২২. গণ্ডূষাদিবিধিরধ্যাযঃ

সর্বাঙ্গসুন্দরী ব্যাখ্যা ( কৃত)

ইদানীং ধূমপানাদনন্তরং গণ্ডূষবিধিরেব যুক্তঃ| তদর্থমাহ

সর্বাঙ্গসুন্দরী ব্যাখ্যা ( কৃত)

স০-গণ্ডূষাদযো বিধীযন্তেঽস্মিন্নিতি গণ্ডূষাদিবিধিঃ| আদিশব্দেন কবলাদিপরিগ্রহঃ|

আযুর্বেদরসাযনম্ ব্যাখ্যা ( কৃত)

আ০ র০-গণ্ডূষাদিবিধিমধ্যাযং ব্যাখ্যাতুং প্রতিজানীতে-অথেতি| গণ্ডূষাদীনি-গণ্ডূষকবলপ্রতিসারণমুখালেপমূর্দ্ধতৈলকর্ণপূরণানি|

সর্বাঙ্গসুন্দরী ব্যাখ্যা ( কৃত)

স০-স্নিগ্ধাদিভেদেন চত্বারঃ প্রকারাঃ-ভেদাঃ, যস্য স চতুষ্প্রকারো গণ্ডূষো ভবতি|

আযুর্বেদরসাযনম্ ব্যাখ্যা ( কৃত)

আ০ র০-গণ্ডূষভেদানাহ-চতুষ্প্রকার ইতি|

সর্বাঙ্গসুন্দরী ব্যাখ্যা ( কৃত)

স০-তত্র-তেষু গণ্ডূষেষু মধ্যে, যথাসঙ্খ্যং পবনপিত্তশ্লেষ্মসু ত্রযঃ স্নিগ্ধাদযো গণ্ডূষা যোজ্যাঃ| তত্র বাতে স্নিগ্ধো গণ্ডূষঃ, পিত্তে শমনঃ, কফে শোধন ইত্যর্থঃ| অন্ত্যো-রোপণাখ্যো ব্রণঘ্নো-ব্রণসাধন উপযুজ্যতে|

আযুর্বেদরসাযনম্ ব্যাখ্যা ( কৃত)

আ০ র০-গণ্ডূষাণাং ভেদেন বিষযমাহ-ত্রযস্তত্রেতি| অন্ত্যো-রোপণঃ| ব্রণঘ্নো-মুখরোগঘ্নঃ|

সর্বাঙ্গসুন্দরী ব্যাখ্যা ( কৃত)

স০- অত্র-এষু গণ্ডূষেষু মধ্যে, স্নিগ্ধো মধুরাদিসাধিতৈঃ স্নেহৈর্ভবতি|

আযুর্বেদরসাযনম্ ব্যাখ্যা ( কৃত)

আ০ র০-স্নিগ্ধস্য দ্রব্যাণ্যাহ-স্নিগ্ধোঽত্রেতি|

সর্বাঙ্গসুন্দরী ব্যাখ্যা ( কৃত)

স০-শমনস্তিক্তাদিভিরৌষধৈঃ-পটোলারিষ্টজম্ব্বাম্রামধুকক্বাথশর্করোদকক্ষৌদ্রাদিভিঃ স্যাত্|

আযুর্বেদরসাযনম্ ব্যাখ্যা ( কৃত)

আ০ র০-শমনস্য দ্রব্যাণ্যাহ-সংশমন ইতি|

সর্বাঙ্গসুন্দরী ব্যাখ্যা ( কৃত)

স০-শোধনো গণ্ডূষস্তিক্তকট্বম্লাদিভিরৌষধৈর্ভবতি|

আযুর্বেদরসাযনম্ ব্যাখ্যা ( কৃত)

আ০ র০-শোধনস্য দ্রব্যাণ্যাহ-শোধন ইতি|

সর্বাঙ্গসুন্দরী ব্যাখ্যা ( কৃত)

স০-রোপণস্তু গণ্ডূষঃ কষাযতিক্তকৈঃ স্যাত্|

আযুর্বেদরসাযনম্ ব্যাখ্যা ( কৃত)

আ০ র০-রোপণস্য দ্রব্যাণ্যাহ-রোপণঃ পুনরিতি|

সর্বাঙ্গসুন্দরী ব্যাখ্যা ( কৃত)

স০-তত্র-তেষু পূর্বোক্তেষু গণ্ডূষেষু মধ্যে, স্নেহাদিকং কল্কৈর্যথাস্বং যুক্তং বিপক্বং বা, যথাস্পর্শং-শীতমুষ্ণং বা, প্রযোজযেত্|

আযুর্বেদরসাযনম্ ব্যাখ্যা ( কৃত)

আ০ র০-গণ্ডূষার্থং দ্রব্যাণ্যাহ-তত্রেতি| স্নেহাদীনি নব যোগ্যতানুসারেণ যথাস্বং কল্কৈঃ সংযোজ্য বিপাচ্য বা শীতান্যুষ্ণানি বা প্রযোজযেত্| উক্তং চ সঙ্গ্রহে (সূ.অ. ৩১)-"তত্র স্বাদ্বম্ললবণোষ্ণৈরৌষধৈঃ সিদ্ধো যুক্তো বা নাত্যুষ্ণঃ স্নেহো মাংসরসস্তিলকল্কোদকং ক্ষীরং বা স্নেহিকঃ| তিক্তকষাযমধুরশীতৈঃ পটোলারিষ্টজম্ব্বাম্রমালতীপল্লবোত্পলমধুকক্বাথসিতোদক ক্ষৌদ্রক্ষীরেক্ষুরসঘৃতাদিভিঃ শমনঃ| কঠ্বম্ললবণোষ্ণৈঃ শিরোবিরেচনাদিদ্রব্যৈঃ শুক্তমদ্যধান্যাম্লমূত্রান্যতমকল্কিতালোডিতৈঃ শোধনঃ|" ইতি|

সর্বাঙ্গসুন্দরী ব্যাখ্যা ( কৃত)

স০-দন্তহর্ষাদৌ কবোষ্ণমথবা শীতং দোষবশাত্ তিলকল্কোদকং হিতম্|

আযুর্বেদরসাযনম্ ব্যাখ্যা ( কৃত)

আ০ র০-দন্তহর্ষাদৌ গণ্ডূষমাহ-দন্তহর্ষ ইতি|

সর্বাঙ্গসুন্দরী ব্যাখ্যা ( কৃত)

স০-গণ্ডূষধারণে নিত্যং তৈলং মাংসরসো বা হিতঃ|

আযুর্বেদরসাযনম্ ব্যাখ্যা ( কৃত)

আ০ র০-স্বস্থে গণ্ডূষমাহ-নিত্যমিতি|

সর্বাঙ্গসুন্দরী ব্যাখ্যা ( কৃত)

স০-ঊষাদিযুক্তে পাকে ক্ষতে চাগন্তুজে, তথা বিষে ক্ষারাগ্নিভ্যাং দগ্ধে চ, সর্পির্গণ্ডূষে হিতং ক্ষীরং বা|

আযুর্বেদরসাযনম্ ব্যাখ্যা ( কৃত)

আ০ র০-ঊষাদাহমুখপাকাদৌ গণ্ডূষমাহ-ঊষাদাহান্বিত ইতি| ঊষা-ক্ষারেণেব| দাহঃ-অগ্নিনেব| পাকাদযো মুখ এব|

সর্বাঙ্গসুন্দরী ব্যাখ্যা ( কৃত)

স০-মাক্ষিকগণ্ডূষধারণং মুখে বৈশদ্যং-অপৈচ্ছিত্যং, জনযতি, মুখব্রণাংশ্চ সন্দধাতি| তথা, দাহং তৃষ্ণাং চ প্রশমযতি|

আযুর্বেদরসাযনম্ ব্যাখ্যা ( কৃত)

আ০ র০-মুখপৈচ্ছিত্যাদৌ গণ্ডূষমাহ-বৈশদ্যমিতি|

সর্বাঙ্গসুন্দরী ব্যাখ্যা ( কৃত)

স০-ধান্যাম্লং গণ্ডূষ উপযুক্তং বদনবৈরস্যং তথা মলং দৌর্গন্ধ্যং চাপনযতি|

আযুর্বেদরসাযনম্ ব্যাখ্যা ( কৃত)

আ০ র০-মুখবৈরস্যাদৌ গণ্ডূষমাহ-ধান্যাম্লমিতি|

সর্বাঙ্গসুন্দরী ব্যাখ্যা ( কৃত)

স০-তদেব-কাঞ্জিকং, অলবণং শীতং পরং-অতিশযেন, আস্যশোষহরম্|

আযুর্বেদরসাযনম্ ব্যাখ্যা ( কৃত)

আ০ র০-মুখশোষে গণ্ডূষমাহ-তদেবেতি| তত্-ধান্যাম্লম্| অর্থাত্ পূর্বং চ লবণোষ্ণম্|

সর্বাঙ্গসুন্দরী ব্যাখ্যা ( কৃত)

স০-ক্ষারেণ-স্বর্জিকাদিনা, যুক্তং জলং কফস্য চযমাশু ভিনত্তি|

আযুর্বেদরসাযনম্ ব্যাখ্যা ( কৃত)

আ০ র০-শ্লেষ্মসঞ্চযে গণ্ডূষমাহ-আশ্বিতি| ক্ষারাম্বু-ক্ষারগালনোদকম্|

সর্বাঙ্গসুন্দরী ব্যাখ্যা ( কৃত)

স০-কোষ্ণপানীযগণ্ডূষৈর্বদনলাঘবং সম্পদ্যতে|

আযুর্বেদরসাযনম্ ব্যাখ্যা ( কৃত)

আ০ র০-মুখগৌরবে গণ্ডূষমাহ-সুখোষ্ণোদকগণ্ডূষৈরিতি|

সর্বাঙ্গসুন্দরী ব্যাখ্যা ( কৃত)

স০-বাতরহিতে রবিকরালোকে স্থানে| স্কন্ধৌ চ কন্ধরা চ স্কন্ধকন্ধরম্| পূর্বং খিন্নং পশ্চান্মৃদিতং স্কন্ধকন্ধরং যস্য স এবম্| তথা গণ্ডূষমপিবন্, তথা কিঞ্চিদুন্নতং মুখং যস্য স এবংবিধঃ সন্, গণ্ডূষং ধারযেত্|

আযুর্বেদরসাযনম্ ব্যাখ্যা ( কৃত)

আ০ র০-গণ্ডূষবিধিমাহ-নিবাত ইতি| সঙ্গ্রহে তু (সূ.অ.৩১)-"সুখোপবিষ্টস্তন্মনাঃ স্বিন্নমৃদিতগলকপোলললাটদেশো বরমধ্যাবরাং ক্রমাদ্বক্ত্রার্ধভাগত্রিভাগচতুর্ভাগপূরণীং দ্রবমাত্রাং কল্কং বা কোলপ্রমাণম্| কবলে তু পর্যাযেণ কপোলৌ কণ্ঠং চ সঞ্চারযেত্| অযমেব কবলগণ্ডূষযোর্বিশেষঃ| পুনশ্চাস্য স্বেদমর্দনান্যাচরেত্| এবমুত্ক্লিষ্টকফো বক্ত্রং প্রতিপদ্যতে|" ইতি|

সর্বাঙ্গসুন্দরী ব্যাখ্যা ( কৃত)

স০-কফেন পূর্ণং কফপূর্ণমাস্যং যস্য স কফপূর্ণাস্যঃ, তস্য ভাবঃ কফপূর্ণাস্যতা,-কফপূর্ণমুখতা, যাবদ্ভবেত্| অথবা স্রবদ্ঘ্রাণাক্ষি যস্য স স্রবদ্ঘ্রাণাক্ষঃ, "বহুব্রীহৌ সক্থ্যক্ষ্ণোঃ" ইতি ষচ্| তস্য ভাবঃ স্রবদ্ঘ্রাণাক্ষতা যাবত্স্যাত্, তাবদ্গণ্ডূষান্ ধারযেত্| এবং গণ্ডূষাঃ পঞ্চ সপ্ত বা ধারযিতব্যাঃ, যাবত্স্বাস্থ্যং স্যাত্|

আযুর্বেদরসাযনম্ ব্যাখ্যা ( কৃত)

আ০ র০-গণ্ডূষধারণাবধিমাহ-কফপূর্ণাস্যতেতি| সঙ্গ্রহে তু (সূ. অ. ৩১)-"ভেষজস্যানুপহতিঃ কফেন| এবং ত্রীন্ পঞ্চ সপ্ত বা গণ্ডূষান্ ধারযেত্| যাবদ্বা সম্যগ্ধূমপীতলিঙ্গোত্পত্তিঃ| তস্য স্বাস্থ্যেন যোগং, জাড্যরসাজ্ঞানারুচিপ্রসেকোপলেপৈরযোগং, মুখশোষপাকক্লমারুচিহৃদযদ্রবস্বরসাদকর্ণনাদৈরতিযোগমুপলক্ষযেত্| তেষাং যথাস্বং প্রতিকুর্বীত|" ইতি|

সর্বাঙ্গসুন্দরী ব্যাখ্যা ( কৃত)

স০-মুখে পূর্ণে সতি যঃ সঞ্চারযিতুমশক্যঃ স্যাত্ স গণ্ডূষ উচ্যতে| অন্যথা-মুখেঽপূর্ণে সতি যঃ সঞ্চারযিতুং শক্যতে, স কবল উচ্যতে|

আযুর্বেদরসাযনম্ ব্যাখ্যা ( কৃত)

আ০ র০-গণ্ডূষকবলযোর্ভেদমাহ-অসঞ্চার্য ইতি| অপূর্ণে-কিঞ্চিদূনে, সঙ্গ্রহে তথৈবোক্তত্বাত্| কবলোঽন্যথা-কপোলৌ কণ্ঠং চ সঞ্চার্যঃ|

সর্বাঙ্গসুন্দরী ব্যাখ্যা ( কৃত)

স০-মন্যাদীনাং রোগেণ সম্বন্ধঃ| প্রসেকাদীনাং দ্বন্দ্বঃ| আমযশব্দস্য কণ্ঠেন সম্বন্ধো বিবিধকণ্ঠরোগসূচনার্থঃ| মন্যারোগাদযো বিশেষেণ কবলধারণেন সাধ্যাঃ-চিকিত্স্যাঃ|

আযুর্বেদরসাযনম্ ব্যাখ্যা ( কৃত)

আ০ র০-কবলস্য বিষযমাহ-মন্যাশির ইতি|

সর্বাঙ্গসুন্দরী ব্যাখ্যা ( কৃত)

স০-কল্কাদিভেদেন প্রতিসারণং ত্রিধা স্যাত্| কল্কো-জলদিপিষ্টঃ| মাক্ষিকাদিনা যদ্রবীক্রিযতে দ্রব্যং সা রসক্রিযা| চূর্ণং তু-প্রথিতমেব|

আযুর্বেদরসাযনম্ ব্যাখ্যা ( কৃত)

আ০ র০-প্রতিসারণমাহ-কল্ক ইতি| রসক্রিযাঅবলেহঃ|

সর্বাঙ্গসুন্দরী ব্যাখ্যা ( কৃত)

স০-তত্-প্রতিসারণং, শ্লেষ্মরোগেষু গণ্ডূষোক্তৈরৌষধৈর্যোজ্যম্| সামান্যোক্তাবপি কফযোগবিষযত্বাত্ শোধনগণ্ডূষোক্তৈরৌষধৈরিতি বেদ্যম্|

আযুর্বেদরসাযনম্ ব্যাখ্যা ( কৃত)

আ০ র০-প্রতিসারণস্য বিষযং দ্রব্যাণি চাহ-যুঞ্জ্যাদিতি| গণ্ডূষবিহিতৈঃ-শোধনগণ্ডূষোক্তৈঃ| প্রতিসারণং-অঙ্গুল্যা ঘর্ষণম্| সঙ্গ্রহে তু (সূ.অ. ৩১)-"তদভিষ্যন্দাধিমন্থগলশুণ্ডিকাদিষু যুক্ত্যা প্রযোজ্যম্| অতিপ্রসারণাদূষাশোষদাহক্লেদশোফাদযো ভবন্তি|" ইতি|

সর্বাঙ্গসুন্দরী ব্যাখ্যা ( কৃত)

স০-মুখালেপস্ত্রিপ্রকারঃ, দোষঘ্নো বিষঘ্নো বর্ণকরশ্চ|

আযুর্বেদরসাযনম্ ব্যাখ্যা ( কৃত)

আ০ র০-মুখালেপভেদানাহ-মুখালেপ ইতি| দোষঘ্নো বিষঘ্নো বর্ণ্যশ্চেতি ত্রিধা|

সর্বাঙ্গসুন্দরী ব্যাখ্যা ( কৃত)

স০-স চ-মুখালেপো, বাতশ্লেষ্মণ্যুষ্ণো হিতঃ| শেষেষু পিত্তে বিষে (বর্ণে) চ, অতিশযেন শিশিরো হিতঃ|

আযুর্বেদরসাযনম্ ব্যাখ্যা ( কৃত)

আ০ র০-বাতঘ্নকফঘ্নাবুষ্ণৌ কার্যাবিত্যাহ-স ইতি| পিত্তঘ্নবিষঘ্নবর্ণ্যাঃ শীতাঃ কার্যা ইত্যাহ-শেষেষ্বিতি|

সর্বাঙ্গসুন্দরী ব্যাখ্যা ( কৃত)

স০-চতুর্ভাগত্রিভাগার্দ্ধাঙ্গুলোন্নতিঃ| উন্নতিঃ-উত্সেধঃ|

আযুর্বেদরসাযনম্ ব্যাখ্যা ( কৃত)

আ০ র০-হীনমধ্যোত্তমভেদেন মুখালেপপ্রমাণমাহ ত্রিপ্রমাণ ইতি|

সর্বাঙ্গসুন্দরী ব্যাখ্যা ( কৃত)

স০-তস্য-মুখালেপস্য, অশুষ্কস্য স্থিতিঃ| শুষ্কস্তু মুখালেপশ্ছবিং-ত্বচং, দূষযতি| তং-মুখালেপং, আর্দ্রযিত্বা-তীমযিত্বা, অপসারযেত্| তস্যান্তে-তস্মিন্নপনীতে, অভ্যঙ্গং কুর্যাত্|

আযুর্বেদরসাযনম্ ব্যাখ্যা ( কৃত)

আ০ র০-মুখালেপাবধিমাহ-অশুষ্কস্যেতি| মুখালেপাপনযমাহ-তমার্দ্রযিত্বেতি|

সর্বাঙ্গসুন্দরী ব্যাখ্যা ( কৃত)

স০-মুখালেপী চ দিবাস্বপ্নাদি বর্জযেত্| অহঃস্বপ্নাদিসেবনাত্ কণ্ডূত্বকূশোষপীনসদৃষ্ট্যুপঘাতাদিভযং স্যাত্|

আযুর্বেদরসাযনম্ ব্যাখ্যা ( কৃত)

আ০ র০-মুখালেপবর্জ্যান্যাহ-বিবর্জযেদিতি| শুক্-শোকঃ|

সর্বাঙ্গসুন্দরী ব্যাখ্যা ( কৃত)

স০-পীনসাদৌ মুখলেপো ন যোজ্যাঃ|

আযুর্বেদরসাযনম্ ব্যাখ্যা ( কৃত)

আ০ র০-পীনসাদৌ মুখালেপং নিষেধতি-ন যোজ্য ইতি|

সর্বাঙ্গসুন্দরী ব্যাখ্যা ( কৃত)

স০-স চ-মুখালেপঃ, সুযোজিতো-বিধিনা সেবিতঃ, অকালপলিতাদীন্ পরাকরোতি|

আযুর্বেদরসাযনম্ ব্যাখ্যা ( কৃত)

আ০ র০-মুখালেপস্য ফলমাহ-স ত্বিতি| নীলিকালিঙ্গনাশোপদ্রবঃ|

সর্বাঙ্গসুন্দরী ব্যাখ্যা ( কৃত)

স০-কোলমজ্জাদযোঽর্দ্ধশ্লোকোক্তাঃ ষট্ মুখালেপাঃ ষট্সু হেমান্তাদিষু ৠতুষু স্মৃতাঃ| মুনীন্দ্রৈরিতি শেষঃ| তত্র বদরমজ্জাদযো হেমন্তে, ব্যাঘ্র্যাদযঃ শিশিরে, দর্ভমূলাদযো বসন্তে, কুমুদাদযো গ্রীষ্মে, কালীযকাদযঃ প্রাবৃষি, তালীসাদযঃ শরদি, ইতি|

আযুর্বেদরসাযনম্ ব্যাখ্যা ( কৃত)

আ০ র০-বর্ণ্যস্য মুখালেপস্য তু ভেদেন দ্রব্যাণ্যাহ-কোলমজ্জেতি| শাবরং-লোধ্রম্| তন্দুলাঃ-শালীনাম্| কালীযকং-পীতচন্দনম্|

সর্বাঙ্গসুন্দরী ব্যাখ্যা ( কৃত)

স০-মুখালেপাভ্যাসবতাং নরাণাং দর্শনং-দৃষ্টিঃ, দৃঢং স্যাত্| মুখং চ বিকসিতমিব তথা কোমলং পদ্মতুল্যং ভবতি-জাযতে|

আযুর্বেদরসাযনম্ ব্যাখ্যা ( কৃত)

আ০ র০-বর্ণ্যমুখালেপশীলনস্য ফলমাহ-মুখালেপনশীলানামিতি|

সর্বাঙ্গসুন্দরী ব্যাখ্যা ( কৃত)

স০-অভ্যঙ্গাদিভেদাত্ চতুর্ধা শিরসি তৈলং স্যাত্|

আযুর্বেদরসাযনম্ ব্যাখ্যা ( কৃত)

আ০ র০-মূর্দ্ধতৈলভেদানাহ-অভ্যঙ্গেতি|

সর্বাঙ্গসুন্দরী ব্যাখ্যা ( কৃত)

স০-তচ্চোত্তরোত্তরং বহুগুণং বিদ্যাত্| অভ্যঙ্ঘাত্ সেকো বহুগুণাঃ, ততোঽপি পিচুঃ, তস্মাদপি বস্তিঃ, ইতি ক্রমেণ|

আযুর্বেদরসাযনম্ ব্যাখ্যা ( কৃত)

আ০ র০-অভ্যঙ্গাদীনাং তারতম্যমাহ-বহুগুণমিতি|

সর্বাঙ্গসুন্দরী ব্যাখ্যা ( কৃত)

স০-তত্র-তেষু মধ্যে, রৌক্ষ্যাদীষ্বভ্যঙ্গঃ প্রযোজ্যঃ|

আযুর্বেদরসাযনম্ ব্যাখ্যা ( কৃত)

আ০ র০-অভ্যঙ্গস্য বিষযমাহ-তত্রাভ্যঙ্গ ইতি|

সর্বাঙ্গসুন্দরী ব্যাখ্যা ( কৃত)

স০-অরূংষিকাদিষু পরিষেকঃ|

আযুর্বেদরসাযনম্ ব্যাখ্যা ( কৃত)

আ০ র০-সেকস্য বিষযমাহ-অরুংপিকেতি|

সর্বাঙ্গসুন্দরী ব্যাখ্যা ( কৃত)

স০-কেশশাতাদিষু পিচুঃ প্রযোক্তব্যঃ|

আযুর্বেদরসাযনম্ ব্যাখ্যা ( কৃত)

আ০ র০-পিচোর্বিষযমাহ-পিচুরিতি| শাতঃ-সদনম্| ধূপনং-ধূমোদ্গম ইব| পিচুঃ-স্নেহার্দ্রপিচুধারণম্|

সর্বাঙ্গসুন্দরী ব্যাখ্যা ( কৃত)

স০-বস্তিঃ পুনঃ প্রসুপ্ত্যাদৌ যোজ্যঃ|

আযুর্বেদরসাযনম্ ব্যাখ্যা ( কৃত)

আ০ র০-বস্তের্বিষযমাহ-বস্তিরিতি| প্রসুপ্তিঃ-স্পর্শাজ্ঞানম্| জাগরো-নিদ্রানাশঃ| দারুণে-তীব্রে|

সর্বাঙ্গসুন্দরী ব্যাখ্যা ( কৃত)

স০-তস্য-শিরোবস্তের্বিধানমুচ্যতে| নিষণ্ণস্য-উপবিষ্টস্য নরস্য| ক্ব ? পীঠে জানুতুল্যে, তথা মৃদৌ-অকঠিনে| কিম্ভূতস্য নরস্য ? শুদ্ধো-বমনাদিনা, অক্তঃ-তৈলাদিনা, খিন্নঃ-খেদেন, দেহো যস্য তস্য শুদ্ধাক্তখিন্নদেহস্য| কদা ? দিনান্তে,-অপরাহ্নে বিভাবর্যাং বা| চর্মপট্টং-গব্যং মাহিষং বা, তথা দ্বাদশাঙ্গুলবিস্তীর্ণং, তথা শিরস্তুল্যং, তথাঽঽকর্ণং-যাবত্, বন্ধনস্থানং যস্য, তদেবংবিধং চর্মপট্টং চৈলবেণিকযা সংযম্য মাষকল্কেন লেপযেত্| কদা ? ললাটে বস্ত্রবেষ্টিতে| সঙ্গ্রহে তূক্তম্ (সূ.অ.৩১)-"অথ শুদ্ধতনোঃ সাযং রাত্রৌ বা নিবাতস্থস্য স্বভ্যক্তখিন্নস্য সোপাশ্রযাসনোপবিষ্টস্য কেশান্তে শ্লক্ষ্ণং ত্র্যঙ্গুলং মাষপিষ্টেন সুসূক্ষ্মেণ সদ্যঃ সুখাম্বুনা মৃদিতেনোভযতঃ প্রদিগ্ধং বস্ত্রপট্টং বধ্নীযাত্| ততস্তস্যোপরি সন্ধায বস্তিমাকর্ণং বস্তিমূলং চ দৃঢমবলীকং সমং চৈলবেণিকযা বদ্ধ্বা পুনর্মাষপিষ্টেনাপরিস্ত্রাবি কৃত্বা যথাব্যাধিদোষদূষ্যহিতং সিদ্ধমন্যতমং স্নেহং সুখোষ্ণমাসেচযেত্|" ইতি| তত এবং কৃতে সতি ব্যাধিবশেন পক্বং স্নেহং কোষ্ণমুপরিচ্চিদ্রেণাবসেচযেত্| কেশভূমেরুপরিষ্টাদঙ্গুলং যাবত্|

আযুর্বেদরসাযনম্ ব্যাখ্যা ( কৃত)

আ০ র০-শিরোবস্তিবিধিমাহ-বিধিস্তস্যেতি| ললাটশব্দেন কেশরহিতঃ প্রদেশঃ, তস্মিন্ বস্ত্রবেষ্টিতে| আকর্ণং-কর্ণাদধো ন বেষ্টযেদিত্যর্থঃ, আবন্ধনস্থানং-যাবতি প্রদেশে বস্তের্বন্ধনং তাবন্তং প্রদেশং বেষ্টযেত্| শিরঃসমং-শিরঃপরিধিমিত্যর্থঃ| বেষ্টনবস্ত্রমপ্যুভযতো মাষকল্কেন লেপযেত্| উক্তং হি সঙ্গ্রহে (সূ.অ. ৩১)-"কেশান্তেশ্লক্ষ্ণং ত্র্যঙ্গুলং সুপূক্ষ্মেণ মাষপিষ্টেন সদ্যঃ সুখাম্বুমৃদিতেনোভযতঃ প্রদিগ্ধং বস্ত্রপট্টং বধ্নীযাত্|" ইতি|

সর্বাঙ্গসুন্দরী ব্যাখ্যা ( কৃত)

স০-তং চ-স্নেহ, যাবদ্বক্ত্রনাসিকাস্রুতিঃ স্যাত্তাবদ্ধারযেত্| চল আদির্যেষাং তে চলাদযঃ, তেষু যথাসঙ্হ্খ্যং দশাষ্টৌ ষট্ মাত্রাসহস্রাণি যাবত্স্নেহং ধারযেত্| বাতে দশ মাত্রাসহস্রাণি, পিত্তেঽষ্টৌ মাত্রাসহস্রাণি, কফে ষণ্মাত্রাসহস্রাণীত্যর্থঃ| অরুজে তু-স্বস্থবৃতে, একং মাত্রাসহস্রং ধারযেত্|

আযুর্বেদরসাযনম্ ব্যাখ্যা ( কৃত)

আ০ র০-বস্তিধারণাবধিমাহ-ধারযেদিতি| অরুজেত্বেকং মাত্রাসহস্রম্| মাত্রামানং ক্লেদাসম্ভবে| ক্লেদে ত্বর্বাগপি নিবর্ততে|

সর্বাঙ্গসুন্দরী ব্যাখ্যা ( কৃত)

স০-মুক্তস্নেহস্য-অপনীতশিরোবস্তেঃ, স্কন্ধশিরোগ্রীবাদি মর্দযেত্| স্নেহবস্তির্হি স্নেহশব্দেনাত্র গৃহ্যতে| ততঃ "উষ্ণোদকোপচারী স্যাত্ " ইত্যাদিকমাচরেত্| তত্র হ্যবোচত্ (হৃ.সূ.অ.১৬|২৮)-"সর্বকর্মস্বযং প্রাযো ব্যাধিক্ষীণেষু চ ক্রমঃ|" ইতি|

আযুর্বেদরসাযনম্ ব্যাখ্যা ( কৃত)

আ০ র০-বস্ত্যন্তে কৃত্যমাহ-স্কন্ধাদীতি|

সর্বাঙ্গসুন্দরী ব্যাখ্যা ( কৃত)

স০-তস্য চ-স্নেহবস্তেঃ, পরমঃ সেকঃ সপ্ত দিনানি| তস্মাত্ত্রীণি পঞ্চ সপ্ত বাঽহানি কার্যঃ শিরোবস্তিরিত্যবতিষ্ঠতে|

আযুর্বেদরসাযনম্ ব্যাখ্যা ( কৃত)

আ০ র০-বস্ত্যাবৃত্ত্যবধিমাহ-পরমমিতি| সঙ্গ্রহে তু (সূ.অ. ৩১)-"উষ্ণাম্বুনা স্নাতং চ যথার্হং ভোজযেত্| স্নেহোক্তং চাস্যাচারমাদিশেত্| এবং ত্রীণি পঞ্চ সপ্ত বা দিনানি যোজযেদিতি|" তথা (সং.সূ.অ. ৩১)-"সাপাশ্রযং পীঠং, সাযং রাত্রির্বা কালঃ, বেদনোপশমো বাঽবধিঃ|" ইতি|

সর্বাঙ্গসুন্দরী ব্যাখ্যা ( কৃত)

স০-কর্ণে পূরণং ধারযেত্| কিং কুর্বন্ ? কর্ণমূলং বিমর্দযন্| কিযন্তং কালম্ ? যাবত্পীডাযা মার্দবং ভবেত্| স্বস্থবৃতে তু মাত্রাশতং যাবদ্বিভৃযাত্|

আযুর্বেদরসাযনম্ ব্যাখ্যা ( কৃত)

আ০ র০-কর্ণপূরণে বিধিং মানং চাহ-ধারযেদিতি|

সর্বাঙ্গসুন্দরী ব্যাখ্যা ( কৃত)

স০-দক্ষিণং হস্তাগ্রং কর্তৃ যাবত্ দক্ষিণং জানুমণ্ডলং পর্যেতি-পরিবর্ততে| দক্ষিণশব্দোঽত্র কাকাক্ষিগোলকন্যাযেন দ্বযোরপি যুজ্যতে| কিযত্কালেন ? ইত্যাহ-নিমেষোন্মেষমাত্রেণ সমং,-ন তু বিশ্রম্য| সা মাত্রা স্মৃতেতি| মুনিভিরিতি শেষঃ|

আযুর্বেদরসাযনম্ ব্যাখ্যা ( কৃত)

আ০ র০-মাত্রালক্ষণমাহ-যাবদিতি|

সর্বাঙ্গসুন্দরী ব্যাখ্যা ( কৃত)

স০-কচানাং সদনাদিভিঃ সম্বন্ধঃ| পরিফুটনং-কচানামেব, প্রকৃতত্বাত্| শিরসো মরুদামযাংশ্চ হন্তি| ইন্দ্রিযাণাং-চক্ষুরাদীনাং, প্রসাদং জনযতি| তথা, স্বরাদিবলং চ মূর্দ্ধতৈলং জনযতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিটযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে গণ্ডূষাদিবিধির্নাম দ্বাবিংশতিতমোঽধ্যাযঃ সমাপ্তঃ|| ২২||

আযুর্বেদরসাযনম্ ব্যাখ্যা ( কৃত)

আ০ র০-মূর্দ্ধতৈলশীলনস্য ফলমাহ-কচসদনেতি| ইতি হেমাদ্রিটীকাযামাযুর্বেদরসাযনে| গণ্ডূষাদিপ্রকরণং সামস্ত্যেন নিরূপিতম্|| ২২||