৩০. শকুনীপ্রতিষেধাধ্যাযঃ

স্কন্দাপস্মারপ্রতিষেধানন্তরং শকুনীপ্রতিষেধারম্ভঃ, স্কন্দাদিগ্রহপ্রতিপাদকসূত্রেঽস্যা এবানন্তরোক্তত্বাদিত্যাহ- অথাত ইত্যাদি||১-২||

শকুনীত্যাদি| অভিপরীতস্য ব্যাপ্তস্য, ‘বালস্য’ ইতি শেষঃ| জানতা বুদ্ধিমতা| নিষ্ক্বাথঃ পরিষেচনে কার্য ইতি সম্বন্ধঃ||৩||

কষাযেত্যাদি| কষাযা বটাদযঃ, মধুরাণি কাকোল্যাদীনি; তত্র বটাদীনাং কষাযঃ, কাকোল্যাদীনাং চ কল্কঃ, তাভ্যাং তৈলং সাধ্যং; প্রত্যেকং বটাদীনাং কাকোল্যাদীনাং চ কল্ককষাযৌ কল্পনীযাবিত্যন্যে|৪|-

মধুকেত্যাদি| উত্পলং নীলোত্পলম্| প্রদিহেত্ লিম্পেত্||৪||-

ব্রণেষ্বিত্যাদি| ব্রণেষু শকুনীজুষ্টবালকব্রণেষু| উক্তানি চূর্ণানি দ্বিব্রণীযাধ্যাযে কীর্তিতানি মিশ্রকোক্তানি চ শোধনরোপণানি| পথ্যানি ব্রণিতোপাসনীযোক্তানি শালিমুদ্গদাডিমসৈন্ধবযবপটোলাদীনি; অন্যে তু পথ্যানীতি চূর্ণানীত্যস্য বিশেষণং কুর্বন্তি, তত্র শকুনীজুষ্টবালকব্রণানাং সদাহপাকরক্তস্রাবহরাণি চূর্ণানি প্রযোক্তব্যানীতি সম্বন্ধনীযম্||৫||

স্কন্দেত্যাদি| ধূপনানি সর্ষপা ইত্যাদীনি স্কন্দগ্রহোক্তানি, তানীহাপি শকুন্যমপি প্রযোজযেত্|৬|-

শতাবরীত্যাদি| মৃগৈর্বারুঃ ইন্দ্রবারুণী, নাগদন্তী দন্তিনী, সহদেবা পীতপুষ্পা বলা, বৃহতী স্থূলফলা||৬||-

তিলেত্যাদি| এষ তিলতণ্ডুলকমিত্যাদিকো বলিঃ| করঞ্জেষু নক্তমালেষু| নিযতাত্মনা সংযতেন্দ্রিযেণ ‘করঞ্জেষু’ ইত্যত্রান্যে ‘নিকুঞ্জেষু’ ইতি পঠন্তি, নিকুঞ্জেষু বনেষু||৭||-

নিষ্কুটে ইত্যাদি| নিষ্কুটে গৃহোপবনে, অন্যে নিষ্কুটং বনগহনমাহুঃ| যথাবিধীতি স্কন্দগ্রহোক্তো বিধিঃ; তেন শালিযবরচিতমণ্ডলে গাযত্র্যভিমন্ত্রতেন জলেন স্নানমিতি লভ্যতে||৮||

স্কন্দেত্যাদি| ঘৃতং দেবদারুণি রাস্নাযামিত্যাদিকং, চকারোঽত্র সোমবল্লযাদীনামপি ধারণং সমুচ্চিনোতি| জেজ্জটস্তু স্কন্দগ্রহে ধূপনানীত্যাদিকধূপনপাঠান্তে ইদং ঘৃতং পঠতি|৯|-

কুর্যাদিত্যাদি| কুসুমৈঃ শুভৈরিতি জাতীপুষ্পনীলোত্পলাদিভিঃ||৯||

বালকরক্ষামাহ- অন্তরীক্ষেত্যাদি||১০-১১||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে কৌমারভৃত্যতন্ত্রে শকুনীপ্রতিষেধো নাম ত্রিংশত্তমোঽধ্যাযঃ||৩০||