Adhikarana ১ (১-২) · Śloka ২
অথাতঃ প্রভাষণীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातः प्रभाषणीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অধীতশাস্ত্রস্য পুনরর্থতো ব্যাখ্যানং প্রভাষণং, তদধিকৃত্য কৃতোঽধ্যাযঃ প্রভাষণীযঃ||১-২||
Adhikarana ২ (৩-৪) · Śloka ৪
অধিগতমপ্যধ্যযনমপ্রভাষিতমর্থতঃ খরস্য চন্দনভার ইব কেবলং পরিশ্রমকরং ভবতি ||৩|| ভবতি চাত্র- যথা খরশ্চন্দনভারবাহী ভারস্য বেত্তা ন তু চন্দনস্য | এবং হি শাস্ত্রাণি বহূন্যধীত্য চার্থেষু মূঢাঃ খরবদ্বহন্তি ||৪||
अधिगतमप्यध्ययनमप्रभाषितमर्थतः खरस्य चन्दनभार इव केवलं परिश्रमकरं भवति ||३|| भवति चात्र- यथा खरश्चन्दनभारवाही भारस्य वेत्ता न तु चन्दनस्य | एवं हि शास्त्राणि बहून्यधीत्य चार्थेषु मूढाः खरवद्वहन्ति ||४||
🔊 Audio coming soon
ইদানীং প্রভাষণস্য প্রযোজনং দর্শযিতুমাহ- অধিগতমিত্যাদি| এতেনৈতদুক্তং- সগুণমপি চন্দনং বোঢুর্গর্দভস্য তদ্গুণানজানতঃ কেবলং যথা ভারো ভবতি, তদ্বদধীতমপি শাস্ত্রমর্থদ্বারেণাপ্রভাষিতং তদধ্যেতুঃ পুরুষস্য কেবলং পরিশ্রমকরং ভবতীত্যর্থঃ| অন্যে তু ‘অপ্রভাষিতং’ ইত্যত্র ‘অননুভাষিতং’ ইতি পঠন্তি, ব্যাখ্যানযন্তি চ- অনুশব্দঃ পশ্চাদর্থঃ; তেনাধ্যযনস্যানু পশ্চাদর্থতঃ প্রকর্ষেণ ভাষণমনুভাষণং, ন কথমপি প্রথমম্| অর্থেষু মূঢা অজ্ঞানাদ্ গর্দভবচ্ছাস্ত্রং বহন্তি||৩-৪||
Adhikarana ৩ (৫) · Śloka ৫
তস্মাত্ সবিংশমধ্যাযশতমনুপদপাদশ্লোকমনুবর্ণযিতব্যমনুশ্রোতব্যং চ; কস্মাত্? সূক্ষ্মা হি দ্রব্যরসগুণবীর্যবিপাকদোষধাতুমলাশযমর্মসিরাস্নাযুসন্ধ্যস্থিগর্ভসম্ভবদ্রব্যসমূহবিভাগাস্তথা প্রনষ্টশল্যোদ্ধরণব্রণবিনিশ্চযভগ্নবিকল্পাঃ সাধ্যযাপ্যপ্রত্যাখ্যেযতা চ বিকারাণামেবমাদযশ্চান্যে বিশেষাঃ সহস্রশো যে বিচিন্ত্যমানা বিমলবিপুলবুদ্ধেরপি বুদ্ধিমাকুলীকুর্যুঃ কিং পুনরল্পবুদ্ধেঃ, তস্মাদবশ্যমনুপদপাদশ্লোকমনুবর্ণযিতব্যমনুশ্রোতব্যং চ ||৫||
तस्मात् सविंशमध्यायशतमनुपदपादश्लोकमनुवर्णयितव्यमनुश्रोतव्यं च; कस्मात्? सूक्ष्मा हि द्रव्यरसगुणवीर्यविपाकदोषधातुमलाशयमर्मसिरास्नायुसन्ध्यस्थिगर्भसम्भवद्रव्यसमूहविभागास्तथा प्रनष्टशल्योद्धरणव्रणविनिश्चयभग्नविकल्पाः साध्ययाप्यप्रत्याख्येयता च विकाराणामेवमादयश्चान्ये विशेषाः सहस्रशो ये विचिन्त्यमाना विमलविपुलबुद्धेरपि बुद्धिमाकुलीकुर्युः किं पुनरल्पबुद्धेः, तस्मादवश्यमनुपदपादश्लोकमनुवर्णयितव्यमनुश्रोतव्यं च ||५||
🔊 Audio coming soon
তস্মাদিত্যাদি| সবিংশমধ্যাযশতং সহোত্তরতন্ত্রেণ বিংশত্যধিকমধ্যাযশতম্| অনুপদপাদশ্লোকম্ অনুশব্দো বীপ্সার্থঃ, তেনাযমর্থঃ- পদং পদং পাদং পাদং শ্লোকং শ্লোকমনুবর্ণযিতব্যমাচার্যেণ ব্যাখ্যাতব্যমিত্যর্থঃ| হিশব্দো যস্মাদর্থে, যস্মাত্ সূক্ষ্মা দ্রব্যাদিবিভাগাস্তস্মাদনুবর্ণযিতব্যমিতি পিণ্ডার্থঃ| তত্র, দ্রব্যং স্থাবরাদি; রসাঃ ষণ্মধুরাদযঃ; গুণা গুর্বাদযঃ; বীর্যং শীতোষ্ণং দ্বিবিধমষ্টবিধং বা; দ্বৌ বিপাকৌ মধুরকটূ; দোষা বাতাদযঃ; ধাতবো রসাদযঃ, ধাতুগ্রহণাত্ স্তন্যার্তবলসীকাবসাদযশ্চোপধাতবো গৃহ্যন্তে; দ্বৌ মলৌ শকৃন্মূত্রে, অন্যে তু সপ্ত মলানাচক্ষতে, তত্র দ্বৌ পূর্বোক্তৌ, পঞ্চানাং চেন্দ্রিযাধিষ্ঠানানাং পঞ্চ, তথাহি- দূষিকাসিংহান(সিঙ্ঘাণ)ককর্ণগূথরোমকূপপ্রজননমলাশ্চেতি, মলাঃ পুরীষাদযো ধাতুমলাশ্চেত্যেকে, আশযাঃ সপ্ত শারীরোক্তা বাতাদীনাং, স্ত্রীণামষ্টমো গর্ভাশযঃ; সপ্তোত্তরং মর্মশতং; সপ্ত সিরাশতানি; নব স্নাযুশতানি; সন্ধযো দশোত্তরে দ্বে শতে; অস্থীনি শতানি ত্রীণি; আশযাদীনাং ব্যক্তিং শারীরে বক্ষ্যতি; গর্ভসম্ভবদ্রব্যাণি শুক্রশোণিতাদীনি, আত্মপঞ্চমহাভূতমনাংসীত্যন্যে; সমূহঃ সঙ্ঘাতঃ, এতেষাং বিভাগা ভেদাঃ| যস্মাত্ সূক্ষ্মা ইতি হেতুপদং সর্বত্র সম্বধ্যতে| তথা প্রনষ্টশল্যোদ্ধরণাদিবিকল্পা ইতি প্রনষ্টশল্যং ত্বগাদিষু নিলীনং; ব্রণবিনিশ্চযো বাতাদিভেদেন শুদ্ধ্যা চ ষোডশবিধঃ; ভগ্নং সঙ্ক্ষেপেণ দ্বিবিধং- সন্ধিমুক্তং, কাণ্ডভগ্নং চ; প্রনষ্টশল্যোদ্ধরণাদিভিঃ সহ বিকল্পশব্দঃ প্রত্যেকং সম্বধ্যতে; বিকল্পাঃ ভেদাঃ| সাধ্যযাপ্যপ্রত্যাখ্যেযতা চ বিকারাণামিতি অত্র চশব্দাত্ সুখসাধ্যতা কৃচ্ছ্রসাধ্যতা চ গৃহ্যতে| কিমেত এব পরং সূক্ষ্মা ইত্যনুক্তং গৃহ্ণন্নাহ- এবমাদযশ্চান্যে বিশেষা ইতি| আদিশব্দঃ প্রকারবাচী, তেন এবম্প্রকারাশ্চান্যে বিশেষাঃ সূক্ষ্মা ইতি প্রকারবাচিনা আদিশব্দেন দ্যোত্যন্তে , তে চ শস্ত্রকর্মণামষ্টবিধতাদযো ভেদাঃ| সহস্রশো যে বিচিন্ত্যমানা ইতি সহস্রশঃ সহস্রবারান্, যে ইতি দ্রব্যাদীনাং ভেদাঃ, বিচিন্ত্যমানা ‘গুরুং বিনা’ ইতি শেষঃ| বিমলবিপুলবুদ্ধেরপীতি বিমলা বুদ্ধির্মিথ্যাসংশযজ্ঞানবর্জিতা| ইত্থম্ভূতস্যাপি পুরুষস্য বুদ্ধিং ব্যাকুলীকুর্যুঃ, অল্পবুদ্ধেস্তু কা কথা| ‘সহস্রশো যেঽনুচিন্ত্যমানা’ ইত্যন্যে পঠন্তি, ব্যাখ্যানযন্তি চ- শ্রুতস্য পশ্চাদপি চিন্ত্যমানাঃ, কিং পুনরশ্রুতা ইত্যনুশব্দার্থঃ| অনুপদপাদেত্যাদিপুনরুক্তিঃ শাস্ত্রস্য বিষমত্বখ্যাপনায||৫||
Adhikarana ৪ (৬) · Śloka ৬
অন্যশাস্ত্রোপপন্নানাং চার্থানামিহোপনীতানামর্থবশাত্তেষাং তদ্বিদ্যেভ্য এব ব্যাখ্যানমনুশ্রোতব্যং, কস্মাত্? ন হ্যেকস্মিন্ শাস্ত্রে শক্যঃ সর্বশাস্ত্রাণামবরোধঃ কর্তুম্ ||৬||
अन्यशास्त्रोपपन्नानां चार्थानामिहोपनीतानामर्थवशात्तेषां तद्विद्येभ्य एव व्याख्यानमनुश्रोतव्यं, कस्मात्? न ह्येकस्मिन् शास्त्रे शक्यः सर्वशास्त्राणामवरोधः कर्तुम् ||६||
🔊 Audio coming soon
ইদানীমন্যশাস্ত্রোপপন্নানামর্থানাং শিষ্যহিতত্বেন বিজ্ঞানোপাযমাহ- অন্যশাস্ত্রোপপন্নানামিত্যাদি|- অন্যশাস্ত্রাণি ব্যাকরণসাঙ্খ্যবৈশেষিকজ্যোতিঃশাস্ত্রাদীনি; অন্যশাস্ত্রাণি কাযচিকিত্সাদীনিত্যন্যে| উপপন্না নিবদ্ধাঃ| ইহোপনীতানাম্ অত্রানীতানাম্| অর্থবশাত্ প্রযোজনাধীনত্বাত্| তেষামিতি অর্থানাম্| তদ্বিদ্যেভ্যঃ ব্যাকরণাদিবিদ্যেভ্যঃ | ‘অন্যশাস্ত্রোপপন্নানাং’- ইত্যত্র ‘অন্যশাস্ত্রবিষযোপপন্নানাং’- ইতি কেচিত্ পঠন্তি; ‘ইহোপনীতানাং’- ইত্যত্র চ ‘ইহোপপতিতানাং’- ইতি| ন হীতি হিশব্দো যস্মাদর্থে||৬||
Adhikarana ৫ (৭) · Śloka ৭
ভবন্তি চাত্র- একং শাস্ত্রমধীযানো ন বিদ্যাচ্ছাস্ত্রনিশ্চযম্ | তস্মাদ্বহুশ্রুতঃ শাস্ত্রং বিজানীযাচ্চিকিত্সকঃ ||৭||
भवन्ति चात्र- एकं शास्त्रमधीयानो न विद्याच्छास्त्रनिश्चयम् | तस्माद्बहुश्रुतः शास्त्रं विजानीयाच्चिकित्सकः ||७||
🔊 Audio coming soon
অমুমেবার্থং শ্লোকেন স্পষ্টীকর্তুমাহ- একমিত্যাদি| নহ্যবহুশ্রুতোঽত্র সঙ্ক্ষিপ্তানপ্যর্থান্ বীজভূতানন্যশাস্ত্রাসংস্কারাদনাযাসেনাবগচ্ছতি||৭||
Adhikarana ৬ (৮) · Śloka ৮
শাস্ত্রং গুরুমুখোদ্গীর্ণমাদাযোপাস্য চাসকৃত্ | যঃ কর্ম কুরুতে বৈদ্যঃ স বৈদ্যোঽন্যে তু তস্করাঃ ||৮||
शास्त्रं गुरुमुखोद्गीर्णमादायोपास्य चासकृत् | यः कर्म कुरुते वैद्यः स वैद्योऽन्ये तु तस्कराः ||८||
🔊 Audio coming soon
ন কথঞ্চিদনধীতশাস্ত্রো বহুশ্রুতমাত্রেণৈব বৈদ্যো ভবতি; কথং ন ভবতীতি দর্শযন্নাহ- শাস্ত্রং গুরুমুখোদ্গীর্ণমিত্যাদি| রোগান্ শাস্তীতি উপবেদোঽপি শাস্ত্রমুচ্যতে, আযুরারোগ্যদানেন ধর্মার্থকামাদীনাং শাসনাদ্বা শাস্ত্রং, মরণাত্ত্রাযত ইতি বা শাস্ত্রম্| উদ্গীর্ণম্ উপদিষ্টম্| আদায গৃহীত্বা, নহ্যাদানমাত্রেণ গৃহীতং, কিন্তু উপাস্য চ পাঠতোঽর্থতশ্চাভ্যস্য| অসকৃত্ অনেকবারম্| অন্যে তু তস্করা ইতি অন্যে পুনর্বৈদ্যাস্তস্করাশ্চৌরাঃ; কস্মাত্? ব্যাধিতেভ্যো বৈদ্যচ্ছদ্মনা বিত্তাপহরণাত্, প্রাণহন্তৃত্বাচ্চ||৮||
Adhikarana ৭ (৯) · Śloka ৯
ঔপধেনবমৌরভ্রং সৌশ্রুতং পৌষ্কলাবতম্ | শেষাণাং শল্যতন্ত্রাণাং মূলান্যেতানি নির্দিশেত্ ||৯||
औपधेनवमौरभ्रं सौश्रुतं पौष्कलावतम् | शेषाणां शल्यतन्त्राणां मूलान्येतानि निर्दिशेत् ||९||
🔊 Audio coming soon
অন্যশাস্ত্রোপপন্নার্থবিজ্ঞানোপাযমভিধায স্বশাস্ত্রোপপন্নানামর্থানাং মিথ্যাজ্ঞানে সম্যগ্জ্ঞানার্থং সমানতন্ত্রাণি দর্শযিতুমাহ- ঔপধেনবমিত্যাদি| এতৈশ্চতুর্ভিরৌপধেনবাদিভিঃ সমানতন্ত্রৈঃ স্বকীযশাস্ত্রার্থানাং মিথ্যাজ্ঞানসংশযজ্ঞানানি স্ফোটনীযানি| অন্যে তু গুরোরেব প্রভাষণস্য মিথ্যাজ্ঞানাদয ঔপধেনবাদিশাস্ত্রৈর্নিবর্তন্ত ইতি ব্যাখ্যানযন্তি| এতেনৈতদুক্তং- ঔপধেনবাদিশাস্ত্রৈর্নিবৃত্তমিথ্যাজ্ঞানাদিনা গুরুণা প্রভাষণং কর্তব্যমিতি| যদ্যপি গুরুমুখাদেব শিষ্যস্য মিথ্যাজ্ঞানাদযো নিবৃত্তাঃ তথাঽপ্যাগমান্তরপ্রত্যযার্থমৌপধেনবাদিশাস্ত্রাণি নির্দিষ্টানি| এতান্যেব পরতন্ত্রাণ্যাগমান্তরপ্রত্যযার্থং কুত ইত্যাহ- শেষাণাং শল্যতন্ত্রাণামিত্যাদি| শেষাণাং করবীর্য(র)গোপুররক্ষিতপ্রভৃতিপ্রণীতশল্যতন্ত্রাণাং, প্রত্যযে তু প্রত্যযো ন ভবতি, কস্মাত্? তেষাং তন্ত্রাণামেতন্মূলত্বাত্| অন্যে তু শেষাণাং করবীর্যাদিপ্রণীতানাং শল্যতন্ত্রাণাং মধ্যে ঔপধেনবাদিতন্ত্রাণি সুব্যাখ্যাতত্বেন মূলানি প্রধানানীতি ব্যাখ্যানযন্তি||৯||
Adhikarana পুষ্পিকা · Śloka ৪
ইতি সুশ্রুতসংহিতাযাং সূত্রস্থানে প্রভাষণীযো নাম চতুর্থোঽধ্যাযঃ ||৪||
इति सुश्रुतसंहितायां सूत्रस्थाने प्रभाषणीयो नाम चतुर्थोऽध्यायः ||४||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে প্রভাষণীযো নাম চতুর্থোঽধ্যাযঃ||৪||