৪৫. দ্রবদ্রব্যবিধ্যধ্যাযঃ

অথাত ইত্যাদি| দ্রবদ্রব্যাণি পানীযক্ষীরাদীনি, তেষাং বিধির্বিধানং ভেদ ইত্যর্থঃ||১-২||

পানীযমিত্যাদি| অন্তরীক্ষাদাগতমান্তরীক্ষং, ন পুনস্তত্র ভবং; কুতঃ? মেঘজত্বাত্; তত্র জাতং চেত্যেকে| অনির্দেশরসম্ অব্যক্তরসমপ্রকটরসমিত্যর্থঃ, অত্যল্পরসত্বাত্; ন পুনস্তস্য রসো নাস্তি| অমৃতমিতি অমৃতমিবেত্যর্থঃ, অমৃতত্বং পুনরস্য দোষপ্রকোপস্যাকরণাত্; ‘অমৃতং ব্রহ্মরূপম্’ ইত্যন্যে| জীবনং প্রাণধারণং, ‘সৌম্যধাতুবৃদ্ধিকরম্’ ইতি কেচিত্, ‘ওজোবৃদ্ধিকরম্’ ইত্যন্যে| তর্পণং তৃপ্তিজনকম্| ধারণমিতি শস্ত্রপাতাদিব্যথাসু মূর্চ্ছতাং শরীরং দধাতীতি ধারণম্| আশ্বাসজননমিতি মার্গাদিশুষ্কদেহানাং প্রাণজননম্| শ্রমেত্যাদি প্রশমনশব্দঃ শ্রমাদিভিঃ সহ প্রত্যেকমভিসম্বধ্যতে, শ্রমাদীনাং প্রশমনমিত্যর্থঃ; বহ্বাযাসকৃতং কষ্টং শ্রমঃ; অল্পাযাসকৃতঃ শ্রম এব ক্লমঃ; মদঃ পূগফলেনেব মত্ততা, স চ বিষমদ্যশোণিতোত্থো বিকারঃ; তন্দ্রানিদ্রযোঃ কফবাতকৃতযোরপি প্রশমনং স্পর্শেন, যা তু স্বাভাবিকী নিদ্রা তাং করোত্যেব পীতং সত্; তন্দ্রা নিদ্রাভেদঃ, নিদ্রা প্রসিদ্ধৈব| একান্ততঃ পথ্যতমমিতি একান্ততোঽতিশযেনেত্যর্থঃ, তর্হি তমপ্প্রত্যযঃ কথং? উচ্যতে- স্বার্থিকত্বাত্; এতেনাতিশযেন পথ্যমিত্যর্থঃ; ‘অন্যেষামাকাশগুণভূযিষ্ঠভূমিসলিলানাং পথ্যানাং প্রকৃষ্টং পথ্যং পথ্যতমম্; একান্তগ্রহণেন সর্বকালদেশপুরুষব্যাধিষু প্রযোগোঽস্য দ্যোত্যতে’ ইত্যেকে; ‘তমপ্প্রত্যযেন স্বস্থস্যাতিশযেন হিতমিত্যভিহিতম্’ ইত্যপরে||৩||

তস্যানির্দেশ্যরসস্যাপি নির্দেশ্যরসত্বে কারণং নির্দিশন্নাহ- তদিত্যাদি| তদেবাবনিপতিতমান্তরিক্ষং জলং ভূমিপ্রাপ্তম্| অন্যতমং মধুরাদিষ্বেকতমম্| উপলভতে প্রাপ্নোতীত্যর্থঃ| স্থানবিশেষাত্ দেশভেদাদিত্যর্থঃ| কে পুনস্তে স্থানবিশেষা ইত্যাহ- নদীত্যাদি| নদ্যো গঙ্গাদ্যাঃ; নদাঃ সিন্ধুশোণাদযঃ; সরো দিব্যখ্যাতং পুরুষব্যাপারং বিনা; পুরুষব্যাপারকৃতস্তডাগঃ, ‘তলাব’ ইতি লোকে, কেচিদ্বিপর্যযেণার্থমাহুঃ; বাপী ইষ্টকাদিভির্বদ্ধা সসোপানতীর্থা ‘পুষ্করিণী’ ইতি লোকে; কূপো মৃত্তিকেষ্টকাদিভির্বদ্ধোঽসোপানঃ; চুণ্টী অববদ্ধকূপঃ, অন্যে ‘ভুআ গিরিপল্বলং বা’ ইত্যাহুঃ, ভুআ নদ্যাঃ সমীপে তত্কালকৃতা লঘুকূপিকা, পল্বলমখাতগর্ত ইতি; প্রস্রবণমুচ্চপ্রদেশাত্ প্রস্রবজ্জলস্থানং পর্বতাশ্রিতম্; উদ্ভিদং পুনর্নিম্নপ্রদেশাদূর্ধ্বোত্তিষ্ঠজ্জলস্থানং; বিকিরং বালুকাদি বিকীর্য গৃহ্যমাণোদকস্থানং; কেদারঃ প্রসিদ্ধঃ; পল্বলমানূপদেশজং তৃণাদিচ্ছন্নং সরঃ| আদিগ্রহণাত্ হ্রদসমুদ্রাদিগ্রহণম্||৪||

পরমতমাহ- তত্রেত্যাদি||৫||

তন্নিরাকৃত্য স্বমতমাহ- তত্ত্বিত্যাদি| কৃত ইতি জনিতঃ| উত্কর্ষাপকর্ষেণেতি বৃদ্ধিহ্রাসাভ্যাম্| স্বলক্ষণভূযিষ্ঠাযাং পৃথিব্যামাত্মগুণবহুলাযাম্ | ‘তত্র পৃথিব্যম্বুগুণবাহুল্যান্মধুর’ ইত্যাদিনা রসবিজ্ঞানীয উক্তস্য সামান্যবিধেরুত্সর্গাখ্যস্য ‘তত্র স্বলক্ষণভূযিষ্ঠাযাং ভূমাবম্লম্’ ইত্যাদিকো বিশেষবিধিরপবাদাখ্যোঽত্র প্রোক্তঃ| অন্যে তু ভূতদ্বযগুণসংযোগং রসবিশেষহেতুমাহুঃ| তথাহি- ‘তত্র স্বলক্ষণোদকভূযিষ্ঠাযাং ভূমৌ মধুরং, পৃথিব্যনিলভূযিষ্ঠাযামম্লং, জলাগ্নিগুণভূযিষ্ঠাযাং লবণং, বায্বগ্নিগুণভূযিষ্ঠাযাং কটুকং, পৃথিব্যনিলগুণভূযিষ্ঠাযাং কষাযম্, আকাশগুণভূযিষ্ঠাযামব্যক্তরসম্’ ইতি||৬||

তত্রেত্যাদি| ধারাভিঃ পততীতি ধারম্| করা বর্ষোপলাঃ, তেষাং তোযং কারম্| তৌষারম্ অবশ্যাযজং নিশাজলম্| তদেব সংহতাবযবত্বেন স্ফটিকশিলাশকলসদৃশাবযবং হিমং, তদ্ভবং হৈমম্| তদিত্যাদি| গাঙ্গমাকাশাধিষ্ঠানং, সামুদ্রং পুনরবন্যধিষ্ঠানম্| তত্রেত্যাদি| এতেন ‘গাঙ্গমাশ্বযুজ এব গ্রহীতব্যং ন ভাদ্রপদে মাসি’ ইত্যুক্তং ভবতি| তযোরিতি তযোর্গাঙ্গসামুদ্রযোরিত্যর্থঃ| কথং পরীক্ষণমিত্যাহ- শাল্যোদনেত্যাদি| অবিদগ্ধম্ অবিবর্ণম্| রূপ্যমযে ভাজনেঽম্লরসে সামুদ্রতোযং বিনা শাল্যন্নং ন কোথমেতি| দিনস্য রাত্রেশ্চ পঞ্চদশো ভাগো মুহূর্তঃ| অবগন্তব্যং জ্ঞাতব্যমিত্যর্থঃ| বর্ণান্যত্বে ইত্যাদি| প্রক্লেদঃ কোথঃ| তন্নোপাদেযমিতি দোষলত্বাত্| সামুদ্রমিত্যাদি| এতেন সামুদ্রস্যানুপাদেযস্যাপি কদাচিদেবোপাদেযতা দর্শিতা| আন্তরিক্ষস্য গ্রহণোপাযং দর্শযন্নাহ- শুচীত্যাদি| শুচিরনুপহতঃ| হর্ম্যতলপরিভ্রষ্টমিতি ধবলগৃহোপরিভূমিকাযাঃ সকাশাদধঃ পতদ্গৃহীতম্| তদিত্যাদি কৌপমিত্যাদিকং সর্বং প্রাগেব ব্যাখ্যাতম্||৭||

তত্রেত্যাদি| অত্র বর্ষাশব্দো বর্ষান্তে আশ্বযুজে বর্ততে ন তু ভাদ্রপদে, তত্রান্তরিক্ষজলস্য নিষিদ্ধত্বাত্; তদুক্তং- “বলাহকাদ্যাঃ সমদাঃ কীটা লূতাশ্চ খেচরাঃ| তদ্বিষোত্সর্গসংসর্গাদগ্রাহ্যং তত্তদা জলম্” ইতি| তর্হি ভাদ্রপদে কিং পাতব্যম্? অত্রোচ্যতে- ভাদ্রপদে মাস্যাকাশগুণভূযিষ্ঠভূম্যাশ্রিতমান্তরিক্ষবদ্ভবতীতি তত্পযঃ পেযমিতি| অন্যে পুনস্তপ্তশীতমম্ভো ভাদ্রপদে পাযযন্তি, পূর্বস্থাপিতং মাহেন্দ্রং বা; অন্যে তু ‘বর্ষাস্বান্তরিক্ষমৌদ্ভিদং কৌপং বা’ ইতি পঠন্তি, তচ্চ কৌপং বিদাহপরিহারার্থং সক্ষৌদ্রং পেযমিতি ব্যাখ্যানযন্তি| শরদি সর্বং ‘পাতব্যম্’ ইতি শেষঃ| প্রসন্নত্বাদিতি প্রসন্নত্বং নির্দোষত্বমগস্ত্যোদযাত্| প্রাবৃষি চৌণ্ট্যমনবমনভিবৃষ্টং সর্বং চেতি অনবং পুরাতনং, তচ্চ সারসং তাডাগং বা; অনভিবৃষ্টমনাভসং, তচ্চ কৌপম্| পরং যত্র ন বৃষ্টো দেবস্তদা সর্বমেব পাতব্যং যদি বা সংস্কৃতং ভবেত্ ক্বথনাদিভিঃ; সর্বত্রৈবাভিনবস্য জলস্য প্রবিষ্টত্বাত্| অন্যে তু ‘অনবম্’ ইত্যস্য স্থানে ‘অনভিনবম্’ ইতি পঠন্তি; অত্রাপি স এবার্থঃ||৮||

ইদানীং নবস্য সলিলস্য বাহ্যাভ্যন্তরপ্রযোগে বাহ্যাভ্যন্তরানেব চ রোগান্নির্দিশন্নাহ- কীটেত্যাদি| কীটাদিভিঃ সহ কোথশব্দঃ প্রত্যেকমভিসম্বধ্যতে, কোথঃ শটিতত্বং; কীটাঃ সবিষা বৃশ্চিকাদযঃ, শবো মৃতপ্রাণিশরীরং, প্রদূষিতং বিকৃতীকৃতম্| তৃণপর্ণোত্করযুতমিতি তৃণপর্ণানামুত্করঃ সমূহস্তেন যুতম্| কলুষং মলিনম্| বিষসংযুতমিতি স্থাবরজঙ্গমবিষযুক্তমিত্যর্থঃ| বর্ষাস্বিতি আশ্বযুজং বিহাযাষাঢশ্রাবণভাদ্রপদা গৃহ্যন্তে| বর্ষাশব্দোঽযং প্রাবৃষি বর্ষাসু চ বর্ততে| তদাহ- “বর্ষাসু চতুরো মাসান্ মাত্রাবদুদকং পিবেত্” ইতি| বাহ্যাভ্যন্তরান্ রোগানিতি বাহ্যাঃ কুষ্ঠাদযঃ, আভ্যন্তরাস্তূদরাদযঃ; তে চ যথাসঙ্খ্যমবগাহপানাভ্যাং জ্ঞেযাঃ||৯-১০||

ব্যাপন্নলক্ষণমাহ- তত্রেত্যাদি| পড্কঃ কর্দমঃ; শৈবালং শৈবলং; হঠঃ জলকুম্ভিকা, ‘অভূমিলগ্নমূলস্তৃণবিশেষঃ’ ইত্যেকে| অবচ্ছন্নম্ আচ্ছাদিতম্| নাভিজুষ্টং ন স্পৃষ্টম্| উপসৃষ্টং সংযুতম্| ব্যাপন্নং দোষাক্রান্তম্| তানেব ষড্দোষান্নির্দিশন্নাহ- তত্রেত্যাদি| ঔষ্ণ্যং ভূবাষ্পজনিতং, ন পুনরগ্ন্যাতপকৃতম্| দন্তগ্রাহিতা অতিশীততাঽভিপ্রেতা| পঙ্কেত্যাদি সিকতা বালুকা| অনিষ্টগন্ধতা বিস্রাদিগন্ধতা| ব্যক্তরসতা রসনেন্দ্রিযগ্রাহ্যমধুরাদিরসতা| যদুপযুক্তমিত্যাদি কফপ্রসেকঃ শ্লেষ্মস্রবণম্| বীর্যং চাচিন্ত্যক্রিযাহেতুঃ| যদুপযুক্তমিত্যাদি বিষ্টম্ভো গুড্গুডাশব্দঃ| ত এতে ইতি এতে পূর্বোক্তাঃ ষড্দোষাঃ| আন্তরিক্ষে ইত্যস্যোপলক্ষণত্বাদাকাশগুণভূযিষ্ঠেঽপি ন সম্ভবন্তি||১১||

ব্যাপন্নানাং প্রসন্নতোপাযং দর্শযন্নাহ- ব্যাপন্নানামিত্যাদি| অগ্নিক্বথনং মহাদোষদুষ্টস্য, সূর্যাতপপ্রতাপনমল্পদোষে, তপ্তাযঃপিণ্ডাদিনির্বাপণং মধ্যদোষে| লোষ্ট্রঃ কঠিনো মৃন্মযঃ| নির্বাপণং জলে নিঃক্ষেপণমিত্যর্থঃ| প্রসাদনং চ কর্তব্যমিতি অগ্নিক্বথনাদিস্বরূপং প্রসাদনং নান্যত্| গন্ধাপনযনে উপাযমাহ- নাগেত্যাদি| নাগো নাগকেশরঃ, চম্পকো রাজচম্পকঃ, উত্পলং সৌগন্ধিকং; প্রভৃতিগ্রহণাত্ কেতকীমল্লিকাদিপুষ্পাণি||১২||

তদুদকং গুণবদপি কিম্মযপাত্রস্থং পেযমিত্যাহ- সৌবর্ণে ইত্যাদি| পুষ্পাবতংসং পুষ্পসুগন্ধীকৃতম্||১৩||

ব্যাপন্নাদিবর্জনমাহ- ব্যাপন্নমিত্যাদি| অনার্তবমিতি ঋতুবিশেষানুপযোগ্যম্, অনৃতুবৃষ্টমিতি কেচিত্| অপ্রসাধিতমিতি ক্বথনাদ্যসংস্কৃতম্||১৪-১৬||

তত্রেত্যাদি| কতকং শশকপুরীষপ্রতিমং ফলং; গোমেদকঃ পুষ্পরাগাভো মণিঃ, মত্কোলমিতি কেচিত্; বিসগ্রন্থিঃ পদ্মমূলং; শৈবালমূলং প্রসিদ্ধম্; মুক্তা মৌক্তিকং; মণিঃ স্ফটিকাদিঃ| এতেন রূপদোষাপযনোপাযো দর্শিতঃ| অন্যে তু বিসগ্রন্থীত্যস্যাগ্রে ‘পর্ণীমূলং’ ইতি পঠন্তি; তত্র পর্ণী পানীযপৃষ্ঠজা, তস্যা মূলং জটা||১৭||

পঞ্চেত্যাদি| নিক্ষেপণং যত্র জলং নিক্ষিপ্যতে স্থাপ্যতে, তেন ভূম্যাদিস্পর্শাভাবাদ্দোষান্তরানুদযঃ| ফলকং শাল্মলীকাষ্ঠাদিবিরচিতং, ত্র্যষ্টকম্ অষ্টাস্রদণ্ডত্রযসংযোগঃ, মুঞ্জবলযো মুঞ্জাদিবিরচিতো বলযাকারঃ, উদকমঞ্চিকা আকাশান্তরালে নিরন্তরনিহিতবেত্রবেণ্বাদিবিরচিতা বেত্রগৃহাদ্যভিধানা, শিক্যং মুঞ্জাদিবিরচিতং প্রসিদ্ধম্||১৮||

সপ্তেত্যাদি| উদকপ্রক্ষেপণমিতি সলিলপূর্ণে ভাজনে বস্ত্রাদিপীডিতে আকণ্ঠমপরশীতসলিলনিক্ষেপঃ| যষ্টিকাভ্রামণং যন্ত্রযষ্ট্যাদিভ্রামণম্| ব্যজনমিতি ব্যজনাদিনা বাতলীকরণম্| বস্ত্রোদ্ধরণং বস্ত্রেণ গালনম্| বালুকাপ্রক্ষেপণম্ উদকপাত্রস্য বালুকামধ্যে নিক্ষেপণম্| শিক্যাবলম্বনং প্রসিদ্ধম্||১৯||

কীদৃশং পুনরুপাদেযং ভৌমমিত্যাহ- নির্গন্ধমিত্যাদি| শুচি অনুপহতম্| লঘু চেতি চকারঃ সমস্তগুণবত্ত্বেঽত্যন্তগুণকারি, অল্পগুণবত্ত্বে ত্বল্পগুণকারীতি তারতম্যসূচকঃ| হৃদ্যং চেত্যত্র তু ক্বথিতজলস্য হৃদযাপ্রিযত্বেঽপ্যুপগ্রহণার্থম| গুণবত্ প্রশস্তগুণোপেতম্||২০||

ইদানীং জাঙ্গলপশ্চিমদেশস্থানূপপূর্বদেশস্থসাধারণমধ্যদেশস্থানাং নদীনাং গুণান্নির্দিশন্নাহ- তত্র নদ্য ইত্যাদি| পশ্চিমাভিমুখা জাঙ্গলপশ্চিমদেশস্থাঃ পশ্চিমসমুদ্রগাঃ, পূর্বাভিমুখাঃ আনূপদেশস্থাঃ পূর্বসমুদ্রগাঃ, দক্ষিণাভিমুখাঃ মধ্যদেশস্থাঃ| শৈলাদিভেদেন গুণান্নির্দিশন্নাহ- তত্রেত্যাদি| মলযপ্রভবা ইতি মলযপ্রভবা হি নদ্যো দ্বিবিধা ভবন্তি- পাষাণসিকতাবাহিন্যঃ, অপাষাণসিকতাবাহিন্যশ্চ; তত্র পাষাণসিকতাবাহিন্যঃ পথ্যাঃ, অপাষাণসিকতাবাহিন্যঃ কৃমীন্ জনযন্তি| হিমবত্প্রভবা ইতি তা অপি দ্বিবিধাঃ- হিমবদুপরিভাগপ্রভবাঃ পথ্যাঃ, অধোভাগপ্রভবাস্তু হৃদ্রোগাদিহেতবঃ| বিশিষ্টদেশাশ্রিতপর্বতপ্রভবাণাং নদীনাং সলিলগুণং দর্শযন্নাহ- প্রাচ্যেত্যদি| অবন্তী উজ্জযিনী তযোপলক্ষিতো দেশস্তস্য পূর্বস্যাং জাতাঃ প্রাচ্যাবন্ত্যাঃ, পশ্চিমস্যাং জাতা অপরাবন্ত্যাঃ শৈলাঃ, তেষু যা নদ্যঃ; এতেন বিশিষ্টদেশাশ্রিতপর্বতপ্রভবাণাং নদীনাং সলিলগুণ উক্তঃ| ‘উজ্জযিন্যুপলক্ষিতে দেশে যাঃ প্রাচীং পশ্চিমাং চাভিমুখং যান্তি তাঃ প্রাচ্যাবন্ত্যা অপরাবন্ত্যাশ্চ, ন তু উজ্জযিনীপ্রভবেষু পর্বতেষু’ ইত্যন্যে| অযমর্থো গযদাসেন দূষিতঃ| পারিযাত্রেত্যাদি পারিযাত্রঃ পর্বতভেদঃ, তত্র প্রভবা নদ্যো দ্বিবিধাঃ- তডাগজা দরীজাশ্চ; তত্র তডাগজাঃ পথ্যাঃ, দরীজা দোষলাঃ||২১||

নদীনাং ধন্বানূপসাধারণশৈলাশ্রযাণাং সর্বাসামেব শেষীভূতং বিশেষং দর্শযন্নাহ- নদ্য ইত্যাদি||২২||

ইদানীং বিশিষ্টদেশপ্রভবাণাং নদীনাং গুণবিশেষং দর্শযন্নাহ- প্রাযেণেত্যাদি| মরুষু প্রসিদ্ধেষু মরুদেশেষু, নতু জাঙ্গলশব্দাভিহিতেষু| পৌরুষেযা বৃষ্যা ইত্যর্থঃ| অন্যে তু ‘ঈষত্কষাযা মধুরা লঘুপাকা বলে হিতাঃ’ ইতি পঠন্তি||২৩||

ভৌমানাং দিনাপেক্ষং গ্রহণকালং নিযমযন্নাহ- তত্রেত্যাদি| প্রত্যূষসি প্রভাতে| স এব চাপাং পরো গুণ ইতি স চ শৈত্যামলত্বলক্ষণোঽপাং পরমো গুণ ইত্যর্থঃ| অন্যে তু ‘শৈত্যং চাপাং পরো গুণঃ’ ইতি পঠন্তি| তত্র চকারোঽমলসূচনার্থঃ||২৪||

তত্র ভৌমানামর্কসোমকরসংস্কারজগুণেনান্তরিক্ষতুল্যত্বং তদলাভে উপাদানাযাহ- দিবেত্যাদি| অর্কগ্রহণে সিদ্ধে দিবাগ্রহণং সমস্তদিনপ্রাপ্ত্যর্থং, কিরণগ্রহণং দুর্দিনব্যুদাসার্থম্| দিবানিশীতিবচনাত্ সরোঽপি চন্দ্রার্ককরসম্বদ্ধং সত্যপ্যর্কে চন্দ্রসম্বন্ধাদরূক্ষং, সত্যপি চন্দ্রেঽর্কসম্বন্ধাদনভিষ্যন্দি| দোষান্ ব্যাধীন্ ঝটিতি যদভিষ্যন্দতে উত্পাদযতি তদভিষ্যন্দি, বিপর্যযেণানভিষ্যন্দি| নিশাগ্রহণং সমস্তরাত্রিপ্রাপ্ত্যর্থম্| যদ্যপি পৌর্ণমাস্যামেব সকলরাত্রৌ চন্দ্রসম্বন্ধো নান্যাসু, তথাঽপি একযাঽপি পৌর্ণমাস্যা রাত্র্যাঽতিশাযী সংস্কারঃ কৃতোঽন্যাস্বপ্যনুবর্ততে| এতেনাতিশীতোষ্ণস্নিগ্ধরূক্ষং নিন্দিতমিত্যুক্তং ভবতি||২৫||

কিঙ্গুণং পুনর্গগনাম্বু যেনৈতত্তুল্যমুচ্যত ইত্যাহ- গগনাম্ব্বিত্যাদি| বল্যমুপচযৌজঃশক্তিকরত্বাত্| বিশিষ্টরসাদ্যুত্পাদনাদ্রসাযনং স্বস্থাতুরোপযোগি| মেধ্যং পবিত্রম্| পাত্রাপেক্ষি ততঃ পরমিতি অতিশ্রেষ্ঠভাজনে গৃহীতমধিকং গুণং করোতীত্যর্থঃ| অন্যে তু মেধ্যস্থানে শীতমিতি পঠন্তি| পূর্বং দোষশমনাদি নোক্তমধুনা অগস্ত্যোদযদর্শনবিশেষপ্রভাবাদুক্তম্||২৬||

চন্দ্রকান্তমণিপ্রভবজলস্য গুণমাহ- রক্ষোঘ্নমিতাদি| রক্ষোঘ্নং রাক্ষসভযহরম্| হ্লাদি সুখাবহম্| চন্দ্রকান্তোদ্ভবমিতি চন্দ্রকান্তমণিপ্রভবম্| ইদং তু চন্দ্রকিরণানুপ্রবেশান্নাভসং, মণিপ্রাদুর্ভূতত্বাদ্ভৌমমিত্যুভযাত্মকম্||২৭||

শীতোষ্ণবিষযমাহ- মূর্চ্ছেত্যাদি| পিত্তোষ্ণদাহেষ্বিতি উষ্ণে শরদি গ্রীষ্মে চ| মদাত্যযে মদ্যবিকারে| ভ্রমশ্চক্রারূঢস্যেব| পরীতেষু যুক্তেষু| তমকঃ শ্বাসো মোহো বা| বমথৌ ছর্দিরোগে||২৮||-

পার্শ্বেত্যাদি| স্তিমিতে কোষ্ঠে আমকোষ্ঠে ইত্যর্থঃ| সদ্যঃশুদ্ধে ইতি যস্মিন্ দিনে শোধনং কৃতং তত্রেত্যেকে, অপরে তু সপ্তাহমিত্যাহুঃ| যদ্যপ্যৌষ্ণ্যং স্পর্শদোষ উক্তস্তথাঽপ্যবস্থাযাং ব্যবহারার্থত্বেনোপাদেযম্; অন্যে তু পূর্বমৌষ্ণ্যং ভূবাষ্পজনিতমেব দোষত্বেনোক্তম্, ইদং ত্বগ্ন্যাতপকৃতমিতি সমাদধতি||২৯-৩০||

সমস্তনদীনাং শেষগুণমাহ- নাদেযমিত্যাদি| দ্বিবিধং কৌপং সক্ষারমব্যক্তরসং চ; যত্ সক্ষারং তত্ পিত্তলং, ইতরন্ন পিত্তলম্||৩১-৩৬||-

আনূপধন্বসাধারণগুণৈর্নির্দিশন্নাহ- অনেকেত্যাদি| অত্র স্পর্শরূপরসগন্ধবীর্যবিপাকাঃ প্রাগুক্তা দোষা জ্ঞেযাঃ| এভিরিতি এভিঃ পূর্বোক্তৈঃ স্পর্শাদিভিরিত্যর্থঃ| অবিদাহি অদাহকারীত্যর্থঃ||৩৭-৩৮||-

উষ্ণোদকগুণমাহ- কফেত্যাদি| পথ্যং হিতম্| উষ্ণোদকমর্ধাবশিষ্টমুদকম্||৩৯||-

উষ্ণোদকভেদমাহ- যদিত্যাদি| নির্বেগং নিশ্চলম্||৪০||-

পর্যুষিতমুষ্ণোদকং ন দাতব্যমিত্যাহ- ন চেত্যাদি| পর্যুষিতং রাত্র্যুষিতম্||৪১||-

শৃতশীতবিষযমাহ- মদ্যপানাদিত্যাদি| পূর্বং মদাত্যযে শীতম্, অত্র তু মদাত্যযসমুদ্ভূতে রোগে শৃতশীতং; মদাত্যযে মদাত্যযসমুদ্ভূতে রোগে চোভযস্মিন্নপি শৃতশীতং প্রযোক্তব্যমিত্যর্থঃ||৪২||-

উদকপ্রসঙ্গেন নারিকেলফলসলিলস্যাপি গুণং নিদর্শযন্নাহ- স্নিগ্ধমিত্যাদি| নারিকেলোদকমীষত্পক্বার্দ্রনারিকেলফলান্তর্বর্তি সলিলমিত্যর্থঃ| জেজ্ঝটস্তু ‘লঘু’ ইতি পঠতি, লঘুত্বং চ শীঘ্রপরিণামিত্বমিচ্ছতি||৪৩||-

অধুনা শৃতশীতস্য শেষবিষযমাহ- দাহেত্যাদি||৪৪||-

কেষু রোগেষু জলং মন্দং পেযমিত্যাহ- অরোচকে ইত্যাদি| যাবত্ প্রতিষেধযিতুমশক্যং তাবদাচরেদিতি মন্দার্থঃ| অযং পানীযবর্গো নিবন্ধকারৈর্বিপরীতক্রমেণ পঠিতঃ| অস্মাভিস্তু যথৈব গুরুভিঃ কথিতস্তথৈব ক্রমেণ ব্যাখ্যাতঃ| ইতি পানীযবর্গঃ||৪৫-৪৬||

ইদানীং ক্ষীরস্যাষ্টবিধাং যোনিমাহ- গব্যমিত্যাদি| করেণুর্হস্তিনী| অশ্বাযাশ্চ নার্যাশ্চ করেণূনাং চেতি চকারত্রযমনুক্তসমানজাতীযক্ষীরাণাং সমুচ্চযার্থং, তেনাশ্বতরীখরীমৃগীখঙ্গিনীক্ষীরাণামপি গ্রহণম্| তত্ পুনর্ভূযসা নোপযুজ্যত ইতি ন কৃতং সাক্ষাত্তদ্গ্রহণম্||৪৭||

সর্বেষামেব ক্ষীরাণাং দশবিধং গুণং নির্দিশন্নাহ- তত্ত্বিত্যাদি| তত্ত্বনেকৌষধিরসপ্রসাদমিতি তুশব্দঃ পুনরর্থে, ওষধিশব্দেন সর্বদ্রব্যাণি ন তু ফলপাকাবসানাঃ, রসঃ সারঃ কিট্টভাব(গ)রহিত ওজঃশুক্রাদিবত্, এতেন শুক্লত্বং দ্যোত্যতে| প্রাণদমগ্নিসোমাদিধারণাদুপচযাদিকরণাদ্বা| পিচ্ছিলং বিশদবিপরীতম্| শ্লক্ষ্ণং খরবিপরীতম্| এবমিদং ক্ষীরং দশগুণযুক্তং ভবতি| জেজ্ঝটস্তু “তত্ত্বনেকৌষধিরসপ্রসাদঃ ক্ষীরতাং গতঃ| সর্বপ্রাণভৃতাং তস্মাত্ সাত্ম্যং ক্ষীরমিহোচ্যতে” ইতি পঠতি, ব্যারব্যানযতি চ- ক্ষীরতাং গতঃ ক্ষীরত্বং প্রাপ্তঃ| প্রাণভৃতাং প্রাণিনাং জরাযুজানাম্| সাত্ম্যং নাম সুস্বং যত্ করোতি তদুচ্যতে||৪৮||

সর্বেষামেব সমানগুণানাং ক্ষীরাণাং সমানকর্ম নির্দেষ্টুমাহ- তত্রেত্যাদি| সর্বম্ অষ্টবিধমপাত্যর্থঃ| প্রাণিনাং জরাযুজানাম্| জাতিসাত্ম্যাত্ মনুষ্যাদিজাতিসুখকরত্বাত্| মানসেষু বিকারেষু রজস্তমঃসংসর্গজেষু| জীর্ণজ্বরেত্যাদি জীর্ণশব্দমেকে জ্বরেণ সহ সম্বধ্নন্তি, অন্যে তু ক্লমান্তৈর্জ্বরাদিভিঃ সহ, জীর্ণত্বেনৈতেষু প্রাযেণ বাতপিত্তানুবন্ধো ভবতীত্যাহুঃ| হরশব্দো জ্বরাদিভিঃ ক্লমান্তৈঃ সর্বৈঃ সহ প্রত্যেকমভিসম্বধ্যতে| কাসেতি কাসোঽত্র কফকাসং ত্যক্ত্বা, শোষোঽত্র মুখকণ্ঠতালূনাং, ক্ষযো রাজযক্ষ্মা, গুল্মোদরযোর্বাতপৈত্তিকযোঃ, মূর্চ্ছাভ্রমমদপিপাসাসু কফামরহিতাসু, হৃদযদোষাণাং বাতপিত্তপ্রাযাণাং, পাণ্ডুরোগে বাতপিত্তপ্রাযে, গ্রহণীপ্রদোষে জীর্ণাবস্থাযাম্, অর্শস্সু রক্তপিত্তপ্রবলেষু, অতিসারে বাতপিত্তশোণিতপ্রাযে পক্বাবস্থাযাং, প্রবাহিকাযাং বাতপিত্তপ্রবলাযাং, গর্ভস্রাবে আমান্বযাদিনা; রক্তপিত্তে কফপ্রধানে, অগ্নিমান্দ্যে চ ন দেযম্| বল্যং মাংসোপচযকরম্, অন্যে ওজসো বর্ধনমিতি; তন্মতে ‘ওজসো বর্ধনম্’ ইতি পাঠোঽগ্রে ন ভবতি| বৃষ্যং শুক্রজনকং, বাজীকরণং শুক্রপ্রবর্তনম্, এতেন জনকপ্রবর্তকমিত্যুক্তম্| রসাযনং সততোপযোগাত্| মেধ্যং মেধাজনকং পবিত্রং বা| পাপ্মাপহং পাপোপশমনং বিশেষতো গব্যম্| বযঃস্থাপনং জরযা বিনা| আযুষ্যং আযুষে হিতম্| সন্ধানং ভগ্নস্য| বমনবিরেচনাস্থাপনমিতি বমনং বমনদ্রব্যসংযোগি; বিরেচনং সরত্বান্মৃদুকোষ্ঠস্য, ‘রেচনদ্রব্যসংযোগাদ্বিরেচনম্’ ইত্যন্যে; আস্থাপনম্ আস্থাপনদ্রব্যসংযোগি, আস্থাপনং নিরূহণমিত্যনর্থান্তরম্| তুল্যগুণত্বাচ্চৌজসো বর্ধনমিতি যাবন্ত এবৌজসো গুণাস্তাবন্ত এব ক্ষীরস্যাপি, তেন তৈস্তৈরেবাত্মগুণৈস্তেষাং সমানানামোজসো গুণানামভিবর্ধনম্| জেজ্ঝটস্তু ‘গব্যং তু শীতং স্নিগ্ধং মধুরমবিদাহী’ ইতি পঠতি, শেষং তু সমং; তন্মতে গোক্ষীরস্যৈব গুণাঃ||৪৯||

সামান্যেন ক্ষীরস্য গুণমভিধায গব্যস্যৈব বিশিষ্টং গুণকর্ম নির্দিশন্নাহ- গোক্ষীরমিত্যাদি| দোষধাতুমলস্রোতসাং মন্দক্লেদপ্রাপ্তিজনকমল্পাভিষ্যন্দি||৫০||-

অজাক্ষীরগুণমাহ- গব্যতুল্যগুণমিত্যাদি| গুণশব্দস্তত্কার্যে ফলে বর্ততে| অত্রাল্পকাযত্বাদযঃ স্বরূপবিশেষেণ ন ক্ষীরপথ্যত্বে হেতবঃ, তেষামল্পকাযত্বাদীনামব্যাদিষ্বপি সম্ভবাত্; অতো দ্বযমেব ক্ষীরপথ্যাপথ্যবিভাগে হেতুর্জাতিবিশেষো ভ্রমণাদিবিশেষশ্চ| সর্বব্যাধিহরং সর্বদোষহরম্||৫১-৫২||-

ইদানীমৌষ্ট্রক্ষীরগুণমাহ- রূক্ষেত্যাদি||৫৩||-

আবিকক্ষীরগুণমাহ- আবিকমিত্যাদি| কফাবহং কফকরম্| কেবলবাতেষ্বিতি কেবলেষ্বনাবৃতেষু, অসংযুক্তেষ্বপীত্যর্থঃ| অন্যে ত্বেবং পঠন্তি- “আবিকং মধুরং স্নিগ্ধমুষ্ণং পিত্তকফাবহম্| গুরু শুদ্ধেঽনিলে পথ্যং সেকশ্চানিলশোণিতে”- ইতি| শুদ্ধেঽনিলে অনাবৃতে, অনিলশোণিতে রক্তাবৃতে বাতে, সেকঃ পরিষেকঃ||৫৪||-

মহিষীক্ষীরমাহ- মহাভিষ্যন্দীত্যাদি| দোষধাতুমলস্রোতসামতিশযক্লেদপ্রাপ্তিজনকং মহাভিষ্যন্দি| গব্যাত্ স্নিগ্ধতরং গোক্ষীরাত্ স্নিগ্ধতরমিত্যর্থঃ||৫৫||-

অশ্বাদিক্ষীরমাহ- উষ্ণমিত্যাদি| একশফা অশ্বাদযঃ, শফঃ খুরঃ| ‘শাখা বাহুজঙ্ঘে, তদ্বাতহরম্’ ইত্যেকে; ‘শাখা রক্তাদযো ধাতবঃ’ ইত্যন্যে| ‘কাঞ্জিকস্যেব প্রভাবাদাধারপ্রভাবাচ্চ শাখাযাং হন্তি, কোষ্ঠে করোতী’ ইত্যামনন্তি||৫৬||-

মানুষং ক্ষীরমাহ- নার্যাস্ত্বিত্যাদি| আশ্চ্যোতনমক্ষিপূরণম্||৫৭||-

হস্তিনীক্ষীরমাহ- হস্তিন্যা ইত্যাদি| স্থৈর্যকরং শরীরদার্ঢ্যকরম্, অন্যে ‘তারুণ্স্থাপকম্’ ইত্যাহুঃ||৫৮||-

প্রাভাতিকং ক্ষীরমাহ- প্রায ইত্যাদি| বিষ্টম্ভো গুডগুডাশব্দঃ||৫৯||-

আপরাহ্ণিকক্ষীরমাহ- দিবাকরেত্যাদি| অপরাহ্ণো দিনান্তভাগঃ| বৃদ্ধানুমতৌ পাঠাবিমৌ||৬০||-

আমক্ষীরমাহ- পয ইত্যাদি||৬১||

পক্বস্য গুণমাহ- তদিত্যাদি| শৃতং পক্বম্, আবর্তিতমিত্যর্থঃ| অনভিষ্যন্দি কিঞ্চিদভিষ্যন্দীত্যর্থঃ|৬২|

স্ত্রীক্ষীরে পাকনিষেধমাহ- বর্জযিত্বেত্যাদি| স্ত্রিযাঃ স্তন্যং বর্জযিত্বাঽন্যদুগ্ধানি শৃতান্যেব হিতানি ভবন্তীত্যর্থঃ| তত্ স্ত্রীভবং স্তন্যমামমক্বথিতমেব হিতম্||৬২||

তেষাং সর্বক্ষীরাণামেব দোহনকালধারাপাতোষ্ণানাং গুণবিশেষং নির্দিশন্নাহ- ধারোষ্ণমিত্যাদি| গুণবত্ গুণান্বিতং, বিপরীতমগুণবত্, অতোঽন্যথেতি ধারোষ্ণং যন্ন ভবতি|৬৩|

অতিপক্বমাহ- তদিত্যাদি| বৃংহণং দেহবৃদ্ধিকরম্||৬৩||

কীদৃশং ক্ষীরং বর্জ্যমিত্যাহ- অনিষ্টেত্যাদি| বিবর্ণং শুক্লাদ্বর্ণান্তরমাপন্নম্| বিরসং মধুরাদন্যরসম্| বিগ্রথিতমম্লাদিদ্রব্যসংযোগেন বিগ্রথিতাবযবং, যল্লোকে বিনষ্টমিতি প্রসিদ্ধম্||৬৪||

অথ দধিভেদানাহ- দধীত্যাদি| এতেন ত্রিপ্রকারং দধ্যুক্তম্| সামান্যদধিগুণমাহ- তদিত্যাদি| উষ্ণমুষ্ণবীর্যম্| বৃষ্যং শুক্রকরম্| মঙ্গল্যং মঙ্গলহেতুঃ| অন্যে ত্বেবং পঠন্তি- ‘দধি তু মধুরং সৃষ্টমূত্রপুরীষং গুর্বম্লমভিষ্যন্দি শ্লেষ্মপিত্তশোফবর্ধনং কার্শ্যাপহং রোচনং মঙ্গল্যং চ, তদেব চোদ্ধৃতসারং গ্রাহ্যনভিষ্যন্দি চ, সসরং কফমেদঃশুক্রকৃত্, ত্রিদোষকৃন্মন্দজাতম্’ ইতি||৬৫||

অথ ত্রিপ্রকারস্যাপি দধ্নো গুণমাহ- মহেত্যাদি| মহাভিষ্যন্দীতি পূর্ববদ্ব্যাখ্যেযম্||৬৬||

মন্দজাতগুণমাহ- বিদাহীত্যাদি| ত্রিদোষকৃদিতি দোষান্ বাতপিত্তশ্লেষ্মাণঃ করোতীতি দোষকৃদিতি সিদ্ধে ত্রিগ্রহণমেতজ্জ্ঞাপযতি যন্মন্দজাতং দধি ত্রীনপি দোষান্ যৌগপদ্যেন তুল্যবলস্বেন চ কোপযতি, ন পুনঃ পরিপাঠ্যা হীনাধিকভাবেন বা|৬৭|

গোদধ্যাহ- স্নিগ্ধমিত্যাদি||৬৭||-

অজাদধ্যাহ- দধ্যাজমিত্যাদি||৬৮||-

মহিষীদধ্যাহ- বিপাকে ইত্যাদি| বলাসঃ শ্লেষ্মা| স্নিগ্ধপদবলাসবর্ধনপদাভ্যাং সহ ‘বিশেষাত্’ ইতি সম্বধ্যতে||৬৯||-

উষ্ট্রীদধ্যাহ- বিপাকে ইত্যাদি| সক্ষারমীষত্ক্ষারম্||৭০||-

মেষীদধ্যাহ- কোপনমিত্যাদি| দুর্নামানি অর্শাংসি| দোষলমপথ্যত্বেন বিকারকারি||৭১||-

অশ্বাদধ্যাহ- দীপনীযমিত্যাদি| বাডবমাশ্বম্||৭২||-

মানুষীদধ্যাহ- স্নিগ্ধমিত্যাদি| চক্ষুষ্যমগ্র্যং শ্রেষ্ঠং চক্ষুষ্যমিত্যর্থঃ| গুণোত্তরং গুণোত্কৃষ্টম্||৭৩||-

হস্তিনীদধ্যাহ- লঘ্বিত্যাদি||৭৪||-

সর্বেষাং গোদধি শ্রেষ্ঠমিত্যাহ- দধীনীত্যাদি| এবমেতেন প্রকারেণ, এবাবধারণে||৭৫||-

বস্ত্রাদিগালিতদধিগুণমাহ- বাতঘ্নমিত্যাদি| সুপরিস্রুতং সুষ্ঠু গালিতং বস্ত্রাদিভিঃ||৭৬||-

ক্বথিতক্ষীরজাতস্য দধ্নো গুণমাহ- শৃতাদিত্যাদি||৭৭||-

দধ্যবযববিশেষাণাং গুণবিশেষং দর্শযন্নাহ- দধ্ন ইত্যাদি| সরঃ দধ্ন উপরিতনো ভাগঃ স্নেহবহুলঃ ‘তর’ ইতি প্রসিদ্ধঃ| বহ্নের্বিধমনঃ অগ্নিনাশনঃ| বৃষ্যঃ শুক্রবর্ধন ইতি চোভযমতিবৃদ্ধিকরত্বপ্রাপ্তযে; এতেন জনকপ্রবর্তকমুক্তম্||৭৮||-

উদ্ধৃতস্নেহস্য দধ্নো গুণমাহ- দধীত্যাদি| অসারং সাররহিতম্| বিষ্টম্ভীতি সবাততোদশূলা মলস্যাপ্রবৃত্তির্বিষ্টম্ভঃ; অন্যে ‘বিষ্টম্ভো গুডগুডাশব্দঃ’ ইতি প্রাহুঃ||৭৯||-

ঋতুভেদেন হেযোপাদেযতামাহ- শরদিত্যাদি||৮০||-

মস্তুগুণমাহ- তৃষ্ণেত্যাদি| মস্তু অধোদধি জলমিশ্রং; তচ্চ সপ্তবিধং দধিভেদাত্; অন্যে তু দধিতক্রজভেদেন মস্তু দ্বিবিধমিচ্ছন্তি| মলং মূত্রপুরীষম্| ভক্তচ্ছন্দং ভোজনাভিলাষম্||৮১-৮৩||

অথ তক্রগুণানাহ- তক্রমিত্যাদি| গরং কৃত্রিমং বিষং, সদাভাবিনং বর্জযিত্বাঽন্যে বিষমজ্বরাঃ, প্রসেকো লালাস্রাবঃ| স্নেহব্যাপত্ স্নেহাতিযোগাযোগসমুত্থো বিকারঃ| অবৃষ্যম্ অশুক্রলম্| তচ্চ তন্ত্রান্তরে ত্রিবিধং- “রূক্ষমর্ধোদ্ধৃতস্নেহং যতশ্চানুদ্ধৃতং ঘৃতম্| তক্রং দোষাগ্নিবলবিত্ত্রিবিধং তত্ প্রযোজযেত্” (চ. চি. অ. ১৪)- ইতি| তন্ত্রান্তরে সর্বেষামেবৈতেষাং পৃথগ্গুণোপবর্ণনং কৃতম্||৮৪||

অথ কীদৃক্ তক্রং যস্যাযং গুণনির্দেশঃ কৃতঃ? উচ্যতে- মন্থনাদীত্যাদি| ঘোলমাহ- যত্ত্বিত্যাদি| তত্তু দধিগুণমেব| সস্নেহং সজলমুদশ্বিত্; তদ্গুণাস্তু মতান্তরাদ্বোদ্ধব্যাঃ||৮৫||

তস্য তক্রস্য নিষেধবিষযমাহ- নৈবেত্যাদি| উষ্ণকালে শরদ্গ্রীষ্মযোঃ||৮৬||

কেষু প্রশস্তমিত্যাহ- শীতকাল ইত্যাদি| মার্গাবরোধে স্রোতঃশোধকত্বাত্| দুষ্টে চ বাযৌ বিকৃতে বাতে; স চ প্রাযঃ কোষ্ঠস্থো জ্ঞেযঃ||৮৭||

তক্রস্য রসবিশেষেণ গুণবিশেষমাহ- তদিত্যাদি||৮৮||

সংযোগবিশেষেণ ত্রিদোষহরত্বমাহ- বাতে ইত্যাদি||৮৯||

তস্য হেত্বন্তরৈর্বিগ্রথিতস্য ঘনীভূতাবযবস্য স্বগুণান্ নির্দিশন্নাহ- গ্রাহিণীত্যাদি| বিনষ্টং তক্রং ঘনাবযবং তক্রকূর্চিকা|৯০|

ইদানীং তক্রাদ্দধিমস্তুনস্তথা তক্রমস্তুনোঽপি বিশেষং গুণেষু দর্শযন্নাহ- তক্রাদিত্যাদি| মণ্ডো মস্তুকঃ; কূর্চিকাভূতং যদ্দধি তক্রং চ তাভ্যাং জাতো যো মণ্ডঃ স তক্রাল্লঘুতরঃ, প্রাকৃতদধিজাতং পুনর্মস্তু লাঘবাত্তক্রসমমেব| অন্যে ত্বেবং পঠন্তি, ‘দধিকূর্চিকতক্রজঃ’ ইতি| তক্র প্রাকৃতদধিজঃ, কূর্চিকীভূতদধিজঃ, কূর্চিকীভূততক্রজ ইতি মস্তুত্রযসঙ্গ্রহঃ| ‘তক্রতুল্যো দধিমণ্ডো বিষ্টম্ভারুচিনাশন’ ইতি চ ক্বচিত্ পঠ্যতে| প্রাকৃতমস্তু চ গ্রীষ্মাদিবিদাহেন সুজাতস্য দধ্নোঽচ্ছো ভাগ উচ্যতে||৯০||

তক্রকূর্চিকাপ্রস্তাবে ক্ষীরকূর্চিকামাহ- গুরুরিত্যাদি| কূর্চিকীভূতক্ষীরস্য ঘনভাগঃ কিলাটঃ; যং লোকাঃ ক্ষীরাংশুমিত্যাহুঃ, সূদাস্তু ‘কিলাটী’ ইতি| পুংস্ত্বং শুক্রম্|৯১|

পীযূষমোরটাবাহ- মধুরাবিত্যাদি| তদ্বদিতি কিলাটতুল্যৌ| পীযূষঃ সদ্যঃপ্রসূতাযা গোঃ ক্ষীরং সপ্তাহং যাবত্, তদেব সপ্তাহাত্ পরতো যাবত্ প্রসন্নতাং ন গচ্ছতি তাবত্ ‘মোরট’ ইত্যুচ্যতে| জেজ্জটস্তু ‘বিনষ্টক্ষীরভবং মস্তু মোরটম্’ ইত্যাহ||৯১||

সদ্যস্কং নবনীতমাহ- নবনীতমিত্যাদি| সদ্যস্কং সদ্যোভবম্| সুকুমারং দেহসৌকুমার্যকরম্| সঙ্গ্রাহি প্রভাবাত্তক্রাবযবসম্বন্ধাচ্চ, অত এবাম্লম্| চিরোত্থিতস্য নবনীতস্য গুণমাহ- গুর্বিত্যাদি| বলকরমোজস্করম্| বৃংহণং দেহোপচযকরম্| বিশেষেণাতিশযেনেত্যর্থঃ||৯২||

ক্ষীরমথনোত্থিতস্য নবনীতস্য গুণমাহ- ক্ষীরোত্থমিত্যাদি| দধ্যুত্থিতনবনীতাপেক্ষযা উত্কৃষ্টে স্নেহমাধুর্যে যস্মিন্ তত্তথা| অতিশীতমপি তদপেক্ষযৈব| প্রসাদনং চেতি রক্তপিত্তনেত্ররোগযোঃ| প্রসাদনস্থানে ‘বর্ণপ্রসাদনীযম্’ ইতি কেচিত্ পঠন্তি||৯৩||

ক্ষীরোত্থনবনীতপ্রসঙ্গেন ক্ষীরোত্থসন্তানিকামাহ- সন্তানিকেত্যাদি| সন্তানিকা ক্ষীরস্যোপরি স্ত্যানো ভাগঃ ক্ষীরসর ইত্যর্থঃ| তর্পণী তৃপ্তিজনিকা||৯৪||

ননু চাষ্টানাং ক্ষীরাণাং নির্দিষ্টত্বাদিহ তক্রমস্তুতক্রকূর্চিকাকিলাটপীযূষমোরটনবনীতসন্তানিকাদযঃ কস্য ক্ষীরস্যোক্তা ইত্যাহ- বিকল্প ইত্যাদি| বিকল্পো ভেদঃ প্রকারঃ| দধি আদির্যস্য স দধ্যাদিঃ| গব্য ইতি গোরেব| অভিবর্ণিতঃ কথিতঃ| ন পুনরজাবিপ্রভৃতীনাং, যতঃ শ্রেষ্ঠঃ সর্বেভ্যঃ প্রধানম্| তত্ কিমজাদীনাং দধ্যাদি ন সম্ভবতীত্যাহ- বিকল্পানিত্যাদি| অবশিষ্টান্ উর্বরিতান্| ক্ষীরবীর্যাদিতি ক্ষীরবীর্যং ক্ষীরগুণ ইত্যর্থঃ| যথাঽজাদীনাং ক্ষীরগুণস্তদনুগুণস্তত্তক্রাদিগুণো বাচ্য ইত্যর্থঃ||৯৫||

অথ ঘৃতমাহ- ঘৃতং ত্বিত্যাদি| এতে সামান্যঘৃতস্য গুণাঃ, অন্যে তু গব্যস্যৈবেতি গুণশ্রেষ্ঠত্বাদিত্যাহুঃ| সৌম্যত্বমুষ্ণেঽপি যথাঽবিক্ষীরে, অত এব শীতবীর্যমিত্যুক্তম্| অনভিষ্যন্দীতি অত্রেষদর্থে নঞ্; তেন, অল্পাভিষ্যন্দীত্যর্থঃ; এতেন দোষধাতুমলস্রোতসাং মন্দক্লেদপ্রাপ্তিজননম্| স্নেহনং স্নিগ্ধত্বাপাদকম্| উদাবর্তাদিপ্রশমনং নিরামাণামেব নতু সামানাম্| জ্বরস্য জীর্ণস্য প্রশমনং শান্তিকরমিত্যর্থঃ| স্মৃত্যাদিভির্বলান্তৈঃ সহ করশব্দঃ প্রত্যেকমভিসম্বধ্যতে| স্মৃতিঃ অতীতস্মরণম্; অনাগতজ্ঞানং মতিঃ; মেধা গ্রন্থধারণশক্তিঃ; কান্তিঃ শোভা; লাবণ্যং রূপাতিশযঃ; সৌকুমার্যং মার্দবমঙ্গানাম্; ওজো হৃদি স্থিতং ধাতুধাম; তেজঃ পরাক্রমঃ, অন্যে প্রভামাহুঃ, সা চ মহাপঞ্জিকাযাং নিষিদ্ধা; বলমুপচযঃ| মেধ্যং পবিত্রম্| বযঃস্থাপনমিতি যাবদেবাযুঃ প্রমিতং তাবদেবাযুঃ স্থাপযত্যনাবাধম্| পাপাদীনি হন্তি প্রভাবাত্| রক্ষোঘ্নং রাক্ষসভযহরম্| ‘ত্রিদোষাপকর্ষণম্’ ইতি কেচিত্ পঠন্তি, স তু নাতিপ্রসিদ্ধঃ পাঠঃ| তত্রাপি বাতপিত্তসম্বদ্ধস্যৈব কফস্য হন্তৃত্বং, নতু কেবলস্য||৯৬||

সামান্যেন ঘৃতগুণমভিধায গব্যঘৃতস্য বিশেষগুণমাহ- বিপাকে ইত্যাদি| চক্ষুষ্যমগ্র্যমিতি সর্বচক্ষুষ্যশ্রেষ্ঠমিত্যর্থঃ| গুণোত্তরং গুণোত্কৃষ্টম্||৯৭||

আজং ঘৃতমাহ- আজমিত্যাদি||৯৮||

মাহিষঘৃতমাহ- মধুরমিত্যাদি||৯৯||

ঔষ্ট্রঘৃতমাহ- ঔষ্ট্রমিত্যাদি||১০০||

আবিকঘৃতমাহ- পাকে ইত্যাদি||১০১||

আশ্বঘৃতমাহ- পাকে ইত্যাদি| ঐকশফং ঘৃতমশ্বাযা ঘৃতমিত্যর্থঃ||১০২||

মানুষীঘৃতমাহ- চক্ষুষ্যমিত্যাদি| চক্ষুষ্যমগ্র্যং সর্বচক্ষুষ্যশ্রেষ্ঠম্||১০৩||

হাস্তিনঘৃতমাহ- কষাযমিত্যাদি| কারেণবং হাস্তিনম্||১০৪||

ক্ষীরোত্থঘৃতগুণমাহ- ক্ষীরঘৃতমিত্যাদি| ক্ষীরমথনাত্ সমুদ্ভূতনবনীতোত্থিতং ঘৃতং ক্ষীরঘৃতম্| সঙ্গ্রাহি প্রভাবাত্| ভ্রমঃ চক্রারূঢস্যেব| মূর্চ্ছা চেতনাচ্যুতিঃ||১০৫||

ঘৃতমণ্ডস্য গুণমাহ- সর্পির্মণ্ডস্ত্বিত্যাদি| বিলীনঘৃতস্য ঘনীভূত উপরিতনো ভাগো মণ্ডঃ||১০৬||

পুরাণঘৃতগুণমাহ- সর্পিরিত্যাদি| পুরাণং দশবর্ষস্থিতম্| বিষরুধিরমদ্যজা মদাস্ত্রযঃ, গরঃ সংযোগবিষম্| পূরণেঽক্ষিপূরণে| একাদশশতমিতি একাদশোত্তরং শতমিত্যর্থঃ| ভূতৈঃ প্রাণিভিঃ| আচার্যস্তু ‘কৌম্ভং তু শতবত্সরম্’ ইত্যাহ| অযং পাঠো নিবন্ধেষু ন দৃশ্যতে, অস্মাভিস্তু বহুবৈদ্যপঠিতত্বাত্ পঠিতঃ||১০৭-১১১||

জঙ্গমস্নেহোত্তমং ঘৃতং নির্দিশ্য স্থাবরস্নেহোত্তমং তৈলং গুণকর্মভ্যাং নির্দিশন্নাহ- তৈলমিত্যাদি| তিলেষু ভবং তৈলং তিলতৈলম্| আগ্নেযমুষ্ণমিতি প্রভা আগ্নেযী ন চোষ্ণা, ক্ষার উষ্ণঃ সৌম্যশ্চ, মত্স্যা উষ্ণা ন ত্বাগ্নেযাঃ, অত এবাগ্নেযমুষ্ণমিত্যুভযমুক্তম্| বৃংহণং ধাতুপুষ্টিকরত্বেন শরীরদার্ঢ্যাবহত্বাত্; ন চ লেখনত্বমপ্যস্য বিরুদ্ধং, মেদোহরত্বাত্| ন খলু তৈলং মেদোঘ্নমপি মাংসং ন করোতি, প্রতিনিযতশক্তিত্বাদ্দ্রব্যাণাম্| প্রীণনং তৃপ্তিজনকম্| ব্যবাযি অপরিণতমেব ব্যাপ্য দেহং পচ্যতে| সূক্ষ্মং সূক্ষ্মস্রোতোনুসারি| বিশদং নির্মলম্| বিকাসি সন্ধিবন্ধবিমোচকম্| বৃষ্যং শুক্রলম্, অন্যে তু ধাতুপোষণকরণাদ্বৃষ্যং, সদ্যঃ পুনরবৃষ্যমেব| যদুক্তং জাতূকর্ণেন- ‘অশুক্রার্থে তৈললবণম্’ ইতি| ত্বক্প্রসাদনমভ্যঙ্গে ভোজনে চ| বর্ণো গৌরাদিঃ| বলকরমুত্সাহকরম্| চক্ষুষ্যং পরিণামে, ন তু পূরণেন| লেখনং মেদোহরম্| অনিলবলাসক্ষযকরমিতি মিলিতবাতবলাসযোঃ ক্ষযকরং, ন কেবলস্য বাতস্য ন চ কেবলস্য শ্লেষ্মণঃ; অথবা ক্ষযো মার্গঃ, অনিলবলাসস্রোতঃশোধনমিত্যর্থঃ| অশিতপিত্তজননম্ জল্পতনূকরণপিত্তযোর্জনকং, শিতং হি তনূকরণং, নঞীষদর্থে, তেনাল্পতনূকরণমিতি লভ্যতে; কেচিদশিতমিতি পৃথক্ পঠন্তি, তচ্চ মহাপঞ্জিকাযাং দূষিতম্| ছিন্নং দ্বিধাভূতং, ভিন্নং বিদারিতং, বিদ্ধং সূচ্যাদিভিঃ, উত্পিষ্টং চূর্ণিতং, চ্যুতং স্থানাদধোগতং, মথিতং বিলোডিতং, ক্ষতমুরঃক্ষতাদি, পিঞ্চিতং চিপ্পটীভূতং ‘চির্পিতং’ ইতি লোকে, ভগ্নং সন্ধিমুক্তাদিভেদং, স্ফুটিতং বহুধা খণ্ডীভূতং, বিশ্লিষ্টং সন্ধিবিশ্লেষমাত্রযুক্তং, দারিতং স্ফাটি(ডি)তমিত্যর্থঃ, অভিহতং লগুডাদিভিঃ, দুর্ভগ্নং চূর্ণিতাতিপাতিতং মজ্জানুগতাদিকং কৃচ্ছ্রসাধ্যং দুষ্টং ভগ্নং, মৃগব্যালবিদষ্টং দুষ্টমৃগভক্ষিতম্| পরিষেকঃ অঙ্গোপরি তৈলধারাদিনিপাতঃ, অভ্যঙ্গঃ প্রসিদ্ধঃ, অবগাহোঽপক্রীডনম্ | অন্নপানবিধাবিতি বিধৌ সংস্করণে||১১২-১১৩||

এরণ্ডতৈলস্য গুণকর্মাণ্যাহ- এরণ্ডতৈলমিত্যাদি| অধোভাগদোষহরং বিরেচনেন দোষহরমিত্যর্থঃ||১১৪||

নিম্বাদিফলস্নেহগুণানাহ- নিম্বেত্যাদি| জীমূতকো দেবদালী, বৃক্ষকঃ কুটজঃ, কৃতবেধনঃ কোশাতকী, অর্কঃ প্রসিদ্ধঃ, কম্পিল্লকো রেচনিকঃ, হস্তিকর্ণো মহাপর্ণো ‘ভূপলাশ’ ইত্যুচ্যতে, অন্যে রক্তৈরণ্ডমাহুঃ, পৃথ্বীকা কৃষ্ণজীরকঃ, পীলুঃ প্রসিদ্ধঃ, করঞ্জো বৃক্ষকরঞ্জঃ, ইঙ্গুদী কণ্টকী(ক)বৃক্ষঃ প্রসিদ্ধঃ, অন্যে পুত্রজীবকমাহুঃ, শিগ্রুঃ শোভাঞ্জনফলং, সুবর্চলা সূর্যাবর্তঃ, বিডঙ্গঃ কৃমিহা, জ্যোতীষ্মতি কাকমর্দনিকা| নিম্বতৈলং তন্ত্রান্তরে পলিতহরমুক্তম্, ইহাপি সামান্যেন শিরোরোগাপহরত্বেন পলিতহরত্বমুচ্যতে||১১৫||

এষু কেষাঞ্চিত্ সামান্যগুণাদ্বিশেষং নির্দিশন্নাহ- বাতঘ্নমিত্যাদি| ক্ষৌমমিতি অতসীভবম্||১১৬-১১৯||

কটূন্যভিধায মধুরাণি নির্দিশন্নাহ- কিরাতেত্যাদি| অতিমুক্তক আবান্তকঃ, কোলো বদরমজ্জা, অক্ষোড উত্তরাপথে প্রসিদ্ধঃ, জীবন্তী স্বর্ণজীবন্তীফলং, প্রিযালঃ প্রসিদ্ধো মধুরাম্লফলঃ, কর্বুদারঃ কাঞ্চনারঃ; সূর্যবল্লী অর্কপুষ্পী, ‘সূর্যাবর্তভেদঃ’ ইত্যন্যে, সুবর্চলাযাঃ পূর্বমেব পঠিতত্বাত্; ত্রপুসং কর্কটীফলং ‘ত্রিষুডী’ ইতি লোকে, এর্বারুর্গ্রীষ্মকর্কটিকা, কর্কারু বাডবং ত্রপুসম্| প্রভৃতিগ্রহণাত্ কালিঙ্গাদীনাং গ্রহণম্| অগ্নিসাদনানি অগ্নিমান্দ্যকরাণি| কিরাততিক্তকাদীনাং তিক্তানামপি মধুরাণি তৈলানি প্রত্যক্ষদৃষ্টত্বাত্||১২০||

মধূকাদীনাং তৈলান্যাহ- মধূকেত্যাদি| পলাশঃ কিংশুকঃ||১২১||

তুবরকাদিতৈলমাহ- তুবরকেত্যাদি| তুবরকং পশ্চিমার্ণবতীরজাতমাহুঃ| তদুক্তং- “পত্রৈস্তু কেশরাকারৈঃ কপিত্থসদৃশৈঃ ফলৈঃ| বৃক্ষস্তুবরকো নাম পশ্চিমার্ণবতীরজঃ”- ইতি| উভযতোভাগদোষহরে চেতি বমনেন বিরেচনেন চেত্যর্থঃ||১২২||

সারস্নেহানাহ- সরলেত্যাদি| সরলাদযঃ প্রসিদ্ধাঃ| গণ্ডীরঃ সারপ্রধানস্তরুবিশেষঃ| সারস্ত্বন্তর্গতঃ প্রধানভূতোঽবযববিশেষঃ||১২৩||

তুম্ব্যাদীনাং স্নেহমাহ- তুম্বীত্যাদি| তুম্বী তিক্তালাবুঃ, কোশাম্রঃ ‘কোশম্ব’ ইতি প্রসিদ্ধঃ, দন্তী দন্তিনী, দ্রবন্তী শম্বরী, শ্যামা বৃদ্ধদারুকঃ, সপ্তলা সাতলেতি প্রসিদ্ধা, নীলিনী শ্রীফলিকা, কম্পিল্লকঃ প্রসিদ্ধঃ, শঙ্খিনী শ্বেতশ্রীফলিকা, অন্যে যবতিক্তাভেদমাহুঃ| অধোভাগদোষহরা ইতি বিরেচনেন দোষহরা ইত্যর্থঃ||১২৪||

যবতিক্তাতৈলমাহ- যবতিক্তাতৈলমিত্যাদি| যবতিক্তা যবক্ষেত্রেষু জাযতে তিক্তসপ্তাষ্টপত্রা ‘যবেন্তিকা’ ইতি প্রসিদ্ধা||১২৫||

একৈষিকাতৈলমাহ- একৈষিকাতৈলমিত্যাদি| একৈষিকা অবিদ্ধকরণী ‘পাঠা’ ইতি লোকে, ত্রিবৃদিতি জেজ্ঝটঃ||১২৬||

আম্রতৈলমাহ- সহকারতৈলমিত্যাদি| সহকারতৈলমাম্রতৈলম্| তচ্চ ‘আম্রস্য তরুণফলবৃন্তভঙ্গমাত্রত এব জাতম্’ ইতি গযী, ‘তত্ফলমজ্জস্নেহঃ’ ইত্যন্যে||১২৭||

ফলানামানন্ত্যাত্ ফলগুণাতিদেশং তৈলেঽপ্যাহ- ফলোদ্ভবানীত্যাদি| ইহ জগতি| ফলানীবেতি ফলসদৃশগুণাঃ কর্মাণি চেত্যর্থঃ; অথবা ইহ তৈলবর্গে যানি কানিচিত্ ফলোদ্ভবানি তৈলান্যুক্তানি তানি তাবদুক্তগুণকর্মভ্যামেব জ্ঞেযানি, শেষাণি তু ফলতৈলানি ফলস্য গুণান্ কর্ম চ বিজ্ঞায ফলানীব বিনির্দিশেদিত্যর্থঃ| কেচিত্তু ‘যান্যুক্তানীহ কানিচিত্’ ইত্যস্য স্থানে ‘যানীত্যুক্তানি কানিচিত্’ ইতি পঠন্তি, শেষং চ সমম্| তচ্চ সুবোধম্||১২৮||

সর্বেষাং স্থাবরাণাং স্নেহানাং তিলতৈলগুণত্বমাহ- যাবন্ত ইত্যাদি| সর্বে তৈলগুণা জ্ঞেযা ইতি এতেন তিলতৈলে যে কেচিদ্ধর্মাঃ যানি চ কানিচিত্ কর্মাণি তান্যপরেষ্বপি তৈলেষু বর্তন্ত ইত্যুক্তং, ন তু সর্বে তিলতৈলধর্মাঃ সর্বাণি তিলতৈলকর্মাণি; অন্যে তু গুণশব্দেন সর্বসাধারণীং স্নিগ্ধতামাহুঃ||১২৯||

তিলতৈলপ্রাধান্যকথনদ্বারেণেতরেষাং তৈলানামপি তৈলত্বমাহ- সর্বেভ্যস্ত্বিত্যাদি| নিষ্পত্তেরিতি যথা তৈলং তিলানাং নিষ্পদ্যতে তথৈবৈরণ্ডাদিতৈলমপীতি নিষ্পত্তিসাম্যাদিত্যর্থঃ| তদ্গুণত্বাচ্চেতি কৈশ্চিত্তিলতৈলকর্মভিঃ কৈশ্চিত্তিলতৈলধর্মৈশ্চ সমানত্বাত্||১৩০||

স্নেহসমানত্বাদ্বসাদিগুণকর্মাহ- গ্রাম্যেত্যাদি| গ্রাম্যা গবোষ্ট্রবস্তাদযঃ, আনূপা মহিষাদযঃ, ঔদকা মত্স্যাদযঃ| জাঙ্গলেত্যাদি জাঙ্গলা এণাদযঃ, একশফা অশ্বাদযঃ, ক্রব্যাদা ব্যাঘ্রাদযঃ| প্রতুদেত্যাদি প্রতুদাঃ কপোতপারাবতাদযঃ, বিষ্কিরা লাবাদযঃ||১৩১||

ইদানীং মধ্বাহ, তস্য সামান্যং স্বগুণং নির্দিশন্নাহ- মধ্বিত্যাদি| রূক্ষদীপনলঘুত্বাদিগুণযুক্তং পুরাণং, নবমেতদ্বিপরীতমিতি| সুকুমারং সৌকুমার্যকরম্| লেখনং পত্তলীকরণম্| হৃদ্যং হৃদযপ্রিযং হিতং চ| বাজীকরণং শুক্রলম্| সন্ধানং ভগ্নস্য| শোধনং দুষ্টব্রণস্য| রোপণং শুদ্ধব্রণস্য| চক্ষুষ্যং চক্ষুষে হিতম্| প্রসাদনং চক্ষুষোর্দেহস্য চ| হ্লাদি সুখকারি| ত্রিদোষশমনমিতি যদ্যপি শৈত্যরৌক্ষ্যলাঘবৈর্বাতকারিত্বং মধুরত্বাদিনা চ কফকারিত্বং তথাঽপি দ্রব্যগুণোভযপ্রভাবাত্ত্রিদোষঘ্নত্বম্||১৩২||

তদ্ভেদানাহ- পৌত্তিকমিত্যাদি| পিঙ্গলা মহত্যো মক্ষিকাঃ পুত্তিকাঃ, তদ্ভবং পৌত্তিকম্; অন্যে ‘মশকোপমা মক্ষিকাঃ কৃষ্ণবর্ণাঃ পুত্তিকাঃ’ ইতি বদন্তি| ভ্রমরাঃ প্রসিদ্ধাঃ, তদ্ভবং ভ্রামরম্| মক্ষিকাঃ পিঙ্গলা এব স্বল্পাঃ ক্ষুদ্রাঃ, তদ্ভবং ক্ষৌদ্রম্| পিঙ্গলবর্ণা মহত্যো মক্ষিকাস্তদ্ভবং মাক্ষিকম্; অন্যে ‘অত্যল্পা মক্ষিকাঃ’ ইত্যাহুঃ| পীতকপিঙ্গলা ‘বগ’ ইতি লোকে যত্ কুর্বন্তি ছত্রকাকারং হৈমবতে বনে মালববনে চ তচ্ছাত্রম্| “মধূকবৃক্ষপুষ্পেভ্যো জরত্কার্বাশ্রমোদ্ভবাঃ| স্রবন্ত্যার্ধ্যং মধু প্রাহুঃ শ্বেতকং মালবে জনাঃ|| তীক্ষ্ণতুণ্ডাস্তু যাঃ পীতবর্ণাঃ ষট্পদসন্নিভাঃ| অর্ঘা নাম চ তদ্ভূতমার্ঘ্যমিত্যপরে জগুঃ”- ইতি| উষ্ণেন সহার্ঘ্যং ন বিরুধ্যতে| যদুক্তং- “মধূন্যুষ্ণৈর্বিরুধ্যন্তেঽন্যত্রার্ঘ্যাত্”- ইতি| উদ্দালকাঃ কপিলকীটাঃ স্বল্পাঃ প্রাযশো বল্মীকেষ্বন্তর্মধু চিন্বন্তি, তদ্ভবমৌদ্দালকম্| দালমিতি দলং পত্রং, তদুপরিস্থিতং দালম্; অন্যে তু কপিলা এব স্বল্পতরা মক্ষিকাঃ প্রাযেণ বৃক্ষকোটরোদ্ভবা ‘দলা’ ইত্যুচ্যন্তে, তদ্ভবং দালমিতি||১৩৩||

তেষাং প্রত্যেকং গুণমাহ- বিশেষাদিত্যাদি| সবিষান্বযাদিতি সবিষপুষ্পাহারমক্ষিকাসম্ভত্বাত্| ছেদি মেদোগ্রন্থ্যাদীনাম্| মদকৃদিতি বিষান্বযত্বাদেব বিষমদকৃত্||১৩৪-১৩৯||-

নবপুরাণযোর্গুণমাহ- বৃংহণীযমিত্যাদি| আশযাচ্চ্যাবিতস্যাল্পকালস্থাপিতত্বেন নবত্বম্, এতদ্বিপর্যযেণ পুরাণত্বম্||১৪০||-

পক্বামযোর্গুণমাহ- দোষত্রযহরমিত্যাদি| পক্বত্বমগ্নিসংযোগাত্, ঘনীভাবাদিত্যেকে; ‘অগ্নিসংযোগনিষেধান্নিন্দিতমেতত্, তস্মান্মধুনঃ কালবিশেষস্থিত্যা পরিণামাত্ পক্বত্বমামত্বং চ জ্ঞেযম্’ ইত্যন্যে||১৪১||

অনেককর্মকারিণীং যোগবাহিতাং দর্শযন্নাহ- তদ্যুক্তমিত্যাদি| যোগৈরিতি ঔষধসমূহৈরিত্যর্থঃ| যাদৃগ্দ্রব্যেণ সংযোজ্যন্তে তাদৃক্ কর্ম কুর্বন্তীতি যোগবাহিত্বং, তেষাং মধ্যে পরমুত্কৃষ্টং মধ্বিত্যর্থঃ||১৪২||

ইদানীমুক্তাযামপি হিতাহিতীযে প্রক্রমাগতাযামনুষ্ণোপচারতাযাং হেতুং দর্শযন্নাহ- তত্ত্বিত্যাদি| তন্মধু অনুষ্ণোপচারং ভবতীতি সম্বন্ধঃ| কস্মাদিত্যাহ- পুষ্পরসানাং মক্ষিকাসম্ভবত্বাত্, কিম্ভূতানাং নানাদ্রব্যরসগুণবীর্যবিপাকবিরুদ্ধানাং; ‘পুষ্পরসবিষমক্ষিকাসম্ভবত্বাত্’ ইত্যন্যে পঠন্তি; পুষ্পরসবিষসঞ্চারিণ্যো মক্ষিকাঃ পুষ্পরসবিষমক্ষিকাঃ| ‘অনুষ্ণোপচারং যোগবাহি চ’ ইতি কেচিদ্দ্বযং পঠন্তি; তন্ন, পূর্বমুক্তত্বাদ্যোগবাহিতাযাঃ| (মক্ষিকা হি পুষ্পরসসঞ্চারিণ্যস্তত্সম্ভবং মধ্বপি বীর্যেণোষ্ণং ভবতি, তস্মান্মধূষ্ণদ্রব্যেণ নোপচর্যতে যুজ্যতে, উষ্ণেন সহ বিরুদ্ধত্বাদ্ বিষবদিতি ভাবঃ|) উষ্ণেন সহ বিরোধে হেতুমাহ- উষ্ণৈরিত্যাদি| উষ্ণৈরিতি উষ্ণস্পর্শৈঃ, ন তূষ্ণবীর্যৈঃ| বিষান্বযতযা বিষাহারমক্ষিকাপ্রসবতযা| উষ্ণার্তং ঘর্মপীডিতম্| উষ্ণৈর্দ্রব্যৈঃ সহ| উষ্ণে দেশে কালে বা| উক্তমেব সুখবোধনার্থমাহ- তদিত্যাদি| সুকুমারং হ্যুষ্ণেন বিরুধ্যতে; যথা নবনীতস্ত্যানঘৃতজলকুসুমানি| শীতস্যাপি স্বভাবতঃ শীতেনাপি কেনচিদ্বিরোধমাহ- তথাঽন্তরীক্ষেণ জলেন চাপি; খজলেন স্বভাবতঃ; অপিশব্দাদার্ঘ্যমুষ্ণেন সহ ন বিরুধ্যতে||১৪৩-১৪৫||

বমনবিষযে উষ্ণেনাপ্যবিরোধমাহ- উষ্ণেনেত্যাদি| যদ্যপি বমনে উষ্ণস্য মধুনা বিরোধো নোক্তঃ, তথাঽপি বৃদ্ধা ন প্রযুঞ্জতে বমনস্যাধোগতিভযাত্||১৪৬||

অন্যেভ্যোঽজীর্ণেভ্যঃ সকাশান্মধ্বজীর্ণং কষ্টাবহমিত্যাহ- মধ্বিত্যাদি| মধ্বামং মধ্বজীর্ণম্| পরত ঊর্ধ্বম্| আমস্য স্বেদোষ্ণোদকাদয উপক্রমাঃ, তে চোষ্ণত্বান্মধুনো বিরুদ্ধাঃ| সর্বং প্রাণিনম্||১৪৭||

অথেক্ষূণাং সামান্যং গুণমাহ- ইক্ষব ইত্যাদি| ইতিশব্দঃ প্রকারবাচী, তেন ভোরদশতপত্রপাণ্ডুকবেত্রকোদ্রবকচণিপ্রভৃতযো বহ্বযো জাতযো গৃহ্যন্তে| স্থৌল্যাদিতি স্থৌল্যাত্ সামান্যাদেব দ্বাদশজাতযো ভবন্তীত্যর্থঃ||১৪৮-১৪৯||-

গুণানিত্যাদি||১৫০-১৫৪||-

তেষামবযববিশেষেণ গুণবিশেষমাহ- অতীবেত্যাদি| অগ্রেষ্বক্ষিষু বিজ্ঞেয ইতি ইক্ষূণামক্ষীণি পর্বসন্ধিষু প্ররোহজননসমর্থা অঙ্কুরাঃ| অন্যে ‘ত্বক্ষু চ’ ইতি পঠন্তি, ত্বক্ষু বল্কলেষু||১৫৫||-

দন্তনিষ্পীডিতেক্ষুরসস্য গুণমাহ- অবিদাহীত্যাদি|- বৃহল্লঘুপঞ্জিকযোঃ; জেজ্ঝটস্তু- “কফকৃচ্চাবিদাহী চ রক্তপিত্তনিবর্হণঃ| শর্করাসমবীর্যস্তু দন্তনিষ্পীডিতো রসঃ”- ইতি পঠতি| শর্করাসমবীর্য ইত্যত্র বীর্যশব্দঃ শক্তযভিধাযকঃ, নতু শীতাদিবীর্যবাচকঃ| কস্মাদবিদাহী? উচ্যতে- বহিরস্থাযিত্বেন বাতাতপাদ্যনুপহতত্বাত্||১৫৭||

যন্ত্রপীডিতেক্ষুরসস্য গুণমাহ- গুরুরিত্যাদি| যন্ত্রপীডিতস্য বহিশ্চিরস্থিত্যা বাতাতপাদিসংযোগে ত্বগাদিভিঃ সহ পীডনাচ্চ গুরুত্বাদযো ভবন্তি| গুরুত্বং চিরপাকিত্বম্| বিদাহীতি “দ্রব্যস্বভাবাদয গৌরবাদ্বা চিরেণ পাকং জঠরাগ্নিযোগাত্| পিত্তপ্রকোপং বিদহত্ করোতি তদন্নপানং কথিতং বিদাহি”- ইতি| বিষ্টম্ভো গুডগুডাশব্দঃ, অন্যে তু সবাততোদশূলা মলস্যাপ্রবৃত্তির্বিষ্টম্ভঃ|১৫৮|

তস্যাগ্নিপক্বস্য গুণমাহ- পক্ব ইত্যাদি||১৫৮||

ফাণিতস্য গুণমাহ- ফাণিতমিত্যাদি| ফাণিতং ক্ষুদ্রগুডঃ ‘কাকবী’ ইতি লোকে| অস্য ত্রিদোষকরত্বং প্রভাবাত্||১৫৯||

তস্যৈব পাকাদতিঘনভাবং গতস্য গুডসঞ্জ্ঞা, তমাহ- গুড ইত্যাদি| সক্ষার ঈষত্ক্ষারঃ| এতেঽনির্মলগুডগুণাঃ||১৬০||

নির্মলগুডস্য গুণমাহ- পিত্তঘ্ন ইত্যাদি| শুদ্ধো নির্মলো ধবল ইত্যর্থঃ|১৬১|

পুরাণস্য গুডস্য গুণমাহ- সেত্যাদি| সপুরাণ ঈষত্পুরাণঃ||১৬১||

তস্য গুডস্য সংস্কারবিশেষেণ নামান্তরং গুণান্তরং চাহ- মত্স্যণ্ডিকেত্যাদি| মত্স্যণ্ডিকা দ্রবখণ্ডঃ ‘খণ্ডদ্রব’ ইতি লোকে; খণ্ডঃ প্রসিদ্ধঃ; শর্করা সিতোপলা ‘তবরাজ’ ইতি লোকে| গুডান্মত্স্যণ্ডিকা ততঃ খণ্ডস্ততঃ শর্করেতি বৈমল্যোত্কর্ষে শৈত্যাদিপ্রকর্ষ ইত্যর্থঃ||১৬২||

পূর্বোক্তমেব স্পষ্টযতি- যথেত্যাদি| এষামিক্ষুবিকারাণাম্| গৌরবং বাতপিত্তহারিত্বং, গৌরবং মধুরবিপাকিত্বমিত্যন্যে| অন্যে তু ‘স্নেহলাঘবশৈত্যানি’ ইতি পঠন্তি||১৬৩||

মত্স্যণ্ডিকাদীনাং করণেঽপনীযমানস্য মলস্য গুণমাহ- যো য ইত্যাদি| স্বকো গুণঃ শীতাদিরিত্যর্থঃ| তেন তেনৈব স্বকীযেন স্বকীযেনৈব গুণেন| কো নির্দেশ্য ইত্যাহ- তেষাং বিস্রাবণো গুণ ইতি; নির্দেশ্যঃ কথনীযঃ| গুণঃ সমলক্ষারোঽবযববিশেষঃ| কথং সমলক্ষারো গুণঃ কথ্যতে? উচ্যতে- যো যত্সম্বন্ধী ভবতি স তু তদ্গুণ এব , তত্সম্ভূতত্বাত্||১৬৪||

শর্করাযা উত্কর্ষমাহ- সারেত্যাদি||১৬৫||

মধুশর্করাগুণমাহ- মধুশর্করেত্যাদি| পাকাত্ কালান্তরশোষণাদ্বা ঘনীভূতাবযবং মধু শর্করাতুল্যত্বাত্ ‘মধুশর্করা’ ইত্যুচ্যতে| ছেদনী কফাদীনাং পিণ্ডীভূতানাং ভেদকারিণী||১৬৬||

যবাসশর্করাগুণমাহ- যবাসশর্করেত্যাদি| যবাসক্বাথপাকঘনীভাবাচ্ছর্করা কৃতা যবাসশর্করা||১৬৭||

অবশিষ্টশর্করাগুণমাহ- যাবত্য ইত্যাদি||১৬৮||

মধূকপুষ্পোত্থফাণিতস্য গুণমাহ- রূক্ষমিত্যাদি| বস্তিদূষণমিতি মূত্রাশযে বাতাদিপ্রকোপকারি||১৬৯||

অথ মদ্যানি গুণকর্মভ্যাং নির্দিশন্নাহ- সর্বমিত্যাদি| সর্বং পৈষ্টিকং মার্দ্বীকং গৌডং চ ত্রিবিধং হি মদ্যম্| অম্লমিতি লবণবর্জ্যং পঞ্চরসত্বেঽপ্যম্লস্যোত্কটত্বাদম্লকার্যকারিত্বাচ্চাম্লমিত্যুক্তম্| ইন্দ্রিযবোধনম্ ইন্দ্রিযপাটবকরম্| বিকাসি সন্ধিবন্ধবিমোচকম্| সৃষ্টবিণ্মূত্রং বিষ্ঠামূত্রপ্রবর্তকম্| এতে সর্বমদ্যগুণাঃ||১৭০||-

মার্দ্বীকমাহ- মার্দ্বীকমিত্যাদি| মার্দ্বীকমবিদাহিত্বাদিতি মার্দ্বীকং দ্রাক্ষোদ্ভবম্| মধুরান্বযতো মধুরদ্রব্যপ্রভবত্বাত্||১৭১-১৭৩||

খার্জূরমাহ- মার্দ্বীকেত্যাদি| অল্পান্তরং স্তোকভেদম্| কর্শনং কার্শ্যকরম্||১৭৪||-

সুরাগুণমাহ- কাসার্শ ইত্যাদি| সুরা লোহিতবর্ণা পিষ্টকিণ্বকল্কেন কিঞ্চিত্কলুষা| এতে সর্বসুরাগুণাঃ||১৭৫||-

শ্বেতসুরাগুণমাহ- কাসার্শ ইত্যাদি| শ্বেতসুরা শ্বেতপুনর্নবাদিমূলশালিপিষ্টককিণ্বপ্রভবা ‘কতোলী’ ইত প্রসিদ্ধা||১৭৬||-

প্রসন্নাগুণমাহ- ছর্দীত্যাদি| তোদঃ পীডা, শূলং দ্বাদশপ্রকারমুক্তলক্ষণম্| প্রসন্না সুরাযা মণ্ড উপর্যচ্ছো ভাগঃ| বিবন্ধো বাতাদীনামপ্রবৃত্তিঃ| আনাহ উদরাপূরঃ||১৭৭||-

পিষ্টসুরাং কথযিত্বা কুধান্যসুরামাহ- পিত্তলেত্যাদি| যবৈরিতি বহুবচনাদ্যবযবিকাতিযবা গৃহ্যন্তে| সবাততোদশূলা মলস্যাপ্রবৃত্তির্বিষ্টম্ভঃ, অন্যে গুডগুডাশব্দমাহুঃ| যবকিণ্বেন সুরেযম্||১৭৮||-

মধূলকমাহ- শ্লেষ্মলং তু মধূলকমিতি| মধূলকঃ স্বল্পগোধূমো মধ্যদেশে ‘পীশীকা’ ইতি খ্যাতাঃ, মর্কটহস্ততৃণং বা, তত্ফলকিণ্বং মধূলকম্; ‘অসঞ্জাতমদ্যং মধূকপুষ্পোত্থম্’ ইতি জেজ্ঝটঃ||১৭৮||

আক্ষিকীং সুরামাহ- রূক্ষেত্যদি| অক্ষস্য বিভীতকস্য বল্কলৈঃ সহ কৃতা আক্ষিকী; ‘বল্কিকী’ ইতি কেচিত্, অত্রাপি স এবার্থঃ||১৭৯||

কোহলগুণমাহ- ত্রিদোষ ইত্যাদি| যবসক্তুকৃতঃ কোহলঃ ‘কৌহলিকা’ ইতি লোকে, অন্যে পুনর্ভক্তসুরামাহুঃ, যামেব পৌণ্ড্রাঃ ‘কাঞ্চনালী’ ইত্যাহুঃ|১৮০| -

জগলগুণমাহ- গ্রাহীত্যাদি| জগলোঽধঃ কিট্টং মদ্যস্য যো বহিস্ত্যজ্যতে| অন্যে ‘কিণ্বভক্তসুরা জগলমিত্যুচ্যতে’| শোফহা লেপেন| শোষঃ ক্ষযঃ||১৮০||-

বক্কসগুণমাহ- বক্কস ইত্যাদি| বক্কসো জগল এবাদ্রবঃ কিণ্বৌষধমাত্রম্||১৮১||-

গুডশীধুমাহ- কষায ইত্যাদি| শীধুঃ সস্যক ইক্ষুরসেন ক্বথিতেন ধাতক্যাদিবদ্ধপাশঃ কালান্তরেণ নিষ্পন্নঃ কিঞ্চিদ্গুডঘৃতাবাপঃ সস্যকবাচ্যঃ||১৮২||

শার্করশীধুমাহ- শার্কর ইত্যাদি| গুডশর্করযা খণ্ডশর্করযা বা ক্রিযত ইতি শার্করশীধুঃ| ইন্দ্রিযবোধনঃ ইন্দ্রিযপাটবজনকঃ||১৮৩||

পক্বরসশীধুমাহ- তদ্বদিত্যাদি| তদ্বত্ শার্করবত্| পক্বরসঃ পক্বেনেক্ষুরসাদিনা কৃতঃ||১৮৪||

অপক্বরসশীধুগুণমাহ- কর্শন ইত্যাদি| শীতরসিকস্ত্বপক্বরসকৃতঃ| জরণোঽন্নাদিপরিণামকারী||১৮৫||

আক্ষিকশীধুমাহ- আক্ষিক ইত্যাদি| বিভীতকক্বাথগুডকৃতো ধাতকীকুসুমাদিকৃতসংস্কারঃ শীধরাক্ষিকঃ| দ্রব্যপ্রভাবাদপরমদ্যাপেক্ষযা প্রাযশঃ পাণ্ডুরোগে ব্রণে চাবিরুদ্ধাঃ; গ্রাহিত্বমপ্যেবং বাচ্যম্||১৮৬||

জাম্ববশীধুমাহ- জাম্বব ইত্যাদি| জম্বূফলরসতুম্বরুক্বাথগুডধাতক্যাদিকৃতসংস্কারো জাম্ববঃ শীধুরুক্তঃ| বদ্ধনিস্যন্দো বদ্ধমূত্রঃ| তুবরঃ কষাযঃ|১৮৭|

আসবমাহ- তীক্ষ্ণ ইত্যাদি| সুরাসবঃ সুরযা সূযতে তোযকার্যং ক্রিযতে যস্মিন্ সঃ সুরাসবঃ| সঃ স্থিরমদশ্চিরকালমত্ততাকারী||১৮৭||-

মধ্বাসবমাহ- লঘুরিত্যাদি| মধ্বাসবো মধুগুডাভ্যাং সন্ধানম্||১৮৮||-

মৈরেযসঞ্জ্ঞকত্রিযোনিমাসবমাহ- তীক্ষ্ণ ইত্যাদি| তত্র মৈরেযো নাম সুরাসবযোঃ প্রত্যেকনিষ্পাদিতযোরেকীকৃত্য পুনঃ সন্ধানান্মৈরেযঃ| সুরা পৈষ্টী, আসবশ্চ গুডযোনিঃ, মধু চ দেযমিতি ত্রিযোনিত্বম্| যদি বা পৈষ্টী মধ্বাসবো গুডশ্চেতি সন্ধানাত্ত্রিযোনিত্বেন মৈরেযো দ্বিবিধো ভবতি||১৮৯||-

ইক্ষুরসাসবমাহ- বল্য ইত্যাদি| ‘মৃদ্বীকেক্ষুরসাসবঃ’ ইতি দ্বযমন্যে পঠন্তি| মার্দ্বীকং মদ্যমুক্তম্, অযং ত্বাসবঃ||১৯০||

পুষ্পযোনিং শীধুমাহ- শীধুরিত্যাদি| অত্র মধূকপুষ্পোত্থে কেচিদ্গুডং নেচ্ছন্তি, শীধুত্বাদ্গুডমিচ্ছন্ত্যন্যে||১৯১||

অনুক্তসঙ্গ্রহাযাহ- নির্দিশেদিত্যাদি| কন্দাদ্যুপলক্ষণং, তেন কাণ্ডত্বগাসবা অপি গৃহ্যন্তে|১৯২|

নবমদ্যস্য দোষমাহ- নবমিত্যাদি| নবত্বমজাতরসপ্রসাদত্বেন, অন্যে তু ‘অনতীতসংবত্সরং নবম্’ ইত্যাহুঃ||১৯২||-

জীর্ণস্য গুণমাহ- সুগন্ধীত্যাদি| রোচিষ্ণু সাধু রোচতে, তৃপ্তস্যাপি রুচিকরম্| পুরাণত্বং জাতরসপ্রসাদনত্বেন গন্ধাদিসম্পত্ত্যা; ‘অতীতসংবত্সরং জীর্ণম্’ ইত্যন্যে বদন্তি||১৯৩||-

আসবপ্রসঙ্গেন তত্সদৃশারিষ্টগুণমাহ- অরিষ্ট ইত্যাদি| দ্রব্যসংযোগঃ অভযাচিত্রকাদিসংযোগঃ| সংস্কারাচ্চ মদ্যাদধিককর্মতা| বহুদোষহরশ্চৈবেতি দোষশব্দো ব্যাধিবাচী| দোষাণাং শমন ইত্যস্য ভাষ্যং- কফবাতঘ্ন ইতি| পিত্তাবিরোধন ইতি নঞীষদর্থে, তেনেষত্ পিত্তং হন্তীতি মন্যতে| বহুব্যাধিহর ইত্যেতস্য তু ভাষ্যং- শূলাধ্মানোদরাদীনাং হিত ইতি; শূলাদিকে হিত ইত্যর্থঃ, অন্যে ‘কফবাতঘ্নত্বং বিশেষতঃ’ ইত্যাহুঃ||১৯৪-১৯৫||-

পিপ্পল্যাদ্যরিষ্টমাহ- পিপ্পল্যাদীত্যাদি||১৯৬||

শেষারিষ্টানাং স্থানমাহ- চিকিত্সিতেষ্বিত্যাদি|১৯৭|

অনুক্তসঙ্গ্রহমাহ- অরিষ্টাসবেত্যাদি| শীধুশব্দেনাত্র মদ্যমাহুঃ| দ্রব্যপ্রধানমরিষ্টং, দ্রবপ্রধান আসবঃ, উভযপ্রধানং মদ্যম্| বুদ্ধ্যা অবেক্ষ্য জ্ঞাত্বা, যথাস্বমিতি যদ্যস্য রোগাদ্যপেক্ষযা হিতং দ্রব্যসংস্কারাদি এতেনারিষ্টাদি বিধীযতে , অতস্তদনুরূপং গুণকর্ম বাচ্যমিত্যর্থঃ||১৯৭||-

মদ্যদোষানাহ- সান্দ্রমিত্যাদি| সান্দ্রং ঘনম্| বিদাহোঽস্যাস্তীতি বিদাহি “জঠরাগ্নিসংযোগাদ্যঃ পাকমগচ্ছন্ মধ্যমাযামেব পাকাবস্থাযাং বিদহ্যমানঃ পিত্তং কুর্বংশ্চিরকালমবতিষ্ঠতে ন শীঘ্রং জরাং যাতি গুরুত্বাদ্বস্তুস্বভাবাদ্বা স বিদাহযুক্তো ভাবো ভণ্যতে” ইত্যাগমিকাঃ; অন্যে ‘বিদাহি বিবিধসন্তাপকারি’ ইত্যাহুঃ| দুর্গন্ধং কুত্সিতগন্ধম্| বিরসং বিরুদ্ধরসমনিষ্টরসমিত্যর্থঃ| কৃমিলং কৃমিযুক্তম্| গুরু চিরপাকি| অহৃদ্যম্ অপ্রিযম্| তরুণং নবম্| তীক্ষ্ণং মুখে দুঃখোত্পাদকম্| উষ্ণং স্পর্শতঃ| দুর্ভাজনস্থিতং কুত্সিতপাত্রস্থম্| অল্পৌষধং স্তোকধাতক্যাদিকম্| পর্যুষিতং সন্ধানভাণ্ডাদন্যস্মিন্ ভাণ্ডে রাত্র্যুষিতম্| অত্যচ্ছম্ অতিতনু| পিচ্ছিলং শ্লেষ্মস্পর্শবত্| সর্বথা সর্বৈঃ প্রকারৈঃ| স্তোকসম্ভারাদিদোষফলমাহ- তত্রেত্যাদি| স্তোকসম্ভারম্ অল্পৌষধম্| পেলবম্ অচ্ছম্, অন্যে তরুণমাহুঃ| সর্বদোষৈরিতি সর্বদোষৈঃ সান্দ্রাদিভিঃ||১৯৮-২০২||-

দোষানভিধাযেদানীং মদ্যস্য গুণানাহ- চিরস্থিতমিত্যাদি| প্রসন্নং নির্মলম্| সুরভি সুগন্ধি| মদাবহং হর্ষকারি| পূর্বদোষান্বিতং বর্জ্যম্; এতদ্গুণান্বিতং সেব্যম্||২০৩||-

ইদানীং যথা মদ্যং মদযতি তদাহ- তস্যেত্যাদি| তস্য এবংবিধস্য মদ্যস্য, বীর্যং শক্তিঃ, হৃদযং প্রাপ্যাচিরেণ মদযতি হর্ষযতীতি সম্বন্ধঃ| অনেকপ্রকারত্বং মৃদ্বীকাদিযোনিভেদেন, তথা রসবীর্যতশ্চ; রসা লবণবর্জ্যাঃ, বীর্যমুষ্ণরূক্ষাদি| কথং মদযতীত্যাহ- বিচাল্যেন্দ্রিযচেতাংসীতি; বিচাল্য ক্ষোভযিত্বা , ইন্দ্রিযাণি চক্ষুরাদীনি, চেতো মনঃ| কিংবিশিষ্টং বীর্যং? ধমনীরূর্ধ্বমাগতমিতি| কথং পুনরস্য ধমনীভিরূর্ধ্বগমনং ভবতীত্যাহ- বহ্নিনা সমেত্য মিলিত্বা, স্বভাবেনৈব বহ্নেরূর্ধ্বগামিত্বাত্| কথং পুনস্তন্মদ্যবীর্যং সূক্ষ্মাণীন্দ্রিযচেতাংসি মদযতীত্যাহ- সৌক্ষ্ম্যাদিতি| ঊর্ধ্বগামিত্বে দ্বিতীযং হেতুমাহ- ঔষ্ণ্যাদিতি| আগ্নেযদ্রব্যস্য স্বভাবেনৈবোর্ধ্বগামিত্বাত্| কুতঃ পুনরচিরেণ মদ্যবীর্যং মদযতীত্যাহ- তৈক্ষ্ণ্যাদিতি| তীক্ষ্ণং হি দ্রব্যমচিরকারি ভবতি| মদ্যবীর্যস্যাচিরকারিত্বেঽপরমপি হেতুমাহ- বিকাসিত্বাদিতি|- বিকাসি সন্ধিবন্ধবিমোচনকারি| চকারেণানুক্তমপি লাঘবমূর্ধ্বগমনে হেতুঃ সমুচ্চীযতে||২০৪-২০৫||-

শারীরদোষেণ মদভেদমাহ- চিরেণেত্যাদি| শ্লৈষ্মিকে শ্লেষ্মপ্রকৃতিকে| বাতিকে বাতপ্রকৃতিকে| পৈত্তিকে পিত্তপ্রকৃতিকে| শীঘ্রমেব চেতি চকারাত্তীক্ষ্ণশ্চ||২০৬||

মানসদোষেণ মদভেদমাহ- সাত্ত্বিক ইত্যাদি| সাত্ত্বিকে সত্ত্বপ্রকৃতিকে| দাক্ষিণ্যং পরাপেক্ষিণী প্রকৃতিঃ| লালসঃ অভিলাষুকঃ| সুরতোত্সাহো মৈথুনোদ্যমঃ| রাজসে রজঃপ্রকৃতিকে| দুঃখশীলত্বং দুঃখসেবিত্বম্| আত্মত্যাগং সসাহসং দেহনাশকারি সাহসম্| অনুবন্ধং নিরন্তরম্| মদ্যকার্যো মদো মত্ততেত্যর্থঃ| অশৌচেত্যাদি| তামসে তামসপ্রকৃতিকে| মাত্সর্যং পরাসহিষ্ণুতা, লোলতা অভিলাষঃ||২০৭-২০৯||

শুক্তাদিকর্মাণি দর্শযন্নাহ- রক্তপিত্তকরমিত্যাদি| শুক্তং চুক্রমুচ্যতে; যদুক্তং- “যন্মস্ত্বাদি শুচৌ ভাণ্ডে সগুডক্ষৌদ্রকাঞ্জিকম্| ধান্যরাশৌ ত্রিরাত্রস্থং শুক্তং চুক্রং তদুচ্যতে” ইতি; তচ্চেক্ষুরসমধূকপুষ্পপীলুপ্রভৃতিভিঃ কষাযব্যতিরেকেণাসূযতে, কন্দাদ্যাসুতমপি শুক্তমাহুরন্যে| ছেদনং কফগ্রন্থ্যাদীনাম্| বৈস্বর্যং বিস্বরত্বোত্পাদকম্| জরণমামস্য| শ্লেষ্মপাণ্ডুঃ শ্লেষ্মোত্কটঃ পাণ্ডুরোগ ইত্যর্থঃ||২১০||-

শুক্তসন্ধিতানাং কন্দাদীনামপি শুক্তগুণমাহ- তদ্বদিত্যাদি| তদ্বত্ শুক্তবত্| তদাসুতং শুক্তসন্ধিতং কন্দাদিকম্||২১১||

শুক্তস্য যোনিভেদেন গুণমাহ- গৌডানীত্যাদি| গৌডানি গুডোদ্ভবানি; “গুডাম্বুনা সতৈলেন সন্ধানং কাঞ্জিকং তু যত্| কন্দশাকফলৈর্যুক্তং গুডশুক্তং তদুচ্যতে”- ইতি| রসশুক্তানি ইক্ষুরসাদিকৃতানি| গুডশুক্তবদিক্ষুরসশুক্তং সন্ধেযম্| মধুশুক্তং তু “জম্বীরস্য ফলরসং পিপ্পলীমূলসংযুতম্| মধুভাণ্ডে বিনিক্ষিপ্য ধান্যরাশৌ নিধাপযেত্|| ত্র্যহেণ তজ্জাতরসং মধুশুক্তমুদাহৃতম্|”- ইতি| (মধুভাণ্ডে ইতি মধুপূর্ণপ্রাযে ভাণ্ডে ইত্যর্থঃ; অথবা মধূনি কৃত্বা ভাণ্ডে নিক্ষিপ্যেতি যোজ্যম্|) মদ্যশুক্তমিতি পাঠান্তরং; তত্র মদ্যশুক্তলক্ষণমুচ্যতে- “সর্বং মদ্যং পঞ্চরসং কালান্তরবশাদ্যদা| ত্যক্ত্বাঽন্যরসমম্লত্বং যাতি শুক্তং তদুচ্যতে” ইতি| চকারেণ ধান্যযোনিশুক্তমপ্যস্তীতি সমুচ্চীযতে| যথাপূর্বং যো যঃ পূর্বঃ; মদ্যশুক্তাপেক্ষযা রসশুক্তং গুরু, তদপেক্ষযা গৌডমিত্যর্থঃ| দোষধাতুমলস্রোতসাং ক্লেদপ্রাপ্তিজননমভিষ্যন্দি||২১২||

তুষাম্বুসৌবীরকযোর্গুণমাহ- তুষাম্ব্বিত্যাদি| কাঞ্জিকভেদাবেতৌ| তুষাম্বুসৌবীরকে বিরেচনাধ্যাযোক্তে অপি সন্ধানসামান্যাদধিকগুণকর্মদর্শনাযেহোক্তে||২১৩||

ধান্যাম্লমাহ- ধান্যাম্লমিত্যাদি| ধান্যাম্লং কাঞ্জিকং শালিজূর্ণাহ্বকোদ্রবাদিকৃতং মদ্যম্| জীবনং প্রাণধারণং শাল্যা দিকৃতত্বাত্| দাহনাশনং স্পর্শাত্| পানাত্তু পবনকফতৃষ্ণাহরমিতি পানাত্ সবাযুং কফং, তযোস্তৃষ্ণাং চ হরতীত্যর্থঃ| শোষো মুখস্য| জরণং পাচনম্| আস্থাপনেষু নিরূহেষু||২১৪-২১৬||

অথ মূত্রাণ্যুচ্যন্তে- মূত্রাণীত্যাদি| অষ্টানামপি মূত্রাণাং সামান্যগুণমাহ- তীক্ষ্ণানীত্যাদি| শোধনানি মলশুদ্ধিকরাণি| তত্ সর্বমিত্যাদি| পদ্যোক্তত্বান্ন দ্বিরুক্তম্||২১৭-২১৯||

গোমূত্রগুণমাহ- গোমূত্রমিত্যাদি| গোমূত্রং গোরেব ন তু বৃষভস্য, মহিষীসাহচর্যাত্, ন হি তত্র মহিষেতি পাঠঃ; অথবা বৃদ্ধব্যবহারাদিত্যেকে; আচার্যাস্তু গোমহিষ্যজাবীনাং স্ত্রীণাং, গজহযখরোষ্ট্রমানুষাণাং পুনঃ পুংসাম্, অনুক্তব্যক্তিকে তু মূত্রপাঠে উভযোরপি মূত্রাণি গ্রাহ্যাণি, যত্র তু ব্যক্তযা স্ত্রীপুরুষনির্দেশস্তত্র তস্যৈবেতি নির্ণীতবন্তঃ||২২০-২২১||

মাহিষমূত্রমাহ- দুর্নামেত্যাদি| অবিশুদ্ধির্বমনাদীনাম্||২২২||

ছাগমূত্রমাহ- কাসশ্বাসাপহমিত্যাদি||২২৩||

মৈষমূত্রমাহ- কাসেত্যাদি||২২৪||

আশ্বমূত্রমাহ- দীপনমিত্যাদি| চেতোবিকার উন্মাদাদযঃ||২২৫||

গজমূত্রমাহ- সতিক্তমিত্যাদি| কিলাসং পাণ্ডুরং কুষ্ঠম্||২২৬||

গর্দভমূত্রমাহ- গরচেত ইত্যাদি| গরঃ কৃত্রিমং বিষম্||২২৭||

কারভমূত্রমাহ- শোফেত্যাদি| কারভম্ ঔষ্ট্রম্|২২৮|

মানুষমূত্রমাহ- মানুষমিত্যাদি| কারভং মানুষং চ মূত্রং বিষাপহমিত্যর্থঃ| মানুষমষ্টানাং মূত্রাণাং মধ্যেঽনুদ্দিষ্টমপি ‘তত্ সর্বম্’ ইত্যনেনৈব পূর্বোক্তেন সূচিতত্বাদ্বিবৃতম্||২২৮||

উক্তানুক্তদ্রবাণামূহার্থমাহ- দ্রবদ্রব্যাণীত্যাদি| দেশকালবিভাগজ্ঞ ইতি ‘বৈদ্য’ ইতি শেষঃ||২২৯||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে পঞ্চচত্বারিংশত্তমোঽধ্যাযঃ||৪৫||