৫. কুষ্ঠনিদানম্

অথেত্যাদি||১-২||

ইদানীং হেতুমাহ- মিথ্যেত্যাদি| মিথ্যাহারাচারস্য শাস্ত্রোক্তবিধিভ্রষ্টাহারাচারস্যেত্যর্থঃ| সম্প্রাপ্তিমাহ- তস্যেত্যাদি| তস্য মিথ্যাহারাচারস্যেত্যাদিকস্য| সমুদ্ভূয আক্ষিপ্য, সমন্তাত্ সর্বত্র; এতেন সর্বদেহগতত্বং রোগস্য সূচযতি||৩||

পূর্বরূপমাহ- তস্যেত্যাদি| অকস্মাত্ কারণং বিনা| স্বাপঃ স্পর্শাজ্ঞানম্||৪||

ইদানীং সঙ্খ্যামাহ- তত্রেত্যাদি| মহত্ত্বমুত্তরোত্তরধাত্বনুপ্রবেশাত্| একাদশকুষ্ঠানাং ক্ষুদ্রত্বমুত্তরোত্তরধাত্বননুপ্রবেশাত্| অষ্টাদশ কুষ্ঠানি ভবন্তীতি দিঙ্মাত্রমিদং দর্শিতং, কুষ্ঠানামনিযতসঙ্খ্যত্বাত্; তথা চ চরকঃ- “সপ্তবিধোঽষ্টাদশবিধোঽসঙ্খ্যেযবিধো বা” (চ. নি. ৫) ইতি| মহাকুষ্ঠানি নামতঃ প্রাহ- তত্র মহাকুষ্ঠানীত্যাদি| ক্ষুদ্রকুষ্ঠানি নামতঃ প্রাহ- ক্ষুদ্রকুষ্ঠান্যপীত্যাদি||৫||

সর্বেষ্বেব কুষ্ঠেষু সর্বেষামেব দোষাণাং ক্রিমীণাং চ সম্ভবং দর্শযন্নাহ- সর্বাণীত্যাদি| সর্বাণি ক্ষুদ্রাণি মহান্তি চ| কথং তর্হি বাতেনারুণমিত্যাদীত্যাশঙ্ক্যাহ- উত্সন্নতস্তু দোষগ্রহণমভিভবাদিতি; উত্সন্নত ঔত্কট্যাত্ দোষগ্রহণম্, অভিভবাত্ ‘ইতরদোষযোঃ’ ইতি শেষঃ||৬||

যস্য দোষস্য যস্মিন্ কুষ্ঠে ঔত্কট্যং তেন তদ্দর্শযন্নাহ- তত্রেত্যাদি| তত্রারুণাদীনাং সপ্তানাং মহত্ত্বাদিষু হেতুং দর্শযন্নাহ- তেষামিত্যাদি| অনুশব্দেন পশ্চাদর্থবাচিনা মহত্বেঽসাধ্যত্বেঽপি কাকণকবর্জং কালান্তরং চ সূচ্যতে; কাকণকং পুনরুত্পত্তাবেবাসাধ্যং, ব্যাধিস্বভাবাত্| অসাধ্যত্বং চেতি চকারো ধাত্বনুপ্রবেশাচ্চেত্যনন্তরং দ্রষ্টব্যঃ; তেনানুক্তমারম্ভকদোষমহত্ত্বং সমুচ্চিনোতি||৭||

তত্র মহাকুষ্ঠানাং লক্ষণং দর্শযন্নাহ- তত্র বাতেনেত্যাদি| ঋষ্যজিহ্বাপ্রকাশানীতি ঋষ্যজিহ্বাযা ইব প্রকাশঃ সাদৃশ্যং যেষাং তানি খরত্বযুক্তানি, ঋষ্যো নীলাণ্ডঃ ‘রোরু ’ ইতি প্রসিদ্ধঃ; অন্যে ‘ঋক্ষ’ ইতি পঠন্তি, ঋক্ষো ‘রীছ’ ইতি লোকে| কৃষ্ণকপালিকা কৃষ্ণকর্করা| কাকণন্তিকা গুঞ্জা, ‘চিরহণ্টিকা’ ইতি প্রসিদ্ধা, তত্ফলবদ্রক্তানি মধ্যে কৃষ্ণানি| উদুম্বরাদীনাং পিত্তকৃতত্বং দর্শযন্নাহ- তেষামিত্যাদি| উষোঽনলসমীপ ইবোপতাপঃ, প্লুষ্টস্যেব বেদনাবিশেষ ইত্যন্যে; চোষ আচূষ্যত ইব বেদনাবিশেষঃ, পিপাসেত্যন্যে; পরিদাহঃ সর্বতো দাহঃ; ধূমাযনং ধূমোপহতস্যেব, ‘ধূমোদ্বমনমিবাঙ্গানাম্’ ইত্যেকে| পুণ্ডরীকদদ্রুকুষ্ঠযোর্লক্ষণং দর্শযন্নাহ- শ্লেষ্মণেত্যাদি| পুণ্ডরীকং শ্বেতপদ্মম্| দদ্রুকুষ্ঠং দ্বিবিধং- সিতমসিতং চ; অসিতস্য মহোপক্রমসাধ্যত্বাদনুবন্ধিত্বপ্রকর্ষাচ্চ মহাকুষ্ঠেষু মধ্যে সুশ্রুতে পাঠঃ, সিতদদ্রুকুষ্ঠস্য সুখসাধ্যত্বাদুত্তরোত্তরধাত্বনুপ্রবেশাভাবাত্তথাঽত্যর্থপীডারহিতত্বাচ্চ চরকে ক্ষুদ্রকুষ্ঠেষু মধ্যে পাঠ ইত্যদোষঃ| দদ্রুসিধ্মযোঃ সুশ্রুতচরকোদিতযোরভিধানভেদ ইতি জেজ্ঝটঃ সমাদধতি, তন্নেচ্ছতি গযী| তযোঃ পুণ্ডরীকদদ্রুকুষ্ঠযোঃ পিত্তকফকৃতত্বং দর্শযন্নাহ- তযোরিত্যাদি| পরিমণ্ডলতা পরিপূর্ণমণ্ডলতা||৮||

ক্ষুদ্রকুষ্ঠেষু প্রাক্ স্থূলারুষ্কমাহ- স্থূলানীত্যাদি| স্থূলানি স্থূলমূলানি| দারুণানি কৃচ্ছ্রসাধ্যানি| অরূংষি ব্রণাঃ|৯|-

মহাকুষ্ঠলক্ষণমাহ- ত্বক্কোচেত্যাদি| ত্বক্শব্দঃ কোচভেদস্বপ্নৈঃ সহ প্রত্যেকং সম্বধ্যতে; তেন ত্বক্কোচঃ ত্বক্সঙ্কোচঃ, ত্বগ্ভেদঃ ত্বগ্বিদারণং, ত্বক্স্বপনং ত্বচোঽচেতনত্বম্, অঙ্গসাদোঽঙ্গগ্লানিঃ| কুষ্ঠে মহত্পূর্বযুত ইতি মহাকুষ্ঠ ইত্যর্থঃ||৯||

এককুষ্ঠমাহ- কুষ্ণারুণমিত্যাদি|১০|-

চর্মদলমাহ- স্যুর্যেনেত্যাদি| চোষ আচূষণমিব| তলেষু হস্তপাদতলেষু||১০||

বিসর্পকুষ্ঠলক্ষণমাহ- বিসর্পবদিত্যাদি| অত্রোক্তবিসর্পাখ্যকুষ্ঠস্য বক্ষ্যমাণবিসর্পরোগস্য চ চিরবিসর্পণশীঘ্রবিসর্পণতো ভেদঃ||১১||

পরিসর্পমাহ- শনৈরিত্যাদি|১২|-

সিধ্মকুষ্ঠমাহ- কুণ্ড্বন্বিতমিত্যাদি| অপাযি অকষ্টকারি | প্রাযশ ঊর্ধ্বকায ইতি প্রাযঃশব্দোপাদানাদধঃকাযেঽপি কদাচিদ্ভবতি| সিধ্মকুষ্ঠং দ্বিবিধং- পুষ্পিকাসিধ্মং, সিধ্মং চ; পুষ্পিকাসিধ্মস্য সুখসাধ্যত্বাত্ সুশ্রুতে ক্ষুদ্রকুষ্ঠেষু পাঠঃ, সিধ্মস্য দুঃখসাধ্যত্বাচ্চরকে মহাকুষ্ঠে পাঠ ইত্যদোষঃ||১২||

বিচর্চিকামাহ- রাজ্য ইত্যাদি| রাজ্যো রেখাঃ, তাশ্চ সরূক্ষা ভবন্তি| কণ্ড্বর্তিঃ খর্জূপীডা, রুজো বেদনাঃ, অতিশব্দঃ কণ্ড্বর্তিরুগ্ভ্যাং সম্বধ্যতে| গাত্রেষু পাণিপাদেষু| কণ্ডূমতীত্যাদি| ইযমেব বিচর্চিকা পাদগতা যদা স্যাত্তদা বিচর্চিকাসঞ্জ্ঞাং বিহায বিপাদিকাসঞ্জ্ঞাং প্রাপ্নোতীত্যর্থঃ||১৩||

কিটিভমাহ- যদিত্যাদি| ‘রক্তকৃষ্ণং’ ইতি কেচিত্ পঠন্তি|১৪|-

অথ পামামাহ,- সাস্রাবেত্যাদি| সহাস্রাবকণ্ডূপরিদাহকৈর্বর্তন্তে যাঃ পিডকাস্তাস্তথাবিধাঃ, তাভিরূহ্যা পামেতি সম্বন্ধঃ; যে তু ‘সাস্রাবকণ্ডূপরিদাহবদ্ভিঃ’ ইতি পঠন্তি, তে তু ব্যাখ্যানযন্তি- সাস্রাবৌ যৌ কণ্ডূপরিদাহৌ তদ্যুক্তৈঃ পুরুষৈঃ কৃত্বা, অণুকাভিঃ পিডকাভিঃ কৃত্বা, পামা ঊহ্যা ‘বৈদ্যৈঃ’ ইতি শেষঃ| সৈব কচ্ছূরিতি সৈব পাণ্যোঃ স্ফিজোশ্চ তীব্রদাহৈঃ স্ফোটৈরুপগতা কচ্ছূরুচ্যতে||১৪||-

রকসামাহ- কণ্ড্বন্বিতেত্যাদি| শরীরে সকলে কাযে||১৫||

ইদানীং কস্মিন্ ক্ষুদ্রকুষ্ঠে কস্যাধিক্যমিত্যাহ- অরুরিত্যাদি| অরুঃ স্থূলারুষ্কম্| শেষাণি বিসর্পকিটিভবিচর্চিকাপামাচর্মদলানি| অরুঃ সসিধ্মমিত্যাদি| জেজ্ঝটেন স্বকপোলকল্পিতঃ শ্লোক ইতি গযদাসো ন মন্যতে, যস্মাদেককুষ্ঠং মহাকুষ্ঠং চ বাতাদেব ভবতি ন কফাত্, পরিসর্পং পিত্তাত্; পাঠান্তরং চাত্র ‘অরুষ্কং’ ইত্যাদি পঠতি, তচ্চাভাবান্ন লিখিতম্||১৬||

কিলাসং নির্দিশন্নাহ- কিলাসমপীত্যাদি| অপিশব্দঃ সম্ভাবনাযাং, তেন কিলাসং কুষ্ঠবিকৃতিরিতি সম্ভাব্যতে; অন্যে তু, কিমপি কিলাসং কুষ্ঠবিকল্পো ন ভবতীত্যপিশব্দাদাহুঃ; কিং তত্ কিলাসং কুষ্ঠবিকল্পো ন ভবতি? উচ্যতে- ত্বগ্গতমপরিস্রাবি চেতি; অন্তরং ভেদঃ| ত্বগ্গতমিতি কুষ্ঠং ত্বগ্রক্তমাংসমধিষ্ঠায ত্বচি দর্শযত্যাত্মানং, কিলাসং তু ত্বচমেব কেবলামধিতিষ্ঠতীত্যর্থঃ| অন্যে তু ‘ত্বগ্গতমেব কিলাসসঞ্জ্ঞং, তদেব ধাত্বনুপ্রবেশাচ্ছ্বিত্রসঞ্জ্ঞম্’ ইত্যাহুঃ| তথা চ বিশ্বামিত্রঃ,- “ত্বগ্গতং তু যদস্রাবি কিলাসং তত্ প্রকীর্তিতম্| যদা ত্বচমতিক্রম্য তদ্ধাতূনবগাহতে|| হিত্বা কিলাসসঞ্জ্ঞাং চ শ্বিত্রসঞ্জ্ঞাং লভেত তত্”- ইতি| বাতাদিজানাং কিলাসানাং লক্ষণমাহ- তদ্বাতেনেত্যাদি| পরিধ্বংসীতি ঘৃষ্টং সদ্রজো বিমুঞ্চতীত্যর্থঃ| বহলং স্থূলম্| অতঃ পরমসাধ্যাবধারণং- তেষ্বিত্যাদি| তেষু বাতপিত্তশ্লেষ্মজেষু কিলাসেষু| সম্বদ্ধমণ্ডলমিতি পরস্পরমভিন্নমণ্ডলমিত্যর্থঃ| অন্তে জাতম্ ওষ্ঠপাণিপাদগুহ্যজম্; অন্যে ত্বত্র ‘অন্তর্জাতরক্তরোম চ’ ইতি পঠন্তি; অন্তর্মধ্যে জাতানি রক্তানি লোমানি যত্র তত্তথা; তে চাচার্যা ‘অগ্নিদগ্ধং চ’ ইতি চকারেণ পাণিপাদগুহ্যৌষ্ঠজমনুক্তমপ্যসাধ্যং সমুচ্চিন্বন্তি||১৭||

কুষ্ঠানাং সঙ্ক্ষেপেণোক্তত্বাদনুক্তমপি দোষলিঙ্গং দর্শযন্নাহ- কুষ্ঠেষ্বিত্যাদি| বাতকার্যেষু স্বেদশ্চিন্ত্যঃ| ‘ত্বক্সঙ্কোচস্বাপাস্বেদৌ’ ইত্যন্যে পঠন্তি, তত্র নঞ্ স্বেদনিষেধার্থঃ; ‘ব্যাধিস্বভাবাত্ স্বেদোঽপি স্যাত্’ ইত্যপরে| কৌণ্যং নষ্টকরতা| সত্ত্বোত্পত্তযঃ ক্রিমীণাং জন্মানি ||১৮||

তেষামসাধ্যতাং দর্শযন্নাহ- তত্রেত্যাদি| পুণ্ডরীকমাদিবলপ্রবৃত্তং শুক্রশোণিতদোষজমসাধ্যম্| ননু চাদিবলপ্রবৃত্তমন্যদপি কুষ্ঠমসাধ্যমেব, যদাহ চরকঃ,- “যে চাপি কেচিত্ কুলজা বিকারাস্তাংশ্চাপ্যসাধ্যান্ প্রবদন্তি তজ্জ্ঞাঃ” (চ. চি. ৬) ইতি; কুলজা ইত্যনেন দুষ্টশুক্রশোণিতজা উচ্যন্তে| পুণ্ডরীকগ্রহণং সর্বেষামেব মহাকুষ্ঠানামুপলক্ষণং; তেষামেবোত্তরোত্তরধাত্বনুক্রমেণ শুক্রধাতোর্দুষ্টিজননসামর্থ্যাত্| এতেন ক্ষুদ্রকুষ্ঠেষ্বাদিবলপ্রবৃত্তত্বং নাস্তি, উত্তরোত্তরধাত্বননুক্রমণাভাবেন শুক্রদোষকরণেঽসামর্থ্যাত্| কাকণকং চাসাধ্যম্, উত্পত্তাবেব ত্রিদোষবলপ্রবৃত্তত্বাত্; ধাত্বনুক্রমণেন হি মহাকুষ্ঠানামস্থিমজ্জশুক্রগতানামসাধ্যত্বমুপরিষ্ঠাদেব বক্ষ্যতি||১৯||

ইদানীমপ্রতিকারিণ উত্তরোত্তরধাত্বনুক্রমণে দৃষ্টান্তং দর্শযন্নাহ- ভবন্তি চাত্রেত্যাদি| যথা বনস্পতির্বৃক্ষঃ, কালপ্রকর্ষণং কালাধিক্যং প্রাপ্য, মূলৈঃ কৃত্বা, অন্তর্ভূমিং বিগাহেতেতি সম্বন্ধঃ| ত্বচীতি অত্র ত্বক্শব্দেন রস উক্তঃ, রসারব্ধত্বাত্; তেন রসস্থমিত্যর্থঃ||২০-২১||

ধাতুগতকুষ্ঠানাং লক্ষণমাহ- স্পর্শহানিরিত্যাদি| “প্রাগেব রসধাতুং ক্রোডীকৃত্য দোষাঃ কুষ্ঠারম্ভকাঃ, অতো রসধাতুলক্ষণং নোক্তম্” ইত্যেকে; অপরে ত্বক্শব্দেন রসমাহুঃ| জাযত ইত্যত্রাপি সম্বধ্যতে| বিপূযকো দুর্গন্ধতা| শোণিতসংশ্রিতে ইতি ‘জাযতে’ ইত্যত্রাপি সম্বধ্যতে| বাহুল্যং স্থূলমণ্ডলতা| স্ফোটঃ ত্বচঃ স্ফুটনম্| স্থিরত্বং কঠিনমণ্ডলতা| কেচিদত্রান্যথা পঠন্তি, স চ পাঠোঽভাবান্ন লিখিতঃ| অত্রাপি ‘জাযতে’ ইত্যধ্যাহারঃ| উপদেহো মলবৃদ্ধিঃ| অত্রাপি কেচিদন্যথা শ্লোকং পঠন্তি, সোঽপি পাঠোঽভাবান্ন লিখিতঃ| শুক্রগতস্য কুষ্ঠস্য লিঙ্গং দর্শযন্নাহ- কৌণ্যমিত্যাদি| তদপীত্যপিশব্দাত্ পূর্বোক্তান্যপি রসাদিমজ্জান্তগতানি লিঙ্গানি ভবন্তি| কুষ্ঠিতং সঞ্জাতকুষ্ঠম্; অন্যে তু ‘কুষ্ঠবত্’ ইতি পঠন্তি, কুষ্ঠসহিতমিত্যর্থঃ; অন্যে ‘কুষ্ঠিলম্’ ইতি পঠন্তি, তত্রাপি স এবার্থঃ| যদা স্ত্রীপুংসযোঃ কুষ্ঠিনোর্বীজমুপহতং স্যাত্তদা তযোঃ প্রজা নোত্পদ্যতে; উপতপ্তমাত্রবীজযোঃ পুনঃ প্রজোপতাপ উত্পদ্যতে||২২-২৮||

ইদানীং ধাত্বনুক্রমেঽপি সাধ্যাদিভেদং দর্শযন্নাহ- কুষ্ঠমিত্যাদি| আত্মবতো জিতেন্দ্রিযস্য||২৯||

কুষ্ঠস্য কর্মজত্বং দর্শযন্নাহ- ব্রহ্মস্ত্রীত্যাদি| সজ্জনঃ সত্পুরুষঃ| পরস্বং পরদ্রব্যম্||৩০||

কুষ্ঠং দীর্ঘরোগাণাং প্রধানমিতি জন্মান্তরেঽপি তদনুবন্ধং দর্শযন্নাহ- ম্রিযত ইত্যাদি| গচ্ছতি অনুগতং ভবতীত্যর্থঃ, কুষ্ঠজনকস্য কর্মণোঽক্ষীণত্বাত্| আস্থায আশ্রিত্য| স পুণ্যাং গতিমাপ্নুযাত্, ক্ষীণপাপত্বাত্||৩১-৩২||

সংসর্গসম্ভবপ্রধানং কুষ্ঠমাশ্রিত্য কুষ্ঠিপ্রভৃতীনাং সংসর্গপরিহারং দর্শযন্নাহ- প্রসঙ্গাদিত্যাদি| প্রসঙ্গাদিতি প্রসঙ্গেন অভ্যাসেন কৃতাত্, পুনঃ পুনঃ কৃতাদিত্যর্থঃ| ইদং বিশেষণং গাত্রসংস্পর্শাদিভিঃ সর্বৈঃ সহ প্রত্যেকং সম্বধ্যতে| সহশয্যাসনাদিতি একশয্যাসনস্থিতেঃ| মাল্যং পুষ্পম্| ঔপসর্গিকরোগাঃ শীতলিকাদযঃ| সঙ্ক্রামন্তি আবিশন্তি||৩৩-৩৪||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং নিদানস্থানে পঞ্চমোঽধ্যাযঃ||৫||