৬২. যোনিব্যাপন্নিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্ত্র্যধিকারানুবৃত্তেঃ প্রদুষ্টার্তবকার্যত্বাচ্চ যোনিব্যাপন্নিদানমাহ– বিংশতিরিত্যাদি| রোগসঙ্গ্রহ ইতি অষ্টোদরীযে, চরকোক্তত্বাদস্য বাক্যস্য| মিথ্যাচারেণ অসম্যগাহারাচারেণ, চরতের্গতিভক্ষণার্থত্বাত্| প্রদুষ্টেনার্তবেনেতি বাতাদিদুষ্টরজসেত্যর্থঃ| তেন, বন্ধ্যাদিষ্বার্তবদুষ্টিরপি কারণং ভবতি| বীজদোষান্মাতাপিত্রোরারম্ভকবীজদোষাত্| দৈবাত্ প্রাক্তনাধর্মকারণাত্; দৈবস্য সর্বত্র কারণত্বে সিদ্ধেঽত্র বিশেষেণ কারণত্বমুক্তম্||১||–

আতঙ্কদর্পণ ব্যাখ্যা (বাচস্পতি বৈদ্য কৃত)

যোনিপ্রবৃত্তত্বাদসৃগ্দরস্যানন্তরং যোনিব্যাপন্নিদানমাহ– বিংশতিরিত্যাদি| ব্যাপদো রোগাঃ| রোগসঙ্গ্রহ ইতি অষ্টোদরীযে, চরকোক্তেঃ| মিথ্যাচারতঃ অসম্যগাহারাচারতঃ| প্রদুষ্টেনার্তবেনেতি কুপিতবাতাদিদুষ্টেনার্তবেন, বন্ধ্যাসু আর্তবদুষ্টিরপি কারণং ভবতি| বীজদোষাদিত্যাদি গর্ভারম্ভকবীজগতার্তবদোষাত্| দৈবাদিত্যাদি দৈবং সর্বত্র সাধারণং বিশিষ্টদৃষ্টকারণাদর্শনে সতি কার্যদর্শনাদুন্নেযম্||১||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকা আহ– সা ফেনিলমিত্যাদি| সা যোনিঃ ফেনবদার্তবং মুঞ্চতি| উদাবর্তেতি ঊর্ধ্বমাবর্তঃ সমন্তাদ্বর্তনং বাযোর্যত্র সা তথেতি, অর্শআদিত্বাদচ্| বিপ্লুতামিতি বিপ্লুতাং বাতবেদনযা বিপ্লুতত্বাত্| নিত্যবেদনাম্ অতিকুপিতেনৈব বাতেনেতি| পরিপ্লুতাযামিতি পরি সর্বতো বাতবিকারেণ প্লুতত্বাত্ পরিপ্লুতাসঞ্জ্ঞা| পরিপ্লুতাযাং বাহ্যাভ্যন্তরবাতবেদনাভির্যুক্তাযাম্| “গ্রাম্যধর্মেণ রুগ্ভৃশম্” ইত্যত্র “গ্রাম্যধর্মে রুচির্ভৃশম্” ইতি পাঠান্তরং, তত্র রুচিরভিলাষঃ; গ্রাম্যধর্মে মৈথুনে| বাতলেত্যাদি যোনিবিশেষণং, বাতলযা সহ পঞ্চ যোনিব্যাপদঃ| বাতলাযাঃ পৃথগভিধানং বাতলাযাং বিশেষেণ বাতবেদনাপ্রাদুর্ভাবার্থম্| এবং পিত্তলাদিষ্বপি বোদ্ধব্যম্| চতসৃষ্বিতি উদাবর্তাবন্ধ্যাবিপ্লুতাপরিপ্লুতাসু||২-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বং যোনের্বিংশতির্ব্যাপদ উক্তাস্তাসু উদাবর্তামাহ– সা ফেনিলমিত্যাদি| উদ্ ঊর্ধ্বমা সমন্তাত্ বৃত্তা বর্তুলা যোনির্যত্র সা তথা| ‘উদাবর্তা’ ইতি পাঠান্তরম্| তত্রাপ্যযমেবার্থঃ| সা যোনিঃ ফেনেনার্তবং মুঞ্চতি| বন্ধ্যামাহ– নষ্টমার্তবং রজো যস্যাং সা তথা| বিপ্লুতামাহ– বাতবেদনাবিপ্লুতত্বাত্| নিত্যবেদনাং বাতজনিততোদবন্ধ্যাদিনানাবেদনাযুক্তাম্| পরিপ্লুতামাহ– পরিপ্লুতাযামিতি| পরি সর্বতো বাতবিকারপরিপ্লুতত্বাত্পরিপ্লুতেতি সঞ্জ্ঞা| গ্রাম্যধর্মে মৈথুনে ভৃশং পীডা ভবতি| “গ্রাম্যধর্মেঽরুচিঃ” ইতি পাঠান্তরম্| তত্রারুচিরনভিলাষঃ| বাতজামাহ– বাতলেত্যাদি| কর্কশা স্তব্ধা, শূলনিস্তোদপীডিতেতি| বাতলেতি যোনিবিশেষণম্| বাতলযা সহ পঞ্চযোনিব্যাপদঃ| বাতলেতি পৃথগ্বিধানমত্যর্থবাতবেদনাপ্রাদুর্ভাবার্থম্| এবং পিত্তলাদিষ্বপি ব্যাখ্যেযম্| আদ্যাসু চতসৃষু বাতানুবন্ধিত্বমাহ– চতসৃষ্বপীত্যাদি| উদাবর্তাবন্ধ্যাবিপ্লুতাপরিপ্লুতেতি চতসৃষু বাতবেদনা জ্ঞেযা, বাতলাযামধিকাঽতঃ সঞ্জ্ঞা||২-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকা আহ– সদাহমিত্যাদি| ক্ষীযতে রক্তমিতি অতিপ্রবৃত্ত্যা রক্তস্য ক্ষযঃ| বামিন্যুদ্গিরেদ্বীজমিতি শুক্রং শুদ্ধমপি বমতীত্যর্থঃ| প্রস্রংসিনী স্রংসতে ইতি স্বস্থানাচ্চ্যবতে নিঃসরতীতি যাবত্| অত এব “ ক্ষীরস্বিন্নাং প্রবেশযেত্|” (সু. উ. তং. অ. ৩৮) ইতি চিকিত্সিতম্| ক্ষোভিতা বিমর্দিতা| দুষ্প্রজাযিনী দুঃখপ্রসবা| রক্তসঙ্ক্ষযাদার্তবস্য বাযুনা ক্ষযাত্| যদ্যপি সর্বস্যৈবাপত্যস্য নাশস্তথাঽপি পুত্রস্য প্রাধান্যাত্ পুত্রঘ্নীতি ব্যপদেশঃ| পিত্তলযা সহ পঞ্চ পিত্তজাঃ| দাহপাকেত্যাদ্যুপলক্ষণং, তেন নীলপীতাসিতার্তবা চ ভবতীত্যর্থঃ| যদুক্তমন্যত্র– “ব্যাপল্লবণকট্বম্লক্ষারাদ্যৈঃ পিত্তজা ভবেত্| দাহপাকজ্বরোষ্ণার্তা নীলপীতাসিতার্তবা||” ইতি| আদ্যাস্বিতি রক্তক্ষযাবামিনীপ্রস্রংসিনীপুত্রঘ্নীষু||৫-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ পিত্তানুবন্ধিন্যঃ| তত্র রক্তক্ষযামাহ– সদাহমিত্যাদি| অতিপ্রবৃত্ত্যা রক্তস্য ক্ষযঃ, তেন রক্তক্ষযেতি সঞ্জ্ঞা| বামিনীমাহ– সবাতমিত্যাদি| সুগমম্| প্রস্রংসিনীমাহ– প্রস্রংসিনীত্যাদি| স্রংসতে স্বস্থানাচ্চ্যবতে, নিঃসরতীত্যর্থঃ| ক্ষোভিতা বিমর্দিতা, দুষ্প্রজাযিনী দুঃখপ্রসবা| স্থিতমিত্যাদি| পুত্রঘ্নীমাহ– পুত্রঘ্নীতি সর্বাপত্যবিনাশিন্যস্তথাঽপি পুত্রস্য প্রাধান্যাদত্র পুত্রঘ্নীতি ব্যপদেশঃ| পিত্তলামাহ– অত্যর্থমিত্যাদি| দাহপাকজ্বরান্বিতেত্যুপলক্ষণং, তেন নীলপীতাসিতার্তবা চ ভবতীত্যবগন্তব্যম্| তথা চ তন্ত্রান্তরে– “ব্যাপল্লবণকট্বম্লক্ষারাদ্যৈঃ পিত্তজা ভবেত্| দাহপাকজ্বরোষ্ণার্তা নীলপীতাঽসিতার্তবা||” ইতি| চতসৃষ্বপি পিত্তানুবন্ধমাহ– রক্তক্ষযাবামিনীপ্রস্রংসিনীপুত্রঘ্নীষু পিত্তলযা সহ পঞ্চপিত্তানুবন্ধিন্যঃ||৫-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকা আহ– অত্যানন্দেত্যাদি| গ্রাম্যধর্মেণ মৈথুনেন| কর্ণিন্যাং কর্ণিকেতি কর্ণিকা মাংসকন্দাকারগ্রন্থিঃ| মৈথুনেঽচরণা পূর্বং পুরুষাদতিরিচ্যতে ইতি অচরণা সম্যঙ্মৈথুনাচরণাত্ পূর্বং প্রথমং, পুরুষাদতিরিচ্যতে বিরমতি, তেন বীজং ন গৃহ্ণাতি| অত্র অচরণশব্দেনোপচারাত্ তদ্বতী স্ত্রী ভণ্যতে| বহুশশ্চাতিচরণেতি বহুশো মৈথুনাচরণাদতিচরণা, সা চ শ্লেষ্মজনিতকণ্ডূভিরাজগেব (?) বহুমৈথুনাচরণাদ্বীজং ন ধত্তে| অত উক্তম্– তযোর্বীজং ন বিন্দতীতি| তযোরিতি অচরণাতিচরণযোঃ| শ্লেষ্মলাযামতিশীতলেত্যুপলক্ষণং, তেন বেদনাদিকমপি জ্ঞেযম্| তথাচ তন্ত্রান্তরে– “কফোঽভিষ্যন্দিভির্বৃদ্ধো যোনিং চেদ্দূষযেত্ স্ত্রিযাঃ| স কুর্যাত্ পিচ্ছিলাং শীতাং কণ্ডূগ্রস্তাং সবেদনাম্||” ইতি||৮-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ শ্লেষ্মানুবন্ধিন্যঃ| তত্রাত্যানন্দামাহ– অতীত্যাদি| কর্ণিনীমাহ– কর্ণিন্যামিত্যাদি| বহুশো মৈথুনাচরণাদতিচরণা, সা চ শ্লেষ্মজনিতকণ্ডুযোগাদ্বহুমৈথুনাচরণাদতিচরণা, বীজং গর্ভাঙ্কুরজননং ন লভতে| অত এবোক্তম্– তযোর্বীজং ন বিন্দতীত্যাদি| তযোরিতি চরণাতিচরণযোঃ| শ্লেষ্মলামাহ– শ্লেষ্মলেত্যাদি| অতিশীতলেত্যুপলক্ষণং, তেন বেদনেত্যপি বোদ্ধব্যম্| যদুক্তং তন্ত্রান্তরে– “কফোঽভিষ্যন্দিভির্বৃদ্ধো যোনিং দূষযতে স্ত্রিযাঃ| স কুর্যাত্পিচ্ছিলাং শীতাং কণ্ডুগ্রস্তাং সবেদনাম্||” ইতি| শ্লেষ্মানুবন্ধত্বমাহ– চতসৃষ্বপীত্যাদি| অত্যানন্দাকর্ণিনীচরণাতিচরণাসু| এবং শ্লেষ্মানুবন্ধিন্যঃ পঞ্চ||৮-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকা আহ– অনার্তবেত্যাদি| অনার্তবা রজঃশূন্যা| অস্তনী ঈষত্স্তনী| অতিকাযগৃহীতাযা মহামেহনেন গৃহীতাযাঃ| অণ্ডলী অণ্ডবন্নিঃসৃতা যোনিঃ| বিবৃতা মহাযোনিঃ অতিবিবৃতমুখী| সূচীবক্ত্রা অতিসংবৃতা সূচীরন্ধ্রাঽতিসঙ্কটমুখী| সর্বলিঙ্গসমুত্থানেতি সর্বদোষলিঙ্গানাং সমুত্থানং যত্র সা তথা| অন্যে ত্বাহুঃ– সর্বদোষসমুত্থানা সর্বদোষহেতুজেত্যর্থঃ| চরকোক্তা অধিকা রক্তযোন্যাদযঃ সুশ্রুতোক্তানামদূরান্তরত্বেনাববোদ্ধব্যাঃ||১১-১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

সন্নিপাতজাদযঃ পঞ্চ| তত্র ষণ্ডীমাহ– ‘অনার্তবেত্যাদি’ ইতি পাঠঃ ক্বচিত্পুস্তকে নোপলভ্যতে [ অনার্তবেত্যাদি| অনার্তবা অরজস্কা, অস্তনী ঈষত্স্তনী| অণ্ডিনীমাহ– অতিকাযো বৃহন্মেহনপুরুষঃ, তেন গৃহীতাযা ইতি অপ্রগল্ভাযাঃ, অণ্ডলী অণ্ডবন্নিঃসৃতা যোনিঃ| বিবৃতামাহ– অতিবিবৃতা| সূচীবক্ত্রামাহ– অতিশযেন সূচীবত্সঙ্কীর্ণমুখী সংবৃতা| সন্নিপাতজামাহ– সর্বলিঙ্গেত্যাদি| সর্বলিঙ্গানাং সমুত্থানং যত্র সা তথা| চতসৃষ্বপি সর্বলিঙ্গানুবন্ধমাহ– চতসৃষ্বিতি| ষণ্ড্যণ্ডলীবিবৃতাসূচীবক্ত্রাসু| ত্রিদোষজাঃ পঞ্চ| আসামসাধ্যতামাহ– পঞ্চেত্যাদি||১১-১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং যোনিব্যাপন্নিদানং সমাপ্তম্||৬২||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং যোনিব্যাপন্নিদানম্||৬২||