৩৭. বৃদ্ধিনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শোথত্বসামান্যাত্ শোথানন্তরং বৃদ্ধিরভিধীযতে| বৃদ্ধেঃ সম্প্রাপ্তিমাহ– ক্রুদ্ধোঽনূর্ধ্বগতির্বাযুরিত্যাদি| অনূর্ধ্বগতিরধোগতির্বাযুঃ মুষ্কৌ প্রাপ্য চরন্ গচ্ছন্ বঙ্ক্ষণতো মেঢ্রজঙ্ঘাসন্ধেঃ সকাশাত্; ফলকোষাভিবাহিনীরিতি ফলং চ কোষশ্চ ফলকোষৌ, অথবা ফলযোঃ কোষৌ, তদ্বহা ধমনীশ্চ প্রপীড্য সন্দূষ্য, বৃদ্ধিং করোতি| ফলকোষযোরিতি দ্বিবচনমুপলক্ষণং, তেনৈককোষেঽপি দৃশ্যমানা বৃদ্ধিঃ সঙ্গতা| স বৃদ্ধিরিতি “ক্তিচ্ক্তৌ চ সঞ্জ্ঞাযাম্” ইত্যনেন ক্তিজন্তো বৃদ্ধিশব্দঃ পুংলিঙ্গঃ, ক্তিন্নন্তস্তু স্ত্রীলিঙ্গঃ| বৃদ্ধিঃ কুরণ্ডোঽভিধীযতে| সঙ্খ্যেযনির্দেশাদেব সঙ্খ্যাযাং লব্ধাযাং সপ্তধেতি বচনং ন্যূনাধিকসঙ্খ্যানিরাসার্থং, তেন দ্বন্দ্বজাদিবৃদ্ধেরধিকাযা নিরাসঃ, অসম্ভবস্তু তস্যা ব্যাধিস্বভাবাত্; মূত্রান্ত্রবৃদ্ধ্যোর্বাতবৃদ্ধ্যন্তর্ভাবাত্ ন্যূনসঙ্খ্যানিরাসার্থম্ অনযোর্বাতজত্বেঽপি নিমিত্তচিকিত্সাভেদাত্ পৃথগভিধানং, নিমিত্তভেদনিবন্ধন এব ব্যাধিভেদঃ| যদুক্তম্– “দোষদূষ্যসংসর্গাদাযতনবিশেষান্নিমিত্ততশ্চৈষাং ব্যাধীনাং ভেদঃ|” (সু. সূ. অ. ২৪) ইতি| অত আহ– মূত্রান্ত্রজাবপ্যনিলাদ্ধেতুভেদস্তু কেবলমিতি||১-২||

আতঙ্কদর্পণ ব্যাখ্যা (বাচস্পতি বৈদ্য কৃত)

শোথাধিকারাত্ বৃদ্ধিরভিধীযতে| বৃদ্ধেঃ সম্প্রাপ্তিমাহ– ক্রুদ্ধ ইত্যাদি| অনূর্ধ্বগতির্বাযুঃ অধোগতির্বাতো মুষ্কৌ প্রাপ্য চরন্ গচ্ছন্, বঙ্ক্ষণতো মেঢ্রজঙ্ঘাসন্ধেঃ সকাশাত্, ফলকোষাভিবাহিনীরিতি ফলং চ কোশশ্চ ফলকোশৌ, অথবা ফলযোঃ কোশৌ ফলকোশৌ, তদ্বহা ধমনীঃ প্রপীড্য সন্দূষ্য বৃদ্ধিং করোতি, ফলকোষযোরিতি দ্বিবচনমুপলক্ষণং, তেনৈকফলকোষেঽপি দৃশ্যমানা বৃদ্ধিঃ সম্মতা| বৃদ্ধিঃ ‘কুরণ্ড’ ইতি লোকে| বৃদ্ধেঃ সঙ্খ্যামাহ– দোষেত্যাদি| দোষত্রযৈস্ত্রযঃ, রক্তেনৈকঃ, মেদসা চৈকঃ, মূত্রেণৈকঃ, এবং সপ্ত| সঙ্খ্যেযনির্দেশাদেব সঙ্খ্যাযাং লব্ধাযাং পুনঃ সপ্তধেতি বচনং ন্যূনাধিকসঙ্খ্যানিরাসার্থং, দ্বন্দ্বজাযা অপি বৃদ্ধের্নিরাসঃ, দ্বন্দ্বজাযাস্ত্বসম্ভবো ব্যাধিস্বভাবাত্; মূত্রান্ত্রবৃদ্ধ্যোর্বাতবৃদ্ধ্যন্তর্ভাবাত্ ন্যূনসঙ্খ্যানিরাসঃ, অনযোর্বাতজত্বেঽপি নিদানচিকিত্সাভেদাত্ পৃথগভিধানং, নিদানভেদনিবন্ধন এব ব্যাধিভেদঃ| উক্তং চ– “দোষদূষ্যসংসর্গাদাযতনবিশেষান্নিমিত্ততশ্চৈষাং ব্যাধীনাং ভেদঃ” ইতি| অত এব মূত্রান্ত্রজাবপি বাতাত্, তত্র হেতুভেদত এব ভেদঃ কেবল ইতি| বৃদ্ধিশব্দঃ পুল্লিঙ্গো বা||১-২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজাদীনাং মূত্রজান্তানাং বৃদ্ধীনাং ক্রমেণ লক্ষণান্যাহ– বাতেত্যাদি| অহেতুরুগিতি অনিমিত্ততো দাহাদিরুক্| রক্তজে ‘কৃষ্ণস্ফোটাবৃত’ ইতি পিত্তজবৃদ্ধিলিঙ্গাদধিকং; তেন হেতুলিঙ্গচিকিত্সাভেদাদ্রক্তজবৃদ্ধিঃ পৃথগ্গণ্যতে| মেদোজে তালফলোপম ইতি পক্বতালফলমিব নীলবর্তুলঃ| মূত্রজে মূত্রকৃচ্ছ্রমিতি মূত্রকৃচ্ছ্রবত্ বেদনা| চালযন্ ফলকোষযোরিতি ফলকোষযোশ্চালযন্ চলো ভবন্নিতস্ততো গচ্ছন্ সোঽধঃ স্যাত্| চালযন্নিতি স্বার্থিকো ণিচ্||৩-৬||–

আতঙ্কদর্পণ ব্যাখ্যা (বাচস্পতি বৈদ্য কৃত)

বাতজমাহ– বাতেত্যাদি| দৃতিশ্চর্মখল্লিঃ| অনিমিত্ততো ভেদতোদাদিরুক্| পিত্তজমাহ– পক্বেত্যাদি| পক্বোদুম্বরসঙ্কাশঃ পক্বোদুম্বরফলাভঃ, তথা দাহাদিযুক্তঃ| কফবৃদ্ধিমাহ– কফাদিত্যাদি| কফাদ্ বৃদ্ধিঃ শীতঃ শীতস্পর্শঃ, তথা গুরুঃ স্নিগ্ধঃ কণ্ডূমান্ কঠিনোঽশ্মবত্, অল্পরুক্ মন্দবেদনঃ| রক্তজমাহ– রক্তেত্যাদি| রক্তজো বৃদ্ধিঃ, অত্র তু কৃষ্ণস্ফোটৈশ্চিতঃ পিত্তবৃদ্ধিলিঙ্গৈশ্চ পক্বোদুম্বরসঙ্কাশাদিভির্যুতো ভবেত্| অত্র তু কৃষ্ণস্ফোটাবৃত ইতি পিত্তবৃদ্ধিলিঙ্গাদধিকং, তেন হেতুভেদচিকিত্সাভেদাদ্রক্তজো বৃদ্ধিঃ পৃথগ্গণ্যতে| মেদোজমাহ– কফবত্কফবৃদ্ধিলক্ষণং তালফলোপম ইতি পক্বতালবন্নীলবর্তুলঃ| মূত্রজমাহ– মূত্রেত্যাদি| মূত্রধারণশীলস্য মূত্রজো ভবতি, গচ্ছতঃ পুংসঃ জলপূর্ণদৃতিবত্ ক্ষোভং যাতি পূরিতো ভবতি, সরুক্ সব্যথঃ, মৃদুঃ মৃদুস্পর্শঃ| মূত্রকৃচ্ছ্রমিতি মূত্রকৃচ্ছ্রবেদনঃ| ফলকোশযোরিতি ফলকোশযোশ্চালযন্ চলো ভবন্নিতস্ততো গচ্ছন্ সোঽধঃ স্যাত্| চালযন্নিতি স্বার্থিকো ণিচ্| ‘বলযং ফলকোশযোঃ’ ইতি পাঠে ফলকোশযোরধস্তাদ্বলযং কঙ্কণং স্যাত্||৩-৬||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অন্ত্রবৃদ্ধিমাহ– বাতকোপিভিরিত্যাদি| ধারণং বেগস্যোপস্থিতস্য, ঈরণমপ্রাপ্তস্য| ক্ষোভণৈঃ ক্ষুভিতোঽন্যৈরিতি বলবদ্বিগ্রহধনুরাকর্ষণাদিভিঃ| ক্ষুদ্রান্ত্রাবযবমিতি বৃহদন্ত্রব্যুদাসার্থম্| বিগুণীকৃত্যেতি সঙ্কুচীকৃত্য| দ্বিগুণীকৃত্যেতি পাঠান্তরে সঙ্কোচেন দ্বিগুণীকৃত্য| স্বনিবেশাত্ স্বস্থানাত্| তদা বঙ্ক্ষণসন্ধিস্থঃ সন্ বঙ্ক্ষণসন্ধৌ গ্রন্থিরূপং সাধ্যং শ্বযথুং করোতি, তত্র গ্রন্থিরূপেণ স্থিত্বা কালান্তরেণ ফলকোষং গচ্ছতীতি| তাং মুষ্কবৃদ্ধিমাধ্মানরুক্স্তম্ভবতীমুপেক্ষ্যমাণস্য অচিকিত্সিতপুরুষস্য| অত্র ভোজঃ– “অন্ত্রং দ্বিগুণমাদায জন্তোর্নযতি বঙ্ক্ষণম্| বঙ্ক্ষণাত্তদ্রুজাযুক্তং ফলকোষং প্রপদ্যতে||” ইতি| প্রধ্মাপযন্নিতি উচ্ছূনযন্| অসাধ্যোঽযমিতি কথং? যতোঽস্য চিকিত্সাঽভিহিতা; নৈবম্, অপ্রাপ্তফলকোষাযামযং চিকিত্সাবিধিঃ; প্রাপ্তফলকোষা ত্বসাধ্যা; যাপ্যাযাং বা তস্যাং চিকিত্সাবিধিঃ| যদুক্তং ভোজে– “যাপ্যাং তামন্ত্রজাং বিদুঃ|” ইতি| ব্রধ্ননিদানং তু তন্ত্রান্তরে পঠ্যতে| তদ্যথা– “অত্যভিষ্যন্দিগুর্বন্নসেবনান্নিচযং গতঃ| করোতি গ্রন্থিবচ্ছোথং দোষো বঙ্ক্ষণসন্ধিষু|| জ্বরশূলাঙ্গসাদাঢ্যং তং ব্রধ্নমিতি নির্দিশেত্||” ইতি||৭-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

অন্ত্রবৃদ্ধিমাহ– বাতেত্যাদি| বাতকোপিভিরাহারৈ রূক্ষতিক্তকষাযাদিভিরাসেবিতৈস্তথা শীততোযাবগাহনৈস্তথা ধারণেরণভারাদিভিরন্যৈশ্চ ক্ষোভণৈঃ ক্ষোভিতঃ কুপিতঃ পবনো বাযুর্যদা যস্মিন্ কালে ক্ষুদ্রান্ত্রাবযবং (মূত্রশকৃদ্গাত্রৈকদেশং?) স্বনিবেশাত্ স্বস্থানাত্, দ্বিগুণীকৃত্যাঽধো নযেদিতি পিণ্ডার্থঃ| অন্যে বিগুণীকৃত্যেতি পঠন্তি| ধারণমুপস্থিতবেগস্য , ঈরণমপ্রাপ্তবেগস্য, ক্ষোভণৈঃ পূর্বোক্তৈঃ, অন্যৈরিতি বলবদ্বিগ্রহৈঃ ধনুরাকর্ষণাদিভিঃ, বিষমাঙ্গপ্রবর্তনৈঃ বিষমত্বেন শরীরমোটনৈঃ| পবনো বঙ্ক্ষণসন্ধিস্থঃ সন্, বঙ্ক্ষণসন্ধৌ গ্রন্থিরূপমসাধ্যং শ্বযথুং করোতি| তত্র গ্রন্থিরূপেণ স্থিত্বা কালান্তরেণ ফলকোশং গচ্ছতি| তাং মুষ্কবৃদ্ধিমাধ্মানরুক্স্তম্ভবতীং তদোপেক্ষমাণস্যাচিকিত্সতঃ পুরুষস্য| যদাহ ভোজঃ– “অন্ত্রং দ্বিগুণমাদায জন্তোর্নযতি বঙ্ক্ষণম্| বঙ্ক্ষণাত্তদ্রুজাযুক্তং ফলকোশং প্রপদ্যতে||” ইতি| স চ শ্বযথুঃ করেণ পীডিতঃ সশব্দং প্রযাতি, মুক্তঃ সন্নাধ্মাপযন্ পূরযন্ পুনরাযাতি| অসাধ্যমাহ– যস্যেত্যাদি| আশ্লেষাত্ সংযোগাত্, বাতসঞ্চযাত্ মুষ্কযোরন্ত্রবৃদ্ধির্ভবতি| অযমসাধ্যঃ, কথং তর্হি চিকিত্সা? অপ্রাপ্তফলকোশযোশ্চিকিত্সাবিধিঃ, প্রাপ্তফলকোষা ত্বসাধ্যা| যাপ্যাযাং বা চিকিত্সাবিধিঃ| যদুক্তং ভোজে– ‘যাপ্যাং তামন্ত্রজাং বিদুঃ’ ইতি| ব্রধ্ননিদানং তু তন্ত্রান্তরে পঠ্যতে, তদ্যথা– “অত্যভিষ্যন্দিগুর্বন্নসেবনান্নিচযং গতঃ| করোতি গ্রন্থিবচ্ছোথং দোষো বঙ্ক্ষণসন্ধিষু| জ্বরশূলাগ্নিসাদাঢ্যং তং ব্রধ্নমিতি নির্দিশেত্||” ইতি||৭-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং বৃদ্ধিনিদানং সমাপ্তম্||৩৭||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যকৃতাযাং মাধবনিদানব্যাখ্যাযামাতঙ্কদর্পণাখ্যাযাং বৃদ্ধিনিদানম্||৩৭||