৫৩. বিস্ফোটনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রাযেণ দোষদূষ্যচিকিত্সাসাম্যাদ্বিস্ফোটনিদানমাহ– কট্বিত্যাদি| অজীর্ণাধ্যশনাতপৈশ্চেতি অজীর্ণাশনমপক্বদ্রব্যস্যাশনম্, অধ্যশনমজীর্ণে ভোজনম্; অথবা অজীর্ণং স্বরূপতো হেতুরধ্যশনং চ| ঋতুদোষেণেতি শীতোষ্ণাদীনামতিযোগেন| বিপর্যযেণেতি ঋতুবিপর্যযশ্চ ঋতুস্বভাবস্যান্যথাভাবঃ| এভির্হেতুভির্যথাসম্ভবং প্রত্যেকং দোষত্রযপ্রকোপো বোদ্ধব্যঃ| জ্বরপুরঃসরানিত্যনেন জ্বরস্য পূর্বরূপতাং দর্শযতি||১-২||

আতঙ্কদর্পণ ব্যাখ্যা (বাচস্পতি বৈদ্য কৃত)

প্রাযেণ দোষদূষ্যচিকিত্সিতত্বতুল্যত্বাদতোঽনন্তরং বিস্ফোটনিদানারম্ভঃ, তস্য নিদানমাহ– কট্বিত্যাদি| অজীর্ণাশনমপক্বদ্রব্যাশনম্| অধ্যশনমজীর্ণভোজনম্| অথর্তুদোষেণ বিপর্যযেণেতি শীতোষ্ণাদেরতিযোগেন ঋতুদোষঃ, ঋতুবিপর্যযঃ ঋতুস্বভাবস্যান্যথাভাবাত্; এভির্হেতুভিঃ যথাসম্ভবং প্রত্যেকং দোষত্রযপ্রকোপো বোদ্ধব্যঃ| বিস্ফোটকসম্প্রাপ্তিমাহ– ত্বচমিত্যাদি| জ্বরপুরঃসরানিত্যনেন জ্বরস্য পূর্বরূপতাং দর্শযতি||১-২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিস্ফোটস্বরূপমাহ– অগ্নিদগ্ধনিভা ইত্যাদি| রক্তপিত্তজা ইতি সর্বত্রৈব বিস্ফোটে রক্তপিত্তযোরব্যভিচারিত্বং, যথা শূলে বাতস্য; বাতানুবন্ধোঽপ্যত্র বোদ্ধব্যঃ| যদাহ ভোজঃ– “যদা রক্তং চ পিত্তং চ বাতেনানুগতং ত্বচি| অগ্নিদগ্ধনিভান্ স্ফোটান্ কুরুতঃ সর্বদেহগান্|| সজ্বরান্ সপরীদাহান্ বিদ্যাদ্বিস্ফোটকাংস্তু তান্||” ইতি||৩-৭||–

আতঙ্কদর্পণ ব্যাখ্যা (বাচস্পতি বৈদ্য কৃত)

বিস্ফোটকসামান্যলিঙ্গমাহ– অগ্নীত্যাদি| সজ্বরা ইতি জ্বরস্তেষাং পূর্বরূপত্বেন জ্ঞেযঃ| রক্তপিত্তজা ইতি সর্ববিস্ফোটেষু রক্তপিত্তযোরব্যভিচারিত্বং সূচিতং শূলেষু বাতস্যেব| যদুক্তং ভোজে– “যদা রক্তং চ পিত্তং চ বাতেনানুগতং ত্বচি| অগ্নিদগ্ধনিভান্ স্ফোটান্কুরুতঃ সর্বদেহগান্|| সজ্বরান্সপরীদাহান্ বিদ্যাদ্বিস্ফোটকাংস্তু তান্|” ইতি| ক্বচিদিতি ক্বচিচ্ছরীরদেশে| বাতিকবিস্ফোটমাহ– শির ইত্যাদি| শূলং শরীরস্য তোদরূপং, পর্বভেদনং সন্ধিস্ফুটনম্| পৈত্তিকমাহ– জ্বরেত্যাদি| সুগমম্| শ্লৈষ্মিকমাহ– ছর্দীত্যাদি| বাতপৈত্তিকমাহ– বাতেত্যাদি সুগমম্| কফজপ্রসঙ্গাত্ কফপৈত্তিকমাহ– কণ্ডূরিত্যাদি| এতৈর্লক্ষণৈঃ কফপৈত্তিকো জ্ঞেযঃ| কফবাতিকমাহ– কণ্ড্বিতি| স্তৈমিত্যমিতি নিশ্চলত্বম্||৩-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকলক্ষণমাহ– মধ্য ইত্যাদি| মধ্যে নিম্নোন্নতোঽন্তে চেতি মধ্যে নিম্নোঽন্তে চোন্নত ইত্যর্থঃ| নিম্নোন্নত ইতি প্রযোগোঽসিদ্ধস্যানিত্যত্বেন| এবং সম্পূর্ণলক্ষণো যস্ত্রিদোষজঃ সোঽসাধ্যঃ||৮-৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিদোষজমাহ– মধ্য ইতি| মধ্যে নিম্নঃ, অন্তে চোন্নত ইত্যর্থঃ| অল্পপ্রপাকত ইতি অল্পপাকবানিত্যর্থঃ| মোহ ইন্দ্রিযাণাম্| এবং সম্পূর্ণলক্ষণো যস্ত্রিদোষজঃ সোঽসাধ্যঃ||৮-৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তজলক্ষণমাহ– রক্তা ইত্যাদি| রক্তসমুত্থানা ইতি লক্ষ্যপদং, বেদিতব্যাস্তু রক্তেনেতি লক্ষণপদম্, অশ্মরীহেতুঃ তত্পূর্বমিতি যথা; অযমর্থঃ– রক্তসমুত্থানাশ্চ বিস্ফোটা ভবন্তি তে চ কথং বিজ্ঞেযা ইত্যত উক্তম্– বেদিতব্যাস্তু রক্তেনতি; অথবা রক্তসমুত্থানা ইতি রক্তং সমুত্থাপযন্তীতি নিরুচ্য রক্তচ্ছর্দনমভিমতমাচার্যস্য, বেদিতব্যাস্তু রক্তেনেতি পদস্য কারণদ্যোতকস্যাব্যবস্থানাত্| ঘোরোঽত্যন্তদুঃখদঃ| ভূর্যুপদ্রব ইতি অত্র বিসর্পোক্ত এবোপদ্রবো জ্ঞেযঃ||১০-১১||

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তজমাহ– রক্তা ইত্যাদি| রক্তা রক্তবর্ণাঃ, রক্তসমুত্থানা ইতি রক্তসমুত্থানাশ্চ বিস্ফোটা ভবন্তীত্যর্থঃ| তে চ পিত্তহেতুভিঃ কুপিত্তেন রক্তেন বেদিতব্যাঃ, রক্তেনেতি লক্ষণপদং, যথাঽশ্মরীহেতু তত্পূর্বমিতি| ঘোর ইতি অত্যন্তদুঃখপ্রদঃ| ভূর্যুপদ্রব ইতি বহূপদ্রবঃ, অত্র বিসর্পোক্তা এবোপদ্রবা জ্ঞেযাঃ||১০-১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং বিস্ফোটনিদানং সমাপ্তম্||৫৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং বিস্ফোটনিদানম্||৫৩||