২২. বাতব্যাধিনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অপস্মারবদ্বাতবিকারাণামপ্যাক্ষেপকাদীনাং বেগকর্তৃত্বাদপস্মারানন্তরং বাতব্যাধ্যারম্ভঃ| ননু, বাতব্যাধিরিতি কোঽর্থঃ? কিং বাত এব ব্যাধির্বাতব্যাধিঃ, উত বাতেন জনিতো ব্যাধির্বাতব্যাধিঃ? আদ্যে স্বস্থেষ্বপি প্রসঙ্গঃ, দ্বিতীযে জ্বরাদিষু| উচ্যতে– ব্যাধিপদসামানাধিকরণ্যাদ্বিকৃতো দুঃখকারী বাতো বাতব্যাধিঃ| উক্তং হি সুশ্রুতে– ‘‘পক্বাশযস্থোঽন্ত্রকূজং শূলাটোপৌ করোতি চ|’’ (সু. নি. অ. ১) ইতি| বাতজনিতোঽসাধারণব্যাধির্বাতব্যাধিরিতি বিশেষণীযং, তেনোভযত্রাপ্রসঙ্গঃ| যচ্চোক্তম্– ‘‘কফপিত্তান্বিতো বাযুর্বাযুরেব চ কেবলঃ| কুর্যাদাক্ষেপকম্’’ ইত্যাদি; তত্রারম্ভকো বাযুরেব, পিত্তকফৌ ত্বনুবন্ধাবিতি ন বিরোধঃ স্যাত্| চরকে হি দ্বিবিধা ব্যাধয উক্তাঃ সামান্যজা, নানাত্মজাশ্চেতি; তত্র সামান্যজা যে বাতাদিভিঃ সমস্তৈর্ব্যস্তৈর্বা জন্যন্তে, যথা– জ্বরাদযঃ; নানাত্মজা যে নিযতৈকদোষজন্যাঃ, যথা– আক্ষেপকাদযো যে বাতেনৈব জন্যন্তে, ন স্বতন্ত্রেণ পিত্তেন কফেন বা; তথা ওষচোষাদযঃ পিত্তেনৈব, ন বাতেন কফেন চ তথা তৃপ্ত্যাদযঃ কফেনৈব, ন বাতেন, ন পিত্তেন,; এবং ব্যবস্থিতে বাতব্যাধিবত্ পিত্তকফব্যাধী কস্মান্নোক্তৌ? উচ্যতে– বাযোরতিবলত্বেন আশুকারিত্বেন চ গরীযস্ত্বাত্তদ্বিকারাণাং দুঃসাধ্যত্বাদাশ্বেবাত্যযকরত্বাদ্বিশিষ্টচিকিত্স্যত্বাদ্বাতব্যাধ্যভিধানং, নতু কফপিত্তব্যাধ্যভিধানম্| অত এব চরকসুশ্রুতাদিষ্বপি বাতরোগাধ্যায এব নির্দিষ্টো, নতু পিত্তকফরোগাধ্যাযঃ| চন্দ্রিকাকারস্ত্বাহ– পিত্তকফযো রূপরসাদিযোগাদ্দূষ্যবিশেষযোগাদ্বা হরিদ্রাচূর্ণসংযোগবদত্যন্তবিসদৃশা রসাদিমন্তো বিকারাঃ পৃথঙ্নামানো জাযন্তে, বাযোস্তু রূপরসাদ্যভাবাত্ দূষ্যনিরপেক্ষা আক্ষেপকাদযো বাতাদনতিভিন্নরূপা নানাত্মজাঃ; তেন বাতবিকারাঃ পৃথগুচ্যন্তে, নতু পিত্তকফবিকারা ইতি| এতত্তু বকুলকরপ্রভৃতযা নানুমন্যন্তে, চরকবিরোধাত্| চরকে হি পিত্তকফযোরপি নানাত্মজা উক্তাঃ, যথা– ‘অশীতির্বাতবিকারাঃ, চত্বারিংশত্ পিত্তবিকারাঃ, বিংশতিঃ শ্লেষ্মবিকারাঃ|’ (চ. সূ. অ. ২০) ইতি| সুশ্রুতেন তু শল্যাধ্যাযিনা পিত্তকফনানাত্মজা ন দর্শিতাঃ, পরাধিকারেষু ন বিস্তারোক্তিরিত্যভিপ্রাযেণেতি| লঙ্ঘনমুত্পতনম্, উপবাসস্যানশনশব্দেন বমনাদেশ্চ দোষস্রবণশব্দেন বক্ষ্যমাণত্বাত্| প্লবনং বাহুভ্যাং জলপ্রতরণম্| আমাদিতি আমরসাত্, তস্য কারণত্বং মার্গাবরণদ্বারেণ নতু স্বরূপেণ; আযাসাদিতি পাঠান্তরমযুক্তং, তস্য ব্যাযামশব্দেনোক্তত্বাত্| মর্মাবাধাত্ মর্মাভিঘাতাত্| অপতংসনং গজাদিভ্যঃ শীঘ্রযানেন পতনম্, উচ্ছ্বাসাবরোধো বা; ধাতুকর্ষণমিতি খরনাদঃ||১-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

অপস্মারবদ্বাতবিকারাণামাক্ষেপকাদীনাং বেগকর্তৃত্বাদপস্মারানন্তরং বাতব্যাধ্যারম্ভঃ| ননু কোঽযং বাতব্যাধিঃ, কিং বাত এব ব্যাধিঃ, উত বাতজনিতো ব্যাধিঃ? আদ্যে স্বস্থেঽপি প্রসঙ্গঃ, দ্বিতীযে জ্বরাদিষু| উচ্যতে– চরকে দ্বিবিধা ব্যাধয উক্তাঃ– সামান্যজা নানাত্মজাশ্চেতি; তত্র সামান্যজা বাতাদিভিঃ সমস্তৈর্ব্যস্তৈর্বা জন্যন্তে, যথা– জ্বরাদযঃ, নানাত্মজা যে নিযতৈকদোষজন্যাঃ, যথা– আক্ষেপকাদযো বাতেনৈব জন্যন্তে, ন স্বতন্ত্রেণ পিত্তেন কফেন বা; তথা ওষচোষাদযঃ পিত্তেনৈব ন বাতেন ন বা কফেন; তথা তৃপ্ত্যাদযো কফেন, নৈব চ বাতেন পিত্তেন বা| এবং ব্যবস্থিতে বাতব্যাধিবত্পিত্তকফব্যাধী কস্মান্নোক্তৌ? উচ্যতে– বাযোরতিবলত্বেনাশুকারিত্বেন চ গরীযস্ত্বাত্তদ্বিকারাণাং দুঃসাধ্যত্বাদাশুকারিত্বাদ্বিশিষ্টচিকিত্স্যত্বাদ্বাতব্যাধ্যভিধানং, ন তু পিত্তকফব্যাধ্যভিধানম্| অত এব চরকসুশ্রুতদিষ্বপি বাতরোগাধ্যায এব নির্দিষ্টো, ন তু পিত্তকফরোগাধ্যাযঃ| তথা য সুশ্রুতে দোষাণাং বাত এব প্রধানঃ| উক্তং চ– “পিত্তং পঙ্গু কফঃ পঙ্গুঃ পঙ্গবো মলধাতবঃ| বাযুনা যত্র নীযন্তে তত্র বর্ষন্তি মেঘবত্||” ইতি| অতো বাতব্যাধ্যভিধানম্| তস্য সম্প্রাপ্তিপূর্বকং নিদানমাহ– রূক্ষেত্যাদি| অল্পং স্তোকং, লঘ্বন্নং পুরাতনং ষষ্টিকাদি, ব্যবাযো মৈথুনং, প্রজাগরণং রাত্রিজাগরণম্| বিষমাদুপচারাদিতি অপ্রাপ্তে ক্রিযাকালে ক্রিযাক্রমঃ| দোষাসৃক্স্রাবণাদপি বমনবিরেকাভ্যাং দোষস্যাতিরেকাত্ রুধিরস্রবণাত্| লঙ্ঘনমুত্পতনং, প্লবনং বাহুভ্যাং তরণম্| , রোগাদিকর্ষণম্, অত্রাদিনা অধ্বজ্বরাদিষ্বতিলঙ্ঘনম্| আমাত্ আমরসাত্, তস্য কারণত্বং মার্গাবরণদ্বারেণ, ন তু স্বরূপেণ| অভিঘাতো লগুডাদিভিঃ| অভোজনাদুপবাসাত্| মর্মাবাধাত্ মর্মাভিঘাতাত্| অপতংসনং পতনং গজাদিভ্যঃ, তথা শীঘ্রযানাদিভিঃ| এতৈঃ কারণৈঃ কুপিতো বলী বাযূ রিক্তানি স্রোতাংসি পূরযিত্বা সর্বাঙ্গৈকাঙ্গজান্ ব্যাধীন্ করোতি||১-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপাদিকমাহ– অব্যক্তমিত্যাদি| অব্যক্তমিতি বক্ষ্যমাণানাং বাতবিকারাণাং রূপমেবাব্যক্তং পূর্বরূপং, নতু জ্বরাদিবদ্বিশিষ্টমন্যত্| আত্মরূপমিত্যাদি তদেব ব্যক্তমাত্মরূপং দোষাদিভেদেন সম্যক্ প্রকাশিতং স্বলক্ষণমিত্যর্থঃ| অপায ইতি বাযোশ্চলত্বেন স্তম্ভসঙ্কোচকম্পাদীনাং কদাচিদভাবাত্; যদুক্তম্– “গতে বেগে ভবেত্ স্বাস্থ্যং সর্বেষ্বাক্ষেপকাদিষু|” ইতি লঘুতেতি শরীরস্য, বাযুনা সর্বধাতুশোষণাত্| অথবা অপাযো লঘুতা ইতি সর্ববাতবিকারাণামপাযোঽভাবঃ, কিং তদিত্যাহ– লঘুতেতি; বাতলিঙ্গানাং লঘুতাঽত্যল্পত্বেনাবস্থানং নতু নিঃশেষনিবৃত্তিঃ; যথা– বহিরাযামনিবৃত্তাবপি ন রূক্ষত্বাদিনিবৃত্তিরিত্যাহুঃ||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অস্য পূর্বরূপমাহ– অব্যক্তমিত্যাদি| বক্ষ্যমাণবাতাদিবিকারাণাং রূপমেবাব্যক্তং পূর্বরূপং, ন তু জ্বরাদিবদ্বিশিষ্টমন্যত্| আত্মরূপমিত্যাদি, তদেব ব্যক্তমাত্মরূপং দোষাদিভেদেন সম্যক্প্রকাশিতং তস্য লক্ষণমিত্যর্থঃ| অপায ইতি বাযোশ্চলত্বাত্ স্তম্ভসঙ্কোচকম্পাদীনাং কদাচিদভাবাত্| যদুক্তম্– “গতে বেগে ভবেত্স্বাস্থ্যং সর্বেষ্বাক্ষেপকাদিষু” ইতি| লঘুতেতি শরীরস্য, বাযুনা সর্বধাতুশোষাত্| অথবা অপাযো লঘুতেতি বাতবিকারাণামপাযোঽভাবঃ| কিং তদিত্যাহ– লঘুতেতি| বাতলিঙ্গানাং লঘুতা অত্যল্পত্বেনাবস্থানং ন তু তদ্ বিশেষেণ নিবৃত্তিঃ| যথা বহিরাযামনিবৃত্তাবপি ন রূক্ষত্বাদিনিবৃত্তিরিত্যাহুঃ||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

করোতি বিবিধান্ ব্যাধীনিতি যদুক্তং তদ্ব্যাকরোতি– সঙ্কোচ ইত্যাদি| স্তম্ভঃ পর্বণামেব| পাঙ্গুল্যং পঙ্গুতা| শোথোঽঙ্গানামিতি বাহুমুখাদীনাম্| অনিদ্রতেত্যনেন অল্পনিদ্রতেত্যাহুঃ| গর্ভশুক্ররজোনাশ ইতি গর্ভশয্যাযা বাতাধিষ্ঠিতত্বেন গর্ভাগ্রহণমিতি জেজ্জটঃ| গর্ভাদিবিকৃতিরপ্যত্র দ্রষ্টব্যা| স্পন্দনং কম্পনম্| হুণ্ডনং শিরঃপ্রভৃতীনামন্তঃপ্রবেশো বক্রত্বং বা, ধাতূনামনেকার্থন্ত্বাত্| অন্যে ত্বাহুঃ– শিরোহুণ্ডনং কেশভূমিস্ফুটনং শঙ্খললাটভেদশ্চ, নাসাহুণ্ডনং ঘ্রাণনাশঃ, অক্ষিহুণ্ডনমক্ষিব্যুদাসঃ, জত্রুহুণ্ডনং বক্ষোপরোধঃ, গ্রীবাহুণ্ডনং গ্রীবাস্তম্ভঃ| ভেদ ইতি ওষ্ঠদন্তশ্রোণ্যাদীনাম্| তোদঃ শূলম্| অর্তিঃ পীডা, সা চ পাদপার্শ্বশ্রোত্রাক্ষিবক্ষসামিতি জেজ্জটঃ| আক্ষেপশ্চ আক্ষেপকাদিষু বক্ষ্যমাণঃ| আযাসঃ শ্রমঃ||৬-৮||

আতঙ্কদর্পণ ব্যাখ্যা (বাচস্পতি বৈদ্য কৃত)

‘করোতি বিবিধান্ব্যাধীন্’ ইতি যদুক্তং তদ্ব্যাকরোতি– সঙ্কোচ ইত্যাদি| সঙ্কোচঃ পর্বণাং, স্তম্ভশ্চ পর্বণামেব, অস্থ্নাং ভঙ্গঃ স্ফুটনং, তথা পর্বণাং পাণ্যাদীনাং গ্রহঃ স্তম্ভ ইব| খাজ্ঞ্যং খঞ্জতা, পাঙ্গুল্যং পঙ্গুতা| শোথোঽঙ্গানামিতি বাহুমুখাদীনাম্| অনিদ্রতেত্যনেনাল্পনিদ্রতেতি বোদ্ধব্যম্| গর্ভশুক্ররজোনাশ ইতি গর্ভাশযস্য বাতাধিষ্ঠিতত্বাদ্গর্ভাদিবিকৃতিরপ্যত্র দ্রষ্টব্যা| স্পন্দনং কম্পনম্| হুণ্ডনং শিরঃপ্রভৃতীনামন্তঃপ্রবেশঃ বক্রত্বং বা ধাতূনামনেকার্থত্বাত্| অন্যে ত্বাহুঃ– শিরোহুণ্ডনং কেশভূমিস্ফুটনং শঙ্খললাটভেদশ্চ, নাসাহুণ্ডনং ঘ্রাণনাশঃ, অক্ষিহুণ্ডনং চক্ষুর্বিকৃতিঃ, জত্রুহুণ্ডনং বক্ষোপরোধঃ, গ্রীবাহুণ্ডনং গ্রীবাস্তম্ভঃ| ভেদ ইতি ওষ্ঠদন্তশ্রোণ্যাদীনাং ভেদঃ| তোদঃ শূলং পীডাভেদঃ| অর্তিঃ পীডাভেদঃ, “অর্তিঃ পীডা, সা চ পাদপার্শ্বশ্রোত্রাক্ষিবক্ষসাম্” ইতি জেজ্জটঃ| আক্ষেপো বক্ষ্যমাণঃ, আযাসঃ শ্রমঃ||৬-৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

হেত্বিত্যাদি| হেতুবিশেষঃ আবরণাদিঃ যথা– শ্লেষ্মাবৃতো মন্যাস্তম্ভকারী; স্থানবিশেষঃ কোষ্ঠাদিঃ; যথা– পক্বাশযস্থোঽন্ত্রকূজনমিত্যাদি||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

হেত্বিত্যাদি| হেতুবিশেষশ্চাবরণাদিঃ, যথা– শ্লেষ্মাবৃতো মন্যাস্তম্ভকারী, স্থানবিশেষঃ কোষ্ঠাদিঃ, যথা– পক্বাশযস্থোঽন্ত্রকূজমিত্যাদি||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

এতদেব বিবৃণোতি (কোষ্ঠাশ্রিতবাতলক্ষণমাহ)– তত্রেত্যাদি| কোষ্ঠশব্দেনাবিশেষাত্ সর্বে আমাশযাদযো গৃহ্যন্তে, আমাশযাদিগং তু পৃথগপি বক্ষ্যতি| নিগ্রহোঽপ্রবৃত্তিঃ| ব্রধ্নঃ কোশবঙ্ক্ষণসন্ধিঃ||১০-১১||

আতঙ্কদর্পণ ব্যাখ্যা (বাচস্পতি বৈদ্য কৃত)

স্থানবিশেষমাহ– তত্রেত্যাদি| তত্র তেষু স্থানেষু মধ্যে কোষ্ঠাশ্রিতে বাতে দুষ্টে সতি মূত্রবর্চসোর্নিগ্রহস্তথা ব্রধ্নাদযো রোগা ভবন্তি| কোষ্ঠশব্দেনাত্র আমাশযাদযঃ সর্বে গৃহ্যন্তে| যদুক্তম্– “স্থানান্যামাগ্নিপক্বানাং মূত্রস্য রুধিরস্য চ| হৃদুণ্ডুকঃ ফুপ্ফুসশ্চ কোষ্ঠমিত্যভিধীযতে” ইতি| আমাশযাদিগতং তু পৃথগপি বক্ষ্যতি| নিগ্রহোঽপ্রবৃত্তিঃ| ব্রধ্নঃ কোশবঙ্ক্ষণসন্ধিঃ| সর্বাঙ্গকুপিতলক্ষণমাহ– সর্বাঙ্গেত্যাদি| ভঞ্জনং ভঙ্গবত্পীডেত্যর্থঃ| সন্ধযো বেদনযা পরীতা যুতাঃ স্ফুটন্তীব||১০-১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গুদস্থিতবাতলক্ষণমাহ– গ্রহ ইত্যাদি| অশ্মা অশ্মরী| রোগো রুজা| গুদ ইত্যুত্তরগুদে পক্বাশয ইত্যর্থঃ, নতু গুদমাত্রে; তথা সতি অশ্মরীকর্তৃত্বানুপপত্তেঃ||১২-১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পক্বাশযকুপিতমাহ– গ্রহঃ অপ্রবৃত্তিঃ, গুদ ইত্যুত্তরগুদে পক্বাশযে নতু পাযৌ, অন্যথা অশ্মর্যনুত্পত্তেঃ| ন চৈবং পক্বাশযস্থ ইত্যাদিনা পৌনরুক্ত্যং দোষায, তস্য সঙ্গ্রহেঽত্র লিখিতত্বাত্| গুদে স্থিত ইতি দৃঢবলস্য লক্ষণং, ‘পক্বাশযস্থ’ ইতি সুশ্রুতস্য, উভযলিঙ্গোপন্যাসস্তু সকললিঙ্গদর্শনার্থমিত্যবিরোধঃ| পাত্ চরণম্, পৃষ্ঠরোগাঃ স্তম্ভাদযঃ, রোগো রুজাবিশেষঃ, তথা শোফশ্চ| আমাশযকুপিতমাহ– রুগিত্যাদি| সুগমম্||১২-১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পক্বাশযস্থবাতলক্ষণমাহ– পক্বাশযস্থ ইত্যাদি| ননু, পক্বাশযস্থ ইতি পুনরুক্তিঃ, গুদে স্থিত ইত্যনেনৈবোক্তত্বাত্| উচ্যতে– গুদে স্থিত ইতি দৃঢবলস্য লক্ষণং, পক্বাশযস্থ ইতি সুশ্রুতস্য; উভযলিঙ্গোপন্যাসস্তু সকললিঙ্গপ্রদর্শনার্থমিত্যবিরোধঃ||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

সুশ্রুতোক্তং পক্বাশযগতবাতলক্ষণমাহ– পক্বেত্যাদি| অন্ত্রকূজং অন্ত্রেঽব্যক্তশব্দং করোতি| আটোপো রুজাপূর্বকক্ষোভঃ| ত্রিকস্ফিজোরুপরি সন্ধিঃ| শ্রোত্রাদিগতলক্ষণমাহ– শ্রোত্রাদিষু গতে শ্রোত্রত্বক্চক্ষুর্ঘ্রাণরসনেন্দ্রিযাণাং বিনাশঃ স্বস্ববিষযগ্রহণেঽশক্ততা||১৪||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্বগ্গতবাতলক্ষণমাহ– ত্বগিত্যাদি| আতন্যতে বিস্তার্যত এব| ত্বগ্গতে ইতি উপধাতুরূপাং ত্বচং প্রাপ্তে; চন্দ্রিকাকারস্তু ত্বক্শব্দেন রসমাহ, তেন রসগত ইত্যর্থঃ| হৃদযস্থস্য চ রসস্যামাশযসামীপ্যাদামাশযগতবাতলক্ষণেনৈব তদধিগতেঃ রসগতস্যানভিধানমিতি কার্তিকঃ||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সাম্প্রতং ধাতুকুপিতস্য লক্ষণম্| তত্র রসকুপিতমাহ– ত্বগিত্যাদি| ত্বক্ ত্বচা, রৌক্ষ্যাদিযুক্তা তুদ্যতে; আতন্যতে বিস্তার্যতে ইব| ত্বক্শব্দেনাত্র রসোঽভিপ্রেতঃ, তদাধারত্বাত্| পর্বরুক্ সর্বত্বগ্ব্যথা||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসৃগ্গতবাতলক্ষণমাহ– রুজা ইত্যাদি| অরূংষি ব্রণাঃ| ভুক্তস্য স্তম্ভঃ ভুক্তবতো গাত্রস্তম্ভঃ, সন্তর্পণেন রক্তস্য বৃদ্ধেঃ| অন্যে ত্বসৃগ্গতবাতলক্ষণং ন পঠন্তি, বাতরক্তেন সহাভেদাত্; তন্ন, অত্র দুষ্টো বাযুঃ রক্তেনাবৃতঃ কুপ্যতি, বাতরক্তে তু স্বকারণাদুভাবপি হস্ত্যাদিগমনকুপিতৌ বিশিষ্টসম্প্রাপ্ত্যা হস্তপাদগতাবেব বাতরক্তাখ্যং বিকারং জনযত ইতি||১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তকুপিতমাহ– রুজ ইত্যাদি| বৈবর্ণ্যং বিচ্ছাযতা, গাত্রে শরীরে, অরূংষি ব্রণাঃ, ভুক্তস্য স্তম্ভ ইতি ভুক্তবতো গাত্রস্য স্তম্ভঃ, সন্তর্পণেন রক্তবৃদ্ধেঃ| অন্যে ত্বসৃগ্বাতলক্ষণং ন পঠন্তি, বাতরক্তেন সহাভেদাত্| তন্ন, অত্র তু দুষ্টো বাযুঃ রক্তেনাবৃতঃ কুপ্যতি, বাতরক্তে তু স্বকারণাদুভাবপি হস্ত্যাদিগমনকুপিতৌ বিশিষ্টসম্প্রাপ্ত্যাহ হস্তপাদগতাবেব বাতরক্তাখ্যং বিকারং জনযত ইতি||১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মাংসমেদোগতবাতলক্ষণমাহ– গুর্বিত্যাদি| শ্রমিতং শ্রান্তং নিঃসহমিত্যর্থঃ| মাংসমেদোগতবাযোরেকলিঙ্গত্বম্ অদূরান্তরেণ প্রত্যাসত্তেরাশ্রযাভেদাত্, এবং মজ্জাস্থিকুপিতেঽপি বাচ্যম্||১৭-১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

মাংসমেদোগতমাহ– গুর্বিত্যাদি| অনিলে মাংসমেদোগতে সতি অঙ্গং শরীরং, গুরু ভারিকং, স্তব্ধং নিশ্চলং, দণ্ডমুষ্টিভ্যাং হতমিব সরুক্ পীডাযুক্তং; শ্রমিতং শ্রান্তং নিঃসহমিত্যর্থঃ| মাংসমেদোগতবাতযোরেকলিঙ্গত্বমদূরান্তরেণ প্রত্যাসত্তেরাশ্রযাভেদাত্| এবং মজ্জাস্থিকুপিতে বাচ্যম্| সুশ্রুতে চাত্র বিশেষ উক্তঃ– “কর্কশাস্তোদবহুলান্ গ্রন্থীন্ মাংসং সমাশ্রিতঃ| বাযুর্মেদোগতঃ কুর্যাদ্গ্রন্থীন্ মন্দরুজোঽব্রণান্||” ইতি| তথা মজ্জাস্থিকুপিতস্যাপি বাতস্য বিশেষ উক্তঃ– “অস্থিশোষং চ ভেদং চ কুর্যাচ্ছূলং চ তত্স্থিতঃ| তথা মজ্জগতে রুক্ চ ন কদাচিত্প্রশাম্যতি|” ইতি| ভেদ ইতি| সুগমম্||১৭-১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শুক্রস্থবাতলক্ষণমাহ– ক্ষিপ্রমিত্যাদি| গর্ভমিতি দুষ্টশুক্রারব্ধত্বাদ্গর্ভস্য| বিকৃতিমিতি গর্ভস্য, শুক্রস্য চ||১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

শুক্রগতমাহ– ক্ষিপ্রমিত্যাদি| অনিলঃ শুক্রস্থঃ কুপিতঃ সন্ শুক্রং ক্ষিপ্রং শীঘ্রং মুঞ্চতি বধ্নাতি চ, তথা গর্ভমপি ক্ষিপ্রং মুঞ্চতি বধ্নাতি চ| দুষ্টশুক্রারব্ধত্বাদ্গর্ভস্য; তথা বিকৃতিমিতি গর্ভস্য শুক্রস্য চ জনযেত্||১৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সিরাগতবাতলক্ষণমাহ– কুর্যাদিত্যাদি| আকুঞ্চনং সঙ্কোচঃ| পূরণং স্থূলত্বং, যদুক্তমন্যত্র– ‘সুপ্তাস্তন্ব্যো বৃহত্যো বা সিরা বাতে সিরাগতে|’ ইতি| খল্লীং বক্ষ্যমাণাম্||২০||

আতঙ্কদর্পণ ব্যাখ্যা (বাচস্পতি বৈদ্য কৃত)

কুর্যাদিতি| সিরাগতো বাযুঃ শূলং সিরাকুঞ্চনপূরণং চ, তথা বাহ্যাভ্যন্তরমাযামং, তথা খল্লীং বক্ষ্যমাণাং, কৌব্জ্যং চ কুর্যাত্| কুঞ্চনং সঙ্কোচঃ| পূরণং স্থূলত্বম্, যদুক্তমন্যত্র– “সুপ্তাস্তন্ব্যো বৃহত্যো বা সিরাবাতে সিরাগতে” ইতি| স্নাযুগতোঽনিলঃ সর্বাঙ্গরোগানেকাঙ্গরোগাংশ্চ কুর্যাত্| সুশ্রুতেনাপ্যুক্তম্– “স্নাযুপ্রাপ্তঃ স্তম্ভকম্পৌ শূলমাক্ষেপণং তথা|” ইতি| বাগ্ভটেনোক্তম্– “তস্য স্নায্বাস্থিতঃ কুর্যাদ্গৃধ্রস্যাযামকুব্জতাম্|” ইতি||২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্ধিগতবাতলক্ষণমাহ– হন্তীত্যাদি| হন্তি সন্ধিগতঃ সন্ধীনিতি সন্ধিবিশ্লেষং স্তম্ভাদিকং বা করোতি||২১||

আতঙ্কদর্পণ ব্যাখ্যা (বাচস্পতি বৈদ্য কৃত)

সন্ধিগতো বাযুঃ সন্ধীন্ হন্তি, তথা শূলশোফৌ করোতি, সন্ধিষ্বিতি শেষঃ| হন্তি সন্ধীনিতি সন্ধিশ্লেষ্মস্তম্ভাদিকং করোতি| এতেনাকুঞ্চনপ্রসারণযোরভাব উক্তঃ||২১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তকফাবৃতানাং প্রাণাদীনামর্ধার্ধশ্লোকেন লিঙ্গান্যাহ– প্রাণ ইত্যাদি| গাত্রহর্ষো রোমাঞ্চঃ| দণ্ডকো দণ্ডবত্ স্তম্ভঃ| পরস্পরং চ প্রাণাদীনামাবরণানি বিংশতির্ভবন্তি| যদুক্তং চরকে– ‘‘মারুতানাং হি পঞ্চানামন্যোন্যাবরণং শৃণু|’’ (চ. চি. অ. ২৮) ইত্যাদি| এষাং চ লক্ষণং চরক এব দ্রষ্টব্যম্ বিদেহে চৈক এব বাযুঃ স্থানকর্মভেদাত্ পঞ্চেত্যাহুঃ, সংসর্গিদ্রব্যত্বেনৈকাশ্রযে জলবত্পৃথগবস্থানানুপপত্তেঃ| ঈশানাঽপ্যাহ– ‘‘যথৈকো দেবদত্তঃ স্থানভেদাদ্ গৃহস্থো বানপ্রস্থঃ, কর্মভেদাত্ কুম্ভকারো মালাকার ইত্যুচ্যতে তথা বাযুরপি’’ ইতি||২২-২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

[অত্র পঞ্চবিধস্য বাযোর্নামান্যাহ– প্রাণেত্যাদি| স্থানস্থাঃ ইতি স্থানশব্দেনাত্র সাম্যমুচ্যতে| প্রাপযন্তি ধারযন্তি|] পিত্তকফাবৃতানাং প্রাণাদীনামর্ধর্ধশ্লোকেন লিঙ্গান্যাহ– প্রাণ ইত্যাদি| সদনমঙ্গগ্লানিঃ| দণ্ডবত্ স্তম্ভঃ| পরস্পরং চ প্রাণাদীনামাবরণানি বিংশতির্ভবন্তি| যদুক্তং চরকে– “মারুতানাং চ পঞ্চানামন্যোন্যাবরণং শৃণু” ইত্যাদি| এষাং চ লক্ষণং চরক এব দ্রষ্টব্যম্| তথা বাগ্ভটক্তং চ দ্বাবিংশতিবিধং বাযোরাবরণং লিখ্যতে– “বাযোরাবরণং চাতো বহুভেদং প্রচক্ষতে| লিঙ্গং পিত্তাবৃতে দাহস্তৃষ্ণা শূলং ভ্রমস্তমঃ|| কটূষ্ণৈশ্চাম্ললবণৈর্বিদাহঃ শীতকামিতা| শৈত্যগৌরবশূলানি কট্বাদ্যুপশযোঽধিকম্|| লঙ্ঘনাযাসরূক্ষোষ্ণকামিতা চ কফাবৃতে| রক্তাবৃতে সদাহার্তিস্ত্বগ্মাংসান্তরযোর্ভৃশম্|| ভবেত্সরাগঃ শ্বযথুর্জাযন্তে মণ্ডলানি চ| মাংসেন কঠিনঃ শোফো বিবর্ণঃ পিডিকাস্তথা|| হর্ষঃ পিপীলিকানাং চ সঞ্চার ইব জাযতে| চলঃ স্নিগ্ধো মৃদুঃ শীতঃ শোফো গাত্রেষ্বরোচকঃ|| আঢ্যবাত ইতি জ্ঞেযঃ স কৃচ্ছ্রো মেদসাঽঽবৃতে| স্পর্শমস্থ্যাবৃতেঽত্যুষ্ণং পীডনং চাভিনন্দতি|| সূচ্যেব তুদ্যতেঽত্যর্থমঙ্গং সীদতি শূল্যতে| মজ্জাবৃতে বিনমনং জৃম্ভণং পরিবেষ্টনম্| শূলং চ পীড্যমানেন পাণিভ্যাং লভতে সুখম্| শুক্রাবৃতেঽতিবেগো বা নবা নিষ্ফলতাঽপি বা|| ভুক্তে কুক্ষৌ রুজা জীর্ণে শাম্যত্যন্নাবৃতেঽনিলে| মূত্রাপ্রবৃত্তিরাধ্মানং বস্তৌ মূত্রাবৃতে ভবেত্|| বিডাবৃতে বিবন্ধোঽধঃ স্বস্থানে পরিকৃন্ততি| ব্রজত্যাশু জরাং স্নেহো ভুক্তে চানহ্যতে নরঃ|| শকৃত্পীডিতমন্নেন দুঃখং শুষ্কং চিরাত্সৃজেত্| সর্বধাত্বাবৃতে বাযৌ শ্রোণীবঙ্ক্ষণপৃষ্ঠরুক্|| বিলোমো মারুতোঽস্বস্থং হৃদযং পীড্যতেঽপি চ| ভ্রমো মূর্ছা রুজা দাহঃ পিত্তেন প্রাণ আবৃতে|| বিদগ্ধেঽন্নে চ বমনমুদানেঽপি ভ্রমাদযঃ| দাহোঽন্তররুজা ভ্রংশো দাহো ব্যানেন সর্বগঃ|| ক্লমোঽঙ্গচেষ্টাসঙ্গশ্চ সন্তাপঃ সহবেদনঃ| সমান ঊষ্মোপহতিরতিস্বেদোঽরতিঃ সতৃট্|| দাহশ্চ স্যাদপানে তু মলে হারিদ্রবর্ণতা| রুজোঽতিবৃদ্ধিস্তাপশ্চ যোনিমেহনপাযুষু|| শ্লেষ্মণা ত্বাবৃতে প্রাণে সাদস্তন্দ্রাঽরুচির্বমিঃ| ষ্ঠীবনং ক্ষবথূদ্গারনিঃশ্বাসোচ্ছ্বাসসঙ্গ্রহঃ|| উদানে গুরুগাত্রত্বমরুচির্বা স্বরগ্রহঃ| বলবর্ণপ্রণাশশ্চ, ব্যানে পর্বাস্থিবাগ্গ্রহঃ|| গুরুতাঽঙ্গেষু সর্বেষু স্খলিতং চ গতৌ ভৃশম্| সমানেঽতিহিমাঙ্গত্বমস্বেদো মন্দবহ্নিতা|| অপানে সকফং মূত্রশকৃতঃ স্যাত্প্রবর্তনম্| ইতি দ্বাবিংশতিবিধং বাযোরাবরণং বিদুঃ|| প্রাণাদযস্তথাঽন্যোন্যমাবৃণ্বন্তি যথাক্রমম্| সর্বেঽপি দ্বাবিংশতিবিধং বিদ্যাদাবরণং চ তত্|| নিঃশ্বাসোচ্ছ্বাসসংরোধঃ প্রতিশ্যাযঃ শিরোগ্রহঃ| হৃদ্রোগো মুখশোষশ্চ প্রাণেনোদান আবৃতে|| উদানেনাবৃতে প্রাণে বর্ণৌজোবলসঙ্ক্ষযঃ| দিশাঽনযা চ বিভজেত্সর্বমাবরণং ভিষক্||” ইতি| দেহে চ এক এব বাযুঃ পৃথক্কাযস্থাননামকর্মভেদাত্পঞ্চধা ইত্যাহুঃ| সংসর্গিদ্রব্যত্বেনৈকাশ্রযে জলবত্ পৃথগবস্থানানুপপত্তেঃ| ঈশানোঽপ্যাহ-”যথৈবৈকো দেবদত্তঃ স্থানভেদাদ্গৃহস্থো বানপ্রস্থঃ, কর্মভেদান্মালা কারঃ কুম্ভকার ইত্যুচ্যতে, তথা বাযুরপি’’ ইতি||২২-২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আক্ষেপকস্য সামান্যলক্ষণমাহ– যদা ত্বিত্যাদি| সর্বা ইতি ঊর্ধ্বাধস্তির্যগ্গাঃ| আক্ষিপতি দেহং হস্ত্যারূঢপুরুষস্যেব গাত্রং চালযতি| মুহুশ্চর ইতি হেতুগর্ভবিশেষণম্| ‘বহিশ্চর’ ইতি পাঠান্তরে কোষ্ঠাদ্বহিঃ শাখাগতশ্চরন্নাক্ষেপকং করোতীত্যর্থঃ| চন্দ্রিকাকারস্তু এতন্নানুমন্যতে, স্থানগাম্ভীর্যাদাক্ষেপকস্য তদারম্ভকবাযোর্বহিশ্চরত্বাযুক্তত্বাত্||২৭||

আতঙ্কদর্পণ ব্যাখ্যা (বাচস্পতি বৈদ্য কৃত)

আক্ষেপকস্য সামান্যলক্ষণমাহ– যদেত্যাদি| সর্বা ইতি| ঊর্ধ্বাধস্তির্যগ্ধমনীঃ| মুহুর্মুহুর্দেহমাক্ষিপতি, হস্ত্যারূঢস্যেব গাত্রং চালযতি| মুহুশ্চর ইতি হেতুগর্ভবিশেষণং, বারংবারং সঞ্চরণশীলঃ, ‘বহিশ্চরঃ’ ইতি পাঠান্তরং তত্র কোষ্ঠাদ্বহিঃ শাখাগতশ্চরন্ আক্ষেপং করোতীত্যর্থঃ| আক্ষেপণাত্ চালনাত্||২৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অস্যৈবাবস্থাবিশেষাবপতন্ত্রকাপতানকাবাহ– ক্রুদ্ধ ইত্যারভ্য একে তদপতানকমিত্যন্তেন| স্বৈঃ কোপনৈরিত্যনেন রূক্ষাদিকুপিতঃ স্বতন্ত্রো ন ত্বাবরণকুপিত ইতীশানঃ| নিমীলিতাক্ষঃ স্তব্ধাক্ষো বা ভবতীত্যর্থঃ| আক্ষেপকশ্চতুর্বিধো ভবতি– দণ্ডাপতানকোঽভ্যন্তরাযামো বহিরাযামোঽভিঘাতজশ্চেতি| দৃঢবলেন যদ্যপি আক্ষেপকাত্ পূর্বমন্তরাযামবহিরাযামৌ পঠিতৌ, তথাঽপ্যাক্ষেপকবিশেষাবেতৌ মন্তব্যৌ, সুশ্রুতদর্শনাত্||২৮-৩১||

আতঙ্কদর্পণ ব্যাখ্যা (বাচস্পতি বৈদ্য কৃত)

অস্যৈবাবস্থাবিশেষাবপতন্ত্রকাপতানকাবাহ– ক্রুদ্ধঃ ইত্যারভ্য একে তমপতানকমিত্যন্তেন| স্বৈঃ কোপনৈরিত্যনেন রূক্ষাদিকুপিতঃ স্বতন্ত্রঃ, ন ত্বাবরণকুপিত ইতীশানজঃ| স্থানাত্ পক্বাশযাত্| ঊর্ধ্বং শিরসি উদ্দিশ্য| পীডযন্ রুজা| হৃদযং ততঃ তস্মাত্ শিরঃ শঙ্খৌ চ পীডযেত্| আক্ষিপেত্ চালযেত্| মোহযেদিন্দ্রিযাণি| কষ্টেনোচ্ছ্বাসং মুঞ্চতি| নিমীলকো নিমীলিতাক্ষঃ, স্তব্ধাক্ষো বা ভবতীত্যর্থঃ| কপোত ইব কূজেত্, নিঃসঞ্জ্ঞঃ সঞ্জ্ঞারহিতঃ, সোঽপতন্ত্রকঃ, দৃষ্টিং রূপগ্রহণযোগ্যাং, সংস্তভ্যাচ্ছাদ্য, সঞ্জ্ঞাং জ্ঞানবিষযিণীং বুদ্ধিং, বিনাশ্য| বাযুনা মুক্তে হৃদি সুখং লভতে| বৃতে মূর্ছিতে তমেবাপতন্ত্রমেকে ত্বপতানকমাহুঃ| তন্ত্রান্তরে অপতন্ত্রকলক্ষণং পঠিতম্| তদ্যথা– “ক্রুদ্ধঃ স্বৈঃ কোপনৈর্বাযুরপানো নাভিসংশ্রযঃ| সন্দূষ্য হৃদযস্থং চ মনো ব্যাকুলযেত্ততঃ|| পীডযন্ হৃদযং প্রাপ্য শিরঃশঙ্খৌ চ পীডযেত্| আক্ষিপ্য চাখিলং দেহং মোহযেচ্চ পুনঃ পুনঃ|| স কৃচ্ছ্রাদুচ্ছ্বসেচ্চাপি স্বেদশৈত্যযুতো বহিঃ| স নিদ্রাং লভতে নীতঃ প্রাপ্য চাশু প্রবুধ্যতে|| ত্রসতে কম্পতে ভূযো নিঃসঞ্জ্ঞঃ সোঽপতন্ত্রকঃ| প্রলাপো বক্ত্রকটুতা ভ্রমো মূর্ছাঽরুচিস্তৃষা|| তস্মিন্পিত্তান্বিতে স্বেদঃ পীতাভঃ শীতকামিতা| শিরোঽঙ্গগৌরবং গ্লানিঃ শীতদ্বিট্ মন্দবেদনঃ| কফান্বিতে চ সদনং শৈত্যং চ হৃদযগ্রহঃ|| বাতোল্বণেঽঙ্গস্ফুরণং শিরোমন্যাকটিব্যথা| ধৈর্যাদিবিপ্লবো দৈন্যং বিষযেষ্বনবস্থিতঃ||”||২৮-৩১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

এষাং লক্ষণমাহ– কফান্বিত ইত্যাদি| ভৃশং কফান্বিত ইত্যনেন পিত্তমপি ন বার্যত ইত্যাহুঃ| চরকে ত্বস্যাসাধ্যত্বং কেবলবাতজত্বেন দ্র্ষ্টব্যম্| যদাহ– “পাণিপাদশিরঃপৃষ্ঠশ্রোণীঃ স্তভ্নাতি মারুতঃ| দণ্ডবত্ স্তব্ধগাত্রস্য দণ্ডকঃ সোঽনুপক্রমঃ||” (চ. চি. অ. ২৮) ইতি| তাস্বিতি সর্বধমনীষু||৩২||

আতঙ্কদর্পণ ব্যাখ্যা (বাচস্পতি বৈদ্য কৃত)

তেষাং লক্ষণমাহ– কফান্বিত ইত্যাদি| তাস্বিতি সর্বধমনীষু| ভৃশং কফান্বিত ইত্যনেন পিত্তমপি ন বার্যত ইত্যাহুঃ| চরকে ত্বস্যাসাধ্যত্বং কেবলবাতজত্বেন দ্রষ্টব্যম্| যদাহ– “পাণিপাদশিরঃপৃষ্ঠশ্রোণীঃ স্তভ্নাতি মারুতঃ| দণ্ডবত্ স্তব্ধগাত্রস্য দণ্ডকঃ সোঽনুপক্রমঃ||” (চ. চি. অ. ২৮) ইতি| তাস্বিতি সর্বধমনীষু||৩২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অন্তরাযামবহিরাযামযোঃ সাধারণং রূপমাহ– ‘ধনুস্তুল্যং নমেদ্যস্তু স ধনুস্তম্ভসঞ্জ্ঞকঃ’ ইতি||৩৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অন্তরাযামবহিরাযামযোঃ সাধারণরূপমাহ– স্তম্ভঃ সামান্যঃ, ধনুঃস্তম্ভঃ অস্যৈব ভেদঃ| ধনুস্তুল্যমিতি ধনুস্তুল্যং ক্রোডেন নম্রস্তিষ্ঠতি, দণ্ডাপতানকস্তু শুষ্ককাষ্ঠদণ্ডবত্||৩৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিশেষলক্ষণমাহ– অঙ্গুলীত্যাদি| বক্ষো বাহুদ্বযান্তরম্| হৃদযং তদভ্যন্তরং দ্ব্যঙ্গুলম্| স্নাযুপ্রতানং লতাবদনেকপ্ররোহং স্নাযুজালম্; স্নাযুরিত্যুপলক্ষণং, তেন সিরাকণ্ডরযোরপি গ্রহণম্| যদুক্তং তন্ত্রান্তরে– “মহাহেতুর্বলী বাযুঃ সিরাঃ সস্নাযুকণ্ডরাঃ| মন্যাপৃষ্ঠাশ্রিতা বাহ্যাঃ সংশোষ্যাযামযেদ্বহিঃ||” ইত্যাদি| অভ্যন্তরাযামং ক্রোডে নতং, বাহ্যাযামং পৃষ্ঠে নতম্| অন্তরাযামবহিরাযামাভ্যাং তন্ত্রান্তরোক্তকুব্জস্যাবরোধঃ| যদুক্তম্– “হৃদযং যদি বা পৃষ্ঠমুন্নতং ক্রমশঃ সরুক্| ক্রুদ্ধো বাযুর্যদা কুর্যাত্তদা তং কুব্জমাদিশেত্||” ইতি||৩৪-৩৬||

আতঙ্কদর্পণ ব্যাখ্যা (বাচস্পতি বৈদ্য কৃত)

বিশেষলক্ষণমাহ– অঙ্গুলীত্যাদি| বলী বাযুঃ কুপিতঃ গুল্ফৌ চরণঘুটিকে, বক্ষো বাহুদ্বযান্তরং, হৃদযং তদভ্যন্তরং দ্ব্যঙ্গুলং, স্নাযুপ্রতানং লতাবদনেকপ্ররোহং স্নাযুজালং, স্নায্বিত্যুপলক্ষণং, তেন সিরাকণ্ডরযোরপি গ্রহণম্| যদুক্তং তন্ত্রান্তরে– “মহাহেতুর্বলী বাযুঃ সিরাঃ সস্নাযুকণ্ডরাঃ| মন্যাপৃষ্ঠাশ্রিতা বাহ্যাঃ সংশোষ্যাযামযেদ্বহিঃ” ইত্যাদি| ততঃ স্নাযুপ্রতানং ধনুরিব নামযেত্| অভ্যন্তরাযামং ক্রোডে নতম্| হনুঃ কণ্ঠকপোলসন্ধিঃ| বহিরাযামলক্ষণমাহ– বাহ্যেত্যাদি| পূর্ববদ্বাহ্যস্নাযুপ্রতানং ধনুর্বদানমেত্| বাহ্যাযামং পৃষ্ঠে নতং বক্ষঃকঠ্যূরুভঙ্গ্ত্বাত্| তমসাধ্যমাহুঃ||৩৪-৩৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তানামাক্ষেপকপ্রকারাণাং কফপিত্তানুবন্ধমাহ– কফপিত্তান্বিত ইত্যাদি| এতচ্চ দণ্ডাপতানকলক্ষণমেব জেজ্জটেন ব্যাখ্যাতম্| পিত্তকফানুবন্ধশ্চাত্র শৈত্যশোথগুরুত্বানীত্যাদিনোক্তলক্ষণ এব বোধ্যঃ| চতুর্থমভিঘাতজমিতি দণ্ডাপতানকাদিত্রিতযাপেক্ষ্য চতুর্থত্বম্, অভিঘাতজং দণ্ডাদ্যভিঘাতকুপিতবাতজম্; অস্য চ লক্ষণম্– ‘‘যদা তু ধমনীঃ সর্বাঃ’’ ইত্যাদিনোক্তসামান্যলক্ষণং দ্রষ্টব্যম্||৩৭||

আতঙ্কদর্পণ ব্যাখ্যা (বাচস্পতি বৈদ্য কৃত)

উক্তানামাক্ষেপপ্রকারাণাং কফপিত্তানুবন্ধমাহ– কফেত্যাদি| কফপিত্তানুবন্ধশ্চাত্র শৈত্যশোষগুরুত্বানীত্যাদিনোক্তলক্ষণে বোদ্ধব্যঃ, কেবলঃ স্বতন্ত্র আক্ষেপং করোতি| অন্যং চতুর্থমভিঘাতজম্| দণ্ডাভিঘাতকুপিতবাতজাতস্য তু লক্ষণম্| ‘যদা তু ধমনীঃ সর্বাঃ’ ইত্যাদিনা জ্ঞেযম্||৩৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যত্বমাহ– গর্ভপাতেত্যাদি| গদাধরস্ত্বাহ– কফপিত্তান্বিত ইত্যাদিনা নিমিত্তভেদেনাক্ষেপকশ্চতুর্ধা ইতি; তদ্যথা– একঃ কফান্বিতেন বাতেন, দ্বিতীযঃ পিত্তান্বিতেন, তৃতীযঃ কেবলেন, চতুর্থোঽভিঘাতেনেতি| অত্র পক্ষে গর্ভপাতশোণিতাতিস্রাবজৌ কেবলবাতেন গ্রাহ্যৌ| এতেষাং চ মুহুর্মুহুরাক্ষেপণং বোধ্যম্ আক্ষেপকবিশেষত্বাত্||৩৮||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যমাহ– গর্ভেত্যাদি| অত্রাপতানকমুপলক্ষণং, তেন চতুষ্টযমপি গৃহ্যতে ‘কফপিত্তান্বিতঃ’ ইত্যাদি নিমিত্তভেদেন চতুর্থ আক্ষেপক ইতি গদাধরঃ| তদ্যথা– একঃ কফান্বিতেন বাতেন, দ্বিতীযঃ পিত্তান্বিতেন, তৃতীযঃ কেবলেন, চতুর্থোঽভিঘাতজেনেতি| অত্র গর্ভপাতশোণিতাতিস্রাবজৌ কেবলবাতেন গ্রাহ্যাবিতি| এষাং চ মুহর্মুহুরাক্ষেপণং জ্ঞেযম্, আক্ষেপকবিশেষাত্||৩৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পক্ষবধমাহ– গৃহীত্বেত্যাদি| অর্ধমিতি অর্ধমর্যাদযা অর্ধনারীশ্বরবত্| পক্ষং বাহুকক্ষপার্শ্বাদিভাগম্, অন্যতরমিতি বামং দক্ষিণং বা| সন্ধিবন্ধান্ কফসহিতস্নাযুভির্বৃতান্ মোক্ষযন্নিতি গদাধরঃ; অত এব “সিরাঃ স্নাযূর্বিশোষ্য” ইত্যুক্তম্| অর্ধকায ইত্যুক্তেঽপি কৃত্স্নগ্রহণং যুগপত্ সর্বার্ধাঙ্গব্যাপ্ত্যর্থম্| অকর্মণ্য ঈষচ্চেষ্টাক্ষমঃ| বিচেতনোঽল্পচেতনঃ, ঈষত্স্পর্শাদিজ্ঞানবানিত্যর্থঃ| তদ্বচ্চেত্যনেন সিরাঃ স্নাযূর্বিশোষ্য চেত্যাদিসম্প্রাপ্তিং লক্ষণং চাতিদিশতি||৩৯-৪১||

আতঙ্কদর্পণ ব্যাখ্যা (বাচস্পতি বৈদ্য কৃত)

পক্ষবধমাহ– গৃহীত্বেত্যাদি| বাযুস্তনোঃ শরীরস্যার্ধং গৃহীত্বা সিরাঃ স্নাযূর্বিশোষ্য শোষযিত্বা অন্যতরং পক্ষং হন্তি নিরীহং করোতি| অর্ধমিতি অর্ধমর্যাদযা অর্ধনারীশ্বরবত্| পক্ষমিতি শরীরার্ধং বাহুকক্ষপার্শ্বাদিভাগম্, অন্যতরমিতি বামং দক্ষিণং বেতি| কিং কুর্বন্? সন্ধীনাং বন্ধান্ সন্ধিবন্ধান্ কফসহিতস্নাযুভির্বৃতান্ বিমোক্ষযন্নিতি গদাধরঃ| অতঃ সিরাঃ স্নাযূর্বিশোষ্যেত্যুক্তম্| তস্য তথাবিধস্য পুংসঃ কৃত্স্নো নিঃশেষ অর্ধকাযোঽকর্মণ্যো বিচেতনঃ স্যাত্| অর্ধকায ইত্যুক্তেঽপি কৃত্স্নগ্রহণং যুগপত্সর্বাঙ্গব্যাপ্ত্যর্থম্| অকর্মণ্য ঈষচ্চেষ্টাক্ষযঃ| বিচেতনোঽল্পচেতনঃ ঈষত্স্পর্শাদিজ্ঞানবানিত্যর্থঃ| কেচিদাচার্যাস্তং ব্যাধিমেকাঙ্গরোগং বিদুঃ, অন্যে পক্ষবধং বিদুঃ| সর্বকাযাশ্রিতে সমস্তদেহগতে বাতে তদ্বত্সর্বাঙ্গরোগমিত্যাহুঃ| তদ্বচ্চেত্যনেন ‘সিরাঃ স্নাযূর্বিশোষ্য চ’ ইত্যাদিসম্প্রাপ্তিং লক্ষণং চাতিদিশতি||৩৯-৪১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্যৈব সাধ্যাসাধ্যজ্ঞানার্থমাহ– দাহেত্যাদি| এতচ্চ লক্ষণমন্যত্রাপি বাতরোগে দ্রষ্টব্যম্, অত এব সামান্যেন বাযাবিতি কৃতবান্| শুদ্ধঃ কেবলঃ| অন্যেনেতি কফেন, পিত্তেন বা| ক্ষযহেতুকমিতি ধাতুক্ষযকুপিতশুদ্ধবাতজমিতি||৪২-৪৩||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যৈব সাধ্যাসাধ্যত্বজ্ঞানার্থমাহ– দাহেত্যাদি| এবং লক্ষণমন্যত্রাপি বাতরোগে দ্র্ষ্টব্যম্| পক্ষাঘাতস্য সাধ্যাসাধ্যত্বং দর্শযন্নাহ– শুদ্ধেত্যাদি| শুদ্ধঃ কেবলঃ, কৃচ্ছ্রসাধ্যং কষ্টসাধ্যং, অন্যেন সংসৃষ্টং কফেন পিত্তেন বা যুক্তং, ক্ষযহেতুকং ধাতুক্ষযজমিত্যর্থঃ||৪২-৪৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অর্দিতমাহ– উচ্চৈরিত্যাদি| অর্দযতি পীডযতি| অপবর্ততে বক্রীভবতি| চলতি কম্পতে| বাক্সঙ্গোঽনির্গমো বচনস্য| আদিশব্দেন ভ্রূগণ্ডাদীনাং গ্রহণম্| বৈকৃতং বেদনাস্ফুরণবক্রত্বাদিকম্| গ্রীবেত্যাদি যস্মিন্ পার্শ্বেঽর্দিতং তস্মিন্ গ্রীবাদীনাং বেদনেতি যোজ্যম্| তন্ত্রান্তরে তু মুখার্ধবচ্ছরীরার্ধব্যাপকোঽপ্যর্দিতঃ পঠিতঃ| যদাহ দৃঢবলঃ– ‘অর্ধে তস্মিন্ মুখার্ধে বা কেবলে স্যাত্তদর্দিতম্|’ (চ. চি. অ. ২৮) ইতি| ননু, যদ্যেবং তদা অর্দিতার্ধাঙ্গবাতযোঃ কো ভেদঃ? উচ্যতে– বেগিত্বেনার্দিতে কদাচিদ্বেদনা ভবতি, অর্ধাঙ্গবাতে তু সর্বদৈবেতি ভেদঃ; অথবা যথোক্তঃ সর্বাঙ্গোঽর্দিতঃ তদ্বিপরীতস্ত্বর্ধাঙ্গবাত ইত্যাহুঃ| সুশ্রুতেন তু মুখমাত্র এবার্দিতঃ পঠিতঃ, অর্ধশরীরস্যার্ধাঙ্গবাতেন লব্ধত্বাত্| স এবাত্র মাধবেন লিখিতঃ||৪৪-৪৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অর্দিতস্য নিদানপূর্বকং লক্ষণমাহ– উচ্চৈরিত্যাদি| উচ্চৈর্ভাষণং, কঠিনানি পূগফলাদীনি খাদতঃ, বিষমাচ্ছযনাত্ গ্রীবাদিবৈপরীত্যশযনাত্, অর্দযতি পীডযতি, গ্রীবাং ব্যাপ্য অপবর্ততে বক্রীভবতি, চলতি কম্পতে, বাক্সঙ্গো বচনস্যানির্গমঃ| আদিশব্দেন গণ্ডনাসাদীনাং গ্রহণং, বৈকৃতং বেদনাস্ফুরণবক্রত্বাদিকম্| গ্রীবেত্যাদি যস্মিন্ পার্শ্বেঽর্দিতং তস্মিন্পার্শ্বে গ্রীবাদীনাং বেদনেতি যোজ্যম্| চিবুকং মুখকুহরস্যাধোভাগঃ| তন্ত্রান্তরে মুখার্ধবচ্ছরীরার্ধব্যাপকোঽপ্যর্দিতঃ পঠিতঃ| যদাহ দৃঢবলঃ– “অর্ধে তস্মিন্মুখার্ধে বা কেবলে স্যাত্তদর্দিতম্” ইতি||৪৪-৪৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্যাসাধ্যলক্ষণমাহ– ক্ষীণস্যেত্যাদি| অনিমিষাক্ষস্য নিমেষাসমর্থচক্ষুষঃ| প্রসক্তাব্যক্তভাষিণ ইতি প্রসক্তং প্রকর্ষেণ সক্তমপ্রবৃত্তম্, অব্যক্তং প্রপীডিতবর্ণপদং, ভাষিতুং শীলং যস্য স তথা| অন্যে তু প্রসক্তং নিরন্তরমাহুঃ; তন্ন, চরকে ‘‘দীনা জিহ্বা সমুত্ক্ষিপ্তা কালে সজ্জতি চাস্য বাক্|’’ (চ. চি. অ. ২৮) ইতি বচনাত্| ত্রিবর্ষমিতি অতীতবর্ষত্রযম্; অথবা ত্রযাণাং মুখনাসাচক্ষুষাং বর্ষঃ স্রবণং যত্র তত্তথেত্যাহুঃ||৪৭||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যাসাধ্যলক্ষণমাহ– ক্ষীণস্যেত্যাদি| অনিমিষাক্ষস্য নিমেষাসমর্থচক্ষুষঃ| প্রসক্তেতি প্রকর্ষেণ সক্তং লগ্নমপ্রবৃত্তং, কণ্ঠতাল্বাদিবর্ণোচ্চারণস্থানেষু, অব্যক্তমস্ফুটং পীডিতবর্ণপদং ভাষিতুং শীলং যস্য স তথা| অন্যে তু প্রসক্তং নিরন্তরমাহুঃ; তন্ন, চরকে– “কালে সজ্জতি চাস্য বাক্” ইতি বচনাত্| ত্রিবর্ষমিতি অতীতবর্ষত্রযম্, অথবা ত্রযাণাং মুখনাসিকাচক্ষুষাং বর্ষঃ স্রবণং যত্র তত্তথেত্যাহুঃ| বেপনস্য কম্পনশীলস্য||৪৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আক্ষেপকাদীনামর্দিতান্তানাং বেগিত্বমাহ– গত ইত্যাদি| স্বাস্থ্যং পীডালাঘবং, ভারাপগমে সুখিত্বব্যপদেশবত্||৪৮||

আতঙ্কদর্পণ ব্যাখ্যা (বাচস্পতি বৈদ্য কৃত)

আক্ষেপকাদীনামর্দিতান্তানাং তাবদ্বেগিত্বমাহ– গত ইত্যাদি| ভারাপগমে সুখিত্বব্যপদেশবত্||৪৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

হনুগ্রহমাহ– জিহ্বেত্যাদি| হনুমূলস্থঃ কপোলমূলস্থঃ| হনুং স্রংসযিত্বাঽধঃ কৃত্বা| বিবৃতাস্যত্বম্ আস্যবিবৃতিং, সংবৃতাস্যতাম্ আস্যসংবৃতিং; সা চ বাযোরনিযতকারিত্বাত্||৪৯-৫০||

আতঙ্কদর্পণ ব্যাখ্যা (বাচস্পতি বৈদ্য কৃত)

হনুগ্রহমাহ– জিহ্বেত্যাদি| জিহ্বানির্লেখনাত্ জিহ্বাঘর্ষণাত্ দন্তকাষ্ঠাদিনা, শুষ্কাণাং চণকাদীনাং ভক্ষণাত্| অভিঘাততঃ তাডনাত্| হনুমূলস্থঃ কপোলমূলস্থঃ| হনুং স্রংসযিত্বা অধঃ কৃত্বা, বিবৃতাস্যত্বং প্রসারিতবদনত্বং, সংবৃতাস্যত্বং সঙ্কুচিতমুখতাম্| অত্র সংবৃতির্বিবৃতির্বা বাযোরনিযতকারিত্বাত্| স এব বাতঃ কুপিত ইত্যর্থঃ| তেন কৃচ্ছ্রাচ্চর্বণং ভাষণং চ স্যাত্||৪৯-৫০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মন্যাস্তম্ভমাহ– দিবাস্বপ্নেত্যাদি| স এবেতি বাতঃ||৫১||

আতঙ্কদর্পণ ব্যাখ্যা (বাচস্পতি বৈদ্য কৃত)

মন্যাস্তম্ভমাহ– দিবেত্যাদি| আসনমুপবেশঃ, স্থানমূর্ধ্বভবনং, বিবৃতোর্ধ্বনিরীক্ষণং বক্রমার্গাবলোকনম্| স এবেতি বাতো দিবাস্বপ্নাদিভিঃ কুপিতঃ সন্, শ্লেষ্মণাঽঽবৃতো মন্যাস্তম্ভং প্রকুরুতে, মন্যাস্তম্ভং কেচিদপতানকপূর্বরূপং মন্যন্তে||৫১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

জিহ্বাস্তম্ভমাহ– বাগিত্যাদি| বাগ্বাহিনীসিরাসংস্থ ইতি বাগ্বাহিনী যা সিরা তত্র সংস্থ ইতি যোজ্যং, সমস্তপক্ষে “পুংবত্ কর্মধারযজাতীযদেশীযেষু” ইত্যনেন পুংবদ্ভাবপ্রাপ্তেঃ| অন্নপানবাক্যেষ্বনীশতেতি অন্নপানাভ্যবহারবচনেষু অসামর্থ্যম্||৫২||

আতঙ্কদর্পণ ব্যাখ্যা (বাচস্পতি বৈদ্য কৃত)

জিহ্বাস্তম্ভমাহ– বাগিত্যাদি| বাগ্বাহিনী বা সিরা তত্র সংস্থ ইতি যোজ্যম্| অন্নপানবাক্যেষ্বনীশতেতি অন্নপানাভ্যবহারবচনেষ্বসামর্থ্যম্||৫২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সিরাগ্রহমাহ– রক্তমিত্যাদি| মূর্ধধরা ইতি গ্রীবাগতাঃ, তাসাং রূক্ষত্বং বেদনাবত্ত্বং কৃষ্ণত্বং চ কুর্যাত্| সোঽসাধ্য ইতি স্বরূপেণৈব, কাকণকুষ্ঠবত্| শিরোগ্রহ ইতি পাঠান্তরেঽপি শিরোধারকসিরাদুষ্ট্যা শিরোবেদনাকারিত্বাত্ ‘শিরোগ্রহ’ ইতি ব্যপদেশঃ, লক্ষণং তু তদেব||৫৩||

আতঙ্কদর্পণ ব্যাখ্যা (বাচস্পতি বৈদ্য কৃত)

সিরাগ্রহমাহ– রূক্ষাঃ সবেদনাঃ কৃষ্ণা ইতি রূক্ষকৃষ্ণবেদনাবত্ত্বং কুর্যাত্| সোঽসাধ্য ইতি স্বরূপেণ হস্তগতদ্রব্যবত্| ‘শিরোগ্রহঃ’ ইতি পাঠান্তরং, তত্র শিরোধারকসিরাদুষ্ট্যা শিরোবেদনাকারিত্বাত্, শিরোগ্রহলক্ষণং তু তদেব||৫৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গৃধ্রসীমাহ– স্ফিক্পূর্বেত্যাদি| স্ফিক্ পূর্বা প্রথমতো গ্রাহ্যা স্তম্ভরুক্তোদৈর্যস্যাঃ সা স্ফিক্পূর্বা; ঈশানস্তু পূর্বা প্রথমা গৃধ্রসী বাতাদিতি যোজযতি, এষা চ ব্যাখ্যা স্ফিক্শব্দস্য নপুংসকত্বেন ‘পূর্বা স্ফিক্ কটীপৃষ্ঠ’ ইত্যাদিনা পাঠেন বোপপদ্যতে নান্যথা| ‘স্ফিক্পূর্বম্’ ইতি পাঠান্তরং জানুজঙ্ঘাপদমিত্যনেন যোজ্যম্| ক্রমাদিতি ন যুগপত্| বাতাদিতি ছেদঃ| বাতকফারব্ধা গৃধ্রসী, সা উক্তবাতলক্ষণযুক্তাঽপি তন্দ্রাগৌরবাদিযুক্তা ভবতীতি গৃধসীদ্বযমুক্তম্||৫৪||

আতঙ্কদর্পণ ব্যাখ্যা (বাচস্পতি বৈদ্য কৃত)

গৃধ্রসীমাহ– স্ফিগিত্যাদি| গৃধ্রসী স্তম্ভরুক্তোদৈঃ ক্রমাত্ কটিপৃষ্ঠোরুজানুজঙ্ঘাপদং গৃহ্ণাতি, তথা মুহুঃ স্পন্দতে সা বাতজা জ্ঞেযা, কথম্ভূতা গৃধ্রসী? স্ফিক্ পূর্বা প্রথমতো গ্রাহ্যা স্তম্ভরুক্তোদৈর্যস্যাঃ সা স্ফিক্পূর্বা| ঈশানস্তু পূর্বা প্রথমা গৃধ্রসী বাতাদিতি যোজযতি| এষা চ ব্যাখ্যা স্ফিক্শব্দস্য নপুংসকত্বেন, ‘পূর্বা স্ফিক্ সকটীপৃষ্ঠ’– ইত্যাদিপাঠেন বোপপদ্যতে, নান্যথা| ‘স্ফিক্পূর্বম্’ ইতি পাঠান্তরং জানুজঙ্ঘাপদমিত্যনেন যোজ্যম্| ক্রমাদিতি ন যুগপত্| গৃধ্রসী রঙ্ঘিণীতি লোকে| বাতাদিতি ছেদঃ, বাতকফারব্ধা গৃধ্রসী, সা প্রোক্তা বাতলক্ষণযুক্তা তন্দ্রাগৌরবাদিযুক্তাঽপি ভবতীতি গৃধ্রসীদ্বযমুক্তম্||৫৪||

আতঙ্কদর্পণ ব্যাখ্যা (বাচস্পতি বৈদ্য কৃত)

গৃধ্রস্যাঃ পুনরপি বিশেষলক্ষণমাহ– বাতজাযামিত্যাদি| সুগমম্||৫৫-৫৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিশ্বাচীমাহ– তলমিত্যাদি| তলং হস্তস্যোপরিভাগঃ, তলশব্দোঽত্র উপরিবচনঃ, যথা– ভূতলমিতি গযদাসঃ| তেনাযমর্থঃ– বাহ্বোঃ পৃষ্ঠং বাহুপৃষ্ঠং, তত আরভ্য হস্ততলং লক্ষীকৃত্যাঙ্গুলীনাং যাঃ কণ্ডরাস্তাঃ সন্দূষ্য বাহ্বোঃ কর্মক্ষযকরী যা সা বিশ্বাচী| বাহ্বোঃ কর্ম গ্রহণাকুঞ্চনাদি, দ্বিত্বং চাত্র সম্ভবপরং, তেনৈকবাহাবপি ভবতি বাতরক্তবত্| বিশ্বাচী চেতি চকারেণ গৃধ্রসীবিশ্বাচ্যোঃ খল্লীসঞ্জ্ঞাং দর্শযতি, তযোরপি করমূলাবমোটনকারিত্বাত্; যদুক্তং হারীতে– ‘‘বিশ্বাচী গৃধ্রসী চোক্তা খল্লী তীব্ররুজান্বিতা|’’ ইতি গযদাসঃ| চক্রস্ত্বাহ– চরকে “খল্লী তু পাদজঙ্ঘোরুকরমূলাবমোটনী|” (চ. চি. অ. ২৮) ইত্যনেন বিশ্বাচ্যাঃ পৃথগেব খল্লী পঠিতা, সুশ্রুতেন তু খল্লী ন পঠিতৈব; নহি তেন তন্ত্রান্তরোক্তসর্ববিকারাঃ পঠ্যন্তে, চরকক্তপরস্পরবাতাবরণলক্ষণমেব ন পঠিতং; হারীতেন তু তীব্ররুজাযোগাদ্ গৃধ্রসীবিশ্বাচ্যোঃ খল্লীত্বং পঠিত্বং, ভবতি হি ধর্মান্তরযোগাত্ কস্যচিদ্বিকারস্য রোগান্তরত্বং; যথা– অষ্ঠীলৈব প্রত্যষ্ঠীলা, অশ্মর্যেব শর্করা, পাণ্ডুরোগ এব কামলেত্যাদি||৫৭||

আতঙ্কদর্পণ ব্যাখ্যা (বাচস্পতি বৈদ্য কৃত)

বিশ্বাচীমাহ– তলমিত্যাদি| কণ্ডরা মহাস্নাযুঃ, তলং হস্তস্যোপরিভাগঃ, তলশব্দোঽত্রোপরিবচনঃ, যথা– ভূতলমিতি| তেনাযমর্থঃ বাহ্বোঃ পৃষ্ঠং বাহুপৃষ্ঠং, তদারভ্য হস্ততলং লক্ষীকৃত্যাঙ্গুলীনাং যাঃ কণ্ডরাঃ তাঃ সন্দূষ্য বাহ্বোঃ কর্মক্ষযকরী যা সা বিশ্বাচী| বাহ্বোঃ কর্ম– আকুঞ্চনগ্রহণাদি, দ্বিত্বং চাত্র সম্ভবপরং, তেনৈকবাহাবপি ভবতি, বাতরক্তবত্| বিশ্বাচী চেতি চকারেণ গৃধ্রসীবিশ্বাচ্যোঃ খল্লীসঞ্জ্ঞা দর্শিতা, তযোরপি করমূলাবমোটকত্বাত্||৫৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্রোষ্টুকশীর্ষমাহ– বাতেত্যাদি| বাতশোণিতজ ইতি বাতরক্তাখ্যবিকারজঃ, চিকিত্সাভেদার্থং পৃথক্ পঠিত ইতি গযদাসঃ| বাতশোণিতাভ্যাং জাত ইতি জেজ্জটঃ| দৃশ্যতে হ্যযং বাতরক্তব্যতিরেকেণাপি; জানুদেশনিযতত্বেন বিশিষ্টলক্ষণত্বেন চেতরবাতরক্তশোথাদ্ভেদ ইতি| ক্রোষ্টুকশীর্ষবত্ শৃগালমস্তকবত্ স্থূলঃ||৫৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্রোষ্টুকশীর্ষমাহ– বাতেত্যাদি| বাতশোণিতাভ্যাং জাতো বাতশোণিতজঃ, ন পুনর্বাতরক্তেন ব্যাধিনা জনিতঃ, জানু মধ্যে ঊরুজঙ্ঘযোঃ সন্ধিঃ, স্থৌল্যেন আকৃত্যা চ ক্রোষ্টুশীর্ষবত্||৫৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

খঞ্জমাহ– বাযুরিত্যাদি| সক্থ্নঃ ঊর্ধ্বজঙ্ঘাযাঃ, কণ্ডরাং মহাস্নাযুম্, আক্ষিপেত্ ঈষত্ ক্ষিপেত্, কিঞ্চিদ্গতিমত্ত্বাদিতি গযদাসঃ| সক্থ্নোরিতি দ্বিবচনেনৈব দ্বিত্বে লব্ধে দ্বযোরিতি পদেন নিযমযতি– সক্থিদ্বযস্যৈব বধাত্ পঙ্গুঃ, একসক্থিবধাত্ খঞ্জ ইতি; বধশ্চাত্র গমনাদিক্রিযানাশঃ||৫৯||

আতঙ্কদর্পণ ব্যাখ্যা (বাচস্পতি বৈদ্য কৃত)

খঞ্জপঙ্গুবাতাবাহ– বাযুরিত্যাদি| যদা কট্যাং স্থিতো বাযুঃ সক্থ্নঃ ঊর্ধ্বজঙ্ঘাযাঃ কণ্ডরাং মহাস্নাযুমাক্ষিপেত্ ঈষত্ ক্ষিপেত্ কিঞ্চিদ্গতিমত্ত্বাদিতি গযদাসঃ, তদা জন্তুঃ খঞ্জো ভবতি| পঙ্গুঃ সক্থ্নোর্দ্বযোর্বধাদিতি সর্বথা গতিবিঘাতাত্ পঙ্গুরির্থঃ| সক্থ্নোরিতি দ্বিবচনেনৈব দ্বিত্বে লব্ধে দ্বযোরিতিপদেন নিযমযতি– সক্থিদ্বযস্যৈব বধাত্পঙ্গুঃ, একসক্থিবধাত্খঞ্জ ইতি| বধশ্চাত্র গমনক্রিযানাশঃ||৫৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

খঞ্জবিশেষমাহ– প্রক্রামন্নিত্যাদি প্রক্রামন্নিতি গমনমারভমাণো বেপতে| প্রশব্দোঽযমাদিকর্মণি| খঞ্জন্নিব গচ্ছতি বিকলযন্নিব গচ্ছতি, গমনারম্ভেন অন্যেন সংসৃষ্টং বেপতে তেন খঞ্জাদস্য ভেদঃ| মুক্তেত্যাদিমিত্যাহুঃ| মুক্তসন্ধিপ্রবন্ধনমিতি শিথিলীকৃতসন্ধিবন্ধনম্| কলাযখঞ্জ ইতি শাস্ত্রে রূঢা সঞ্জ্ঞা; অযমেবান্যত্র খঞ্জবাত ইত্যুক্তঃ||৬০||

আতঙ্কদর্পণ ব্যাখ্যা (বাচস্পতি বৈদ্য কৃত)

কলাযখঞ্জমাহ– প্রক্রামন্নিত্যাদি| প্রক্রামন্ পাদবিক্ষেপং কুর্বন্, বেপতে কম্পতে| খঞ্জন্নিবেত্যাদি বৈকল্যং কুর্বন্নিব গচ্ছতি| মুক্তসন্ধিপ্রবন্ধনং শিথিলীকৃতসন্ধিবন্ধনম্| কলাযখঞ্জ ইতি শাস্ত্রে রূঢিঃ সঞ্জ্ঞা||৬০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতকণ্টকমাহ– রুগিত্যাদি| বিষমপাদন্যাসকুপিতঃ শ্রমকুপিতো বা বাযুর্গুল্ফে বেদনাং জনযন্, বাতকণ্টকমিত্যাহুঃ; অযমেবান্যত্র ‘খুডুকাবাত’ ইত্যুক্তঃ||৬১||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতকণ্টকমাহ– রুগিত্যাদি| যদা বিষমপাদন্যাসকুপিতঃ শ্রমকুপিতো বা বাযুর্গুল্ফেবেদনাং জনযতি, তং বাতকণ্টকমিত্যাহুঃ; অযমেবান্যত্র ‘খুডুকাবাত’ ইত্যুক্তঃ||৬১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পাদদাহমাহ– পাদযোরিত্যাদি| বিশেষতশ্চঙ্ক্রমত ইত্যনেন স্থিতস্য মন্দো দাহ ইতি দর্শযতি| বৈবর্ণ্যাদেরভাবাদ্বাতরক্তাদস্য ভেদঃ||৬২||

আতঙ্কদর্পণ ব্যাখ্যা (বাচস্পতি বৈদ্য কৃত)

পাদদাহমাহ– পাদযোরিত্যাদি| পাদযোঃ বিশেষতশ্চঙ্ক্রমতঃ বিশেষেণ গচ্ছতঃ, বিশেষতশ্চঙ্ক্রমত ইত্যেনন স্থিতস্য মন্দো দাহ ইতি দর্শযতি| বৈবর্ণ্যাদেরভাবাদ্বাতরক্তাদস্য ভেদঃ||৬২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পাদহর্ষমাহ– হৃষ্যেতে ইত্যাদি| হৃষ্যেতে হর্ষযুক্তৌ ভবতঃ, হর্ষশ্চ রোমাঞ্চপ্রাযঃ অন্তঃশীতো ঝিণিঝিণিবত্ বেদনাবিশেষ ইত্যাহুঃ; ঝিণিঝিণি তু ন চিরানুবন্ধিনী কেবলবাতজেতি ভেদঃ||৬৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পাদহর্ষমাহ– হৃষ্যেতে ইত্যাদি| হৃষ্যেতে হর্ষযুক্তৌ ভবতঃ, হর্ষশ্চ রোমাঞ্চপ্রাযোঽন্তঃশীতো ঝিণিঝিণিবত্ বেদনাবিশেষঃ||৬৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অংসেত্যাদি| অংসেত্যাদিনা শ্লোকার্ধেনাংসশোষঃ কেবলবাতজ উচ্যতে| অংসবন্ধনকারকঃ শ্লেষ্মা অংসবন্ধনঃ; এতদনন্তরং ‘অংসশোষং জনযেত্’ ইতি শেষ ইতি কার্তিকঃ||৬৪||

আতঙ্কদর্পণ ব্যাখ্যা (বাচস্পতি বৈদ্য কৃত)

অর্ধার্ধশ্লোকেনাংসশোষাববাহুকযোর্লক্ষণমাহ– অংসেত্যাদি| অংসশব্দেনাংসসমীপোপলক্ষিতদেশোংঽসদেশঃ| অংসো বাহুশিরঃ, তত্র স্থিতো ব্যবস্থিতঃ| অংসবন্ধনমিতি অংসবন্ধনকারকঃ শ্লেষ্মা অংসবন্ধনঃ, তত্রাংসবন্ধনং শ্লেষ্মাণং শোষযিত্বা স তদনন্তরং অংসশোষং জনযেদিতি বাক্যশেষ ইতি কার্তিকঃ||৬৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অববাহুকমাহ– সিরাশ্চেত্যাদিনা| তত্রস্থোংঽসদেশস্থঃ| অযং চ বাতকফজঃ| অন্যে তু মিলিত্বা অববাহুকলক্ষণমাহুঃ; তন্ন, যতঃ সুশ্রুতেনোক্তম্– ‘অংসশোষাববাহুকযোর্বাহুমধ্যে সিরাব্যধঃ’ (সু. শা. অ. ৮) ইতি| এতদনন্তরং সুশ্রুতেন বাধির্যং পঠিতম্– “যদা শব্দবহং বাযুঃ” (সু. নি. অ. ১) ইত্যাদিনা, মাধবেন তু প্রকরণানুরোধং মন্যমানেন কর্ণরোগ এব তত্ পঠিতং, কিন্তু সুশ্রুতেন বাতব্যাধৌ বাধির্যং পঠিত্বাঽপি বাধির্যকর্ণশূলৌ শালাক্যঽপি পঠিতৌ; পুনরুক্তমিতি চেত্; নৈব, সম্প্রাপ্তিভেদভিন্নত্বাত্; বাতব্যাধৌ শব্দবহমিত্যনেন কর্ণশষ্কুল্যবচ্ছিন্ননভোদেশ উক্তঃ, শালাক্যে চ শব্দবহাঃ সিরা ইত্যুক্তম্| মাধবেন তু কর্ণরোগে শব্দাশ্রবণত্বাবিশেষাদেতদেব তত্র পঠিতমিত্যবিরোধঃ|৬৫|–

আতঙ্কদর্পণ ব্যাখ্যা (বাচস্পতি বৈদ্য কৃত)

সিরাশ্চেত্যাদিনা অববাহুকঃ| তত্রস্থোংঽসদেশস্থঃ, সিরাঃ আকুঞ্চ্যাববাহুকং জনযেত্| অযং চ কফবাতজঃ| অত্রাংসশোষমববাহুকমিতি রোগদ্বযমুক্তবান্, অন্যে তু মিলিত্বাঽববাহুকলক্ষণমাহুঃ, তন্ন যতঃ সুশ্রুতেন রোগদ্বযং পৃথক্ পঠিতম্– “অংসশোষাববাহুকযোর্বাহুমধ্যে সিরাব্যধঃ” ইতি|৬৫|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মূকাদীংস্ত্রীনাহ– আবৃত্যেত্যাদি| অক্রিযকান্ অবচনক্রিযকানিতি; নঞযমভাবে, ঈষদর্থে চ| আদ্যো মূকোঽবচনঃ, দ্বিতীযো মিন্মিনঃ সানুনাসিকসর্ববচনঃ, তৃতীযো গদ্গদো লুপ্তপদব্যঞ্জনাভিধাযী| এষাং চ সমানকারণাভিধানেঽপি দুষ্টেরুত্কর্ষাদিভিরদৃষ্টবশাদ্বা ভেদ ইত্যুন্নেযম্||৬৫||

আতঙ্কদর্পণ ব্যাখ্যা (বাচস্পতি বৈদ্য কৃত)

মূকাদীন্ জিহ্বাগতান্ বাতরোগাংস্ত্রীনাহ– আবৃত্যেত্যাদি| বাযুঃ সকফঃ কুপিতঃ সন্, শব্দবাহিনীর্ধমনীরাবৃত্যাবরুধ্য, নরান্ অক্রিযকান্ অবচনক্রিযকান্ করোতি| অত্র নঞ্ অভাবে ঈষদর্থে চ| মূকোঽবচনঃ, মিন্মিনঃ সানুনাসিকসর্ববচনঃ, গদ্গদো লুপ্তপদব্যঞ্জনাভিধাযী| এষাং তুল্যহেত্বভিধানেঽপি দুষ্টেরুত্কর্ষাদিভিরদৃষ্টবশাদ্বা ভেদ ইত্যুন্নেযম্||৬৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তূনীমাহ– অধ ইত্যাদি| অধ ইতি গুদোপস্থম্| বেদনা শূলম্| বর্চোমূত্রাশযোত্থিতা পক্বাশযমূত্রাশযোত্থিতা, পক্বাশযমূত্রপুটযোর্ব্যস্তসমস্তযোর্জাতা| উপস্থং স্ত্রীপুংসযোর্গুহ্যম্| নামতঃ প্রসিদ্ধিতঃ||৬৬||

আতঙ্কদর্পণ ব্যাখ্যা (বাচস্পতি বৈদ্য কৃত)

তূনীবাতমাহ– অধ ইত্যাদি| যা বেদনা শূলমধ ইতি গুদোপস্থং যাতি, নামতঃ প্রসিদ্ধিতঃ সা তূনী নাম, বর্চোমূত্রাশযোত্থিতা পক্বাশযমূত্রপুটযোর্ব্যস্তসমস্তযোর্জাতা, ভিন্দতীব গুদোপস্থমিতি ভেদং কুর্বতীব গুদোপস্থস্যেত্যর্থঃ| উপস্থং স্ত্রীপুংসযোর্গুহ্যম্||৬৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রতিতূনীমাহ– গুদেত্যাদি| প্রতিলোমমিত্যূর্ধ্বম্| বেগৈর্বাতকৃতোদ্গমৈঃ| সেত্যনেন ‘ভিন্দতীব’ ইত্যতিদিশ্যতে||৬৭||

আতঙ্কদর্পণ ব্যাখ্যা (বাচস্পতি বৈদ্য কৃত)

প্রতিতূনীমাহ– গুদেত্যাদি| গুদোপস্থোত্থিতা সৈব বেদনা প্রতিলোমিত্যূর্ধ্বং প্রধাবিতা সতী, বেগৈর্বাতকৃতোদ্গমৈর্মুহুর্মুহুঃ স্বভাবোপশমোপলক্ষিতৈঃ পক্বাশযং যাতি, সা প্রতিতূনীত্যুচ্যতে, সৈবেত্যনেন ভিন্দতীত্যতিদিশ্যতে||৬৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আধ্মানমাহ– সাটোপমিত্যাদি| সাটোপমিতি আটোপশ্চলচলনমিতি গযদাসঃ, গুডগুডাশব্দ ইতি কার্তিকঃ| আধ্মাতং বাতপূর্ণচর্মপুটকস্থানীযম্| উদরমিতি পক্বাশযঃ, প্রত্যাধ্মানস্য আমাশযসম্ভবত্বাত্| ঘোরমিতি কষ্টপ্রদম্| আমাশযসমুত্থত্বেন প্রত্যাসত্ত্যা পার্শ্বহৃদযযোরপি বেদানাশঙ্কানিরাসার্থমাহ– বিমুক্তেত্যাদি| তদেবেত্যনেন সাটোপাদিত্বমতিদিশতি| কফব্যাকুলিতানিলং কফাবৃতবাতম্||৬৮-৬৯||

আতঙ্কদর্পণ ব্যাখ্যা (বাচস্পতি বৈদ্য কৃত)

আধ্মানলক্ষণমাহ– সাটোপমিত্যাদি| সাটোপাদিলক্ষণযুক্তমুদরমাধ্মানং জানীযাত্; সাটোপমিতি আটোপশ্চলনং তেন সহ বর্তত ইতি সাটোপমিতি গযদাসঃ; গুডগুডাশব্দ ইতি কার্তিকঃ| আধ্মানমিতি আধ্মাতং বাতপূর্ণচর্মপুটকস্থানীযম্ উদরমিতি পক্বাশযঃ, প্রত্যাধ্মানস্যামাশযসম্ভবত্বাত্| ঘোরমিতি কষ্টপ্রদম্| প্রত্যাধ্মানমাহ– বিমুক্তেত্যাদি| বিমুক্তং পার্শ্বহৃদযং যেন তত্তথা| কফাকুলিতং বাতমিত্যর্থঃ||৬৮-৬৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অষ্ঠীলামাহ– নাভেরিত্যাদি| অষ্ঠীলা উত্তরাপথে বর্তুলঃ পাষাণবিশেষ ইতি জেজ্জটমতানুবাদী কার্তিকঃ, কর্মকারাণাং বর্তুলা দীর্ঘা লৌহভাণ্ডীতি গযদাসঃ| ঊর্ধ্বমাযত উপরিদীর্ঘঃ| উন্নতঃ তির্যগুন্নতঃ| বাতকৃতা অষ্ঠীলা বাতাষ্ঠীলেতি স্বরূপপরং, ব্যাবৃত্ত্যভাবাত্| বহির্মার্গাবরোধিনীং বাতমূত্রপুরীষাবরোধিনীম্| এতামিত্যাদি সৈব জঠরে তির্যগুত্থিতা তির্যগাযতা প্রত্যষ্ঠীলেতি ভেদঃ| বাতবিণ্মূত্ররোধিনীমিতি বিশেষপরম্||৭০-৭২||

আতঙ্কদর্পণ ব্যাখ্যা (বাচস্পতি বৈদ্য কৃত)

অষ্ঠীলামাহ– নাভেরিত্যাদি| অষ্ঠীলাবত্ অষ্ঠীলাসদৃশং গ্রন্থিং বাতাষ্ঠীলাং বিজানীযাত্| অষ্ঠীলা উত্তরাপথে বর্তুলঃ পাষাণবিশেষ ইতি জেজ্জটানুবাদী কার্তিকঃ, কর্মকারাণাং বর্তুলা দীর্ঘা লৌহভাণ্ডী ইতি গযদাসঃ| ঘনং সংহতাবযবম্| ঊর্ধ্বমাযতমুপরিদীর্ঘম্| উন্নতং তির্যগুন্নতম্| বাতকৃতা অষ্ঠীলা বাতাষ্ঠীলা ইতি স্বরূপপরং, ব্যাবৃত্ত্যভাবাত্| বহির্মার্গনিরোধিনী বাতমূত্রপুরীষরোধিনীম্| প্রত্যষ্ঠীলামাহ– এতামিত্যাদি| প্রত্যষ্ঠীলেতি ভেদঃ| বাতমূত্রপুরীষরোধিনীমিতি বিশেষপরম্||৭০-৭২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অষ্ঠীলাব্যতিরিক্তামপি বাতবিকৃতিং মূত্ররোধিনীমাহ– মারুত ইত্যাদি| অনুগুণেঽনুলোমে| প্রতিলোমে প্রতিলোমগে মারুত ইতি সম্বন্ধঃ| বিকারা অশ্মরীমূত্রকৃচ্ছ্রাদযঃ||৭৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অষ্ঠীলাব্যতিরিক্তামপি মূত্ররোধিনীং বাতবিকৃতিমাহ– মারুত ইত্যাদি| অবিগুণেঽনুলোমে মারুত ইত্যর্থঃ| বিকারাঃ অশ্মরীমূত্রকৃচ্ছ্রবাতকৃতাষ্ঠীলাকৃচ্ছ্রাদযঃ||৭৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বেপথুবাতবিকারমাহ– সর্বেত্যাদি| শিরসঃ কম্প ইতি সম্বন্ধঃ; শির ইত্যবযবোপলক্ষণং, তেন হস্তাদেরপি কম্পো বেপথুরিত্যর্থঃ|৭৪|–

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বাঙ্গকম্পবাতমাহ– সর্বাঙ্গেত্যাদি| সর্বাঙ্গস্য শিরসশ্চ কম্প ইতি সম্বন্ধঃ| শিরস ইত্যবযবোপলক্ষণং, তেন হস্তোদেরপি কম্পো বেপথুরিতি|৭৪|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

খল্লীত্যাদি| খল্লী ‘সিরাবমোটন’ ইতি লোকে||৭৪||

আতঙ্কদর্পণ ব্যাখ্যা (বাচস্পতি বৈদ্য কৃত)

খল্লীমাহ– খল্লীত্যাদি| মোটিনীতি পরিবর্তনশীলা||৭৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অধঃ প্রতিহতো বাযুঃ শ্লেষ্মণা মারুতেন চ| করোত্যুদ্গারবাহুল্যমূর্ধ্ববাতং প্রচক্ষতে||৭৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ঊর্ধ্ববাতমাহ– অধ ইতি||৭৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অনুক্তবাতরোগসঙ্গ্রহণার্থমাহ– স্থানেত্যাদি| স্থানানুরূপৈর্লিঙ্গৈর্যথা– কুক্ষিশূলং, পৃষ্ঠশূলং, নখভেদ ইত্যাদি| নামানুরূপৈর্লিঙ্গৈর্যথা– শূলমিত্যুক্তে কীলনিখাতবদ্বেদনাবিশেষ এব উচ্যতে, তথা ভেদতোদাদিভিরপি পীডাবিশেষ এব গম্যতে| বাতা ইতি বাতবিকারাঃ, কার্যকারণযোরভেদোপচারাত্| বাতাদিতি পাঠে তু বাতাদ্যে পক্ষবধাদয ইতি যোজ্যম্||৭৬-৭৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অনুক্তবাতরোগসঙ্গ্রহার্থমাহ– স্থানেত্যাদি| স্থানানুরূপৈর্লিঙ্গৈর্যথা– কুক্ষিশূলং, পৃষ্ঠশূলং, নখভেদঃ| নামানুরূপৈর্যথা– কুক্ষিশূলমিত্যুক্তে কীলনিখাতবদ্বেদনাবিষে এবোচ্যতে, তথা তোদভেদ ইত্যাদি পীডাবিশেষ এব গম্যতে| পিত্তাদ্যৈরিতি পিত্তশ্লেষ্মরুধিরৈঃ, সংসর্গং দ্বিদোষজং চ লক্ষযেত্| উক্তরোগাণাং কৃচ্ছ্রসাধ্যত্বমাহ– হন্বিত্যাদি| এতেষ্বেকঃ কশ্চিন্মুচ্যতে ইত্যর্থঃ| পরং কঃ সিদ্ধ্যতি, য তরুণো ভবতি| তথা নিরুপদ্রবান্ উপদ্রবরহিতান্||৭৬-৭৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতোপদ্রবানাহ– বিসর্পেত্যাদি| বাতা ইতি বাতবিকারাঃ, কার্যকারণযোরভেদোপচারাত্| বাতাদিতি পাঠে তু বাতাত্ পক্ষবধাদয ইতি যোজ্যম্| শূনমিত্যাদি শূনং সশোথম্| সুপ্তত্বচং স্পর্শানভিজ্ঞত্বগিন্দ্রিযম্||৭৮-৭৯||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতোপদ্রবানাহ– বিসর্পেত্যাদি| বাতা ইতি বাতবিকারাঃ, কার্যকারণযোরভেদোপচারেণ| বাতাত্ ইতি পাঠে তু বাতাত্ পক্ষবধাদযঃ ইতি যোজ্যম্, সঙ্গো মূত্রপুরীষবাতাপ্রবৃত্তিঃ| ক্ষীণং মাংসবলং যস্য স তথা| অসাধ্যমাহ– শূনমিত্যাদি| শূনং শোথযুক্তম্| সুপ্তত্বচং স্পর্শানভিজ্ঞত্বগিন্দ্রিযম্| ভগ্নং ভগ্নাস্থি| রুজার্তিমন্তমতীব পীডযাঽঽর্তম্||৭৮-৭৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইদানীং পঞ্চবিধস্যাপি প্রকৃতিস্থস্য বাযোর্লিঙ্গং কার্যং চাহ– অব্যাহতেত্যাদি| যস্যেতি পুরুষস্য, অব্যাহতগতিঃ অনবরুদ্ধমার্গঃ, স্থানস্থঃ স্বাশ্রযব্যবস্থিতঃ, প্রকৃতিস্থিতোঽক্ষীণশ্চাপ্রবৃদ্ধঃ, এতদ্বিশেষণত্রযং হেতুহেতুমদ্ভাবেন যোজ্যম্| বীতরোগো নীরোগঃ, কফপিত্তদুষ্টেরপি প্রেরকবাতেনান্তরীযকত্বাত্| অধিকং সমাঃ শতমিতি পঞ্চ দিনাধিকং সবিংশং বর্ষশতম্| যদাহ বরাহঃ আযুর্নিরূপণে– ‘সমাঃ ষষ্টির্দ্বিঘ্না মনুজকরিণাং পঞ্চ চ নিশাঃ|’ ইত্যাদি||৮০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীং পঞ্চবিধস্যাপি প্রকৃতিস্থস্য বাযোঃ কার্যং লিঙ্গং চ প্রাহ– অব্যাহত ইত্যাদি| যস্য পুরুষস্য অব্যাহতগতিঃ অরুদ্ধমার্গঃ, স্থানস্থঃ স্বাশযব্যবস্থিতঃ, প্রকৃতৌ স্থিতঃ ন বৃদ্ধো ন চ ক্ষীণঃ, বাযোর্বিশেষণত্রযম্| বীতরোগো নীরোগঃ, কফপিত্তদুষ্টেরপি প্রেরকবাতেনান্তরীযকত্বাত্| অধিকং সমাঃ শতং পঞ্চদিনাধিকং বিংশতিবর্ষশতম্| যদাহ বরাহমিহিরে আযুর্নিরূপণাধ্যাযে– “সমাঃ ষষ্টির্দ্বিঘ্না মনুজকরিণাং পঞ্চ চ নিশাঃ” ইতি||৮০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং বাতব্যাধিনিদানং সমাপ্তম্||২২||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং বাতব্যাধিনিদানম্||২২||