২৩. বাতরক্তনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতব্যাধিবিশেষত্বাত্তদনন্তরং বাতরক্তমাহ| ননু, সুশ্রুতে বাতরোগাধ্যাযে এব বাতরক্তং পঠিতং, তত্ কুতোঽত্র সঙ্গ্রহে পৃথক্ পাঠঃ? উচ্যতে– সত্যপি বাতরোগত্বে নিদানবৈশিষ্ট্যাত্ বিশিষ্টদোষদূষ্যখ্যাপনার্থং হস্তাদিদেশ এব সম্প্রাপ্তিকথনার্থং ক্রিযাবিশেষখ্যাপনার্থং চ পৃথক্করণম্| অত এব চরকেঽপি বাতব্যাধ্যনন্তরং পৃথগ্বাতরক্তাধিকারঃ| ননু, ‘রুজস্তীব্রাঃ সসন্তাপা’ ইত্যাদিনা রক্তগতস্য বাতস্য লক্ষণং বাতব্যাধাবেবোক্তং, ততশ্চ বাতরক্তাভিধানং পুনরুক্তং স্যাত্; নৈবং, বাতরক্তং হি দুষ্টেন বাতেন দুষ্টেন রক্তেন চ বিশিষ্টসম্প্রাপ্তিকং বিকারান্তরমেব| উক্তং হি চরকে– “বাযুঃ প্রবৃদ্ধো বৃদ্ধেন রক্তেনাবারিতঃ পথি| ক্রুদ্ধঃ সন্দূষযেদ্রক্তং তজ্জ্ঞেযং বাতশোণিতম্||” (চ. চি. অ. ২৯) ইতি| রক্তগতবাতে তু বাত এব দুষ্টো রক্তমদুষ্টমেব গচ্ছতীতি ভেদঃ| লবণাম্লেত্যাদি, ক্লিন্নশুষ্কশব্দৌ মাংসেন সম্বধ্যেতে| পিণ্যাকস্তিলকল্কঃ| নিষ্পাবঃ শিম্বিঃ, পললং মাংসম্| প্রাযশ ইত্যাদি, সুকুমারা মৃদুদেহাবযবাঃ, “তেষামল্পচেষ্টত্বাল্লবণাদিভিঃ রক্তং কটুতিক্তপ্রজাগরাদিভিশ্চ বাতঃ কুপ্যতি|” ইতি ঈশানঃ||১-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতব্যাধিবিশেষত্বাত্তদনন্তরং বাতরক্তমাহ| ননু, সুশ্রুতে বাতরোগাধ্যাযে এব বাতরক্তং পঠিতং, তত্ কুতোঽত্র সঙ্গ্রহে পৃথক্ পঠিতম্? উচ্যতে– সত্যপি বাতরোগত্বে নিদানবৈশিষ্ট্যাদ্বিশিষ্টসম্প্রাপ্তিকথনার্থং ক্রিযাবিশেষজ্ঞাপনার্থং চ পৃথক্করণম্| অত এব চরকেঽপি বাতব্যাধ্যনন্তরং পৃথগ্বাতরক্তাধ্যায উক্তঃ| তস্য নিদানমাহ– লবণেত্যাদি| লবণাদিভির্ভোজনৈঃ, তথা ক্লিন্নশুষ্কাম্বুজাদিভিঃ, তথা কুলত্থাদিভিঃ, তথা দধ্যাদিভিঃ, তথা বিরুদ্ধাদিভিঃ, তথা প্রাযশঃ সুকুমারাণাং পুংসাং, তথা মিথ্যাহারবিহারিণাং স্থূলানাং চ সুখিনাং চ বাতরক্তং প্রকুপ্যতি| ক্লিন্নশুষ্কশব্দৌ মাংসেন সম্বধ্যেতে| পিণ্যাকঃ তিলকল্কঃ, নিষ্পাবঃ শিম্বিঃ, পললং মাংসং, ক্লিন্নং শটিতম্, অম্বুজা মত্স্যাদযঃ, আরনালাদযঃ কাঞ্জিকভেদাঃ, সুরা পিষ্টকৃতা, আসবো মদ্যং, বিরুদ্ধং ক্ষীরমত্স্যাদি, অধ্যশনং ভুক্তোপরিভোজনং, সুকুমারা মৃদুদেহাবযবাঃ, স্থূলা মেদস্বিনঃ, সুখিনশ্চ সম্যক্প্রবৃত্ত্যাদিবর্জিতাঃ; তেষামল্পচেষ্টত্বাত্ লবণাদিভিঃ রক্তং, তিক্তকটুকষাযাদিভির্বাতশ্চ কুপ্যতীতি ঈশানঃ||১-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্প্রাপ্তিমাহ– হস্ত্যশ্বেত্যাদি| হস্ত্যাদিগমনং বাতবৃদ্ধৌ বিশেষেণ রক্তস্য দ্রবস্যাধোগমনেঽপি হেতুঃ, বিদাহ্যন্নং চ শোণিতবৃদ্ধৌ| হস্ত্যাদিগমনং বিশেষেণ, পাদেনাপি গমনং হেতুরেব| তত্ রক্তম্| সম্পৃক্তং বাযুনা দূষিতেন স্বহেতুবৃদ্ধেন| তত্প্রাবল্যাদিতি দ্বযোর্দুষ্টত্বেঽপিবাতস্য প্রাবল্যাত্ দোষত্বেন প্রাধান্যাদ্বাতরক্তব্যপদেশঃ, নতু রক্তবাত ইতি||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য সম্প্রাপ্তিমাহ– হস্তীত্যাদি| বিদাহি বিরূঢকাদিকম্| অশ্নতঃ ভুক্তবতঃ, বিদাহাত্ কৃষ্ণশরীরগতরক্তমাশু বিদহতি, বিদাহ্যন্নং শোণিতবৃদ্ধৌ হস্ত্যাদিগমনং চ বিষমপাদেনাপি গমনং হেতুঃ| তত্সম্পৃক্তমিতি তদ্রক্তপিত্তং সংসৃষ্টং বাযুনা দূষিতেন স্বহেতুবৃদ্ধেন সহ, তত্প্রাবল্যাদ্বাতরক্তমুচ্যতে– তত্প্রাবল্যাদিতি দ্বযোর্দুষ্টত্বেঽপি বাতস্য প্রাবল্যাদ্দোষত্বেন প্রাধান্যাদ্বাতরক্তব্যপদেশঃ, নতু রক্তবাত ইতি| তদ্বত্পিত্তমিতি দুষ্টং পিত্তমিত্যর্থঃ| দূষিতেনাসৃজাক্তমিতি দূষিতেন রক্তেন মিশ্রং তথা দুষ্টঃ শ্লেষ্মা দূষিতেন রক্তেনাক্তো মিশ্রঃ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– স্বেদেত্যাদি| স্বেদোঽত্যর্থং ন বেতি ঘর্মাগমনমত্যর্থং ভবতি সর্বথা বা ন ভবতি, এতচ্চ ব্যাধিমহিম্না কুষ্ঠবত্| ক্ষতেঽতিরুগিতি যদি কারণান্তরাত্ ক্ষতং স্যাত্তদাঽতিশযং রুজা স্যাত্, তদ্দেশস্য দুষ্টত্বাত্||৫-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য পূর্বরূপমাহ– স্বেদ ইত্যাদি| ঘর্মাগমনমত্যর্থং ভবতি সর্বথা বা ন ভবতি, এতচ্চ ব্যাধিমহিম্না কুষ্ঠবত্ বোদ্ধব্যম্| কার্ষ্ণ্যমঙ্গানাম্| ক্ষতেঽতিরুগিতি যদি কারণান্তরাত্ ক্ষতং ভেদঃ স্যাত্, তদা হ্যতিশযেন রুজা ভবতি, তদ্দেশস্য দুষ্টত্বাত্| সদনমঙ্গানাম্| পিডিকাপ্রাদুর্ভাবো জান্বাদিষু, নিস্তোদঃ পীডাবিশেষঃ, সুপ্তিস্ত্বচঃ, বৈবর্ণ্যং বিচ্ছাযতা, এতত্পূর্বরূপং বাতরক্তস্য||৫-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতরক্তস্য দোষান্তরসংসর্গেণ লক্ষণান্যাহ– বাতেঽধিক ইত্যাদি| বৃদ্ধিহানয ইতি বাতরক্তলক্ষণানাম্| রক্ত ইত্যাদি| রক্ত ইত্যত্র ‘অধিক’ ইত্যনুবর্তনীযম্, এবং বক্ষ্যমাণপিত্তাদিষু| এতচ্চারম্ভকরক্তাদন্যদ্রক্তান্তরং বোধ্যং, রক্তমপি রক্তান্তরদূষকং ভবতি| যদুক্তং দুষ্টরক্তলক্ষণে– “ পিত্তবদ্রক্তেনাতিকৃষ্ণং চ|” (সু. সূ. অ. ১৪) ইতি| শমং নৈতি শান্তিং ন যাতি| কফ ইত্যাদি| দ্বন্দ্বসর্বলিঙ্গং চ সঙ্করাদিতি সঙ্করাত্ দ্বিদোষত্রিদোষমেলকাত্ দ্বন্দ্বলিঙ্গং সর্বলিঙ্গং চ ক্রমাদ্বাতরক্তং ভবতি||৮-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

দোষান্তরসংসর্গে লক্ষণমাহ– বাতেঽধিক ইত্যাদি| তত্র জানুজঙ্ঘাদিস্থানেষু শূলাদিকং জ্ঞেযং, তথা শোথস্য রৌক্ষ্যাদিকং বৃদ্ধিহানযশ্চ বিজ্ঞেযাঃ, ধমন্যাদীনাং সঙ্কোচঃ| অঙ্গগ্রহঃ শীতদ্বেষঃ, অনুপশযঃ অসাত্ম্যম্; শীতেন রোগবৃদ্ধিঃ| রক্তাধিকলক্ষণমাহ– রক্ত ইতি| রক্ত ইত্যত্রাধিক ইত্যনুবর্তনীযম্, এবং বক্ষ্যমাণপিত্তাদিষু| কণ্ডূক্লেদৌ শমং ন যাতঃ, ক্লেদো দ্রবত্বম্| এতচ্চারম্ভকরক্তাদ্রক্তান্তরং বোদ্ধব্যম্| রক্তমপি রক্তান্তরদূষকং ভবতি, যদুক্তং দুষ্টরক্তলক্ষণে– “পিত্তবত্ রক্তেনাতিকৃষ্ণং চ” ইতি| পিত্তাধিকমাহ– পিত্ত ইতি| ভৃশোষ্মতা সন্তাপাধিক্যম্| কফাধিকমাহ– কফ ইতি| কফাধিকে স্তৈমিত্যমার্দ্রতা, মন্দা অদারুণা, রুক্ পীডা| দ্বন্দ্বজসান্নিপাতিকাবাহ– দ্বন্দ্বমিত্যাদি| সঙ্করাত্ দ্বিদোষমেলকাত্ ত্রিদোষমেলকাচ্চ দ্বন্দ্বলিঙ্গং সর্বলিঙ্গং চ ভবেত্||৮-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পাদযোর্জাতমপ্রতিক্রিযমাণং দেশান্তরং ব্যাপ্নোতি, পাদবদ্ধস্তযোরপি ভবতীতি দর্শযন্নাহ– পাদযোরিত্যাদি| আখোর্বিষমিত্যনেন মন্দবিসর্পণতাং দর্শিতবান্; এতদ্বাতরক্তং চরকেণ দ্বিবিধমুক্তম্| যদাহ– “উত্তানমথ গম্ভীরং দ্বিবিধং বাতশোণিতম্| ত্বঙ্মাংসাশ্রযমুত্তানং গম্ভীরং ত্বন্তরাশ্রযম্||” (চ. চি. অ. ২৯) ইতি| সুশ্রুতেন তু কুষ্ঠবদুত্পত্তৌ উত্তানস্যোত্তরকালং গম্ভীরত্বমুক্তমিতি মতভেদ এব||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পাদযোর্জাতমপ্রতিক্রিযমাণং প্রদেশান্তরং প্রাপ্নোতি; পাদবদ্ধস্তযোরপি ভবতীতি দর্শযন্নাহ– পাদযোরিত্যাদি| কদাচিদিতি অপ্রতিক্রিযমাণম্| হস্তযোরপীতি মূলমাস্থায| আখোর্বিষমিবেত্যনেন মন্দবিসর্পিতাং দর্শিতবান্| এতচ্চ বাতরক্তং চরকেণ দ্বিবিধমুক্তং তদ্যথা– “উত্তানমথ গম্ভীরং দ্বিবিধং বাতশোণিতম্| ত্বঙ্মাংসাশ্রযমুত্তানং গম্ভীরং ত্বন্তরাশ্রযম্||” ইতি||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যত্বাদিকমাহ– আজান্বিত্যাদি| আজানু জানুপর্যন্তং গতমসাধ্যম্| তথা স্ফুটিতাদিকং স্ফুটিতং দলিতত্বক্, প্রভিন্নং বিদীর্ণত্বক্| উপদ্রবৈরিত্যাদৌ আদিশব্দেন বক্ষ্যমাণানামস্বপ্নাদীনাং গ্রহণম্| যাপ্যং সংবত্সরোত্থিতমিত্যনেন সংবত্সরাদর্বাক্ সাধ্যং, যদি স্ফুটিতত্বগাদযো ন ভবেযুরিত্যাহুঃ| অস্বপ্নেত্যাদি| পাঙ্গুল্যং পঙ্গুতা| মোহেনৈকেনেতি বচনাত্ পূর্বোক্তৈঃ সমস্তৈর্দ্বিত্র্যাদিভিশ্চেতি জ্ঞাপযতীতি||১৪-১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

এতস্যৈবাসাধ্যযাপ্যত্বে আহ– আজান্বিত্যাদি| আজানু জানুপর্যন্তং গতমসাধ্যম্| স্ফুটিতং দলিতত্বক্| প্রভিন্নং বিদীর্ণম্| প্রস্রুতং স্রাবযুক্তম্| উপদ্রবৈরিতি প্রাণমাংসক্ষযাদিভিঃ, আদিগ্রহণেন চ বক্ষ্যমাণানামস্বপ্নাদীনাং গ্রহণম্| যাপ্যং সংবত্সরোত্থিতমিত্যনেন সংবত্সরাদর্বাক্ সাধ্যং, যদি স্ফুটিতত্বাদযো ন ভবেযুঃ| উপদ্রবানাহ– অস্বপ্নেত্যাদি| মাংসকোথো মাংসগলনম্| মূর্ছাযো মূর্ছা| অমন্দরুক্ পীডাবাহুল্যম্| মোহ ইন্দ্রিযার্থানাম্| পাঙ্গুল্যং পঙ্গুতা| মোহেনৈকেনেতি বচনাত্ পূর্বোক্তৈঃ সমস্তৈশ্চেতি জ্ঞাপযতি| পুনশ্চ সাধ্যাসাধ্যত্বমাহ– অকৃত্স্নেত্যাদি| যস্য চ সর্বে উপদ্রবা ভবেযুঃ সোঽপ্যসাধ্যঃ| ‘অকৃত্স্নোপদ্রবম্’ ইত্যাদিকং মাধবেন ন গৃহীতং, পুস্তকান্তরেষু দৃষ্টত্বাল্লিখিতমিতি||১৪-১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং বাতরক্তনিদানং সমাপ্তম্||২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং বাতরক্তনিদানম্||২৩||