১৬. তৃষ্ণানিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ছর্দেস্তৃষ্ণোপদ্রবত্বাচ্ছর্দ্যনন্তরং তৃষ্ণানিদানম্| তস্যাঃ সম্প্রাপ্তিমাহ– ভযেত্যাদি| পিত্তবিবর্ধনৈরিতি কট্বম্লোষ্ণাদিভিঃ ক্রোধোপবাসাদিভিশ্চ স্বস্থান এব সঞ্চিতং কুপিতং চ পিত্তং, বাতশ্চ ভযশ্রমবলক্ষযৈঃ কুপিতঃ, ঊর্ধ্বং প্রসরত্ পিপাসাং জনযতি| তাল্বিত্যুপলক্ষণং; তেন ক্লোমাদ্যপি বোধ্যং, তস্য পিপাসাস্থানত্বেনোক্তত্বাত্| চরকেঽপ্যুক্তম্– “রসবাহিনীশ্চ ধমনীর্জিহ্বামূলগলতালুকক্লোম্নঃ| সংশোষ্য নৄণাং দেহে কুরুতস্তৃষামতিবলৌ তৌ তু||” (চ. চি. অ. ২২) ইতি| অন্নকফামজানাং সম্প্রাপ্তিমাহ– স্রোতঃস্বিত্যাদি| ননু, অপাংবাহিষ্বিতি বহুবচনং বিরুদ্ধং, ‘দ্বে উদকবহে’ (সু. শা. অ. ৯) ইতি সুশ্রুতেনোক্তত্বাত্| নৈবং, তযোরেবানেকপ্রতানযোগাদিতি| দোষৈরিতি অন্নকফামৈঃ, দুষ্টিকর্তৃত্বাদ্দুষ্টদোষসম্বন্ধাদ্বাঽন্নামযোরপি দোষত্বমিতি গদাধরঃ | তিস্র ইতি বাতাদিভিঃ প্রত্যেকম্| ক্ষতজেতি ক্ষতনিমিত্তা ব্রণিনাং যা ভবতি| চতুর্থীত্যনেনোক্তানাং চতসৃণাং সুখসাধ্যত্বং বোধযতি, অন্যাসাং তু কষ্টসাধ্যত্বম্||১-২||

আতঙ্কদর্পণ ব্যাখ্যা (বাচস্পতি বৈদ্য কৃত)

ছর্দেস্তৃষ্ণোপদ্রবত্বাচ্ছর্দ্যনন্তরং তৃষ্ণানিদানং, তস্যাঃ সম্প্রাপ্তিমাহ– ভযশ্রমাভ্যামিত্যাদি| পিত্তবিবর্ধনৈঃ কট্বম্লোষ্ণাদিভিঃ ক্রোধোপবাসাদিভিশ্চ স্বস্থানে হৃদি সঞ্চিতং পিত্তং, বাতশ্চ ভযশ্রমবলক্ষযৈঃ কুপিতঃ, ঊর্ধ্বং প্রসরন্ পিপাসাং জনযেত্| তালুপ্রপন্নমিতি সবাতং পিত্তং তালুগতমিত্যর্থঃ| তাল্বিত্যুপলক্ষণম্; তেন ক্লোমগতমপি বোদ্ধব্যং, তস্য পিপাসাস্থানত্বাত্| উক্তং চ চরকে– “রসবাহিনীশ্চ ধমনীর্জিহ্বামূলগলতালুকক্লোম্নঃ| সংশোষ্য নৃণাং দেহে কুরুতস্তৃষামতিবলৌ তৌ তু” ইতি| অন্নকফজামজানাং সম্প্রাপ্তিমাহ– স্রোতঃস্বিত্যাদি| ননু স্রোতঃস্বিতি বহুবচনং বিরুদ্ধং যদুক্তং সুশ্রুতে– “দ্বে উদকবহে” ইতি| মৈবং, তযোরেবানেকপ্রতানযোগাদিতি| অন্নকফামৈঃ, দুষ্টিকর্তৃত্বাদ্দুষ্টদোষসম্বন্ধাদন্নামযোরপি দোষত্বমিতি গযদাসঃ| তিস্র ইতি বাতাদিভিঃ প্রত্যেকং, ক্ষতজেতি ক্ষতনিমিত্তা ব্রণিনাং যা ভবতি, চতুর্থীত্যনেন চোক্তানাং তিসৃণাং সাধ্যত্বং বোধযতি, অন্যাসাং তু কষ্টসাধ্যত্বমিতি| ক্ষযাদন্যা পঞ্চমী, আমসমুদ্ভবা ষষ্ঠী, ভক্তোদ্ভবা সপ্তমিকেতি, ক্রমেণ তাসাং লক্ষণানি জানীহি||১-২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজামাহ– ক্ষামাস্যতেত্যাদি| ক্ষামাস্যতা শুষ্কদীনমুখত্বম্| স্রোতোনিরোধো রসাম্বুবাহিধমনীনিরোধঃ| শীতাভিরদ্ভিরিত্যনেন বাযোঃ শীতস্য শীতাম্বুনা বৃদ্ধিরিত্যনুপশযনিদর্শনম্| চকারাচ্চরকোক্তনিদ্রানাশস্য গ্রহণম্| যদাহ চরকঃ– “নিদ্রানাশঃ শিরসো ভ্রমস্তথা শুষ্কগলতালুঃ|” (চ. চি. অ. ২২) ইতি||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতজাং তৃষ্ণামাহ– ক্ষামেত্যাদি| ক্ষামাস্যতা শুষ্কদীনমুখত্বং, বক্তুং চর্বিতুং বাঽসামর্থ্যমিত্যেকে| শঙ্খশিরঃস্বিতি শঙ্খযোঃ শিরসি বা, তোদো ব্যথাবিশেষঃ; শঙ্খযোর্দ্বিত্বেন বহুবচনত্বম্| স্রোতোনিরোধঃ রসাম্বুবাহিধমনীনিরোধঃ; অন্যে শব্দাশ্রবণমিতি| শীতাভিরদ্ভিরিত্যনেন বাযোঃ শীতঃ স্পর্শঃ, তেন বৃদ্ধিরিত্যনুপশযস্য নিদর্শনং; চকারাচ্চরকোক্তনিদ্রানাশস্য গ্রহণম্||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তজামাহ– মূর্ছেত্যাদিনা| বিলাপোঽত্র প্রলাপঃ| প্রততশ্চ শোষঃ অতীব মহতী তৃষ্ণা| শীতাভিনন্দা শীতেচ্ছা, ‘গুরোশ্চ হলঃ’ ইত্যকারপ্রত্যযঃ| পরিদূযনমুপতাপঃ, ‘পরিধূমনম্’ ইতি পাঠেঽন্তঃক্ষোভণং, ধূমনির্গম ইব বা| চকারাত্ পীতবিণ্মূত্রনেত্রত্বাদযো গ্রাহ্যাঃ||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

পিত্তজামাহ– মূর্ছেত্যাদি| বিলাপো বিবিধপ্রকারেণ ভাষণং, রক্তেক্ষণত্বং রক্তনেত্রত্বং, প্রততশ্চ শোষ ইতি অতিমহতী তৃষ্ণা, শীতাভিনন্দা শীতেচ্ছা, পরিদূযনমুপতাপঃ, ‘পরিধূপনম্’ ইতি পাঠান্তরং, তত্রান্তঃক্ষোভণং ধূমস্যোদ্গিরণমিব ,চকারাত্পীতবিণ্মূত্রনেত্রাদযো গ্রাহ্যাঃ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লেষ্মজামাহ– বাষ্পেত্যাদি| স্বকারণকুপিতেন কফেনোপরিষ্টাদাচ্ছাদিতেঽন্তরগ্নৌ কফাবরুদ্ধবাষ্পেণ পাবকোষ্মণাঽধোগতেনাম্বুবহস্রোতঃশোষণাত্ কফজা তৃষ্ণা ভবতি| ননু, কফজা তৃষ্ণাঽনুপপন্না? কফস্য বৃদ্ধস্য কেবলদ্রবস্য পিপাসাকর্তৃত্বাযোগাত্, বাতপিত্তযোরেব তৃষ্ণাকর্তৃত্বেনোক্তত্বাত্| যদুক্তম্– “পিত্তং সবাতং কুপিতং নরাণাং” ইত্যাদি| চরকেঽপ্যুক্তম্– “নাগ্নের্বিনা তর্ষঃ পবনাদ্বা, তৌ হি শোষণে হেতূ|” (চ. চি. অ. ২২) ইতি| সুশ্রুতেঽপ্যুক্তম্– “মদ্যস্যাগ্নেযবাযব্যগুণাবম্বুবহানি তু| স্রোতাংসি শোষযেযাতাং ততস্তৃষ্ণা প্রজাযতে||” (সু. উ. তং. অ. ৪৭) ইতি| অত আহ– তথেতি| উক্তপ্রকারেণ কফাদগ্নের্বাষ্পাবরোধাদিনা, নতু স্বগুণেন; অত এব চরকে কফজা তৃষ্ণা ন পঠিতৈব, সুশ্রুতেন তু চিকিত্সাভেদার্থং পঠিতা, হারীতেনাপি সপিত্তেনৈব শ্লেষ্মণা তৃষ্ণা পঠিতা ন তু কেবলেন| যদাহ– “স্বাদ্বম্ললবণাজীর্ণৈঃ ক্রুদ্ধঃ শ্লেষ্মা সহোষ্মণা| প্রপদ্যাম্বুবহং স্রোতস্তৃষ্ণাং সঞ্জনযেন্নৃণাম্|| শিরসো গৌরবং তন্দ্রা মাধুর্যং বদনস্য চ| ভক্তদ্বেষঃ প্রসেকশ্চ নিদ্রাধিক্যং তথৈব চ|| এতৈর্লিঙ্গৈর্বিজানীযাত্তৃষ্ণাং কফসমুদ্ভবাম্|” ইতি||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লেষ্মজামাহ– বাষ্পেত্যাদি| স্বকারণকুপিতেন কফেন সংবৃতে উপরিষ্টাদাচ্ছাদিতেঽন্তরগ্নৌ কফাবরুদ্ধবাষ্পেণ অধোগতানামম্বুবাহস্রোতসাং শোষণাত্ কফজা তৃষ্ণা ভবতি| ননু কফেন তৃষ্ণাঽনুপপন্না? কফস্য বৃদ্ধস্য কেবলদ্রবভূতস্য পিপাসাকর্তৃত্বাসম্ভবাত্, বাতপিত্তযোরেব তৃষ্ণাকর্তৃত্বেনোক্তত্বাত্; যদুক্তম্– “পিত্তং সবাতং কুপিতং নরাণাম্” ইত্যাদি| চরকেঽপ্যুক্তম্– “নাগ্নের্বিনা হি তর্ষঃ পবনাদ্বা তৌ হি শোষণে হেতূ” ইতি| সুশ্রুতেঽপ্যুক্তং “মদ্যস্যাগ্নেযবাযব্যৌ গুণাবম্বুবহানি চ| স্রোতাংসি শোষযেযাতাং ততস্তৃষ্ণা প্রবর্ততে” ইতি| অত এবাহ– তথেতি| উক্তপ্রকারেণ কফাদগ্নের্বাষ্পাবরোধাদিনা ন তু স্বগুণেন, অত এব চরকেণ কফজা তৃষ্ণা ন পঠিতৈব, সুশ্রুতে তু চিকিত্সাভেদার্থং পঠিতা, হারীতেনাপি সপিত্তেন শ্লেষ্মণৈব তৃষ্ণা পঠিতা ন তু কেবলা| “স্বাদ্বম্ললবণাজীর্ণৈঃ ক্রুদ্ধঃ শ্লেষ্মা সহোষ্মণা| প্রপদ্যাম্বুবহং স্রোতস্তৃষ্ণাং সঞ্জনযেন্নৃণাম্|| শিরসো গৌরবং তন্দ্রা মাধুর্যং বদনস্য চ| ভক্তদ্বেষঃ প্রসেকশ্চ নিদ্রাধিক্যং তথৈব চ|| লিঙ্গৈরেতৈর্বিজানীযাত্তৃষ্ণাং কফসমুদ্ভবাম্” | তযা তৃষ্ণযা পীডিতো মনুষ্যোঽতিতরাং কৃশো ভবতি, ধাতূনামনুপচযাত্||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষতজামাহ– ক্ষতস্যেত্যাদি| শস্ত্রাদিক্ষতযুক্তস্য|৬|–

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষতজামাহ– শস্ত্রাদিক্ষতযুক্তস্য নরস্য রুক্পীডনাচ্ছোণিতস্রাবাচ্চ তৃষ্ণা জাযতে| সা ক্ষতসম্ভবা চতুর্থী|৬|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষযশব্দস্যানেকবিষযত্বাত্ ক্ষযজাং বিশেষযন্নাহ– রসক্ষযাদিত্যাদি| পেপীযতে পুনঃ পুনঃ পিবতি; এতচ্চ বিশেষপরং, সর্বতৃষ্ণাসু তথাভূতত্বাত্| যদাহ সুশ্রুতঃ– “সততং যঃ পিবেদ্বারি ন তৃপ্তিমধিগচ্ছতি| পুনঃ কাঙ্ক্ষতি তোযং চ তং তৃষ্ণার্দিতমাদিশেত্||” (সু. উ. তং. অ. ৫৮) ইতি| রসক্ষযোক্তানি চ লক্ষণানি সুশ্রুতোক্তানি| তদ্যথা– “রসক্ষযে হৃত্পীডা কম্পঃ শোষঃ শূন্যতা তৃষ্ণা চ|” (সু. সূ. অ. ১৫) ইতি| তস্যাং ক্ষযজাযাম্| অশেষেণ কার্ত্স্ন্যেন||৬-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষযশব্দস্যানেকবিষযত্বাত্ ক্ষযজাং বিশেষযন্নাহ– রসক্ষযাদিত্যাদি| রসক্ষযোক্তানি চ লক্ষণানি তস্যামশেষেণ ভিষগ্ব্যবস্যেত্| রসক্ষযাত্তৃষ্ণা ভবতি, সা ক্ষযজা জ্ঞেযা| তযা ব্যাপ্তঃ পুমান্ জলং পেপীযতে পুনঃ পুনঃ পিবতি, পরং সুখং ন লভতে, জলেন তৃপ্তো ন ভবতীত্যর্থঃ| এতচ্চ বিশেষপরং, সর্বতৃষ্ণাসু তথাভূতত্বাত্| তাং কেচন সন্নিপাতাত্ কথযন্তি| যদুক্তং সুশ্রুতে– “সততং যঃ পিবেত্তোযং ন তৃপ্তিমধিগচ্ছতি| পুনঃ কাঙ্ক্ষতি তোযং চ তং তৃষ্ণার্দিতমাদিশেত্” ইতি| রসক্ষযোক্তানি তু লক্ষণানি সুশ্রুতোক্তানি– তথা চ “রসক্ষযে হৃত্পীডা কম্পঃ শোষঃ শুষ্কতা তৃষ্ণা চ” ইতি| এতানি সমস্তান্যপি ভবন্তি||৬-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আমজামাহ– ত্রিদোষেত্যাদি| ত্রিদোষলিঙ্গা ত্রিদোষলিঙ্গযুক্তা| আমাদজীর্ণাত্ত্রিদোষকোপঃ স্যাদিতি|৮|–

আতঙ্কদর্পণ ব্যাখ্যা (বাচস্পতি বৈদ্য কৃত)

আমজামাহ– ত্রিদোষেত্যাদি| ত্রিদোষলিঙ্গা ত্রিদোষলিঙ্গযুক্তা| সাদোঽঙ্গানাম্| এতানুপদ্রবান্ করোতি| আমে হি অজীর্ণাত্ত্রিদোষকোপঃ স্যাদিতি| উক্তং চ সুশ্রুতে– “অজীর্ণাত্পবনাদীনাং বিভ্রমো বলবান্ভবেত্” ইতি|৮|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ভুক্তোদ্ভবামাহ– স্নিগ্ধমিত্যাদি| চকারাত্ কটু চ, নতু তিক্তকষাযমধুরাণীত্যর্থঃ| গুরুশব্দেন মাত্রাগুরু দ্রব্যগুরু চ গৃহ্যতে| দৃঢবলেন তু পঞ্চ তৃষ্ণাঃ পঠিতাঃ, বাতপিত্তক্ষযামোপসর্গজাঃ (চ. চি. অ. ২২) ইতি; তত্র, কফজা আমজাযামেবাবরুদ্ধা; ক্ষতজা বাতজাযাং; ভক্তজা চ বাতজাযাং, ভক্তাবরণেন বাতপ্রকোপাত্; পিত্তজাযাং বা, বিদাহেন পিত্তপ্রকোপাত্| সুশ্রুতে চোপসর্গজা যথাস্বং দোষজাসু| ননু, মদ্যজাঽপি সুশ্রুতেন মদাত্যযে (সু. উ. তং. অ. ৪৭) পঠিতা, তত্ কথং সপ্তেত্যুচ্যতে? সত্যং, তস্যা বাতপিত্তজাযামবরোধঃ, এবং দৃঢবলমতেঽপি||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ভক্তোদ্ভবামাহ– স্নিগ্ধমিত্যাদি| চকারাত্ কটু চ, ন তু তিক্তকষাযমধুরাণীত্যর্থঃ| গুরুশব্দেন মাত্রাগুরু দ্রব্যগুরু চ গৃহ্যতে| দৃঢবলেন তু পঞ্চ তৃষ্ণা উক্তাঃ বাতপিত্তক্ষযামোপসর্গজনিতা ইতি| তত্র কফজাযামামজাঽন্তর্ভূতা, বাতাজাযাং ক্ষতজা; ভক্তজাঽপি বাতজাযাং, ভক্তাবরণেন বাতকোপাত্, পিত্তজাযাং বা বিদাহেন পিত্তকোপাত্| সুশ্রুতে চোপসর্গজা যথাস্বং দোষজাসু| ননু, মদ্যজাঽপি সুশ্রুতে মদাত্যযে পঠিতা, তত্ কথং সপ্তেত্যুচ্যতে? তস্যা বাতজাযামন্তর্ভাবাত্; এবং দৃঢবলমতেঽপি||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তত্রোপসর্গজামাহ– দীনেত্যাদি| দীনস্বরঃ ক্ষামবচনঃ, প্রতাম্যন্ মুহ্যন্, দীনঃ ক্লান্তঃ| উপসর্গাদিতি উপদ্রবাদ্রোগাত্; উপদ্রবশব্দশ্চ সামান্যেন রোগমাত্রেঽপি বর্ততে, যথা– “নিরূহোপদ্রবচিকিত্সিতং ব্যাখ্যাস্যামঃ|” (সু. চি. অ. ৩৮) ইত্যত্র| কষ্টা কষ্টসাধ্যা, ব্যাধিকর্ষিতদেহত্বাত্||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

তত্রোপসর্গজামাহ– দীনেত্যাদি| দীনস্বরঃ ক্ষামবচনঃ, প্রতাম্যন্ মুহ্যন্, দীনঃ ক্লান্তঃ, উপসর্গাদিতি উপদ্রবাত্ রোগাত্, উপদ্রবশব্দস্তু সামান্যেন রোগমাত্রেঽপি বর্ততে| যথা– “নিরূহোপদ্রবচিকিত্সিতং ব্যাখ্যাস্যামঃ” ইতি| শোষিণী ধাতুশোষণাত্মিকা| সা কষ্টা কষ্টসাধ্যা, ব্যাধিকর্ষিতদেহত্বাত্||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তানেবোপসর্গানাহ– জ্বরেত্যাদি| আদিশব্দেনাতীসারাদীনাং গ্রহণম্|১০|–

আতঙ্কদর্পণ ব্যাখ্যা (বাচস্পতি বৈদ্য কৃত)

তানেবোপসর্গানাহ– জ্বরেত্যাদি| আদিশব্দেনাতীসারাদীনাং গ্রহণম্| এতৈর্ব্যাধিভির্গৃহীতদেহানাং নৃণাম্; অত্র পূর্বলক্ষণানুরোধঃ|১০|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যানাং লক্ষণমাহ– সর্বাস্ত্বিত্যাদি| সর্বা বাতজাদযঃ, অতিপ্রসক্তা অতিপ্রবৃদ্ধাঃ| ঘোরোপদ্রবযুক্তা মুখশোষাদিভির্বলবদ্ভিরুপদ্রবৈঃ সমন্বিতা ইতি জেজ্জটঃ||১০||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যলক্ষণমাহ– সর্ব ইত্যাদি| অতিপ্রসক্তা অতিপ্রবৃদ্ধা, বমিপ্রসক্তানামিতি শরীরশ্লেষ্মশোধনায বমনশীলানাম্, ঘোরোপদ্রবযুক্তাঃ শ্বাসশোষাদিভির্বলবদ্ভিরুপদ্রবৈর্যুক্তা ইতি জেজ্জটঃ| তা মরণকারিকা ইত্যর্থঃ||১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং তৃষ্ণানিদানং সমাপ্তম্||১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানটীকাযামাতঙ্কদর্পণাখ্যাযাং তৃষ্ণানিদানম্||১৬||