৪৮. শূকদোষনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সমানস্থানত্বাচ্ছূকদোষনিদানমাহ– অক্রমাদিত্যাদি| শূকো জলশূকঃ, স তু বিষজন্তুর্জলমলোদ্ভবঃ সশূকঃ, তথা শূকপ্রধানো লিঙ্গবৃদ্ধিকরো বাত্স্যাযনাদ্যুক্তো যোগঃ শূক উচ্যতে; তস্য দোষো বৈকৃতমসম্যক্করণাত্, ততো বা দোষো বাতাদিঃ, তত্কৃতো বা বিকারঃ, “দোষা অপি ব্যাধ্যাখ্যাং লভন্তে” ইত্যাগমাত্; অত এব শূকদোষবিবরণে শূকদোষনিমিত্তা ব্যাধয এব বোদ্ধব্যাঃ| এবং চ যদত্র ‘কুম্ভিকা রক্তপিত্তোত্থা’ ইত্যাদিকারণান্তরোপবর্ণনং তত্ শূককৃতরক্তপিত্তাদিরূপং জ্ঞেযম্| অন্যে ত্বাদিশব্দলোপাত্ শূকাদিদোষনিদানমাহুঃ| আদিশব্দেন দুষ্টযোনিগূঢান্তর্লোমদুর্ভগাগমনাদি গৃহ্যতে; তন্ন মনোহরং, “বৃদ্ধিং যোঽভিবাঞ্ছতি” ইত্যনেন বিশেষণেন দুষ্টযোন্যাদেরযোগ্যস্য গ্রহীতুমনর্হত্বাত্| অন্যে তু দুষ্টযোন্যাদীন্যুপদংশহেতুত্বেনোক্তত্বাত্ নানুমন্যন্তে; তদনৈকান্তিকম্, একজাতীযহেতূনামনেকরোগকরণদর্শনাত্| অক্রমাদিত্যনুচিতবৃদ্ধিক্রমাত্; অনুচিতা চ বৃদ্ধির্ভূরিবিকারকরজলশূকযোগানামাচারণাত্, জলশূকযোগানাং বাত্স্যাযনাদৌ বিস্তরঃ| যথা– “ভল্লাতকাস্থিজলশূকমথাব্জপত্রমন্তর্বিদহ্য মতিমান্ সহ সৈন্ধবেন| এতদ্বিরূঢবৃহতীফলতোযপিষ্টমালেপনং মহিষবিড্বিমলীকৃতেঽঙ্গে|| স্থূলং মহত্তরতুরঙ্গমতুল্যমাশু শেফং করোত্যভিমতং ন হি সংশযোঽস্তি||” ইত্যাদি| যচ্চ জলশূকরহিতমশ্বগন্ধাদিতৈলং তদুচিতমেব লিঙ্গবর্ধনম্| যদুক্তম্– “অশ্বগন্ধাবরীকুষ্ঠমাংসীসিংহীফলান্বিতম্| চতুর্গুণেন দুগ্ধেন তিলতৈলং বিপাচযেত্|| স্তনলিঙ্গকর্ণপালিবর্ধনং ম্রক্ষণাদিদম্||” ইতি| গদাধরস্ত্বাহ– লিঙ্গবৃদ্ধিরেব কামপরাযণনিন্দিতপুরুষৈঃ ক্রিযমাণা অক্রমঃ| দশ চাষ্টৌ চেতি অষ্টাদশ; সঙ্খ্যেযনির্দেশাদেব লব্ধাযাং সঙ্খ্যাযাং পুনস্তদুক্তিঃ সম্মূঢপিডকাদৌ দ্বিত্বশঙ্কানিরাসার্থম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

সমানস্থানত্বাচ্ছূকদোষনিদানারম্ভঃ| তস্য সম্প্রাপ্তিমাহ– অক্রমাদিত্যাদি| শূকো জলশূকঃ, স তু বিষজন্তুর্জলমলোদ্ভবো জীববিশেষঃ সশূকঃ, তত্প্রধানো লিঙ্গবৃদ্ধৌ বাত্স্যাযনাদিশাস্ত্রোক্তো যোগঃ শূকদোষ উচ্যতে, তন্মুখ্যত্বাত্ লিঙ্গবৃদ্ধৌ অন্যেঽপি যোগাঃ শূকাঃ কথ্যন্তে, তস্য দোষো বিকারঃ, শূকস্য কারণত্বাত্ “ক্বচিদ্দোষা অপি ব্যাধ্যাখ্যাং লভন্তে” ইত্যাগমাত্, অত এব শূকদোষবিবরণে শূকদোষনিমিত্তত্বাত্ ব্যাধয এব বক্তব্যাঃ| অত্র শূকজা ইতি শূকদোষজা ব্যাধযঃ| অক্রমাদিতি অনুচিতবৃদ্ধিক্রমাত্, অনুচিতা বৃদ্ধিঃ ভূরিবিকারকরজলশূকযোগানামাচরণাত্, জলশূকযোগানাং বাত্স্যাযনাদৌ বিস্তরঃ| যথা– “ভল্লাতকাস্থিজলশূকমথাব্জপত্রমন্তর্বিদহ্য মতিমান্সহ সৈন্ধবেন| এতদ্বিরূঢবৃহতীফলজোপপিষ্টমালেপনং মহিষবিড্বিমলীকৃতেঽঙ্গে|| স্থূলং মহত্তরতুরঙ্গমতুল্যমাশু শেফং করোত্যভিমতং ন হি সংশযোঽস্তি|” ইত্যাদি| যচ্চ জলশূকরহিতমশ্বগন্ধাদিতৈলং, তদুচিতমেব লিঙ্গবর্ধনম্| যদুক্তম্– “ অশ্বগন্ধাবচাকুষ্ঠমাংসীসিংহীফলান্বিতম্| চতুর্গুণেন দুগ্ধেন তিলতৈলং বিপাচযেত্| স্তনলিঙ্গকর্ণপালিবর্ধনং ম্রক্ষণাদিদম্||” ইতি| শেফসো লিঙ্গস্য| গদাধরস্ত্বাহ– লিঙ্গবৃদ্ধিরেব কামপরাযণনিন্দিতপুরুষৈঃ ক্রিযমাণা অক্রমঃ| দশ চ অষ্টৌ চেতি অষ্টাদশ, সঙ্খ্যেযনির্দেশাদেব লব্ধাযাং সঙ্খ্যাযাং পুনস্তদুক্তিঃ সম্মূঢপিডকাদৌ দ্বিত্বসঙ্খ্যানিরাসার্থম্||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্ষপিকামাহ– গৌরেত্যাদি| শূকদুর্ভুগ্নহেতুকেতি দুর্ভুগ্নশূকহেতুকেত্যর্থঃ| পিডকাদিষু উভযবচনমিতি(?) পরনিপাতঃ দুর্ভুগ্নো দুরবচারিতঃ| ‘শূকদুর্ভগহেতুকা’ ইতি পাঠান্তরে শূকনিমিত্তা, দুষ্টযোনিনিমিত্তা চেত্যর্থঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতশ্লেষ্মজনিতাং সর্ষপিকামাহ– গৌরেত্যাদি| গৌরসর্ষপতুল্যা| শূকদুর্ভুগ্নহেতুকেতি দুর্ভুগ্নশূকহেতুকেত্যর্থঃ| ‘পিডকাদিষু উভযবচনম্’ ইতি পরনিপাতঃ| দুর্ভুগ্নো দুরবচারিতঃ| “শূকদুর্ভগহেতুকী” ইতি পাঠান্তরম্| তত্র শূকনিমিত্তা দুষ্টযোনিনিমিত্তা চেত্যর্থঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অষ্ঠীলিকামাহ– কঠিনেত্যাদি| বিষমৈর্ভুগ্নৈরিতি বক্ষ্যমাণশূকৈরিত্যনেন সম্বধ্যতে| বিষমৈরিতি অপ্রশস্তৈঃ| অষ্ঠীলিকা লৌহকারস্য ভাণ্ডীবিশেষ, তত্তুল্যত্বাদষ্ঠীলিকা|৩|–

আতঙ্কদর্পণ ব্যাখ্যা (বাচস্পতি বৈদ্য কৃত)

অষ্টীলিকামাহ– কঠিনেত্যাদি| বিষমৈর্ভুগ্নৈরিতি বক্ষ্যমাণশূকৈরিত্যনেন সম্বধ্যতে| বিষমৈঃ অপ্রশস্তৈঃ, ভুগ্নৈর্বক্রৈঃ| অষ্ঠীলিকা লোহকারভাণ্ডবিশেষঃ, তত্তুল্যত্বাদষ্ঠীলিকা; সা চ বাতেন|৩|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গ্রথিতমাহ– শূকৈরিত্যাদি| শূকৈর্যত্ পূরিতং শশ্বদ্গ্রথিতমিতি শূকৈঃ সর্বদা পূরিতং লিঙ্গং যত্ গ্রন্থিলং তত্ গ্রথিতমিত্যর্থঃ; গ্রন্থিতুল্যত্বাত্ গ্রথিতসঞ্জ্ঞা||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

কফাদ্গ্রথিতমাহ– শূকৈরিত্যাদি| শূকৈঃ সর্বদা পূরিতং লিঙ্গং যত্তদ্গ্রথিতমিত্যর্থঃ| গ্রথিতত্বাদ্ গ্রথিতসঞ্জ্ঞা| শশ্বদিতি অহরহঃ| শূকপূরণং শেফসি, এতেনৈকদিনান্তরপূরণং প্রশস্তমিচ্ছন্তি কামতন্ত্রাচার্যাঃ| নিত্যপূরণাদ্ গ্রথিতনাম্নো রোগস্যোত্পত্তিঃ||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কুম্ভিকামাহ– কুম্ভিকেত্যাদি| কুম্ভী কুম্ভীলতা, তস্যাঃ ফলং কুম্ভী; তদ্ধিতস্য লুক্; ‘ইবে প্রতিকৃতৌ’ ইতি কন্ কুম্ভীফলবত্ কুম্ভিকা| অশুভেতি শুভং শুক্লং তদ্বিরোধে নঞ্, কৃষ্ণেত্যর্থঃ| ‘আশুজা’ ইতি পাঠান্তরম্|৪|–

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তপিত্তাভ্যাং কুম্ভিকামাহ– কুম্ভিকেত্যাদি| কুম্ভিকা কুম্ভকারী, তস্যাঃ ফলং কুম্ভী, তদ্ধিতস্য লুক্ “ইবে প্রতিকৃতৌ” ইতি কন্, কুম্ভীফলবত্ কুম্ভিকা, তথা জাম্ববাস্থিরূপা জম্বূফলাস্থিসদৃশী, অশুভা শুভং শুক্লং ন শুভা অশুভা কৃষ্ণেত্যর্থঃ| সা চ রক্তপিত্তজনিতা| ‘আশুজা’ ইতি পাঠান্তরম্|৪|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অলজীমাহ– তুল্যজামিত্যাদি| তুল্যজামিতি প্রমেহপিডকা অলজী তত্তুল্যসম্ভবা, সা চ রক্তাঽসিতা স্ফোটচিতা| তুল্যত্বমেব বিবৃণোতি– যথাপ্রোক্তামিতি| অলজী যথাপ্রোক্তা যাদৃশলক্ষণা তথেযমপীত্যর্থঃ| এষা চ কারণচিকিত্সাভেদাত্ প্রমেহং বিনা লিঙ্গ এব সম্ভবাচ্চ ততঃ পৃথগ্ভূতা জ্ঞেযা||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

অলজীমাহ– তুল্যজামিত্যাদি| বিচক্ষণঃ অলজীপিডকাং বিদ্যাত্| কিম্ভূতাং? তুল্যজামিতি| প্রমেহপিডকা অলজী, তত্তুল্যসম্ভবা| সা চ রক্তাসিতস্ফোটচিতা| তুল্যত্বমেব বিবৃণোতি– যথাপ্রোক্তামিত্যাদি| সা অলজী যথাপ্রোক্তা যাদৃশলক্ষণা তথেযমপীত্যর্থঃ| এষা চ কারণচিকিত্সাভেদাত্ প্রমেহং বিনা লিঙ্গ এব সম্ভবাচ্চ ততঃ পৃথগ্ভূতা জ্ঞেযা| ইযমপি দুষ্টশূকাবচারণাজ্জ্ঞেযা||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মৃদিতমাহ– মৃদিতমিত্যাদি| পীডিতমিতি অধিকৃতত্বাত্ শূকপাতানন্তরং পীডিতমিতি জ্ঞেযং, পীডিতং ‘লিঙ্গম্’ ইতি শেষঃ| সংরব্ধং সশোথম্|৫|–

আতঙ্কদর্পণ ব্যাখ্যা (বাচস্পতি বৈদ্য কৃত)

মৃদিতমাহ– মৃদিতমিত্যাদি| সংরব্ধং সশোফং তন্মৃদিতং মৃদিতাখ্যং রোগাক্রান্তং জ্ঞেযং, পীডিতমিত্যধিকৃতত্বাত্ শূকপাতানন্তরং পীডিতমিতি জ্ঞেযম্|৫|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্মূঢপিডকামাহ– পাণিভ্যামিত্যাদি| পাণিভ্যাং ভৃশসম্মূঢে ইত্যধিকারাত্ পাতিতশূকে লিঙ্গে পাণিভ্যাং ভৃশসম্মূঢে পিচ্চিতাবনতে, অত্রাপি ‘বাতকোপাত্’ ইত্যনুবর্ততে||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সম্মূঢপিডকামাহ– পাণিভ্যামিত্যাদি| পাণিভ্যাং ভৃশসম্মূঢে ইত্যত্রাধিকারাত্ পাতিতশূকে লিঙ্গে পাণিভ্যাং ভৃশসম্মূঢে অত্যর্থং পিচ্চিতাবনতে সম্মূঢপিডকা স্যাত্, অত্রাপি বাতপ্রকোপ ইত্যনুবর্ততে||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অধিমন্থমাহ– দীর্ঘা ইত্যাদি| কফাসৃগ্ভ্যামিতি শূকপাতকৃতাভ্যাম্| এবমন্যত্রাপি সামান্যেন শূকদোষাভিহিতে শূকপাতোঽনুক্তোঽপি জ্ঞেযঃ| বেদনারোমহর্ষকৃদিতি বেদনযা রোমহর্ষং করোতি||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অবমন্থমাহ– দীর্ঘা ইত্যাদি| দীর্ঘা বিস্তীর্ণাঃ, বহ্ব্যঃ বহুলাঃ| কফাসৃগ্ভ্যামিতি শূকপাতকৃতাভ্যাম্| এবমন্যত্র সর্বেষ্বপি সামান্যেন শূকদোষেষু শূকপাতোঽনুক্তোঽপি জ্ঞেযঃ| বেদনযা রোমহর্ষং করোতি ইতি বেদনারোমহর্ষকৃত্| অধিমন্থ ইতি সঞ্জ্ঞা||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পুষ্করিকামাহ– পিডেকেত্যাদি||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

পুষ্করিকামাহ– পিডকাভিশ্চিতেত্যাদি| যা পিডকৈব পিডকাভিশ্চিতা ব্যাপ্তা| পদ্মকর্ণিকসংস্থানেতি কমলকোশতুল্যা, পুষ্করিকেতি সঞ্জ্ঞা পিত্তশোণিতাদ্বিজ্ঞেযা||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্পর্শহানিমাহ– স্পর্শহানিং ত্বিত্যাদি|৮|–

আতঙ্কদর্পণ ব্যাখ্যা (বাচস্পতি বৈদ্য কৃত)

স্পর্শহানিমাহ– স্পর্শহানিমিত্যাদি| স্পর্শহানিনামানং ব্যাধিবিশেষং, শূকদূষিতং শূকেন দুষ্টিং নীতং রক্তং জনযেত্|৮|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উত্তমামাহ– মুদ্গমাষেত্যাদিনা| এষোত্তমা ব্যাধিঃ শূকাজীর্ণনিমিত্তজা ভবতি, শূকাজীর্ণং পুনঃ পুনর্দুরবচারিতশূকবিকৃতিরূপমেব| “ব্যাধিরেষোত্তমো নাম” ইতি পাঠান্তরে এষোত্তম ইতি নির্দেশঃ পূর্বত্রাসিদ্ধবিধেরনিত্যত্বাত্ সাধুঃ||৮||–

আতঙ্কদর্পণ ব্যাখ্যা (বাচস্পতি বৈদ্য কৃত)

উত্তমমাহ– ব্যাধিরিত্যাদি| এষ উত্তমো নাম ব্যাধিঃ শূকাজীর্ণনিমিত্তজো ভবতি, শূকাজীর্ণং পুনঃ পুনর্দুরবচারিতশূকবিকৃতিরূপমেব, তদেব নিমিত্তং ততো জাযত ইতি| ‘ ব্যাধিরেষোত্তম’ ইতি নির্দেশঃ| পূর্বত্রাসিদ্ধবিধেরনিত্যত্বাত্সাধুঃ||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শতপোনকমাহ– ছিদ্রৈরণুমুখৈরিত্যাদিনা| ছিদ্রৈরিতি দুরবচারিতশূকদোষজনিতবাতশোণিতজৈঃ, চিতমুপচিতম্, অত এব চিকিত্সাযাং লেখনোপদেশঃ| শতপোনকশ্চালনিকা, তত্তুল্যত্বাত্ শতপোনকঃ||৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

শতপোনকমাহ– ছিদ্রৈরিত্যাদি| যস্য লিঙ্গং ছিদ্রৈঃ সূক্ষ্মমুখৈঃ সমন্ততঃ সর্বতশ্চিতং ব্যাপ্তং, স ব্যাধিঃ শতপোনকো জ্ঞেযঃ| ছিদ্রৈরিতি দুরবচারিতশূকজনিতবাতশোণিতজৈঃ| শতপোনকশ্চালনিকা, তত্তুল্যঃ শতপোনকঃ||৯||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্বক্পাকমাহ– বাতপিত্তকৃত ইত্যাদি| শূকদোষেষু ক্বচিত্ কস্যচিত্ দোষস্যাভিধানং শূকবিশেষাদাহারাচারভেদাচ্চ সমর্থনীযম্||১০||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্বক্পাকমাহ– বাতেত্যাদি| বাতপিত্তকৃতঃ ত্বক্পাকনামা ব্যাধির্জ্ঞেযঃ| স চ জ্বরদাহৌ করোতি| অযং চ দুরবচারিতশূকদূষিতবাতপিত্তজ ইত্যর্থঃ| শূকদোষেষু ক্বচিত্কস্যচিদ্দোষস্যাভিধানং শূকবিশেষাদাহারাদিভেদাচ্চ সমর্থনীযম্||১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শোণিতার্বুদমাহ– কৃষ্ণৈঃ স্ফোটৈরিত্যাদিনা| পিডকাভিরিতি স্বল্পাভির্নিপীডিতং লিঙ্গমিতি বোদ্ধব্যম্| যস্য বাস্তুরুজ ইতি বাস্তু ব্রণাধিষ্ঠানং, তত্র রুজঃ, অগাধোচ্ছ্রিতমাংসশোথত্বাত্| ‘বস্তিরুজশ্চোগ্রা’ ইতি পাঠান্তরম্| অর্বুদং দুরবচারিতশূকজশোণিতকৃতম্||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

শোণিতার্বুদমাহ– কৃষ্ণৈরিত্যাদি| পিডকাভিরিতি স্বল্পাভিঃ নিপীডিতং লিঙ্গমিতি বোদ্ধব্যম্| যস্য বাস্তুরুজ ইতি বাস্তু ব্রণাধিষ্ঠানম্| তত্র উগ্রা রুজঃ, অগাধোচ্ছ্রিতমাংসশোথত্বাত্| ‘বস্তিরুজশ্চোগ্রাঃ’ ইতি পাঠান্তরম্| সর্বদা দুরবচারিতশূকজশোণিতকৃতম্||১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মাংসার্বুদমাহ– মাংসদোষেণেত্যাদি| মাংসদোষেণেতি শূকপাতানন্তরং প্রহারাদিনা কৃতেন মাংসদোষেণ|১২|–

আতঙ্কদর্পণ ব্যাখ্যা (বাচস্পতি বৈদ্য কৃত)

মাংসার্বুদমাহ– মাংসদোষেণেত্যাদি| শূকপাতানন্তরং প্রহারাদিনা কৃতেন মাংসদোষেণ, অত্রাপি শোণিতং হেতুঃ, মাংসার্বুদসঞ্জ্ঞা|১২|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মাংসপাকমাহ– শীর্যন্তে যস্যেত্যাদি| শীর্যন্তে গলন্তি, সর্বাশ্চ বেদনা ইতি বাতপিত্তকফজাঃ||১২||–

আতঙ্কদর্পণ ব্যাখ্যা (বাচস্পতি বৈদ্য কৃত)

মাংসপাকমাহ– শীর্যন্ত ইত্যাদি| শীর্যন্তে গলন্তি| সর্বাশ্চ বেদনাঃ ইতি বাতপিত্তকফজাঃ, অযং ত্রিদোষজঃ||১২||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিদ্রধিমাহ– বিদ্রধিমিত্যাদি| সন্নিপাতেন যথোক্তমিতি ‘নানাবর্ণরুজাস্রাবঃ’ ইত্যাদিনা সন্নিপাতজবিদ্রধিলক্ষণং বিদ্রধিমিহ জানীযাদিত্যর্থঃ||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

বিদ্রধিমাহ– যথোক্তমিত্যাদি| সন্নিপাতবিদ্রধিলক্ষণেন জানীযাত্| বিদ্রধিনিদানোক্তং ‘নানাবর্ণরুজাস্রাবঃ’ ইত্যাদিনা||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তিলকালকমাহ– কৃষ্ণানীত্যাদি| চিত্রাণীতি নানাবর্ণানি| সবিষাণীতি শূকানাং সবিষত্বেঽপি বিশেষার্থমুক্তম্| কালানীতি কৃষ্ণানি, কৃষ্ণতিলতুল্যত্বাত্ তিলকালকসঞ্জ্ঞা| শীর্যন্তে গলন্তি||১৪-১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

তিলকালকমাহ– কৃষ্ণানীত্যাদি| যস্য পুংসঃ শূকানি কৃষ্ণানি, অথবা চিত্রাণি, অথবা সবিষাণি, তানি সংহত্যাশু শীঘ্রং নিরবশেষতঃ সমগ্রং মেঢ্রং পচন্তি, কৃষ্ণানি কৃষ্ণবর্ণানি, চিত্রাণীতি শুক্লপীতনীলাদিনানাবর্ণানি, সবিষাণীতি শূকানাং সবিষত্বেঽপি বিশেষার্থমুক্তং, তথা কালানীতি কৃষ্ণানি পরিণততিলফলবর্ণানি ভূত্বা শীর্যন্তি গলন্তি, তান্ সন্নিপাতজান্ তিলকালকান্ বিদ্যাত্, কৃষ্ণতিলতুল্যবর্ণত্বাত্তিলকালকসঞ্জ্ঞা||১৪-১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শূকদোষেষ্বসাধ্যানাহ– তত্র মাংসার্বুদমিত্যাদি| যচ্চেতি চকারোঽযং ভিন্নক্রমঃ, স চ ন সিদ্ধ্যতীত্যনন্তরং দ্রষ্টব্যঃ; তেন সাধ্যতাঽপ্যেষামচিরত্বাদিনা ভবতি, অত এব প্রত্যাখ্যায চিকিত্সাবিধানমুপপন্নমিতি গদাধরঃ| দুর্জ্ঞানাত্ সাধ্যে এব অসাধ্যতারোপাদসম্পূর্ণাবস্থাযামসাধ্যেঽপি ক্রিযাসিদ্ধেশ্চ মা নিবর্ততাং ভিষগিতি প্রত্যাখ্যায চিকিত্সাং কারুণিকতযা আচার্য উপদিশতীতি মন্তব্যম্||১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

শূকদোষেষ্বসাধ্যতামাহ– তত্রেত্যাদি| তত্র তেষু শূকদোষেষু মধ্যে যন্মাংসার্বুদং, তথা যো মাংসপাকঃ, তথা বিদ্রধিঃ, তথা যে চ তিলকালকাঃ স্যুঃ, এতে ন সিধ্যন্তি| যে চেতি চকারো ভিন্নক্রমঃ, স চ ন সিদ্ধ্যতীত্যনন্তরং দ্রষ্টব্যঃ| তেন সাধ্যতাঽপ্যেষামচিরত্বাদিনা ভবতি, অত এব প্রত্যাখ্যায চিকিত্সাবিধানমুপপন্নমিতি গদাধরঃ||১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং শূকদোষনিদানং সমাপ্তম্||৪৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যকৃতাযাং মাধবনিদানব্যাখ্যাযামাতঙ্কদর্পণাখ্যাযাং শূকদোষনিদানং সমাপ্তম্||৪৮||