৪৩. সদ্যোব্রণনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শারীরব্রণমভিধাযাগন্তুব্রণমাহ– নানাধারমুখৈরিত্যাদি| নানা ধারা মুখানি চ যেষাং তানি তথা| স্থানবিশেষোঽপি শস্ত্রনিপাততুল্যত্বেনাকৃতিবিশেষে হেতুরিত্যত উক্তং– নানাস্থাননিপাতিতৈরিতি||১-২||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ শারীরব্রণমভিধাযাগন্তুমাহ– নানেত্যাদি| নানাধারামুখৈঃ শস্ত্রৈঃ, নানাস্থাননিপাতিতৈঃ, এভির্নানাকৃতযো ব্রণা ভবন্তি, মে মত্সকাশাত্তান্ ব্রণান্ নিবোধ জানীহি| তত্ষাড্বিধ্যমাহ– ছিন্নমিত্যাদি| এবং ছিন্নাদিভেদেন আগন্তবঃ ষড্বিধা ভবন্তি||১-২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ছিন্নলক্ষণমাহ– তির্যগিত্যাদি| তির্যগিতি তির্যগ্ব্যবস্থিতঃ| ছিন্নঃ ছেদসম্পন্নঃ| ঋজুরবক্রঃ| গাত্রস্য পাতনমিতি গাত্রাবযবস্য তদেকদেশরূপস্য বা গাত্রস্য পাতনম্||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

তত্র ছিন্নলক্ষণমাহ– তির্যগিত্যাদি| যো ব্রণস্তির্যক্ ছিন্নোঽথবা ঋজুশ্ছিন্নঃ সন্নাযতো ভবেত্, তির্যগিতি তির্যগ্ব্যবস্থিতঃ, ছিন্নঃ ছেদসম্পন্নঃ| ‘তিরশ্চীনঃ’ ইতি পাঠান্তরে স এবার্থঃ, ঋজুরবক্রঃ, অনযোর্দ্বযোরপ্যাযত ইতি বিশেষণম্| অত্র পাতনং নির্দিশন্নাহ– গাত্রস্য পাতনমিতি গাত্রস্যাবযবস্য তদেকদেশরূপস্য বা গাত্রস্য পাতনম্| ডল্লনস্তু ব্যাচষ্টে– শস্ত্রাদিপ্রহারেণ গাত্রস্য হস্তাদেঃ পাতনং, চকারাদপাতনং চ||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ভিন্নলক্ষণমাহ– শক্তীত্যাদি| বিষাণং দন্তঃ শৃঙ্গং চ| এতদ্ভিন্নলক্ষণং পারিভাষিকং; তেন ব্যধ এবাশযদেশে ভেদ উচ্যতে, আশযদেশরহিতে তু ব্যধঃ| যত্কিঞ্চিদিত্যাদি| যস্য মূত্ররুধিরাদের্য আশযো ভিন্নঃ স তত্ প্রস্রবেত্; তেন বস্তির্ভিন্নো মূত্রং, রুধিরাশযো রুধিরমিত্যাদি||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ভিন্নলক্ষণমাহ– শক্তীত্যাদি| শক্ত্যাদিভিরাশযো হতঃ সন্ যত্কিঞ্চিত্ প্রস্রবেত্, তদ্ভিন্নলক্ষণমুচ্যতে| কুন্তো ভল্লঃ, বিষাণং দন্তঃ শৃঙ্গং চ, এতদ্ভিন্নলক্ষণং পারিভাষিকং, তেন ব্যধ এবাশযদেশে ভেদ উচ্যতে, আশযরহিতে তু দেশে ব্যধঃ| যত্কিঞ্চিত্ প্রস্রবেদিতি কিমপি নির্দেষ্টব্যমিত্যর্থঃ| যস্য মূত্ররুধিরাদের্যশ্চাশযো ভিন্নঃ স তত্ প্রস্রবেত্; তেন বস্তির্ভিন্নো মূত্রং, উদরং মেদঃ, পুরীষাশযঃ পুরীষং, রুধিরাশযো রুধিরমিতি||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

যত্র ভূযসাঽঽমাশযানাং স্থানে ভেদব্যপদেশস্তমাহ– স্থানানীত্যাদি| আমস্য স্থানমামাশযঃ অগ্নেঃ পচ্যমানাশযঃ, মলস্য পক্বাশযঃ, মূত্রস্য বস্তিঃ, রুধিরস্য যকৃত্প্লীহানৌ, হৃত্ হৃদযং, উণ্ডুক ইক্ষুরসপাকমলবদ্যঃ শোণিতমলস্তজ্জ উণ্ডুকঃ, স চান্ত্রদেশে ব্যবস্থিতঃ পুরীষাধানমিতি, ফুপ্ফুস ইতি হৃদযস্য বামপার্শ্বে রক্তাধারঃ ‘ফুপ্ফুস’ ইতি খ্যাতঃ| মূত্রমার্গগুদাস্যেভ্যো রক্তং ঘ্রাণাচ্চ গচ্ছতীতি বস্ত্যাদৌ ভিন্নে মেহনগুদাভ্যাং রক্তং নিঃসরতি, আমাশযাদিভেদে তু মুখঘ্রাণাভ্যাং রক্তনির্গমঃ| স্বেদাস্রাব ইতি স্বেদস্যাত্যন্তস্রুতিঃ| পার্শ্বযোশ্চাপীতি শূলমিতি সম্বন্ধঃ| মে ইত্যব্যযং মত্ত ইত্যর্থঃ| আমাশযস্থ ইত্যাদি আধ্মানং রক্তাবততত্বাদ্বাযোঃ| রুজা শূলম্| গৌরবং রক্তবহুত্বাত্| অধঃকাযে বিশেষেণ শীততেতি ব্যাধিপ্রভাবাত্||৫-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

যত্র ভূযসামাশযানাং স্থানে ভেদব্যপদেশস্তমাহ– স্থানানীত্যাদি| স্থানশব্দঃ আমাদিভিঃ প্রত্যেকং সম্বধ্যতে, আমস্য স্থানমামাশযঃ, অগ্নেঃ পচ্যমানাশযঃ, পক্বস্য পক্বাশযঃ, মূত্রস্য বস্তিঃ, রুধিরস্য যকৃত্প্লীহানৌ, হৃত্ হৃদযং, উণ্ডুক ইক্ষুরসপাকমলবচ্ছোণিতমলঃ, তজ্জ উণ্ডুকঃ, স চান্ত্রদেশে ব্যবস্থিতঃ পুরীষাধানং, ফুপ্ফুস ইতি হৃদযস্য বামপার্শ্বে ফুপ্ফুস ইতি খ্যাতঃ| আমাদীনাং স্থানানি কোষ্ঠ ইত্যভিধীযতে| ভিন্নকোষ্ঠস্য সামান্যলিঙ্গমাহ– তস্মিন্নিত্যাদি| তত্র বস্ত্যাদৌ ভিন্নে মেহনগুদাভ্যাং রক্তং নিঃসরতি, আমাশযাদিভেদে তু মুখঘ্রাণাভ্যাং রক্তনির্গমঃ, জ্বরমূর্ছাদয উপদ্রবা ভবন্তি, বিণ্মূত্রবাতানাং সঙ্গোঽপ্রবৃতিঃ, স্বেদাস্রাবঃ স্বেদস্যাস্রুতিঃ| মুখস্য লোহগন্ধতা, হৃত্পার্শ্বযোঃ শূলমিতি সম্বন্ধঃ| অত্রাপি মে মত্তো বিশেষং শৃণু| রক্তপূর্ণভেদলক্ষণমাহ– আমাশযস্থ ইত্যাদি| অতিমাত্রমাধ্মানং আধ্মাতবস্তিরিবোদরপূর্ণতা, দারুণং মারণাত্মকম্| পক্বাশযস্থিতস্য রক্তস্য লক্ষণমাহ– পক্বেত্যাদি| রুজা শূলম্| গৌরবমিতি নাভেরধো বোদ্ধব্যম্| অধঃকাযে বিশেষেণ শীততেতি ব্যাধিপ্রভাবাত্||৫-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিদ্ধলক্ষণমাহ– সূক্ষ্মাস্যশল্যেত্যাদি| আশযং বিনেতি উক্তামাদ্যাশযং বিনা| উত্তুণ্ডিতমনির্গতশল্যোপলক্ষণং, তেনানুত্তুণ্ডিতমুত্তুণ্ডিতং চ বিদ্ধং গৃহ্যতে| নির্গতেন চ নির্গতমুখং বিদ্ধং সর্বথা নির্গতং চ গৃহ্যতে; তেন তন্ত্রান্তরে “বিদ্ধমুত্তুণ্ডিতমনুত্তুণ্ডিতং ভিন্নং নির্ভিন্নম্” ইতি যচ্চতুষ্প্রকারমভিহিতং তত্ সর্বং সঙ্গৃহীতম্||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

বিদ্ধলক্ষণমাহ– সূক্ষ্মেত্যাদি| আশযং বিনা সূক্ষ্মাস্যেন শল্যেন যদঙ্গমভিহতম্ উত্তুণ্ডিতং উন্নমিতত্বঙ্মাংসম্ ঈষদ্দৃষ্টমুখং বা, নির্গতং নির্গতশল্যম্, উত্তুণ্ডিতমনির্গতশল্যোপলক্ষণম্| তেনানুত্তুণ্ডিতং চ বিদ্ধং গৃহ্যতে, নির্গতেন চ বিনির্গতমুখং বিদ্ধং সর্বদা নির্গতং চ গৃহ্যতে, তেন তন্ত্রান্তরে বিদ্ধমুত্তুণ্ডিতমনুত্তুণ্ডিতং ভিন্নং নির্ভিন্নমিতি চতুঃপ্রকারমভিহিতং তত্সঙ্গৃহীতম্||১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষতমাহ– নাতিচ্ছিন্নমিত্যাদি| নাতিচ্ছিন্নং নাবগাঢচ্ছেদম্| নাতিভিন্নমিতি নাতিবিদীর্ণাশযম্| উভযোর্লক্ষণান্বিতমিতি স্তোকচ্ছেদস্তোকাবদরণযোগাদুভযলক্ষণযুক্তম্| বিষমং ব্রণমঙ্গে যদিতি অঙ্গবৈষম্যকরং ব্রণং যত্তত্ ক্ষতম্||১২||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষতলক্ষণমাহ– নেত্যাদি| নাতিচ্ছিন্নমিতি নাবগাঢচ্ছিন্নং, নাতিভিন্নমিতি নাতিবিদীর্ণাশযম্| উভযোরিতি ছিন্নভিন্নযোরিত্যর্থঃ| তেন স্তোকচ্ছেদস্তোকাবদরণযোগাদুভযলক্ষণযুক্তম্| বিষমং ব্রণমঙ্গে ইতি অঙ্গে বৈষম্যকরং ব্রণং যত্তত্ক্ষতমিতি||১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিচ্চিতলক্ষণমাহ– প্রহারেত্যাদিনা| প্রহারো মুদ্গরাদিনা, পীডনং কপাটাদিনা| পৃথুতামিতি চিপ্পিটতাম্| মজ্জরক্তপরিপ্লুতমিত্যনেন ব্রণভাবাত্ মজ্জরক্তাগমং দর্শযতি| তেন যত্ ব্রণং পিচ্চিতং, তদ্ভগ্নস্য তথা সদ্যোব্রণস্য চ চিকিত্সাবিষযম্||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পিচ্চিতলক্ষণমাহ– প্রহারেত্যাদি| প্রহারো মুদ্গরাদিনা, পীডনং করাদিনা, পৃথুতাং বিপুলতাং, সাস্থি অস্থিখণ্ডান্বিতং, মজ্জরক্তপরিপ্লুতমিত্যনেন ব্রণভাবান্মজ্জরক্তাগমং দর্শযতি, তেন যদ্ব্রণং পিচ্চিতং তদ্ভগ্নস্য তথা সদ্যোব্রণস্য চিকিত্সাবিষযম্||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ঘৃষ্টলক্ষণমাহ– ঘর্ষণাদিত্যাদি| ঘর্ষণাত্ কর্কশবস্ত্রাদিনা| বিগতত্বচমিতি পাঠং ত্যক্ত্বা ‘বিগতত্বচা’ ইতি পাঠঃ সাধুঃ, বিগতত্বচোপলক্ষিতমঙ্গম্| উষা ঊষ্মনির্গমবদ্ব্যথা||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ঘৃষ্টলক্ষণমাহ– ঘর্ষণাদিত্যাদি| যদঙ্গং ঘর্ষণাত্ কর্ষণাত্ কর্কশবস্ত্রাদিনা অভিঘাতাদ্বা বিগতত্বচং ভবতি, অন্যে ‘বিগতত্বচা’ ইতি পাঠং পঠন্তি, বিগতত্বচা লক্ষিতমঙ্গম্| উষা ঊষ্মানির্গমবদ্ব্যথা||১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কোষ্ঠভেদমাহ– ত্বচ ইত্যাদি| ত্বচ ইতি সপ্ত ত্বচঃ| সিরাদীনীতি মাংসস্নায্বস্থিসন্ধীনি| পরিহৃত্য বেতি পরিহারপক্ষেঽপি কোষ্ঠভেদস্য সঙ্গতত্বাত্; সিরাব্যধলিঙ্গং চাত্রৈব ‘সুরেন্দ্রগোপপ্রতিমং’ ইত্যাদিনা ব্যক্তীভবিষ্যতি| উক্তানিতি প্রনষ্টশল্যবিজ্ঞানীযে| তত্র হ্যুক্তং– “কোষ্ঠগতে ত্বাটোপানাহৌ মূত্রপুরীষাহারদর্শনং চ ব্রণমুখাদ্ভবতি|” (সু. সূ. অ. ২৬) ইতি||১৫-১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

সশল্যব্রণলক্ষণমাহ– শ্যাবমিত্যাদি| শ্যাবং শাববর্ণম্| মুহুর্বারংবারং, শোণিতস্রাবযুক্তং, মৃদু কোমলং, উদ্গতং তুম্ব্যাকারাবস্থিতবুদ্বুদেন সদৃশং মাংসং যস্য তং, সরুজং পীডাযুক্তম্| কোষ্ঠভেদমাহ– ত্বচ ইত্যাদি| সপ্ত ত্বচঃ, সিরাদীনি সিরামাংসস্নায্বস্থিসন্ধীনি ভিত্ত্বা, পরিহৃত্য বেতি সন্ত্যজ্য বা| উক্তানিতি প্রনষ্টশল্যবিজ্ঞানীযে| তত্র হ্যুক্তং, “কোষ্ঠগতে ত্বাটোপানাহৌ মূত্রপুরীষাহারদর্শনং চ ব্রণমুখাদ্ভবতি” ইতি||১৫-১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যকোষ্ঠভেদলিঙ্গমাহ– তত্রেত্যাদি| তত্র কোষ্ঠে| অন্তর্লোহিতমিতি অভ্যন্তরস্থিতরক্তম্, অনিঃসৃতরক্তমিতি যাবত্| আনদ্ধমিত্যানাহবন্তম্||১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যকোষ্ঠান্তর্ভেদলিঙ্গমাহ– তত্রেত্যাদি| কোষ্ঠে অন্তর্লোহিতম্ অভ্যন্তরস্থিতরক্তম্, অনিঃসৃতরক্তমিতি| পাণ্ডূনি শীতানি পাদকরাননানি যস্য তং, তথা| আনদ্ধং আনাহযুক্তম্||১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মাংসসিরাস্নায্বস্থিসন্ধিমর্মসু পঞ্চসু ক্ষতেষু সামান্যলিঙ্গমাহ– ভ্রম ইত্যাদি| বিচেষ্টনং বিরুদ্ধচেষ্টনং করচরণাদিক্ষেপাদিকম্| গ্লানির্বলক্ষযঃ| স্রস্তাঙ্গতা অঙ্গসন্ধিবিস্রংসবদ্ব্যথা| মূর্ছনমিন্দ্রিযমোহঃ| ইন্দ্রিযার্থোপরম ইন্দ্রিযাণাং স্ববিষযেষু রূপাদিষু উপরমো গ্রহণাশক্তিঃ| দশার্ধসঙ্খ্যেষু পঞ্চসু||১৮-১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

মাংসসন্ধিসিরাস্নায্বস্থিমর্মসু পঞ্চসু ক্ষতেষু সামান্যলিঙ্গমাহ– ভ্রম ইত্যাদি| ভ্রমশ্চক্রারূঢস্যেব, পতনং ভূমৌ, প্রমোহঃ মনোমোহঃ, বিচেষ্টনং বিরুদ্ধচেষ্টনং চরণক্ষেপণাদিকং, গ্লানিঃ বলক্ষযঃ, স্রস্তাঙ্গতা অঙ্গসন্ধিবিস্রংসবদ্ব্যথা, শরীরশৈথিল্যং বা, মূর্ছনমিন্দ্রিযসম্মোহঃ, প্রমোহস্তু মনোমোহঃ, ঊর্ধ্ববাত ইতি উদ্গারবাহুল্যং, বাতকৃতা রুজস্তাস্তা দণ্ডাপতানকাক্ষেপকাদ্যাঃ| সর্বেন্দ্রিযার্থোপরমঃ স্ববিষযেষু রূপাদিষু উপরমো গ্রহণেঽশক্তিঃ, দশার্ধসঙ্খ্যেষু পঞ্চসু||১৮-১৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সিরাদযো মর্মরূপা অমর্মরূপাশ্চ সন্তি, তত্র পূর্বং মর্মরহিতানাং সিরাদীনাং বিদ্ধলিঙ্গমাহ– সুরেন্দ্রগোপেত্যাদি| যথোক্তানিতি শোণিতবর্ণনীযোক্তান্| তত্র চোক্তং– “তদতিপ্রবৃত্তং শিরোভিতাপমান্ধ্যমাক্ষেপাদীংশ্চ করোতি|” ইতি| বিদ্ধাসু বাণাদিনা| ক্ষতাসু খড্গাদিনা| কৌব্জ্যং কুব্জতা| তুমুলা গহনাঃ| সন্ধিষ্বচলাচলেষ্বিতি অচলেষু নিশ্চেষ্টেষু, চলেষু চেষ্টাবত্সু; সন্ধযশ্চলাচলভেদেন দ্বিবিধাঃ| তথাচ সুশ্রুতঃ– “শাখাসু হন্বোঃ কট্যাং চ চেষ্টাবন্তশ্চ সন্ধযঃ| শেষাস্তু সন্ধযঃ সর্বে বিজ্ঞাতব্যাঃ স্থিরা বুধৈঃ||” (সু. শা. অ. ৫) ইতি||২০-২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

সিরাদযো মর্মরূপা অমর্মরূপাশ্চ সন্তি, তত্র মর্মরহিতসিরাদিবিদ্ধলিঙ্গমাহ– সুরেন্দ্রেত্যাদি| ইন্দ্রগোপো বার্ষিকঃ কীটঃ, তত্ক্ষযজঃ তস্য রুধিরস্য ক্ষযাজ্জাতো বাযুঃ, যথোক্তানিতি শোণিতবর্ণনীযোক্তান্, তথা চোক্তম্– “তদতিপ্রবৃত্তং শিরোভিতাপমান্ধ্যমাক্ষেপকাদীংশ্চ করোতি” ইতি| বিদ্ধাসু বাণাদিনা, ক্ষতাসু খড্গাদিনা| স্নাযুবিদ্ধমাহ– কৌব্জ্যমিত্যাদি| যস্য কৌব্জ্যাদিচিহ্নং ভবতি, তং পুরুষং স্নাযুবিদ্ধং ব্যবস্যেত্ জানীযাত্| কৌব্জ্যং কুব্জতা, তচ্চ অন্তর্বহিরাযামজং দ্বিধা, অবযবাবসাদঃ অবযবানাং স্বকর্মণ্যসামর্থ্যং, ক্রিযাস্বশক্তিঃ সর্বশরীরস্যোত্ক্ষেপণাপক্ষেপণপ্রসারণাকুঞ্চনক্রিযাণামশক্তিঃ| তুমুলা গহনাঃ, অন্যে তু বাতপিত্তকফজনিতা একত্র ব্যাকুলীভূতবেদনাস্তুমুলা উচ্যন্তে ইতি বদন্তি| সন্ধিবিদ্ধমাহ– শোফেত্যাদি| অচলাচলেষু সন্ধিষু ক্ষতেষু সত্সু শোফাতিবৃদ্ধ্যাদিলিঙ্গং স্যাত্| সন্ধযস্তু চলাচলভেদাত্ দ্বিবিধাঃ| তথা চোক্তং সুশ্রুতে– “শাখাসু হন্বোঃ কট্যাং চ চেষ্টাবন্তশ্চ সন্ধযঃ| শেষাস্তু সন্ধযঃ সর্বে বিজ্ঞাতব্যাঃ স্থিরা বুধৈঃ” ইতি| কর্মোপরমঃ কর্মোপরতিঃ| অস্থিবিদ্ধমাহ– ঘোরা ইত্যাদি| তমস্থিবিদ্ধং জানীযাত্, সর্বাস্ববস্থাসু শযনাসনাদিকাসু, বিদিতার্থসূত্রঃ অধিগতশল্যতন্ত্রঃ||২০-২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মর্মরহিতানাং সিরাদীনাং বিদ্ধলক্ষণমভিধায সিরাদিমর্মবিদ্ধলিঙ্গমতিদেশযন্নাহ– যথাস্বমেতানীত্যাদি| বিভাবযেচ্চেতি চকারো ভিন্নক্রমে; তেন এতানি লিঙ্গানি তথা সামান্যলিঙ্গানি চ জানীযাদিত্যর্থঃ|২৪|–

আতঙ্কদর্পণ ব্যাখ্যা (বাচস্পতি বৈদ্য কৃত)

মর্মরহিতানাং সিরাদীনাং বিদ্ধলিঙ্গমভিধায সিরাদিমর্মবিদ্ধলিঙ্গমতিদেশেনাহ– যথাস্বমিত্যাদি| বিভাবযেচ্চেতি চকারোঽত্র ভিন্নক্রমে, তেনৈতানি মর্মবিদ্ধসিরালিঙ্গানি তথা সামান্যলিঙ্গানি ভ্রমপ্রলাপাদীনি পূর্বোক্তানি চ যথাস্বং জানীযাদিত্যর্থঃ|২৪|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অনুক্তমাংসমর্মণো বিদ্ধস্য লিঙ্গমাহ– পাণ্ডুর্বিবর্ণ ইত্যাদি| ননু, সিরাদিবিদ্ধলিঙ্গবত্ মাংসবিদ্ধলিঙ্গমপি পূর্বং কুতো নোপদিষ্টম্? উচ্যতে– কেবলমাংসবিদ্ধস্যাবহুব্যাপত্করত্বাত্ পূর্বমনুপাদানম্||২৪||

আতঙ্কদর্পণ ব্যাখ্যা (বাচস্পতি বৈদ্য কৃত)

মাংসমর্মবিদ্ধলিঙ্গমাহ– পাণ্ডুরিত্যাদি| বিবর্ণো বিচ্ছাযঃ| ননু, সিরাদিবিদ্ধলিঙ্গবন্মাংসবিদ্ধলিঙ্গমপি পূর্বং কুতো নোপদিষ্টং? উচ্যতে– কেবলমাংসবিদ্ধস্যাবহুব্যাপত্করত্বাত্ পূর্বমনুপাদানম্||২৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বব্রণানামুপদ্রবানাহ– বিসর্প ইত্যাদি||২৫-২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বব্রণানামুপদ্রবানাহ– বিসর্প ইত্যাদি| ব্রণরুজো ব্রণপীডাঃ, বেপথুঃ কম্পঃ||২৫-২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং সদ্যোব্রণনিদানং সমাপ্তম্||৪৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং সদ্যোব্রণনিদানম্||৪৩||