10. rājayakṣmakṣatakṣīṇanidānam

madhukōśa vyākhyā (vijayarakṣita, śrīkaṇṭhadatta kr̥ta)

rājayakṣmarūpēṣu pittādraktasya cāgama iti vacanādraktapittānantaraṁ yakṣmanidānam| cikitsōpayōgiviprakr̥ṣṭaṁ kāraṇaṁ caturvidhamāha– vēgarōdhādityādi| vēgō'tra vātamūtrapurīṣāṇāṁ, na tu na vēgāndhāraṇīyōktānāṁ jr̥mbhādīnāṁ sarvēṣām| yaduktaṁ carakē– “hrīmattvādvā ghr̥ṇitvādvā bhayādvā vēgamāgatam| vātamūtrapurīṣāṇāṁ nigr̥hṇāti yadā naraḥ||” (ca. ci. a. 8) ityādi| kṣayāditi kṣīyatē anēnēti kṣayaḥ, tēnātivyavāyānaśanērṣyāviṣādādayō dhātukṣayahētavō gr̥hyantē| sāhasāditi sāhasaṁ balavadvigrahādiruraḥkṣatahētutvēna kāraṇam| viṣamāśanādi suśrutōktadvādaśāśanapravicāravyatirēkēṇōpayōgaḥ, tasya śīghraṁ srōtōrōdhakatvāt| uktaṁ hi carakē– “vividhānyannapānāni vaiṣamyēṇa samaśnatām| janayantyāmayān ghōrān viṣamā mārutādayaḥ|| ruddhvā srōtāṁsi dhātūnāṁ vaiṣamyādviṣamaṁ gatāḥ| dōṣā rōgāya kalpantē puṣyanti naca dhātavaḥ||” (ca. ci. a. 8) iti| tridōṣa iti militatridōṣaja ēka ēva, natu kāraṇabhēdādanēkaḥ| yadāha suśrutaḥ– “ēka ēva mataḥ śōṣaḥ sannipātātmakō yataḥ| udrēkāttatra liṅgāni dōṣāṇāṁ nipatanti hi||” (su. u. taṁ. a. 41) iti| nanu, vēgarōdhādayō vātaṁ prakōpayanti, tajjanitō yakṣmā kathaṁ tridōṣaja iti cēt? ucyatē– vātaprakōpādēvāgniduṣṭyā kaphapittayōrapi prakōpa ityāhuḥ| hētucatuṣṭayādityanēnāsaṅkhyēyā api hētava uktacatuṣṭayē'ntarbhavantīti darśayati| śōṣādinānāśabdavācyatvēna cāsya suśrutē'nvayamakārṣīt| yathā– “saṁśōṣaṇādrasādīnāṁ śōṣa ityabhidhīyatē| kriyākṣayakaratvācca kṣaya ityucyatē budhaiḥ|| rājñaścandramasō yasmādabhūdēṣa kilāmayaḥ| tasmāttaṁ rājayakṣmēti kēcidāhurmanīṣiṇaḥ||” (su. u. taṁ. a. 41) iti| vāgbhaṭē tu– “yakṣmaṇāṁ rājā rājayakṣmā” ityuktam | “rājadantādiṣu param” iti upasarjanasya yakṣmaśabdasya paranipātaḥ||1||

ātaṅkadarpaṇa vyākhyā (vācaspati vaidya kr̥ta)

rājayakṣmarūpēṣu ‘pittādraktasya cāgama’ iti vacanādraktapittanidānānantaraṁ rājayakṣmanidānārambhaḥ| cikitsōpayōgiviprakr̥ṣṭaṁ kāraṇacatuṣṭayamāha– vēgētyādi| vēgō'tra vātamūtrapurīṣādīnāṁ na tu jr̥mbhādīnāṁ sarvēṣāṁ, yaduktaṁ carakē– “hrīmattvādvā ghr̥ṇitvādvā bhayādvā vēgamāgatam| vātamūtrapurīṣāṇāṁ nigr̥hṇāti yadā naraḥ” ityādi| kṣayō dhātukṣayaḥ| sa ca vyavāyānaśanāsr̥ksrāvōpavāsādibhiranēkakāraṇairjāyatē| sāhasāditi sāhasō balavadvigrahādiḥ| viṣamāśanāditi “bahustōkamakālē vā jñēyaṁ tadviṣamāśanam” iti| tasya śīghraṁ srōtōrōdhakatvāt| uktaṁ ca carakē– “vividhānyannapānāni vaiṣamyēṇa samaśnataḥ| janayantyāmayān ghōrānviṣamānmārutādayaḥ|| ruddhvā srōtāṁsi dhātūnāṁ vaiṣamyādviṣasaṅgatāḥ| dōṣā rōgāya jāyantē na puṣyanti ca dhātavaḥ|” iti| tridōṣa iti militatridōṣajanita ēka ēva, na ca kāraṇabhēdādanēkaḥ| uktaṁ hi suśrutē– “ēka ēva mataḥ śōṣaḥ sannipātātmakō yataḥ| udrēkāttatra liṅgāni dōṣāṇāṁ nipatanti hi” iti| asaṅkhyēyā api hētava uktacatuṣṭayē ēvāntarbhāvantīti darśayati| asya śōṣādinānāśabdavācyatvēna sañjñāṁ svayamēvākārṣītsuśrutaḥ| yathā– “saṁśōṣaṇādrasādīnāṁ śōṣa ityabhidhīyatē| kriyākṣayakaratvācca kṣaya ityucyatē punaḥ|| rājñaścandramasō yasmādabhūdēṣa kilāmayaḥ| tasmāttaṁ rājayakṣmēti kēcidāhurmanīṣiṇaḥ” iti| tantrāntarē'pi kāraṇacatuṣṭayamuktam– “ayathābalamārambhō vēgasandhāraṇaṁ kṣayaḥ| yakṣmaṇaḥ kāraṇaṁ vidyāccaturthaṁ viṣamāśanam” iti||1||

madhukōśa vyākhyā (vijayarakṣita, śrīkaṇṭhadatta kr̥ta)

na kēvalaṁ dhātukṣayamātrādēva yakṣmā bhavati, api tu , rasādivahasrōtōnirōdhādibhirapīti darśayituṁ viśiṣṭāṁ samprāptimāha– kaphētyādi| yadā tvēvaṁ na syāt, tadā dhātukṣaya ēva rōgō na tu yakṣmā| kaphaḥ pradhānaṁ yēṣāmanilādīnāṁ dōṣāṇāṁ tē tathā| nanu, dōṣairityanēna dōṣatrayamucyatē, kaphasya viśēṣaṇatvēnōpāttatvāt, kathaṁ tasyaivānyapadārthavācyatā? ucyatē– svāvayavēna vigrahaḥ, samudāyaḥ samāsārthaḥ; yathā– bahuvr̥kṣaṁ vanamiti; samādhānavistarastu suśrutē jējjaṭē draṣṭavyaḥ| kaphapradhānatā ca vēgarōdhādikupitavātaviplutāgnimāndyādinā bōddhavyā| rasavartmasu rasavahadhamanīṣu, atrādiśabdō luptanirdiṣṭō draṣṭavyaḥ| tēna raktādivahasrōtōrōdhō'pi bōdhyaḥ| athavā rasakāraṇatayā raktādīnāṁ rasaduṣṭyaiva raktādiduṣṭiriti kārtikaḥ| idamatra sūcitam– yanmārgarōdhāt hr̥dayasthō rasastatraivāvasthitō vikr̥tō mukhēna niḥsarati| yadāha carakaḥ– “rasaḥ srōtaḥsu ruddhēṣu svasthānasthō vidahyatē| sa ūrdhvaṁ kāsavēgēna bahurūpaḥ pravartatē||” (ca. ci. a. 8) iti| ētēnānulōmakṣayō darśitaḥ, kāraṇabhūtarasadhātukṣayē sati raktādīnāṁ rasakāryāṇāṁ pōṣakābhāvēna kṣīyamāṇatvāt| pratilōmakṣayaṁ darśayitumāha– ativyavāyinō vētyādi| rētasi kṣīṇē satyanantarāḥ samīpagā dhātavaḥ kṣīyantē, tadyathā– śukrē kṣīṇē majjā kṣīyatē, majjani kṣīṇē'sthi, ēvaṁ pūrvaḥ pūrvaḥ dhātuḥ| nanu, kāryabhūtasya śukrasya kṣayāt kathaṁ kāraṇabhūtānāṁ dhātūnāṁ kṣaya iti cēt? ucyatē– śukrakṣayādvāyuḥ prakupyati| yaduktam– “vāyōrdhātukṣayāt kōpō mārgasyāvaraṇēna ca|” (ca. ci. a. 28) iti| sa vāyuḥ sānnidhyānmajjānaṁ śōṣayati, ēvaṁ pūrvapūrvadhātūn| dr̥ṣṭaṁ ca pratyāsattyā'pi kāryajananaṁ; yathā– agnisantaptāyōgōlakasannidhānādārdrabhūbhāgasyāpi śōṣaḥ| tathāca rasasañcārapakṣē suśrutavacanam– “pūrvaḥ pūrvō'tivr̥ddhatvādvardhayēddhi paramparam| tasmādatipravr̥ddhānāṁ dhātūnāṁ hrāsanaṁ hitam||” (su. sū. a. 15) iti||2||

ātaṅkadarpaṇa vyākhyā (vācaspati vaidya kr̥ta)

tasya viśiṣṭāṁ samprāptimāha– kaphētyādi| kaphaḥ pradhānaṁ yēṣāmanilādidōṣāṇāṁ taistathā| nanu dōṣairiti bahutvēna dōṣatrayamucyatē, tatkathaṁ kaphasya pradhānatā? ucyatē– tasya pradhānatā ca vēgarōdhādikṣubhitavātaviplutāgnimāndyādinā bōddhavyā| rasavartmasu rasavahadhamanīṣu| atrādiśabdō luptanirdiṣṭō draṣṭavyaḥ, tēna raktādivahasrōtō'pi bōddhavyam| athavā rasakāraṇatayā raktādīnāṁ rasaduṣṭyaiva raktādiduṣṭiriti kārtikaḥ| idamatra sūcitam– yanmārgāvarōdhāddhr̥dayasthō rasō vidahyatē, tatraivāvasthitō vikr̥tibahulapicchilavisraharitapītaśvētakāsavēgēna mukhamārgēṇa niḥsarati| yaduktaṁ carakē– “rasaḥ srōtaḥsu ruddhēṣu svasthānasthō vidahyatē| sa ūrdhvaṁ kāsavēgēna bahurūpaḥ pravartatē” iti| ētēnānulōmakṣayō darśitaḥ| kāraṇabhūtarasadhātukṣayē sati raktādīnāṁ rasakāryāṇāṁ pōṣakābhāvēna kṣīyamāṇatvāt| pratilōmakṣayaṁ darśayannāha– atītyādi| ativyavāyinaḥ atyarthaṁ grāmyadharmasēvinaḥ| yadi strībhyō na nivartatē tadā kṣīṇē rētasi kṣīyamāṇē śukrē anantarāḥ samīpasthā dhātavaḥ kṣīyantē, tadyathā– śukrē kṣīṇē majjā kṣīyatē, majjani kṣīyamāṇē'sthi, ēvaṁ pūrvaṁ pūrvam| nanu, rasavartmarōdhāt rasō na raktasya br̥ṁhaṇāyālaṁ, raktāpacayānmāṁsasyāpacaya ityādipūrvapūrvadhātukṣīṇatayā śukrakṣayō yuktaḥ, kāryabhūtaśukrakṣayē pūrvadhātūnāṁ kathaṁ kṣayaḥ? ucyatē, śukrakṣayādvāyuḥ kupyati; yaduktam– “vāyōrdhātukṣayātkōpō mārgasyāvaraṇēna ca” iti| sa vāyuḥ sānnidhyāt majjānaṁ śōṣayati, ēvaṁ pūrvapūrvadhātūn| dr̥ṣṭaṁ ca pratyāsannatayā kāryajanakatvam| yathā'gnisantaptāyōgōlakasannidhānādārdrabhūbhāgasya śōṣaḥ, yathā ca mahājalādhāraparikṣayē tatra praviśatāṁ jalāśayānāṁ parikṣayaḥ||2||

madhukōśa vyākhyā (vijayarakṣita, śrīkaṇṭhadatta kr̥ta)

pūrvarūpamāha– śvāsētyādi| saṁsravaḥ ṣṭhīvanam| pīnasaḥ pratiśyāyaḥ| māṁsaparō māṁsabhōjanēcchuḥ| riraṁsuḥ striyaṁ rantumicchuḥ; ētacca vyādhimahimnā manōdōṣāt| tathā svapnēṣu kākādivāhanaṁ ca pūrvarūpamēva| śallakī ‘ śarāru’ iti khyātā, nīlakaṇṭhō mayūraḥ| vijalā nirjalāḥ| davō vanāgniḥ| arditān abhibhūtān| cakārāttr̥ṇakēśanipātādayō draṣṭavyāḥ| yaduktaṁ carakē– “pūrvarūpaṁ pratiśyāyō daurbalyaṁ dōṣadarśanam| adōṣēṣvapi bhāvēṣu kāyē bībhatsadarśanam|| ghr̥ṇitvamaśnataścāpi balamāṁsaparikṣayaḥ| strīmadyamāṁsapriyatā priyatā cāvaguṇṭhanē|| makṣikāghuṇakēśānāṁ tr̥ṇānāṁ patanāni ca| prāyō'nnapānē, kēśānāṁ nakhānāṁ cātivardhanam|| patattribhiḥ pataṅgaiśca śvāpadaiścābhidharṣaṇam|| ” (ca. ci. a. 8) iti| tatra śvāpadā vyāghrādayaḥ||3-4||

ātaṅkadarpaṇa vyākhyā (vācaspati vaidya kr̥ta)

pūrvarūpamāha– śvāsētyādi| bhaviṣyati utpadyamānē śōṣē śvāsādayō bhavantīti sambandhaḥ| aṅgasādō'ṅgaglāniḥ| kaphasaṁsravaḥ kaphaṣṭhīvanaṁ, madō dhattūraphalabhakṣaṇādiva manōmōhaḥ, pīnasaḥ pratiśyāyaḥ, ‘kāsahikkā’ itisthānē'nyē ‘pāṇḍunidrā’ iti paṭhanti, tatra pāṇḍuḥ pāṇḍudēhacchaviḥ| sa ca puruṣaḥ śuklanayanō bhavati| māṁsaparō māṁsabhakṣaṇakāmaḥ| riraṁsuḥ striyaṁ rantumicchuḥ, ētacca vyādhimahimnā manōdōṣādbōddhavyam| tathā svapnē kākādivāhanaṁ ca pūrvarūpamēva, śallakī gōdhānukārī vajraśakalī ‘sēllaka’ iti vikhyātaḥ, nīlakaṇṭhō mayūraḥ, kr̥kalāsaḥ saraṭaḥ ‘giragiṭa’ iti pūrvadēśīyā bhāṣantē; ētē taṁ vāhanībhūya vahanti| vijalā nirjalāḥ| pavanō vāyuḥ, davō dāvāgniḥ, arditān abhibhūtān| cakārāt kēśatr̥ṇādinipātādayō bhōjanē grāhyāḥ| yaduktaṁ carakē– “pūrvarūpaṁ pratiśyāyō daurbalyaṁ dōṣadarśanam| adōṣēṣvapi bhāvēṣu kāyē bībhatsadarśanam|| ghr̥ṇitvamaścāpi balamāṁsaparikṣayaḥ| strīmadyamāṁsapriyatā priyatā cāvaguṇṭhanē|| makṣikāghuṇakēśānāṁ tr̥ṇānāṁ patanāni ca| prāyō'nnapānē kēśānāṁ nakhānāṁ cābhivardhanam|| patattribhiḥ pataṅgaśca śvāpadaiścāpi gharṣaṇam| svapnē kēśāsthirāśīnāṁ bhasmanaścādhirōhaṇam|| jalāśayānāṁ śailānāṁ vanānāṁ jyōtiṣāmapi| śuṣkatāṁ kṣīyamāṇānāṁ patatāṁ cāpi darśanam| prāgrūpaṁ bahurūpasya tajjñēyaṁ rājayakṣmaṇaḥ||” iti| atra śvāpadā vyāghrādayaḥ||3-4||

madhukōśa vyākhyā (vijayarakṣita, śrīkaṇṭhadatta kr̥ta)

trirūpasampannamāha– aṁsētyādi| aṁsapārśvayōrabhitāpaḥ pīḍā, aṁsō bhujasyōparibhāgaḥ, abhitāpatvēnaikaṁ rūpam, ēvaṁ santāpē'pi vācyam| karapādayōrityatra prāṇyaṅgatvādēkavadbhāvaṁ manyamānāḥ kāśmīrāḥ– ‘tāpaḥ pādakarasya ca’ iti paṭhanti, ‘karapādikaḥ’ iti ca pāṭhāntaram| ētattrayaṁ prāyōbhāvitvēna carakēṇōktaṁ, tēnaikādaśarūpēṣu madhyē'nyadapi trayaṁ bōdhyam| tathāca bhōjaḥ– “kāsō jvarō raktapittaṁ trirūpē rājayakṣmaṇi|” iti| anyē tvāhuḥ– rājayakṣmaṇi yō jvarastasyaitallakṣaṇamiti; jējjaṭastu trirūpasampattimēva vyākhyātavān||5||

ātaṅkadarpaṇa vyākhyā (vācaspati vaidya kr̥ta)

trirūpasampattiṁ darśayannāha– aṁsētyādi| aṁsapārśvayōrabhitāpaḥ pīḍā, aṁsō bhujasyōparibhāgaḥ| karapādayōrityatra prāṇyaṅgatvēnaikavadbhāvaṁ manyamānāḥ kāśmīrāḥ ‘tāpaḥ pādakarasya ca’ iti paṭhanti; ‘santāpaḥ karapādādikaḥ’ ityaparē| ētattrayaṁ prāyōbhāvitvēna carakēṇōktam||5||

ātaṅkadarpaṇa vyākhyā (vācaspati vaidya kr̥ta)

idānīṁ tasyaiva ṣaḍrūpāṇi darśayitumāha– bhaktētyādi|6|

madhukōśa vyākhyā (vijayarakṣita, śrīkaṇṭhadatta kr̥ta)

rājayakṣmaṇastraidōṣikasyaikādaśarūpāṇi vibhajya vyādhiprabhāvājjāyantē, natu sannipātajvaraliṅgavat sarvadōṣaiḥ sarvāṇītyāha– svarabhēdō'nilādityādi| śūlamaṁsapārśvayōrēva, aṁsapārśvayōḥ saṅkōca ēka ēva gaṇanīyaḥ| abhaktacchandō bhaktāruciḥ| kaṇṭhasyōddhvaṁsaḥ kaṇṭhabhēdaḥ; ‘utkāsikā’ iti kārtikaḥ||6-7||

ātaṅkadarpaṇa vyākhyā (vācaspati vaidya kr̥ta)

dōṣabhēdēnaikādaśarūpāṇi darśayannāha– svarētyādi| śūlam aṁsapārśvayōḥ saṅkōca ēka ēva| aparē ‘saṁlōca’ iti paṭhanti, tatra saṁlōcō luñcitamiva aṁsayōḥ pārśvayōśca, tēnaivaṁ trīṇi; jvarādīni catvāri pittēna; śirasaḥ paripūrṇatvaṁ kaphēnēti śēṣaḥ, abhaktacchandō bhōjanē aśraddhā, kaṇṭhasya cōddhvaṁsaḥ kaṇṭhabhaṅgaḥ, uddhvaṁsa utkāriphēti kārtikaḥ, ēvaṁ catvāri kaphēna; ēvamēkādaśarūpāṇi; ēvaṁ ṣaḍrūpāṇyapi vātādibhēdēna jñēyāni||6-7||

madhukōśa vyākhyā (vijayarakṣita, śrīkaṇṭhadatta kr̥ta)

asādhyalakṣaṇamāha– ēkādaśabhirityādi| ēkādaśabhirēbhiriti svarabhēdādibhiḥ kaṇṭhōddhvaṁsāntaiḥ| ṣaḍbhiriti suśrutēna ṣaḍrūpāṇi paṭhitāni “bhaktadvēṣō jvaraḥ śvāsaḥ kāsaḥ śōṇitadarśanam| svarabhēdaśca jāyēta ṣaḍrūpaṁ rājayakṣmaṇi||” (su. u. taṁ. a. 41) iti| “kāsātisārapārśvārtisvarabhēdārucijvaraiḥ” iti tu kasyacittantrasya ṣaḍrūpāṇi mādhavakarēṇa likhitānīti| ētāni caikādaśa rūpāṇi prāyōbhāvitvāduktāni, anyatamarūpaparihārāt; rūpāntarayōgē'pyēkādaśatvaṁ ṣaṭtvaṁ ca syādēva, tathāhi carakō nidānē ēkādaśarūpāṇi paṭhitvā cikitsitē'pi vēgarōdhādikāraṇacatuṣṭayajē pratikāraṇaṁ caturdhā ēkādaśarūpāṇi paṭhitavān| yathā– “kāsōṁ'satāpō vaisvaryaṁ jvaraḥ pārśvaśirōrujā| chardanaṁ raktakaphayōḥ śvāsō varcōgrahō'ruciḥ|| rūpāṇyēkādaśaitāni, yakṣmaṇi ṣaḍimāni ca| kāsō jvaraḥ pārśvaśūlaṁ svaravarcōgrahō'ruciḥ||” (ca. ci. a. 8) iti| ēkādaśavacanēnaivaṁ bōdhayati– sampūrṇē yakṣmaṇyēkādaśaiva rūpāṇi bhavantīti| jahyāditi ‘ balamāṁsakṣatē sati’ iti śēṣaḥ| tathāca carakaḥ– “vātavyādhirapasmārī kuṣṭhī bradhnī cirajvarī| gulmī ca madhumēhī ca rājayakṣmī ca yō naraḥ|| acikitsyā bhavantyētē balamāṁsaparikṣayāt| svalpēṣvapi vikārēṣu bhiṣagētān vivarjayēt||” (ca. i. a. 9) iti| sarvairityādi| nanu, sarvarūpāṇyēkādaśa, ēkādaśānāmardhaṁ sārdhapañca bhavanti, tatra katamasya rūpasyārdhatvaṁ kimbhūtaṁ vā bhavati? ucyatē– ēkasya rupasyārdhatvāsambhavē ṣaṭpañcarūpayōrutkr̥ṣṭatvāt ṣaḍrūpa ēvārdhō grāhyāḥ| liṅgairyukta iti sambandhaḥ| atō'nyathēti balamāṁsakṣayābhāvē sati| mahāśanaṁ kṣīyamāṇamityēkamasādhyalakṣaṇam, ariṣṭarūpatvāt; atīsārapīḍitamiti dvitīyaṁ, yakṣmiṇō malāyattajīvitasyōktatvāt; śūnamuṣkōdaramiti tr̥tīyaṁ, muṣkaśōthasya virēkasādhyatvēna viruddhōpakramatvāt| śuklētyādi| śuklākṣatvādayaḥ ēkaikaśō'sādhyalakṣaṇāni||8-12||

ātaṅkadarpaṇa vyākhyā (vācaspati vaidya kr̥ta)

bahurūpō rājayakṣmā'sādhyastamāha– ēkādaśabhiriti| ētairiti svarabhēdō'nilācchūlamityādikairēkādaśabhiḥ| ṣaḍbhirvāpīti bhaktadvēṣō jvara ityādibhiḥ ṣaḍbhiḥ, apiśabdāt tribhirvā aṁsapārśvābhitāpaścētyādikaiḥ, samanvitaṁ jahyāt tyajēt| śōṣānvitaṁ puruṣaṁ yakṣmiṇamiti śēṣaḥ| vahnimāṁsabalakṣayē satīti bōdhyam| asādhyalakṣaṇamāha– sarvairiti sarvaiḥ ēkādaśabhiḥ| nanu, sarvāṇi rūpāṇyēkādaśa, ēkādaśānāmardhaṁ sārdhapañca bhavanti, tatra katamarūpasyārdhatvaṁ kimbhūtaṁ vā bhavati? ucyatē– ēkasya rūpasyārthāsambhavē ṣaṭpañcarūpayōrardhayōrutkr̥ṣṭatvāt ṣaḍrūpamatrārdhō grāhyaḥ| ētairliṅgairmāṁsabalakṣayairyuktō varjya iti sambandhaḥ| māṁsabalayōḥ kṣayaiḥ| kṣayaliṅgāni suśrutēnōktāni| tadyathā– “māṁsakṣayē'sthigaṇḍōpasthōruvakṣaḥkakṣāpiṇḍikōdaragrīvāśuṣkatā rūkṣatā sādō gātrāṇāṁ dhamanīśaithilyaṁ ca” iti| balam ōjaḥ| “mūrchā māṁsakṣayō mōhaḥ pralāpō'jñānamēva ca| pūrvōktāni ca liṅgāni maraṇaṁ ca balakṣayē” iti| aparē māṁsabalakṣayē iti paṭhanti, tatra māṁsabalakṣayē satīti yōjyam| atō'nyathēti māṁsabalakṣayē'satīti| ētēna balamāṁsāgniyuktaḥ pratyākhyēya cikitsyaḥ sarvarūpō'pi| aparamasādhyalakṣaṇamāha– mahāśanamiti|– mahāśanaṁ bahvaśanamapi kṣīyamāṇaṁ māṁsabalābhyāṁ kṣīṇamariṣṭatvāt| atīsāranipīḍitaṁ atīsārayuktam| uktaṁ ca– “malāyattaṁ balaṁ puṁsāṁ śukrāyattaṁ tu jīvitam| tasmādyatnēna saṁrakṣēdyakṣmiṇō malarētasī” iti; śūnamuṣkōdaraṁ śōphayuktaṁ muṣka udaraṁ ca yasya taṁ; muṣkaśōthasya virēkasādhyatvēna viruddhōpakramatvāt| mahāśanaṁ kṣīyamāṇamityēkamasādhyalakṣaṇam, atīsāranipīḍitamiti dvitīyaṁ, śūnamuṣkōdaramiti tr̥tīyam| aparamapi varjyamāha– śuklākṣamityādi| kr̥cchrēṇa bahumēhantamiti kaṣṭēna bahutaraṁ mēhantaṁ ‘malam’ iti śēṣaḥ| ētēnāhārasya malabhāvaḥ kathitaḥ| yasya cātiśayō malō niṣpadyatē tasya māṁsaraktakṣayō bhavati, sa punarasādhyaḥ syāt| itthambhūtaṁ naraṁ śuklākṣatvādyupadravasahitaṁ yakṣmā hantīti sambandhaḥ| ihētyasmin śāstrē| śuklākṣatvādaya ēkaikaśō'pyalakṣaṇāni bōddhavyāni||8-12||

madhukōśa vyākhyā (vijayarakṣita, śrīkaṇṭhadatta kr̥ta)

cikitsyatvamāha– jvarētyādi| upakramēt cikitsēt| akr̥śamityanēna vayaḥsthō'pi pratyākhyāyōpakramyata iti sūcyatē| yaduktamanyatra– “paraṁ dinasahasraṁ tu yadi jīvati mānavaḥ| subhiṣagbhirupakrāntastaruṇaḥ śōṣapīḍitaḥ||” iti||13||

ātaṅkadarpaṇa vyākhyā (vācaspati vaidya kr̥ta)

atha cikitsyamāha– jvarēdityādi| upakramēditi| upakramēt cikitsēt| akr̥śamityanēna vayasthō'pi pratyākhyāyōpakramya iti sūcyatē| yaduktamanyatra– “paraṁ dinasahasraṁ tu yadi jīvati mānavaḥ| subhiṣagbhirupakrāntastaruṇaḥ śōṣapīḍitaḥ” iti||13||

madhukōśa vyākhyā (vijayarakṣita, śrīkaṇṭhadatta kr̥ta)

vyavāyādijanitadhātuśōṣaṇamātrēṇa rājayakṣmatvaṁ nirasyannāha– vyavāyētyādi| yaduktaṁ suśrutē– “kēṣāñcidēvaṁ śōṣō hi kāraṇairbhēdamāgataḥ| na tatra dōṣaliṅgānāṁ samastānāṁ nipātanam|| kṣayā ēva hi tē jñēyāḥ pratyēkaṁ dhātusaṅkṣayāt|” (su. u. taṁ. a. 41) iti| vr̥ddhasya bhāvō vārdhakyamiti svārthē kya(ṣya)ñ” iti kārtikaḥ||14||

ātaṅkadarpaṇa vyākhyā (vācaspati vaidya kr̥ta)

vyavāyādijanitaśōṣamātrēṇa rājayakṣmatvaṁ nirasyannāha– vyavāyētyādi| vyavāyaḥ strīsēvā, śōkaḥ putrādiviyōgēna cittōdvēgaḥ, vārdhakyaṁ vr̥ddhatvaṁ, vyāyāmaḥ śarīrāyāsajananaṁ, adhvā dīrghamārgāṭanaṁ, vraṇaṁ kṣatam, uraḥkṣatamurōntarabhighātajanitavraṇam| yakṣmaṇō lakṣaṇairiti talliṅgaiḥ, na tu yakṣma vai; yaduktaṁ suśrutē– “kēṣāñcidēvaṁ śōṣō hi kāraṇairbhēdamāgataḥ| na tatra dōṣaliṅgānāṁ samastānāṁ nipātanam|| kṣayā ēva hi tē jñēyāḥ pratyēkaṁ dhātusaṅkṣayāt” iti||14||

madhukōśa vyākhyā (vijayarakṣita, śrīkaṇṭhadatta kr̥ta)

vyavāyaśōṣiṇō lakṣaṇamāha– vyavāyētyādi| śukrasya kṣayaliṅgairiti suśrutōktaiḥ| tadyathā– “śukrakṣayē mēḍhravr̥ṣaṇavēdanā, aśaktirmaithunē, cirādvā prasēkaḥ, prasēkē cālparaktaśukradarśanam|” (su. sū. a. 15) iti||15||

ātaṅkadarpaṇa vyākhyā (vācaspati vaidya kr̥ta)

vyavāyaśōṣiṇō lakṣaṇamāha– vyavāyētyādi| śukrakṣayaliṅgairiti suśrutōktaiḥ “śukrakṣayē mēḍhravr̥ṣaṇavēdanā'śaktirmaithunē cirādvā prasēkaḥ, prasēkē cālpaśukradarśanaṁ raktasya ca” iti| yathāpūrvaṁ dhātavaḥ kṣīyantē; tatra śukrasya pūrvō majjā, majjñō'sthi asthnō mēdaḥ mēdasō māṁsaṁ māṁsasya raktamityēvaṁ paraṁ yadi strībhyō na nivartatē||15||

madhukōśa vyākhyā (vijayarakṣita, śrīkaṇṭhadatta kr̥ta)

śōkaśōṣiṇō lakṣaṇamāha– pradhyānētyādinā| śōkaśōṣyapi tādr̥śa iti śukrasya kṣayalakṣaṇavyatiriktēna śukraśōṣaliṅgēna yuktaḥ; yaduktaṁ suśrutē– “vinā śukrakṣayakr̥tairvikārairupalakṣitaḥ|” (su. u. taṁ. a. 41) iti|16|–

ātaṅkadarpaṇa vyākhyā (vācaspati vaidya kr̥ta)

śōkaśōṣamāha– pradhyānaśīlaḥ cintāparaḥ, srastāṅgaḥ avasannagātraḥ, tādr̥śa iti pāṇḍudēhaḥ| śukrakṣayalakṣaṇavyatiriktaiḥ śukraśōṣilakṣaṇairyuktaḥ|16|–

madhukōśa vyākhyā (vijayarakṣita, śrīkaṇṭhadatta kr̥ta)

vārdhakyaśōṣiṇō lakṣaṇamāha– jarētyādi| kampanaḥ kampayuktaḥ| bhinnasya sphuṭitasya kāṁsyapātrasya hatasya daṇḍādinēva svarō yasya sa tathā| ṣṭhīvati ślēṣmaṇā hīnamiti ślēṣmaharaṇāya yatnē kr̥tē'pi na ślēṣmaniḥsaraṇam | śuṣkarūkṣamalacchaviriti śuṣkarūkṣē yathākramaṁ malacchavī yasya sa tathā||16-17||–

ātaṅkadarpaṇa vyākhyā (vācaspati vaidya kr̥ta)

jarāśōṣiṇamāha– jarētyādi| mandaśabdō vīryādibhiḥ pratyēkaṁ sambadhyatē| vīryaṁ śaktiḥ, balamōjō hr̥di sthitaṁ saptadhātūnāṁ dhāma| kampanaḥ kampayuktaḥ| bhinnasya sphuṭitasya kāṁsyapātrasya daṇḍādinā hatasyēva svarō yasya sa tathā| ṣṭhīvati ślēṣmaṇā hīnamiti ślēṣmaharaṇāya balē kr̥tē'pi na ślēṣmaniḥsaraṇam| arucipīḍita iti punararōcakagrahaṇamatyantamarōcakatākhyāpanārtham| samprasrutaśabda āsyādibhiḥ sambadhyatē| āsyaṁ mukhakuharam, akṣi lōcanam| śuṣkarūkṣamalacchaviriti śuṣkarūkṣē yathākramaṁ malacchavī yasya sa tathā||16-17||–

madhukōśa vyākhyā (vijayarakṣita, śrīkaṇṭhadatta kr̥ta)

adhvaśōṣiṇō lakṣaṇamāha– adhvētyādi| sambhr̥ṣṭasyēva bharjitasyēva paruṣā chaviḥ varṇō yasya sa tathā| prasuptaḥ sparśānabhijñaḥ| klōma pipāsāsthānaṁ hr̥dayē, klōmasthānē tālviti pāṭhāntaram||18||–

ātaṅkadarpaṇa vyākhyā (vācaspati vaidya kr̥ta)

adhvaśōṣiṇamāha– srastāṅga iti| srastāṅgaḥ śithilagātraḥ| sambhr̥ṣṭasyēva bharjitasyēva chavirvarṇō yasya sa tathā| prasuptagātrāvayava iti prasuptaḥ sparśānabhijñaḥ akarmaṇyaḥ śarīrapradēśō yasya tathōktaḥ| śuṣkaśabdaḥ klōmādibhiḥ pratyēkaṁ sambadhyatē, klōma pipāsāsthānaṁ hr̥dayē, klōmasthānē tālviti pāṭhāntaram| yadyapi yathōddēśaṁ jarāśōṣyanantaraṁ vyāyāmaśōṣī vācyō nādhvaśōṣī, tathā'pyadhvaśōṣiṇō lakṣaṇānāṁ vyāyāmaśōṣiṇyatidēśāt pūrvamatrādhvaśōṣī nirdiṣṭaḥ| yadyēvaṁ tarhi vyāyāmaśōṣilakṣaṇānyēva kutō'dhvaśōṣiṇi nātidiśyantē| satyam, uraḥkṣataliṅgānāmadhikānāṁ vyāyāmaśōṣiṇi sadbhāvāt| athōddēśa ēvādhvaśōṣī kasmānnādāvukta iti cēt– chandōnurōdhāt| kēcidatra tr̥ḍhaṅagabalapāruṣyāratitōdanairiti paṭhanti tatrāpi sa ēvārthaḥ||18||–

madhukōśa vyākhyā (vijayarakṣita, śrīkaṇṭhadatta kr̥ta)

vyāyāmaśōṣiṇō lakṣaṇamāha– vyāyāmētyādi| ēbhiriti srastāṅgatvādibhiradhvaśōṣalakṣaṇaiḥ, adhvanō vyāyāmamātrasāmānyāt| bhūyiṣṭham atyartham, adhvaśōṣē'lpāni lakṣaṇāni, vyāyāmajē tu mahāntītyarthaḥ| tathā ‘uraḥkṣatakr̥tairliṅgaiḥ saṁyuktaḥ kṣatavarjitaiḥ’ iti sugamaḥ pāṭhaḥ| gadādharastu– “liṅgairuraḥkṣatakr̥taḥ saṁyuktaśca kṣataṁ vinā|” iti paṭhati, vyācaṣṭē ca– uraḥkṣatēna vyāyāmabhārādhyayanadrutayānādihētunā yaḥ kr̥taḥ śōṣaḥ sō'pyēbhirēvādhvaśōṣaliṅgairbhūyiṣṭhaṁ saṁyuktaḥ, kṣataṁ kṣatakāryaṁ vinā| kṣatakāryaṁ tu suśrutē yathā– “tasyōrasi kṣatē raktaṁ pūyaḥ ślēṣmā ca gacchati|” ityārabhya “bhinnavarṇasvarō naraḥ|” (su. u. taṁ. a. 41) ityantamētānyēva lakṣaṇāni kṣatē'dhikāni, uraḥkṣatakāraṇavyāyāmabhārādikr̥taśōṣasya lakṣaṇamēva bhūyiṣṭhaṁ yattadēvōraḥkṣatakāraṇamātratvādadhvanō'pītyarthaḥ| athavā kṣataṁ vinā vraṇaṁ vinā, uraḥkṣatanimittabhārādhyayanādinā'mātrēṇa yaḥ kr̥taḥ śōṣaḥ sō'pyēbhirēvātyarthādhvaśōṣaliṅgaiḥ samanvita iti prakr̥tēna sambandhaḥ; savraṇasya tu vakṣyamāṇamēva lakṣaṇamiti||19||

ātaṅkadarpaṇa vyākhyā (vācaspati vaidya kr̥ta)

vyāyāmaśōṣiṇō lakṣaṇamāha– vyāyāmētyādi| ēbhiriti| srastāṅgatvādibhiranantarōktairēvādhvapraśōṣilakṣaṇaiḥ; bhūyiṣṭhamatyartham, adhvaśōṣē alpāni liṅgāni vyāyāmajē tu mahāntītyarthaḥ| ‘sa ēvōraḥkṣatakr̥taiḥ samprayukta’ iti sugamaḥ pāṭhaḥ| gadādharastu– ‘ liṅgairuraḥkṣatakr̥taḥ saṁyuktaśca kṣataṁ vinā’ iti paṭhati; vyācaṣṭē ca– uraḥkṣatēna vyāyāmabhārādhyayanadrutapr̥ṣṭhayānādihētunā yaḥ kr̥taḥ śōṣaḥ sō'pyēbhirēvādhvaśōṣaliṅgairbhūyiṣṭhaṁ saṁyuktaḥ| kṣataṁ vinā kṣatakāryaṁ vinā, kṣatakāryaṁ tu suśrutē yathā– “tasyōrasi kṣatē raktaṁ pūyaḥ ślēṣmā ca gacchati| “kāsamānaśchardayēcca pītaraktāsitāruṇam|| santaptavakṣāḥ sō'tyarthaṁ dūyanātparitāmyati|| durgandhōcchvāsavadanō bhinnavarṇasvarō naraḥ” iti||19||

madhukōśa vyākhyā (vijayarakṣita, śrīkaṇṭhadatta kr̥ta)

kāraṇatrayēṇa vraṇaśōṣiṇamāha– raktakṣayādityādi| vēdanā vraṇavēdanāḥ, tābhirbhayaśōkavanmanaḥkṣōbhādvātaprakōpādēva śōṣaḥ| sa cāsādhyatama iti svārthikastamap, yathā “yudhiṣṭhiraḥ śrēṣṭhatamaḥ kurūṇām|” iti| atrēṣṭhanaivātiśāyikapratyayēna praśastatamatvasya pratipāditatvāt; athavā yāpyāpēkṣayā'sādhyatamaśabdēna pratyākhyēya ucyatē, yāpyasyāpyasādhyarūpatvāt| nanu, ēvaṁ sati “kr̥śānāṁ vraṇaśōṣiṇām| br̥ṁhaṇīyō vidhiḥ kāryaḥ” (su. ci. a. 1) iti suśrutēnaivōktaṁ cikitsitasthānē virudhyatē? ucyatē– prabalaśōṣē pratyākhyēyatvaṁ, nātiprabalē tu cikitsāvidhānamiti samarthanīyam| candrikākārastu ‘sa cāsādhyatamaḥ smr̥taḥ’ ityasya sthānē “yāpyāsādhyatamastu saḥ” iti paṭhati, cikitsāyāṁ br̥ṁhaṇavidhērabhidhānāditi||20||

ātaṅkadarpaṇa vyākhyā (vācaspati vaidya kr̥ta)

vraṇaśōṣiṇamāha– raktētyādi| raktātisrutēḥ, vēdanāḥ vraṇavēdanāḥ, tābhirapi bhayaśōkavanmanaḥkṣōbhādvātaprakōpādēva śōṣaḥ; sa cāsādhyatamaḥ, atha vā yāpyāpēkṣayā asādhyatamaḥ; asādhyatamaśabdēna pratyākhyēya ucyatē, yāpyasyāpyasādhyarūpatvāt| ēvaṁ sati “kr̥śānāṁ vraṇaśōṣiṇām| br̥ṁhaṇīyō vidhiḥ kāryaḥ” iti suśrutēnaivōktam| tathā ca prabalaśōṣē pratyākhyēyatvaṁ, nātiprabalē cikitsāvidhānamiti||20||

madhukōśa vyākhyā (vijayarakṣita, śrīkaṇṭhadatta kr̥ta)

śōṣanidānēnaiva sāhasādinā uraḥkṣatasya sambhavāt, uraḥkṣatēnāpi śōṣasambhavāt, śōṣādhikārē sanidānamuraḥkṣatamāha– dhanuṣētyādi| āyasyata iti āyāsaṁ kurvatō ‘narasya’ iti śēṣaḥ, ‘āyamyataḥ’ iti pāṭhāntarē vistīryamāṇahr̥dayasya| damyaṁ damanārhaṁ vr̥ṣādikamēva balavantamityarthaḥ| anyaṁ vā gajōṣṭrādikaṁ, nigr̥hṇataḥ vidhārayataḥ| śilā dīrghaśilā, aśmā taditaraprastarakhaṇḍaḥ, nirghātō'straviśēṣaḥ, kiṁvā nirghātaḥ śilādīnāṁ prēraṇaviśēṣō'tibalasampāditaḥ| nighnataḥ parān śatrūn tāḍayataḥ| adhīyānasya paṭhataḥ| mahānadīstarata iti ‘bāhubhyām’ iti śēṣaḥ| tūrṇaṁ śīghram| tathā'nyaiḥ karmabhiḥ krūrairmallayuddhādibhirabhyāhatasya, krūrairityatra śūrairiti śatrubhirityanyē| ēṣāṁ kāraṇānāṁ madhyē kiñcinnikhiladēhasyāyāsakaraṁ, kiñcidurasa ēvēti bōddhavyam| vyādhiriti uraḥkṣatalakṣaṇaḥ; athavā vyādhirvāyuḥ, ‘dōṣā api vyādhiśabdaṁ labhanta’ ityāgamāditi jējjaṭaḥ| urō vibhajyatē bhajyata iva, bhidyatē vidāryatē vibhajyatē dvidhā kriyata iva; ‘vidahyatē’ iti pāṭhāntaramasaṅgataṁ, kāraṇābhāvāt ṭīkākārairavyākhyātatvācca| vīryaṁ śaktiḥ| balaṁ māṁsōpacayaḥ| ‘viḍbhēdō'gnivadhādapi’ iti pāṭhāntarē agnivadhāddhētōrviḍbhēdō bhavatītyarthaḥ; apiśabdāt vyādhimahimnā vinā'pyagnivadhādviḍbhēdō bhavatītyāhuḥ| duṣṭō vyāpannaḥ; tadēva vivr̥ṇōti– śyāva ityādi| vigrathitō viśēṣēṇa granthilaḥ, ‘vibaddha’ iti jējjaṭaḥ| sa puruṣaḥ, kṣatī uraḥkṣatavān, kṣīyatē dhātuśōṣamāpnōti| na kēvalaṁ kṣatādēva kṣīyatē, kiṁ tarhi strīsēvādinā śukraujasōḥ kṣayādapītyāha– tathētyādi||21-28||

ātaṅkadarpaṇa vyākhyā (vācaspati vaidya kr̥ta)

sanidānamuraḥkṣatamāha– dhanuṣētyādi| āyasyataḥ āyāsaṁ kurvataḥ, ‘narasya’ iti śēṣaḥ| ‘āyamyata’ iti pāṭhāntarē vistāryamāṇahr̥dayasya| damyaṁ damanārhaṁ vr̥ṣādikamēva balavattaramityarthaḥ, athavā gajōṣṭrādikaṁ; nigr̥hṇatō vidhārayataḥ| śilā dīrghapāṣāṇaḥ; aśma taditaraprastarakhaṇḍaḥ, nirghātō'straviśēṣaḥ, kiṁ vā śilādinā prēraṇaviśēṣō'tibalasampāditaḥ| tān kṣipataḥ| parān śatrūn| adhīyānasya uccaiḥ paṭhataḥ| dūraṁ vā vrajatō drutamiti śīghraṁ dūraṁ gacchataḥ| mahānadīṁ tarataḥ ‘bāhubhyām’ iti śēṣaḥ| tūrṇaṁ śīghramatinr̥tyataḥ| anyaiḥ karmabhiḥ krūrairiti mallayuddhādibhirabhyāhatasya, śūrairiti śatrubhirityanyē| vikṣatē vidāritē, vakṣasi hr̥di| vyādhiriti uraḥkṣatalakṣaṇaḥ, athavā vyādhirvāyuḥ, dōṣā api vyādhiśabdaṁ labhantē ityāgamāditi jējjaṭaḥ| balavān samudīryatē utkaṭa utpadyatē| uraḥkṣatakṣīṇatvē'paramapi kāraṇamāha– strīṣvityādi| rūkṣaṁ caṇakādiḥ, alpaṁ stōkaṁ, pramitamakālabhōjanam| urō virujyatē rujyata iva bhidyata iva śūlēna, vibhajyatē dvidhā kriyata, iva ‘vidahyatē’ iti pāṭhāntaram| vīryaṁ śaktiḥ, balaṁ māṁsōpacayalakṣaṇaṁ, varṇō gaurādiḥ, vyathā aṅgānāṁ, manōdainyaṁ manōglāniḥ, agnivadhō'gnyabhāvaḥ, ‘viḍbhēdō'gnivadhādapi’ iti paṭhanti vyākhyānayanti ca– agnivadhāddhētōrviḍbhēdō bhavatītyarthaḥ; apiśabdādvāyādhimahimnā vinā'pyagnivadhāt viḍbhēdō bhavatītyāhuḥ| duṣṭō vyāpannaḥ, vigrathitō viśēṣāt granthilaḥ, vinibaddha iti jējjaṭaḥ| kaphaḥ sāsraḥ pravartatē iti rudhirayuktaṁ kaphaṁ ṣṭhīvatē, ‘sāsram’ ityatra ‘sāndra’ iti pāṭhāntaraṁ, tatra sāndrō ghanaḥ| ēbhiḥ kāraṇaiḥ, sakṣataḥ kṣatavān; ‘sa tata’ iti pāṭhē sa puruṣaḥ, tata uraḥkṣatāt; atyarthaṁ kṣīyatē dhātuśōṣamāpnōtītyarthaḥ| na kēvalaṁ kṣatādēva kṣīyatē kiṁ tarhi strīsēvādinā śukraujasōḥ kṣayādapi||21-28||–

madhukōśa vyākhyā (vijayarakṣita, śrīkaṇṭhadatta kr̥ta)

pūrvarūpamāha– avyaktamityādi| tasya kṣatasya lakṣaṇamavyaktamaprakaṭam||29||

ātaṅkadarpaṇa vyākhyā (vācaspati vaidya kr̥ta)

pūrvarūpamāha– kṣatakṣīṇayōrasādhāraṇaṁ lakṣaṇamidam| tasya kṣatasya lakṣaṇamavyaktamaprakaṭam||29||

madhukōśa vyākhyā (vijayarakṣita, śrīkaṇṭhadatta kr̥ta)

kṣatakṣīṇayōrasādhāraṇalakṣaṇamāha– urōrugityādi| vaiśēṣikō viśiṣṭaḥ kāsaḥ; sa ca viśēṣa uktō duṣṭaśyāvādikaphasaṁyuktatvaṁ; kiṁvā vaiśēṣika udbhūtaḥ| kṣata iti chēdaḥ| kṣīṇē iti kṣayē ityarthaḥ| saraktamūtratvam ālōhitamūtratā||30||

ātaṅkadarpaṇa vyākhyā (vācaspati vaidya kr̥ta)

kṣatakṣīṇayōrasādhāraṇamāha– urōrugityādi| kṣatē uraḥkṣatē| kāsō vaiśēṣika iti viśiṣṭaḥ kāsaḥ kṣīṇakāsāpēkṣayā adhika ityarthaḥ| kṣīṇasya rūpamāha– kṣaya iti| śukraujasōḥ kṣayē tu saraktamūtrādirupadravaḥ| vaiśēṣikaḥ viśiṣṭaḥ kāsa iti asmin lakṣaṇē sambadhyatē||30||

madhukōśa vyākhyā (vijayarakṣita, śrīkaṇṭhadatta kr̥ta)

tayōḥ sādhyalakṣaṇamāha– alpētyādi||31||

ātaṅkadarpaṇa vyākhyā (vācaspati vaidya kr̥ta)

uraḥkṣatē sādhyayāpyāsādhyatvamāha– alpētyādi| alpaliṅgasya alpalakṣaṇasya||31||

madhukōśa vyākhyā (vijayarakṣita, śrīkaṇṭhadatta kr̥ta)

iti śrīvijarakṣitakr̥tāyāṁ madhukōśavyākhyāyāṁ rājayakṣmakṣatakṣīṇanidānaṁ samāptam||10||

ātaṅkadarpaṇa vyākhyā (vācaspati vaidya kr̥ta)

iti śrīvaidyavācaspatikr̥tē ātaṅkadarpaṇē nidānavyākhyānē rājyakṣmanidānam||10||