১০. রাজযক্ষ্মক্ষতক্ষীণনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রাজযক্ষ্মরূপেষু পিত্তাদ্রক্তস্য চাগম ইতি বচনাদ্রক্তপিত্তানন্তরং যক্ষ্মনিদানম্| চিকিত্সোপযোগিবিপ্রকৃষ্টং কারণং চতুর্বিধমাহ– বেগরোধাদিত্যাদি| বেগোঽত্র বাতমূত্রপুরীষাণাং, ন তু ন বেগান্ধারণীযোক্তানাং জৃম্ভাদীনাং সর্বেষাম্| যদুক্তং চরকে– “হ্রীমত্ত্বাদ্বা ঘৃণিত্বাদ্বা ভযাদ্বা বেগমাগতম্| বাতমূত্রপুরীষাণাং নিগৃহ্ণাতি যদা নরঃ||” (চ. চি. অ. ৮) ইত্যাদি| ক্ষযাদিতি ক্ষীযতে অনেনেতি ক্ষযঃ, তেনাতিব্যবাযানশনের্ষ্যাবিষাদাদযো ধাতুক্ষযহেতবো গৃহ্যন্তে| সাহসাদিতি সাহসং বলবদ্বিগ্রহাদিরুরঃক্ষতহেতুত্বেন কারণম্| বিষমাশনাদি সুশ্রুতোক্তদ্বাদশাশনপ্রবিচারব্যতিরেকেণোপযোগঃ, তস্য শীঘ্রং স্রোতোরোধকত্বাত্| উক্তং হি চরকে– “বিবিধান্যন্নপানানি বৈষম্যেণ সমশ্নতাম্| জনযন্ত্যামযান্ ঘোরান্ বিষমা মারুতাদযঃ|| রুদ্ধ্বা স্রোতাংসি ধাতূনাং বৈষম্যাদ্বিষমং গতাঃ| দোষা রোগায কল্পন্তে পুষ্যন্তি নচ ধাতবঃ||” (চ. চি. অ. ৮) ইতি| ত্রিদোষ ইতি মিলিতত্রিদোষজ এক এব, নতু কারণভেদাদনেকঃ| যদাহ সুশ্রুতঃ– “এক এব মতঃ শোষঃ সন্নিপাতাত্মকো যতঃ| উদ্রেকাত্তত্র লিঙ্গানি দোষাণাং নিপতন্তি হি||” (সু. উ. তং. অ. ৪১) ইতি| ননু, বেগরোধাদযো বাতং প্রকোপযন্তি, তজ্জনিতো যক্ষ্মা কথং ত্রিদোষজ ইতি চেত্? উচ্যতে– বাতপ্রকোপাদেবাগ্নিদুষ্ট্যা কফপিত্তযোরপি প্রকোপ ইত্যাহুঃ| হেতুচতুষ্টযাদিত্যনেনাসঙ্খ্যেযা অপি হেতব উক্তচতুষ্টযেঽন্তর্ভবন্তীতি দর্শযতি| শোষাদিনানাশব্দবাচ্যত্বেন চাস্য সুশ্রুতেঽন্বযমকার্ষীত্| যথা– “সংশোষণাদ্রসাদীনাং শোষ ইত্যভিধীযতে| ক্রিযাক্ষযকরত্বাচ্চ ক্ষয ইত্যুচ্যতে বুধৈঃ|| রাজ্ঞশ্চন্দ্রমসো যস্মাদভূদেষ কিলামযঃ| তস্মাত্তং রাজযক্ষ্মেতি কেচিদাহুর্মনীষিণঃ||” (সু. উ. তং. অ. ৪১) ইতি| বাগ্ভটে তু– “যক্ষ্মণাং রাজা রাজযক্ষ্মা” ইত্যুক্তম্ | “রাজদন্তাদিষু পরম্” ইতি উপসর্জনস্য যক্ষ্মশব্দস্য পরনিপাতঃ||১||

আতঙ্কদর্পণ ব্যাখ্যা (বাচস্পতি বৈদ্য কৃত)

রাজযক্ষ্মরূপেষু ‘পিত্তাদ্রক্তস্য চাগম’ ইতি বচনাদ্রক্তপিত্তনিদানানন্তরং রাজযক্ষ্মনিদানারম্ভঃ| চিকিত্সোপযোগিবিপ্রকৃষ্টং কারণচতুষ্টযমাহ– বেগেত্যাদি| বেগোঽত্র বাতমূত্রপুরীষাদীনাং ন তু জৃম্ভাদীনাং সর্বেষাং, যদুক্তং চরকে– “হ্রীমত্ত্বাদ্বা ঘৃণিত্বাদ্বা ভযাদ্বা বেগমাগতম্| বাতমূত্রপুরীষাণাং নিগৃহ্ণাতি যদা নরঃ” ইত্যাদি| ক্ষযো ধাতুক্ষযঃ| স চ ব্যবাযানশনাসৃক্স্রাবোপবাসাদিভিরনেককারণৈর্জাযতে| সাহসাদিতি সাহসো বলবদ্বিগ্রহাদিঃ| বিষমাশনাদিতি “বহুস্তোকমকালে বা জ্ঞেযং তদ্বিষমাশনম্” ইতি| তস্য শীঘ্রং স্রোতোরোধকত্বাত্| উক্তং চ চরকে– “বিবিধান্যন্নপানানি বৈষম্যেণ সমশ্নতঃ| জনযন্ত্যামযান্ ঘোরান্বিষমান্মারুতাদযঃ|| রুদ্ধ্বা স্রোতাংসি ধাতূনাং বৈষম্যাদ্বিষসঙ্গতাঃ| দোষা রোগায জাযন্তে ন পুষ্যন্তি চ ধাতবঃ|” ইতি| ত্রিদোষ ইতি মিলিতত্রিদোষজনিত এক এব, ন চ কারণভেদাদনেকঃ| উক্তং হি সুশ্রুতে– “এক এব মতঃ শোষঃ সন্নিপাতাত্মকো যতঃ| উদ্রেকাত্তত্র লিঙ্গানি দোষাণাং নিপতন্তি হি” ইতি| অসঙ্খ্যেযা অপি হেতব উক্তচতুষ্টযে এবান্তর্ভাবন্তীতি দর্শযতি| অস্য শোষাদিনানাশব্দবাচ্যত্বেন সঞ্জ্ঞাং স্বযমেবাকার্ষীত্সুশ্রুতঃ| যথা– “সংশোষণাদ্রসাদীনাং শোষ ইত্যভিধীযতে| ক্রিযাক্ষযকরত্বাচ্চ ক্ষয ইত্যুচ্যতে পুনঃ|| রাজ্ঞশ্চন্দ্রমসো যস্মাদভূদেষ কিলামযঃ| তস্মাত্তং রাজযক্ষ্মেতি কেচিদাহুর্মনীষিণঃ” ইতি| তন্ত্রান্তরেঽপি কারণচতুষ্টযমুক্তম্– “অযথাবলমারম্ভো বেগসন্ধারণং ক্ষযঃ| যক্ষ্মণঃ কারণং বিদ্যাচ্চতুর্থং বিষমাশনম্” ইতি||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ন কেবলং ধাতুক্ষযমাত্রাদেব যক্ষ্মা ভবতি, অপি তু , রসাদিবহস্রোতোনিরোধাদিভিরপীতি দর্শযিতুং বিশিষ্টাং সম্প্রাপ্তিমাহ– কফেত্যাদি| যদা ত্বেবং ন স্যাত্, তদা ধাতুক্ষয এব রোগো ন তু যক্ষ্মা| কফঃ প্রধানং যেষামনিলাদীনাং দোষাণাং তে তথা| ননু, দোষৈরিত্যনেন দোষত্রযমুচ্যতে, কফস্য বিশেষণত্বেনোপাত্তত্বাত্, কথং তস্যৈবান্যপদার্থবাচ্যতা? উচ্যতে– স্বাবযবেন বিগ্রহঃ, সমুদাযঃ সমাসার্থঃ; যথা– বহুবৃক্ষং বনমিতি; সমাধানবিস্তরস্তু সুশ্রুতে জেজ্জটে দ্রষ্টব্যঃ| কফপ্রধানতা চ বেগরোধাদিকুপিতবাতবিপ্লুতাগ্নিমান্দ্যাদিনা বোদ্ধব্যা| রসবর্ত্মসু রসবহধমনীষু, অত্রাদিশব্দো লুপ্তনির্দিষ্টো দ্রষ্টব্যঃ| তেন রক্তাদিবহস্রোতোরোধোঽপি বোধ্যঃ| অথবা রসকারণতযা রক্তাদীনাং রসদুষ্ট্যৈব রক্তাদিদুষ্টিরিতি কার্তিকঃ| ইদমত্র সূচিতম্– যন্মার্গরোধাত্ হৃদযস্থো রসস্তত্রৈবাবস্থিতো বিকৃতো মুখেন নিঃসরতি| যদাহ চরকঃ– “রসঃ স্রোতঃসু রুদ্ধেষু স্বস্থানস্থো বিদহ্যতে| স ঊর্ধ্বং কাসবেগেন বহুরূপঃ প্রবর্ততে||” (চ. চি. অ. ৮) ইতি| এতেনানুলোমক্ষযো দর্শিতঃ, কারণভূতরসধাতুক্ষযে সতি রক্তাদীনাং রসকার্যাণাং পোষকাভাবেন ক্ষীযমাণত্বাত্| প্রতিলোমক্ষযং দর্শযিতুমাহ– অতিব্যবাযিনো বেত্যাদি| রেতসি ক্ষীণে সত্যনন্তরাঃ সমীপগা ধাতবঃ ক্ষীযন্তে, তদ্যথা– শুক্রে ক্ষীণে মজ্জা ক্ষীযতে, মজ্জনি ক্ষীণেঽস্থি, এবং পূর্বঃ পূর্বঃ ধাতুঃ| ননু, কার্যভূতস্য শুক্রস্য ক্ষযাত্ কথং কারণভূতানাং ধাতূনাং ক্ষয ইতি চেত্? উচ্যতে– শুক্রক্ষযাদ্বাযুঃ প্রকুপ্যতি| যদুক্তম্– “বাযোর্ধাতুক্ষযাত্ কোপো মার্গস্যাবরণেন চ|” (চ. চি. অ. ২৮) ইতি| স বাযুঃ সান্নিধ্যান্মজ্জানং শোষযতি, এবং পূর্বপূর্বধাতূন্| দৃষ্টং চ প্রত্যাসত্ত্যাঽপি কার্যজননং; যথা– অগ্নিসন্তপ্তাযোগোলকসন্নিধানাদার্দ্রভূভাগস্যাপি শোষঃ| তথাচ রসসঞ্চারপক্ষে সুশ্রুতবচনম্– “পূর্বঃ পূর্বোঽতিবৃদ্ধত্বাদ্বর্ধযেদ্ধি পরম্পরম্| তস্মাদতিপ্রবৃদ্ধানাং ধাতূনাং হ্রাসনং হিতম্||” (সু. সূ. অ. ১৫) ইতি||২||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য বিশিষ্টাং সম্প্রাপ্তিমাহ– কফেত্যাদি| কফঃ প্রধানং যেষামনিলাদিদোষাণাং তৈস্তথা| ননু দোষৈরিতি বহুত্বেন দোষত্রযমুচ্যতে, তত্কথং কফস্য প্রধানতা? উচ্যতে– তস্য প্রধানতা চ বেগরোধাদিক্ষুভিতবাতবিপ্লুতাগ্নিমান্দ্যাদিনা বোদ্ধব্যা| রসবর্ত্মসু রসবহধমনীষু| অত্রাদিশব্দো লুপ্তনির্দিষ্টো দ্রষ্টব্যঃ, তেন রক্তাদিবহস্রোতোঽপি বোদ্ধব্যম্| অথবা রসকারণতযা রক্তাদীনাং রসদুষ্ট্যৈব রক্তাদিদুষ্টিরিতি কার্তিকঃ| ইদমত্র সূচিতম্– যন্মার্গাবরোধাদ্ধৃদযস্থো রসো বিদহ্যতে, তত্রৈবাবস্থিতো বিকৃতিবহুলপিচ্ছিলবিস্রহরিতপীতশ্বেতকাসবেগেন মুখমার্গেণ নিঃসরতি| যদুক্তং চরকে– “রসঃ স্রোতঃসু রুদ্ধেষু স্বস্থানস্থো বিদহ্যতে| স ঊর্ধ্বং কাসবেগেন বহুরূপঃ প্রবর্ততে” ইতি| এতেনানুলোমক্ষযো দর্শিতঃ| কারণভূতরসধাতুক্ষযে সতি রক্তাদীনাং রসকার্যাণাং পোষকাভাবেন ক্ষীযমাণত্বাত্| প্রতিলোমক্ষযং দর্শযন্নাহ– অতীত্যাদি| অতিব্যবাযিনঃ অত্যর্থং গ্রাম্যধর্মসেবিনঃ| যদি স্ত্রীভ্যো ন নিবর্ততে তদা ক্ষীণে রেতসি ক্ষীযমাণে শুক্রে অনন্তরাঃ সমীপস্থা ধাতবঃ ক্ষীযন্তে, তদ্যথা– শুক্রে ক্ষীণে মজ্জা ক্ষীযতে, মজ্জনি ক্ষীযমাণেঽস্থি, এবং পূর্বং পূর্বম্| ননু, রসবর্ত্মরোধাত্ রসো ন রক্তস্য বৃংহণাযালং, রক্তাপচযান্মাংসস্যাপচয ইত্যাদিপূর্বপূর্বধাতুক্ষীণতযা শুক্রক্ষযো যুক্তঃ, কার্যভূতশুক্রক্ষযে পূর্বধাতূনাং কথং ক্ষযঃ? উচ্যতে, শুক্রক্ষযাদ্বাযুঃ কুপ্যতি; যদুক্তম্– “বাযোর্ধাতুক্ষযাত্কোপো মার্গস্যাবরণেন চ” ইতি| স বাযুঃ সান্নিধ্যাত্ মজ্জানং শোষযতি, এবং পূর্বপূর্বধাতূন্| দৃষ্টং চ প্রত্যাসন্নতযা কার্যজনকত্বম্| যথাঽগ্নিসন্তপ্তাযোগোলকসন্নিধানাদার্দ্রভূভাগস্য শোষঃ, যথা চ মহাজলাধারপরিক্ষযে তত্র প্রবিশতাং জলাশযানাং পরিক্ষযঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– শ্বাসেত্যাদি| সংস্রবঃ ষ্ঠীবনম্| পীনসঃ প্রতিশ্যাযঃ| মাংসপরো মাংসভোজনেচ্ছুঃ| রিরংসুঃ স্ত্রিযং রন্তুমিচ্ছুঃ; এতচ্চ ব্যাধিমহিম্না মনোদোষাত্| তথা স্বপ্নেষু কাকাদিবাহনং চ পূর্বরূপমেব| শল্লকী ‘ শরারু’ ইতি খ্যাতা, নীলকণ্ঠো মযূরঃ| বিজলা নির্জলাঃ| দবো বনাগ্নিঃ| অর্দিতান্ অভিভূতান্| চকারাত্তৃণকেশনিপাতাদযো দ্রষ্টব্যাঃ| যদুক্তং চরকে– “পূর্বরূপং প্রতিশ্যাযো দৌর্বল্যং দোষদর্শনম্| অদোষেষ্বপি ভাবেষু কাযে বীভত্সদর্শনম্|| ঘৃণিত্বমশ্নতশ্চাপি বলমাংসপরিক্ষযঃ| স্ত্রীমদ্যমাংসপ্রিযতা প্রিযতা চাবগুণ্ঠনে|| মক্ষিকাঘুণকেশানাং তৃণানাং পতনানি চ| প্রাযোঽন্নপানে, কেশানাং নখানাং চাতিবর্ধনম্|| পতত্ত্রিভিঃ পতঙ্গৈশ্চ শ্বাপদৈশ্চাভিধর্ষণম্|| ” (চ. চি. অ. ৮) ইতি| তত্র শ্বাপদা ব্যাঘ্রাদযঃ||৩-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– শ্বাসেত্যাদি| ভবিষ্যতি উত্পদ্যমানে শোষে শ্বাসাদযো ভবন্তীতি সম্বন্ধঃ| অঙ্গসাদোঽঙ্গগ্লানিঃ| কফসংস্রবঃ কফষ্ঠীবনং, মদো ধত্তূরফলভক্ষণাদিব মনোমোহঃ, পীনসঃ প্রতিশ্যাযঃ, ‘কাসহিক্কা’ ইতিস্থানেঽন্যে ‘পাণ্ডুনিদ্রা’ ইতি পঠন্তি, তত্র পাণ্ডুঃ পাণ্ডুদেহচ্ছবিঃ| স চ পুরুষঃ শুক্লনযনো ভবতি| মাংসপরো মাংসভক্ষণকামঃ| রিরংসুঃ স্ত্রিযং রন্তুমিচ্ছুঃ, এতচ্চ ব্যাধিমহিম্না মনোদোষাদ্বোদ্ধব্যম্| তথা স্বপ্নে কাকাদিবাহনং চ পূর্বরূপমেব, শল্লকী গোধানুকারী বজ্রশকলী ‘সেল্লক’ ইতি বিখ্যাতঃ, নীলকণ্ঠো মযূরঃ, কৃকলাসঃ সরটঃ ‘গিরগিট’ ইতি পূর্বদেশীযা ভাষন্তে; এতে তং বাহনীভূয বহন্তি| বিজলা নির্জলাঃ| পবনো বাযুঃ, দবো দাবাগ্নিঃ, অর্দিতান্ অভিভূতান্| চকারাত্ কেশতৃণাদিনিপাতাদযো ভোজনে গ্রাহ্যাঃ| যদুক্তং চরকে– “পূর্বরূপং প্রতিশ্যাযো দৌর্বল্যং দোষদর্শনম্| অদোষেষ্বপি ভাবেষু কাযে বীভত্সদর্শনম্|| ঘৃণিত্বমশ্চাপি বলমাংসপরিক্ষযঃ| স্ত্রীমদ্যমাংসপ্রিযতা প্রিযতা চাবগুণ্ঠনে|| মক্ষিকাঘুণকেশানাং তৃণানাং পতনানি চ| প্রাযোঽন্নপানে কেশানাং নখানাং চাভিবর্ধনম্|| পতত্ত্রিভিঃ পতঙ্গশ্চ শ্বাপদৈশ্চাপি ঘর্ষণম্| স্বপ্নে কেশাস্থিরাশীনাং ভস্মনশ্চাধিরোহণম্|| জলাশযানাং শৈলানাং বনানাং জ্যোতিষামপি| শুষ্কতাং ক্ষীযমাণানাং পততাং চাপি দর্শনম্| প্রাগ্রূপং বহুরূপস্য তজ্জ্ঞেযং রাজযক্ষ্মণঃ||” ইতি| অত্র শ্বাপদা ব্যাঘ্রাদযঃ||৩-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্রিরূপসম্পন্নমাহ– অংসেত্যাদি| অংসপার্শ্বযোরভিতাপঃ পীডা, অংসো ভুজস্যোপরিভাগঃ, অভিতাপত্বেনৈকং রূপম্, এবং সন্তাপেঽপি বাচ্যম্| করপাদযোরিত্যত্র প্রাণ্যঙ্গত্বাদেকবদ্ভাবং মন্যমানাঃ কাশ্মীরাঃ– ‘তাপঃ পাদকরস্য চ’ ইতি পঠন্তি, ‘করপাদিকঃ’ ইতি চ পাঠান্তরম্| এতত্ত্রযং প্রাযোভাবিত্বেন চরকেণোক্তং, তেনৈকাদশরূপেষু মধ্যেঽন্যদপি ত্রযং বোধ্যম্| তথাচ ভোজঃ– “কাসো জ্বরো রক্তপিত্তং ত্রিরূপে রাজযক্ষ্মণি|” ইতি| অন্যে ত্বাহুঃ– রাজযক্ষ্মণি যো জ্বরস্তস্যৈতল্লক্ষণমিতি; জেজ্জটস্তু ত্রিরূপসম্পত্তিমেব ব্যাখ্যাতবান্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিরূপসম্পত্তিং দর্শযন্নাহ– অংসেত্যাদি| অংসপার্শ্বযোরভিতাপঃ পীডা, অংসো ভুজস্যোপরিভাগঃ| করপাদযোরিত্যত্র প্রাণ্যঙ্গত্বেনৈকবদ্ভাবং মন্যমানাঃ কাশ্মীরাঃ ‘তাপঃ পাদকরস্য চ’ ইতি পঠন্তি; ‘সন্তাপঃ করপাদাদিকঃ’ ইত্যপরে| এতত্ত্রযং প্রাযোভাবিত্বেন চরকেণোক্তম্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীং তস্যৈব ষড্রূপাণি দর্শযিতুমাহ– ভক্তেত্যাদি|৬|

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রাজযক্ষ্মণস্ত্রৈদোষিকস্যৈকাদশরূপাণি বিভজ্য ব্যাধিপ্রভাবাজ্জাযন্তে, নতু সন্নিপাতজ্বরলিঙ্গবত্ সর্বদোষৈঃ সর্বাণীত্যাহ– স্বরভেদোঽনিলাদিত্যাদি| শূলমংসপার্শ্বযোরেব, অংসপার্শ্বযোঃ সঙ্কোচ এক এব গণনীযঃ| অভক্তচ্ছন্দো ভক্তারুচিঃ| কণ্ঠস্যোদ্ধ্বংসঃ কণ্ঠভেদঃ; ‘উত্কাসিকা’ ইতি কার্তিকঃ||৬-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

দোষভেদেনৈকাদশরূপাণি দর্শযন্নাহ– স্বরেত্যাদি| শূলম্ অংসপার্শ্বযোঃ সঙ্কোচ এক এব| অপরে ‘সংলোচ’ ইতি পঠন্তি, তত্র সংলোচো লুঞ্চিতমিব অংসযোঃ পার্শ্বযোশ্চ, তেনৈবং ত্রীণি; জ্বরাদীনি চত্বারি পিত্তেন; শিরসঃ পরিপূর্ণত্বং কফেনেতি শেষঃ, অভক্তচ্ছন্দো ভোজনে অশ্রদ্ধা, কণ্ঠস্য চোদ্ধ্বংসঃ কণ্ঠভঙ্গঃ, উদ্ধ্বংস উত্কারিফেতি কার্তিকঃ, এবং চত্বারি কফেন; এবমেকাদশরূপাণি; এবং ষড্রূপাণ্যপি বাতাদিভেদেন জ্ঞেযানি||৬-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যলক্ষণমাহ– একাদশভিরিত্যাদি| একাদশভিরেভিরিতি স্বরভেদাদিভিঃ কণ্ঠোদ্ধ্বংসান্তৈঃ| ষড্ভিরিতি সুশ্রুতেন ষড্রূপাণি পঠিতানি “ভক্তদ্বেষো জ্বরঃ শ্বাসঃ কাসঃ শোণিতদর্শনম্| স্বরভেদশ্চ জাযেত ষড্রূপং রাজযক্ষ্মণি||” (সু. উ. তং. অ. ৪১) ইতি| “কাসাতিসারপার্শ্বার্তিস্বরভেদারুচিজ্বরৈঃ” ইতি তু কস্যচিত্তন্ত্রস্য ষড্রূপাণি মাধবকরেণ লিখিতানীতি| এতানি চৈকাদশ রূপাণি প্রাযোভাবিত্বাদুক্তানি, অন্যতমরূপপরিহারাত্; রূপান্তরযোগেঽপ্যেকাদশত্বং ষট্ত্বং চ স্যাদেব, তথাহি চরকো নিদানে একাদশরূপাণি পঠিত্বা চিকিত্সিতেঽপি বেগরোধাদিকারণচতুষ্টযজে প্রতিকারণং চতুর্ধা একাদশরূপাণি পঠিতবান্| যথা– “কাসোংঽসতাপো বৈস্বর্যং জ্বরঃ পার্শ্বশিরোরুজা| ছর্দনং রক্তকফযোঃ শ্বাসো বর্চোগ্রহোঽরুচিঃ|| রূপাণ্যেকাদশৈতানি, যক্ষ্মণি ষডিমানি চ| কাসো জ্বরঃ পার্শ্বশূলং স্বরবর্চোগ্রহোঽরুচিঃ||” (চ. চি. অ. ৮) ইতি| একাদশবচনেনৈবং বোধযতি– সম্পূর্ণে যক্ষ্মণ্যেকাদশৈব রূপাণি ভবন্তীতি| জহ্যাদিতি ‘ বলমাংসক্ষতে সতি’ ইতি শেষঃ| তথাচ চরকঃ– “বাতব্যাধিরপস্মারী কুষ্ঠী ব্রধ্নী চিরজ্বরী| গুল্মী চ মধুমেহী চ রাজযক্ষ্মী চ যো নরঃ|| অচিকিত্স্যা ভবন্ত্যেতে বলমাংসপরিক্ষযাত্| স্বল্পেষ্বপি বিকারেষু ভিষগেতান্ বিবর্জযেত্||” (চ. ই. অ. ৯) ইতি| সর্বৈরিত্যাদি| ননু, সর্বরূপাণ্যেকাদশ, একাদশানামর্ধং সার্ধপঞ্চ ভবন্তি, তত্র কতমস্য রূপস্যার্ধত্বং কিম্ভূতং বা ভবতি? উচ্যতে– একস্য রুপস্যার্ধত্বাসম্ভবে ষট্পঞ্চরূপযোরুত্কৃষ্টত্বাত্ ষড্রূপ এবার্ধো গ্রাহ্যাঃ| লিঙ্গৈর্যুক্ত ইতি সম্বন্ধঃ| অতোঽন্যথেতি বলমাংসক্ষযাভাবে সতি| মহাশনং ক্ষীযমাণমিত্যেকমসাধ্যলক্ষণম্, অরিষ্টরূপত্বাত্; অতীসারপীডিতমিতি দ্বিতীযং, যক্ষ্মিণো মলাযত্তজীবিতস্যোক্তত্বাত্; শূনমুষ্কোদরমিতি তৃতীযং, মুষ্কশোথস্য বিরেকসাধ্যত্বেন বিরুদ্ধোপক্রমত্বাত্| শুক্লেত্যাদি| শুক্লাক্ষত্বাদযঃ একৈকশোঽসাধ্যলক্ষণানি||৮-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

বহুরূপো রাজযক্ষ্মাঽসাধ্যস্তমাহ– একাদশভিরিতি| এতৈরিতি স্বরভেদোঽনিলাচ্ছূলমিত্যাদিকৈরেকাদশভিঃ| ষড্ভির্বাপীতি ভক্তদ্বেষো জ্বর ইত্যাদিভিঃ ষড্ভিঃ, অপিশব্দাত্ ত্রিভির্বা অংসপার্শ্বাভিতাপশ্চেত্যাদিকৈঃ, সমন্বিতং জহ্যাত্ ত্যজেত্| শোষান্বিতং পুরুষং যক্ষ্মিণমিতি শেষঃ| বহ্নিমাংসবলক্ষযে সতীতি বোধ্যম্| অসাধ্যলক্ষণমাহ– সর্বৈরিতি সর্বৈঃ একাদশভিঃ| ননু, সর্বাণি রূপাণ্যেকাদশ, একাদশানামর্ধং সার্ধপঞ্চ ভবন্তি, তত্র কতমরূপস্যার্ধত্বং কিম্ভূতং বা ভবতি? উচ্যতে– একস্য রূপস্যার্থাসম্ভবে ষট্পঞ্চরূপযোরর্ধযোরুত্কৃষ্টত্বাত্ ষড্রূপমত্রার্ধো গ্রাহ্যঃ| এতৈর্লিঙ্গৈর্মাংসবলক্ষযৈর্যুক্তো বর্জ্য ইতি সম্বন্ধঃ| মাংসবলযোঃ ক্ষযৈঃ| ক্ষযলিঙ্গানি সুশ্রুতেনোক্তানি| তদ্যথা– “মাংসক্ষযেঽস্থিগণ্ডোপস্থোরুবক্ষঃকক্ষাপিণ্ডিকোদরগ্রীবাশুষ্কতা রূক্ষতা সাদো গাত্রাণাং ধমনীশৈথিল্যং চ” ইতি| বলম্ ওজঃ| “মূর্ছা মাংসক্ষযো মোহঃ প্রলাপোঽজ্ঞানমেব চ| পূর্বোক্তানি চ লিঙ্গানি মরণং চ বলক্ষযে” ইতি| অপরে মাংসবলক্ষযে ইতি পঠন্তি, তত্র মাংসবলক্ষযে সতীতি যোজ্যম্| অতোঽন্যথেতি মাংসবলক্ষযেঽসতীতি| এতেন বলমাংসাগ্নিযুক্তঃ প্রত্যাখ্যেয চিকিত্স্যঃ সর্বরূপোঽপি| অপরমসাধ্যলক্ষণমাহ– মহাশনমিতি|– মহাশনং বহ্বশনমপি ক্ষীযমাণং মাংসবলাভ্যাং ক্ষীণমরিষ্টত্বাত্| অতীসারনিপীডিতং অতীসারযুক্তম্| উক্তং চ– “মলাযত্তং বলং পুংসাং শুক্রাযত্তং তু জীবিতম্| তস্মাদ্যত্নেন সংরক্ষেদ্যক্ষ্মিণো মলরেতসী” ইতি; শূনমুষ্কোদরং শোফযুক্তং মুষ্ক উদরং চ যস্য তং; মুষ্কশোথস্য বিরেকসাধ্যত্বেন বিরুদ্ধোপক্রমত্বাত্| মহাশনং ক্ষীযমাণমিত্যেকমসাধ্যলক্ষণম্, অতীসারনিপীডিতমিতি দ্বিতীযং, শূনমুষ্কোদরমিতি তৃতীযম্| অপরমপি বর্জ্যমাহ– শুক্লাক্ষমিত্যাদি| কৃচ্ছ্রেণ বহুমেহন্তমিতি কষ্টেন বহুতরং মেহন্তং ‘মলম্’ ইতি শেষঃ| এতেনাহারস্য মলভাবঃ কথিতঃ| যস্য চাতিশযো মলো নিষ্পদ্যতে তস্য মাংসরক্তক্ষযো ভবতি, স পুনরসাধ্যঃ স্যাত্| ইত্থম্ভূতং নরং শুক্লাক্ষত্বাদ্যুপদ্রবসহিতং যক্ষ্মা হন্তীতি সম্বন্ধঃ| ইহেত্যস্মিন্ শাস্ত্রে| শুক্লাক্ষত্বাদয একৈকশোঽপ্যলক্ষণানি বোদ্ধব্যানি||৮-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চিকিত্স্যত্বমাহ– জ্বরেত্যাদি| উপক্রমেত্ চিকিত্সেত্| অকৃশমিত্যনেন বযঃস্থোঽপি প্রত্যাখ্যাযোপক্রম্যত ইতি সূচ্যতে| যদুক্তমন্যত্র– “পরং দিনসহস্রং তু যদি জীবতি মানবঃ| সুভিষগ্ভিরুপক্রান্তস্তরুণঃ শোষপীডিতঃ||” ইতি||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ চিকিত্স্যমাহ– জ্বরেদিত্যাদি| উপক্রমেদিতি| উপক্রমেত্ চিকিত্সেত্| অকৃশমিত্যনেন বযস্থোঽপি প্রত্যাখ্যাযোপক্রম্য ইতি সূচ্যতে| যদুক্তমন্যত্র– “পরং দিনসহস্রং তু যদি জীবতি মানবঃ| সুভিষগ্ভিরুপক্রান্তস্তরুণঃ শোষপীডিতঃ” ইতি||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ব্যবাযাদিজনিতধাতুশোষণমাত্রেণ রাজযক্ষ্মত্বং নিরস্যন্নাহ– ব্যবাযেত্যাদি| যদুক্তং সুশ্রুতে– “কেষাঞ্চিদেবং শোষো হি কারণৈর্ভেদমাগতঃ| ন তত্র দোষলিঙ্গানাং সমস্তানাং নিপাতনম্|| ক্ষযা এব হি তে জ্ঞেযাঃ প্রত্যেকং ধাতুসঙ্ক্ষযাত্|” (সু. উ. তং. অ. ৪১) ইতি| বৃদ্ধস্য ভাবো বার্ধক্যমিতি স্বার্থে ক্য(ষ্য)ঞ্” ইতি কার্তিকঃ||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ব্যবাযাদিজনিতশোষমাত্রেণ রাজযক্ষ্মত্বং নিরস্যন্নাহ– ব্যবাযেত্যাদি| ব্যবাযঃ স্ত্রীসেবা, শোকঃ পুত্রাদিবিযোগেন চিত্তোদ্বেগঃ, বার্ধক্যং বৃদ্ধত্বং, ব্যাযামঃ শরীরাযাসজননং, অধ্বা দীর্ঘমার্গাটনং, ব্রণং ক্ষতম্, উরঃক্ষতমুরোন্তরভিঘাতজনিতব্রণম্| যক্ষ্মণো লক্ষণৈরিতি তল্লিঙ্গৈঃ, ন তু যক্ষ্ম বৈ; যদুক্তং সুশ্রুতে– “কেষাঞ্চিদেবং শোষো হি কারণৈর্ভেদমাগতঃ| ন তত্র দোষলিঙ্গানাং সমস্তানাং নিপাতনম্|| ক্ষযা এব হি তে জ্ঞেযাঃ প্রত্যেকং ধাতুসঙ্ক্ষযাত্” ইতি||১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ব্যবাযশোষিণো লক্ষণমাহ– ব্যবাযেত্যাদি| শুক্রস্য ক্ষযলিঙ্গৈরিতি সুশ্রুতোক্তৈঃ| তদ্যথা– “শুক্রক্ষযে মেঢ্রবৃষণবেদনা, অশক্তির্মৈথুনে, চিরাদ্বা প্রসেকঃ, প্রসেকে চাল্পরক্তশুক্রদর্শনম্|” (সু. সূ. অ. ১৫) ইতি||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ব্যবাযশোষিণো লক্ষণমাহ– ব্যবাযেত্যাদি| শুক্রক্ষযলিঙ্গৈরিতি সুশ্রুতোক্তৈঃ “শুক্রক্ষযে মেঢ্রবৃষণবেদনাঽশক্তির্মৈথুনে চিরাদ্বা প্রসেকঃ, প্রসেকে চাল্পশুক্রদর্শনং রক্তস্য চ” ইতি| যথাপূর্বং ধাতবঃ ক্ষীযন্তে; তত্র শুক্রস্য পূর্বো মজ্জা, মজ্জ্ঞোঽস্থি অস্থ্নো মেদঃ মেদসো মাংসং মাংসস্য রক্তমিত্যেবং পরং যদি স্ত্রীভ্যো ন নিবর্ততে||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শোকশোষিণো লক্ষণমাহ– প্রধ্যানেত্যাদিনা| শোকশোষ্যপি তাদৃশ ইতি শুক্রস্য ক্ষযলক্ষণব্যতিরিক্তেন শুক্রশোষলিঙ্গেন যুক্তঃ; যদুক্তং সুশ্রুতে– “বিনা শুক্রক্ষযকৃতৈর্বিকারৈরুপলক্ষিতঃ|” (সু. উ. তং. অ. ৪১) ইতি|১৬|–

আতঙ্কদর্পণ ব্যাখ্যা (বাচস্পতি বৈদ্য কৃত)

শোকশোষমাহ– প্রধ্যানশীলঃ চিন্তাপরঃ, স্রস্তাঙ্গঃ অবসন্নগাত্রঃ, তাদৃশ ইতি পাণ্ডুদেহঃ| শুক্রক্ষযলক্ষণব্যতিরিক্তৈঃ শুক্রশোষিলক্ষণৈর্যুক্তঃ|১৬|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বার্ধক্যশোষিণো লক্ষণমাহ– জরেত্যাদি| কম্পনঃ কম্পযুক্তঃ| ভিন্নস্য স্ফুটিতস্য কাংস্যপাত্রস্য হতস্য দণ্ডাদিনেব স্বরো যস্য স তথা| ষ্ঠীবতি শ্লেষ্মণা হীনমিতি শ্লেষ্মহরণায যত্নে কৃতেঽপি ন শ্লেষ্মনিঃসরণম্ | শুষ্করূক্ষমলচ্ছবিরিতি শুষ্করূক্ষে যথাক্রমং মলচ্ছবী যস্য স তথা||১৬-১৭||–

আতঙ্কদর্পণ ব্যাখ্যা (বাচস্পতি বৈদ্য কৃত)

জরাশোষিণমাহ– জরেত্যাদি| মন্দশব্দো বীর্যাদিভিঃ প্রত্যেকং সম্বধ্যতে| বীর্যং শক্তিঃ, বলমোজো হৃদি স্থিতং সপ্তধাতূনাং ধাম| কম্পনঃ কম্পযুক্তঃ| ভিন্নস্য স্ফুটিতস্য কাংস্যপাত্রস্য দণ্ডাদিনা হতস্যেব স্বরো যস্য স তথা| ষ্ঠীবতি শ্লেষ্মণা হীনমিতি শ্লেষ্মহরণায বলে কৃতেঽপি ন শ্লেষ্মনিঃসরণম্| অরুচিপীডিত ইতি পুনররোচকগ্রহণমত্যন্তমরোচকতাখ্যাপনার্থম্| সম্প্রস্রুতশব্দ আস্যাদিভিঃ সম্বধ্যতে| আস্যং মুখকুহরম্, অক্ষি লোচনম্| শুষ্করূক্ষমলচ্ছবিরিতি শুষ্করূক্ষে যথাক্রমং মলচ্ছবী যস্য স তথা||১৬-১৭||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অধ্বশোষিণো লক্ষণমাহ– অধ্বেত্যাদি| সম্ভৃষ্টস্যেব ভর্জিতস্যেব পরুষা ছবিঃ বর্ণো যস্য স তথা| প্রসুপ্তঃ স্পর্শানভিজ্ঞঃ| ক্লোম পিপাসাস্থানং হৃদযে, ক্লোমস্থানে তাল্বিতি পাঠান্তরম্||১৮||–

আতঙ্কদর্পণ ব্যাখ্যা (বাচস্পতি বৈদ্য কৃত)

অধ্বশোষিণমাহ– স্রস্তাঙ্গ ইতি| স্রস্তাঙ্গঃ শিথিলগাত্রঃ| সম্ভৃষ্টস্যেব ভর্জিতস্যেব ছবির্বর্ণো যস্য স তথা| প্রসুপ্তগাত্রাবযব ইতি প্রসুপ্তঃ স্পর্শানভিজ্ঞঃ অকর্মণ্যঃ শরীরপ্রদেশো যস্য তথোক্তঃ| শুষ্কশব্দঃ ক্লোমাদিভিঃ প্রত্যেকং সম্বধ্যতে, ক্লোম পিপাসাস্থানং হৃদযে, ক্লোমস্থানে তাল্বিতি পাঠান্তরম্| যদ্যপি যথোদ্দেশং জরাশোষ্যনন্তরং ব্যাযামশোষী বাচ্যো নাধ্বশোষী, তথাঽপ্যধ্বশোষিণো লক্ষণানাং ব্যাযামশোষিণ্যতিদেশাত্ পূর্বমত্রাধ্বশোষী নির্দিষ্টঃ| যদ্যেবং তর্হি ব্যাযামশোষিলক্ষণান্যেব কুতোঽধ্বশোষিণি নাতিদিশ্যন্তে| সত্যম্, উরঃক্ষতলিঙ্গানামধিকানাং ব্যাযামশোষিণি সদ্ভাবাত্| অথোদ্দেশ এবাধ্বশোষী কস্মান্নাদাবুক্ত ইতি চেত্– ছন্দোনুরোধাত্| কেচিদত্র তৃঢঙগবলপারুষ্যারতিতোদনৈরিতি পঠন্তি তত্রাপি স এবার্থঃ||১৮||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ব্যাযামশোষিণো লক্ষণমাহ– ব্যাযামেত্যাদি| এভিরিতি স্রস্তাঙ্গত্বাদিভিরধ্বশোষলক্ষণৈঃ, অধ্বনো ব্যাযামমাত্রসামান্যাত্| ভূযিষ্ঠম্ অত্যর্থম্, অধ্বশোষেঽল্পানি লক্ষণানি, ব্যাযামজে তু মহান্তীত্যর্থঃ| তথা ‘উরঃক্ষতকৃতৈর্লিঙ্গৈঃ সংযুক্তঃ ক্ষতবর্জিতৈঃ’ ইতি সুগমঃ পাঠঃ| গদাধরস্তু– “লিঙ্গৈরুরঃক্ষতকৃতঃ সংযুক্তশ্চ ক্ষতং বিনা|” ইতি পঠতি, ব্যাচষ্টে চ– উরঃক্ষতেন ব্যাযামভারাধ্যযনদ্রুতযানাদিহেতুনা যঃ কৃতঃ শোষঃ সোঽপ্যেভিরেবাধ্বশোষলিঙ্গৈর্ভূযিষ্ঠং সংযুক্তঃ, ক্ষতং ক্ষতকার্যং বিনা| ক্ষতকার্যং তু সুশ্রুতে যথা– “তস্যোরসি ক্ষতে রক্তং পূযঃ শ্লেষ্মা চ গচ্ছতি|” ইত্যারভ্য “ভিন্নবর্ণস্বরো নরঃ|” (সু. উ. তং. অ. ৪১) ইত্যন্তমেতান্যেব লক্ষণানি ক্ষতেঽধিকানি, উরঃক্ষতকারণব্যাযামভারাদিকৃতশোষস্য লক্ষণমেব ভূযিষ্ঠং যত্তদেবোরঃক্ষতকারণমাত্রত্বাদধ্বনোঽপীত্যর্থঃ| অথবা ক্ষতং বিনা ব্রণং বিনা, উরঃক্ষতনিমিত্তভারাধ্যযনাদিনাঽমাত্রেণ যঃ কৃতঃ শোষঃ সোঽপ্যেভিরেবাত্যর্থাধ্বশোষলিঙ্গৈঃ সমন্বিত ইতি প্রকৃতেন সম্বন্ধঃ; সব্রণস্য তু বক্ষ্যমাণমেব লক্ষণমিতি||১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ব্যাযামশোষিণো লক্ষণমাহ– ব্যাযামেত্যাদি| এভিরিতি| স্রস্তাঙ্গত্বাদিভিরনন্তরোক্তৈরেবাধ্বপ্রশোষিলক্ষণৈঃ; ভূযিষ্ঠমত্যর্থম্, অধ্বশোষে অল্পানি লিঙ্গানি ব্যাযামজে তু মহান্তীত্যর্থঃ| ‘স এবোরঃক্ষতকৃতৈঃ সম্প্রযুক্ত’ ইতি সুগমঃ পাঠঃ| গদাধরস্তু– ‘ লিঙ্গৈরুরঃক্ষতকৃতঃ সংযুক্তশ্চ ক্ষতং বিনা’ ইতি পঠতি; ব্যাচষ্টে চ– উরঃক্ষতেন ব্যাযামভারাধ্যযনদ্রুতপৃষ্ঠযানাদিহেতুনা যঃ কৃতঃ শোষঃ সোঽপ্যেভিরেবাধ্বশোষলিঙ্গৈর্ভূযিষ্ঠং সংযুক্তঃ| ক্ষতং বিনা ক্ষতকার্যং বিনা, ক্ষতকার্যং তু সুশ্রুতে যথা– “তস্যোরসি ক্ষতে রক্তং পূযঃ শ্লেষ্মা চ গচ্ছতি| “কাসমানশ্ছর্দযেচ্চ পীতরক্তাসিতারুণম্|| সন্তপ্তবক্ষাঃ সোঽত্যর্থং দূযনাত্পরিতাম্যতি|| দুর্গন্ধোচ্ছ্বাসবদনো ভিন্নবর্ণস্বরো নরঃ” ইতি||১৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কারণত্রযেণ ব্রণশোষিণমাহ– রক্তক্ষযাদিত্যাদি| বেদনা ব্রণবেদনাঃ, তাভির্ভযশোকবন্মনঃক্ষোভাদ্বাতপ্রকোপাদেব শোষঃ| স চাসাধ্যতম ইতি স্বার্থিকস্তমপ্, যথা “যুধিষ্ঠিরঃ শ্রেষ্ঠতমঃ কুরূণাম্|” ইতি| অত্রেষ্ঠনৈবাতিশাযিকপ্রত্যযেন প্রশস্ততমত্বস্য প্রতিপাদিতত্বাত্; অথবা যাপ্যাপেক্ষযাঽসাধ্যতমশব্দেন প্রত্যাখ্যেয উচ্যতে, যাপ্যস্যাপ্যসাধ্যরূপত্বাত্| ননু, এবং সতি “কৃশানাং ব্রণশোষিণাম্| বৃংহণীযো বিধিঃ কার্যঃ” (সু. চি. অ. ১) ইতি সুশ্রুতেনৈবোক্তং চিকিত্সিতস্থানে বিরুধ্যতে? উচ্যতে– প্রবলশোষে প্রত্যাখ্যেযত্বং, নাতিপ্রবলে তু চিকিত্সাবিধানমিতি সমর্থনীযম্| চন্দ্রিকাকারস্তু ‘স চাসাধ্যতমঃ স্মৃতঃ’ ইত্যস্য স্থানে “যাপ্যাসাধ্যতমস্তু সঃ” ইতি পঠতি, চিকিত্সাযাং বৃংহণবিধেরভিধানাদিতি||২০||

আতঙ্কদর্পণ ব্যাখ্যা (বাচস্পতি বৈদ্য কৃত)

ব্রণশোষিণমাহ– রক্তেত্যাদি| রক্তাতিস্রুতেঃ, বেদনাঃ ব্রণবেদনাঃ, তাভিরপি ভযশোকবন্মনঃক্ষোভাদ্বাতপ্রকোপাদেব শোষঃ; স চাসাধ্যতমঃ, অথ বা যাপ্যাপেক্ষযা অসাধ্যতমঃ; অসাধ্যতমশব্দেন প্রত্যাখ্যেয উচ্যতে, যাপ্যস্যাপ্যসাধ্যরূপত্বাত্| এবং সতি “কৃশানাং ব্রণশোষিণাম্| বৃংহণীযো বিধিঃ কার্যঃ” ইতি সুশ্রুতেনৈবোক্তম্| তথা চ প্রবলশোষে প্রত্যাখ্যেযত্বং, নাতিপ্রবলে চিকিত্সাবিধানমিতি||২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শোষনিদানেনৈব সাহসাদিনা উরঃক্ষতস্য সম্ভবাত্, উরঃক্ষতেনাপি শোষসম্ভবাত্, শোষাধিকারে সনিদানমুরঃক্ষতমাহ– ধনুষেত্যাদি| আযস্যত ইতি আযাসং কুর্বতো ‘নরস্য’ ইতি শেষঃ, ‘আযম্যতঃ’ ইতি পাঠান্তরে বিস্তীর্যমাণহৃদযস্য| দম্যং দমনার্হং বৃষাদিকমেব বলবন্তমিত্যর্থঃ| অন্যং বা গজোষ্ট্রাদিকং, নিগৃহ্ণতঃ বিধারযতঃ| শিলা দীর্ঘশিলা, অশ্মা তদিতরপ্রস্তরখণ্ডঃ, নির্ঘাতোঽস্ত্রবিশেষঃ, কিংবা নির্ঘাতঃ শিলাদীনাং প্রেরণবিশেষোঽতিবলসম্পাদিতঃ| নিঘ্নতঃ পরান্ শত্রূন্ তাডযতঃ| অধীযানস্য পঠতঃ| মহানদীস্তরত ইতি ‘বাহুভ্যাম্’ ইতি শেষঃ| তূর্ণং শীঘ্রম্| তথাঽন্যৈঃ কর্মভিঃ ক্রূরৈর্মল্লযুদ্ধাদিভিরভ্যাহতস্য, ক্রূরৈরিত্যত্র শূরৈরিতি শত্রুভিরিত্যন্যে| এষাং কারণানাং মধ্যে কিঞ্চিন্নিখিলদেহস্যাযাসকরং, কিঞ্চিদুরস এবেতি বোদ্ধব্যম্| ব্যাধিরিতি উরঃক্ষতলক্ষণঃ; অথবা ব্যাধির্বাযুঃ, ‘দোষা অপি ব্যাধিশব্দং লভন্ত’ ইত্যাগমাদিতি জেজ্জটঃ| উরো বিভজ্যতে ভজ্যত ইব, ভিদ্যতে বিদার্যতে বিভজ্যতে দ্বিধা ক্রিযত ইব; ‘বিদহ্যতে’ ইতি পাঠান্তরমসঙ্গতং, কারণাভাবাত্ টীকাকারৈরব্যাখ্যাতত্বাচ্চ| বীর্যং শক্তিঃ| বলং মাংসোপচযঃ| ‘বিড্ভেদোঽগ্নিবধাদপি’ ইতি পাঠান্তরে অগ্নিবধাদ্ধেতোর্বিড্ভেদো ভবতীত্যর্থঃ; অপিশব্দাত্ ব্যাধিমহিম্না বিনাঽপ্যগ্নিবধাদ্বিড্ভেদো ভবতীত্যাহুঃ| দুষ্টো ব্যাপন্নঃ; তদেব বিবৃণোতি– শ্যাব ইত্যাদি| বিগ্রথিতো বিশেষেণ গ্রন্থিলঃ, ‘বিবদ্ধ’ ইতি জেজ্জটঃ| স পুরুষঃ, ক্ষতী উরঃক্ষতবান্, ক্ষীযতে ধাতুশোষমাপ্নোতি| ন কেবলং ক্ষতাদেব ক্ষীযতে, কিং তর্হি স্ত্রীসেবাদিনা শুক্রৌজসোঃ ক্ষযাদপীত্যাহ– তথেত্যাদি||২১-২৮||

আতঙ্কদর্পণ ব্যাখ্যা (বাচস্পতি বৈদ্য কৃত)

সনিদানমুরঃক্ষতমাহ– ধনুষেত্যাদি| আযস্যতঃ আযাসং কুর্বতঃ, ‘নরস্য’ ইতি শেষঃ| ‘আযম্যত’ ইতি পাঠান্তরে বিস্তার্যমাণহৃদযস্য| দম্যং দমনার্হং বৃষাদিকমেব বলবত্তরমিত্যর্থঃ, অথবা গজোষ্ট্রাদিকং; নিগৃহ্ণতো বিধারযতঃ| শিলা দীর্ঘপাষাণঃ; অশ্ম তদিতরপ্রস্তরখণ্ডঃ, নির্ঘাতোঽস্ত্রবিশেষঃ, কিং বা শিলাদিনা প্রেরণবিশেষোঽতিবলসম্পাদিতঃ| তান্ ক্ষিপতঃ| পরান্ শত্রূন্| অধীযানস্য উচ্চৈঃ পঠতঃ| দূরং বা ব্রজতো দ্রুতমিতি শীঘ্রং দূরং গচ্ছতঃ| মহানদীং তরতঃ ‘বাহুভ্যাম্’ ইতি শেষঃ| তূর্ণং শীঘ্রমতিনৃত্যতঃ| অন্যৈঃ কর্মভিঃ ক্রূরৈরিতি মল্লযুদ্ধাদিভিরভ্যাহতস্য, শূরৈরিতি শত্রুভিরিত্যন্যে| বিক্ষতে বিদারিতে, বক্ষসি হৃদি| ব্যাধিরিতি উরঃক্ষতলক্ষণঃ, অথবা ব্যাধির্বাযুঃ, দোষা অপি ব্যাধিশব্দং লভন্তে ইত্যাগমাদিতি জেজ্জটঃ| বলবান্ সমুদীর্যতে উত্কট উত্পদ্যতে| উরঃক্ষতক্ষীণত্বেঽপরমপি কারণমাহ– স্ত্রীষ্বিত্যাদি| রূক্ষং চণকাদিঃ, অল্পং স্তোকং, প্রমিতমকালভোজনম্| উরো বিরুজ্যতে রুজ্যত ইব ভিদ্যত ইব শূলেন, বিভজ্যতে দ্বিধা ক্রিযত, ইব ‘বিদহ্যতে’ ইতি পাঠান্তরম্| বীর্যং শক্তিঃ, বলং মাংসোপচযলক্ষণং, বর্ণো গৌরাদিঃ, ব্যথা অঙ্গানাং, মনোদৈন্যং মনোগ্লানিঃ, অগ্নিবধোঽগ্ন্যভাবঃ, ‘বিড্ভেদোঽগ্নিবধাদপি’ ইতি পঠন্তি ব্যাখ্যানযন্তি চ– অগ্নিবধাদ্ধেতোর্বিড্ভেদো ভবতীত্যর্থঃ; অপিশব্দাদ্বাযাধিমহিম্না বিনাঽপ্যগ্নিবধাত্ বিড্ভেদো ভবতীত্যাহুঃ| দুষ্টো ব্যাপন্নঃ, বিগ্রথিতো বিশেষাত্ গ্রন্থিলঃ, বিনিবদ্ধ ইতি জেজ্জটঃ| কফঃ সাস্রঃ প্রবর্ততে ইতি রুধিরযুক্তং কফং ষ্ঠীবতে, ‘সাস্রম্’ ইত্যত্র ‘সান্দ্র’ ইতি পাঠান্তরং, তত্র সান্দ্রো ঘনঃ| এভিঃ কারণৈঃ, সক্ষতঃ ক্ষতবান্; ‘স তত’ ইতি পাঠে স পুরুষঃ, তত উরঃক্ষতাত্; অত্যর্থং ক্ষীযতে ধাতুশোষমাপ্নোতীত্যর্থঃ| ন কেবলং ক্ষতাদেব ক্ষীযতে কিং তর্হি স্ত্রীসেবাদিনা শুক্রৌজসোঃ ক্ষযাদপি||২১-২৮||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– অব্যক্তমিত্যাদি| তস্য ক্ষতস্য লক্ষণমব্যক্তমপ্রকটম্||২৯||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– ক্ষতক্ষীণযোরসাধারণং লক্ষণমিদম্| তস্য ক্ষতস্য লক্ষণমব্যক্তমপ্রকটম্||২৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষতক্ষীণযোরসাধারণলক্ষণমাহ– উরোরুগিত্যাদি| বৈশেষিকো বিশিষ্টঃ কাসঃ; স চ বিশেষ উক্তো দুষ্টশ্যাবাদিকফসংযুক্তত্বং; কিংবা বৈশেষিক উদ্ভূতঃ| ক্ষত ইতি ছেদঃ| ক্ষীণে ইতি ক্ষযে ইত্যর্থঃ| সরক্তমূত্রত্বম্ আলোহিতমূত্রতা||৩০||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষতক্ষীণযোরসাধারণমাহ– উরোরুগিত্যাদি| ক্ষতে উরঃক্ষতে| কাসো বৈশেষিক ইতি বিশিষ্টঃ কাসঃ ক্ষীণকাসাপেক্ষযা অধিক ইত্যর্থঃ| ক্ষীণস্য রূপমাহ– ক্ষয ইতি| শুক্রৌজসোঃ ক্ষযে তু সরক্তমূত্রাদিরুপদ্রবঃ| বৈশেষিকঃ বিশিষ্টঃ কাস ইতি অস্মিন্ লক্ষণে সম্বধ্যতে||৩০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তযোঃ সাধ্যলক্ষণমাহ– অল্পেত্যাদি||৩১||

আতঙ্কদর্পণ ব্যাখ্যা (বাচস্পতি বৈদ্য কৃত)

উরঃক্ষতে সাধ্যযাপ্যাসাধ্যত্বমাহ– অল্পেত্যাদি| অল্পলিঙ্গস্য অল্পলক্ষণস্য||৩১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজরক্ষিতকৃতাযাং মধুকোশব্যাখ্যাযাং রাজযক্ষ্মক্ষতক্ষীণনিদানং সমাপ্তম্||১০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবৈদ্যবাচস্পতিকৃতে আতঙ্কদর্পণে নিদানব্যাখ্যানে রাজ্যক্ষ্মনিদানম্||১০||