৩৩. প্রমেহপ্রমেহপিডকানিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চন্দ্রোদযপ্রণযপীবরদুগ্ধসিন্ধুপূরভ্রমং বহতি যদ্গুণকীর্তিগুচ্ছঃ| তেন ব্যধাযি গুরুণা বিজযেন শিষ্যপ্রেম্ণাঽশ্মরীরুগবধের্মধুকোষবন্ধঃ||১|| শ্রীকণ্ঠদত্তভিষজা গুরুভক্তিলেশাদারভ্যতে প্রভৃতি সম্প্রতি মেহরোগাত্| সূক্তীর্বিচিন্ত্য মধুশীকরমুদ্গিরন্তীষ্টীকাকৃতঃ কতিপযস্য তদীযশেষঃ||২|| অশ্মরীরোগানন্তরং বস্তিবিকৃতিসাম্যাত্ প্রমেহনিদানমুচ্যতে– আস্যাসুখমিত্যাদি| আস্যা উপবিষ্টস্য চেষ্টোপরমঃ, তেন কৃতং সুখমাস্যাসুখম্; এবং স্বপ্নসুখমিতি দ্রষ্টব্যম্| তেনাসনাদিদোষাদাস্যাদুঃখং স্বপ্নদুঃখং বা ন প্রমেহহেতুঃ| গুডবৈকৃতমিতি গুডবিকারাঃ শর্করাদযঃ তথা গুডকৃতাশ্চ ভক্ষ্যাঃ| প্রমেহহেতুঃ কফকৃচ্চ সর্বমিত্যনুক্তহেতুসঙ্গ্রহার্থমুক্তম্| এষ সাধারণো হেতুঃ প্রমেহস্য; বিশেষহেতুস্তু চরকে নিদানস্থানে– ‘হাযনকোদ্দালক’ ইত্যাদিনা কফজস্য, ‘উষ্ণাম্ললবণ’ ইত্যাদিনা পিত্তজস্য, ‘কটুতিক্তকষায’ (চ. নি. অ. ৪) ইত্যাদিনা বাতজস্যাভিহিতঃ| এতেন সামান্যহেতুসহিতো বিশিষ্টহেতুঃ কফজাদিপ্রমেহস্য| কিঞ্চ কফজনিদানমপ্যেতদাস্যাসুখাদি বোদ্ধব্যম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

অশ্মরীরোগানন্তরং বস্তিবিকৃত্যধিকারাত্ প্রমেহনিদানমাহ– আস্যেত্যাদি| আসনমাস্যা উপবিষ্টস্য চেষ্টোপরমঃ, তেন কৃতং সুখম্, এবং স্বপ্নসুখং দ্রষ্টব্যম্| দধীনীতি বহুবচনাত্ সর্বজাতীনাং দধ্নাং নিষেধঃ| গ্রাম্যৌদকানূপরসাঃ রস্যন্ত ইতি রসাঃ; রসশব্দেন আহার উচ্যতে, কার্যে কারণোপচারাত্| কানি গ্রাম্যৌদকানি? মাংসানি; তত্র গ্রাম্যাঃ ছাগোরভ্রমেদঃপুচ্ছপ্রভৃতযঃ, ঔদকা মত্স্যকূর্মাদযঃ, আনূপাঃ জলসন্নিধিচারিণো হংসচক্রবাকাদযঃ, এবং মাংসানি; পযাংসি ক্ষীরাণি, অত্রাপি বহুবচনং দধিবত্| পানং নবাভিবৃষ্টজলপানম্| গুডবৈকৃতমিতি শর্করাদযো গুডবিকারা গুডকৃতভক্ষ্যাশ্চ, এতত্সর্বং প্রমেহহেতুঃ| কফকৃচ্চ সর্বমিতি আহারাচারাদিকং কফকারি; এষ সাধারণো হেতুঃ, প্রমেহস্য বিশিষ্টহেতুস্তু চরকে নিদানস্থানে– “হাযনকোদ্দালক” ইত্যাদিনা কফজস্য, “উষ্ণাম্ললবণ” ইত্যাদিনা পিত্তজস্য, “কটুতিক্তকষায” ইত্যাদিনা বাতজস্যাভিহিতঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফপিত্তবাতজমেহানাং ক্রমেণ সম্প্রাপ্তিমাহ– মেদ ইত্যাদিনা| অত্র কফজা এব মেহা ভূযস্ত্বেন সাধ্যত্বেন চ আদাবুচ্যন্তে| তানেবেতি মেদোমাংসশরীরজক্লেদান্| উষ্ণৈরিতি উষ্ণবীর্যস্পর্শৈর্দ্রব্যৈঃ| ক্ষীণেষু দোষেষ্বিতি প্রবৃদ্ধত্বেনৈব ক্ষীণেষু, ন তু সমানাপেক্ষযা ক্ষীণেষু; অনেন বৃদ্ধে কফে পিত্তে বা যো বাযুর্লঙ্ঘনাদিনা ক্রমেণ বৃদ্ধো ভবতি, স নেহাসাধ্যমেহচতুষ্টযপ্রকরণে বিবক্ষিত ইতি সূচ্যতে| তত্র হি চিকিত্সাবিধানাত্ সাধ্যত্বমস্তি| যদুক্তম্– “যা বাতমেহান্ প্রতি পূর্বমুক্তা বাতোল্বণানাং বিহিতা ক্রিযা সা| বাযুর্হি ধাতুষ্বতিকর্ষিতেষু কুপ্যত্যসাধ্যান্ প্রতি নাস্তি চিন্তা||” (চ. চি. অ. ৬) ইতি| দোষেষ্বিতি কফপিত্তেষু, দ্বযোশ্চ বহুবচনং ব্যক্ত্যপেক্ষযা বহুত্বাত্| অবকৃষ্যেতি বস্তিমুখং নীত্বা| ধাতূনিতি বসামজ্জৌজোলসীকাখ্যান্| সমক্রিযত্বাদিতি কফস্য দোষস্য দূষ্যস্য চ মেদঃপ্রভৃতেঃ সমানত্বাত্ কটুতিক্তাদিক্রিযাযাঃ| অত্র ব্যাধিমহিম্না তুল্যদূষ্যতা সাধ্যতাযা হেতুঃ| তেন “ন চ তুল্যগুণো দূষ্যো ন দোষঃ প্রকৃতির্ভবেত্|” (চ. সূ. অ. ১১) ইতি চরকবচনং কষ্টসাধ্যতার্থং নোদ্ভাবনীযম্| যদুক্তম্– “জ্বরে তুল্যর্তুদোষত্বং প্রমেহে তুল্যদূষ্যতা| রক্তগুল্মে পুরাণত্বং সুখসাধ্যস্য লক্ষণম্||” ইতি| বিষমক্রিযত্বাদিতি পিত্তস্য প্রমেহপ্রধানদূষ্যস্য চ মেদঃপ্রভৃতেশ্চান্যোন্যবিপরীতক্রিযত্বাত্; পিত্তহরং হি মধুরাদি মেদস্করং, মেদোহরং চ কটুকাদি পিত্তকরমিতি ক্রিযাবৈষম্যম্; অত্র ব্যাধিস্বভাবো হেতুঃ, তেনান্যেষু ব্যাধিষু পরস্পরবিরুদ্ধদোষদূষ্যসংসর্গেঽপ্যুভযপ্রত্যনীকভেষজবিধিরবিরোধীতি| মহাত্যযত্বাদিতি মজ্জাদিগম্ভীরধাত্বপকর্ষকত্বেন বহুব্যাপত্তিকরত্বাত্; আশুকারিত্বাদিতি ঈশানঃ| চকারাত্ বিষমক্রিযত্বং চ বাতজানাং সমুচ্চীযতে||২-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

কফপিত্তবাতমেহানাং ক্রমেণ সম্প্রাপ্তিমাহ– অত্র কফজা এব মেহা ভূযস্ত্বেন সাধ্যত্বেন চাদাবুচ্যন্তে| শরীরজং ক্লেদং বস্তিগতং বস্তিপ্রাপ্তং প্রদূষ্য শ্লৈষ্মিকান্ মেহান্ করোতি| যদুক্তম্– “মূত্রাঘাতাঃ প্রমেহাশ্চ শুক্রদোষাস্তথৈব চ| মূত্রদোষাশ্চ যে চাপি বস্তৌ চৈব ভবন্তি হি||” ইতি| উষ্ণৈরুষ্ণবীর্যস্পর্শৈর্দ্রব্যৈঃ, সমুদীর্ণবেগং পিত্তং তানেব মেদোমাংসশরীরক্লেদান্ বস্তিগতান্ প্রদূষ্য পৈত্তিকান্ মেহান্ করোতি| পিত্তপ্রমেহসম্প্রাপ্তিমুক্ত্বা বাতপ্রমেহসম্প্রাপ্তিমাহ– ক্ষীণেষ্বিত্যাদি| অনিলো দোষেষু ক্ষীণেষু বস্তৌ ধাতূনবকৃষ্য মেহান্ বাতজান্ কুরুতে| ধাতূন্ বসামজ্জৌজোলসীকাখ্যান্; অবকৃষ্য বস্তিমুখং নীত্বা| মেহানিতি বহুবচনং ব্যক্ত্যপেক্ষযা বহুত্বাত্| ক্রমেণ কফপিত্তবাতজানাং দূষ্যবর্গত্বেন সাধ্যাসাধ্যত্বমাহ– সাধ্যা ইত্যাদি| দোষদূষ্যাণাং সমক্রিযত্বাদিতি| অত্র দোষঃ শ্লেষ্মা, দূষ্যাণি রসমাংসমেদোমজ্জাশুক্রলসীকৌজাংসি; দোষস্য শ্লেষ্মণঃ, এষাং দূষ্যবর্গাণাং চ কটুতিক্তকষাযাদিভিঃ সমৈব ক্রিযা, অত এব কফজাঃ প্রমেহাঃ দশ সাধ্যাঃ; প্রমেহেন বিনা অন্যেষাং রোগাণামতুল্যদূষ্যত্বমেব সাধ্যত্বহেতুঃ| যদুক্তম্– “জ্বরে তুল্যর্তুদোষত্বং প্রমেহে তুল্যদূষ্যতা| রক্তগুল্মে পুরাণত্বং সুখসাধ্যস্যত্বহেতবঃ||” ইতি| দোষদূষ্যাণাং বিষমক্রিযত্বাদিতি| অত্র দোষঃ পিত্তং, দূষ্যাণি রসমাংসাদীনি; শীতমধুরাদিকা ক্রিযা পিত্তহন্ত্রী, সা রসমাংসমেদোজনযিত্রী; এতেন বিষমক্রিযত্বাত্ ষট্ পিত্তজা যাপ্যাঃ| মজ্জাদিগম্ভীরধাত্বকর্ষকত্বেন বহুব্যাপ্তিপরত্বাত্ আশুকারিত্বাত্ বাতজচতুষ্টযস্যাসাধ্যত্বং, মহাত্যযত্বাদ্বিনাশকারিত্বাত্| অপ্রবৃদ্ধে কফে পিত্তে বা বাযুর্বৃদ্ধো ভবতি, তত্র হি চিকিত্সাবিধানাদ্ বাতচতুষ্টযস্যাসাধ্যত্বমুক্তম্– “যা বাতমেহান্প্রতি পূর্বমুক্তা বাতোল্বণানাং বিহিতা ক্রিযা সা| বাযুর্হি মেহেষ্বতিকর্ষিতেষু কুপ্যত্যসাধ্যান্প্রতি নাস্তি চিন্তা||” ইতি||২-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বমেহানাং দোষদূষ্যসঙ্গ্রহমাহ– কফ ইত্যাদিনা| বসা মাংসস্নেহঃ, সর্বদেহস্নেহ ইত্যন্যে| লসীকা উদকবিশেষঃ| যথাহ চরকঃ– “যত্তু মাংসত্বগন্তরে উদকং তল্লসীকাশব্দং লভতে|” (চ. শা. অ. ৭) ইতি| রসৌজ ইতি রসশ্চ ওজশ্চ ইতি দ্বন্দ্বঃ| ওজশ্চাত্রার্ধাঞ্জলিপরিমিতং শ্লেষ্মরূপং; যদুক্তম্– “শ্লেষ্মলস্যৌজসোঽর্ধাঞ্জলিঃ পরিমাণম্|” (চ. শা. অ. ৭) ইতি; নত্বষ্টবিন্দ্বাত্মকং, তস্য ভ্রংশেন মরণাভিধানাত্| ননু, রস এবৌজো রসৌজ ইতি কুতো ন কল্প্যতে? রসোঽপ্যোজঃশব্দেনোচ্যতে; যদুক্তম্– “তস্মিন্ কালে পচত্যগ্নির্যদন্নং কোষ্ঠমাগতম্| মলীভবতি তত্ প্রাযঃ কল্পতে কিঞ্চিদোজসে||” (চ. চি. অ. ৮) ইতি; ওজসে ইতি রসাযেত্যর্থঃ| নৈবম্, ওজসো হি মধুমেহে দূষ্যত্বেনোক্তত্বাত্, ওজঃশব্দোপাদানবৈফল্যাচ্চ| যদ্যপ্যত্র বহূনি মেদঃপ্রভৃতীনি দূষ্যত্বেনোচ্যন্তে, তথাঽপি পূর্বং মেদোমাংসশরীরজক্লেদানাং সর্বমেহেষ্ববশ্যম্ভাবিদূষ্যত্বেন পৃথগভিধানম্| মজ্জাদযস্তু মেহবিশেষে দূষ্যাঃ| তদ্যথা– লসীকাবসামজ্জৌজাংসি বাতিকে, ন পৈত্তিকে, ন শ্লৈষ্মিকে| ঈশানঃ পুনরাহ– রসরক্তশুক্রাণি সর্বমেহেষু কদাচিত্ দুষ্যন্তে, ন ত্ববশ্যমিতি| কিঞ্চ সর্বমেহানামেব দোষত্রযজন্যত্বং সকলদূষ্যাশ্রযিত্বং চ ‘কফঃ সপিত্তঃ’ ইত্যাদিনোপদর্শ্যতে| মেদোমাংসাদীনি তু অত্যন্তদূষ্যোপদর্শনার্থং পৃথগুক্তানি| যতশ্চরকেঽপি কিযন্তঃশিরসীযাধ্যাযে সকলমেহবাচকমধুমেহকথনে দোষত্রযপ্রকোপোঽভিহিতঃ| তথাহি– “সমারুতস্য পিত্তস্য কফস্য চ মুহুর্মুহুঃ| দর্শযত্যাকৃতিং গত্বা ক্ষযমাপ্যায্যতে পুনঃ||” (চ. সূ. অ. ১৭) ইতি| তথা সুশ্রুতোঽপ্যাহ– “বাতপিত্তমেদোভিরন্বিতঃ শ্লেষ্মা মেহান্ জনযতি|” (সু. নি. অ. ৬) ইত্যাদি| কফাদীনাং দ্ব্যুল্বণাদিসংসর্গস্যানন্ত্যেন সর্বমেহাবস্থাবিশেষেণ মধুমেহেন চ সঙ্খ্যাধিক্যপ্রসঙ্গনিরাসাযাবধারণার্থমাহ– বিংশতিরেব মেহা ইতি||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

প্রমেহে দূষ্যবর্গমাহ– কফ ইত্যাদি| সর্বত্র মেহানামযং দোষদূষ্যসঙ্গ্রহঃ– ত্রযো দোষাঃ, অস্রং রক্তম্, অম্বু শরীরক্লেদঃ, বসা মাংসস্নেহঃ, লসীকা উদকবিশেষঃ, যদুক্তং চরকে– “যত্তু মাংসত্বগন্তরে উদকং, তল্লসীকাশব্দেন লভ্যতে|” যদুক্তমন্যত্রাপি– “তেজোভূতঃ পরং সূক্ষ্মঃ স রক্তরস উচ্যতে| ‘লসীকা’ নাম লভতে সামগন্ধিস্ত্বগাশ্রিতঃ||” ইতি| রসশ্চ ওজশ্চ রসৌজ ইতি দ্বন্দ্বঃ| ওজশ্চাত্রার্ধাঞ্জলিপরিমিতং শ্লেষ্মরূপম্| যদুক্তং “শ্লেষ্মরূপস্যৌজসোঽর্ধাঞ্জলিঃ পরিমাণম্|” ইতি| ন ত্বষ্টবিন্দুকম্, তস্য ভ্রংশেন নিযতং মরণমিতি| কফাদীনাং সংসর্গস্যানন্ত্যেন তথা সর্বমেহাবস্থাবিশেষেণ মধুমেহেন সঙ্খ্যাধিক্যপ্রসঙ্গনিরাসাযাবধারণমাহ– বিংশতিরেব মেহা ইতি| তন্ত্রান্তরেঽপি দূষ্যসঙ্গ্রহ উক্তঃ– “ বসা মাংসং শরীরস্য ক্লেদঃ শুক্রং সশোণিতম্| মেদো মজ্জা লসীকৌজঃ প্রমেহে দূষ্যসঙ্গ্রহঃ||” ইতি||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– দন্তাদীনামিত্যাদি| আদিশব্দেন নযনতালুকর্ণাদীনাং গ্রহণম্| যদুক্তং সুশ্রুতে– ‘তালুগলজিহ্বাদন্তেষু মলোত্পত্তিঃ|’ (সু. নি. অ. ৬) ইতি| অত্র চ মলভূযস্ত্বং মেদোদোষাত্| চিক্কণতা দেহে মেদঃকফদুষ্টেঃ| অত্র চকারাত্ সুশ্রুতোক্তকেশজটিলীভাবনখাতিবৃদ্ধী বোধ্যে| এতচ্চ ব্যাধিবিশেষনিযতমেব, যেনান্যত্র, বিদ্যমানাঽপি কফমেদোদুষ্টিঃ নৈবং কর্তুং ক্ষমা||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– দন্তাদীনামিত্যাদি| আদিশব্দেন তাল্বাদীনাং গ্রহণম্| যদুক্তং সুশ্রুতে– “তালুগলজিহ্বাদন্তেষু মলোত্পত্তিঃ|” (সু. নি. স্থা. অ. ৬) ইতি| অত্র মলভূযস্ত্বং মেদোদোষাত্| হস্তপাদযোঃ সন্তাপঃ, চিক্কণতা দেহে মেদঃকফদুষ্টেঃ| স্বাদ্বাস্যং মধুরাস্যতা, চকারাত্ সুশ্রুতোক্তকেশজটিলীভাবনখবৃদ্ধী বোধ্যে| এতচ্চ ব্যাধিমহিম্না বোদ্ধব্যম্, অন্যথা কফমেদোদুষ্টিরেবং কর্তুং ন ক্ষমা||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সামান্যলক্ষণমাহ– সামান্যমিত্যাদি| প্রভূতেত্যাদি প্রভূতমূত্রত্বং দূষ্যদ্রবধাতুসম্বন্ধাত্ আবিলত্বং দোষদূষ্যসংসর্গাত্| ননু, কথং কফেন দশ, পিত্তেন ষডিত্যাদিব্যবস্থা? যতঃ কারণভেদাত্ কার্যভেদ ইত্যাশঙ্ক্যাহ– দোষদূষ্যাবিশেষেঽপি তত্সংযোগবিশেষত ইতি| তেষাং দোষদূষ্যাণামুত্কর্ষাপকর্ষকৃতাত্ সংযোগভেদাদ্ভেদো মেহেষু ভবতি| যথা– পঞ্চানাং বর্ণানাং শ্বেতকৃষ্ণপীতলোহিতশ্যাবানাং সংযোগভেদাদনেকপিঙ্গলপাটলাদিভেদাঃ| সুশ্রুতেঽপ্যুক্তম্– “যথা পঞ্চানাং বর্ণানামুত্কর্ষাপকর্ষকৃতেন সংযোগবিশেষেণ কপিলাদিনানাবর্ণোত্পত্তিরেবং দোষাদিসংসর্গান্মেহানাং নানাত্বম্|” (সু. নি. অ. ৬) ইতি| সংযোগভেদপ্রতীতিঃ কুত ইত্যত আহ– মূত্রেত্যাদি| মূত্রবর্ণাদিভেদং দৃষ্ট্বা কারণানাং সমানানাং ভেদঃ কল্পনীযঃ, যথা– মৃদাদিকারণকলাপস্যাভেদেঽপি কুম্ভকারাদিসংযোগভেদাদুদঞ্চনাদিপ্রপঞ্চভেদঃ| ননু, উদঞ্চনাদৌ কুম্ভকারাদিপ্রযত্নভেদাত্ সংযোগভেদঃ, অত্র তু কঃ সংযোগভেদহেতুঃ? উচ্যতে– তত্তদাহারাদিকমদৃষ্টং চ ভবতীত্যদোষঃ||৬||–

আতঙ্কদর্পণ ব্যাখ্যা (বাচস্পতি বৈদ্য কৃত)

সামান্যলক্ষণমাহ– সামান্যমিত্যাদি| প্রভূতমূত্রং দূষ্যদ্রবধাতুসম্বন্ধাত্, আবিলমূত্রত্বং দোষদূষ্যসংসর্গাত্| ননু, কথং কফেন দশ, পিত্তেন ষট্ ইত্যাদিব্যবস্থা? যতঃ কারণভেদাত্ কার্যভেদ ইত্যাশঙ্ক্যাহ– দোষেত্যাদি| দোষদূষ্যযোরবিশেষেঽপি তত্সংযোগবিশেষতঃ, তেষাং দোষদূষ্যাণামুত্কর্ষাপকর্ষকৃতাত্ সংযোগভেদাত্ মেহেষু ভেদো ভবতি| দশ ষট্ চত্বার ইত্যাদিকা| দোষা বাতাদযঃ, দূষ্যা মেদোমজ্জাদিকাঃ, যথা পঞ্চানাং শ্বেতপীতকৃষ্ণলোহিতশ্যামবর্ণানাং সংযোগভেদাত্ অনেকপিঙ্গলাদিভেদো জাযতে| যদুক্তং সুশ্রুতে– “যথা পঞ্চানাং বর্ণানামুত্কর্ষাপকর্ষকৃতেন সংযোগবিশেষেণ কপিলাদিনানাবর্ণোত্পত্তিরেবং দোষদূষ্যসংযোগান্মেহানাং নানাত্বম্|” ইতি| মূত্রবর্ণাদিভেদেন মূত্রবর্ণাদিভেদং দৃষ্ট্বা কারণানাং সমানানাং ভেদঃ কল্পনীযঃ, যথা মৃত্পাত্রাণাং মৃদাদিকারণকলাপস্যাভেদেঽপি কুম্ভকারাদিসংযোগাত্ ঘটস্থাল্যাদিপ্রপঞ্চভেদঃ||৬||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অত্র কফস্য শ্বেতশীতমূর্তপিচ্ছিলাচ্ছস্নিগ্ধগুরুমধুরসান্দ্রপ্রসাদমন্দেষু গুণেষু মধ্যে কুত্রচিত্ কিঞ্চিদ্গুণপ্রকর্ষাদুদকমেহাদযো দশ দৃশ্যন্ত ইত্যাহ– অচ্ছমিত্যাদি| সান্দ্রপ্রসাদস্তু এক এব গুণো গণনীযঃ, সান্দ্রমেহব্যপদেশস্ত্বেকদেশেন ভবিষ্যতীতি| এতৈশ্চ শ্বেতাদিভির্গুণৈর্ব্যস্তৈঃ সমস্তৈশ্চ যোগাদ্দশ মেহা ন তু যথাক্রমং, “যেন গুণেনৈকেনানেকেন বা ভূযস্তরমুপসৃজ্যতে তত্সমাখ্যং গৌণং নামবিশেষং প্রাপ্নোতি|” (চ. নি. অ. ৪) ইতি চরকবচনাত্| নচ যথা দশভির্গুণৈর্দশ মেহান্ করোতি তথা সংসর্গবিকল্পান্তরেণাপরানপি কুতো ন করোতীত্যাশঙ্কনীযং, ভাবস্বভাবস্যাপর্যনুযোজ্যত্বাত্, অদৃষ্টকল্পনাযাশ্চানর্হত্বাত্| তত্র শ্বেতাচ্ছশীতৈর্গুণৈরুদকমেহঃ; মধুরশীতাভ্যামিক্ষুমেহঃ; সান্দ্রপিচ্ছিলাভ্যাং সান্দ্রমেহঃ; অচ্ছেন পিত্তানুরাগিণা সুরামেহঃ; শুক্লেন পিষ্টমেহঃ, অত্র পিষ্টবদিত্যালেপনপিষ্টবত্; শ্বেতস্নিগ্ধাভ্যাং শুক্রমেহঃ; অত্র শুক্রাভমিতি সর্বমেব মূত্রং শুক্রতুল্যং, শুক্রমিশ্রং বেতি শুক্রাভশুক্রমিশ্রং; বাস্তবশুক্রমিশ্রত্বে তু কফজস্যাপ্যসাধ্যত্বং স্যাদিতি; বাপ্যচন্দ্রস্তু শুক্রস্য মূত্রেণ গুণকৃতং সাদৃশ্যং, শুক্রমিশ্রং বেতি চ শুক্রগুণানাং সংযুক্তসমবাযাত্ মূত্রে দর্শনমিত্যাহ; সান্দ্রমূর্তাভ্যাং সিকতামেহঃ, অত্র মূর্তাণূনিতি মূর্তান্ কঠিনান্, অণূন্ অল্পান্; মলানিতি বহুবচনং দোষাণামবযববহুত্বাত্, জাত্যাখ্যাযামেকস্মিন্ বহুবচনমিতি বাপ্যচন্দ্রঃ, মলোঽত্র প্রকরণাত্ কফঃ; গুরুমধুরশীতৈঃ শীতমেহঃ; মন্দমূর্তাভ্যাং শনৈর্মেহঃ; পিচ্ছিলেন লালামেহঃ| চরকে সুরামেহস্থানে সান্দ্রপ্রসাদমেহঃ পঠিতঃ, তথা পিষ্টমেহঃ শুক্লমেহশব্দেন, তেনৈব শীতমেহলালামেহৌ পঠিতৌ, পিত্তজশ্চ কালমেহঃ; সুশ্রুতস্তু চরকোক্তশীতমেহলালামেহযোঃ স্থানে ফেনমেহলবণমেহৌ, কালমেহস্থানে চাম্লমেহং পঠিতবান্| সামঞ্জস্যং চাত্র নাস্ত্যেব, পরস্পরলক্ষণসংবাদাভাবাত্. স্মৃতির্দ্বৈধবত্ সর্বং প্রমাণম্||৭-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

তত্র কফস্য শ্বেতমৃদুপিচ্ছিলস্নিগ্ধগুরুমধুরসান্দ্রপ্রসাদমন্দেষু গুণেষু মধ্যে ক্বচিত্ কিঞ্চিদ্গণপ্রকর্ষাত্ উদকমেহাদযো দশ স্যুস্তান্ কফজানাহ– তত্রাদাবুদকমেহমাহ– অচ্ছমিত্যাদি| আবিলং ঘনম্| শেষং সুগমম্| ইক্ষুমেহমাহ– ইক্ষোরিত্যাদি| সুগমম্| সান্দ্রমেহমাহ– সান্দ্রীভবেদিত্যাদি| পর্যুষিতং রাত্রৌ পাত্রে স্থাপিতম্| সুরামেহমাহ– উপরি অচ্ছম্ অধো ঘনম্| পিষ্টমেহমাহ– সংহৃষ্টেত্যাদি| তণ্ডুলাদিকৃতালেপনপিষ্টবত্| সংহৃষ্টরোমা রোমাঞ্চিতশরীরঃ| পিষ্টমিত্যনেন শ্বেতত্বং, শ্লেষ্মণঃ শ্বেতত্বাত্| শুক্রমেহমাহ– শুক্রাভমিত্যাদি| শুক্রেণ মিশ্রিতং শুক্রমিশ্রিতং; শুক্রাভমিতি শুক্রসদৃশং, ন তু বাস্তবং শুক্রং, তস্যাসাধ্যত্বপ্রসঙ্গঃ| সিকতামেহমাহ– মূর্তাণূনিতি| কঠিনানল্পান্| মলানিতি বহুবচনং দোষাবযববহুত্বাদিতি বাপ্যচন্দ্রঃ| মলোঽত্র প্রকরণাত্ কফঃ, সিকতা বালুকা| শীতমেহমাহ– শীতমেহীতি| অতিশীতলম্| শনৈর্মেহমাহ– মন্দশব্দেন শ্লেষ্মৈবোচ্যতে, মধুরত্বান্মূত্রং মন্দেন বেগেন শনৈঃ প্রমেহতি| লালাপ্রমেহমাহ– লালেত্যাদি| এবং দশ শ্লেষ্মণঃ| এতে দোষদূষ্যসংযোগগুণাত্ বিংশতিসঙ্খ্যাং লভন্তে| উক্তং চ তন্ত্রান্তরে– “শীতাচ্ছশীতৈরুদকপ্রমেহঃ স্যাদিক্ষুবালী মধুরাচ্ছশীতাত্| পিত্তোত্কটঃ স্বচ্ছগুণাত্সুরাখ্যো মূত্রেণ যুক্তঃ সিকতাপ্রমেহঃ| মন্দেন মূত্রেণ শনৈঃ প্রমেহো গুরোর্বিদগ্ধাল্লবণপ্রমেহঃ| পিষ্টপ্রমেহঃ খলু শুক্রভাগাত্সমস্তসান্দ্রেণ তু সান্দ্রমেহঃ| স্নিগ্ধেন শুক্রেণ চ শুক্রমেহঃ স্যাত্ফেনমেহো গুরুশুক্রযোগাত্| ইত্যেভিরংশৈঃ কফদোষজাতৈর্নৃণাং প্রমেহা দশ সম্ভবন্তি| ঔত্কট্যতোঽযং ব্যপদেশ এষু সংসর্গভাবো গুণদোষদূষ্যাত্| পিত্তান্নীলহরিদ্রাম্লক্ষারমাঞ্জিষ্ঠশোণিতৈঃ| সর্পির্মেহং মরুত্কুর্যাদ্যুক্তশ্চ লবণেন হি| মেদোযুক্তো বসাযুক্তো বসামেহকরস্তু সঃ| ক্ষৌদ্রমেহে রৌক্ষ্যগুণাদ্বিষ্টম্ভো হস্তিমেহতঃ||” ইতি||৭-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তাত্তু ষড্ভিঃ পিত্তগুণৈঃ ক্ষারনীলকালপীতলোহিতবিস্রৈর্যথাক্রমং ক্ষারমেহাদযঃ ষট্, তান্ গন্ধবর্ণরসস্পর্শৈরিত্যাদিনা দর্শযতি– গন্ধেত্যাদি| নীলাভমিতি চাসপক্ষপ্রভং, চাসঃ ‘স্বর্ণচূড’ ইতি লোকে খ্যাতঃ; ক্বচিত্ ‘টাক্সনা চাসঃ’ ইতি গদাধরঃ, তত্পক্ষশ্চ স্নিগ্ধনীলো ভবতি| দহদিতি মূত্রবিশেষণম্| ‘দহন্’ ইতি পাঠান্তরে দাহমনুভবন্ পুরুষঃ||১৩-১৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকানাহ– তত্র ক্ষারপ্রমেহমাহ– গন্ধেত্যাদি| গন্ধাদিভিঃ ক্ষারতোযবত্ ক্ষারমেহেন| নীলমেহমাহ– নীলেত্যাদি| নীলাভং চাষপক্ষপ্রতিমং, চাষঃ পক্ষিবিশেষঃ, ‘সুবর্ণচূড’ ইতি লোকে| কালমেহমাহ– কালেত্যাদি| সুগমম্| হরিদ্রামেহমাহ– হারিদ্রেত্যাদি| দহদিতি মূত্রবিশেষণং, ‘দহন্’ ইতি পাঠান্তরে দাহমনুভবন্ ‘পুরুষঃ’ ইতি শেষঃ| মাঞ্জিষ্ঠমেহমাহ– বিস্রং বিস্রগন্ধি| রক্তমেহমাহ– বিস্রমিত্যাদি| সুগমম্| এবং ষট্ পৈত্তিকাঃ সর্বেষাং মূত্রং যোজ্যম্||১৩-১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতেন যথাক্রমং বসামজ্জৌজোলসীকাভির্যথাক্রমং বসামেহাদযঃ; তানাহ– বসেত্যাদি| অযং বসামেহঃ সুশ্রুতে সর্পির্মেহনাম্না, ক্ষৌদ্রমেহশ্চরকে মধুমেহনাম্না পঠিতঃ||১৫-১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ চতুর্ণাং বাতজানাং লক্ষণম্| বসামেহমাহ– বসা মাংসস্নেহঃ, বসামিশ্রং বসামিলিতং, বসাভং বসাতুল্যং, মুহুর্মূত্রযেত্| মজ্জমেহমাহ– মজ্জাভমিত্যাদি| সুশ্রুতেঽযং সর্পির্মেহনাম্না পঠিতঃ, শেষং পূর্ববত্ ব্যাখ্যেযম্| ক্ষৌদ্রমেহমাহ– কষাযমিত্যাদি| সুগমম্| হস্তিমেহমাহ– হস্তীত্যাদি| অজস্রমনবরতং, বেগবিবর্জিতং বেগরহিতং, সলসীকং লসীকযা সহ, বিবদ্ধং পিণ্ডীভূতমিব||১৫-১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইদানীং কফজাদিমেহানাং কৃচ্ছ্রসাধ্যত্বমসাধ্যত্বং চ জ্ঞাপযিতুং ভেদেনোপদ্রবানাহ– অবিপাকোঽরুচিরিত্যাদি| কফজে কাস আর্দ্রঃ, বাতজে শুষ্কঃ| তোদঃ সংসর্গিবাতজন্যঃ, মেহানাং ত্রিদোষজন্যত্বাত্| মুষ্কাবদরণং পাকেন| অম্লিকা অম্লোদ্গারঃ| লোলতা সর্বরসভক্ষণেচ্ছা, ইযং তু প্রভাবাত্ ধাতুক্ষযাদ্বা ভবতি; যথা বাতগ্রহণ্যাং ‘গৃদ্ধিঃ সর্বরসানাম্’ ইত্যুক্তম্||১৮-২০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীমুপদ্রবানাহ– অবিপাক ইত্যাদি| কফজে কাস আর্দ্রঃ, বাতজে শুষ্কঃ, সপীনসঃ প্রতিশ্যাযযুক্তঃ, এতে কফজানামুপদ্রবাঃ| পিত্তজানামুপদ্রবানাহ– বস্তীত্যাদি| বস্তিঃ মূত্রাশযঃ, মেহনং মেঢ্রং, শূলং তোদঃ সংসর্গিবাতজন্যঃ, মেহানাং ত্রিদোষজন্যত্বাত্, মুষ্কাবদরণং পাকেন, অম্লিকা অম্লোদ্গারঃ, বিড্ভেদঃ ভিন্নপুরীষতা| বাতজানামুপদ্রবানাহ– বাতজানামিত্যাদি| লোলতা সর্বরসভক্ষণেচ্ছা, অযং চ প্রভাবো রোগস্য, অথবা ধাতুক্ষযাদ্ভবতি, যথা বাতগ্রহণ্যাং ‘গৃদ্ধিঃ সর্বরসানাম্’ ইত্যুক্তং; শূলং বস্তিমেহনযোরেব, কাসোঽত্র শুষ্কঃ||১৮-২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যতামাহ– যথোক্তোপদ্রবাবিষ্টমিত্যাদি| উক্তৈরবিপাকাদিভিরন্যৈশ্চ সুশ্রুতাদ্যুক্তৈরুপদ্রবৈঃ; তদ্যথা– কফজে আলস্যাস্যোপদেহশৈথিল্যকফপ্রসেকমক্ষিকোপসর্পণাদিকং, পিত্তজে পাণ্ডুরোগাদিকম্| অতিপ্রস্রুতমিতি অতিশযং ধাতুমূত্রস্রাবযুক্তম্| পিডকাপীডিতমিতি শরাবিকাদিপিডকাপীডিতম্| গাঢঃ কালপ্রকর্ষাত্| যদ্যপি পিডকা অপ্যুপদ্রবত্বেনাভিমতাঃ; যদুক্তং চরকে– “উপদ্রবাস্তু খলু প্রমেহিণাং তৃষ্ণাতীসারজ্বরদাহদৌর্বল্যারোচকাবিপাকাঃ পূতিমাংসপিডকালজীবিদ্রধ্যাদযঃ|” (চ. নি. অ. ৪) ইতি, তথাঽপি পিডকানাং পৃথগুত্পাদসূচনার্থং পৃথক্করণম্| উক্তং চ চরকে– “বিনা প্রমেহমপ্যেতা জাযন্তে দুষ্টমেদসঃ|” (চ. সূ. অ. ১৭) ইতি| অন্যদপি অসাধ্যলক্ষণং বোদ্ধব্যম্| যদাহ চরকঃ– “সপূর্বরূপাঃ কফপিত্তমেহাঃ ক্রমেণ যে বাতকৃতাশ্চ মেহাঃ| সাধ্যা ন তে, পিত্তকৃতাস্তু যাপ্যাঃ, সাধ্যাস্তু মেদো যদি ন প্রদুষ্টম্||” (চ. চি. অ. ৬) ইতি| অস্যার্থঃ– যে কফজাঃ সাধ্যাস্তে সপূর্বরূপাঃ সন্তোঽসাধ্যাঃ, পিত্তকৃতাস্তু যাপ্যা যে তে সপূর্বরূপা এব অসাধ্যাঃ প্রত্যাখ্যেযাঃ| সর্বরোগাণামেব যদ্যপি পূর্বরূপানুবৃত্তৌ অসাধ্যত্বমুক্তং, তথাঽপ্যত্রাসকলপূর্বরূপান্বযে অসাধ্যত্বম্, অন্যত্র তু সকলপূর্বরূপান্বযে সতীতি বিশেষঃ| ক্রমেণেতি স্বনিদানক্রমেণ| তেন নিজহেত্বাদিকৃতা যে বাতজাশ্চত্বারো মেহাস্তে পূর্বরূপরহিতা অপি নহি সাধ্যাঃ, যে তু পশ্চাত্ ধাত্বপকর্ষণাদ্বাতানুবন্ধেন বাতজাস্তে সাধ্যাঃ যাপ্যা বা| অত এবোক্তম্– “যা বাতমেহান্ প্রতি পূর্বমুক্তা বাতোল্বণানাং বিহিতা ক্রিযা সা” (চ. চি. অ. ৬) ইত্যাদি||২১||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যতামাহ– যথেত্যাদি| উক্তোপদ্রবৈরপাকাদিভিরন্যৈশ্চ সুশ্রুতোক্তৈঃ– “আলস্যাস্যোপদেহশৈথিল্যকফপ্রসেকমক্ষিকোপসর্পণাদিভিঃ যুক্তমতিপ্রস্রুতমতিশযং ধাতুমূত্রস্রাবযুক্তম্|” ইত্যাদিভিঃ পিডকাপীডিতং শরাবিকাদিপিডকাপীডিতং, গাঢং কালপ্রকর্ষাত্||২১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যতাযাঃ প্রকারান্তরমাহ– জাত ইত্যাদি| শ্লেষ্মমেদসোরতিদুষ্ট্যা মূত্রমেদঃশ্লেষ্মণামতিমাধুর্যাত্ মধুমেহিনো জাতো যঃ প্রমেহী স চাপ্যসাধ্যো ভবতীতি| বীজদোষাদিতি প্রমেহারম্ভকদোষদুষ্টবীজজাতপ্রমেহিত্বাত্| মধুমেহশব্দেন চাত্র মেহমাত্রমুচ্যতে, যদি তু বাতিক উপেক্ষিতো বা মেহো মধুমেহ উচ্যতে, তদা চেতরপ্রমেহযুক্তমাতৃপিতৃজনিতপ্রমেহিণো নাসাধ্যত্বমুক্তং স্যাত্; কিঞ্চ মধুমেহিনা জনিতস্য মধুমেহিত্বমেব কারণানুরূপতযা যুক্তং ততশ্চ মধুমেহী মধুমেহিনা বা জাতো ন সাধ্য ইতি বক্তুমুচিতং; তস্যাসাধ্যত্বমপি ন বক্তব্যং, মধুমেহস্যাসাধ্যত্বাদেব| অন্যত্রাপি মধুমেহশব্দেন মেহমাত্রমুক্তম্| যথা– “ গুল্মী চ মধুমেহী চ রাজযক্ষ্মী চ যো নরঃ| অচিকিত্স্যা ভবন্ত্যেতে বলমাংসপরিক্ষযাত্|” (চ. ই. অ. ৯) ইতি| যদি হ্যত্র মধুমেহোঽভীষ্টঃ স্যাত্তদা বলমাংসপরিক্ষযাদিতি ন কৃতং স্যাত্, তস্য স্বরূপত এবাসাধ্যত্বাত্| যথা কিযন্তঃশিরসীযাধ্যাযে “উপেক্ষযাঽস্য জাযন্তে পিডকা মধুমেহিকাঃ|” (চ. সূ. অ. ১৭) ইত্যাদিনা যা মধুমেহসম্বন্ধিত্বেনোক্তাস্তা এব “প্রমেহিণাং যাঃ পিডকা মযোক্তাঃ” (চ. চি. অ. ৬) ইত্যন্তেন চ চিকিত্সাস্থানে প্রমেহিমাত্রসম্বন্ধিতযা অনূদ্য চিকিত্সাযাং সংযোজিতাঃ| তস্মাদ্ভাবিনীং মধুমেহতামাশ্রিত্য সর্ব এব মেহা মধুমেহশব্দবাচ্যাঃ| উক্তং হি বাগ্ভটে– “মধুরং যচ্চ মেহেষু প্রাযো মধ্বিব মেহতি| সর্বেঽপি মধুমেহাখ্যা মাধুর্যাচ্চ তনোরতঃ||” (বা. নি. অ. ১০) ইতি| গদাধরেণ তু পিডকাসম্বন্ধেনৈব মধুমেহত্বমুক্তং, যতশ্চরকে কিযন্তঃশিরসীযাধ্যাযে (চ. সূ. অ. ১৭) মধুমেহমভিধায পিডকা উক্তা ইতি| তন্ন মনোহরং, তত্র মধুমেহশব্দেন প্রমেহমাত্রাভিধানাত্| যদি তু মধুমেহ এবাভীষ্টঃ স্যাত্, তদা “উপেক্ষযাঽস্য জাযন্তে” ইতি উপেক্ষণাভিধানমনুপপন্নং স্যাত্, পিডকানাং চ মধুমেহভবানাং চিকিত্সোপদেশো ব্যর্থঃ স্যাদিতি| কুলজমেহস্যাসাধ্যতাপ্রসঙ্গেনাপরেষামপি কুলজানামসাধ্যত্বমাহ– যে চাপীত্যাদি| কেচিদিতি কুষ্ঠাদযঃ| কুলজা ইতি পিতৃপিতামহাদিসম্ভূতাঃ| এতেন প্রমেহিপিতৃপিতামহমাতামহস্যাপি প্রমেহমসাধ্যং দর্শযতি| ননু, যস্য পিতামহঃ প্রমেহী তস্য পিতাঽপি প্রমেহী, প্রমেহিজাতত্বাত্; তথাচ সতি “জাতঃ প্রমেহী মধুমেহিনো বা ন সাধ্য উক্তঃ স হি বীজদোষাত্|” ইত্যনেনৈব গতার্থম্| নৈবং, ন হি প্রমেহিণো জাত ইত্যেতাবতা উত্পন্নমাত্র এব প্রমেহী ভবতি, কিং তর্হি কালবশেন দুষ্টেরভিব্যক্ত্যা; যথা– কুষ্ঠিজাতস্য কুষ্ঠম্; এতেন যদা অনতিদুষ্টবীজেন প্রমেহিজাতেন পিত্রা জন্যতে পুরুষঃ প্রমেহী সোঽপ্যসাধ্য ইতি| কুলজা ইত্যনেনৈব মেহস্যাপ্যসাধ্যতাযাং লব্ধতাযাং পুনস্তদ্বচনং প্রমেহিণাং প্রাযেণ সন্তানানুবন্ধিত্বপ্রদর্শনার্থম্| উক্তং চ– ‘ প্রমেহোঽনুষঙ্গিণাম্’ (চ. সূ. অ. ২৫) ইতি||২২||

আতঙ্কদর্পণ ব্যাখ্যা (বাচস্পতি বৈদ্য কৃত)

প্রকারান্তরেণাসাধ্যত্বমাহ– জাত ইত্যাদি| মধুমেহিনো জাতো জনিতো যঃ পুরুষঃ প্রমেহী, স চাসাধ্যো ভবতি; বীজদোষাদিতি মেহারম্ভকদোষদুষ্টবীজজাতমধুমেহত্বাত্, মধুমেহশব্দেন চাত্র মেহমাত্রমুচ্যতে; যদি তু বাতিক উপেক্ষিতো বা মেহো মধুমেহ উচ্যতে, তদা ইতরমেহযুক্তমাতাপিতৃজনিতপ্রমেহিণাং নাসাধ্যত্বমুক্তং স্যাত্; মধুমেহিজনিতস্য মধুমেহিত্বমেব কারণানুরূপতযা যুক্তং, ততশ্চ মধুপ্রমেহী মধুমেহিনা বা জাতো ন সাধ্য ইতি বক্তুমুচিতং; তস্যাসাধ্যত্বমপি ন বক্তব্যং, মধুমেহস্যাসাধ্যত্বাত্| অন্যত্রাপি মধুমেহশব্দেন মেহমাত্রমুক্তম্| তথা চ– “কুষ্ঠী চ মধুমেহী চ রাজযক্ষ্মী চ যো নরঃ| অচিকিত্স্যা ভবন্ত্যেব বলমাংসপরিক্ষযাত্||” ইতি| যদ্যত্র মধুমেহোঽভীষ্টঃ স্যাত্, তদা বলমাংসপরিক্ষযাদিতি ন কৃতং স্যাত্, তস্য স্বরূপত এবাসাধ্যত্বাত্| তথা চ সুশ্রুতে– “মধুরং যচ্চ মেহেষু প্রাযো মধ্বিব মেহতি| সর্বেঽপি মধুমেহাখ্যা মাধুর্যাচ্চ তনোরতঃ||” ইতি| যে চাপি কেচিত্কুলজা ইতি কেচিদিতি পিতৃপিতামহাদিসম্ভূতাঃ কুষ্ঠাদযঃ||২২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উপেক্ষযা হি পিত্তকফজানামপি মধুমেহত্বং প্রদর্শযিতুমাহ– সর্ব এবেত্যাদি| ধাতুক্ষযাবরণাভ্যাং কুপিতবাতেন মধুমেহসম্ভবমাহ– মধুমেহ ইত্যাদি| মধুসমমিতি ‘মূত্রম্’ ইতি শেষঃ| স ইতি মধুমেহঃ| সাবরণলিঙ্গমাহ– আবৃত ইত্যাদি| আবৃত ইতি আবৃতবাতকৃতঃ| দোষলিঙ্গানীতি যেন পিত্তাদিনা আবৃতস্তস্য বাতস্য চ লিঙ্গানি প্রদর্শযতি| অনিমিত্তম্ অকস্মাত্| ক্ষীণঃ ক্ষণাত্ ক্ষণাত্ পূর্ণ ইতি আবরণেন পুনঃ পূর্ণো ভবন্ কৃচ্ছ্রসাধ্যো ভবতি| তথাচ চরকঃ– “সমারুতস্য পিত্তস্য কফস্য চ মুহুর্মুহুঃ| দর্শযত্যাকৃতিং গত্বা ক্ষযমাপ্যায্যতে পুনঃ||” (চ. সূ. অ. ১৭) ইতি| ধাতুক্ষযকুপিতবাতজস্য তু কেবলবাতজমেব লিঙ্গম্| গদাধরস্ত্বাহ– মধুমেহঃ সাবরণবাযুনৈব ক্রিযতে| যদাহ চরকঃ– “তৈরাবৃতগতির্বাযুরোজ আদায গচ্ছতি| যদা বস্তিং তদা কৃচ্ছ্রো মধুমেহঃ প্রবর্ততে||” (চ. সূ. অ. ১৭) ইতি| কেবলবাতজেষু তু কষাযাদিবমনাদ্যতিযোগাদিকৃতেষু ধাতুক্ষযজেষু বাযোরাবরণং নাস্তীতি ভেদঃ||২৩-২৫||

আতঙ্কদর্পণ ব্যাখ্যা (বাচস্পতি বৈদ্য কৃত)

উপেক্ষযা পিত্তকফজানামপি মধুমেহিত্বং দর্শযন্নাহ– সর্ব ইত্যাদি| সর্ব এব প্রমেহাঃ অপ্রতিকারিণঃ প্রতীকারমকুর্বতঃ পুংসঃ কালেন মধুমেহত্বমাযান্তি, তদা অসাধ্যা ভবন্তি| ধাতুক্ষযাবরণাভ্যাং কুপিতবাতেন মধুমেহসম্ভবমাহ– মধ্বিত্যাদি মধুমেহসমমিতি ‘মূত্রম্’ ইতি শেষঃ| স চ দ্বিধা ভবতি, একো ধাতুক্ষযাত্ কুপিতবাযৌ, ধাতুক্ষযকুপিতবাতজস্য তু মধুমেহস্য কেবলবাতমেহলিঙ্গং; যদুক্তম্– “কৃত্স্নং শরীরং নিষ্পীড্য মেদোমজ্জবসাযুতঃ| অধঃ প্রক্রমতে বাযুস্তেনাসাধ্যাস্তু বাতজাঃ||” ইতি; অপরস্তু দোষৈরাবৃতপথে| গদাধরস্তু– মধুমেহঃ সাবরণেন বাযুনা ক্রিযতে| যদুক্তং চরকে– “ তৈরাবৃতগতির্বাযুরোজ আদায গচ্ছতি| যদা বস্তিং তদা কৃচ্ছ্রো মধুমেহঃ প্রবর্ততে||” ইতি| কেবলবাতজেষু তু কষাযাদিবমনাদ্যতিযোগাদ্ধাতুক্ষযে বাযোরাবরণং নাস্তীতি ভেদঃ| সাবরণলিঙ্গমাহ– আবৃত ইত্যাদি| যেন পিত্তাদিনা দোষেণাবৃতশ্চ ভবতি তস্য লিঙ্গং লক্ষণং দর্শযন্, অনিমিত্তমকস্মাত্ ক্ষীণঃ, ক্ষণাত্ পুনঃ আবরণে সতি পূর্ণো ভবেত্, স কৃচ্ছ্রসাধ্যো ভবতি| উক্তং চরকে– “সমারুতস্য পিত্তস্য কফস্য চ মুহুর্মুহুঃ| দর্শযত্যাকৃতিং গত্বা ক্ষযমাপাদ্যতে পুনঃ||” ইতি||২৩-২৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মধুমেহশব্দপ্রবৃত্তৌ নিমিত্তমাহ– মধুরং যচ্চ মেহেষ্বিত্যাদি||২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

মধুমেহশব্দপ্রবৃত্তৌ নিমিত্তমাহ– মধুরমিত্যাদি| শরীরস্য মাধুর্যাদতঃ সর্ব এব প্রমেহা মধুমেহাখ্যাং লভন্তে| শেষং সুগমম্||২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রমেহোপেক্ষযা পিডকাসম্ভবং দর্শযিতুমাহ– শরাবিকেত্যাদি| ইহ দশপিডকাসু বিনতাযাঃ পাঠো ভোজবিরুদ্ধঃ, ভোজে হি নব পিডকাঃ; তদ্যথা– “শরাবিকা সর্ষপিকা কূর্মিকা জালিনী তথা| কুলত্থিকাঽলজী পুত্রী বিদারী বিদ্রধী তথা|| নবৈতাঃ পিডকা জ্ঞেযাঃ” ইত্যাদি| কুলত্থিকা ভোজে মসূরিকা জ্ঞেযা; কিন্তু ভোজে এব বিনতা ন্যূনেতি বক্তুং সুকরং, সুশ্রুতে চরকে চ বিনতাযা দর্শনাত্| চরকে তু সপ্ত পিডকাঃ| তদ্যথা– “শরাবিকা কচ্ছপিকা জালিনী সর্ষপী তথা| অলজী বিনতাখ্যা চ বিদ্রধী চেতি সপ্তমী||” (চ. সূ. অ. ১৭) ইতি| তত্র প্রাযোভাবাত্ সপ্তানামভিধানম্| যতঃ তেনৈব কিযন্তঃশিরসীযে “তথাঽন্যাঃ পিডকাঃ সন্তি” ইত্যাদিনা অধিকপিডকাসম্ভবঃ সূচিতঃ| প্রমেহোপেক্ষযেত্যভিধানং মধুমেহেন প্রমেহমাত্রেণ চ পিডকাসম্ভবং দর্শযতি| অত এব “বিনা প্রমেহমপ্যেতাঃ” (চ. সূ. অ. ১৭) ইত্যত্র প্রমেহমাত্রগ্রহণং কৃতম্| ধামস্বিতি স্থানেষু||২৭-২৮||

আতঙ্কদর্পণ ব্যাখ্যা (বাচস্পতি বৈদ্য কৃত)

প্রমেহোপেক্ষযা পিডকাসম্ভবং দর্শযিতুমাহ– শরাবিকেত্যাদি| এতৈঃ স্বনামভিঃ প্রসিদ্ধাঃ| প্রমেহোপেক্ষযা অপ্রতিক্রিযমাণেষু কালপ্রকর্ষাদিত্যর্থঃ| প্রমেহোপেক্ষযেত্যভিধানং মধুমেহেন প্রমেহমাত্রেণ চ পিডকাসম্ভবং দর্শযতি| ধামসু স্থানেষু, অত এব ‘বিনা প্রমেহমপ্যেতা’ ইত্যাদি| সন্ধিমর্মসু সন্ধ্যাশ্রিতেষু মর্মসু, অন্যে সন্ধৌ মর্মসু চেতি ব্যাখ্যানযন্তি||২৭-২৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বাসামাকৃতিমাহ– অন্তোন্নতেত্যাদি| তদ্রূপেতি শরাবরূপা| অল্পচিতা অল্পপিডকান্তরাচিতা| বিদ্রধের্লক্ষণৈর্যুক্তেত্যভিধানেন বিদ্রধেরস্যা ভেদো বোধ্যঃ||২৯-৩৩||–

আতঙ্কদর্পণ ব্যাখ্যা (বাচস্পতি বৈদ্য কৃত)

শরাবিকালক্ষণমাহ– অন্তোন্নতেত্যাদি| অন্তে উন্নতা মধ্যে নিম্না, তদ্রূপা শরাবরূপা| কচ্ছপিকামাহ– সদাহেত্যাদি| দাহযুক্তা কূর্মাঽঽকারা| জালিনীমাহ– জালিনীত্যাদি| অতিশযদাহযুক্তা মাংসজালৈর্ব্যাবৃতেব, অস্যা লক্ষণং তন্ত্রান্তরে– “পরস্পরাভিসম্বন্ধাত্পিডকা চৈকদেশজা| পিত্তোত্কটা দাহবতী ভৃশরুগ্জালিনী মতা||” ইতি| বিনতামাহ– অবগাঢেত্যাদি| অবগাঢরুজা ক্লেদা, অন্তর্নিবিষ্টবেদনা ক্লেদা পৃষ্ঠে বা জঠরে বা জাযতে| মহতী স্থূলা, নীলা নীলবর্ণা| অল্পচিতেতি অল্পপিডকান্তরচিতা, সা পুত্রিণী জ্ঞেযা| বিদারিকা পিডকা বিদারীকন্দবদ্বৃত্তা পরিবর্তুলা, কঠিনা অশ্মবত্| বিদ্রধের্লক্ষণৈর্যুক্তেত্যভিধানেন বিদ্রধেরস্যা অভেদো বোদ্ধব্যঃ||২৯-৩৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিডকানামারম্ভককারণমাহ– যে যন্মযা ইত্যাদি| তন্মযা ইতি নির্দেশঃ ক্বচিদপবাদবিষযেঽপ্যুত্সর্গোঽভিনিবিশত ইতি ঙীপং বাধিত্বা টাপা সাধনীযঃ| তদ্দোষং মত্বা কৈশ্চিত্ ‘তত্কৃতাঃ’ ইতি পাঠান্তরং কৃতম্| অযমত্র পিণ্ডার্থঃ– যো যদ্দোষোল্বণো মেহস্তদ্দোষোল্বণেনৈব পিডকা ভবন্তি| ননু, জালিন্যাং তীব্রদাহঃ পঠিতঃ, স চ পিত্তকৃতঃ, ভোজেঽপি জালিনী পিত্তকৃতৈব পঠিতা; যথা– “পরস্পরাভিসম্বন্ধা পিডকা চৈকদেশজা| পিত্তোত্কটা দাহবতী ভৃশরুগ্ জালিনী মতা||” ইতি| তত্কথং জালিন্যাং পিত্তজত্বনিযমাত্ যে যন্মযা ইত্যাদিগ্রন্থার্থসঙ্গতিঃ? নৈবং, প্রচুরপিডকানাং তন্মযত্বেন বাহুল্যেনাভিধানং; যথা– ছত্রিণো গচ্ছন্তীতি গদাধরঃ; কিংবা স্বমহিম্না জালিনী পিত্তপ্রধানা ভবতি, শ্লেষ্মবাতজমেহভবত্বেন শ্লেষ্মবাতপ্রধানা চ; তেন দোষত্রযপ্রধানত্বাত্ সর্বদা সা ভবতি| অন্যস্ত্বাহ– তীব্রদাহত্বং পিত্তোত্কটত্বং চ পৈত্তিকমেহজাযাং জালিন্যামবগন্তব্যম্, অন্যমেহজা তু অন্যদোষোত্কটা নির্দাহা চ| অত এব চরকে জালিনী কফোল্বণা নির্দাহা এব পঠিতা| তদ্যথা– “শরাবিকা কচ্ছপিকা জালিনী চেতি দুঃসহাঃ| জাযন্তে তা হ্যতিবলাঃ প্রভূতশ্লেষ্মমেদসাম্|| স্তব্ধা সিরাজালবতী স্নিগ্ধস্রাবা মহাশ্রযা| রুজানিস্তোদবহুলা সূক্ষ্মচ্ছিদ্রা চ জালিনী||” (চ. সূ. অ. ১৭) ইতি| ন চাতিপ্রসক্তিঃ, উক্তং হি চরকে সমর্থ্যতে; অস্মিংশ্চ সমাধানে যে যন্মযা ইত্যাদি ন ব্যাহন্যতে| চরকভোজবচনযোশ্চাবিরোধার্থং যত্নান্তরং মৃগ্যম্| কার্তিকস্ত্বাহ– পাককালে পিত্তোত্কটত্বং, “তস্মাদ্ধি সর্বে পরিপাককালে পচন্তি শোথাংস্ত্রয এব দোষাঃ|” (সু. সূ. অ. ১৭) ইতি বচনাত্; এতত্তু সর্বত্রাবিশেষান্নাদ্রিযন্তে||৩৪-৩৫||

আতঙ্কদর্পণ ব্যাখ্যা (বাচস্পতি বৈদ্য কৃত)

পিডকানামারম্ভকারণমাহ– য ইত্যাদি| যে মেহা যন্মযা যদ্দোষারব্ধাঃ তেষাং মেহানামেতাঃ পিডকাস্তন্মযাস্তদ্দোষমযা বাচ্যাঃ| শ্লেষ্মজেষু শ্লেষ্মজাঃ, পিত্তজেষু পিত্তজাঃ, বাতজেষু বাতজাঃ| কদাচিত্প্রমেহান্ বিনাঽপি বাতাদিদুষ্টমেদসঃ পুরুষস্য জাযন্তে, এতাস্তাবন্ন জ্ঞাযন্তে, যাবদ্বাস্তুপরিগ্রহো বাস্ত্বধিষ্ঠানং ন ভবতি||৩৪-৩৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যপিডকালক্ষণমাহ– গুদে ইত্যাদি| সোপদ্রবা ইতি উপদ্রবাশ্চ তৃট্কাসাদযঃ| যথাহ চরকঃ– “তৃট্কাসমাংসসঙ্কোচমোহহিক্কামদজ্বরাঃ| বিসর্পমর্মসংরোধাঃ পিডকানামুপদ্রবাঃ||” (চ. সূ. অ. ১৭) ইতি| পিডকাস্তু প্রাযেণাধঃকায এব, দোষদূষ্যাণামধঃপ্রসরণাত্, “রসাযনীনাং চ দৌর্বল্যান্নোর্ধ্বমুত্তিষ্ঠন্তি প্রমেহিণাং দোষাঃ||” (সু. চি. অ. ১২) ইতি বচনাচ্চ| কেচিদাহুঃ– স্ত্রীণাং প্রমেহো ন ভবতীতি| তথাচ তন্ত্রান্তরে– “রজঃপ্রসেকান্নারীণাং মাসি মাসি বিশুধ্যতি| সর্বং শরীরং দোষাশ্চ ন প্রমেহন্ত্যতঃ স্ত্রিযঃ||” ইতি| কিন্তু স্ত্রীষু প্রমেহদর্শনাত্, এতদ্ধেতুবলাদন্যরোগাসম্ভবত্বাচ্চৈতত্ প্রাযোবাদমাশ্রিত্যোক্তম্| মেহনিবৃত্তিলক্ষণং চ সুশ্রুতে পঠিতম্| তদ্যথা– “প্রমেহিণো যদা মূত্রমনাবিলমপিচ্ছিলম্| বিশদং তিক্তকটুকং তদাঽঽরোগ্যং প্রচক্ষতে||” (সু. চি. অ. ১২) ইতি||৩৬||

আতঙ্কদর্পণ ব্যাখ্যা (বাচস্পতি বৈদ্য কৃত)

পিডকানামসাধ্যলক্ষণমাহ– গুদ ইত্যাদি| অংসে বাহুমূলে, মর্মসু শারীরোক্তেষু, সোপদ্রবাঃ উপদ্রবাশ্চ তৃট্কাসাদযশ্চরকোক্তাঃ| যদুক্তম্– “তৃট্কাসমাংসসঙ্কোচমোহহিক্কামদজ্বরাঃ| বিসর্পমর্মসংরোধাঃ পিডকানামুপদ্রবাঃ||” ইতি| পিডকাস্তু প্রাযেণাধঃকায এব ভবন্তি, দোষদূষ্যাণামধঃপ্রক্রমণাত্ ‘রসাযনীনাং চ দৌর্বল্যাত্ নোর্ধ্বমুত্তিষ্ঠন্তি দোষা’ ইতি বচনাত্| কেচিদাহুঃ– “স্ত্রীণাং প্রমেহো ন ভবতি|” ইতি| যদুক্তং তন্ত্রান্তরে– “রজঃপ্রসেকান্নারীণাং মাসি মাসি বিশুদ্ধ্যতি| কৃত্স্নং শরীরং দোষাশ্চ ন প্রমেহন্ত্যতঃ স্ত্রিযঃ||” ইতি| কিন্তু স্ত্রীষু প্রমেহহেতুদর্শনাদেতদ্ধেতুনাঽন্যরোগাসম্ভবাচ্চৈতত্প্রাযোবাদমাশ্রিত্যোক্তম্| প্রমেহনিবৃত্তিলিঙ্গং চ সুশ্রুতে পঠিতং, তদ্যথা– “প্রমেহিণাং যদা মূত্রমনাবিলমপিচ্ছিলম্| বিশদং কটু তিক্তং চ তদারোগ্যং প্রচক্ষতে||” ইতি| মেহরক্তপিত্তযোর্ব্যক্তিমাচষ্টে বাগ্ভটঃ– “হারিদ্রবর্ণং রক্তং বা মেহপ্রাগ্রূপবর্জিতম্| যো মূত্রযেন্ন তং মেহং রক্তপিত্তং তু তং বিদুঃ||” ইতি||৩৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং প্রমেহপ্রমেহপিডকানিদানং সমাপ্তম্||৩৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং প্রমেহপ্রমেহপিডকানিদানং সমাপ্তম্||৩৩||