৮. পাণ্ডুরোগকামলাকুম্ভকামলাহলীমকনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পুরীষজাঃ ক্রিমযঃ সূক্ষ্মাঃ পাণ্ডুতাং জনযন্তি, অতঃ ক্রিমেরনন্তরং পাণ্ডুরোগমাহ– পাণ্ডুরোগা ইত্যাদি| পাণ্ডুত্বেনোপলক্ষিতো রোগঃ পাণ্ডুরোগঃ| চরকে অষ্টোদরীযাধ্যাযে “পঞ্চ পাণ্ডুরোগাঃ” (চ. সূ. অ. ১৯)ইত্যভিধাযাপি “পাণ্ডুরোগাঃ স্মৃতাঃ পঞ্চ” (চ. চি. অ. ১৬) ইতি যদেতত্পুনশ্চরকবচনং তত্ “পঞ্চানামপি সাধ্যত্বং বোধযতি, নতু পঞ্চোন্মাদেষ্বিব সান্নিপাতিকস্যাসাধ্যত্বমিতি” জেজ্জটঃ; “ন্যূনসঙ্খ্যাব্যবচ্ছেদার্থমিতি” চক্রঃ| ননু, সুশ্রুতে হি মৃত্তিকাজো ন পঠিতঃ; মৃত্তিকাঽপি দোষপ্রকোপদ্বারেণৈব পাণ্ডুরোগং জনযতীতি; যদুক্তম্– “কষাযা মারুতং, পিত্তমূষরা, মধুরা কফম্|” (চ. চি. অ. ১৬) ইতি; নিদানভেদাচ্চ রোগভেদে রোগানন্ত্যপ্রসঙ্গঃ, বাতজস্যাপি রূক্ষশীতাদ্যনেকবাতনিদানকুপিতবাতজন্যত্বাত্| উচ্যতে– দোষজত্বাবিশেষেঽপি বিশিষ্টরূপচিকিত্সাপ্রতিপাদনার্থং পৃথগভিধানং, মূত্রান্ত্রবৃদ্ধিবত্; সুশ্রুতেন তু পরাধিকারেষু ন বিস্তরোক্তিরিত্যভিপ্রাযেণ ন পৃথক্কৃতঃ| চিকিত্সা তু দোষচিকিত্সযাঽপি ভবতীতি||১||

আতঙ্কদর্পণ ব্যাখ্যা (বাচস্পতি বৈদ্য কৃত)

পুরীষজাঃ কৃমযো সূক্ষ্মাঃ পাণ্ডুতাং জনযন্তি, অতঃ কৃমেরনন্তরং পাণ্ডুরোগমাহ পাণ্ডুরোগা ইত্যাদি| পাণ্ডুত্বেনোপলক্ষ্যতে রোগঃ পাণ্ডুরোগঃ| স চ পঞ্চবিধঃ– বাতপিত্তকফৈস্ত্রযঃ, সন্নিপাতেনৈকঃ, মৃদ্ভক্ষণাদেকঃ, এবং পঞ্চ| ননু, সুশ্রুতেন মৃত্তিকাজনিতো ন পঠিতঃ, যতো মৃত্তিকাঽপি ত্রিদোষকোপকারণেনৈব পাণ্ডুরোগং জনযতি, উক্তং চ– “কষাযা মারুতং পিত্তমূষরা মধুরা কফম্” ইতি, যদি নিদানভেদাদ্রোগভেদস্তদা রোগাণামানন্ত্যপ্রসঙ্গঃ? উচ্যতে– দোষজত্বাবিশেষেঽপি বিশিষ্টরূপচিকিত্সাপ্রতিপাদনার্থং পৃথগভিধানম্||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্প্রাপ্তিমাহ– ব্যাযামমিত্যাদি| রক্তমিত্যুপলক্ষণং, তেন ‘ত্বঙ্মাংসমপি’ দূষ্যত্বেন দৃঢবলেন পঠিতং, হারীতেন রসোঽপি, ইতি||২||

আতঙ্কদর্পণ ব্যাখ্যা (বাচস্পতি বৈদ্য কৃত)

পাণ্ডুরোগনিদানমাহ– ব্যবাযমিত্যাদি| ব্যবাযাদীনি নিষেবমাণস্য পুংসো দুষ্টা দোষা রক্তং বিদূষ্য ত্বচি পাণ্ডুভাবং কুর্বন্তীতি পিণ্ডার্থঃ| রক্তমিত্যুপলক্ষণং; ত্বচং মাংসমপি দূষযন্তীতি দৃঢবলেন পঠিতং, হারীতেন তথোক্তত্বাত্| ব্যবাযঃ স্ত্রীসেবা, অন্যে ‘ব্যাযামম্’ ইতি পঠন্তি| লবণানীতি বহুবচনেন ক্ষারাণ্যপি বোদ্ধব্যানি| মৃদং মৃত্তিকাম্| তীক্ষ্ণং রাজিকাদি||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– ত্বগিত্যাদি| ত্বক্স্ফোটনং ত্বচঃ কিঞ্চিদ্বিদারণম্| মৃদ্ভক্ষণং মৃদ্ভক্ষণেচ্ছা| প্রেক্ষণকূটশোথো অক্ষিগোলকে শোথঃ| অবিপাক আহারস্য| পুরঃসরাণি পূর্বরূপাণি||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– ত্বগিত্যাদি| ত্বক্স্ফোটনং ত্বচঃ কিঞ্চিদ্বিদারণম্| অন্যে ‘ত্বক্পাটনিষ্ঠীবনগাত্রসাদাঃ’ ইতি পঠন্তি, তত্রাপি স এবার্থঃ| নিষ্ঠীবনং মুখেন, ‘থুগথুগীতি’ লোকে| মৃদ্ভক্ষণং মৃদ্ভক্ষণেচ্ছা, প্রেক্ষণকূটশোথঃ অক্ষিগোলকশোথঃ, অবিপাক আহারস্য, পুরঃসরাণি পূর্বরূপাণি, তস্য ভাবিনঃ ভবন্তি||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিকলক্ষণমাহ– ত্বগিত্যাদি| অত্র কৃষ্ণারুণাভতা ন পাণ্ডুতামতিক্রামতি, অন্যথা পাণ্ডুরোগত্বাভাবঃ| উক্তং চ সুশ্রুতে– “সর্বেষু চৈতেষ্বিহ পাণ্ডুভাবো যতোঽধিকোঽতঃ খুল পাণ্ডুরোগঃ|” (সু. উ. তং. অ. ৪৪) ইতি| ভ্রমাদয ইতি আদিশব্দেন ভেদশূলাদীনাং গ্রহণম্||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকপাণ্ডুরোগমাহ– ত্বগিত্যাদি| কৃষ্ণারুণপ্রভা পাণ্ডুত্বমতিক্রম্য ন ভবতি, অন্যথা পাণ্ডুরোগত্বাভাবাত্| উক্তং হি সুশ্রুতে– “সর্বেষু চৈতেষ্বিহ পাণ্ডুভাবো যতোঽধিকোঽতঃ খলু পাণ্ডুরোগঃ” ইতি| তোদঃ পীডাভেদঃ, আনাহ উদরাটোপঃ, ভ্রমশ্চক্রারূঢস্যেব| আদিগ্রহণাদ্ভেদশূলাদীনাং গ্রহণম্||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকলক্ষণমাহ– পীতেত্যাদি| ননু, পিত্তপাণ্ড্বামযীতি বক্তুং ন যুক্তং, পাণ্ডুরোগস্য পিত্তকার্যত্বাদেব| উচ্যতে– ইতরদোষাসংশ্লিষ্টপ্রবলপিত্তজন্যত্বেন পৈত্তিকাভিধানং, যথা– পৈত্তিকরক্তপিত্তমিতি||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– পীতেত্যাদি| ভিন্নবিট্কঃ সদ্রবমলঃ, অতিপীতাভঃ অতিশযেন পীতঃ| ননু পিত্তপাণ্ড্বামযীতি বক্তুং ন যুক্তং, পাণ্ডুরোগস্য| উচ্যতে, ইতরদোষাসংসৃষ্টপ্রবলপিত্তজন্যত্বেন পৈত্তিকাভিধানং, পৈত্তিকরক্তপিত্তবত্||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকলক্ষণমাহ– কফপ্রসেকেত্যাদি| কফাদ্যঃ পাণ্ডুরোগী স শুক্লৈস্ত্বঙ্মূত্রনযনাননৈরুপলক্ষিত ইতি যোজ্যম্||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকমাহ– কফেত্যাদি| কহাত্তু যঃ পাণ্ডুরোগী স শুক্লৈঃ ত্বব্ধূত্রনযনাদিভিরুপলক্ষ্যতে যোজ্যম্| কফপ্রসেকঃ কফস্রাবঃ, সান্নিপাতিকস্তু সমসমবেতৈর্বাতাদিলক্ষণৈরেব বোধ্যঃ| উক্তং হি চরকে “সর্বান্নসেবিনঃ সর্বে দুষ্টা দোষাস্ত্রিদোষজম্| ত্রিদোষলিঙ্গং কুর্বন্তি পাণ্ডুরোগং সুদুঃসহম্” ইতি||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকস্তু প্রকৃতিসমসমবেতত্বেনৌক্তবাতজাদিলক্ষণৈরেব বোদ্ধব্যঃ| উক্তং হি চরকে– “সর্বান্নসেবিনঃ সর্বে দুষ্টা দোষাস্ত্রিদোষজম্| ত্রিলিঙ্গং সম্প্রকুর্বন্তি পাণ্ডুরোগং সুদুঃসহম্||” (চ. চি. অ. ১৬) ইতি| তস্যৈব সোপদ্রবস্যাসাধ্যত্বমাহ– জ্বরারোচকেত্যাদি| হতেন্দ্রিযঃ স্ববিষযাগ্রাহকেন্দ্রিযঃ||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যৈব সোপদ্রবস্যাসাধ্যত্বমাহ– জ্বরেত্যাদি| ত্রিদোষজঃ পাণ্ডুরোগম্| এতৈরুপদ্রবৈর্যুক্তস্ত্যাজ্যঃ অসাধ্য ইত্যর্থঃ| হতেন্দ্রিযঃ স্ববিষযাগ্রাহকেন্দ্রিযঃ||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মৃজ্জসম্প্রাপ্তিমাহ– মৃত্তিকেত্যাদি| অন্যতমো মলো বাতাদিঃ| ঊষরা সক্ষারা| রসাদীন্ রূক্ষযেত্, ভুক্তং চ রূক্ষযেদিতি যোজ্যম্| রৌক্ষ্যাত্ প্রাকৃতিকোদ্ভূতরৌক্ষ্যগুণাত্| অবিপক্বৈব কোষ্ঠধাত্বগ্নিভিঃ পাকং ন গত্বৈব, স্রোতাংসি রসবহাদীনি, পূরযতি রুণদ্ধি চ| ইন্দ্রিযাণাং বলং স্ববিষযগ্রহণশক্তিম্| “তেজো দীপ্তিঃ” ইতি জেজ্জটঃ, ‘ঊষ্মা’ ইতি চক্রঃ| বীর্যং শক্তিঃ| ‘ওজঃ সর্বধাতুসারঃ, সর্বধাতুসারভূতং হৃদযস্থম্’ ইতি পরাশরঃ, ‘পরাভিভবেচ্ছা’ ইতি জেজ্জটঃ||৮-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

মৃত্তিকাজনিতপাণ্ডুরোগমাহ– মৃত্তিকেত্যাদি| মৃত্তিকাভক্ষণশীলস্য পুরুষস্য অন্যতমো মলো দোষো বাতাদিঃ কোপং গচ্ছতি| মৃত্তিকাযাস্ত্রিদোষপ্রকোপনে হেতুং দর্শযতি– কষাযেত্যাদি| কষাযা মৃত্তিকা মারুতং প্রকোপযেত্, ঊষরা সক্ষারা পিত্তম্, মধুরা কফং, রৌক্ষ্যাচ্চ রসাদীন্ ধাতূন্ রূক্ষযেত্ ভুক্তং চ রূক্ষযেত্, তস্যাঃ স্বভাবোদ্ভূতরূক্ষগুণত্বাত্| অপক্বৈবেত্যাদি ন কোষ্ঠধাত্বগ্নিভিঃ পাকং গচ্ছতি কিন্তু অপক্বৈব রসবাহীনি স্রোতাংসি পূরযতি নিরুণদ্ধি চ| ইন্দ্রিযাণাং বলং স্ববিষযগ্রহণশক্তিং হত্বা পাণ্ডুরোগং করোতি| তেজো দীপ্তিরিতি জেজ্জটঃ, ঊষ্মেতি চক্রঃ| বীর্যং শক্তিঃ, ওজঃ সর্বধাতুসারভূতং হৃদযস্থং, পরাভিভবেচ্ছেতি জেজ্জটঃ| বলবর্ণাগ্নিনাশনমিত্যত্র বলং শরীরে সামর্থ্যম্||৮-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মৃজ্জস্য লক্ষণমাহ-শূনাক্ষীত্যাদি| ‘সর্বপাণ্ডুরোগেষু ক্রিমিকোষ্ঠতা যদা স্যাত্তদৈতল্লক্ষণম্’ ইতি জেজ্জটঃ, মৃত্তিকাজানন্তরপঠিতত্বেন তস্যৈব লক্ষণমিত্যন্যে| বিদেহে তু পঠ্যতে– “মৃদ্ভক্ষণাদ্ভবেত্পাণ্ডুস্তন্দ্রালস্যনিপীডিতঃ| সশ্বাসকাসশোষার্শঃ সাদারুচিসমন্বিতঃ|| শূনপাদাননকরঃ কৃশাঙ্গঃ কৃশপাবকঃ|” ইতি||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

মৃজ্জনিতস্যোপদ্রবমাহ– শূনেত্যাদি| অক্ষিকূটোঽক্ষিগোলকঃ, গণ্ডঃ কপোলঃ, এতেষু শ্বযথুঃ| তথা শূনপান্নাভিমেহনঃ শূনশ্চরণো নাভির্মেহনং চ যস্য স তথা| তথা চ কৃমিকোষ্ঠঃ পুরুষঃ, সরুধিরং কফং পুরীষমতিসার্যেত| সর্বপাণ্ডুরোগেষু কৃমিকোষ্ঠতা যদা স্যাত্তদৈতল্লক্ষণমিতি জেজ্জটঃ; মৃত্তিকাজানন্তরং পঠিতত্বাত্তস্যৈব লক্ষণমিত্যন্যে| উক্তং চ বিদেহেন– “মৃদ্ভক্ষণাদ্ভবেত্পাণ্ডুস্তন্দ্রালস্যনিপীডিতঃ| সশ্বাসকাসশোথার্শঃ সাদারুচিসমন্বিতঃ|| শূনপাদাননকরঃ কৃষ্ণাঙ্গঃ কৃশপাবকঃ” ইতি||১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যলক্ষণমাহ– পাণ্ডুরোগ ইত্যাদি| ‘পাণ্ডুরোগশ্চিরোত্পন্নঃ কালপ্রকর্ষাত্ খরীভূতো জঠরতাং গতো ন সিধ্যতি, অচিরোত্পন্নোঽপি শূনানাং মধ্যে যো বা পীতানি পশ্যতি স পাণ্ডুরোগী ন সিধ্যতীত্যপরমসাধ্যলক্ষণম্’ ইতি জেজ্জটস্য যোজনা| চক্রস্ত্বাহ– ‘চিরোত্পন্নঃ খরীভূতোঽত্যর্থরূক্ষিতসর্বধাতুর্ন সিধ্যতি, তথা কালপ্রকর্ষাদিত্যাদিনাঽপরমসাধ্যলক্ষণম্’ ইতি| অত্র শূনানাং শোথবতাং মধ্যে যো বা পীতানি পশ্যতি স ন সিধ্যতীতি| ‘শূনো না’ ইতি পাঠান্তরে না পুরুষঃ| ‘শূনাঙ্গো যো বা পীতানি পশ্যতি’ ইতি পাঠান্তরং সুগমম্| অপরমসাধ্যলক্ষণমাহ– বদ্ধেত্যাদি| অত্র সকফত্বেঽপি বদ্ধত্বাল্পত্বহরিতত্বানি ব্যাধিপ্রভাবাত্; বদ্ধাল্পস্থানে বহুলমিতি পাঠান্তরম্| বিট্শব্দো নপুংসকোঽপ্যস্তীত্যেতন্নির্দেশাদেবোন্নেযমিত্যাহুঃ| অপরমসাধ্যলক্ষণমাহ– দীন ইত্যাদি| দীনঃ গ্লানঃ| শ্বেতাতিদিগ্ধাঙ্গ ইতি শ্বেতবর্ণলিপ্তাঙ্গ ইবেত্যর্থঃ| স নাস্তি নষ্ট ইব অসাধ্য ইত্যর্থঃ| অপরমাহ– অসৃগিত্যাদ| অপরমসাধ্যলক্ষণমাহ– পাণ্ডুদন্তেত্যাদি| পাণ্ডুসঙ্ঘাতদর্শীতি নযনরশ্মিসহচরিতং বহির্নির্গতং পিত্তং সম্পিণ্ডিতং পশ্যতি| অপরমসাধ্যলক্ষণমাহ– অন্তেষ্বিত্যাদি| অন্তেষু বাহুজঙ্ঘাশিরঃসু, শূনং শোথযুক্তম্| পরিহীণমধ্যং দুর্বলমধ্যদেহম্| এতদ্বৈপরীত্যেনাপরমসাধ্যলক্ষণমাহ– ম্লানমিত্যাদি| ম্লানং দুর্বলম্| অসঞ্জ্ঞকল্পং মৃতপ্রাযম্| এবংবিধং পাণ্ডুকিনং পাণ্ডুরোগিণং যশোঽর্থী বৈদ্যো বিবর্জযেদিতি| অত্র সৌশ্রুতশ্লোকে ‘পাণ্ডুকিনম্’ ইত্যত্র “ পালকিনম্” ইতি পাঠান্তরং, যুক্তং চৈতত্; এবং হি পঠ্যমানে পাণ্ডুরোগাবস্থাবিশেষস্য পালকিনো লক্ষণমপি কৃতং স্যাত্| উক্তং হি সুশ্রুতে– “ সকামলাপালকিপাণ্ডুরোগঃ কুম্ভাহ্বযো” লাঘবকোঽলসাখ্যঃ| (সু. উ. তং. অ. ৪৪) ইতি| অনেনৈবাভিপ্রাযেণ কশ্চিদভিযুক্তো লিখিতবান্– “অন্তে শূনঃ কৃশো মধ্যেঽন্যথা চ গুদশেফসি| শূনো জ্বরাতিসারার্তো ভৃতকল্পস্তু পালকী||” ইতি||১২-১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যলক্ষণমাহ– পাণ্ড্বিত্যাদি| পাণ্ডুরোগশ্চিরোত্পন্নঃ কালপ্রকর্ষাচ্চিরকালাত্খরীভূতো জঠরতাং গতো ন সিধ্যতি, অচিরোত্পন্নোঽপি পাণ্ডুরোগঃ শূনাঙ্গো যো বা পুরুষঃ পীতানি পশ্যতি স পাণ্ডুরোগী ন সিধ্যতি, ইত্যপরমসাধ্যলক্ষণমিতি জেজ্জটঃ| চক্রস্ত্বন্যথা ব্যাচষ্টে– চিরোত্পন্নঃ খরীভূতো অত্যর্থা বিরূক্ষিতসর্বধাতুর্ন সিধ্যতি, তথা কালপ্রকর্ষাদিত্যাদিনা অপরমসাধ্যলক্ষণমিতি| অত্র ‘শূনানাং যো বা পীতানি পশ্যতি’ ইতি পাঠান্তরে শূনানাং শোথবতাং মধ্যে যঃ পীতানি পশ্যতি স ন সিধ্যতি, অন্যে ‘শূনো না’ ইতি পঠন্তি, তত্র না পুরুষঃ| অপরমসাধ্যলক্ষণমাহ– বদ্ধেত্যাদি| অত্র সকফত্বেঽপি চ বহুত্বমল্পত্বং হরিতত্বং ব্যাপিস্বভাবাত্| হরিতং হরিতশাকবর্ণম্| অন্যে বহ্বল্পস্থানে বহুলমিতি পাঠং পঠন্তি| বহুলং বিট্ সার্যতে ইতি বিট্শব্দো নপুংসকোঽপ্যস্তীত্যেতন্নির্দেশাদুন্নেযমিত্যাহুঃ| অপরমসাধ্যলক্ষণমাহ– দীন ইত্যাদি| দীনো গ্লানঃ| শ্বেতাতিদিগ্ধাঙ্গ ইতি শ্বেতবর্ণাতিলিপ্তাঙ্গ ইত্যর্থঃ| স পুরুষো নাস্তি নষ্টঃ অসাধ্য ইত্যর্থঃ| অত্রৈবাপরমপ্যসাধ্যলক্ষণমাহ– অসৃক্ক্ষযাত্ যঃ পাণ্ডুরোগী শ্বেতত্বমাপ্নুযাত্সোঽপ্যসাধ্যঃ| অপরমপ্যসাধ্যলক্ষণমাহ– পাণ্ড্বিত্যাদি| নযনরশ্মিসহচরিতং বহির্নির্গতং পিত্তং তদ্যোগাদখিলমপি পশ্যন্ বস্তু পীতবর্ণপিণ্ডিতং পশ্যতি| অপরমসাধ্যলক্ষণমাহ– অন্তেষ্বিত্যাদি| বাহু জঙ্ঘাশিরস্সু শূনং শোথযুক্তং, পরিহীণমধ্যং দুর্বলমধ্যদেহং, গ্লানমিত্যাদিনা পরমসাধ্যলক্ষণমাহ– গ্লানং দুর্বলং মধ্যদেহং শূনং শ্বযথুযুক্তং যস্য স তাদৃশস্তম্| অপরমসাধ্যলক্ষণমাহ– গুদে শেফসি মুষ্কযোশ্চ শূনং শোথযুক্তং প্রতাম্যন্তং মোহমুপগচ্ছন্তং মূর্ছন্তমিত্যর্থঃ| অসঞ্জ্ঞকল্পং মৃতপ্রাযম্| এবংবিধং পাণ্ডুরোগিণং যশোর্থী ভিষক্ বিবর্জযেত্| সুশ্রুতে অস্মিন্ শ্লোকে পাণ্ডুকিনমিত্যত্র পালকিনমিতি পঠন্তি, যুক্তং চৈতত্| এবং হি পঠ্যমানে পাণ্ডুরোগাবস্থাবিশেষস্য পালকিনো লক্ষণমপ্যুক্তং স্যাত্| যদুক্তং সুশ্রুতে– “সকামলাপালকিপাণ্ডুরোগঃ কুম্ভাহ্বযো লাঘবিকোঽলসাখ্যঃ” ইতি| অনেনৈবাভিপ্রাযেণ কশ্চিদভিযুক্তো লিখিতবান্ “অন্তে শূনঃ কৃশো মধ্যে ত্বথ বা গুদশেফসি| শূনো জ্বরাতিসারাদ্যৈর্মৃতকল্পস্তু পালকী” ইতি||১২-১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পাণ্ডুরোগাবস্থাযাং কামলামাহ– পাণ্ডুরোগীত্যাদি| দগ্ধ্বা সন্দূষ্য| রোগায কামলারূপায| ভেকবর্ণঃ প্রাবৃষেণ্যভেকবর্ণঃ| কোষ্ঠশাখাশ্রযেতি একা কোষ্ঠাশ্রযা, অপরা শাখাশ্রযা; শাখা রক্তাদযো ধাতবঃ| স্বতন্ত্রাঽপি কামলা ভবতি, যথা রাজযক্ষ্মা স্বতন্ত্রঃ উপেক্ষিতেষ্বপি কাসেষু ভবতীত্যাহুঃ||১৬-১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

পাণ্ডুরোগাবস্থাযাং কামলামাহ– পাণ্ড্বিত্যাদি| যঃ পাণ্ডুরোগী পিত্তজনকানি অত্যর্থং সেবতে তস্য রোগিণঃ পিত্তং দোষঃ অসৃঙ্মাংসং দগ্ধ্বা সন্দূষ্য রোগায কামলারূপায জাযতে| তস্য চ রক্তং পীতং শকৃন্মূত্রং, ‘রক্তপীতশকৃন্নেত্রে’ ইতি বা পাঠঃ| ভেকবর্ণঃ প্রাবৃষেণ্যমণ্ডূকবর্ণঃ, হতেন্দ্রিযঃ হতেন্দ্রিযশক্তিঃ এতৈশ্চোপদ্রবৈর্দাহাদিভিঃ কর্ষিতঃ পীডিতঃ, অবিপাক আহারস্য, সদনমঙ্গগ্লানিঃ| বহুপিত্তা এষা কামলা কোষ্ঠশাখাশ্রযেতি একা কোষ্ঠাশ্রযাঽপরা শাখাশ্রযা, শাখা রক্তাদযো ধাতবঃ| উপেক্ষিতঃ পাণ্ডুরোগঃ কামলাযৈ ভবতি||১৬-১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্যা অবস্থান্তরং কুম্ভকামলামাহ– কালান্তরাদিত্যাদি| খরীভূতেতি পূর্ববদ্ব্যাখ্যেযম্| কৃচ্ছ্রা চ কৃচ্ছ্রসাধ্যা| কুম্ভঃ কোষ্ঠঃ, অন্তঃশুষিরসাধর্ম্যাত্; তদ্গতা কামলা কুম্ভকামলা, কোষ্ঠাশ্রযেত্যর্থঃ|১৯|–

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যাবস্থান্তরং কুম্ভকামলামাহ– কালেত্যাদি| কালান্তরাত্ খরীভূতা কঠিনতাং গতা কৃচ্ছ্রসাধ্যা; কুম্ভং কোষ্ঠং, তত্সাধর্ম্যাত্তদ্গতা কামলা কোষ্ঠাশ্রযেত্যর্থঃ||১৯||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কামলাযা অসাধ্যলক্ষণমাহ– কৃষ্ণেত্যাদি| কৃষ্ণেত্যাদিনা তাম্যতীত্যন্তেনৈকমসাধ্যলক্ষণম্| তাম্যতি মুহ্যতি| দাহেত্যাদিনা বিপদ্যতে ইত্যন্তেনাপরমসাধ্যলক্ষণমিতি জেজ্জটঃ||১৯-২০||–

আতঙ্কদর্পণ ব্যাখ্যা (বাচস্পতি বৈদ্য কৃত)

কামলাযা অসাধ্যলক্ষণমাহ– কৃষ্ণেত্যাদি| ছর্দিরিতি ছর্দিরপি রক্তা| তাম্যতি মুহ্যতি| ইত্যেকমসাধ্যলক্ষণং, দাহাদিনা বিপদ্যতে ইত্যন্তেনাপরমপি অসাধ্যলক্ষণমিতি জেজ্জটঃ| নষ্টোঽগ্নিঃ সঞ্জ্ঞা চেতনা চ যস্য স তথা||১৯-২০||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কুম্ভকামলিনোঽসাধ্যলক্ষণমাহ– ছর্দীত্যাদি||২১||–

আতঙ্কদর্পণ ব্যাখ্যা (বাচস্পতি বৈদ্য কৃত)

কুম্ভকামলিনোঽসাধ্যলক্ষণমাহ– ছর্দীত্যাদি| আযাসেন বিনৈব শ্রমঃ ক্লমঃ| বিড্ভেদঃ সদ্রবমলপ্রবৃত্তিঃ| এতৈরুপদ্রবৈঃ কুম্ভকামলী ত্যাজ্যঃ||২১||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পাণ্ডুরোগাবস্থাযাং হলীমকমাহ– যদেত্যাদি| যদা তু পাণ্ডোঃ পাণ্ডুরোগিণঃ হরিতাদিবর্ণযুক্তস্যৈতে উপদ্রবা ভবন্তি তদা তস্য বাতপিত্তকোপজং হলীমকং জানীযাত্| হরিতঃ শাকবর্ণঃ| শ্যাবো নীলবর্ণঃ| বলোত্সাহক্ষযো বলোত্সাহযোঃ ক্ষীণতা| স্ত্রীষ্বহর্ষঃ স্ত্রীরিরংসাযা অভাবঃ| অঙ্গমর্দঃ অঙ্গমোটনম্| লাঘবকালসকাদীনাং পাণ্ডুরোগাবস্থাবিশেষাণাং লক্ষণং সুশ্রুতদিষ্বনুস্মর্তব্যমিতি||২২-২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পাণ্ডুরোগাঽবস্থাযাং হলীমকমাহ– যদেত্যাদি| যদা পাণ্ডুরোগিণো হরিতাদিবর্ণযুক্তস্য এতে উপদ্রবা ভবন্তি তদা তস্য বাতপিত্তপ্রকোপতো হলীমকং জানীযাত্| হরিতঃ শাকবর্ণঃ, শ্যাবো নীলবর্ণঃ| বলোত্সাহক্ষয ইতি বলোত্সাহযোর্নাশঃ| মৃদুজ্বরঃ| স্ত্রীষ্বহর্ষ ইতি রিরংসাযা অভাবঃ| অঙ্গমর্দঃ অঙ্গমোটনম্| লাঘবকালসাদীনাং পাণ্ডুরোগাবস্থাবিশেষাণাং লক্ষণং সুশ্রুতাদবগন্তব্যম্||২২-২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং পাণ্ডুরোগকামলাকুম্ভকামলা হলীমকনিদানং সমাপ্তম্||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং পাণ্ডুরোগনিদানম্||৮||