৫৮. নাসারোগনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইন্দ্রিযাধিকরণবিকারাধিকারান্নাসারোগনিদানম্| তত্রাদাবপীনসমাহ– আনহ্যত ইত্যাদি| আনহ্যত ইত্যাবধ্যতে, বাতশোষিতকফেন| প্রক্লিদ্যতে আর্দ্রীভবতি| ধূপ্যতীতি সন্তাপমনুভবতি; দিবাদেরাকৃতিগণত্বাত্ ধূপ্যতীতি রূপম্| গন্ধরসানিতি গন্ধান্ সুরভ্যসুরভীন্, আবদ্ধত্বেন নাসাযাঃ; নাসারোগারম্ভকদোষেণ রসনাযা অপি দুষ্টেঃ রসান্ মধুরাদীন্ন বেত্তি| তং চানিলশ্লেষ্মভবমিতি বাতকফজম্| ননু, অন্যত্র পিত্তকফজোঽসদৃশলিঙ্গশ্চ পঠ্যতে; তদ্যথা– “মস্তুলুঙ্গোচিতঃ শ্লেষ্মা যদা পিত্তাদ্বিদহ্যতে| তদাঽসৃক্ পিচ্ছিলং নাসা বহুসিংহাণকং স্রবেত্|| সকণ্ডূদাহপাকং চ তং তু বিদ্যাদপীনসম্|” ইতি, তত্ কথং ন বিরোধঃ? নৈবং, সম্প্রাপ্তিবিশেষেণাস্য তথাভাব ইতি কার্তিকঃ| তন্ত্রান্তরপ্রত্যযাত্ পিত্তসম্বন্ধো লিঙ্গবিশেষশ্চাত্র বোদ্ধব্য ইত্যর্থঃ| গদাধরস্তু তত্সংবাদাত্ ‘অনলশ্লেষ্মভবম্’ ইতি পঠিত্বা শ্লেষ্মপিত্তজ এব ন্যায্য ইত্যাহ| প্রতিশ্যাযসমানলিঙ্গমিতি কফবাতজপ্রতিশ্যাযতুল্যলিঙ্গম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

ইন্দ্রিযাধিকরণাধিকারান্নাসারোগনিদানারম্ভঃ| তত্রৈকত্রিংশন্নাসারোগাঃ, তত্রাপীনসমাহ– আনহ্যত ইত্যাদি| আনহ্যতে আবধ্যতে, বিশুষ্যতে বাতশোষিতকফেন, প্রক্লিদ্যতে আর্দ্রীভবতি, ধূপ্যতি সন্তাপমনুভবতি, গন্ধান্ সুরভ্যসুরভীন্, আনদ্ধত্বেন নাসাযাঃ; নাসারোগারম্ভকদোষেণ রসনাযাশ্চ দুষ্টেঃ| রসান্ মধুরাদীন্ন বেত্তি| তং চানিলশ্লেষ্মভবমিতি বাতকফজং ব্রূযাত্| নন্বন্যত্র পিত্তশ্লেষ্মজোঽন্যাদৃশশ্চ পঠ্যতে, তদ্যথা– “মস্তুলুঙ্গোচিতঃ শ্লেষ্মা যদা পিত্তাদ্বিদহ্যতে| তদাঽসৃক্পিচ্ছিলং নাসা বহুসিংহাণকং স্রবেত্|| সকণ্ডূদাহপাকং চ তং তু বিদ্যাদ্ধি পীনসম্” ইতি, তত্কথং ন বিরোধঃ? মৈবং, সম্প্রাপ্তিবিশেষেণাস্য তথাভাব ইতি কার্তিকঃ| তন্ত্রান্তরপ্রত্যযাত্ পিত্তসম্বন্ধো লিঙ্গবিশেষশ্চ বোদ্ধব্য ইত্যর্থঃ| প্রতিশ্যাযসমানলিঙ্গমিতি কফবাতজপ্রতিশ্যাযতুল্যলিঙ্গম্||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূতিনস্যমাহ– দোষৈরিত্যাদি| দোষৈরিতি পিত্তকফরক্তৈঃ, রক্তস্যাপি দোষতুল্যরূপত্বাদ্দোষত্বম্| বিদগ্ধৈরিতি পিত্তশ্লেষ্মণোঃ সরক্তযোরূষ্মণা বিরুদ্ধলবণাম্লরসপাকেন পূতিভাবমাপন্নৈঃ| সম্মূর্ছিত ইতি উচ্ছ্রাযং নীতঃ| নিরেতীতি সমীরণ এব, অন্যস্য কর্তৃপদস্যাভাবাত্| তং পূতিনস্যমিতি নাসিকাভবো নস্যঃ, পূতির্নস্যো বাযুর্যত্র তং পূতিনস্যম্| ইহৈব বিদেহঃ– “কফপিত্তমসৃঙ্মিশ্রং সঞ্চিতং মূর্ধ্নি দেহিনাম্| বিদগ্ধমূষ্মণা গাঢং রুজাং কৃত্বাঽক্ষিশঙ্খজাম্|| ততঃ প্রস্যন্দতে ঘ্রাণাত্ সরক্তং পূতিপীতকম্| পূতিনস্যং তু তং বিদ্যাদ্ ঘ্রাণকণ্ডূজ্বরপ্রদম্||” ইতি||২||

আতঙ্কদর্পণ ব্যাখ্যা (বাচস্পতি বৈদ্য কৃত)

পূতিনস্যমাহ– দোষৈরিত্যাদি| দোষৈঃ পিত্তকফরক্তৈঃ, রক্তস্যাপি তুল্যদোষত্বাদ্দোষত্বম্, অতো বহুবচনং; বিদগ্ধৈরিতি পিত্তশ্লেষ্মণোঃ সরক্তযোরূষ্মণা বিরুদ্ধলবণাম্লরসপাকেন পূতিভাবমাপন্নৈঃ| সম্মূর্ছিত উচ্ছ্রাযং নীতঃ, নিরেতি নির্গচ্ছতি, সমীরণ এব, তং পূতিনস্যমিতি নাসিকাভবো নস্যঃ, পূতির্নস্যো বাযুর্যত্র| তথাচ বিদেহে– “কফপিত্তমসৃঙ্মিশ্রং সঞ্চিতং মূর্ধ্নি দেহিনাম্| বিদগ্ধমূষ্মণা গাঢং রুজাং কৃত্বাঽক্ষিশঙ্খজাম্|| তেন প্রস্যন্দতে ঘ্রাণাত্সরক্তং পূতিপীতকম্| পূতিনস্যং তু তং বিদ্যাদ্ ঘ্রাণকণ্ডূজ্বরপ্রদম্||” ইতি||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

নাসাপাকমাহ– ঘ্রাণাশ্রিতমিত্যাদি| অরূংষীতি ব্রণান্| যস্মিন্ বিকার ইতি যস্যাং বিকৃতৌ সত্যাম্| ব্যবস্যেত্ জানীযাত্| বিক্লেদঃ আর্দ্রতা, কোথঃ, পূতিভাবঃ||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

নাসাপাকমাহ– ঘ্রাণাশ্রিতমিত্যাদি| অরূংষি ব্রণান্, যস্মিন্নিতি যস্মিন্বিকারে, দৃষ্টৌ দর্শনং গতৌ||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দোষাগন্তুজং পূযরক্তমাহ– দোষৈরিত্যাদি| বিদগ্ধৈরিতি পিত্তরক্তাধিকত্বাদ্বিরুদ্ধাং পরিণতিং প্রাপ্তৈঃ, ললাটাভিঘাতেন বা পাকং প্রাপ্তৈঃ| তৈস্তরিতি প্রহারপীডনাদিভিঃ||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

দোষাগন্তুজং পূযরক্তমাহ– দোষৈরিত্যাদি| বিদগ্ধৈরিতি পিত্তরক্তাধিকত্বাত্ বিরুদ্ধাং গতিং প্রাপ্তৈঃ ললাটাভিঘাতেন বা পাকং প্রাপ্তৈঃ, তৈস্তৈরিতি প্রহারপীডনাদিভিঃ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ক্ষবথুর্দোষাগন্তুভেদাদ্দ্বিবিধো ভবতি; তত্র দোষজং প্রাগাহ– ঘ্রাণাশ্রিত ইত্যাদি| মর্মণীতি শৃঙ্গাটকে, ‘নস্তকযোঃ’ ইতি পাঠান্তরে নাসাপুটযোঃ, ‘তদাশ্রিতঃ সন্’ ইতি শেষঃ||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ক্ষবথুর্দোষাগন্তুভেদাদ্ দ্বিবিধো ভবতি, তত্র দোষজমাহ– ঘ্রাণাশ্রিত ইত্যাদি| মর্মণি শৃঙ্গাটকাখ্যে, ‘নস্তকযোঃ’ ইতি পাঠান্তরে নাসাপুটযোঃ, তদাস্থিতঃ সন্নিতি শেষঃ||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আগন্তুজমাহ– তীক্ষ্ণোপযোগাদিত্যাদি| তীক্ষ্ণোপযোগাদ্রাজিকাদিতীক্ষ্ণদ্রব্যভক্ষণাত্| ভাবান্ কটূনিতি কটূনি দ্রব্যাণি| অভিজিঘ্রতো ভৃশং জিঘ্রতঃ| অর্কনিরীক্ষণাদ্বা কফবিলযনকরাত্| তরুণাস্থিমর্মণীতি তরুণাস্থি নাসাবংশাস্থি তদেব মর্ম তস্মিন্ ফণামর্মণীত্যর্থঃ, অভিঘাতাদিনা মর্মব্যথাজনকত্বাত্; অথবা তরুণাস্থ্নি চ মর্মণি চ শৃঙ্গাটকে, দ্বন্দ্বৈকবদ্ভাবনির্দেশাত্| উদ্ঘাটিতে চালিতে| অন্য আগন্তুজঃ||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

আগন্তুজমাহ– তীক্ষ্ণেত্যাদি| তীক্ষ্ণোপযোগাত্ রাজিকাদিভক্ষণাত্, ভাবান্ কটূনিতি কটুদ্রব্যাণি, অতিজিঘ্রতো ভৃশং জিঘ্রতঃ, অর্কনিরীক্ষণাদ্বা কফবিলযনকরত্বাদ্, অথবা সূত্রাদিভিঃ, তরুণাস্থিমর্মণীতি তরুণাস্থি নাসাবংশাস্থি, তদেব মর্ম, অভিঘাতাদিনা মর্মবদ্ব্যথাজনকত্বাত্, উদ্ঘাটিতেঽর্ধচালিতে, অন্যঃ আগন্তুজঃ, দোষজাগন্তুরেক এব গণনীযঃ||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ভ্রংশথুমাহ– প্রভ্রশ্যত ইত্যাদি| প্রভ্রশ্যতে গলতি| বিদগ্ধো লবণ ইতি স্বরূপাখ্যানং, বিদগ্ধত্বাদেব কফস্য লবণত্বসিদ্ধেঃ| প্রাক্সঞ্চিত ইত্যনেন সঞ্চযপূর্বকং কোপং দর্শযতি, হেতুভূযস্ত্বেন চযমন্তরেণাপি কোপদর্শনাত্| যদুক্তম্– “ন কেবলং চযং প্রাপ্য দোষাঃ কুপ্যন্তি দেহিনাম্| অন্যতোঽপি হি কুপ্যন্তি হেতুবাহুল্যতো বলাত্||” ইতি||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

ভ্রংশথুমাহ– প্রভ্রশ্যত ইত্যাদি| বিদগ্ধো লবণ ইতি স্বরূপাখ্যানং, বিদগ্ধত্বাদেব কফস্য লবণত্বসিদ্ধেঃ, ‘পিত্ততপ্ত’ ইতি সুশ্রুতপাঠঃ||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দীপ্তমাহ– ঘ্রাণে ভৃশমিত্যাদি| প্রদীপ্তেবেতি প্রজ্বলিতেব||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

দীপ্তমাহ– ঘ্রাণ ইত্যাদি| প্রদীপ্তেবেতি প্রজ্বলিতেব, বিদেহেঽস্য লক্ষণম্– “ধূমাযতে যদা নাসা চলত্কৃষ্যতি দীপ্যতে| নিশ্চরেত্তম উচ্ছ্বাসং তং ব্যাধিং দীপ্তমাদিশেত্||” ইতি||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রতীনাহমাহ– উচ্ছ্বাসমার্গমিত্যাদি|৯|–

আতঙ্কদর্পণ ব্যাখ্যা (বাচস্পতি বৈদ্য কৃত)

প্রতীনাহমাহ– উচ্ছ্বাসমার্গমিত্যাদি|৯|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

নাসাস্রাবমাহ– ঘ্রাণাদিত্যাদি| দোষ ইতি কফঃ||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

নাসাস্রাবমাহ– দোষ ইতি কফঃ| অস্য লক্ষণং বিদেহে– “স্রোতঃশৃঙ্গাটকে শ্লেষ্মা| চিতঃ ক্লেদিত ঊষ্মণা| বিশেষাত্স্যন্দতে রাত্রৌ নাসাস্রাবং তু তদ্বিদুঃ||” ইতি||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

নাসাশোষমাহ– ঘ্রাণাশ্রিতে স্রোতসীত্যাদি| অত্র চ বাযুকৃতস্রোতঃশোষণেন তদ্গতশ্লেষ্মশোষো বোদ্ধব্যঃ| প্রতপ্ত ইত্যনেন পিত্তমপি গম্যতে, প্রতপনস্য পিত্তমন্তরেণাসম্ভবাত্| তথাচ কশ্চিত্ পঠতি– “ঘ্রাণাশ্রিতে শ্লেষ্মণি মারুতেন পিত্তেন গাঢং পরিশোষিতে চ||” ইতি| প্রতপ্ত ইত্যস্য স্থানে ‘প্রদীপ্তে’ ইতি পাঠান্তরে স এবার্থঃ| কৃচ্ছ্রাচ্ছ্বসেদূর্ধ্বমধশ্চ যস্মিন্নিতি কষ্টেনোচ্ছ্বাসনিঃশ্বাসৌ করোতি যত্রেত্যর্থঃ||১০||

আতঙ্কদর্পণ ব্যাখ্যা (বাচস্পতি বৈদ্য কৃত)

নাসাশোষমাহ– ঘ্রাণেত্যাদি| নাসাশোষস্তু বাযুকৃতস্রোতঃশোষণেন তদ্গতশ্লেষ্মশোষো জ্ঞেযঃ| প্রতপ্ত ইত্যনেন চ পিত্তমপি গম্যতে, প্রতপনস্য পিত্তমন্তরেণাসম্ভবাত্| প্রতপ্ত ইত্যস্য স্থানে ‘প্রদীপ্তে’ ইতি পাঠান্তরে স এবার্থঃ| কৃচ্ছ্রাচ্ছ্বসিতীতি কষ্টেনোচ্ছ্বসিতি শ্বাসং করোতি যত্রেত্যর্থঃ| বৈদেহেঽস্য লক্ষণম্– “বাতপিত্তৌ যদা ঘ্রাণকফরক্তং বিশোষযেত্| তদা স্যাদুচ্ছ্বসেন্নাসা তস্য শুষ্কং বিধীযতে|| ভৃশশুষ্কাবচূর্ণেন নাসাশোষং তু তং বিদুঃ|” ইতি||১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চিকিত্সাভেদার্থং পীনসস্যামপক্বলক্ষণমাহ– শিরোগুরুত্বমিত্যাদি| তনুরঘনঃ| স্বরঃ ক্ষাম ইতি অবিস্পষ্টং বচনম্| ষ্ঠীবত্যথাভীক্ষ্ণমিতি মুহুর্মুহুর্নাসিকযা শ্লেষ্মাণং নিরস্যতীত্যর্থঃ| আমরসান্বিতেন দোষেণ শিরোগুরুত্বাদযঃ| “আমলিঙ্গান্বিতঃ শ্লেষ্মা ঘনঃ খেষু নিমজ্জতি” ইত্যাদি পক্বলক্ষণম্| আমলিঙ্গৈঃ শিরোগুরুত্বাদিভিরন্বিতঃ শ্লেষ্মা নিমজ্জতীতি লীনো ভবতি| অযমর্থঃ– শ্লেষ্মা তাবল্লীনো ভবতি, আমলিঙ্গান্যপি লীনানি ভবন্তি, তথাচ ‘তনুত্বমামলিঙ্গানাম্’ ইতি সুশ্রুতঃ| ‘ন সজ্জতি’ ইতি পাঠান্তরে ন সক্তো ভবতি, ন তিষ্ঠতীতি যাবত্; তদাঽঽমলিঙ্গান্বিতঃ স্তোকেনামলিঙ্গেনান্বিতঃ| ঘনঃ স্ত্যানঃ| খেষু নাসারন্ধ্রেষু, ‘স্থিতঃ’ ইতি শেষঃ; ব্যক্ত্যপেক্ষযা বহুবচনম্| স্বরবিশুদ্ধিঃ স্বরভেদাভাবঃ, বর্ণবিশুদ্ধিঃ প্রকৃতিসবর্ণতা||১১-১২||

আতঙ্কদর্পণ ব্যাখ্যা (বাচস্পতি বৈদ্য কৃত)

চিকিত্সাভেদার্থং পীনসস্যামপক্বলক্ষণং কথযন্নাহ– শির ইত্যাদি| তনুঃ অঘনঃ, স্বরঃ ক্ষামঃ অবিস্পষ্টবচনঃ, ষ্ঠীবেত্তথাঽভীক্ষ্ণমিতি মুর্হুর্মুহুর্নাসযা শ্লেষ্মাণং নিরস্যতীত্যর্থঃ| পক্বলক্ষণমাহ– আমেত্যাদি| আমলিঙ্গৈঃ শিরোগুরুত্বাদিভিরন্বিতঃ শ্লেষ্মা, নিমজ্জতি লীনো ভবতীতি, অযমর্থঃ– শ্লেষ্মা বিলীনো ভবতি, আমলিঙ্গান্যপি, তথাচ– “তনুত্বং চামলিঙ্গানাম্” ইতি সুশ্রুতে| ‘ন সজ্জতি’ ইতি পাঠান্তরে ন সক্তো ভবতি, ন তিষ্ঠতীতি যাবত্| স্বরবিশুদ্ধিঃ স্বরভেদাভাবঃ, বর্ণবিশুদ্ধিঃ প্রকৃতিবর্ণতা||১১-১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রতিশ্যাযঃ পঞ্চবিধো ভবতি, বাতপিত্তকফসন্নিপাতরক্তজভেদাত্; তস্য নিদানং দ্বিবিধম্– একং সদ্যোজনকং, তচ্চ বলবত্ত্বেন চযং নাপেক্ষত এব; অপরং চযাদিক্রমেণ জনকং, চযাদিক্রমোত্পন্নশ্চ দোষো গরীযান্ সকলশরীরসম্ভাবনযা বদ্ধমূলত্বাত্| তত্র সদ্যোজনকনিদানপূর্বিকাং তস্য সম্প্রাপ্তিমাহ– সন্ধারণেত্যাদি| সন্ধারণং পুরীষাদিবেগধারণং, রজো ধূলিঃ, শিরোভিতাপঃ শিরোঽভিতপ্যতে যেন স শিরোভিতাপো ধূমাদিঃ; রজোধূমাদযশ্চ নাসাপ্রবিষ্টাঃ সন্তো হেতবঃ| অতিস্বপনং দিবাস্বপনমিত্যর্থঃ| অবশ্যযা তুষারেণ| সংস্ত্যানদোষে শিরসীতি ঘনীভূতশ্লেষ্মণি শিরসি| সুশ্রুতেনাপি সদ্যোজনকং নিদানং পঠিতং; তদ্যথা– “নারীপ্রসঙ্গঃ শিরসোঽভিতাপো ধূমো রজঃ শীতমতিপ্রতাপঃ| সন্ধারণং মূত্রপুরীষযোশ্চ সদ্যঃ প্রতিশ্যাযনিদানমুক্তম্||” (সু. উ. তং. অ. ২৪) ইতি| চযাদিক্রমেণ জনকমপি দোষং দর্শযন্নাহ– চযং গতা ইত্যাদি| চযং গতা ইতি সামর্থ্যাত্ স্বে স্বে স্থানে, “স্বস্থানবৃদ্ধির্দোষাণাং চয ইত্যভিধীযতে|” ইতি বচনাত্| তথৈব শোণিতমিতি চযং গতম্| ননু, যদি স্বস্থানস্থিতা দোষাঃ তত্ কথং মূর্ধ্নি প্রতিশ্যাযসম্ভবঃ? ইত্যাহ– প্রকুপ্যমাণা বিবিধৈঃ প্রকোপণৈরিতি| বিবিধৈরিতি বলবদ্বিগ্রহদিবাস্বপ্নাদিভিঃ| প্রকোপবিশেষশ্চ প্রসরঃ| যদুক্তম্– “প্রকুপিতানাং পর্যুষিতকিণ্বোদকপিষ্টসমবায ইবোদ্রিক্তানাং প্রসরো ভবতি|” (সু. সূ. অ. ২১) ইতি| অত এব, “চযপ্রকোপপ্রশমাঃ পিত্তাদীনাং যথাক্রমম্|” ইত্যত্র প্রকোপমাত্রমুপাত্তম্| এতেন প্রসরেণ শিরঃসম্প্রাপ্তা দোষাঃ প্রতিশ্যাযকরাঃ| অন্যে তু চযং গতা মূর্ধনীতি যথাস্থিতমেব যোজযন্তি, উদানবাযোরূর্ধ্বগতিত্বাচ্ছিরস্যপি সম্ভবাত্, ত্বক্সিরাশ্রিতত্বাত্ পিত্তাসৃজোঃ কফস্য চ নিসর্গতঃ শিরোবস্থিতেঃ শিরসি চয ইতি| তত ইতি প্রকোপবিশেষাত্ প্রসরাদনন্তরম্| প্রতিশ্যায ইতি বাতং প্রতি অভিমুখং শ্যাযো গমনং কফাদীনাং যত্র স প্রতিশ্যাযঃ| ‘শৈঙ্’ গতৌ, ইত্যস্য প্রযোগঃ| তথাচ চরকঃ– “ঘ্রাণমূলে স্থিতঃ শ্লেষ্মা রুধিরং পিত্তমেব বা| মারুতাধ্মাতশিরসঃ শ্যাযতে মারুতং প্রতি||” (চ. চি. অ. ৮)||১৩-১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

এবং নাসারোগা দশ শ্রীকণ্ঠোক্তাঃ কথিতাঃ| প্রতিশ্যাযঃ পঞ্চবিধো ভবতি, বাতপিত্তকফসন্নিপাতরক্তজভেদাত্, তস্য সম্প্রাপ্তিমাহ– সন্ধারণেত্যাদি| নিদানং দ্বিবিধম্– একং সদ্যোজনকম্, অপরং চযাদিক্রমজাতং, তত্রেদং সদ্যোনিদানম্| সন্ধারণং পুরীষাদিবেগবিধারণং, রজো ধূলিঃ, শিরোভিতাপঃ শিরোঽভিতাপ্যতে যেন স শিরোভিতাপঃ ধূমাদিঃ, রজোধূমাদযশ্চ নাসাপ্রবিষ্টাঃ প্রতিশ্যাযহেতবঃ, অতিস্বপ্নং দিবাস্বপ্নমিত্যর্থঃ| অবশ্যযা তুষারেণ| সংস্ত্যানদোষে শিরসীতি সংহতকফে শিরসি| সুশ্রুতেনাপি সদ্যোজনকং নিদানং পঠিতম্| তদ্যথা– “নারীপ্রসঙ্গঃ শিরসোঽভিতাপো ধূমো রজঃ শীতমতিপ্রতাপঃ| সন্ধারণং মূত্রপুরীষযোশ্চ সদ্যঃপ্রতিশ্যাযনিদানমুক্তম্||” ইতি| চযাদিক্রমজস্য নিদানমাহ– চযমিত্যাদি| চযং গতাঃ ইতি স্বে স্বে স্থানে সঞ্চযং প্রাপ্তাঃ “স্বস্থানবৃদ্ধির্দোষাণাং চযঃ” ইতি বচনাত্| মারুতাদয ইতি বাতপিত্তশ্লেষ্মাণঃ এতে, তথৈব শোণিতমপি চযং গতং ততো মূর্ধ্নি প্রতিশ্যাযকরং ভবতীতি যোজ্যম্| ননু, যদি স্বে স্বে স্থানে স্থিতা দোষাস্তত্কথং মূর্ধ্নি প্রতিশ্যাযসম্ভবঃ ইত্যাহ– প্রকোপ্যমাণা বিবিধৈঃ প্রকোপণৈরিতি, বলবদ্বিগ্রহাদিক্রোধাদিদিবাস্বপ্নাদিভিশ্চ কোপনৈঃ প্রকোপ্যমাণাঃ; প্রকোপবিশেষশ্চ প্রসরঃ| যদুক্তম্– “কুপিতানাং দোষাণাং কিণ্বোদকপিষ্টসমবায ইবোদ্গতানাং প্রসরো ভবতি” ইতি| অত এবাহ– “চযপ্রকোপোপশমাঃ পিত্তাদীনাং যথাক্রমম্” ইতি| অত এব প্রকোপমাত্রমুপাত্তম্| এবং চ প্রসরণস্থানসংশ্রযেণ শিরঃসম্প্রাপ্তা দোষাঃ প্রতিশ্যাযকরাঃ| অন্যে তু চযং গতো মূর্ধ্নীতি যথাবস্থিতমেব মন্যন্তে, উদানবাযোরূর্ধ্বগতিত্বাত্, শিরস্যপি বাতসমুদ্ভবত্বাত্| ত্বক্সিরাসৃতত্বাত্পিত্তাসৃজোঃ কফস্য চ নিসর্গতঃ শিরোবস্থিতেঃ শিরসি চয ইতি| অথবা সর্বশরীরচরাস্তু বাতপিত্তশ্লেষ্মাণঃ সরক্তাঃ, সর্বত্রৈতত্কার্যদর্শনাত্| তত ইতি প্রকোপবিশেষাত্ প্রসরাদনন্তরম্| প্রতিশ্যায ইতি বাতং প্রতি অভিমুখং শ্যাযো গমনং কফাদীনাং যত্র স প্রতিশ্যাযঃ| ‘শ্যৈঙ্’ গতৌ ইত্যস্য প্রযোগঃ| তথা চরকঃ– “ঘ্রাণমূলে স্থিতঃ শ্লেষ্মা রুধিরং পিত্তমেব চ| মারুতাধ্মানশিরসঃ শ্যাযতে মারুতং প্রতি|| প্রতিশ্যাযস্ততো ঘোরো জাযতে দেহকর্ষণঃ|” ইতি||১৩-১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্য পূর্বরূপমাহ– ক্ষবপ্রবৃত্তিরিত্যাদি| উপদ্রবাশ্চাপ্যপরে ইতি উপদ্রবাস্তত্কালভাবিনো রোগাঃ, নতু পারিভাষিকাঃ পশ্চাত্কালভাবিনঃ; তে চ ঘ্রাণধূমাযনমন্থাদযঃ| যদাহ বিদেহঃ– “পূর্বরূপাণি দৃশ্যন্তে প্রতিশ্যাযে ভবিষ্যতি| ঘ্রাণধূমাযনং মন্থঃ ক্ষবথুস্তালুদারণম্|| কণ্ঠধ্বংসো মুখস্রাবঃ শিরসঃ পূরণং তথা|” ইতি| পুরঃসরা ইতি পূর্বরূপাণি||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য পূর্বরূপমাহ– ক্ষবেত্যাদি| উপদ্রবাঃ তত্কালভাবিনো রোগাঃ| অপরে ইতি ঘ্রাণধূমাযনমন্থাদযঃ| যদুক্তং বিদেহে– “পূর্বরূপাণি দৃশ্যন্তে প্রতিশ্যাযে ভবিষ্যতি| ঘ্রাণধূমাযনং মন্থঃ ক্ষবথুস্তালুদারণম্| কণ্ঠধ্বংসো মুখস্রাবঃ শিরসঃ পূরণং তথা||” ইতি| পুরঃসরা ইতি পূর্বরূপাণি||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতাদিপ্রতিশ্যাযলিঙ্গান্যাহ– আনদ্ধেত্যাদি| আনদ্ধা বিবদ্ধা| পিহিতা সপিধানেব| নিস্তোদঃ সূচিব্যধনবদ্ব্যথা| শঙ্খযোরিতি ভ্রূপুচ্ছান্তযোঃ| সপীতক ইতি ঈষত্ পীতঃ| পিত্তপ্রতিশ্যাযবান্ মানবঃ কৃশো ভবতি| অতিপাণ্ডুর্ধূসরঃ| উষ্ণাভিপীডিত ইতি উষ্ণগুণেনাভিপীডিত ইত্যর্থঃ||১৬-১৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

তেষু বাতিকমাহ– আনদ্ধেত্যাদি| আনদ্ধা বিবদ্ধা, আধ্মানাপূরিতেবেতি যাবত্| পিহিতা সপিধানেব, তথা গলতাল্বোষ্ঠশোষাদযো ভবন্তি, নিস্তোদঃ শূলব্যধনবদ্ব্যথা, শঙ্খযোরিতি ভ্রূপুচ্ছান্তযোঃ| পৈত্তিকমাহ– সপীতক ইত্যাদি| ঈষত্পীতকঃ| পিত্তপ্রতিশ্যাযবান্মানবঃ কৃশো ভবতি| অতিপাণ্ডুর্ধূসরঃ, উষ্ণাভিপীডিত ইতি উষ্ণগুণেনাভিপীডিতঃ| শ্লৈষ্মিকমাহ– সধূমমিত্যাদি| শুক্লাবভাসঃ শ্বেতবপুঃ, শূনাক্ষঃ উচ্ছূননযনঃ||১৬-১৯||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্নিপাতজমাহ– ভূত্বেত্যাদি| ভূত্বা ভূত্বা ইতি বীপ্সযা পুনঃ পুনঃ সম্ভবং দর্শযতি| অন্যতমদোষস্য কালাদিনাঽনবধারিতেন বলহানের্নিবৃত্তিঃ, অকস্মাত্ প্রবৃত্তিরপি অসম্যঙ্নিবৃত্তদোষস্য কালাদিনা বললাভাত্| অত্র যদ্যপি দোষত্রযলিঙ্গানি নোক্তানি, তথাঽপি সর্বপ্রভবত্বাত্ প্রত্যেতব্যানি| অসাধ্যশ্চাযং দুষ্টতাং গতঃ সন্, “নৃণাং দুষ্টপ্রতিশ্যাযস্ত্বসাধ্যঃ সর্বজঃ স্মৃতঃ|” ইতি বিদেহবচনাত্||২০||–

আতঙ্কদর্পণ ব্যাখ্যা (বাচস্পতি বৈদ্য কৃত)

সান্নিপাতিকমাহ– ভূত্বেত্যাদি| বীপ্সযা পুনঃপুনঃ সম্ভবং দর্শযতি| অন্যতমদোষস্য কালাদিনাঽনবধারিতেন বলহানের্নিবৃত্তিঃ, অকস্মাত্ প্রবৃত্তিরপি, অসম্যঙ্নিবৃত্তদোষস্য কালাদিনা বললাভাত্| অত্র যদ্যপি দোষত্রযলিঙ্গানি নোক্তানি তথাঽপি সর্বপ্রভবত্বাত্ প্রত্যেতব্যানি| কেচিত্ ‘সর্বপ্রভবঃ স্মৃতঃ’ ইত্যস্যাগ্রেঽধিকং পাদদ্বযং পঠন্তি, তচ্চ– “লিঙ্গানি চৈব সর্বেষাং পীনসানাং চ সর্বজে” ইতি সর্বজে প্রতিশ্যাযে সর্বেষাং বাতাদীনাং পীনসানাং লিঙ্গানি ভবন্তীতি যোজ্যম্| অসাধ্যশ্চাযং দুষ্টতাং গতঃ সন্– “নৃণাং দুষ্টপ্রতিশ্যাযস্ত্বসাধ্যঃ সর্বজঃ স্মৃতঃ” ইতি বিদেহবচনাত্||২০||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

একদোষস্যাপি দুরুপচারাদ্দোষদ্বযানুবন্ধেন দুষ্টতাং গতস্য দোষত্রযসম্বন্ধসাম্যেন সন্নিপাতজানন্তরং লিঙ্গমাহ– প্রক্লিদ্যতে পুনর্নাসেত্যাদি| আনহ্যত ইতি বিবধ্যতে| বিব্রিযত ইতি বিগতাবরণা ভবতীত্যর্থঃ| ক্লেদশোষপিধানবিবরণানি নৈককালং ভিন্নদোষজানি বোদ্ধব্যানি, তেন বিরোধো নোদ্ভাবনীযঃ| এবমিতি ইত্থম্ভূতলিঙ্গং দুষ্টপ্রতিশ্যাযং পরস্পরবিরুদ্ধোপক্রমদোষসম্বন্ধাত্ কৃচ্ছ্রসাধ্যং জানীযাত্| অযং চ পঞ্চানামেবাবস্থান্তরতযা অনন্যত্বান্ন ষষ্ঠঃ| ননু, অবস্থান্তরত্বেঽপি অভিষ্যন্দাদধিমন্থ ইব ভিন্নো ভবিষ্যতি? ন, তদ্বদ্বাতাদিজত্বেনানির্দেশাত্||২১-২২||

আতঙ্কদর্পণ ব্যাখ্যা (বাচস্পতি বৈদ্য কৃত)

একদোষস্যাপি দুরুপচারাদ্ দোষদ্বযানুবন্ধেন দুষ্টিং গতস্য দোষত্রযসম্বন্ধসাম্যেন সন্নিপাতজানন্তরং দুষ্টপ্রতিশ্যাযলিঙ্গমাহ– প্রক্লিদ্যত ইত্যাদি| আনহ্যত ইতি বিবধ্যতে, বিব্রিযত ইতি বিগতাবরণা ভবতি, ক্লেদশোষপিধানবিবরণানি নৈককালং ভিন্নদোষজানি বোদ্ধব্যানি, তেন বিরোধো নোদ্ভাবনীযঃ| ইত্থম্ভূতলিঙ্গং দুষ্টপ্রতিশ্যাযং পরস্পরবিরুদ্ধোপক্রমদোষসম্বন্ধাত্ কৃচ্ছ্রসাধ্যং জানীযাত্| অযং চ পঞ্চানামেবাবস্থান্তরতযাঽনন্যত্বান্ন ষষ্ঠো গণনীযঃ| নন্ববস্থান্তরত্বেঽপি অভিষ্যন্দাদধিমন্থ ইব ভিন্নো ভবিষ্যতীতি? নৈবং, তদ্বদ্বাতাদিজত্বেনানির্দেশাত্||২১-২২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তজলিঙ্গমাহ– রক্তজ ইত্যাদি| উরোঘাতপ্রপীডিত ইতি উরোঘাতস্তন্ত্রান্তরপঠিতলক্ষণঃ, তেন প্রকর্ষেণ পীডিতঃ| তদ্যথা– “উরঃক্ষতমুরঃস্তম্ভঃ পূতিকর্ণকফোরসঃ| সকাসঃ সজ্বরো জ্ঞেয উরোঘাতঃ সপীনসঃ||” ইতি| অত্র পিত্তপ্রতিশ্যাযলিঙ্গান্যপি বোদ্ধব্যানি, তুল্যত্বাত্ পিত্তরক্তযোঃ| তথা চ ক্বচিত্ পঠ্যতে– “পিত্তপ্রতিশ্যাযকৃতৈর্লিঙ্গৈশ্চাপি সমন্বিতঃ|” ইতি||২৩-২৪||

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তজপ্রতিশ্যাযলিঙ্গমাহ– রক্তজ ইত্যাদি| উরোঘাতঃ তন্ত্রান্তরপঠিতলক্ষণঃ, তেন প্রকর্ষেণ পীডিতঃ, তদ্যথা– “উরঃক্ষতমুরঃস্তম্ভঃ পূতিকর্ণকফোরসঃ| সকাসঃ সজ্বরো জ্ঞেয উরোঘাতঃ সপীনসঃ||” ইতি| অত্র পিত্তপ্রতিশ্যাযলিঙ্গান্যপি বোদ্ধব্যানি, তুল্যত্বাত্পিত্তরক্তযোঃ| তথাচ ক্বচিত্পঠ্যতে– “পিত্তপ্রতিশ্যাযকৃতৈর্লিঙ্গৈশ্চাপি সমন্বিতঃ” ইতি||২৩-২৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অপ্রতিক্রিযযা কালান্তরেণ সর্ব এব দুষ্টপ্রতিশ্যাযা ভবন্তি, তে চাসাধ্যা ইত্যাহ– সর্ব এবেত্যাদি| মূর্ছন্তি চাত্র ক্রিময ইতি অত্রেতি এষু, বহুবচনান্তাত্ত্রল্প্রত্যযবিধিঃ; অন্যে তু প্রত্যাসন্নত্বাত্ রক্তজ এব ক্রিমিমূর্ছনং বদন্তি| শ্বেতা ইতি কফাধিকত্বাত্ প্রতিশ্যাযস্য সর্বত্র কফজা এব শ্বেতক্রিমযো ভবন্তি| ‘ক্রিমিতো যঃ শিরোরোগস্তুল্যং তেনাস্য লক্ষণম্’ ইতি ক্রিমিজশিরোরোগেণেহ তুল্যং লিঙ্গং, তচ্চ “নিস্তুদ্যতে যস্য শিরোঽতিমাত্রম্” ইত্যাদিনা বক্ষ্যমাণম্||২৫-২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্ব এব প্রতিশ্যাযা অপ্রতিক্রিযমাণাঃ কালান্তরেণ দুষ্টতাং যান্তি, তে চাসাধ্যা ভবন্তীত্যত আহ– সর্ব ইত্যাদি| অত্র এষু প্রতিশ্যাযেষু, বহুবচনান্তাত্ত্রল্| অন্যে তু প্রত্যাসন্নত্বাত্ রক্তজ এব ক্রিমিমূর্ছনং বদন্তি| শ্বেত ইতি কফাধিকত্বাত্| প্রতিশ্যাযে সর্বত্র কফজা এব শ্বেতাঃ কৃমযো ভবন্তি| ক্রিমিজো য ইত্যাদি ক্রিমিজশিরোরোগেণ তুল্যং লিঙ্গমিত্যর্থঃ| তল্লক্ষণম্– “নিস্তুদ্যতে যস্য শিরোঽতিমাত্রম্” ইত্যাদি শিরোরোগনিদানে বক্ষ্যমাণম্||২৫-২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অতঃ পরমপরান্ বিকারান্ প্রবৃদ্ধাঃ প্রতিশ্যাযাঃ কুর্বন্তি, তানাহ– বাধির্যমিত্যাদি| ঘোরান্নযনামযানিত্যভিধানাদেবান্ধ্যে লব্ধে বিশেষেণ তত্করত্বপ্রতিপাদনার্থমান্ধ্যগ্রহণম্| অঘ্রত্বমিতি ন জিঘ্রতীত্যঘ্রস্তস্য ভাবোঽঘ্রত্বম্| ‘ঘ্রা’ গন্ধোপাদানে, ইত্যস্মাত্ ‘সুপি স্থঃ’ ইত্যত্র যোগবিভাগাত্ কপ্রত্যযঃ||২৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অতঃ পরমপরান্ যান্ বিকারান্ প্রবৃদ্ধাঃ প্রতিশ্যাযাঃ কুর্বন্তি তানাহ– বাধির্যমিত্যাদি| ঘোরনযনামযাভিধানাদেবান্ধ্যে লব্ধে বিশেষেণ তত্করত্বপ্রতিপাদনার্থমান্ধ্যগ্রহণম্| অঘ্রত্বমিতি ন জিঘ্রতীত্যঘ্রঃ, তস্য ভাবোঽঘ্রত্বম্| ‘ঘ্রা’ গন্ধোপাদানে, ইত্যস্মাত্ “সুপি স্থঃ” ইত্যত্র “সুপি” ইতি যোগবিভাগাত্কপ্রত্যযঃ||২৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সুশ্রুতে নাসারোগা একত্রিংশদুক্তাঃ, অত্রাপ্যপীনসমারভ্য প্রতিশ্যাযপর্যন্তেন পঞ্চদশোক্তাঃ, শেষসঙ্খ্যাপূরণায অপরান্ ষোডশ নাসারোগানাহ– অর্বুদং সপ্তধেত্যাদি| একৈকদোষরক্তমাংসমেদঃসম্ভবত্বেন ষডর্বুদানি, শালাক্যসিদ্ধান্তেন সন্নিপাতজমধিকম্, এবং সপ্ত| তথাচ বিদেহঃ– “সর্বলিঙ্গং রুজাযুক্তমর্বুদং বিদ্ধি সর্বজম্|” ইতি| শোথাশ্চত্বারো বাতপিত্তকফসন্নিপাতজভেদাত্, এবমর্শোঽপি চতুর্বিধং, রক্তপিত্তং চতুর্বিধমপি তচ্চ রক্তপিত্তত্বসামান্যাদেকত্বেন গণনীযং, তেন ন সঙ্খ্যাতিরেকঃ| অর্বুদাদীনাং তত্র তত্রোক্তানামত্রাভিধানং শালাক্যোক্তসঙ্খ্যাপূরণার্থমাশ্রযপ্রভাবেণাতিরিক্তলিঙ্গাদিখ্যাপনার্থং চ||২৮||

আতঙ্কদর্পণ ব্যাখ্যা (বাচস্পতি বৈদ্য কৃত)

সুশ্রুতে নাসারোগা একত্রিংশদুক্তাঃ| তত্র পীনসমারভ্য প্রতিশ্যাযপর্যন্তেন পঞ্চদশোক্তাঃ, অপরান্ ষোডশ সঙ্খ্যাপূরণায নাসারোগানাহ– অর্বুদমিত্যাদি| বাতপিত্তকফশোণিতমাংসমেদোজত্বেন ষড্বিধমর্বুদং, শালাক্যসিদ্ধান্তেন, বিদেহেন সন্নিপাতজমধিকমুক্তম্, এবং সপ্ত| শোথাশ্চত্বারো বাতপিত্তকফসন্নিপাতভেদাত্ এবমর্শোঽপি চতুর্বিধং, সহজরক্তজযোরর্শসোর্দোষজেঽন্তর্ভাবঃ| রক্তপিত্তং চতুর্বিধমপি রক্তপিত্তত্বসামান্যাদেকত্বেন গণনীযং, তেন ন সঙ্খ্যাতিরেকঃ| অর্বুদাদীনামুক্তানামপ্যত্রাভিধানং শালাক্যোক্তসঙ্খ্যাপূরণায, আশ্রযপ্রভাবেণাতিরিক্তলিঙ্গাদিখ্যাপনার্থং চ| ঘ্রাণার্শোঽর্বুদযোর্গ্রন্থান্তরে ভেদ উক্তঃ, তদ্যথা– “শিরোললাটতালূনাং গৌরবং দুঃখনিদ্রতা| অর্শসামর্বুদানাং চ দোষৈঃ শেষাকৃতিঃ সমা|| অর্শাংসি গোস্তনাকারাণ্যর্বুদং কোলসম্মিতম্|” ইতি||২৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং নাসারোগনিদানং সমাপ্তম্||৫৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং নাসারোগনিদানম্||৫৮||