৪৫. নাডীব্রণনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ভগ্নস্যাপি ব্রণস্যোপেক্ষযা নাডী ভবতি, অতোঽনন্তরং নাডীমাহ– যঃ শোথমিত্যাদি| উপেক্ষত ইতি পীডনশোধনাদিকং ন করোতি| প্রচুরপূয ইত্যনেন গম্ভীরপাকিত্বমুক্তম্| অসাধুবৃত্তঃ অহিতাহারাচারঃ| স্থানানি পূর্ববিহিতানীতি ব্রণাস্রাববিজ্ঞানীযোক্তানি ত্বঙ্মাংসসিরাস্নাযুসন্ধ্যস্থিকোষ্ঠমর্মাণি||১||

আতঙ্কদর্পণ ব্যাখ্যা (বাচস্পতি বৈদ্য কৃত)

ভগ্নস্যাপি ব্রণস্যোপেক্ষযা নাডীসম্ভবাত্তদনন্তরং নাডীমাহ– য ইত্যাদি| যোঽপক্বং শোফমামমিত্যুপেক্ষতে পীডনশোধনাদীনি ন করোতি, অথবা যঃ যুরুষঃ প্রচুরপূযং ব্রণমুপেক্ষতে ইতি সম্বন্ধঃ| প্রচুরপূযমিত্যনেন গম্ভীরপাকিত্বং দর্শযতি| অসাধুবৃত্তঃ অহিতাহারাচারঃ| সপূযঃ তস্য পূর্বোক্তানি ব্রণাস্রাববিজ্ঞানীযোক্তানি ত্বঙ্মাংসসিরাস্নাযুসন্ধ্যস্থিকোষ্ঠমর্মাণি স্থানানি বিদার্যান্তঃ প্রবিশতি||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্যেতি পূযস্য| নাডীবেতি অন্তঃশুষিরলতাদিনাডীবত্|২|–

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যেত্যাদি| পূযস্যাতিমাত্রগমনাদ্গতিরিষ্যতে, ইষ্যতে চেতি চশব্দো নাডীনিরুক্তিপক্ষান্তরসমুচ্চযে, তামেব নাডীনিরুক্তিমাহ– নাডীত্যাদি| যেন হেতুনা নাডীব প্রণালীব যদ্বহতি, তেন হেতুনা নাডী মতেত্যর্থঃ| অন্তঃশুষিরনালা নাডী|২|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তাসাং কালান্তরসম্ভবেন দোষানুবন্ধেন সঙ্খ্যামাহ– দোষৈস্ত্রিভিরিত্যাদি| দোষৈঃ পৃথক্ তিস্রঃ| একশশ্চ সম্মূর্ছিতৈরিতি প্রত্যেকং বৃদ্ধ্যা মিশ্রীভূতৈস্ত্রিভিশ্চতুর্থী; কার্তিকস্তু সন্নিপতিতৈরিত্যধ্যাহার্য একশশ্চ সন্নিপতিতৈরন্যা| সম্মূর্ছিতৈঃ সংশ্লিষ্টৈরপরাস্তিস্রঃ| অত এবোক্তং সুশ্রুতে– “দোষদ্বযাভিহিতলক্ষণদর্শনেন তিস্রো গতীর্ব্যতিকরপ্রভবাস্তু বিদ্যাত্|” (সু. নি. অ. ১০) ইতি| ব্যতিকরপ্রভবা দ্বন্দ্বপ্রভবাঃ; অপি চকারৌ সার্থকাবিত্যাহুঃ| ন চোক্তপঞ্চসঙ্খ্যাহানিঃ, অস্মিন্ পক্ষেঽতিদেশেনোক্তযোর্দ্বন্দ্বসন্নিপাতযোঃ সর্বত্রাগণনাত্| শল্যনিমিত্ততোঽন্যেতি আগন্তুরপরেত্যর্থঃ| ইতি পঞ্চ নাড্যঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

তাসাং কালান্তরসম্ভবেন দোষানুবন্ধেন সঙ্খ্যামাহ– দোষৈরিত্যাদি| ত্রিভির্দোষৈস্তিস্রঃ, শল্যনিমিত্ততোঽন্যেতি আগন্তুরিত্যর্থঃ| এবং পঞ্চ নাড্যঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজামাহ– তত্রেত্যাদি| অধিকং স্রবতি ক্ষপাস্বিতি শৈত্যেন বাতবৃদ্ধে রাত্রাবধিকং স্রবণম্|৩|–

আতঙ্কদর্পণ ব্যাখ্যা (বাচস্পতি বৈদ্য কৃত)

তত্র বাতজামাহ– তত্রেত্যাদি| পরুষং কর্কশং সূক্ষ্মং মুখং যস্যাঃ সা তথা, শৈত্যেন বাতবৃদ্ধিরতো রাত্রাবধিকং স্রবতি|৩|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তজামাহ– পিত্তাদিত্যাদি| অধিকমুষ্ণমহঃসু চেতি দিবা ঔষ্ণ্যেন পিত্তকোপাত্||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পিত্তজামাহ– পিত্তাদিত্যাদি| পরিদাহঃ সমন্তাদ্দাহঃ, অধিকমুষ্ণম্, অহঃস্বিতি দিবসেষু, ঔষ্ণ্যেন পিত্তপ্রকোপাত্||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফজামাহ– জ্ঞেযেত্যাদি| বহুঘনার্জুনপিচ্ছিলাস্রা ইতি অত্রার্জুনঃ শ্বেতঃ, ঘনঃ সান্দ্রঃ, আস্রশব্দ আস্রাবশব্দৈকদেশপাঠঃ, পদেঽপি পদৈকদেশপ্রযোগাত্| যথা “জে প্রোষ্ঠপদানাম্” ইত্যত্র জে ইত্যনেনৈব জাত ইত্যুচ্যতে| পিচ্ছিলাস্রুরিতি পাঠেঽপ্যযমেবার্থঃ| আস্রুশব্দঃ সম্পদাদিষু পাঠাত্ ক্বিবন্তঃ, তুগভাবস্ত্বাগমানিত্যত্বাত্|৪|–

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লেষ্মজামাহ– জ্ঞেযা ইত্যাদি| বহুরধিকঃ, ঘনঃ সান্দ্রঃ, অর্জুনঃ শ্বেতঃ, পিচ্ছিলঃ আস্রঃ আস্রাবো যস্যাং সা তথা| আস্রশব্দেন আস্রাব উচ্যতে| অন্যে ‘পিচ্ছিলাস্রুঃ’ ইতি পঠন্তি| অত্রাপ্যযমেবার্থঃ| আস্রুশব্দঃ সম্পদাদিত্বাত্ক্বিবন্তঃ, তুগভাবস্ত্বাগমানিত্যত্বাত্| রজনীপ্রবৃদ্ধেতি শৈত্যেন শ্লেষ্মণঃ প্রকোপাত্|৪|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্রিদোষজামাহ– দাহেত্যাদি| অভিহিতানীতি প্রত্যেকং বাতাদিজনাডীকথিতানি| অসুক্ষযকরীমিতি মারণাত্মিকাং, কালরাত্রিং মরণকারিণীং যমভগিনীমিব| ‘গতিং ত্বসুহরাম্’ ইতি পাঠান্তরম্||৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিদোষজামাহ– দাহেত্যাদি| অভিহিতানীতি পূর্বোক্তদোষত্রযলক্ষণানি অসুক্ষযকরীমিতি মারণাত্মিকাম্| কালরাত্রিমিবেতি মৃত্যুরূপামিব||৪||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শল্যনিমিত্তামাহ– নষ্টমিত্যাদি| নষ্টমদৃশ্যমানম্| কথঞ্চিদিতি বেগক্ষযাদিকারণানামনিযমার্থমুক্তম্| অনুমার্গং মার্গং লক্ষীকৃত্য| কেচিত্ ‘অণুমার্গম্’ ইতি পঠিত্বা শল্যবিশেষণতযা যোজযন্তি| কিন্ত্বস্মিন্ পক্ষেঽণুমার্গত্বেনৈব শল্যস্যাদর্শনে প্রযুক্তে কথঞ্চিদিতি নিরর্থকং স্যাত্| উদীরিতেষ্বিতি ত্বগাদিষু| ফেনিলং ফেনবন্তম্| মথিতমুন্মথিতম্| উষ্ণমুষ্ণস্পর্শম্| এতে চ ধর্মাঃ প্রসারণাকুঞ্চনাদৌ চলতা শল্যেন মাংসাদিক্ষোভেণ ভবন্তি||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

শল্যনিমিত্তামাহ– নষ্টমিত্যাদি| নষ্টদৃশ্যমানং, কথঞ্চিত্ প্রমাদাত্, অনুমার্গং মার্গং লক্ষীকৃত্য| কেচিদ্ ‘অণুমার্গম্’ ইতি পঠন্তি| তত্র শল্যবিশেষণতযা যোজযন্তি| উদীরিতেষ্বিতি ত্বঙ্মাংসাদিষু পূর্বোক্তেষু| সা নাডী, ফেনিলং ফেনবর্ণম্, উন্মথিতম্, উষ্ণমুষ্ণস্পর্শম্, এতে চ ধর্মাঃ প্রসারণাদৌ চলতা শল্যেন মাংসাদিক্ষোভেণ ভবন্তি||৫||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যত্বাদিকমাহ– নাডীত্যাদি| ননু, নাডী ত্রিদোষপ্রভবা ন সিধ্যেদিতি পুনরুক্তম্, অসুক্ষযকরীমিত্যনেনৈবাসাধ্যত্বস্যোক্তত্বাত্| নৈবম্, অযং গ্রন্থঃ সুশ্রুতেন নিদানস্থানোক্তমেব ত্রিদোষনাড্যা অসাধ্যত্বমনূদ্য তদন্যাসাং শেষত্বনিশ্চযেন যত্নসাধ্যত্বপ্রতিপাদনায চিকিত্সিতে পঠিতঃ, স এবাত্র মাধবকরেণ লিখিত ইত্যদোষঃ||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যামাহ– নাডীত্যাদি| শেষা বাতপিত্তকফশল্যজা ইতি||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তবিরচিতাযাং মধুকোশব্যাখ্যাযাং নাডীব্রণনিদানং সমাপ্তম্||৪৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং নাডীব্রণনিদানং সমাপ্তম্||৪৫||