২. জ্বরনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অথ সর্বরোগপ্রাধান্যাত্ প্রথমং জ্বরো বাচ্যঃ| প্রাধান্যং চ তস্য শারীররোগেষু প্রথমোত্পন্নত্বাত্, বলবত্ত্বাত্, দেহেন্দ্রিযমনস্তাপিত্বাত্, জন্মনিধনযোরবশ্যম্ভাবিত্বাত্, স্থাবরজঙ্গমরূপসর্বভূতব্যাপিত্বাচ্চ; নৈবমন্যে বিকারাঃ| যদুক্তং চরকে– “দেহেন্দ্রিযমনস্তাপী সর্বরোগাগ্রজো বলী| জ্বরঃ প্রধানো রোগাণামুক্তো ভগবতা পুরা|| তস্য প্রাণিসপত্নস্য ধ্রুবস্য প্রলযোদযে|” (চ. চি. অ. ৩) ইত্যাদি; যাবদ্ “ভগবন্! বক্তুমর্হসি” (চ. চি. অ. ৩) ইতি| তথা– “জ্বরেণাবিশতা ভূতং নহি কিঞ্চিন্ন তপ্যতে|” (চ. চি. অ. ৩) ইত্যাদি| উক্তং চ , পালকাপ্যে– “পাকলঃ স তু নাগানামভিতাপস্তু বাজিনাম্| গবামীশ্বরসঞ্জ্ঞশ্চ মানবানাং জ্বরো মতঃ|| অজাবীনাং প্রলাপাখ্যঃ করভে চালসো ভবেত্| হারিদ্রো মহিষীণাং তু মৃগরোগো মৃগেষু চ| পক্ষিণামভিঘাতস্তু মত্স্যেষ্বিন্দ্রমদো মতঃ| পক্ষপাতঃ পতঙ্গানাং ব্যাডেষ্বক্ষিকসঞ্জ্ঞিতঃ||” ইত্যাদি| তথাঽন্যত্র– “জলস্য নীলিকা ভূমেরূষরো বৃক্ষস্য কোটরঃ|” ইত্যাদি| তস্য প্রাগুত্পত্তিমাহ– দক্ষাপমানেত্যাদি| দক্ষাপমানেন দক্ষপ্রযুক্তপরিভবেন ক্রুদ্ধস্য রুদ্রস্য নিঃশ্বাসাত্ সম্ভব উত্পত্তির্যস্য স তথা| নিঃশ্বাসোঽত্র ক্রোধলিঙ্গত্বেন নির্দিষ্টঃ, অত এব সুশ্রুতেন “রুদ্রকোপাগ্নিসম্ভূতঃ” (সু. উ. তং. অ. ৩৯) ইত্যুক্তম্| ক্রুদ্ধেন রুদ্রেণ ললাটে তৃতীযমাগ্নেযং চক্ষুঃ সৃষ্ট্বা ততোঽপ্যাগ্নেযো বাণো নির্মিতঃ| যদাহ চরকঃ– “সৃষ্ট্বা ললাটে চক্ষুর্বৈ দগ্ধ্বা তানসুরান্প্রভুঃ বাণং ক্রোধাগ্নিসন্তপ্তমসৃজচ্ছত্রুনাশনম্||” (চ. চি. অ. ৩) ইতি; অত্র সত্রনাশনং যজ্ঞনাশনম্| এষা চ জ্বরোত্পত্তিকথা চরকচিকিত্সিতে সবিশেষা শ্রোতব্যা| এতেন রুদ্রকোপস্য বিপ্রকৃষ্টকারণত্বমুক্তং; যদি হি ততো জ্বরো নোদপত্স্যতং অধুনাঽপ্যপচারান্নোদপত্স্যত ইতি ভট্টারহরিচন্দ্রঃ| এতদভিধানস্য চিকিত্সানুপযোগিত্বেনান্যে টীকাকৃতোঽন্যথা ব্যাচক্ষতে– কোপোদ্ভবত্বেন তৈজসত্বং প্রকাশ্যতে; ক্রোধো হ্যাগ্নেযঃ; যদাহ চরকঃ– “ক্রোধাত্ পিত্তং” (চ. চি. অ. ৩) ইতি| তেন সর্বজ্বরে পিত্তাবিরোধিনী ক্রিযা কার্যেতি সিধ্যতি| যদুক্তং বাগ্ভটেনৈব– “ঊষ্মা পিত্তাদৃতে নাস্তি জ্বরো নাস্ত্যূষ্মণা বিনা| তস্মাত্ পিত্তবিরুদ্ধানি ত্যজেত্ পিত্তাধিকেঽধিকম্||” (বা. চি. অ. ১) ইতি| অত এব চরকে কট্বম্ললবণান্ পাচনান্ পরিত্যজ্য তরুণজ্বরে পাচকত্বেন তিক্তকো রসঃ পিত্তঘ্নো নির্দিষ্টঃ| যদাহ– “লঙ্ঘনং স্বেদনং কালো যবাগূস্তিক্তকো রসঃ| পাচনান্যবিপক্বানাং দোষাণাং তরুণজ্বরে||” (চ. চি. অ. ৩) ইতি| ( কালোঽত্রাষ্টাহ ইতি)| অন্যে ত্বাহুঃ– রুদ্রকোপসম্ভবত্বেন দেবতাত্মকত্বাত্ পূজার্হত্বমুপদর্শিতম্| যদাহ বিদেহঃ– “জ্বরস্তু পূজনৈর্বাঽপি সহসৈবোপশাম্যতি||” ইতি| হরিবংশেঽপি– “জ্বরস্ত্রিপাদস্ত্রিশিরাঃ ষড্ভুজো নবলোচনঃ| ভস্মপ্রহরণো রৌদ্রঃ কালান্তকযমোপমঃ||” ইতি মূর্তিমানেবোক্তঃ| বহুবিধমপি জ্বরং সঙ্ক্ষেপেণাহ– জ্বরোঽষ্টধেত্যাদি| অষ্টত্বং বিবৃণোতি– পৃথগিত্যাদি| তচ্চ সম্প্রাপ্তৌ বিবৃতম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ সর্বরোগপ্রাধান্যাত্ প্রথমং জ্বরো বাচ্যঃ| প্রাধান্যং চাস্য শারীররোগেষু প্রথমোত্পন্নত্বাত্, বলবত্ত্বাদ্দেহেন্দ্রিযমনস্তাপিত্বাচ্চ জন্মনিধনযোরবশ্যম্ভাবিত্বাচ্চ স্থাবরজঙ্গমরূপসর্বভূতব্যাপিত্বাচ্চ, নৈবমন্যে বিকারাঃ| উক্তং চ চরকে– “দেহেন্দ্রিযমনস্তাপী সর্বরোগাগ্রজো বলী| জ্বরঃ প্রধানো রোগাণামুক্তো ভগবতা পুরা||” ইতি| তথা– “জ্বরেণাবিশতা ভূতং নহি কিঞ্চিন্ন তপ্যতে|” ইতি| উক্তং চ গজবৈদ্যকে– “পাকলঃ স তু নাগানামভিতাপস্তু বাজিনাম্| গবামীশ্বরসঞ্জ্ঞস্তু মানবানাং জ্বরো মতঃ|| অজাবীনাং প্রলাপাখ্যঃ করভেষ্বলসো ভবেত্| হারিদ্রো মহিষাণাং তু মৃগরোগো মৃগেষু চ|| পক্ষিণামভিঘাতস্তু মত্স্যেষ্বিন্দ্রমদো মতঃ| পক্ষঘাতঃ পতঙ্গানাং , ব্যালেষ্বক্ষিকসঞ্জ্ঞকঃ||” ইত্যাদি| তথা তন্ত্রান্তরেঽপি– “জলস্য নীলিকা, ভূমেরূষরো, বৃক্ষস্য কোটরঃ|” ইত্যাদি| তস্য প্রাগুত্পত্তিমাহ– দক্ষেত্যাদি| দক্ষাপমানেন দক্ষপ্রযুক্তপরিভবেন ক্রুদ্ধস্য রুদ্রস্য নিঃশ্বাসাত্সম্ভব উত্পত্তির্যস্য স তথা| নিঃশ্বাসোঽত্র ক্রোধলিঙ্গত্বেন নির্দিষ্টঃ| যথা সুশ্রুতে– “রুদ্রকোপাগ্নিসম্ভূতঃ সর্বভূতপ্রতাপনঃ|” ইতি| ক্রুদ্ধেন রুদ্রেণ ললাটে তৃতীযকমাগ্নেযং চক্ষুঃ স্পৃষ্ট্বা ততোঽপ্যাগ্নেযো বাণো নির্মিতঃ| উক্তং চ চরকে– “ সৃষ্ট্বা ললাটে চক্ষুর্বৈ দগ্ধ্বা তানসুরান্ প্রভুঃ| বাণং ক্রোধাগ্নিসন্তপ্তমসৃজচ্ছত্রুতাপনম্||” ইতি| এতাবতা ক্রোধোদ্ভবত্বেন তস্য তৈজসত্বং প্রকশ্যতে| তদুক্তং চরকে– “ক্রোধাত্পিত্তম্” ইতি| তেন সর্বজ্বরে পিত্তাবিরোধিনী ক্রিযা কার্যেতি সিধ্যতি| যদুক্তং বাগ্ভটে– “ঊষ্মা পিত্তাদৃতে নাস্তি জ্বরো নাস্ত্যূষ্মণা বিনা| তস্মাত্পিত্তবিরুদ্ধানি ত্যজেত্পিত্তাধিকেঽধিকম্||” ইতি| অন্যে ত্বাহুঃ– রুদ্রসম্ভবত্বেন দেবতাত্মকত্বাত্পূজার্হত্বমুপদর্শিতম্| যথাহ বিদেহঃ– “জ্বরস্তু পূজনৈর্বাঽপি সহসৈবোপশাম্যতি|” ইতি| উক্তং চ হরিবংশেঽপি– “জ্বরস্ত্রিপাদস্ত্রিশিরাঃ ষড্ভুজো নবলোচনঃ| ভস্মপ্রহরণো রৌদ্রঃ কালান্তকযমোপমঃ||” ইতি মূর্তিমানেবোক্তঃ| বহুবিধমপি সঙ্ক্ষেপেণাহ– জ্বরোঽষ্টধেতি| অষ্টধাত্বং বিবৃণোতি পৃথক্– বাতিকঃ, পৈত্তিকঃ, শ্লৈষ্মিকঃ, এবং ত্রযঃ; বাতপৈত্তিকঃ, বাতশ্লৈষ্মিকঃ, পিত্তশ্লৈষ্মিকঃ, এবং দ্বন্দ্বজাস্ত্রযঃ; সাঙ্ঘাতিকঃ সান্নিপাতিক একঃ; আগন্তুজ একঃ; এবমষ্টৌ জ্বরা ইতি||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্প্রাপ্তিমাহ– মিথ্যেত্যাদি| আহারস্য মিথ্যাত্বং প্রকৃত্যাদীনামাহারোপযোগহেতূনাং বিরুদ্ধত্বেনোপযোগঃ| যদাহ চরকঃ– "তত্র খল্বিমান্যষ্টাবাহারবিধিবিশেষাযতনানি ভবন্তি; তদ্যথা– প্রকৃতিকরণসংযোগরাশিদেশকালোপযোগসংস্থোপযোক্ত্রষ্টমানি|" (চ. বি. অ. ১) ইতি| অত্র প্রকৃতির্দ্রব্যাণাং স্বাভাবিকগুরুত্বলঘুত্বাদিগুণযোগঃ, যথা– মাষমুদ্গযোঃ; করণং সংস্কারঃ, যথা– ব্রীহের্গুরোর্লঘবো লাজাঃ; সংযোগঃ সংহতীভাবঃ, যথা– ক্ষীরমত্স্যযোঃ; রাশিরাহারস্য দ্রবাদ্রবস্যাবযবেন সমুদাযেন বা পরিমাণং; দেশো দ্রব্যোত্পত্তিপ্রচারাদিস্থানং; কালো নিত্যগশ্চাবস্থিকশ্চ; উপযোগসংস্থা উপযোগনিযমঃ, যথা– জীর্ণান্ন এব ভুঞ্জীত; উপযোক্তা স্বযং নিরূপিতাত্মপ্রকৃত্যাদিকঃ পুরুষ ইতি| বিহারস্য মিথ্যাত্বমযথাবলমারম্ভাদি| আমাশযাশ্রযা ইত্যনেনামাশযপ্রাপ্তিব্যতিরেকেণ দোষা জ্বরং নারভন্ত ইতি প্রতিপাদযন্তি| আমাশযশ্চ “নাভিস্তনান্তরং জন্তোরামাশয ইতি স্মৃতঃ|” (চ. বি. অ. ২) ইতি চরকেণোক্তঃ| বহির্নিরস্য কোষ্ঠাগ্নিমিতি কোষ্ঠাগ্নিরেব দোষোত্ক্ষিপ্তো বহির্নির্গত ঊষ্মতযা প্রতিভাতি| কোষ্ঠাগ্নিমিতি ধাত্বাদ্যগ্নিনিরাসার্থম্| জ্বরদা জ্বরকারিণঃ| রসানুগা রসসম্বদ্ধাঃ, অবশ্যং রসং দূষযিত্বা জ্বরোত্পাদকা ইতি| ‘এষা চ সম্প্রাপ্তিঃ শারীরাণামেব নত্বাগন্তূনাং, তেষাং ব্যথাপূর্বকত্বং ততো বাতাদ্যনুবন্ধঃ,’ ইতি জেজ্জটঃ| অত এব সুশ্রুতে আগন্তুসম্প্রাপ্তিঃ পৃথগেব পঠ্যতে| যথা– “শ্রমক্ষতাভিঘাতেভ্যো দেহিনাং কুপিতোঽনিলঃ| পূরযিত্বাঽখিলং দেহং জ্বরমাপাদযেদ্ভৃশম্||’ (সু. উ. তং. অ. ৩৯) ইতি| অত্র ন আমাশযগত এব বাযুঃ, কিন্তূর্ধ্বাধস্তির্যগ্রসবাহিস্রোতশ্চরঃ| চরকেঽপ্যুক্তম্– “তত্রাভিঘাতজো বাযুঃ প্রাযো রক্তং প্রদূষযন্| সব্যথাশোথবৈবর্ণ্যং করোতি সরুজং জ্বরম্||” (চ. চি. অ. ৩) ইতি| ননু, আগন্তুজ্বরেঽপ্যূষ্মোপলভ্যতে, “ঊষ্মা চ পিত্তাদৃতে নাস্তি” (বা. চি. অ. ১) ইত্যুক্তম্, অত আগন্তুরপি শারীরঃ স্যাত্| নৈবম্, উত্তরকালং তদুত্পত্তেঃ| যদুক্তম্– “আগন্তুর্হি ব্যথাপূর্বো জ্বরোঽষ্টমো ভবতি; স কিঞ্চিত্কালমাগন্তুঃ কেবলো ভূত্বা পশ্চাদ্দোষৈরনুবধ্যতে|” (চ. নি. অ. ১); তথা– “আগন্তুরন্বেতি নিজং বিকারং নিজস্তথাঽঽগন্তুমপি প্রবৃদ্ধঃ|” (চ. সূ. অ. ১৯) ইতি| ননু, মিথ্যাহারেত্যাদিনা একৈব সম্প্রাপ্তিরুক্তা; এতচ্চ ন যুক্তং, যতঃ সম্প্রাপ্তিঃ সংযোগভেদঃ, সংযোগভেদশ্চ সংযোগিভেদনিবন্ধনঃ, সংযোগিনশ্চাত্র বাতাদযো নানাবিধাঃ, ততশ্চ সম্প্রাপ্তেরপি নানাত্বং স্যাত্; নহি বাতপিত্তযোর্যঃ সংযোগঃ স এব কফপিত্তযোরিতি| উচ্যতে– অনেকৈব সম্প্রাপ্তিঃ কিন্ত্বেকজাতীযা, আশযদুষ্ট্যাদেঃ সর্বত্রাবিশেষেণাভিধানাত্; এবমাগন্তুসম্প্রাপ্তিরপি সংযোগভেদাদ্ভিন্নেতি||২||

আতঙ্কদর্পণ ব্যাখ্যা (বাচস্পতি বৈদ্য কৃত)

জ্বরস্য সম্প্রাপ্তিমাহ– মিথ্যাহারেত্যাদি| “অকালে চাতিমাত্রং চ অসাত্ম্যং যচ্চ ভোজনম্| বিষমং চাপি যদ্ভুক্তং মিথ্যাহারঃ স উচ্যতে||” ইতি| মিথ্যাহারো দেশকালপ্রকৃত্যাদিবিরুদ্ধঃ, সংযোগবিরুদ্ধশ্চ ক্ষীরমত্স্যযোরিব| মিথ্যাবিহারোঽযথাবলমারম্ভঃ| “অশক্তঃ কুরুতে কর্ম শক্তিমাত্রং করোতি যঃ| মিথ্যাবিহার ইত্যুক্তঃ সদা তং পরিবর্জযেত্||” ইতি| ঈদৃশস্য পুরুষস্য আমাশযাশ্রযা দোষা বাতপিত্তশ্লেষ্মাণঃ কোষ্ঠাগ্নিং বহির্নিরস্য জ্বরদাঃ স্যুঃ জ্বরকারিণো ভবেযুঃ আমাশযস্থানমুক্তং চরকে– “নাভিস্তনান্তরং জন্তোরামাশয ইতি স্মৃতঃ||” ইতি| কিংবিশিষ্টাঃ? রসানুগাঃ রসসম্বদ্ধাঃ রসং দূষযিত্বা জ্বরোত্পাদকা ইতি| কোষ্ঠাগ্নিমিতি ধাত্বগ্নিনিরাসার্থম্| এষা চ সম্প্রাপ্তিঃ শারীরাণামেব ন ত্বাগন্তূনাম্| তেষাং তু ব্যথাপূর্বকো বাতাদ্যনুবন্ধঃ| উক্তং চ সুশ্রুতে, যথা– “ শ্রমক্ষতাভিঘাতেভ্যো দেহিনঃ কুপিতোঽনিলঃ| পূরযিত্বাঽখিলং দেহং জ্বরমাপাদযেদ্ভৃশম্||” ইতি| উক্তং চ চরকে– “তত্রাভিঘাতজো বাযুঃ প্রাযো রক্তং প্রদূষযন্| সব্যথাশোথবৈবর্ণ্যং করোতি সরুজং জ্বরম্||” ইতি| নন্বাগন্তুরপি শারীরঃ স্যাত্, যত আগন্তুজ্বরেঽপ্যূষ্মোপলভ্যতে, ঊষ্মা চ পিত্তাদৃতে নাস্তীত্যুক্তম্| মৈবম্, আগন্তুজ্বর উত্তরকালে তদুত্পত্তিঃ| যদুক্তম্– “আগন্তুর্হি ব্যথাপূর্বো জাযতে পশ্চান্নিজৈর্দোষৈরনুবধ্যতে|” ইতি| তথা “আগন্তুরভ্যেতি নিজং বিকারং নিজস্তথাঽঽগন্তুমপি প্রবৃদ্ধঃ|” ইতি||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

জ্বরলক্ষণমাহ– স্বেদাবরোধ ইত্যাদি| স্বেদাবরোধো ঘর্মানির্গমঃ| তাপ ইতি বক্তব্যে সন্তাপগ্রহণাদ্দেহেন্দ্রিযমনসাং তাপং লক্ষযতি| তদুক্তং চরকে– “দেহেন্দ্রিযমনস্তাপী” (চ. চি. অ. ৩) ইতি; “ইন্দ্রিযাণাং চ বৈকৃত্যং জ্ঞেযং সন্তাপলক্ষণম্|” (চ. চি. অ. ৩) ইতি| তথা– “বৈচিত্ত্যমরতির্গ্লানির্মনঃসন্তাপলক্ষণম্|” (চ. চি. অ. ৩) ইতি| সর্বাঙ্গগ্রহণং সর্বাঙ্গবেদনা| যুগপদিতি মিলিতমেতল্লক্ষণং, প্রত্যেকশো ব্যভিচারাত্; স্বেদাবরোধো হি কুষ্ঠপূর্বরূপে, তথা সন্তাপো দাহাখ্যে রোগে, সর্বাঙ্গগ্রহণং সর্বাঙ্গবাতরোগে ইতি| ননু, পৈত্তিকে স্বেদাগমাত্, বাতিকে বিষমারম্ভবিসর্গিত্বাত্ সর্বাঙ্গগ্রহণাব্যবস্থিতেশ্চাব্যাপকং লক্ষণমিতি| অত্র জেজ্জটকার্তিককুণ্ডাদযঃ সমাদধুঃ– উত্সর্গাপবাদভাবেন ব্যবস্থিতিরিতি| তন্ন সঙ্গতমিত্যন্যে; বিধৌ হ্যুত্সর্গাপবাদভাবো নতু লক্ষণে, অব্যাপ্ত্যতিব্যাপ্ত্যোর্লক্ষণদোষাত্; তস্মাত্ স্বেদোঽগ্নিঃ ‘স্বিদ্যতেঽনেন’ ইতি ব্যুত্পত্ত্যা; তস্যাবরোধো দোষব্যাপ্তিঃ| বাতজ্বরে যদ্যপি বাযোশ্চলত্বেনারম্ভবিসর্গযোর্বৈষম্যং, তথাঽপি সর্বদেহগতজ্বরারম্ভকদোষদুষ্ট্যনিবৃত্তেরনুদ্ভূতসর্বাঙ্গগ্রহণস্য বিদ্যমানতৈবেতি ন ব্যভিচারঃ| চরকে তু জ্বরলক্ষণং “ জ্বরপ্রত্যাত্মিকং লিঙ্গং সন্তাপো দেহমানসঃ|” (চ. চি. অ. ৩) ইতি| ননু, “শারীরো জাযতে পূর্বং দেহে মনসি মানসঃ||” (চ. চি. অ. ৩) ইতি| চরকবচনাদ্দেহমনসোরন্যোন্যব্যভিচারাদলক্ষণমিতি চেত্; তন্ন, সূক্ষ্মতরকালব্যবহিতস্যান্যতররূপস্যাবশ্যম্ভাবিত্বাত্| যথা– গুণবদ্দ্রব্যমিতি দ্রব্যলক্ষণমিতি||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

জ্বরলক্ষণমাহ– (যত্র যস্মিন্ রোগে, যুগপদেককালে, ঈদৃশলক্ষণং দৃশ্যতে স জ্বরঃ কথ্যতে|) স্বেদাবরোধঃ স্বেদানির্গমঃ, অন্যে পৈত্তিকে স্বেদাবগমাল্লক্ষণে ব্যভিচারঃ, তেন স্বেদোঽগ্নিঃ ‘স্বিদ্যতেঽনেন’ ইতি ব্যুত্পত্ত্যা, তস্যাবরোধো দোষব্যাপ্তিঃ| সন্তাপেত্যত্র সংশব্দো দেহেন্দ্রিযমনসাং তাপং লক্ষযতি| সর্বাঙ্গগ্রহণং সর্বাঙ্গবেদনেত্যাহুঃ| স্বেদাবরোধ ইত্যত্র ‘বেগোপরোধ’ ইত্যন্যে পঠন্তি| তত্র বেগোপরোধো বাতমূত্রপুরীষাদীনামনির্গমনং; তদযুক্তম্, পিত্তজ্বরে পুরীষাদীনাং নির্গমনেন তত্রাঽব্যাপ্তেঃ||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– শ্রম ইত্যাদি| শ্রমঃ শ্রান্তত্বমিব| অরতিরনবস্থিতচিত্তত্বম্, অরতিঃ ক্রীডাভাব ইতি কার্তিকঃ| বিবর্ণত্বং ম্লানগাত্রত্বম্| যত্তু ‘‘দুষ্টাঃ স্বহেতুভির্দোষাঃ’’ ইত্যারভ্য “স্বকালেষু জ্বরাগমম্| জনযন্ত্যথ বৃদ্ধিং চ স্ববর্ণং চ ত্বগাদিষু||” (সু. চি. অ. ৩৯) ইতি সম্প্রাপ্তৌ বৃদ্ধসুশ্রুতবচনং, তদত্যর্থজৃম্ভাদিবদ্বিশিষ্টপূর্বরূপাভিপ্রাযেণ, সম্প্রাপ্ত্যবস্থাপন্নদোষজন্যত্বাত্ পূর্বরূপস্যেতি| বৈরস্যমিতি মুখস্য বিরুদ্ধরসতা| নযনপ্লবোঽশ্রুপূর্ণনেত্রত্বম্| যদুক্তং চরকে– " আলস্যং নযনে সাস্রে" (চ. চি. অ. ৩) ইত্যাদি| আদিশব্দাদম্বুজ্বলনযোরপি অনিশ্চিতেচ্ছাদ্বেষযোর্গ্রহণম্| উক্তং হি চরকে– ‘‘জ্বলনাতপবায্বম্বুভক্তিদ্বেষাবনিশ্চিতৌ|’’ (চ. চি. অ. ৩) ইতি| অন্যে তু শৈত্যৌষ্ণ্যসাধর্ম্যাজ্জলানলৌ গ্রাহযন্তি, আদিশব্দেন চ শযনাদিকম্| তমোঽন্ধকারপ্রবিষ্টস্যেবাসংবিত্তিঃ| অপ্রহর্ষঃ প্রীত্যভাবঃ| জ্বলনেচ্ছযা শীতে লব্ধে শীতং চেতি বচনং শীতস্য বিশেষেণ বোধনার্থম্| চকারেণ বাতবিদ্বেষাদিগ্রহণমিত্যাহুঃ| উত্পত্স্যতীতি ভবিষ্যতি জ্বরে| উত্পত্স্যতীতি আত্মনেপদানিত্যত্বেন; তচ্চ চক্ষিঙ ইকারেণ ‘ অনুদাত্তঙিত আত্মনেপদম্’ (পা. অ. ১/৩/১২) ইত্যাত্মনেপদে সিদ্ধে তদর্থং ঙিত্করণেন জ্ঞাপিতমিতি শাব্দিকাঃ| গদাধরস্তু– ‘উত্পিত্সতি’ ইতি পঠিত্বা ‘পদ গতৌ’ ইত্যস্য সন্নন্তস্য ‘ সনিমীমাঘুরভলভশকপতপদাম্|’ (অ. ৭ পা. ৪ সূ. ৫৪) ইত্যাদিনা ইসি কৃতে ‘পূর্ববত্ সনঃ’ (অ. ১ পা. ৩ সূ. ৬২) ইত্যত্র ভিন্নবাক্যতযা পরস্মৈপদমিতি ব্যাচষ্টে ইতি||৪-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– শ্রম ইত্যাদি| শ্রান্তত্বমিব শ্রমঃ| অরতিরনবস্থিতচিত্তত্বম্, অরতিঃ ক্রীডাভাব ইত্যপরে| বিবর্ণত্বং মলিনগাত্রতা| বৈরস্যং মুখস্য, বিরসতা বিরুদ্ধরসতা| নযনপ্লবঃ অশ্রুপূর্ণনেত্রত্বম্| শীতবাতাতপাদিষু বিষযেষু ইচ্ছাদ্বেষৌ অভিলাষবিদ্বেষৌ| আদিশব্দাদম্বুজ্বলনযোর্গ্রহণম্| উক্তং হি চরকে– “জ্বলনাতপবায্বম্বুভক্তিদ্বেষাবনিশ্চিতৌ” ইতি| অন্যে তু শৈত্যৌষ্ণ্যাসাধর্ম্যাজ্জলানলৌ গৃহ্ণন্তি| তে ত্বাদিশব্দেন শযনাদিকং মন্যন্তে|| জৃম্ভেতি জৃম্ভা জৃম্ভণম্| অঙ্গমর্দোঽঙ্গমোটনম্| গুরুতা গাত্রাণাম্| রোমহর্ষো রোমাঞ্চঃ| অরুচির্ভোজ্যে| তমঃ অন্ধকারপ্রবিষ্টস্যেবার্থাসংবিত্তিঃ| অপ্রহর্ষঃ আনন্দাভাবঃ| শীতমিতি শীতাদৌ মুহুরিচ্ছাদ্বেষাবিতি সিদ্ধে পুনরপি শীতবচনং বিশেষেণ শীতপ্রাদুর্ভাবদর্শনার্থম্| উত্পত্স্যতি ভাবিনি জ্বরে এতানি লক্ষণানি ভবন্তি| অত্র তু মাধবেন সামান্যপূর্বলক্ষণং সুশ্রুতোক্তং লিখিতং, নতু বিশিষ্টং পূর্বরূপলক্ষণং; তচ্চাস্মাভিরিহৈব লিখ্যতে– সামান্যত ইত্যাদি| সামান্যত ইতি পূর্বপদ্যেন সম্বধ্যতে| ভাবিনি বাতিকে জ্বরেঽত্যর্থং জৃম্ভা, পৈত্তিকে নযনযোর্দাহঃ, কফজে নান্নাভিনন্দনমিতি ন অন্নাভিলাষঃ||৪-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতপিত্তকফানাং যথাপূর্বং ভূরিদারুণবিকারকর্তৃত্বেন প্রাধান্যং, যদুক্তং চরকে– ‘‘অশীতির্বাতবিকারাশ্চত্বারিংশত্পিত্তবিকারাঃ, বিংশতিঃ শ্লেষ্মবিকারাঃ|’’ (চ. সূ. অ. ২০) ইতি; তথা দারুণাশ্চ বাতবিকারা আক্ষেপকপক্ষাঘাতাদযঃ; অতঃ প্রাধান্যাত্ প্রথমং বাতজ্বরলক্ষণমাহ– বেপথুরিত্যাদি| এবমন্যত্রাপি বাতাদিক্রমনির্দেশেন বেদিতব্যম্| বিষমো বেগ ইতি বেগো জ্বরস্য প্রবৃত্তির্বৃদ্ধির্বা, তস্য বৈষম্যমনিযতকালত্বম্, অঙ্গেষু চৌষ্ণ্যাদ্যনিযতত্বম্| ক্ষবশ্ছিক্কা ‘ হা~ংচি’ ইতি লোকে| স্তম্ভো গাত্রাণাং জডিমা, রৌক্ষ্যমপি গাত্রাণামেবেতি গদাধরাদযো ব্যাচক্ষতে; তচ্চানবধানাদ্ব্যাখ্যাতমিতি লক্ষ্যতে; ক্ষবস্য স্তম্ভঃ ক্ষবস্তম্ভ ইত্যেকপদতাঽত্র যুজ্যতে| যদাহ বাগ্ভটঃ– ‘‘হর্ষো রোমাঙ্গদন্তেষু বেপথুঃ ক্ষবথোর্গ্রহঃ| ভ্রমঃ প্রলাপো ঘর্মেচ্ছা বিলাপশ্চানিলজ্বরে||’’(বা. নি. অ. ২) ইতি| চরকেঽপি নিদানে ‘‘ক্ষবথূদ্গারবিনিগ্রহঃ’’ (চ. নি. অ. ১) ইতি পঠিতম্| বিনিগ্রহশব্দস্তু তত্র নিরোধার্থ এবাচার্যেণ নির্দিষ্টঃ; যথা বাতগুল্মনিদানে– “রূক্ষান্নপানং বিষমাতিমাত্রং বিচেষ্টিতং বেগবিনিগ্রহশ্চ|” (চ. চি. অ. ৫) ইতি; তথাঽন্তর্বেগজ্বরলক্ষণে “দোষবর্চোবিনিগ্রহঃ” (চ. চি. অ. ৩) ইতি| এতেন, জ্বরমুক্তিলক্ষণে ক্ষবস্য পাঠাত্ কথমেতল্লক্ষণমিতি যদাশঙ্কিতং কার্তিককুণ্ডেন তদপি নিরস্তম্| আধ্মানং বাযুনা সবেদনমুদরপূর্ণত্বম্| শিরোহৃদ্গাত্ররুগিত্যত্র গাত্রগ্রহণেন শিরোহৃদ্গ্রহণে সিদ্ধে তদভিধানং বিশেষেণ শিরসি হৃদি চ বেদনার্থম্| এতানি রূপাণি প্রাযোভাবিত্বেন নির্দিষ্টানি সুশ্রুতেন, তেন চকারেণান্যান্যপি চরকনিদানোক্তানি বোদ্ধব্যানি| তান্যেব গদ্যেনোক্তানি সুখগ্রহণার্থং শ্লোকেন মযা প্রদর্শ্যন্তে– “ভবন্তি বিবিধা বাতবেদনাঃ পাদসুপ্ততা| পিণ্ডিকোদ্বেষ্টনং কর্ণস্বনো বক্ত্রকষাযতা|| ঊরুসাদো হনুস্তম্ভো বিশ্লেষঃ সন্ধিজানুনোঃ| শুষ্ককাসো বমির্লোমদন্তহর্ষঃ শ্রমভ্রমৌ|| অরুণং নেত্রমূত্রাদি তৃট্প্রলাপোষ্ণকামিতাঃ|” ইতি||৮-৯||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতপিত্তকফানাং যথাপূর্বং ভূরিদারুণবিকারকর্তৃত্বেন বাযোঃ প্রাধান্যমতস্তত্প্রাধান্যাত্প্রথমং বাতজ্বরলক্ষণমাহ– বেপথুরিত্যাদি| বেপথুঃ কম্পঃ| বিষমো বেগো জ্বরস্য হীনাধিকভাবেন, অঙ্গেষু চোষ্মাদ্যনিযতত্বম্| কণ্ঠৌষ্ঠপরিশোষণমিতি সুগমম্| তথা ক্ষবস্তম্ভঃ ক্ষবঃ ছিক্কা তস্যাঃ স্তম্ভোঽনির্গমনম্| কেচিত্তু ‘ক্ষবঃ স্তম্ভঃ’ ইতি ভিন্নং পদং পঠন্তি, তন্মতে ক্ষবঃ ছিক্কা, স্তম্ভো গাত্রাণামিতি ব্যাখ্যানযন্তি; তন্ন যুক্তম্| যদুক্তং বাগ্ভটে– “হর্ষো রোমাঙ্গদন্তেষু বেপথুঃ ক্ষবথোর্গ্রহঃ| ভ্রমঃ প্রলাপো ঘর্মেচ্ছা বিরমশ্চানিলজ্বরে||” ইতি| চরকেঽপি নিদানে– “ক্ষবথূদ্গারবিনিগ্রহঃ” ইতি| বিনিগ্রহশব্দস্তু নিরোধার্থ এব, যথাঽন্তর্বেগজ্বরলক্ষণে “দোষবর্চোবিনিগ্রহঃ” ইত্যেবং পঠিতঃ| রৌক্ষ্যং গাত্রাণামেব| চকারাত্ কৃষ্ণবিণ্মূত্রনেত্রত্বং সমুচ্চীযতে| অন্যে তু “রৌক্ষ্যমেব চ” ইত্যত্র স্থানে “শ্যাবাঙ্গমলমূত্রতা” ইতি পঠন্তি| অত্র গাত্রগ্রহণেন শিরোগ্রহণে সিদ্ধে তদভিধানং বিশেষেণ শিরসি হৃদি বেদনাদর্শনার্থং; শিরসি হৃদি গাত্রেষু রুক্ পীডা| বৈরস্যং বিরসতা| গাঢবিট্কতা বদ্ধমলতা| শূলাধ্মানে শূলমুদরশূলম্, আধ্মানং বাযুনা সবেদনমুদরপূর্ণত্বমিত্যর্থঃ| জৃম্ভণং জৃম্ভাবাহুল্যম্| অনিলজে জ্বরে এতানি লক্ষণানি ভবন্তি| এতানি প্রকৃতিসমসমবেতানি||৮-৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তজ্বরলক্ষণমাহ– বেগস্তীক্ষ্ণ ইত্যাদি| অতিসারঃ পিত্তস্য সরত্বেন সদ্রবা প্রবৃত্তির্ন ত্বতিসার এব, তস্য জ্বরোপদ্রবত্বাত্| নিদ্রাল্পত্বং স্বল্পনিদ্রাত্বম্| উক্তং হি সুশ্রুতে– “নিদ্রানাশোঽনিলাত্ পিত্তাত্” (সু. শা. অ. ৪) ইত্যাদি| বমিঃ পিত্তস্য কফস্থানগমনাত্| স্বেদো ঘর্মাগমনং, প্রাযেণ সামদোষেণ স্রোতসাং নিরোধাত্ সর্বজ্বরেষু ঘর্মনিরোধঃ, অত্র তু পিত্তস্য তৈক্ষ্ণ্যাজ্জ্বরপ্রভাবাদ্বা স ন ভবতীতি| প্রলাপোঽসম্বদ্ধভাষণম্| বক্ত্রকটুতা মুখতিক্তত্বং, চরকে হি পৈত্তিকনানাত্মজচত্বারিংশদ্বিকারেষু তিক্তাস্যতাযাঃ পাঠাদনুভবাচ্চ| কার্তিকস্ত্বরোচকে “কট্বম্লমুষ্ণং বিরসং চ পূতি পিত্তেন বিদ্যাল্লবণং চ বক্ত্রম্|” (চ. চি. অ. ২৬) ইতি বচনং দৃষ্টান্তমুপন্যস্য কটুমুখত্বমপীচ্ছতি| তন্ন, তত্রাপি সন্দেহাত্| যদুক্তম্– “কটু স্যাত্ কটুতিক্তযোঃ|” ইতি| তস্মাত্ “যোঽম্লং ভৃশোষ্ণং কটুতিক্তবক্ত্রঃ পীতং সরক্তং হরিতং বমেদ্বা| সদাহচোষজ্বরবক্ত্রশোষং সা পিত্তকোপপ্রভবা হি ছর্দিঃ||” (সু. উ. তং. অ. ৪৯) ইতি সুশ্রুতবচনাত্ কটুমুখত্বমপ্যেষ্টব্যমিতি| মূর্ছেতি মূর্ছা রূপাদ্যবিজ্ঞানং, তমঃপ্রবেশো বিস্মৃতিরিত্যাহুঃ| মদো মত্তত্বমিব, যথা– পূগকোদ্রবধত্তূরভক্ষণাদৌ| ভ্রম ইতি ভ্রমশ্চক্রস্থিতস্যেব ভ্রমদ্বস্তুদর্শনমিত্যাহুঃ; অন্যে তু স্বদেহভ্রমণজ্ঞানম্| ননু, ভ্রমস্যাশীতিবাতবিকারপঠিতস্য বাতনানাত্মজত্বাত্ কথং পিত্তবিকারে পাঠঃ? উচ্যতে, “ন রোগোঽপ্যেকদোষজঃ|” ইতি বচনাত্ পৈত্তিকে বাতানুবন্ধাত্ ভ্রমঃ, ইতি জেজ্জটঃ সমাধানমুক্তবান্| অথবা দোষদূষ্যসম্মূর্ছনপ্রভাবাত্ কারণাদৃষ্টস্যাপি রূপস্য কার্য উপলম্ভঃ; যথা– অরূপবাতারব্ধাতিসারাদাবিবারুণত্বং, হরিদ্রাচূর্ণসংযোগ ইব লৌহিত্যম্| যত্তূক্তং সুশ্রুতে– “রজঃপিত্তানিলাদ্ভ্রমঃ|” (সু. শা. অ. ৪) ইতি, তত্রাপি বাতানুগতপিত্তজত্বমেব বোদ্ধব্যম্, অন্যথা ভ্রমস্য বাতিকনানাত্মজত্বমেব ন স্যাদিতি| অপরে তু পিত্তদূষিতনেত্রত্বেন বিপর্যস্তজ্ঞানং ভ্রমঃ, ‘পীতঃ শঙ্খ’ ইত্যাদিবত্| চকারঃ পূর্ববদনুক্তসমুচ্চযার্থঃ| তদ্যথা– তীব্রোষ্মতা রক্তকোঠাঃ শীতেচ্ছতাঽরুচিরিতি||১০-১১||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– বেগ ইত্যাদি| বেগস্তীক্ষ্ণস্তীব্রবেগঃ| অতীসার ইতি পিত্তস্য সরত্যেন সদ্রবা প্রবৃতির্ন ত্বতীসারঃ, তস্য জ্বরোপদ্রবত্বাত্| নিদ্রাল্পত্বং স্বল্পনিদ্রাত্বম্| বমিঃ পিত্তস্য কফস্থানগতত্বাত্| কণ্ঠৌষ্ঠমুখনাসানাং পাক ইতি সুগমম্| স্বেদো ঘর্মাম্বুনির্গমনম্| প্রাযেণ সামজ্বরে স্বেদনিরোধঃ, অত্র তু পিত্তস্য তৈক্ষ্ণ্যাজ্জ্বরপ্রভাবাদ্বা স ন ভবতি| প্রলাপোঽসম্বদ্ধভাষণম্| বক্ত্রকটুতা মুখতিক্তত্বম্| যদুক্তমভিধানান্তরে– “কটুঃ স্যাত্কটুতিক্তযোঃ|” ইতি| যদুক্তং সুশ্রুতে– “ যোঽমলং ভৃশোষ্ণং কটুতিক্তবক্ত্রঃ পীতং সরক্তং হরিতং বমেদ্বা| সদাহশোষজ্বরবক্ত্রশোষং সা পিত্তকোপপ্রভবা হি ছর্দিঃ||” ইতি সুশ্রুতবচনাত্ কটুমুখত্বমপ্যেষ্টব্যমিতি| মূর্ছা রূপাদ্যপরিজ্ঞানং তমঃপ্রবেশো বিস্মৃতিরিত্যাহুঃ| মদো মত্তত্বমিব, যথা পূগদুষ্টকোদ্রবধত্তূরভক্ষণাদৌ| ভ্রম ইতি চক্রস্থিতস্যেব সম্ভ্রমাদ্বস্তুদর্শনমাহুঃ, অন্যে তু স্বদেহভ্রমণজ্ঞানম্| ননু ভ্রমস্য অশীতিবাতবিকারপঠিতস্য নানাত্মজত্বাত্ কথং পিত্তবিকারে পাঠঃ? উচ্যতে– ‘ন রোগোঽপ্যেকদোষজঃ’ ইতি বচনাত্, অথবা দোষদূষ্যসম্মূর্ছনপ্রভাবাত্| যদুক্তং সুশ্রুতে– “রজঃপিত্তানিলাদ্ভ্রমঃ” ইতি| অপরে তু পিত্তদূষিতনেত্রত্বেন বিপর্যস্তজ্ঞানং ভ্রমঃ পীতঃ শঙ্খ ইত্যাদিবত্| পীতবিণ্মূত্রনেত্রত্বমিতি সুগমম্| পৈত্তিকে জ্বরে এতানি লক্ষণানি ভবন্তি||১০-১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফজ্বরলক্ষণমাহ– স্তৈমিত্যমিত্যাদি| স্তৈমিত্যমঙ্গানামার্দ্রপটাবগুণ্ঠিতত্বমিব| স্তিমিতো বেগো মন্দো বেগঃ| আলস্যমিতি “সমর্থস্যাপ্যনুত্সাহঃ কর্মণ্যালস্যমুচ্যতে|” (সু. শা. অ. ৪) ইত্যালস্যলক্ষণমাহুঃ| স্তম্ভোঽঙ্গস্তব্ধতা| তৃপ্তিস্তৃপ্তস্যেবান্নানভিলাষঃ| উত্ক্লেদঃ কণ্ঠোপস্থিতবমনত্বমিব| অরুচিরত্র সত্যপ্যভিলাষে অভ্যবহারাসামর্থ্যমিতি ভেদঃ| চকারঃ পূর্ববত্| তেন “তথাঽঙ্গে পীডকাঃ শীতাঃ প্রসেকশ্ছর্দিতন্দ্রিকে| হৃদুপলেপ উষ্ণাভিলাষিতা বহ্নিমার্দবম্||” ইতি||১২-১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ শ্লৈষ্মিকমাহ– স্তৈমিত্যমিত্যাদি| স্তৈমিত্যমঙ্গানামার্দ্রবস্ত্রাবগুণ্ঠিতত্বমিব| স্তিমিতো বেগো মন্দবেগঃ| আলস্যং “যঃ শক্তস্যাপ্যনুত্সাহঃ কর্মণ্যালস্যমুচ্যতে|” ইতি| মধুরাস্যতা মধুরবক্ত্রত্বম্| মূত্রপুরীষযোঃ শৌক্ল্যম্| স্তম্ভোঽঙ্গস্তব্ধতা| তৃপ্তিঃ তৃপ্তসেবান্নানভিলাষঃ| গৌরবং গুরুগাত্রতা| শীতং শীতাবির্ভাবঃ| উত্ক্লেদঃ উপস্থিতবমনত্বমিব, অপরে শ্লেষ্মনিষ্ঠীবনম্| রোমহর্ষো রোমাঞ্চঃ| অতিনিদ্রতা নিদ্রাধিক্যম্| প্রতিশ্যাযঃ নাসাস্রবণম্| অরুচিঃ অস্ত্র সত্যপ্যভিলাষেঽভ্যবহারাসামর্থ্যমিতি তৃপ্তিতো ভেদঃ| স্রোতোরোধো রসবাহিনাং স্রোতসাং রোধঃ| কাসঃ প্রসিদ্ধঃ| অবিপাকতা অন্নাবিপাকঃ| চকারঃ পূর্ববদনুক্তসমুচ্চযার্থঃ, কফজে জ্বরে এতানি লক্ষণানি ভবন্তি||১২-১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতপিত্তজ্বরলক্ষণমাহ– তৃষ্ণেত্যাদি| পর্বাণি ভিদ্যন্ত ইব বেদনা পর্বভেদঃ| এতানি চ লিঙ্গানি বিকৃতিবিষমসমবাযারব্ধস্য বোদ্ধব্যানি| বিকৃতিবিষমসমবাযারব্ধত্বং চৈষাং কেবলবাতিকপৈত্তিকজ্বরলক্ষণানাং মধ্যে কেষাঞ্চিদেব নিযমেন পাঠাত্তদতিরিক্তলক্ষণপাঠাচ্চ বোদ্ধব্যম্| যথা– অত্রৈব বাতপৈত্তিকেঽরুচিরোমহর্ষৌ, বক্ষ্যমাণবাতশ্লৈষ্মিকে স্বেদঃ সন্তাপশ্চ, এবং কফপৈত্তিকে অনবস্থিতশীতদাহৌ, এবং সন্নিপাতজে সাস্রকলুষাদিনেত্রত্বং শিরোলোঠনাদি| প্রকৃতিসমবাযারব্ধে তু বাতজাদিজ্বরলিঙ্গান্যেব সমস্তানি কতিপযানি বা ভবন্তি| অত এব চিকিত্সিতে চরকঃ বিকৃতিবিষমসমবাযারব্ধানাং দ্বন্দ্বসন্নিপাতজ্বরাণাং লক্ষণানি সাক্ষাত্ পঠিত্বা নিদানস্থানোক্তবাতাদিজ্বরলিঙ্গাতিদেশেন প্রকৃতিসমসমবেতানাং দ্বন্দ্বসন্নিপাতজ্বরাণাং লক্ষণমুক্তবান্| যদাহ– “নিদানে ত্রিবিধা প্রোক্তা যা পৃথগ্জজ্বরাকৃতিঃ| সংসর্গসন্নিপাতানাং তথা চোক্তং স্বলক্ষণম্||” (চ. চি. অ. ৩) ইতি| এবং বক্ষ্যমাণং দ্বন্দ্বসন্নিপাতলক্ষণং ব্যাখ্যেযম্| প্রকৃতিসমসমবাযবিকৃতিবিষমসমবাযযোশ্চাযমর্থঃ– প্রকৃত্যা হেতুভূতযা সমঃ কারণানুরূপঃ সমবাযঃ কার্যকারণভাবসম্বন্ধঃ প্রকৃতিসমসমবাযঃ, কারণানুরূপং কার্যমিত্যর্থঃ; যথা– শুক্লতন্তুসমবাযারব্ধস্য পটস্য শুক্লত্বম্| বিকৃত্যা হেতুভূতযা বিষমঃ কারণাননুরূপঃ সমবাযো বিকৃতিবিষমসমবাযঃ, যথা– হরিদ্রাচূর্ণসংযোগজং লৌহিত্যমিতি||১৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

অথ বাতপিত্তজজ্বরলক্ষণমাহ– তৃষ্ণেত্যাদি| তৃষ্ণাদ্যাঃ শিরোরুজান্তাঃ সুগমাঃ| কণ্ঠাস্যশোষঃ কণ্ঠশোষো মুখশোষশ্চ| বমথুশ্ছর্দিভেদঃ থুগথুগীতি লোকে| রোমহর্ষঃ রোমাঞ্চঃ| অরুচিঃ প্রসিদ্ধা| তমঃ অন্ধকারে প্রবিষ্টস্যেবার্থাসংবিত্তিঃ| পর্বভেদঃ পর্বাণি ভিদ্যন্ত ইতি সন্ধিষু বেদনাভেদঃ| দ্বন্দ্বজেষু সান্নিপাতিকেষু চ কানিচিল্লক্ষণানি বিকৃতিবিষমসমবাযারব্ধানি ভবন্তি, কানিচিত্প্রকৃতিসমসমবাযারব্ধানি ভবন্তি| দোষাণামেব লক্ষণানি দৃশ্যন্তে প্রকৃতিসমসমবাযারব্ধানি, বিপরীতানি তু বিকৃতিবিষমসমবাযারব্ধানি| যথাত্রৈব বাতপৈত্তিকে জ্বরে অরুচিঃ, রোমহর্ষশ্চ; বক্ষ্যমাণবাতশ্লৈষ্মিকে সন্তাপঃ; এবং কফপিত্তজে লিপ্ততিক্তাস্যত্বং সন্নিপাতজে সাস্রকলুষাদিনেত্রত্বং শিরোলোঠনাদি, প্রকৃতিসমসমবাযবিকৃতিবিষমসমবাযযোশ্চাযমর্থঃ– প্রকৃত্যা হেতুভূতযা সমঃ কারণানুরূপঃ সমবাযঃ কার্যকারণভাবসম্বন্ধঃ প্রকৃতিসমসমবাযঃ, কারণানুরূপং কার্যমিত্যর্থঃ; যথা শুক্লতন্তুসমবাযারব্ধস্য শুক্লত্বং পটস্য; বিকৃত্যা হেতুভূতযা বিষমঃ কারণাননুরূপঃ সমবাযো বিকৃতিবিষমসমবাযঃ; যথা হরিদ্রাচূর্ণসংযোগজং লৌহিত্যমিতি, যথা বাতপিত্তযোর্লক্ষণেষু অরুচিরোমহর্ষৌ| ইমৌ তু বিকৃত্যারব্ধৌ দৃশ্যেতে; বাতশ্লেষ্মণোর্লক্ষণেষু সন্তাপো নাস্তি, সান্নিপাতিকজ্বরলক্ষণে দৃশ্যতে সোঽপি বিকৃত্যারব্ধঃ| শিরসো লোঠনং বাতপিত্তশ্লেষ্মণাং লক্ষণেষু ন দৃশ্যতে সান্নিপাতিকজ্বরলক্ষণে দৃশ্যতে তদপি বিকৃত্যারব্ধম্| এবং দ্বন্দ্বজসন্নিপাতজেষু সর্বেষ্বপি রোগেষু বোদ্ধব্যম্||১৪||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতশ্লেষ্মজ্বরলক্ষণমাহ– স্তৈমিত্যং পর্বণাং ভেদ ইত্যাদি| স্বেদাপ্রবর্তনং স্বেদস্য আ সমন্তাদকারণেন প্রবর্তনং বিকৃতবিষমসমসমবাযারব্ধত্বাদিতি কার্তিকঃ| যুক্তং চৈতত্; যদাহ হারীতঃ– “শিরোগ্রহঃ স্বেদভবো জ্বরস্য কাসশ্চ লিঙ্গং কফবাতজস্য|” ইতি| স্বেদভবঃ স্বেদোত্পত্তিঃ| মধ্যবেগো নাতিতীক্ষ্ণো নাতিমৃদুরিতি||১৫-১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতশ্লেষ্মজ্বরলক্ষণমাহ– স্তৈমিত্যমিত্যাদি| স্তৈমিত্যং আর্দ্রবস্ত্রাবগুণ্ঠিতমিব, অন্যে নিশ্চলত্বং জ্বরিতস্য| পর্বণাং ভেদো বেদনাবিশেষঃ সন্ধিষু| নিদ্রা প্রসিদ্ধা| গৌরবম্ অঙ্গানাম্| শিরোগ্রহঃ শিরোগৃহীতমিব মন্যতে| প্রতিশ্যাযো নাসাস্রাবঃ| স্বেদাপ্রবর্তনং স্বেদস্য আসমন্তাত্প্রবর্তনম্| যদুক্তং হারীতে– “শিরোগ্রহঃ স্বেদভবশ্চ কাসো জ্বরস্য লিঙ্গং কফবাতজস্য|” ইতি| স্বেদভবঃ স্বেদোত্পত্তিঃ| ইদমপি লক্ষণং বিকৃতিবিষমসমবাযারব্ধম্| সন্তাপোঽপি বিকৃতিবিষমসমবাযারব্ধঃ| মধ্যবেগো নাতিতীক্ষ্ণো নাতিমৃদুরিতি ||১৫-১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তশ্লেষ্মজ্বরলক্ষণমাহ– লিপ্তেত্যাদি| শ্লেষ্মণা লিপ্তং চ পিত্তেন তিক্তং চ আস্যং মুখং যস্য, তস্য ভাবো লিপ্ততিক্তাস্যতা| তন্দ্রা নিদ্রাবত্ক্লান্তিঃ| মোহো মূর্ছা| এতানি লিঙ্গানি প্রাযোভাবিত্বেন নির্দিষ্টানি, তেনান্যান্যপি চরকোক্তানি বোদ্ধব্যানি| যথা– “তথা স্তম্ভশ্চ সংস্বেদঃ কফপিত্তপ্রবর্তনম্|” ইতি||১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লেষ্মপিত্তজ্বরমাহ– লিপ্তেত্যাদি| শ্লেষ্মণা লিপ্তং পিত্তেন তিক্তং চ মুখং যস্য, তস্য ভাবো লিপ্ততিক্তাস্যতা, লিপ্তাস্যতা তিক্তাস্যতা চেত্যর্থঃ| তন্দ্রা নিদ্রাবত্ক্লান্তিঃ| তন্দ্রালক্ষণমাহ– “ ইন্দ্রিযার্থেষ্বসংবিত্তির্গৌরবং জৃম্ভণং ক্লমঃ| নিদ্রার্তস্যেব যস্যেহা তস্য তন্দ্রাং বিনির্দিশেত্||” ইতি| মোহো মূর্ছা| অন্যত্সুগমম্||১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকজ্বরলক্ষণমাহ– ক্ষণে দাহ ইত্যাদি| রুজা শূলম্, অস্থ্যাদিভিঃ সম্বধ্যতে| সাস্রাবে সাশ্রুণী| কলুষে আবিলবর্ণে| নির্গতং ভুগ্নং সঙ্কুচিততা যযোস্তে নির্ভুগ্নে, “বিস্ফারিতে ইত্যর্থঃ” ইতি জেজ্জটঃ; “অন্তঃপ্রবিষ্টে” ইত্যন্যে, “অতিকুটিলে” ইতি চক্রঃ| শূকৈঃ শূকশিম্বি(ম্বা)ধান্যাদেঃ| পরিদগ্ধা দগ্ধবত্কৃষ্ণবর্ণা| খরস্পর্শা খরোগোজিহ্বাবত্ স্পর্শো যস্যাং সা তথা| স্রস্তাঙ্গতা নিঃসহাবযবতা| ষ্ঠীবনং রক্তস্য পিত্তস্য বা মুখেন স্বল্পোদ্গিরণম্| শিরসো লোঠনমিতস্ততশ্চালনম্| কৃশত্বং নাতিগাত্রাণাং দোষপূর্ণত্বেন| প্রততং নিরন্তরম্| কোঠো ভালুকিতন্ত্রে পঠিতঃ| তদ্যথা– “বরটীদষ্টসঙ্কাশঃ কণ্ডূমাংল্লোহিতোঽস্রকফপিত্তাত্| ক্ষণিকোত্পাদবিনাশঃ কোঠ ইতি নিগদ্যতে তজ্জ্ঞৈঃ||” ইতি| মূকত্বং মন্দবচনতা, অবচনতা বা| গুরুত্বমুদরস্য চ উদরগৌরবম্, চিরাত্পাকশ্চ দোষাণামিতি অতিসামতারব্ধত্বেন| চকারাদন্যান্যপি চ বোদ্ধব্যানি| যদাহ বাগ্ভটঃ– “তদ্বচ্ছীতং মহানিদ্রা দিবা জাগরণং নিশি| সদা বা নৈব বা নিদ্রা মহান্ স্বেদোঽথবা ন বা|| গীতনর্তনহাস্যাদিবিকৃতেহাপ্রবর্তনম্|” (বা. নি. অ. ২) ইতি| এতচ্চ লক্ষণং ত্রযোদশসন্নিপাতেষু মধ্যে স্বমানাদ্বৃদ্ধৈর্দোষৈস্তুল্যৈরারব্ধস্য জ্বরস্য চরকেণ পঠিতং; দ্ব্যুল্বণৈকোল্বণাদীনাং চ দ্বাদশানাং লক্ষণং তত্রৈব দ্রষ্টব্যম্| তথাচ কাশ্মীরপাঠে চরকঃ– “ভ্রমঃ পিপাসা দাহশ্চ গৌরবং শিরসোঽতিরুক্| বাতপিত্তোল্বণে বিদ্যাল্লিঙ্গং মন্দকফে জ্বরে|| শৈত্যং কাসোঽরুচিস্তন্দ্রাপিপাসাদাহহৃদ্ব্যথাঃ| বাতশ্লেষ্মোল্বণে ব্যাধৌ লিঙ্গং পিত্তাবরে বিদুঃ|| ছর্দিঃ শৈত্যং মুহুর্দাহস্তৃষ্ণা মোহোঽস্থিবেদনা| মন্দবাতে ব্যবস্যন্তি লিঙ্গং পিত্তকফোল্বণে|| সন্ধ্যস্থিশিরসঃ শূলং প্রলাপো গৌরবং ভ্রমঃ| বাতোল্বণে স্যাদ্দ্ব্যনুগে তৃষ্ণা কণ্ঠাস্যশুষ্কতা|| রক্তবিণ্মূত্রতা দাহঃ স্বেদস্তৃষ্ণা বলক্ষযঃ| মূর্ছা চেতি ত্রিদোষে স্যাল্লিঙ্গং পিত্তে গরীযসি| আলস্যারুচিহৃল্লাসদাহবম্যরতিভ্রমৈঃ| কফোল্বণং সন্নিপাতং তন্দ্রা কাসেন চাদিশেত্|| প্রতিশ্যাচ্ছর্দিরালস্যং তন্দ্রাঽরুচ্যগ্নিমার্দবম্| হীনবাতে পিত্তমধ্যে লিঙ্গং শ্লেষ্মাধিকে মতম্|| হারিদ্রমূত্রনেত্রত্বং দাহস্তৃষ্ণা ভ্রমোঽরুচিঃ| হীনবাতে মধ্যকফে লিঙ্গং পিত্তাধিকে মতম্|| শিরোরুগ্বেপথুশ্বাসপ্রলাপশ্ছর্দ্যরোচকাঃ| হীনপিত্তে মধ্যকফে লিঙ্গং বাতাধিকে মতম্|| শীততা গৌরবং তন্দ্রা প্রলাপোঽস্থিশিরোতিরুক্| হীনপিত্তে বাতমধ্যে লিঙ্গং শ্লেষ্মাধিকে বিদুঃ|| বর্চোভেদোঽগ্নিদৌর্বল্যং তৃষ্ণা দাহোঽরুচির্ভ্রমঃ| কফহীনে বাতমধ্যে লিঙ্গং পিত্তাধিকে বিদুঃ|| শ্বাসঃ কাসঃ প্রতিশ্যাযো মুখশোষোঽতিপার্শ্বরুক্| কফহীনে পিত্তমধ্যে লিঙ্গং বাতাধিকে মতম্||” (চ. চি. অ. ৩) ইতি| বিকৃতৌ নিযমো নাস্তি; তেন বিকৃতিবিষমসমবাযা অনেকপ্রকারা ভবন্তি| অতঃ সুশ্রুতেনাপ্যন্যাদৃশঃ সন্নিপাতলক্ষণং পঠিতম্– “নাত্যুষ্ণশীতোঽল্পসঞ্জ্ঞো ভ্রান্তপ্রেক্ষী হতপ্রভঃ| খরজিহ্বঃ শুষ্ককণ্ঠঃ স্বেদবিণ্মূত্রবর্জিতঃ|| সাশ্রুনির্ভুগ্ননযনো ভক্তদ্বেষী হতস্বরঃ| শ্বসন্নিপতিতঃ শেতে প্রলাপোপদ্রবান্বিতঃ|| অভিন্যাসং তু তং প্রাহুর্হতৌজসমথাপরে| সন্নিপাতজ্বরং কৃচ্ছ্রমসাধ্যমপরে জগুঃ||” (সু. উ. তং. অ. ৩৯) ইতি| তথা ভালুকিতন্ত্রে দ্ব্যুল্বণৈকোল্বণাদিলক্ষণমন্যথা পঠিতম্| তদ্যথা– “বাতপিত্তাধিকো যস্য সন্নিপাতঃ প্রকুপ্যতি| তস্য জ্বরোঽঙ্গমর্দস্তৃট্তালুশোষপ্রমীলকাঃ|| আধ্মানতন্দ্রারুচযঃ শ্বাসকাসভ্রমশ্রমাঃ| পিত্তশ্লেষ্মাধিকো যস্য সন্নিপাতঃ প্রকুপ্যতি|| অন্তর্দাহো বহিঃ শীতং তস্য তন্দ্রা চ বাধতে| তুদ্যতে দক্ষিণং পার্শ্বমুরঃশীর্ষগলগ্রহাঃ|| নিষ্ঠীবেত্ কফপিত্তং চ তৃষ্ণা কণ্ডূশ্চ জাযতে| বিড্ভেদশ্বাসহিক্কাশ্চ বাধন্তে সপ্রমীলকাঃ|| বিভুফল্গূ চ তৌ নাম্না সন্নিপাতাবুদাহৃতৌ| শ্লেষ্মানিলাধিকো যস্য সন্নিপাতঃ প্রকুপ্যতি|| তস্য শীতজ্বরো নিদ্রা ক্ষুত্তৃষ্ণা পার্শ্বনিগ্রহঃ| শিরোগৌরবমালস্যমন্যাস্তম্ভপ্রমীলকাঃ|| উদরং দহ্যতে চাস্য কটির্বস্তিশ্চ দূযতে| সন্নিপাতঃ স বিজ্ঞেযো মকরীতি সুদারুণঃ|| বাতোল্বণঃ সন্নিপাতো যস্য জন্তোঃ প্রকুপ্যতি| তস্য তৃষ্ণাজ্বরগ্লানিপার্শ্বরুগ্দৃষ্টিসঙ্ক্ষযাঃ|| পিণ্ডিকোদ্বেষ্টনং দাহ ঊরুসাদো বলক্ষযঃ| সরক্তং চাস্য বিণ্মূত্রং শূলং নিদ্রাবিপর্যযঃ|| নির্ভিদ্যতে গুদং চাস্য বস্তিশ্চ পরিকৃত্যতে| আযম্যতে ভিদ্যতে চ হিক্কতে বিলপত্যপি|| মূর্ছতি স্ফাযতে রৌতি নাম্না বিস্ফুরকঃ স্মৃতঃ| পিত্তোল্বণঃ সন্নিপাতো যস্য জন্তোঃ প্রকুপ্যতি|| তস্য দাহো জ্বরো ঘোরো বহিরন্তশ্চ বর্ধতে| শীতং চ সেবমানস্য কুপ্যতঃ কফমারুতৌ|| ততশ্চৈনং প্রধাবন্তে হিক্কাশ্বাসপ্রমীলকাঃ| বিসূচিকা পর্বভেদঃ প্রলাপো গৌরবং ক্লমঃ|| নাভিপার্শ্বরুজা তস্য স্বিন্নস্যাশু বিবর্ধতে| স্বিদ্যমানস্য রক্তং চ স্রোতোভ্যঃ সম্প্রবর্ততে|| শূলেন পীড্যমানস্য তৃষ্ণা দাহশ্চ বর্ধতে| অসাধ্যঃ সন্নিপাতোঽযং শীঘ্রকারীতি কথ্যতে|| নহি জীবত্যহোরাত্রমেতেনাবিষ্টবিগ্রহঃ| কফোল্বণঃ সন্নিপাতো যস্য জন্তোঃ প্রকুপ্যতি|| তস্য শীতজ্বরস্বপ্নগৌরবালস্যতন্দ্রযঃ| ছর্দিমূর্ছাতৃষাদাহতৃপ্ত্যরোচকহৃদ্গ্রহাঃ|| ষ্ঠীবনং মুখমাধুর্যং শ্রোত্রবাগ্দৃষ্টিনিগ্রহঃ| শ্লেষ্মণো নিগ্রহং চাস্য যদা প্রকুরুতে ভিষক্|| তদা তস্য ভৃশং পিত্তং কুর্যাত্ সোপদ্রবং জ্বরম্| নিগৃহীতে তু পিত্তে চ ভৃশং বাযুঃ প্রকুপ্যতি|| নিরাহারস্য সোঽত্যর্থং মেদোমজ্জাস্থি বাধতে| অথাত্র স্নাতি ভুঙ্ক্তে বা ত্রিরাত্রং ন হি জীবতি|| মেদোগতঃ সন্নিপাতঃ কপ্ফণঃ স উদাহৃতঃ| কামান্মোহাচ্চ লোভাচ্চ ভযাচ্চাযং প্রপদ্যতে|| মধ্যহীনাধিকৈর্দোষৈঃ সন্নিপাতো যদা ভবেত্| তস্য রোগাস্ত এবোক্তাঃ প্রাযো দোষবলাশ্রযাঃ||” ইত্যাদি| ননু, বাতাদযঃ পরস্পরং বিরুদ্ধগুণাঃ; বিরুদ্ধগুণানাং চ সম্ভূযৈককার্যারম্ভকত্বং নোপপদ্যতে, পরস্পরোপঘাতাত্তুহিনদহনযোরিব; তত্কথং সান্নিপাতিকবিকারোত্পত্তিরিতি ‘তদ্যথা– বাতস্য শীতরূক্ষাদিগুণযুক্তস্য উষ্ণস্নিগ্ধাদিগুণযুক্তেন পিত্তেন, তথা কফস্য গৌরবস্নিগ্ধাত্মকস্যোভাভ্যাং বিরোধঃ| “তত্র রূক্ষো লঘুঃ শীতঃ খরঃ সূক্ষ্মশ্চলোঽনিলঃ| পিত্তং সস্নেহতীক্ষ্ণোষ্ণং লঘু বিস্রং সরং দ্রবম্| স্নিগ্ধঃ শীতো গুরুর্মন্দঃ শ্লক্ষ্ণো মৃত্স্নঃ স্থিরঃ কফঃ|| কট্বম্ললবণং পিত্তং স্বাদ্বম্ললবণঃ কফঃ| কষাযতিক্তকটুকো বাযুর্দুষ্টোঽনুমানতঃ||” ইতি| কিঞ্চ, মিথ্যাহারবিহারাভ্যাং দোষা যুগপদুত্পদ্যন্তে আহোস্বিত্কালব্যবধানেন? আদ্যে সমবলত্বেন তারতম্যেন বা? নাদ্যঃ, সর্বেষাং সমবলত্বেন পরস্পরঘাতকানাং যুগপদুত্পত্তির্ন স্যাত্| অথ ভিন্নাশ্রযতযা সাঽস্তু; তদপি ন, কুপিতানাং সর্বদেহব্যাপিত্বেন পরস্পরসম্বন্ধাত্| তদুক্তম্– “ব্যাপ্নোতি সহসা দেহমাপাদতলমস্তকম্|” ইতি| কিঞ্চ জ্বরোত্পত্তৌ তাবত্কুপিতানামামাশযগতানাং রসদূষকাণাং জ্বরোত্পাদকত্বং, তন্মিলিতানামেব স্যাদ্যথাদুষ্টেনেতি| ন দ্বিতীযঃ, পূর্বদোষাধিকত্বাত্| কিঞ্চ তারতম্যেনোত্পত্তৌ মূষকমার্জারবদ্বিরোধে প্রাগেব তেন প্রবলেন দুর্বলাঘাতঃ সুকরঃ; দৃশ্যতে চ মাত্স্যো ন্যাযঃ| অথ যুগপদুত্পাদকা আহারাদযো ন ভবন্তি; তত্র যুগপদুত্পাদকদ্রব্যমেকমনেকং বা? তস্য ( একত্বে)পাঞ্চভৌতিকত্বেন বিরুদ্ধগুণাধিকার(করণ)স্য ত্রিদোষোত্পাদকত্বং ন স্যাত্| অস্তু বাঽবিচারিতরমণীযম্| একমেবাভ্যবহ্রীযত ইতি কথম্? অস্তু বা সাধকত্বেন সহকারিণি দ্রব্যাভ্যবহারে তস্য বিরুদ্ধগুণবত্ত্বেন দোষান্তরঘাতকত্বেনানুত্পত্তিঃ; তদবস্থতযৈব জাযমানঃ কেবলৈকদোষজো ন সংসর্গসন্নিপাতজো জ্বর ইতি| অথাদৃষ্টাধীনত্বেন সহকারিণো ভাবে (সম্ভবে) একাভ্যবহারে সন্নিপাতঃ, তর্হি সর্বেষাং সমবলত্বেনেত্যত্রোক্তদোষঃ স্যাত্| অথানেকদ্রব্যাণামভ্যবহারে ত্রিদোষপ্রকোপণং ন সম্ভবতি| তত্র তুল্যানামেবাভ্যবহারঃ কথং? যতোঽভিন্নরুচিত্বাত্| যথারুচ্যভ্যবহারে তারতম্যসম্বন্ধাত্| তারতম্যেনৈব ভবতি প্রকোপো ন যুগপদিতি প্রতিজ্ঞাহানিঃ| অত্রাপ্যদৃষ্টাধীনত্বাত্তুল্যাভ্যবহারে প্রতিঘাতকত্বাভাবেঽপি যৌগপদ্যং; তর্হি স এব দোষঃ| অথ কালব্যবধানেন, তত্র পূর্বস্মাদুত্তরস্য ভিন্নঃ কালো ভবেত্; সমবলো বা ন্যূনাধিকবলো বা? নাদ্যঃ, উপসঞ্জাতবিরোধিত্বেনোত্পত্তুমেব ন শক্নোতি| ন দ্বিতীযঃ, ন্যূনবলত্বেন পূর্বপ্রবলেনৈব বিনাশিতত্বাত্, অকিঞ্চিত্করত্বাচ্চ| ন তৃতীযঃ, বিচারাসহত্বাত্| তত্র বক্তব্যম্ অধিকবলত্বমুত্পত্তেঃ পূর্বং পশ্চাদ্বা? নাদ্যঃ, অনুত্পন্নস্যাধিক্যাভাবাত্| অধিকত্বং ধর্মঃ, স তু সতি ধর্মিণি চিন্ত্যঃ| অথ পশ্চাত্? তন্ন, উত্পত্ত্যধিকে অধিকেন ঘাতস্যোপসঞ্জাতবিরোধিন উত্পত্তিরেব ন, কুতোঽধিকত্বম্| অত্রাপ্যধিকত্বং ন সম্ভবতি| তস্মাদ্বিরুদ্ধগুণানাং সম্ভূয কর্তৃত্বং ঘটঘটাভাবযোরিব ঘটঘটপ্রধ্বংসযোরিব সহাবস্থাযিত্বং নাস্তি দহনতুহিনবত্| অত্রোচ্যতে– সর্বে বিকল্পা অনঙ্গীকারপাশহতাঃ, সন্নিপাতস্তু স্যাদেব; মিথ্যাহারাদিনা কুপিতা দোষা যুগপত্কালব্যবধানেন বা, সমবলত্বেন তারতম্যেন বা পরস্পরবিরুদ্ধা অপি স্বস্থানাদামাশযমাগত্য রসং দূষযিত্বা দ্বন্দ্বসন্নিপাতোত্পাদকা ভবন্তি, উক্তং চ– মিথ্যাহারেত্যাদি| কালব্যবধানেনোত্পন্নানামপি কালান্তরেণ যৌগপদ্যমেব ভবতীতি ন কদাচিদনুপপত্তিঃ| ননু, কথমাদিপশ্চাদ্ভাবেনোত্পন্নানাং যৌগপদ্যমিতি চেত্? তন্ন, দোষাদ্দোষান্তরোত্পত্তেঃ| তদুক্তম্– “একঃ প্রকুপিতো দোষঃ সর্বানেব প্রকোপযেত্| একঃ প্রশমিতো দোষঃ সর্বান্ দোষান্নিবারযেত্||” ইতি| তথাচ চরকঃ– “কশ্চিদ্ধি রোগো রোগস্য হেতুর্ভূত্বা প্রশাম্যতি||” ইতি| অত্র রুজাকরত্বাদ্দোষোঽপি রোগ ইতি টীকাকৃতো ব্যাচক্ষতে, ‘বিকৃতো দোষো রোগ’ ইতি সমুদাযসমুদাযিনোরভেদবাদিনাং মতং পূর্বমেবোক্তম্| অন্যচ্চ তথা– “বিকৃতাবিকৃতা দেহং ঘ্নন্তি তে বর্তযন্তি চ|” ইতি| বিকৃতানাং ঘাতকত্বং রোগরূপেণৈব ভবতি, যা বিকৃতিঃ স এব রোগ ইতি ন দোষরোগযোর্ভেদঃ| অস্তু বা ভেদঃ, মিলিতৈর্দোষৈঃ রোগঃ ক্রিযত ইতি| কথঞ্চিদপি একানেকদ্রব্যাভ্যবহারে সহকারিণো দৈবাত্ত্রযাণাং প্রকোপো ভবত্যেব| উক্তং চ– “দৃষ্টাপরাধজঃ কশ্চিত্কশ্চিত্পূর্বাপরাধজঃ| তত্সঙ্করাদ্ভবত্যন্যো ব্যাধিরেবং ত্রিধা স্মৃতঃ||” ইতি| তথা– “পিত্তক্ষোভে তিলাভ্যঙ্গো রাত্রৌ চ দধিভোজনম্| অনিদ্রা মৈথুনং যস্য সন্নিপাতো ভবেদ্ধ্রুবম্||” ইতি| ননু দোষাণাং বাধ্যবাধকভাবেনাদিপশ্চাদ্ভাবেনোত্পত্তির্দোষাদ্দোষান্তরোত্পত্তির্বা ন সম্ভবতীত্যনুপদমেবোক্তম্|” অত্র সমাধানমুক্তং দৃঢবলেন, যথা– “বিরুদ্ধৈরপি ন ত্বেতে গুণৈর্ঘ্নন্তি পরস্পরম্| দোষাঃ সহজসাত্ম্যত্বাদ্ঘোরং বিষমহীনিব||” ইতি (চ. চি. অ. ২৬)| এতচ্চান্যে দূষযন্তি– সহজত্বাদিত্যনৈকান্তিকং, যতঃ সহজানপি ধাতূন্ দোষা উপঘ্নন্তি; সাত্ম্যত্বাদিত্যপি সাধ্যাবিশিষ্টং, যতঃ সাত্ম্যত্বমবাধকত্বং, তদেব চ দোষাণামিহ সাধ্যম্| অত্রোচ্যতে– দোষা নোপঘ্নন্তীতি কোঽযমনুপঘাতঃ সাধ্যতে? বিকৃতেরকারকত্বং বা, অবিনাশকত্বং বা? নাদ্যঃ, দোষাণাং পরস্পরং বিকৃতিকর্তৃত্বাত্| যথোক্তং চরকে– “বিশোষযেদ্বস্তিগতং সশুক্রং মূত্রং সপিত্তং পবনঃ কফং বা| যদা তদাঽশ্মর্যুপজাযতে তু ক্রমেণ পিত্তেষ্বিব রোচনা গোঃ||” (চ. চি. অ. ২৬) ইতি; তথা চোক্তং বাগ্ভটেন– “সশ্লেষ্মমেদঃ পবনঃ সামমত্যর্থসঞ্চিতম্| অভিভূযেতরং দোষমূরূ চেত্প্রতিপদ্যতে|| সক্থ্যস্থিনী প্রপূর্যান্তঃ শ্লেষ্মণা স্তিমিতেন চ| তদা স্তভ্নাতি তেনোরূ স্তব্ধৌ শীতাবচেতনৌ||’ (বা. নি. অ. ১৫) ইতি| অবিনাশকত্বং তু বিদ্যত এব, ধাতুদোষযোঃ পরস্পরং চ দোষাণাং সর্বথোচ্ছেদপ্রতিপাদকাগমাভাবাত্, মরণপ্রসঙ্গাচ্চ ; দোষাণামপি দেহধারকত্বাত্; তস্মাত্সর্বথোচ্ছেদনিরাসাভিপ্রাযেণৈব দৃঢবলবচনমিহ দ্রষ্টব্যং; ততঃ কুতোঽনৈকান্তিকতা| ন চৈবং সতি বিষস্য বিষাদকর্তৃত্বেন দৃষ্টান্তবিফলত্বং, বিষস্য বিষাদাদবান্তরখ্যাপারস্য প্রাণবিনাশকত্বাত্; নচ সর্বাত্মনা দৃষ্টান্তো ভবতীতি| সাত্ম্যত্বাদিত্যস্যাযমর্থঃ– সাত্ম্যত্বেন প্রতীযমানত্বাত্| দোষাঃ পরস্পরং নোপঘ্নন্তি, অনুপঘাতকত্বেন প্রতীযমানত্বাত্; যদ্যথা প্রতীযতে তত্তথা নির্দিশ্যতে, যথাঽগ্নিকার্যো ধূমোঽগ্নিকার্যত্বেনেতি, তত্কুতঃ সাধ্যাবিশিষ্টত্বমিতি| চক্রদত্তস্তু সহজসাত্ম্যত্বাদিত্যেকমেব হেতুং ব্যাখ্যাতবান্– সহজং স্বাভাবিকং দোষাণাং সাত্ম্যত্বমিতি| দৃঢবলোক্তহেতুদ্বযাস্বরসেন গযদাসস্তু হেত্বন্তরমুক্তবান্– “দৈবাদ্দোষস্বভাবাদ্বা দোষাণাং সান্নিপাতিকে| বিরুদ্ধৈঃ স্বগুণৈঃ কশ্চিন্নোপঘাতঃ পরস্পরম্||” ইতি সঙ্ক্ষেপঃ||১৮-২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ সান্নিপাতিকজ্বরলক্ষণমাহ– ক্ষণে দাহ ইত্যাদি| রুজাশব্দোঽস্থ্যাদিভিঃ সম্বধ্যতে| লোচনে সাস্রাবে সাশ্রুণী, কলুষে আবিলে, রক্তে লোহিতবর্ণে, নির্ভুগ্নে বিস্ফারিতে ইতি জেজ্জটঃ, অতিকুটিলে ইতি চক্রঃ| কর্ণৌ সস্বনৌ সশব্দৌ, সরুজৌ বেদনাযুক্তৌ ভবতঃ| কণ্ঠঃ শূকৈর্ধান্যাগ্রসূক্ষ্মকণ্টকাকারৈঃ, অন্যে কপিকচ্ছূশূকৈরিবাবৃতঃ ব্যাপ্ত ইব| তন্দ্রা প্রসিদ্ধা, মোহোঽচৈতন্যং ভবতি, প্রলাপোঽসম্বদ্ধভাষণম্| ভ্রমশ্চক্রারূঢস্ত্যেব, অন্যে তু বিপরীতপদার্থজ্ঞানং স্থাণৌ তুষজ্ঞানবত্| জিহ্বা পরিদগ্ধা দগ্ধবত্কৃষ্ণবর্ণা, খরস্পর্শা কণ্টকিনী চ| স্রস্তাঙ্গতা নিঃসহাবযবতা, অন্যে বিকলাঙ্গত্বমাহুঃ| ষ্ঠীবনং মুখেন রক্তপিত্তস্য| ঈষত্কফমিশ্রিতস্যোদ্গিরণম্| শিরসো লোঠনমিতস্ততঃ শিরশ্চালনম্| তৃষ্ণা পিপাসা| নিদানাশঃ হৃদি ব্যথা স্বেদমূত্রপুরীষাণাং চিরেণাল্পশো দর্শনং চিরাত্ স্রুতিঃ| কৃশত্বং নাতিগাত্রাণাং নাতিদৌর্বল্যং দোষপূর্ণত্বাত্| প্রততং নিরন্তরং, কণ্ঠকূজনং অব্যক্তশব্দঃ| কোঠানাং শ্যাবরক্তবর্ণানাং মণ্ডলানাং চ দর্শনং; কোঠলক্ষণং ভালুকিতন্ত্রে পঠিতম্– “বরটিদষ্টসঙ্কাশঃ কণ্ডূমাঁল্লোহিতোঽস্রকফপিত্তাত্| ক্ষণিকোত্পাদবিনাশঃ কোঠ ইতি নিগদ্যতে তজ্জ্ঞৈঃ” ইতি, অথবা কোঠাঃ অব্যক্তমুখাঃ পিডিকাপ্রাযাঃ, তেষাং চ শ্যাবরক্তানাং দর্শনং, শরীরে মণ্ডলানাং চ সকলানাং চ দর্শনম্| মূকত্বং মন্দবচনতা অবচনতা বা| স্রোতসাং মুখনাসাদিরন্ধ্রাণাং পাকঃ| গুরুত্বমুদরস্য উদরগৌরবম্| চিরাত্পাকশ্চ দোষাণামিতি অতিসামত্বারব্ধেন দোষাণামেকত্র মিলিতানাং চিরকালেন পাকো নিরামতা| চকারাদন্যান্যপি বোদ্ধব্যানি| যদাহ বাগ্ভটঃ– “তদ্বচ্ছীতং মহানিদ্রা দিবা জাগরণং নিশি| সদা বা নৈব বা নিদ্রা মহান্ স্বেদোঽথ নৈব চ|| গীতনর্তনহাস্যাদিবিকৃতেহাপ্রবর্তনম্|” ইতি| এতচ্চ লক্ষণং ত্রযোদশসন্নিপাতেষু সামান্যং বৃদ্ধৈর্দোষৈস্তুল্যৈরারব্ধস্য চরকেণ পঠিতম্; এবং ‘ দ্ব্যুল্বণৈকোল্বণৈঃ ষট্ স্যুঃ’ ইত্যাদিদ্বাদশসন্নিপাতানাং চ লক্ষণং বোদ্ধব্যম্| তথা চ কাশ্মীরপাঠে চরকতন্ত্রে– “ভ্রমঃ পিপাসা দাহশ্চ গৌরবং শিরসোঽতিরুক্| বাতপিত্তোল্বণে বিদ্যাল্লিঙ্গং মন্দকফজ্বরে|| শৈত্যং কাসোঽরুচিস্তন্দ্রা পিপাসাদাহহৃদ্ব্যথাঃ| বাতশ্লেষ্মোল্বণে ব্যাধৌ লিঙ্গং পিত্তাবরে বিদুঃ|| ছর্দিঃ শৈত্যং বহির্দাহস্তৃষ্ণা মোহোঽস্থিবেদনা মন্দে বাতে ব্যবস্যন্তি লিঙ্গং পিত্তকফোল্বণে|| সন্ধ্যস্থিশিরসঃ শূলং প্রলাপো গৌরবং ভ্রমঃ| বাতোল্বণে ত্রিদোষে তু তৃষ্ণা কণ্ঠাস্যশুষ্কতা|| রক্তবিণ্মূত্রনেত্রত্বং দাহতৃড্বলসঙ্ক্ষযাঃ| মূর্ছা চেতি ত্রিদোষে স্যাল্লিঙ্গং পিত্তে গরীযসি|| আলস্যারুচিহৃল্লাসদাহবম্যরতিভ্রমাঃ| কফোল্বণে সন্নিপাতে তন্দ্রা কাসোঽপি জাযতে|| মূর্ছাচ্ছর্দিঃ প্রতিশ্যাযস্তন্দ্রাঽরুচ্যগ্নিমার্দবম্| হীনবাতে মধ্যপিত্তে লিঙ্গং শ্লেষ্মাধিকে মতম্|| হারিদ্রমূত্রনেত্রত্বং দাহস্তৃষ্ণাঽরুচির্ভ্রমঃ| হীনবাতে মধ্যকফে লিঙ্গং পিত্তাধিকে মতম্|| শিরোরুগ্বেপথুঃ শ্বাসপ্রলাপশ্চ্ছর্দ্যরোচকাঃ| হীনপিত্তে মধ্যকফে লিঙ্গং বাতাধিকে মতম্|| শীতকং গৌরবং তন্দ্রা প্রলাপঃ শিরসোঽতিরুক্|| হীনপিত্তে বাতমধ্যে লিঙ্গং শ্লেষ্মাধিকে মতম্|| পর্বভেদোঽঙ্গদৌর্বল্যং তৃষ্ণা দাহোঽরুচির্ভ্রমঃ|| কফে হীনে মধ্যবাতে লিঙ্গং পিত্তাধিকে বিদুঃ|| শ্বাসঃ কাসঃ প্রতিশ্যাযো মুখশোষোঽতিপার্শ্বরুক্|| কফে হীনে মধ্যপিত্তে লিঙ্গং বাতাধিকে মতম্|” ইতি|| বিকৃতৌ নিযমো নাস্তি, তেন বিকৃতিবিষমসমবাযারব্ধা অনেকপ্রকারা ভবন্তি| প্রকৃতিসমসমবাযে সন্নিপাতে পৃথগ্বাতাদিজ্বরস্যৈব লক্ষণং জ্ঞেযম্| হীনমধ্যাধিকক্রমেণ সন্নিপাতাঃ এবং ষট্, দ্ব্যুল্বণেন ত্রযঃ, একোল্বণেন ত্রযঃ, সমত্বেনৈকঃ, এবং ত্রযোদশসন্নিপাতাঃ প্রকৃতৌ| অত্র সুশ্রুতস্তু দোষোত্কর্ষাপকর্ষতারতম্যেন ধাত্বাদ্যাবরণভেদেন চ সন্নিপাতভেদানামানন্ত্যাত্পৃথগ্লক্ষণং নোক্তবান্; কিন্তু তুল্যকুপিতৈর্দোষৈরেকমেব সন্নিপাতলক্ষণং পঠিতবান্| তদ্যথা– “নাত্যুষ্ণশীতোঽল্পসঞ্জ্ঞো ভ্রান্তপ্রেক্ষী হতপ্রভঃ|| খরজিহ্বঃ শূককণ্ঠঃ স্বেদবিণ্মূত্রবর্জিতঃ|| সাশ্রুনির্ভুগ্ননযনো ভক্তদ্বেষী হতস্বরঃ|| শ্বসন্নিপতিতঃ শেতে প্রলাপোপদ্রবৈর্যুতঃ|| অভিন্যাসং তু তং প্রাহুর্হতৌজসমথাপরে|| সন্নিপাতজ্বরং কৃচ্ছ্রমসাধ্যমপরে বিদুঃ|| নিদ্রোপেতমভিন্যাসং ক্ষীণমেনং হতৌজসম্|| সন্ন্যস্তগাত্রং সন্ন্যাসং বিদ্যাত্সর্বাত্মকং জ্বরম্|” ইতি|| অথ ভালুকিতন্ত্রে দ্ব্যুল্বণৈকোল্বণাদিলক্ষণমন্যথা পঠিতম্| তদ্যথা– “আমো হ্যাহারদোষাত্প্রথমমুপচিতো হন্তি বহ্নিং শরীরে শ্লেষ্মত্বং যাতি ভুক্তং সকলমপি ততোঽসৌ কফো বাযুদুষ্টঃ| স্রোতাংস্যাপূর্য রুন্ধ্যাদনিলমথ মরুত্কোপযেত্পিত্তমন্তঃ সম্মূর্ছ্যান্যোন্যমেতে প্রবলমিতি নৃণাং কুর্বতে সন্নিপাতম্|| বাতপিত্তাধিকো যস্য সন্নিপাতঃ প্রকুপ্যতি| তস্য জ্বরোঽঙ্গমর্দস্তৃট্ তালুশোষপ্রমীলকৌ|| আধ্মানতন্দ্রারুচযঃ শ্বাসকাসভ্রমশ্রমাঃ| পিত্তশ্লেষ্মাধিকো যস্য সন্নিপাতঃ প্রকুপ্যতি|| অন্তর্দাহো বহিঃ শৈত্যং তস্য তন্দ্রা চ বর্ধতে| তুদ্যতে দক্ষিণং পার্শ্বমুরঃশীর্ষগলগ্রহঃ|| নিষ্ঠীবেত্কফপিত্তং চ কৃচ্ছ্রাত্কণ্ডূশ্চ জাযতে| বিড্ভেদশ্বাসহিক্কাশ্চ বর্ধন্তে সপ্রমীলকাঃ|| বিভুঃ ফল্গুশ্চ তৌ নাম্না সন্নিপাতাবুদাহৃতৌ| শ্লেষ্মানিলাধিকো যস্য সন্নিপাতঃ প্রকুপ্যতি|| তস্য শীতজ্বরো নিদ্রা ক্ষুত্তৃষ্ণা পার্শ্বনিগ্রহঃ| শিরোগৌরবমালস্যমন্যাস্তম্ভপ্রমীলকাঃ|| উদরং দহ্যতে চাস্য কটী বস্তিশ্চ দূযতে| সন্নিপাতঃ স বিজ্ঞেযো মকরীতি সুদারুণঃ|| বাতোল্বণঃ সন্নিপাতো যস্য জন্তোঃ প্রকুপ্যতি| তস্য শীতজ্বরো নিদ্রা ক্ষুত্তৃষ্ণাপার্শ্বনিগ্রহাঃ| শিরোগৌরবমালস্যমন্যাস্তম্ভপ্রমীলকাঃ|| উদরং দহ্যতে চাস্য কটী বস্তিশ্চ দূযতে| সন্নিপাতঃ স বিজ্ঞেযো মকরীতি সুদারুণঃ|| বাতোল্বণঃ সন্নিপাতো যস্য জন্তোঃ প্রকুপ্যতি| তস্য তৃষ্ণা জ্বরো গ্লানিঃ পার্শ্বরুক্ দৃষ্টিসঙ্ক্ষযাঃ|| পিণ্ডিকোদ্বেষ্টনং দাহ ঊরুসাদো বলক্ষযঃ| সরক্তং চাস্য বিণ্মূত্রং শূলং নিদ্রাবিপর্যযঃ|| নির্ভিদ্যতে গুদং চাস্য বস্তিশ্চ পরিগৃহ্যতে| আযম্যতে ভিদ্যতে চ হিক্কতে বিলপত্যপি|| মূর্ছতে স্ফার্যতে রৌতি নাম্না বিস্ফারকঃ স্মৃতঃ| পিত্তোল্বণঃ সন্নিপাতো যস্য জন্তোঃ প্রকুপ্যতি|| তস্য দাহজ্বরো ঘোরো বহিরন্তশ্চ বর্ধতে| শীতং চ সেবমানস্য কুপ্যতঃ কফমারুতৌ| ততশ্চৈনং প্রবাধন্তে হিক্কাশ্বাসপ্রমীলিকাঃ|| বিসূচিকা পর্বভেদঃ প্রলাপো গৌরবং ক্লমঃ| নাভিপার্শ্বরুজা তস্য স্বিন্নত্যাশু বিবর্ধতে|| স্বিদ্যমানস্য রক্তং চ স্রোতোভ্যঃ সম্প্রবর্ততে| শূলেন পীড্যমানস্য তৃষ্ণা শ্বাসঃ প্রবাধতে|| অসাধ্যঃ সন্নিপাতোঽযং শীঘ্রকারীতি কথ্যতে| ন হি জীবত্যহোরাত্রমনেনাবিষ্টবিগ্রহঃ|| কফোল্বণঃ সন্নিপাতো যস্য জন্তোঃ প্রকুপ্যতি| তস্য শীতজ্বরঃ স্বপ্নগৌরবালস্যতন্দ্রিকাঃ| ছর্দিমূর্ছাতৃষাদাহতৃষ্ণারোচকহৃদ্গ্রহাঃ| ষ্ঠীবনং মুখমাধুর্যং শ্রোত্রবাগ্দৃষ্টিনিগ্রহঃ|| অথাত্র স্নাতি ভুঙ্ক্তে বা ত্রিরাত্রং নৈব জীবতি| মেদোগতঃ সন্নিপাতো হ্যুল্বণঃ পরিকীর্তিতঃ|| কামান্মোহাচ্চ লোভাচ্চ ভযাচ্চাপি প্রপদ্যতে| মধ্যহীনাধিকৈর্দোষৈঃ সন্নিপাতো যদা ভবেত্|| তস্য রোগাস্ত এবোক্তাঃ প্রাযো দোষবলাশ্রযাঃ|” ইতি|| ননু বাতাদযঃ পরস্পরং বিরুদ্ধগুণাঃ, পরস্পরং বিরুদ্ধগুণানাং চ তেষাং সম্ভূযৈককার্যারম্ভকত্বং নোপপদ্যতে, পরস্পরোপঘাতকত্বাদ্দহনতুহিনযোরিব, তত্কথং সান্নিপাতিকবিকারোত্পত্তিঃ? অত্র সমাধানমুক্তং দৃঢবলেন, যথা “বিরুদ্ধৈরপি ন ত্বেতে গুণৈর্ঘ্নন্তি পরস্পরম্| দোষাঃ সহজসাত্ম্যত্বাদ্ঘোরং বিষমহীনিব||” ইতি| দৃঢবলোক্তহেতুদ্বযাদন্যদ্ধেতুদ্বযং গযদাসশ্চোক্তবান্– “দৈবাদ্দোষস্বভাবাদ্বা দোষাণাং সান্নিপাতিকে| বিরুদ্ধৈশ্চ গুণৈঃ কশ্চিন্নোপঘাতঃ পরস্পরম্||” ইতি||১৮-২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্য সন্নিপাতজ্বরস্যাসাধ্যলক্ষণমাহ– দোষে বিবদ্ধ ইত্যাদি| দোষো মলং বাতাদিশ্চ; জেজ্জটস্তু মলমেবাহ, বিবদ্ধ ইতি বচনাত্| নষ্টাগ্নিত্বমাহারাপাকগম্যম্| যদুক্তং চরকে– “অগ্নিং জরণশক্ত্যা” (চ. বি. অ. ৪) ইতি| অসাধ্যকৃচ্ছ্রসাধ্যাভিধানেন সুখসাধ্যো ন ভবতীতি দর্শিতম্| উক্তং হি চরকে– “সন্নিপাতো দুশ্চিকিত্স্যানাম্” (চ. সূ. অ. ২৫) ইতি| তথা ভালুকিঃ– “মৃত্যুনা সহ যোদ্ধব্যং সন্নিপাতং চিকিত্সতা||” ইতি| সর্বসম্পূর্ণলক্ষণ ইতি সর্বাণি সমগ্রাণি, সম্পূর্ণানি বলীযাংসি লক্ষণানি যস্য স তথা||২৪||

আতঙ্কদর্পণ ব্যাখ্যা (বাচস্পতি বৈদ্য কৃত)

সঙ্ক্ষেপতঃ তস্য সন্নিপাতজ্বরস্যাসাধ্যলক্ষণমাহ– দোষে ইত্যাদি| দোষো মলং বাতাদিশ্চ| জেজ্জটস্তু মলং পুরীষমাহ, বিবদ্ধ ইতি বচনাত্| নষ্টাগ্নিত্বমিতি অন্নাবিপাকাদবগন্তব্যম্| সর্বাণি সম্পূর্ণানি লক্ষণানি যস্য স তথা| ঈদৃশোঽসাধ্যঃ, ততোঽন্যথা বিসদৃশঃ অবিবদ্ধদোষোঽল্পলক্ষণঃ কৃচ্ছ্রসাধ্যঃ| অসাধ্যত্বকৃচ্ছ্রসাধ্যত্বাভিধানেন সুখসাধ্যো ন ভবতীতি দর্শিতম্| উক্তং চ ভালুকিনা– “মৃত্যুনা সহ যোদ্ধব্যং সন্নিপাতং চিকিত্সতা| যস্তু তত্র ভবেজ্জেতা স জেতাঽঽমযসঙ্কুলে|| সন্নিপাতার্ণবে মগ্নং যোঽভ্যুদ্ধরতি মানবম্| কস্তেন ন কৃতো ধর্মঃ কাং বা পূজাং ন সোঽর্হতি||” ইতি| সুশ্রুতেঽপি সন্নিপাতজ্বরস্য মোক্ষবধযোরবধিকালো দর্শিতঃ– “সপ্তমে দিবসে প্রাপ্তে দশমে দ্বাদশেঽপি বা| পুনর্ঘোরতরো ভূত্বা প্রশমং যাতি হন্তি বা||” ইতি| ভালুকিনাঽপ্যুক্তম্– “সপ্তমী দ্বিগুণা যাবন্নবম্যেকাদশী তথা| এষা ত্রিদোষমর্যাদা মোক্ষায চ বধায চ||” ইতি| উক্তং চ– “পিত্তকফানিলবৃদ্ধ্যা দশদিবসদ্বাদশাহসপ্তাহাত্| হন্তি বিমুঞ্চতি বাঽপি ত্রিদোষজো ধাতুমলপাকাত্||” ইতি| বাতাধিকঃ সপ্তমে দিনে, পিত্তাধিকো দশমে, শ্লেষ্মাধিকো দ্বাদশে, মলপাকাদ্বিমুঞ্চতি, ধাতুপাকাদ্ধন্তি| ধাতুপাকলক্ষণং তন্ত্রান্তরোক্তম্– “সম্বাধ্যমানো হৃদি নাভিদেশে গাত্রেষু বা পাকরুজান্বিতেষু| পক্বেষু বা তেষু রুজা জ্বরার্তঃ স ধাতুপাকী কথিতো ভিষগ্ভিঃ||” ইতি| তন্ত্রান্তরেঽপ্যুক্তম্– “দশদ্বাদশসপ্তাহৈঃ পিত্তশ্লেষ্মানিলাধিকঃ| পক্ত্বোষ্মণা ধাতুমলান্ হন্তি মুঞ্চতি বা জ্বরঃ||” ইতি||২৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্নিপাতজ্বরোপদ্রবমাহ– সন্নিপাতেত্যাদি||২৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সন্নিপাতোপদ্রবমাহ– সন্নিপাতজ্বরস্যেত্যাদি| সন্নিপাতজ্বরস্য অন্তে অবসানে সন্নিপাতক্ষপিতশরীরস্য পুংসঃ কর্ণমূলে কর্ণপর্যন্তে সুদারুণঃ কষ্টতমঃ শোফঃ সম্প্রাপ্তিবিশেষাত্কর্মবৈচিত্র্যাত্সঞ্জাযতে, তেন শোফেন কশ্চিদেবাতুরো বিমুচ্যতে, প্রাযো মারযতীত্যর্থঃ||২৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আগন্তুজ্বরমাহ– অভিঘাতেত্যাদি| অভিঘাতোঽভিহননং শস্ত্রলোষ্টমুষ্টিলগুডাদিভিঃ; অভিচারঃ শ্যেনাদিযাগকৃতঃ, অথবা বিপরীতৈর্মন্ত্রৈর্লোহস্রুচা সর্ষপাদিহোম ইত্যাহুঃ| অভিষঙ্গঃ কামাদীনাং ভূতানাং চ সম্বন্ধঃ; যদুক্তং চরকে– “কামশোকভযক্রোধৈরভিষক্তস্য যো জ্বরঃ| সোঽভিষঙ্গজ্বরো জ্ঞেযো যশ্চ ভূতাভিষঙ্গজঃ||” (চ. চি. অ. ৩) ইতি| অভিশাপো ব্রাহ্মণগুরুবৃদ্ধসিদ্ধানামনিষ্টাভিশংসনম্| তং চাগন্তুজ্বরং যথাস্বং দোষৈর্জানীযাত্| যদুক্তম্– “কামশোকভযাদ্বাযুঃ” ইত্যাদি| অযং চ দোষসম্বন্ধঃ পশ্চাদ্ভাবী নত্বারম্ভক ইতি সম্প্রাপ্ত্যবসরে নিরূপিতম্| শ্যাবাস্যতেত্যাদি| শ্যাবঃ শুক্লানুবিদ্ধঃ কৃষ্ণো বর্ণঃ; শ্যামবর্ণ ইত্যন্যে| বিষকৃতে স্থাবরবিষভক্ষণাদিকৃতে; অতীসারঃ তদ্বিষস্যাধোগত্বাত্| ওষধিগন্ধজ ইতি তীব্রৌষধিগন্ধঘ্রাণজে, “পুষ্পেভ্যো গন্ধরজসী ওজস্বিভ্যো যদাঽনিলঃ|” (সু. উ. তং. অ. ৩৯) ইত্যাদিনা বৃদ্ধসুশ্রুতেন পঠিতং তৃণপুষ্পাখ্যং জ্বরমত্রৈবান্তর্ভাবযন্তি| কামজ ইত্যাদি অভিমতকামিন্যাদ্যপ্রাপ্তিনিমিত্তে| চিত্তবিভ্রংশো ভ্রমাদিঃ| যদাহ বাগ্ভটঃ– “কামাদ্ ভ্রমোঽরুচির্দাহো হ্রীনিদ্রাধীধৃতিক্ষযঃ|” (বা. নি. অ. ২) ইতি| ভযাদিতি ভযাজ্জাতে জ্বরে| এবং শোকাচ্চ কোপাদিত্যেতযোর্বোদ্ধব্যং; শোকাত্ প্রলাপ ইতি সম্বন্ধঃ; প্রলাপশ্চাত্র বাতকার্যঃ, তস্য বাতপিত্তকার্যত্বাত্| ( বিশেষনিশ্চযস্তু নিদানাত্, নিদানমপি লক্ষণং ভবতি|) উক্তং চ– “কামশোকভযাদ্বাযুঃ, ক্রোধাত্ পিত্তং, ত্রযো মলাঃ|” (চ. চি. অ. ৩) ইত্যাদি| যদ্যেবং তত্ কুতঃ ক্রোধজে বেপথুঃ? তস্য বাতকার্যত্বাত্| উচ্যতে– “একঃ প্রকুপিতো দোষঃ সর্বানেব প্রকোপযেত্|” ইতি বচনাত্ পিত্তকোপিতবাতজন্য এবাত্র বেপথুঃ, অথবা ক্রুদ্ধশ্চ বেপমানো দৃশ্যতে ইতি ন হি ‘ দৃষ্টেরনুপপন্নং নামেতি জেজ্জটঃ| ক্রোধঃ পিত্তমিব বাতং চ কোপযতীতি, তদ্যুক্তম্| যদাহ বিদেহঃ– “ক্রোধশোকৌ স্মৃতৌ বাতরক্তপিত্তপ্রকোপণৌ|” ইতি| কোপাচ্চেতি চকারেণ শিরোরুজং সমুচ্চিনোতি| যদাহ বাগ্ভটঃ– “ক্রোধাত্ কম্পঃ শিরোরুক্ চ, প্রলাপো ভযশোকজঃ|” (বা. নি. অ. ২) ইতি| মানসত্বাবিশেষেঽপি ভযজাদীনাং পৃথগুপাদানং হেতুভেদাত্; হেতুভেদাচ্চ ভেদাভিধানং হেতুপ্রত্যনীকচিকিত্সার্থমিতি| অভিচারেত্যাদি| তৃষ্ণা চেতি চকারেণাভিচারজে দাহাদিকং সমুচ্চিনোতি| যদুক্তং হারীতার্থানুবাদিনা বাগ্ভটেন– “তত্রাভিচারিকৈর্মন্ত্রৈর্হূযমানস্য তপ্যতে| পূর্বং চেতস্ততো দেহস্ততো বিস্ফোটতৃড্ভ্রমৈঃ|| সদাহমূর্ছৈর্গ্রস্তস্য প্রত্যহং বর্ধতে জ্বরঃ|” (বা. নি. অ. ২) ইতি| ভূতাভিষঙ্গাদিতি ভূতা দেবগ্রহাদয উন্মাদনিদানে বক্ষ্যমাণাঃ, তেষামভিষঙ্গঃ সম্বন্ধঃ| উদ্বেগ উদ্বিগ্নচিত্ততা||২৬-২৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

অথাগন্তুকজ্বরলক্ষণমাহ– অভিঘাতেত্যাদি| অভিঘাতো লোহশস্ত্রকাষ্ঠাদিনা, অভিচারঃ বিপরীতৈর্মন্ত্রৈঃ লোহস্রুচা সর্ষপাদিহোমঃ, অভিষঙ্গঃ কামাদীনাং ভূতাদীনাং চ সম্বন্ধঃ, অভিশাপঃ ব্রাহ্মণগুরুবৃদ্ধসিদ্ধানামাক্রোশোঽনিষ্টাপাদনমভিশপনম্| তং চাগন্তুকজ্বরং যথাস্বদোষৈর্জানীযাত্| যদুক্তং “কামশোকভযাদ্বাযুঃ” ইত্যাদি| অযং চ দোষসম্বন্ধঃ পশ্চাদ্ভাবী ন ত্বারম্ভক ইতি সম্প্রাপ্ত্যবসরে নিরূপিতম্| আগন্তুজ্বরাণাং বৈচিত্র্যমাহ– শ্যাবেত্যাদি| শ্যাবঃ শুক্লানুবিদ্ধঃ কৃষ্ণো বর্ণঃ, শ্যাববর্ণ ইত্যন্যে| বিষকৃতে স্থাবরাদিবিষভক্ষণাদিকৃতে, বিষস্য ত্রিদোষকর্তৃত্বেঽপি অত্যন্তপিত্তকরত্বাত্ শ্যাবমুখত্বম্| অতিসারঃ স্থাবরবিষযস্যাধোগত্বাত্| তোদো ব্যথা| শেষং সুগমম্| তীব্রৌষধিগন্ধঘ্রাণজে বমথুঃ ছর্দিঃ, ক্ষবঃ ছিক্কা| শেষং সুগমম্| কামজে অভিমতকামিন্যাদ্যপ্রাপ্তিনিমিত্তজে| চিত্তবিভ্রংশঃ কিঙ্কর্তব্যতামূঢত্বম্| যদুক্তং বাগ্ভটে– “কামাদ্ভ্রমোঽরতির্দাহো হ্রীনিদ্রাধীধৃতিক্ষযঃ| ধ্যাননিঃশ্বাসবহুলং লিঙ্গং কামজ্বরে স্মৃতম্||” ইতি| শেষং সুবোধম্| ভযশোককোপাভিষঙ্গজ্বরমাহ– ভযাদিত্যাদি| ভযাদিতি ভযাজ্জাতে জ্বরে, এবং শোকাত্কোপাদিত্যত্রাপি বোদ্ধব্যম্| প্রলাপঃ অসম্বদ্ধভাষণং, বেপথুঃ কম্পঃ, ভযাজ্জাতে জ্বরে তথা শোকাত্ কোপাদিত্যেতযোর্বোদ্ধব্যম্| শোকাত্প্রলাপ ইতি সম্বন্ধঃ| প্রলাপশ্চাত্র বাতকার্যঃ, সর্বদৈব তস্য বাতকার্যত্বাত্, বিশেষনিশ্চযশ্চ নিদানাত্; নিদানমপি ক্বচিল্লক্ষণং ভবতি| যদ্যেবং তত্কথং ক্রোধাদ্বেপথুঃ, তস্যাপি বাতকার্যত্বাত্| উচ্যতে– “একঃ প্রকুপিতো দোষঃ সর্বানেব প্রকোপযে|ত্” ইতি পিত্তকোপিতবাতজন্য এবাত্র বেপথুঃ, ক্রুদ্ধশ্চ বেপমানো দৃশ্যতে ইতি ন হি দৃষ্টেরনুপপন্নং নামেতি জেজ্জটঃ| ক্রোধঃ পিত্তমিব বাতং চ কোপযতীতি যুক্তং; যদাহ বিদেহঃ– “ক্রোধশোকৌ স্মৃতৌ বাতরক্তপিত্তপ্রকোপণৌ|” ইতি| কোপাচ্চেতি চকারেণ শিরোরোগং সমুচ্চিনোতি| যদাহ বাগ্ভটঃ– “ক্রোধাত্কম্পঃ শিরোরুক্ চ প্রলাপো ভযশোকজে|” ইতি| মানসত্বাবিশেষেঽপি ভযজাদীনাং পৃথগুপাদানং হেতুভেদাত্, হেতুভেদাচ্চ ভেদাভিধানং হেতুপ্রত্যনীকচিকিত্সার্থমিতি| অভিচারাভিশাপাভ্যাং জাতে জ্বরে মোহোঽচৈতন্যং জাযতে; অভিচারো মন্ত্রাদিভির্মারণপ্রযোগঃ, অভিশাপো ব্রহ্মর্ষিগুরুসিদ্ধাদীনামভিশপনমাক্রোশঃ| তৃষ্ণা চেতি চকারেণাভিচারজে দাহাদিকং সমুচ্চিনোতি| যদুক্তং হারীতমতানুবাদিনা বাগ্ভটেন– “তন্ত্রাভিচারিকৈর্মন্ত্রৈর্হূযমানস্য তপ্যতে| পূর্বং চেতস্ততো দেহস্ততো বিস্ফোটতৃড্ভ্রমৈঃ|| সদাহমূর্ছাগ্রস্তস্য প্রত্যহং বর্ধতে জ্বরঃ|” ইতি| ভূতা দেবগ্রহাদয উন্মাদনিদানে বক্ষ্যমাণাঃ, তেষামভিসমন্তাত্সঙ্গস্তস্মাত্| উদ্বেগ উদ্বিগ্নচিত্ততা||২৬-২৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আগন্তুজ্বরেষ্বপি প্রতিনিযতদোষানুবন্ধপ্রদর্শনার্থমাহ– কামশোকেত্যাদি| ত্রযো মলা ভূতাভিষঙ্গাত্ কুপ্যন্তীতি ভূতপ্রভাবাত্| যচ্চ চরকেণ নিদানস্থানে ‘অভিষঙ্গজঃ পুনর্বাতপিত্তাভ্যাং’ (চ. নি. অ. ১) ইত্যুক্তং, তত্ প্রাযিকং মন্তব্যমিতি জেজ্জটঃ| চক্রস্ত্বাহ– “অভিষঙ্গজ ইত্যনেন কামাদ্যভিষঙ্গজ উচ্যতে, নতু ভূতাভিষঙ্গজঃ|” ইতি| ভূতসামান্যলক্ষণা ইতি যস্য ভূতস্য দেবগ্রহাদেরভিষঙ্গাত্ কুপ্যন্তি তস্য যল্লক্ষণং রোদনাদি তেন সহ সামান্যং সদৃশ লক্ষণং যেষাং তে তথা, ইতি ব্যাচক্ষতে জেজ্জটাদযঃ; দোষলক্ষণানি ভূতলক্ষণানি চ ভবন্তীত্যর্থঃ||৩০||–

আতঙ্কদর্পণ ব্যাখ্যা (বাচস্পতি বৈদ্য কৃত)

আগন্তুজেষু প্রতিনিযতদোষানুবন্ধান্ প্রদর্শযন্নাহ– কামেত্যাদি| কামশোকভযৈর্বাযুঃ কুপ্যতি, ক্রোধেন পিত্তং, ভূতাভিষঙ্গাত্ত্রযো দোষাঃ কুপ্যন্তি| ভূতসামান্যলক্ষণা ইতি যস্য ভূতস্য দেবগ্রহাদেরভিষঙ্গাত্প্রকুপ্যন্তি তস্য যল্লক্ষণং রোদনাদি তেন সহ সামান্যং লক্ষণং যেষাং তে তথা ইতি ব্যাচক্ষতে জেজ্জটাদযঃ| দোষলক্ষণানি ভূতলক্ষণানি চ ভবন্তীত্যর্থঃ; তচ্চ বক্ষ্যমাণে উন্মাদনিদানে দ্রষ্টব্যম্||৩০||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অথ বিষমজ্বরসম্প্রাপ্তিমাহ– দোষোঽল্প ইত্যাদি| অল্প ইত্যনেনাবলত্বাত্ কালবিশেষমবাপ্য লব্ধবলো জ্বরযতি, যস্তু বলবান্ স নিত্যজ্বরমেব করোতি| অহিতসম্ভূত ইতি অহিতাহারাচারাদিসম্ভূতো বৃদ্ধঃ| জ্বরোত্সৃষ্টস্য সহসা নিবৃত্তজ্বরস্য| বাশব্দেন প্রথমতোঽপি বিষমজ্বরো ভবতীতি দর্শযতি| যদুক্তম্– “আরম্ভাদ্বিষমো যস্তু” ইত্যাদি| ধাতুমন্যতমং রসরক্তাদিকম্| বিষমজ্বরং তৃতীযকাদিকম্| বিষমজ্বরসামান্যলক্ষণং চ ভালুকিনা পঠিতম্– “যঃ স্যাদনিযতাত্ কালাচ্ছীতোষ্ণাভ্যাং তথৈব চ| বেগতশ্চাপি বিষমো জ্বরঃ স বিষমঃ স্মৃতঃ||” ইতি||৩১||–

আতঙ্কদর্পণ ব্যাখ্যা (বাচস্পতি বৈদ্য কৃত)

অথ বিষমজ্বরসম্প্রাপ্তিমাহ– দোষ ইত্যাদি| জ্বরোত্সৃষ্টস্য পুংসোঽল্পো দোষঃ পুনরহিতসম্ভূতঃ সন্ অন্যতমং ধাতুং প্রাপ্য বিষমজ্বরং করোতি| অল্প ইত্যনেনাবলত্বাত্কালবিশেষমবাপ্য লব্ধবলো জ্বরযতি, যস্তু বলবান্ স নিত্যমেব জ্বরং করোতি| অহিতসম্ভূত ইতি অহিতাহারাচারাদিজনিতঃ| জ্বরোত্সৃষ্টস্য সহসা নিবৃত্তজ্বরস্য| বাশব্দেন প্রথমতোঽপি বিষমজ্বরো ভবতীতি দর্শযতি| যদুক্তম্– “আরম্ভাদ্বিষমৌ যস্তু” ইতি| ধাতুমন্যতমং রসরক্তাদিকম্| বিষমজ্বরং তৃতীযাদিকম্| বিষমজ্বরসামান্যলক্ষণং চ ভালুকিনা পঠিতং; তদ্যথা– “যঃ স্যাদনিযতাত্কালাচ্ছীতোষ্ণাভ্যাং তথৈব চ| বেগতশ্চাপি বিষমো জ্বরঃ স বিষমঃ স্মৃতঃ||” ইতি| এতে ধাতুগতাঃ||৩১||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্ততাদিজ্বরাণাং প্রতিনিযতদূষ্যান্ ধাতূনাহ– সন্ততমিত্যাদি| সন্ততশব্দঃ সততস্যোপলক্ষণঃ| তেনৈতদুক্তং ভবতি– রসস্থঃ সন্ততং, রক্তস্থঃ সততকমিতি; যদুক্তং চরকে– “ রক্তধাত্বাশ্রযঃ প্রাযো দোষঃ সততকং জ্বরম্|” (চ. চি. অ. ৩) ইতি ( প্রাযোগ্রহণাত্ সততকো রক্তব্যতিরিক্তং রসধাতুমাশ্রযতে)| রসগ্রহণং চাত্র বিশেষপরং, সর্বজ্বরেষু রসস্যাবশ্যদূষ্যত্বাত্| অন্যে তু সততগ্রহণার্থং ‘সন্ততৌ রসরক্তস্থৌ’ ইতি পঠন্তি| তন্নাতিযুক্তম্, অত্র হি সন্ততসততশব্দৌ সঞ্জ্ঞাপরৌ, নতু সাতত্যবচনৌ; তেন সন্ততশব্দেন সততকস্যানভিধানাত্ কথমেকশেষ ইতি দোষঃ| অন্যেদ্যুরিতি অন্যেদ্যুষ্কম্| ঘোরং দুঃসহম্| অন্তকং যমমিব, মারকত্বাত্| রোগসঙ্করম্ অনেকরোগসঙ্কুলম্||৩২-৩৩||

আতঙ্কদর্পণ ব্যাখ্যা (বাচস্পতি বৈদ্য কৃত)

সন্ততাদিজ্বরাণাং প্রতিনিযতদূষ্যান্ ধাতূনাহ– রসরক্তস্থো দোষঃ সন্ততং কুর্যাদিত্যধ্যাহার্যমাণেন সম্বন্ধঃ| যো দোষো রসরক্তাশ্রযঃ স সন্ততং জ্বরং করোতি| সন্ততশব্দঃ সততস্যোপলক্ষণঃ| তেনৈতদুক্তং ভবতি– রসস্থঃ সন্ততং, রক্তস্থঃ সততকমিতি যদুক্তং চরকে– “রক্তধাত্বাশ্রযঃ প্রাযো দোষঃ সততকং জ্বরম্|” ইতি| রসগ্রহণং চাত্র বিশেষপরং, সর্বজ্বরেষু রসস্যাবশ্যং দুষ্টত্বাত্| অন্যে তু সততং সাতত্যার্থকং মন্যমানাঃ “সন্ততৌ রসরক্তস্থৌ” ইতি পঠন্তি| তন্ন যুক্তম্| অত্র হেতুঃ– সন্ততসততশব্দৌ চাত্র সঞ্জ্ঞাপরৌ ন তু সাতত্যবচনৌ, তেন সন্ততশব্দেন সততকস্যানভিধানাত্কথমেকশেষঃ? ভিন্নরূপযোঃ সমানার্থযোরেব একশেষবিধানাত্| তথা চ বার্তিকম্– “বিরূপাণামপি সমানার্থানাম্” ইতি| কেচিত্তু “সততং রসরক্তস্থঃ” ইতি পাঠং পঠিত্বা রসরক্তস্থো দোষঃ সততকং জ্বরং করোতীতি| অন্যে ত্বত্র সন্ততমিতি লুপ্তং বর্ণযিত্বা সন্ততং রসস্থঃ সততং রক্তস্থঃ কুর্যাদিত্যাচক্ষতে| সোঽন্যেদ্যুরিতি স ইতি দোষঃ, পিশিতাশ্রিতো মাংসাশ্রিতঃ, অন্যেদ্যুরিতি অন্যেদ্যুষ্কম্| দোষোঽস্থিমজ্জগতশ্চতুর্থেঽহ্নি চাতুর্থকং কুর্যাত্| কীদৃশং চাতুর্থকং? ঘোরং সুদুঃসহম্| অন্তকং যমমিব মারকত্বাত্| রোগসঙ্করমনেকরোগসঙ্কুলং, যতো গম্ভীরস্থানত্বাচ্চিরক্লেশনত্বাচ্চ রোগানন্যানপ্যাবহতি||৩২-৩৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অথৈষাং লক্ষণান্যাহ– সপ্তাহমিত্যাদি| এতে বিকল্পা যথাক্রমং বাতপিত্তকফোল্বণত্বেন জ্ঞেযাঃ| যথোক্তম্– “পিত্তকফানিলবৃদ্ধ্যা দশদিবসদ্বাদশাহসপ্তাহাত্| হন্তি বিমুঞ্চতি বাঽঽশু ত্রিদোষজো ধাতুমলপাকাত্||” ইতি| অযং চ সন্ততস্ত্রিদোষজ এব দ্বাদশাশ্রযত্বেন| যদুক্তং চরকেণ– “যথা ধাতূংস্তথা মূত্রং পুরীষং চানিলাদযঃ| যুগপচ্চানুপদ্যন্তে নিযমাত্ সন্ততে জ্বরে||” (চ. চি. অ. ৩) ইতি| সন্তত্যা অবিচ্ছেদেন সপ্তাহাদীন্ ব্যাপ্য অবিসর্গী অপরিত্যাগী, অত্যন্তসংযোগে দ্বিতীযা| ননু, যদ্যেবং কথমস্য বিষমজ্বরে পাঠঃ? মুক্তানুবন্ধিত্বং বিষমত্বং, তচ্চাত্র নাস্তি| নৈবম্, অস্যাপি তথাভাবাত্| তথা চ তল্লক্ষণে চরকঃ– “বিসর্গং দ্বাদশে কৃত্বা দিবসেঽব্যক্তলক্ষণঃ| দুর্লভোপশমঃ কালং দীর্ঘমপ্যনুবর্ততে||” (চ. চি. অ. ৩) ইতি| যত্তূক্তং খরনাদেন– “জ্বরাঃ পূর্বং মযোক্তা যে পঞ্চ সন্ততকাদযঃ| চত্বারঃ সন্ততং হিত্বা জ্ঞেযাস্তে বিষমজ্বরাঃ||” ইতি; তত্ সন্ততে মুক্তানুবন্ধিত্বস্যৈকদা ভাবিত্বেনাল্পত্বান্ন তদ্ব্যপদেশঃ, একতণ্ডুলাভ্যবহারেঽনশনশব্দস্য ব্যপদেশবত্; নহি তৃতীযকাদিবদাবৃত্ত্যা মুক্তানুবন্ধিত্বমস্যেত্যভিপ্রাযেণ দ্রষ্টব্যম্| অথবা যা বিষমজ্বরোল্লেখেন চিকিত্সোক্তা সা সন্ততবর্জং সততাদিষু কার্যেতি প্রতিপাদনার্থম্| হরিচন্দ্রেণাপি কিল| “কর্ম সাধারণং জহ্যাত্তৃতীযকচতুর্থকৌ|” ইতি (চ. চি. অ. ৩) চরকবচনাদ্বিষমজ্বরোক্তচিকিত্সা তৃতীযকচতুর্থকযোরেব, অন্যেষু দোষপ্রত্যনীকচিকিত্সা কার্যেতি ব্যাখ্যাতম্| অস্যাং হরিচন্দ্রব্যাখ্যাযাং কর্ম সাধারণং সর্বত্রৈব বিষমজ্বরে কার্যং, বিশেষেণ তৃতীযকচতুর্থকযোরিতি দ্রষ্টব্যম্; অন্যথা উক্ততন্ত্রান্তরবিরোধঃ| অহোরাত্রে সততকো দ্বৌ কালাবনুবর্তত ইতি অহ্নি দ্বৌ কালৌ রাত্রৌ দ্বৌ কালৌ বা; অহ্নি এককালং রাত্রাবেককালমেবং বা; দ্বৌ কালৌ ইতীশানদেবঃ, নিযমানভিধানাত্ তথা দর্শনাচ্চ| অনুবর্ততে বেগং করোতি| তৃতীযেঽহ্নি তৃতীযক ইতি বেগদিনাপেক্ষযা তৃতীযেঽহ্নি যো ভবতি স তৃতীযকো ভবতি, এবং চতুর্থকেঽপি বাচ্যম্||৩৪-৩৫||–

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীমেকদোষদ্বিদোষজস্য সন্ততজ্বরস্য বিসর্গকালাবধিদ্বারেণ লক্ষণমাহ– স্রোতোভিরিত্যাদি| সর্বগাত্রানুগাঃ সর্বে দোষা বাতাদযঃ সন্ততমবিছিন্নং জ্বরং সন্তাপং কুর্বন্তি| কিম্ভূতাঃ রসবাহিভিঃ স্রোতোভিঃ বিস্তৃতাঃ বিস্তৃতিং প্রাপ্তাঃ, গুরবো দুঃসহাঃ, সর্বগাত্রানুগাঃ সন্তাপাদিনা সমগ্রং গাত্রং ব্যাপ্নুবন্তি| সন্তত্যা নৈরন্তর্যেণ সপ্তাহাদীন্ ব্যাপ্য অবিসর্গী অত্যাগশীলঃ স জ্বরঃ সন্ততঃ| অযং সুখসাধ্যঃ; তদুক্তং তন্ত্রান্তরে “সন্ততজ্বর এবান্যঃ স্বল্পদুর্বলকারণঃ| একদোষো দ্বিদোষো বা সুখসাধ্যঃ প্রকীর্তিতঃ||” ইতি| তথা চ– “বাতিকঃ সপ্তরাত্রেণ দশরাত্রেণ পৈত্তিকঃ| শ্লৈষ্মিকো দ্বাদশাহেন জ্বরঃ পাকং প্রগচ্ছতি” ইতি, প্রকৃতিসমসমবেতত্বাত্| ননু কথমস্য বিষমজ্বরে পাঠঃ? যদুক্তং খরনাদেন– “জ্বরাঃ পঞ্চ মযোক্তা যে পূর্বং সন্ততকাদযঃ| চত্বারঃ সন্ততং হিত্বা জ্ঞেযাস্তে বিষমজ্বরাঃ||” ইতি; মুক্তানুবন্ধিত্বাদ্বিষমত্বং, বিমুচ্যানুবধ্নাতীতি, তচ্চাত্র নাস্তি| নৈবম্, অস্যাপি তথাভাবাত্| তথা চ তল্লক্ষণে চরকঃ– “বিসর্গং দ্বাদশে কৃত্বা দিবসেঽব্যক্তলক্ষণম্| দুর্লভোপশমঃ কালং দীর্ঘমপ্যনুবর্ততে||” ইতি| সততকাদীনাং কালানুবর্তনত্বেন লক্ষণমাহ– অহোরাত্র ইত্যাদি| কালাঃ ষট্ পূর্বাহ্ণমধ্যাহ্নাপরাহ্ণকপ্রদোষার্ধরাত্রপ্রত্যূষাঃ; পূর্বাহ্ণপ্রদোষযোঃ কফস্য কালঃ, মধ্যাহ্নার্ধরাত্রযোঃ পিত্তস্য, অপরাহ্ণপ্রত্যূষযোর্বাতস্য| পূর্বাহ্ণাদীনাং ষণ্ণাং কালানাং মধ্যে কালদ্বযমনুবর্ততে, বেগং করোতি স সততঃ; অহ্নি এককালং রাত্রাবেককালং বা, অহ্নি দ্বৌ কালৌ রাত্রৌ দ্বৌ কালৌ বা, এবং দ্বৌ কালাবিতি ঈশানো যদুক্তবান্ তত্র দোষোত্কর্ষাপকর্ষাভ্যামধিককালত্বং হীনকালত্বমপি জ্ঞাতব্যং ন তু নিযমঃ| অন্যেদ্যুষ্কো জ্বর এককালমনুবর্ততে বেগং করোতি অহোরাত্রাদন্যস্মিন্নহোরাত্রে এককালমাগচ্ছতীত্যর্থঃ| তৃতীযকঃ তৃতীযেঽহ্নি এককালমিতি সম্বধ্যতে| চাতুর্থকশ্চতুর্থেঽহ্নীত্যত্রাপ্যেকং কালমিতি| এতে চত্বারো বিষমজ্বরাঃ| যদুক্তং খরনাদেন– “জ্বরাঃ পঞ্চ মযোক্তাঃ” ইত্যাদিনা| এষাং চোত্পত্তিক্রমো বৃদ্ধসুশ্রুতাদবগন্তব্যঃ, স যদাহ– “ অহোরাত্রাদহোরাত্রাত্ স্থানাত্স্থানে প্রপদ্যতে| ততশ্চামাশযং প্রাপ্য করোতি বিষমজ্বরম্|| তথা প্রলেপকো জ্ঞেযঃ শোষিণাং প্রাণনাশনঃ| দুশ্চিকিত্স্যতমো মন্দঃ স কষ্টো ধাতুশোষকৃত্|| কৃশানাং জ্বরমুক্তানাং মিথ্যাহারবিহারিণাম্| দোষঃ স্বল্পোঽপি সংবৃদ্ধো দেহিনামনিলেরিতঃ|| কফস্থানবিভাগেন যথাসঙ্খ্যং করোতি হি| সততান্যেদ্যুষ্কত্র্যাখ্যচতুর্থান্সপ্রলেপকান্||” ইতি| অস্যাযমর্থঃ– আমাশযহৃদযকণ্ঠশিরঃসন্ধয ইতি পঞ্চ কফস্থানানি, এষু স্থিতৈর্দোষৈর্যথাসঙ্খ্যমহোরাত্রাত্ স্থানং প্রপদ্য আমাশযং গত্বা সততাদযঃ ক্রিযন্তে| তত্রামাশযস্থিতেন দোষেণ সততঃ ক্রিযতে পরন্তু দ্বিকালং নচ সর্বদা; ন চামাশযপ্রাপ্ত্যা সর্বদাঽস্য সম্ভবপ্রসঙ্গঃ, অহোরাত্রে স্বপ্রকোপকালাপেক্ষযা জ্বরোত্পত্তেঃ| হৃদযস্থিতেন দোষেণ একস্মিন্ দিনে আমাশযমাগত্যান্যেদ্যুঃ ক্রিযতে, সততারম্ভকদোষাপেক্ষযাস্য ব্যবহিতত্বাত্| কণ্ঠস্থিতেন দোষেণৈকস্মিন্ দিনে হৃদযমাগম্যতে, অন্যস্মিন্ দিনে আমাশযমাগত্য জ্বর আরভ্যতে তৃতীযকঃ| এবং শিরসি স্থিতেন দোষেণ কণ্ঠহৃদযামাশযান্ ত্রিভির্দিনৈঃ ক্রমেণ প্রাপ্য চতুর্থেঽহ্নি চাতুর্থকঃ ক্রিযতে| পুনঃ স্বস্থানগমনং তু দোষাণাং হৃতবেগত্বেন লাঘবাদ্বেগদিন এব ভবতি| সন্ধিস্থিতেন দোষেণ প্রলেপকঃ, সন্ধযশ্চামাশযেঽপি সন্তীতি স সর্বদা ভবতি| অবিষমোঽপ্যযং বিষমসহচরিতঃ পঠিতঃ, কফস্থানোত্পাদানুরোধাত্| উক্তং হি সুশ্রুতে– “ প্রলেপকস্ত্ববিষমঃ প্রাযঃ ক্লেশায শোষিণাম্|” ইতি| বিষমজ্বর এবান্যশ্চাতুর্থকবিপর্যযঃ, ইতি| অত্র তন্ত্রান্তরে– “অস্থিমজ্জোভযগতে চাতুর্থিকবিপর্যযঃ| মধ্যেঽহনি জ্বরযতি হ্যাদাবন্তে চ মুঞ্চতি||” ইতি| আদাবেকদিনং ন ভূত্বা মধ্যে দিনদ্বযং ভূত্বা অন্তে একদিনং ন ভবতীতি ব্যাচক্ষতে জেজ্জটাদযঃ| “অস্থিমজ্জোভযগতে চাতুর্থকবিপর্যযঃ| ত্র্যহাদ্দ্ব্যহং জ্বরযতি হ্যাদাবন্তে বিমুঞ্চতি||” ইতি তন্ত্রান্তরম্| চাতুর্থকবিপর্যযো নাম্না জ্বরঃ| অস্থি চ মজ্জা চ অস্থিমজ্জানৌ অস্থিমজ্জ্ঞোরুভযং তত্র গতো যো মলোঽস্থিষু মজ্জসু বা গতস্তস্মিন্ ত্রিপ্রকারো জাযতে||৩৪-৩৫||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিষমজ্বরস্যৈকীযমতেন ভূতাভিষঙ্গজত্বমাহ– কেচিদিত্যাদি| পরবচনমপ্রতিষিদ্ধমনুমতং সুশ্রুতেন; অত এব বিষমজ্বরে দৈবব্যপাশ্রযং বলিহোমাদি ভূতোচিতং, যুক্তিব্যপাশ্রযং কষাযপানাদি দোষোচিতং চ বিধীযতে| যদাহ চরকঃ– “কর্ম সাধারণং জহ্যাত্তৃতীযকচতুর্থকৌ| আগন্তুরনুবন্ধো হি প্রাযশো বিষমজ্বরে||” (চ. চি. অ. ৩) ইতি| অত্র সাধারণমিতি দৈবযুক্তিব্যপাশ্রযমিতি ব্যাচক্ষতে ইতি||৩৬||

আতঙ্কদর্পণ ব্যাখ্যা (বাচস্পতি বৈদ্য কৃত)

পরকীযমতমাহ– কেচিদিত্যাদি| কেচন আচার্যা বিষমজ্বরং ভূতাভিষঙ্গোত্থং কথযন্তি| অত এব বিষমজ্বরে দৈবব্যপাশ্রযং বলিমঙ্গলহোমাদিভূতোচিতং যুক্তিব্যপাশ্রযং কষাযপানাদিকং দোষোচিতং চ বিধীযতে| যদাহ চরকঃ– “কর্ম সাধারণং জহ্যাত্তৃতীযকচতুর্থকৌ| আগন্তুরনুবন্ধো হি প্রাযশো বিষমজ্বরে||” ইতি| অত্র সাধারণমিতি দৈবযুক্তিব্যপাশ্রযমিতি ব্যাচক্ষতে||৩৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উল্বণদোষভেদেন তৃতীযকচতুর্থকযোর্লক্ষণান্তরমাহ– কফপিত্তাদিত্যাদি| ত্রিকগ্রাহী বেদনযা ত্রিকব্যাপী, ত্রিকস্য বাতস্থানত্বেন তদ্গতৌ পিত্তকফাবন্যস্থানগতত্বেন দুর্বলৌ তৃতীযদিনে বেগং কুরুতঃ, যদি তু স্বস্থানস্থিতৌ স্যাতাং তদা সন্ততজ্বরমেব কুর্যাতামিতি জেজ্জটঃ| এবং শিরসি কফস্থানে, পৃষ্ঠে চ পিত্তস্থানে বোদ্ধব্যম্| পৃষ্ঠাদিতি ল্যব্লোপে কর্মণি পঞ্চমী, পৃষ্ঠং বেদনযা ব্যাপ্যেত্যর্থঃ| নচ বাচ্যং যদি ত্রিকং বাতস্থানং তত্কথং তত্র পিত্তকফাবিতি; প্রকৃতিস্থানাং দোষাণাং স্থাননিযমো নতু প্রকুপিতানাং, তেষাং সর্বদেহগতত্বাত্| যদাহ সুশ্রুতঃ– “কুপিতানাং হি দোষাণাং শরীরে পরিধাবতাম্| যত্র সঙ্গঃ খবৈগুণ্যাদ্ব্যাধিস্তত্রোপজাযতে||” (সু. সূ. অ. ২৪) ইতি| এবমন্যস্থানগতত্বেন দোষদৌর্বল্যাদি চতুর্থকেঽপি বাচ্যম্| প্রভাবং রুজারূপাং শক্তিম্| দ্বিবিধং বিবৃণোতি– জঙ্ঘাভ্যামিত্যাদি| জঙ্ঘাভ্যাং শিরস্ত ইতি| এতচ্চ পঞ্চমীদ্বযং পূর্ববত্| পূর্বমিতি প্রথমং, তত্র ভূত্বা নিখিলং দেহং ব্যাপ্নোতি| শ্লৈষ্মিক ইতি শ্লেষ্মোল্বণঃ, সন্ততসততকান্যেদ্যুষ্কতৃতীযকচতুর্থকানাং পঞ্চানাং সান্নিপাতিকত্বাত্| যদুক্তং চরকে– “প্রাযশঃ সন্নিপাতেন দৃষ্টঃ পঞ্চবিধো জ্বরঃ| সন্নিপাতে তু যো ভূযান্ স দোষঃ পরিকীর্তিতঃ||” (চ. চি. অ. ৩) ইতি| অথবা প্রাযোগ্রহণাদেকদোষজা দ্বিদোষজা অপি ভবন্তি| অন্যে ত্বাহুঃ– বিকৃতিবিষমসমবাযারব্ধাঃ সন্ততাদযঃ সন্নিপাতজাঃ, তেষামেবোদ্ভূতদোষেণ ব্যপদেশঃ; প্রকৃতিসমসমবাযারব্ধাস্তে একদোষজদ্বিদোষজা অপি ভবন্তীতি জেজ্জটঃ| প্রকৃতিসমসমবাযারব্ধশ্চতুর্থকস্তু পিত্তেন ন ক্রিযত এব, ব্যাধিস্বভাবাত্; পিত্তজগলগণ্ডবত্| ননু, অস্তি পৈত্তিকোঽপি চতুর্থকঃ; তথা চ হারীতাচার্যো ব্যাহরতি– “চতুর্থকো নাম গদো দারুণো বিষমজ্বরঃ| শোষণঃ সর্বধাতূনাং বলবর্ণাগ্নিনাশনঃ|| ত্রিদোষজো বিকারঃ স্যাদস্থিমজ্জগতোঽনিলঃ| কুপিতং পিত্তমেবং তু কফশ্চৈবং স্বভাবতঃ|| শীতদাহকরস্তীব্রস্ত্রিকালং চানুবর্ততে| সন্নিপাতসমুদ্ভূতো বিষমো বিষমজ্বরঃ|| ঊর্ধ্বং কাযস্য গৃহ্ণাতি যঃ পূর্বং সোঽনিলাত্মকঃ| পূর্বং গৃহ্ণাত্যধঃকাযং শ্লেষ্মবৃদ্ধশ্চতুর্থকঃ||” ইতি| অত্রাহুঃ– অনুবন্ধরূপমত্র পিত্তং, ন ত্বারম্ভকং; কথমেষা প্রতীতিরিতি চেত্, স্থানবিশেষানভিধানাত্; অত এব হারীতেনাপি স্থানং নোদাহৃতমেব জঙ্ঘাদিবদিতি চরকটীকাকৃতো ব্যাচক্ষতে| কিন্ত্বেষা ব্যাখ্যা তদা সঙ্গচ্ছতে যদি পিত্তলিঙ্গং নোদ্ভূতং দৃশ্যতে, দৃশ্যতে চ; তথাহি কথ্যতে– ভেডেঽপি পৈত্তিকঃ পঠ্যতে– “আমাশযস্থঃ পবনো হ্যস্থিমজ্জগতোঽপি বা| কুপিতঃ কোপযত্যাশু শ্লেষ্মাণং পিত্তমেব চ||” ইতি| কিঞ্চ নাগভর্তৃতন্ত্রে স্থানমপ্যুক্তমেব– “ঊর্ধ্বকাযং তু যঃ পূর্বং গৃহ্ণাতি সোঽনিলাত্মকঃ| মধ্যকাযং তু গৃহ্ণাতি পূর্বং যস্তু স পিত্তজঃ|| পূর্বং গৃহ্ণাত্যধঃকাযং শ্লেষ্মবৃদ্ধশ্চতুর্থকঃ||” ইতি| তস্মাত্ প্রাযেণ কফবাতাভ্যাং ভবতীতি পৈত্তিকশ্চতুর্থকশ্চরকাদিভির্নোদাহৃতঃ, নত্বসম্ভবাদিতি মন্তব্যম্| এষাং চোত্পত্তিক্রমো বৃদ্ধসুশ্রুতাদবগন্তব্যঃ| স যদাহ– “অহোরাত্রাদহোরাত্রাত্ স্থানাত্ স্থানং প্রপদ্যতে| ততশ্চামাশযং প্রাপ্য করোতি বিষমজ্বরম্|| কফস্থানবিভাগেন যথাসঙ্খ্যং করোতি হি| সততান্যেদ্যুষ্কত্র্যাখ্যচতুর্থান্ সপ্রলেপকান্||” (সু. উ. তং. অ. ৩৯) ইতি| অস্যাযমর্থঃ– আমাশযহৃদযকণ্ঠশিরঃসন্ধযঃ পঞ্চ কফস্থানানি, এষু স্থিতৈর্দোষৈর্যথাসঙ্খ্যং সততাদযঃ ক্রিযন্তে| তত্রামাশযস্থিতেন দোষেণ সততকঃ ক্রিযতে দ্বিকালং ন চ সর্বদা; ন চামাশযপ্রাপ্ত্যা সর্বদা প্রসঙ্গঃ, অহোরাত্রেষু কালেষু স্বপ্রকোপকালাপেক্ষযা জ্বরোত্পত্তেঃ| হৃদযস্থিতেন দোষেণামাশযমাগত্যান্যেদ্যুষ্কঃ ক্রিযতে এককালং, নচ সর্বদা, সততারম্ভকদোষাপেক্ষযাঽস্য ব্যবহিতত্বাত্| কণ্ঠস্থিতেন দোষেণৈকস্মিন্ দিনে হৃদযমাগম্যতে, অপরস্মিন্নামাশযমাগত্য জ্বর আরভ্যতে তৃতীযকঃ| এবং শিরঃস্থিতেন দোষেণ কণ্ঠহৃদযামাশযান্ ত্রীন্ ত্রিভির্দিনৈঃ ক্রমেণ প্রাপ্য চতুর্থকঃ ক্রিযতে| পুনঃ স্বস্থানগমনং তু দোষাণাং হৃতবেগত্বেন লাঘবাদ্বেগদিন এব ভবতি| সন্ধিস্থিতেন দোষেণ প্রলেপকঃ ক্রিযতে, সন্ধযশ্চামাশযেঽপি সন্তীতি স সর্বদা ভবতি| অযং চাবিষমোঽপি বিষমসহচরিতঃ পঠিতঃ কফস্থানোত্পাদানুরোধাত্| উক্তং হি সুশ্রুতে– “ প্রলেপকস্ত্ববিষমঃ প্রাযঃ ক্লেশায শোষিণাম্||” (সু. উ. তং. অ. ৩৯) ইতি||৩৭-৩৮||

আতঙ্কদর্পণ ব্যাখ্যা (বাচস্পতি বৈদ্য কৃত)

উল্বণদোষভেদেন তৃতীযকচতুর্থকযোর্লক্ষণান্তরমাহ– তৃতীযক ইত্যাদি| তৃতীযকো জ্বরস্ত্রিবিধো ভবতি| কফপিত্তাত্ত্রিকগ্রাহী বেদনযা ত্রিকব্যাপী| ত্রিকস্য বাতস্থানত্বাত্তদ্গতৌ কফপিত্তৌ অন্যস্থানগতত্বেন দুর্বলৌ তৃতীযদিনে বেগং কুরুতঃ, যদি তু স্বস্থানস্থিতৌ স্যাতাং তদা সন্ততমেব কুর্যাতামিতি জেজ্জটঃ| এবং শিরসি কফস্থানে পৃষ্ঠে চ পিত্তস্থানে বোদ্ধব্যম্| ন চ বাচ্যং যদি ত্রিকং বাতস্থানং তত্কথং তত্র পিত্ত কফাবিতি? উচ্যতে– প্রকৃতিস্থানাং দোষাণাং স্থাননিযমো ন তু কুপিতানাং, তেষাং সর্বগতত্বাত্| যদাহ সুশ্রুতঃ– “কুপিতানাং হি দোষাণাং শরীরে পরিধাবতাম্| যত্র সঙ্গঃ খবৈগুণ্যাদ্ব্যাধিস্তত্রোপজাযতে||” ইতি| এবমন্যস্থানগতত্বেন দোষদৌর্বল্যাদিচতুর্থকেঽপি বাচ্যম্| বাতকফাত্মকো জ্বরো বেদনযা পৃষ্ঠগ্রাহী, বাতপিত্তাত্মকো বেদনযা শিরোগ্রাহী, এবং ত্রৈবিধ্যম্| চাতুর্থিকো দ্বিপ্রকারাং শক্তিং দর্শযতি– জঙ্ঘাভ্যাং শ্লৈষ্মিকঃ, অনিলসম্ভবঃ শিরসঃ, বেদনযেত্যর্থঃ| চাতুর্থিকঃ পিত্তেন ন ক্রিযতে ইত্যেকে, ব্যাধিস্বভাবাত্ পিত্তজগলগণ্ডবত্| হারীতস্তু চাতুর্থিকোঽপি পৈত্তিকোঽস্তীতি বদতি– “চাতুর্থিকো নাম গদো দারুণো বিষমজ্বরঃ| শোষণঃ সর্বধাতূনাং বলবর্ণাগ্নিনাশনঃ|| ত্রিদোষজো বিকারঃ স্যাদস্থিমজ্জাগতোঽনিলঃ| করোতি পিত্তমেবং তু কফশ্চৈবং স্বভাবতঃ||” ইত্যাদি| অত্রাহুঃ– অনুবন্ধরূপমত্র পিত্তং ন ত্বারম্ভকং, কথমেষা প্রতীতিরিতি চেত্, স্থানবিশেষানভিধানাত্; অত এব হারীতেনাপি স্থানং নোদাহৃতং জঙ্ঘাদিবদিতি চরকটীকাকৃতো ব্যাচক্ষতে| কিং ত্বেষা ব্যাখ্যা তদা সঙ্গচ্ছতে যদি পিত্তলিঙ্গং নোদ্ভূতং দৃশ্যেত, দৃশ্যতে চ| তথা চ ভেডেঽপি পঠিতম্– “আমাশযস্থঃ পবনো হ্যস্থিমজ্জগতোঽপি বা| কুপিতঃ কোপযত্যাশু শ্লেষ্মাণং পিত্তমেব বা||” ইতি| কিঞ্চ বাগ্ভটতন্ত্রে স্থানমপ্যুক্তমেব “ঊর্ধ্বকাযং তু যঃ পূর্বং গৃহ্ণীতে সোঽনিলাত্মকঃ| মধ্যকাযং তু গৃহ্ণাতি পূর্বং যস্তু স পিত্তজঃ|| পূর্বং গৃহ্ণাত্যধঃকাযং শ্লেষ্মা বৃদ্ধশ্চতুর্থকাঃ|” ইতি| তস্মাত্ প্রাযেণ কফবাতাভ্যাং ভবতীতি পৈত্তিকশ্চাতুর্থকশ্চরকাদিভিনোদাহৃত এব, নত্বসম্ভবাদিতি মন্তব্যম্||৩৭-৩৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চতুর্থকবিপর্যযমাহ– বিষমেত্যাদি| অত্র তন্ত্রান্তরম্– “অস্থিমজ্জোভযগতে চতুর্থকবিপর্যযঃ| ত্র্যহাদ্ দ্ব্যহং জ্বরযতি হ্যাদাবন্তে চ মুঞ্চতি||” ইতি| আদাবেকদিনং মুক্ত্বা, মধ্যে দিনদ্বযং ভূত্বা, অন্তে একদিনং ন ভবতীতি ব্যাচক্ষতে জেজ্জটাদযঃ| “অস্থিমজ্জোভযগতে চতুর্থকবিপর্যযঃ| ত্র্যহাদ্দ্ব্যহং জ্বরযত্যাদাবন্তে চ মুঞ্চতি||” ইতি পরাশরবচনস্যাপি স এবার্থঃ; ত্র্যহাদিতি ত্র্যহস্যাদিদিনং বিমুঞ্চতি, দিনদ্বযং জ্বরযতি, ত্র্যহস্যান্তে চতুর্থদিনং মুঞ্চতীতি তাত্পর্যার্থং ব্যাচক্ষতে| হরিচন্দ্রস্ত্বাহ-দ্বে অহনী নিরন্তরং জ্বরযিত্বা উপরম্যৈকমহঃ পুনর্জ্বরযতীত্যেষশ্চতুর্থকবিপর্যয ইতি| আদিদিনাভাবশ্চোত্তরোত্তরপাতিদিবসেষ্ববধার্যঃ| চতুর্থকবিপর্যযস্যোপলক্ষণত্বেন তৃতীযকাদিবিপর্যযোঽপ্যূহ্যঃ ইত্যাহুঃ| তদ্যথা– মধ্যে একদিনং জ্বরযতি, আদ্যন্তযোর্মুঞ্চতীতি তৃতীযকবিপর্যযঃ; এককালং বিমুচ্য সর্বমহোরাত্রং ব্যাপ্নোতীত্যন্যেদ্যুষ্কবিপর্যযঃ; ( কালদ্বযে মুঞ্চতি, সর্বমহোরাত্রং জ্বরযতীতি সততকবিপর্যযঃ)| অত্র দোষবিকৃতিরেব নানাবিধা হেতুরিতি| “কফস্থানেষু বা তিষ্টন্ দোষো দ্বিত্রিচতুর্ষু চ| বিপর্যযাখ্যান্ কুরুতে বিষমান্ কৃচ্ছ্রসাধনান্||” (সু. উ. তং. অ. ৩৯) ইতি বৃদ্ধসুশ্রুতবাক্যং ব্যাচক্ষাণো জেজ্জটঃ– অন্যেদ্যুষ্কতৃতীযচতুর্থকমাত্রস্য বিপর্যযমুদাহরতি, তদ্যথা– আমাশযহৃদযস্থদোষেণ যথোদাহৃত এবান্যেদ্যুষ্কবিপর্যযঃ; আমাশযহৃদযকণ্ঠস্থিতেন তৃতীযকবিপর্যযঃ; তত্রৈকস্মিন্ দিনে হৃদযস্থো দোষ আমাশযমাগত্য তত্স্থেন সহ জ্বরযতি, তদ্দিনে কণ্ঠস্থিতশ্চ হৃদযমাযাতি, অপরদিনে সোঽপ্যামাশযমাগত্য জ্বরযতি, এবং দিনদ্বযং ভূত্বা পশ্চাদেকদিনং ন ভবতীতি তৃতীযকবিপর্যযঃ; আমাশযহৃদযকণ্ঠশিরঃস্থেন দোষেণ চতুর্থকবিপর্যয ক্রিযতে তত্র যস্মিন্ দিনে হৃদযস্থো দোষ আমাশযমাগত্য জ্বরযতি তস্মিন্ দিনে কণ্ঠস্থো হৃদযং শিরস্থঃ কণ্ঠমাযাতি, অপরদিনে হৃদযস্থ আমাশযমাগত্য জ্বরযতি কণ্ঠস্থিতশ্চ হৃদযমাযাতি, অপরদিনে হৃদিস্থ এবামাশযমাগত্য জ্বরযতি, এবং দিনত্রযে ভূত্বা পশ্চাদেকদিনং ন ভবতীতি চতুর্থকবিপর্যয ইতি| এতে চ সর্ব এব জ্বরা ন বিরুদ্ধাঃ, সর্বেষামেব মুনিপ্রণীতত্বাত্| যথোক্তং স্মৃতিশাস্ত্রে– “স্মৃতিদ্বৈধং তু যত্র স্যাত্তত্র ধর্মাবুভৌ মতৌ||” (মনু. স্মৃ. অ. ২/১৪) ইতি| দৃশ্যন্তে চ নানাবিধা এব বিষমজ্বরাঃ; এষ এব ন্যাযশ্চরকসুশ্রুতযোঃ কুষ্ঠবৈষম্যে বাপ্যচন্দ্রেণ দর্শিতঃ; ন বা চিকিত্সাভেদোঽপ্যেষামুক্তঃ; যৈব তৃতীযকাদৌ চিকিত্সা সৈব তদ্বিপর্যযেঽপীতি||৩৯||

আতঙ্কদর্পণ ব্যাখ্যা (বাচস্পতি বৈদ্য কৃত)

চাতুর্থিকবিপর্যযমাহ– বিষমেত্যাদি| চাতুর্থকবিপর্যযোঽন্যো বিষমজ্বরঃ| ত্র্যহাদ্দ্ব্যহমিতি ত্র্যহাদ্দ্ব্যহং দ্বিদিনং জ্বরযতি একং দিনং বিমুঞ্চতি, এবং তৃতীযকবিপর্যযো বাচ্যঃ| অত্র দোষবিকৃতিরেব হেতুরিতি| পূর্বোক্তেষু কফস্থানবিভাগেষু দ্বিত্রিচতুর্ষু তিষ্ঠন্ দোষো বিপর্যযং কুরুতে| উক্তং চ– “কফস্থানেষু বা তিষ্ঠন্দোষো দ্বিত্রিচতুর্ষু বা| বিপর্যযাখ্যান্কুরুতে বিষমান্কৃচ্ছ্রসাধনান্” ইতি| নানাবিধা এব বিষমজ্বরা দৃশ্যন্তে| এষ ন্যাযশ্চরকসুশ্রুতযোঃ কুষ্ঠবৈধর্ম্যে বাপ্যচন্দ্রেণ দর্শিতঃ| সুশ্রুতে বিষমজ্বরাণামুপশান্তবেগানামপি দেহেঽবস্থানং দর্শিতম্| তদ্যথা– “স চাপি বিষমো দেহং ন কদাচিদ্বিমুঞ্চতি| যস্মাদ্গৌরববৈরস্যকার্শ্যেভ্যো ন বিমুচ্যতে|| বেগে তু সমতিক্রান্তে গতোঽযমিতি লক্ষ্যতে| গৌরবং শিরসো গ্লানির্নাতিশ্রদ্ধা চ ভোজনে|| মাধুর্যমথ বৈরস্যং তিক্তত্বমথবা পুনঃ| বক্ত্রস্য জাযতে যস্মাত্প্রবেগেঽপি গতে সতি| তস্মাত্তু নিযতো জুষ্টঃ শরীরে বিষমজ্বরঃ” ইতি||৩৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তসঙ্গত্যা প্রলেপকাদনূপদ্রবত্বেন তত্সধর্মিণি বাতবলাসকে বাচ্যে প্রতিলোমতন্ত্রযুক্ত্যা বাতবলাসকমেবাহ– নিত্যমিত্যাদি| বাতবলাসকাখ্যো জ্বরোঽস্যাস্তীতি বাতবলাসকী নরঃ, তেন জ্বরেণ, শূনকঃ শোথী, সীদতি অবসন্নো ভবতি; শোথিনঃ স উপদ্রব ইত্যর্থঃ| ‘শূনঃ কৃচ্ছ্রেণ সিধ্যতি’ ইতি পাঠান্তরে ‘তেন’ ইতি শেষঃ| বাতবলাসকমেকে কুম্ভাহ্বযপাণ্ডুরোগবিষযমাহুরিতি গদাধরঃ| বাতবলাসকারব্ধত্বাদ্বাতবলাসকঃ; বলাসকঃ শ্লেষ্মা, পিত্তমপ্যত্র বোদ্ধব্যম্| যদুক্তং তন্ত্রান্তরে– “বাযুঃ প্রকুপিতো দোষাবুদীর্যোভৌ বিধাবতি| স শিরস্থঃ শিরঃশূলম্||” ইত্যাদি| যচ্চোক্তং সুশ্রুতেন– “প্রলেপকং বাতবলাসকং বা কফাধিকত্বাত্ প্রবদন্তি তজ্জ্ঞাঃ||” (সু. উ. তং. অ. ৩৯) ইতি, তত্তু শ্লেষ্মণো নিত্যানুষক্তত্বেনেতি জেজ্জটঃ| রূক্ষত্বং চাস্য বাতপিত্তাভিভূতত্বাত্ কফস্নেহস্য ব্যাধিপ্রভাবাদ্বেতি||৪০||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতবলাসকজ্বরমাহ– বাতবলাসকো জ্বরোঽস্যাস্তীতি বাতবলাসকী নরঃ, তেন জ্বরেণ, শূনকঃ শোথী, সীদতি অবসন্নো ভবতি, শোথিনঃ স উপদ্রব ইত্যর্থঃ| কীদৃশঃ? নিত্যং মন্দজ্বরো নিত্যং সততং, মন্দজ্বরো মন্দবেগঃ, বাতবলাসকারব্ধত্বাদ্বাতবলাসকঃ| বলাসঃ শ্লেষ্মা| পিত্তমপ্যত্র বোদ্ধব্যম্| যদুক্তং তন্ত্রান্তরে– “বাযুঃ প্রকুপিতো দোষাবুদীর্যোভৌ বিধাবতি| স শিরস্থঃ শিরঃশূলম্” ইত্যাদি| যদুক্তং সুশ্রুতেন– “প্রলেপকং বাতবলাসকং বা কফাধিকত্বাত্প্রবদন্তি তজ্জ্ঞাঃ” ইতি| তত্তু শ্লেষ্মণো নিত্যানুষক্তত্বেনেতি জেজ্জটঃ| রূক্ষত্বং চাস্য বাতপিত্তাভিভূতত্বাত্কফস্য ব্যাধিপ্রভাবাদ্বা| স্তব্ধাঙ্গশ্লেষ্মভূযিষ্ঠ ইতি স্তব্ধাঙ্গশ্চ শ্লেষ্মভূযিষ্ঠশ্চ; তদুক্তং সুশ্রুতে– “প্রলেপকং বাতবলাসকং বা কফাধিকত্বেন বদন্তি তজ্জ্ঞাঃ” ইতি| অন্যত্র তু বাতাধিকত্বেন দর্শিতঃ, তত্কথমত্র শ্লেষ্মভূযিষ্ঠত্বমুক্তম্| অত্রোচ্যতে– বাতেরিতসর্বসন্ধিরূপকফারব্ধত্বাত্, বাতবলাসকস্তু যথার্থনামা বাতেরিতো বলাসক আরম্ভকো যস্যেতি| শূনঃ কৃচ্ছ্রেণ সিধ্যতীতি পাঠান্তরম্| তেন বাতবলাসকমেকে কুম্ভাহ্বযপাণ্ডুরোগবিষযমাহুরিতি গযাদাসঃ||৪০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

প্রলেপকমাহ– প্রলিম্পন্নিত্যাদি| মন্দজ্বরশ্চাসৌ বিলেপী চেতি মন্দজ্বরবিলেপী, বিলেপিত্বং চাস্য যস্মাদ্ঘর্মগৌরবাভ্যাং লিম্পতি সম্বধ্নাতীত্যর্থঃ| অযং চ কফপিত্তজঃ| যদুক্তং সুশ্রুতেন “প্রলেপকং বাতবলাসকং বা” (সু. উ. তং. অ. ৩৯) ইত্যাদি| তথা যক্ষ্মণি “জ্বরো দাহোঽতিসারশ্চ পিত্তাদ্রক্তস্য চাগমঃ||” (সু. উ. তং. অ. ৪১) ইত্যুক্তং, যক্ষ্মণি চাযং ভবতীতি| অন্যে তু ত্রিদোষজযক্ষ্মজনিতত্বেন ত্রিদোষজ এবাযম্, উদ্ভূতত্বেন তু কফপিত্তব্যপদেশঃ||৪১||

আতঙ্কদর্পণ ব্যাখ্যা (বাচস্পতি বৈদ্য কৃত)

মন্দজ্বরশ্চাসৌ বিলেপী চ মন্দজ্বরবিলেপী, বিলেপিত্বং চাস্য ঘর্মেণেতি আতপেনেব গৌরবেণ গুরুত্বেনেব লিম্পতি সম্বধ্নাতি স প্রলেপকাখ্যো জ্বরঃ| সশীতঃ শীতযুক্তঃ| অযং চ কফপিত্তজঃ| যদুক্তং সুশ্রুতেন যক্ষ্মণি– “জ্বরো দাহোঽতিসারশ্চ পিত্তাদ্রক্তস্য চাগমঃ|” ইতি| যক্ষ্মণি চাযং ভবতি| অন্যে তু ত্রিদোষজনিতত্বেন ত্রিদোষজ এবাযম্, উদ্ভূতত্বেন তু কফপিত্তব্যপদেশঃ| গাত্রাণি প্রলিম্পতীবেতি প্রলেপকোঽন্বর্থসঞ্জ্ঞঃ||৪১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিষমজ্বরবিশেষানাহ– বিদগ্ধ ইত্যাদি| বিদগ্ধেঽন্নরসে দুষ্টে আহাররসে তথা দুষ্টে পিত্তে দুষ্টে শ্লেষ্মণি দেহে ব্যবস্থিতে ভবতঃ, ‘তেন হেতুনা দেহমর্ধং শীতলং কফেনার্ধং চোষ্ণং পিত্তেন প্রজাযতে| অর্ধত্বং চার্ধনারীশ্বরাকারেণ নরসিংহাকারেণ বা, যথাদোষং ব্যবস্থাননিযমহেতোরভাবাদিতি| কায ইত্যাদি| কাযে অন্তরগ্নৌ, কোষ্ঠ ইতি যাবত্| অন্তে হস্তপাদযোঃ| উক্তার্থস্য বিপর্যযেণ জ্বরান্তরমাহ– কাযে শ্লেষ্মেত্যাদি| ত্বক্স্থাবিত্যাদি|– ত্বক্শব্দেন ত্বক্স্থো রস উচ্যতে, তত্স্থস্য তদুপচারেণেতি গদাধরঃ; জেজ্জটস্তু ত্বচমেবাহ| এতদভিপ্রাযেণৈব চরকেণ জ্বরেঽভ্যঙ্গার্থং তৈলাদীন্যভিধাযোক্তম্– “তৈরাশু প্রথমং যাতি বহির্মার্গগতো জ্বরঃ||” (চ. চি. অ. ৩) ইতি| তযোঃ শ্লেষ্মানিলযোঃ| প্রশান্তযোরিতি প্রশান্তবেগযোরিত্যর্থঃ; নহি বিষমেষু দোষস্য প্রশান্তির্ভবতি, পুনর্বেগাগমাত্| যদাহ সুশ্রুতঃ– “স চাপি বিষমো দেহং ন কদাচিদ্বিমুঞ্চতি| গ্লানিগৌরবকার্শ্যেভ্যঃ স যস্মান্ন প্রমুচ্যতে|| বেগে তু সমতিক্রান্তে গতোঽযমিতি লক্ষ্যতে| ধাত্বন্তরস্থো লীনত্বাত্ সৌক্ষ্ম্যান্নৈবোপলভ্যতে [ |” (সু. উ. তং. অ. ৩৯) ইতি| ইতরৌ বাতকফৌ| দাহশীতাদীতি একো দাহাদিঃ, অপরঃ শীতাদিঃ| ননু, এতযোঃ সম্প্রাপ্তৌ ত্রিদোষজত্বমুক্তং; তত্ কথং সংসর্গজাবিত্যুক্তং, সংসর্গো হি দ্বযোর্ভবতি ত্রযাণাং সন্নিপাত ইতি স্থিতিঃ| উচ্যতে– সংসর্গঃ সম্বন্ধঃ, স চ দ্বযোর্বহূনাং চ ভবতি, অত্র ত্রযাণামুক্তঃ, ন চৈবং সর্বত্র; অথবা সংসর্গঃ সৌম্যাগ্নেযদোষকোটিদ্বযমেলাপঃ| তত্র শীতাদৌ জ্বরে পিত্তমনুবন্ধঃ, দাহাদৌ বাতকফাবনুবন্ধৌ; অনুবন্ধ্যশ্চ প্রাধান্যেন চিকিত্স্যোঽনুবন্ধাবিরোধেনেতি প্রযোজনমেতস্য| তযোর্দাহশীতাদিজ্বরযোর্মধ্যে দাহপূর্বো দাহাদিঃ কষ্ট ইতি দুঃখপ্রদঃ| দাহাদেঃ কষ্টসাধ্যত্বাভিধানেন শীতাদেরর্থতোঽকষ্টত্বমিতি| উক্তবিষমজ্বরাণামুপলক্ষণত্বাদন্যেঽপি বিষমজ্বরা রাত্রিজ্বরাদযো বোদ্ধব্যা ইতি জেজ্জটঃ| উক্তং চ তন্ত্রান্তরে– “সমৌ বাতকফৌ যস্য ক্ষীণপিত্তস্য দেহিনঃ| প্রাযো রাত্রৌ জ্বরস্তস্য দিবা হীনকফস্য তু||” ইতি| সর্বেষু চ বিষমজ্বরেষ্ববশ্যম্ভাবী বাযুঃ| যদাহ বৃদ্ধসুশ্রুতঃ– “নর্তেঽনিলাদ্বৈ বিষমজ্বরঃ সমুপজাযতে| কফপিত্তে হি নিশ্চেষ্টে চেষ্টযত্যনিলঃ সদা||” (সু. উ. তং. অ. ৩৯) ইতি| তথা বিদেহেঽপি– “পবনো গতিবৈষম্যাদ্বিষমজ্বরকারণম্|” ইতি| এষাং চ জ্বরাণামৃত্বাদিহেত্বন্তরলাভাদন্যথাভাবোঽপি দৃশ্যতে| তদ্যথা– সন্ততঃ স্বরূপং ত্যক্ত্বা সততাদীনামন্যতমত্বং প্রতিপদ্যতে, তথা চতুর্থকস্তৃতীযকাদিরূপত্বম্| যদাহ চরকঃ– “ঋত্বহোরাত্রদোষাণাং মনসশ্চ বলাবলাত্| কালমর্থবশাচ্চৈব জ্বরস্তং তং প্রপদ্যতে||” (চ. চি. অ. ৩) ইতি| অস্যার্থঃ– বলাবলাদিতি ঋত্বাদিমনোঽন্তেন সম্বধ্যতে, বলং চাবলং চ বলাবলম্| অর্থশব্দোঽত্র প্রাক্তনকর্মবাচী| তং তং কালং সততকাদ্যুক্তং, জ্বরঃ প্রতিপদ্যতে ইতি যোজনা| উদাহরণং চ ঋত্বহোরাত্রবলাবলাদ্যথা– যদা নিদাঘোত্পন্নো বাতপ্রধানশ্চতুর্থকো বর্ষাসমযমাপ্নোতি তদা তেনর্তুনাঽঽপ্যাযিতবলস্তৃতীযকান্তানাং সততকাদীনামন্যতমত্বং প্রাপ্নোত্যুত্কর্ষাত্| এবং বর্ষাসমুত্পন্নঃ সন্ততঃ শরদং প্রাপ্যাপকৃষ্টবলঃ সততাদীনামন্যতমত্বমেত্যপকর্ষাত্| এবং পিত্তকফযোরপি উত্কর্ষাপকর্ষৌ ঋতুকৃতৌ ব্যাখ্যেযৌ| অহোরাত্রশব্দেন কতিপযান্যহোরাত্রাণি গৃহ্যন্তে, নহি একস্মিন্নহোরাত্রে সততাদীনামুত্কর্ষাপকর্ষাভ্যামন্যথাভাব উপপদ্যতে; কিন্তু কতিপযৈরেব| যদা বর্ষাশরদ্বসন্তপ্রারম্ভে বাতাদযো জ্বরং চতুর্থকমারভন্তে তদা মধ্যানি কতিপযদিনান্যবাপ্য স এব তৃতীযকপূর্বকত্বেন বিপরিণমতে উত্কর্ষাত্; অপকর্ষাত্তু যদাঽন্ত্যানি দিনান্যাপ্নোতি তদা সন্ততো (বাতারব্ধঃ প্রাবৃষঃ,) পিত্তারব্ধঃ শারদো, বসন্তস্য চ শ্লেষ্মারব্ধঃ, প্রতনুকত্বাদ্দোষস্য সততাদীনামন্যতমত্বেন বিপরিণমত ইতি| দোষবলাবলাদ্যথা– যদা সততাদীনামন্যতমকারী দোষঃ শ্লেষ্মা মধুরস্নিগ্ধাদীন্ দিবাস্বপ্নাদীংশ্চ হেতূনাপ্নোতি তদা সন্ততকাদীন্ করোতি| এবং বাতপিত্তযোরপ্যূহ্যম্| মনোবলাবলাদ্যথা– যদা সন্ততজ্বরী সত্ত্বগুণোদ্রেকাত্ প্রহর্ষাবষ্টম্ভবহুলো ভবতি তদা সততাদীনামন্যতমত্বং প্রাপ্নোতি; যদা চতুর্থকজ্বরী তমোগুণভূযিষ্ঠত্বাদ্বিষাদাদিভিরভিভূযতে তদা তৃতীযকাদীনামন্যতমো ভবতি, “বিষাদো রোগবর্ধনানাম্” (চ. সূ. অ. ২৫) ইত্যাগমাত্| অন্যে তু মনঃশব্দেন বুদ্ধিং ব্যাখ্যানযন্তি, কারণে কার্যোপচারাত্| তস্যাশ্চ বলাবলং যথা– যদা চতুর্থকজ্বরী প্রজ্ঞাপরাধাদ্দেবাদীনভিভূযাহিতান্যাচরতি তদা তৃতীযকপূর্বেষামন্যতমত্বমাপ্নোতি; যদা তু শুদ্ধসত্ত্বোত্কর্ষাদ্বিবেকিন্যা বুদ্ধ্যা যুক্তঃ স্যাত্তদা শুভানি দেবতারাধনেষ্টিবল্যুপহারাদীন্যাচরতি তদা সন্ততজ্বরী সততাদীনামন্যতমত্বং প্রাপ্নোতি| অর্থবশাদ্যথা– সন্ততজ্বরিণোঽপি যদি চতুর্থকবেদনীযং কর্ম স্যাত্তদা সন্ততোঽপি চতুর্থকত্বেন বিপরিণমতে; অথ চতুর্থকজ্বরাবিষ্টস্য যদি তত্কালপরিপাকি কর্ম বলীযো ভবতি তদা সন্ততত্বেন পরিণমতে| এতচ্চ কর্মবশত্বমৃত্বহোরাত্রদোষবলাবলেষ্বপি বোদ্ধব্যং, তদনন্তরং তন্নির্দেশাদিতি||৪২-৪৭||

আতঙ্কদর্পণ ব্যাখ্যা (বাচস্পতি বৈদ্য কৃত)

বিষমজ্বরবিশেষানাহ– দেহে বিদগ্ধে অন্নরসে দুষ্টে আহারে রসে তথা শ্লেষ্মপিত্তে দুষ্টং ব্যবস্থিতে সতি তেন হেতুনা দেহেঽর্ধে শীতত্বং কফেন, অর্ধে চোষ্ণত্বং পিত্তেন প্রজাযতে; অর্ধত্বং চার্ধনারীশ্বরাকারেণ নরসিংহাকারেণ বা, যথাদোষব্যবস্থাননিযমহেতোরভাবাদিতি| কায ইত্যাদি কাযেঽন্তরগ্নৌ কোষ্ঠে ইতি যাবত্| যদা পিত্তং দুষ্টং ভবতি শ্লেষ্মা চান্তে দুষ্টো ব্যবস্থিতো ভবতি তেন হেতুনা শরীরস্য উষ্ণত্বং হস্তপাদযোঃ শীতত্বম্| বিপর্যযেণ জ্বরান্তরমাহ– কাযে ইত্যাদি| বিপরীতত্বে তু পূর্ববদ্ব্যাখ্যেযম্| অতঃ পরং সন্ততাদীনাং শীতদাহপূর্বকত্বেন ভেদমাহ– ত্বক্স্থাবিত্যাদি| যদা শ্লেষ্মানিলৌ ত্বচি কুপিতৌ ভবতস্তদা জ্বরস্যাদৌ ত্বচি শীতং জনযতঃ| দ্বাবেতৌ দাহশীতাদিজ্বরৌ সংসর্গজৌ স্মৃতৌ কথিতৌ ‘মুনীন্দ্রৈঃ’ ইতি শেষঃ| এতৌ কৌ? জ্বরে আদৌ পূর্ব কফবাতৌ ত্বক্স্থৌ সন্তৌ শীতমুত্পাদযতঃ, তযোঃ শ্লেষ্মানিলযোঃ প্রশান্তযোঃ সতোরন্তে পিত্তং দাহং করোতি; তথা তেনৈব প্রকারেণ আদৌ পিত্তং ত্বক্স্থং সদতীব দাহং করোতি, তস্মিংস্তু পিত্তে প্রশান্তে সতি ইতরৌ বাতকফৌ শীতং কুরুতঃ| ত্বক্শব্দেন ত্বক্স্থো রস উচ্যতে, তাত্স্থ্যাত্তদুপচারেণেতি গদাধরঃ; জেজ্জটস্ত্বচমেবাহ| তযোঃ শ্লেষ্মানিলযোঃ প্রশান্তবেগযোঃ স্বকালাপগমাত্ প্রত্যনীকপ্রাপ্ত্যা বা বিষমেষু দোষস্য প্রশান্তির্ভবতি পরং বেগোপগমাত্| যদুক্তং সুশ্রুতেন– “স চাপি বিষমো দেহং ন কদাচিদ্বিমুঞ্চতি|” ইতি| পূর্বমেবোক্তং যদা তৌ প্রশান্তবেগৌ ভবতস্তদা পিত্তমন্তর্দাহং করোতি, চকারান্মূর্ছাদীন্| যদা তু পিত্তং ত্বক্স্থং ভবতি তদা ত্বচি অতীব দাহং করোতি, ত্বগ্দাহকারকে পিত্তে প্রশান্তে গতবেগে সতি তাবপি ইতরৌ শ্লেষ্মানিলৌ অন্ততঃ শীতং কুরুতঃ| আদিশব্দাদ্বমথুতন্দ্রাদীন্| দ্বাবেতৌ দাহশীতাদী সংসর্গজৌ কথিতৌ, একো দাহাদিঃ, অপরঃ শীতাদিঃ| তযোর্দাহশীতপূর্বকযোর্জ্বরযোর্মধ্যে দাহপূর্বকঃ কষ্টোঽত্যন্তদুঃখপ্রদঃ, কষ্টঃ কৃচ্ছ্রসাধ্যতম ইতি বিশেষণদ্বযোপাদানাদত্যর্থং দুঃসাধ্যত্বং দর্শিতং, শীতপূর্বস্য সুখসাধ্যত্বং; কুতঃ? রোগশক্তেরচিন্ত্যত্বাত্| নন্বেতযোস্ত্রিদোষজত্বমুক্তং তত্কথং সংসর্গজাবিত্যুক্তম্| উচ্যতে– সংসর্গঃ সম্বন্ধঃ স চ দ্বযোর্বহূনাং চ ভবতি, অতোঽত্র ত্রযাণামুক্তঃ, ন চৈবং সর্বত্র| অথবা সংসর্গঃ সৌম্যাগ্নেযদোষদ্বযমেলকঃ| তত্র শীতাদৌ জ্বরে পিত্তানুবন্ধঃ, দাহাদৌ জ্বরে বাতকফানুবন্ধঃ| অনু উপর্যধশ্চ প্রাধান্যেন চিকিত্স্যত ইত্যনুবন্ধাত্সংসর্গজাবিত্যুক্তমিতি ন বিরোধঃ| উক্তবিষমজ্বরাণামুপলক্ষণত্বাদন্যেঽপি বিষমজ্বরা রাত্রিজ্বরাদযো বোদ্ধব্যা ইতি জেজ্জটাদযঃ| উক্তং চ তন্ত্রান্তরে– “সমৌ বাতকফৌ যস্য হীনপিত্তস্য দেহিনঃ| রাত্রৌ প্রাযো জ্বরস্তস্য দিবা হীনকফস্য তু” ইতি| সর্বেষু বিষমজ্বরেষ্বশ্যম্ভাবী বাযুঃ| যদাহ বৃদ্ধসুশ্রুতঃ– “নর্তেঽনিলাদ্বৈ বিষমো জ্বরঃ সমুপজাযতে| কফপিত্তে তু নিশ্চেষ্টে চেষ্টযত্যনিলো বলী||” ইতি| তথা বিদেহেঽপি– “পবনো গতিবৈষম্যাদ্বিষমজ্বরকারণম্||” ইতি||৪২-৪৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তবাতাদিজ্বরাণাং ধাতুবিশেষদূষ্যতযাঽধিকলক্ষণানি ভবন্তি; যদুক্তম্– ‘বাতপিত্তকফোত্থানাং জ্বরাণাং লক্ষণং যথা| তথা তেষাং ভিষগ্ব্রূযাদ্রসাদিষ্বপি বুদ্ধিমান্||’ (সু. উ. তং. অ. ৩৯) ইতি; এতদভিধানং চ রসাদিধাত্ববিরোধেন বাতাদিচিকিত্সাকরণার্থম্; অতস্তানাহ– গুরুতেত্যাদি| হৃদযোত্ক্লেশঃ হৃদযস্থিতস্য দোষস্যোপস্থিতবমনত্বমিব, রসস্য হৃদযস্থত্বাত্| রসস্থ ইত্যনেন বিশেষেণাত্র রসো দূষ্যঃ, সর্বেষামেব জ্বরাণাং রসানুগত্বাত্| দৈন্যং ক্লান্তচিত্তত্বম্| পিণ্ডিকেত্যাদি| পিণ্ডিকা জান্বধো জঙ্ঘামাংসপিণ্ডঃ, তস্যা উদ্বেষ্টনং দণ্ডাদিনা পীডনেনেব বেদনা পিণ্ডিকোদ্বেষ্টনম্; এবমন্যত্রাপি| সৃষ্টমূত্রপুরীষতা প্রবর্তমানমূত্রপুরীষতা| ঊষ্মা বহিঃ, এতচ্চ বিশেষপরং, প্রাযঃ সর্বজ্বরেষু তথাভাবাত্| ‘ঊষ্মাঽন্তর্মোহবিক্ষেপৌ’ ইতি পাঠান্তরে ঊষ্মাঽন্তঃ অন্তর্দাহ ইত্যর্থঃ, বিক্ষেপো হস্তাদিচালনম্| ভৃশং স্বেদ ইতি ঘর্মস্য মেদোমলত্বাত্; তদ্বিকৃত্যৈব দৌর্গন্ধ্যং গাত্রে| অসহিষ্ণুতা বেদনাযা অসহত্বং, ক্রোধনত্বমিতি কার্তিকঃ| ভেদোঽস্থ্নামিতি ভেদ ইব ভেদঃ ভঙ্গবত্পীডেত্যর্থঃ, (পরপদার্থেষু প্রযুজ্যমানাঃ শব্দা বৃত্তি(বতি)মন্তরেণাপি বৃত্ত্য(বত্য)র্থং গমযন্তি) যথা– অগ্নির্মাণবকঃ| এবমন্যত্রাপি ভেদাদৌ দ্রষ্টব্যম্| কূজনং কুন্থনং; ‘কুঞ্চনম্’ ইতি পাঠান্তরেঽস্থ্নামেব সঙ্কোচ ইত্যর্থঃ| তমঃপ্রবেশনম্ অন্ধকারপ্রবিষ্টস্যেবাসংবিত্তিঃ| মহাশ্বাসঃ শ্বাসাধিকারে বক্ষ্যমাণলক্ষণঃ| মর্মশব্দেন হৃদযমুচ্যতে, প্রাধান্যাদিতি কার্তিকঃ; তস্য ছেদ ইব মর্মচ্ছেদঃ| মরণমিত্যাদি শুক্রগতস্য| তত্রৈতেষু রসাদিধাতুগতজ্বরেষু মধ্যে শুক্রস্থানগতে মরণং প্রাপ্নুযাদিতি যোজ্যম্| শুক্রং চ তত্স্থানং চেতি শুক্রস্থানং; (নতু শুক্রস্য স্থানং শুক্রস্থানং) শুক্রস্য সর্বদেহগত্বেন নিযতস্থানাসম্ভবাদিতি কার্তিকঃ| (যদুক্তম্– “যথা পযসি সর্পিস্তু গুডশ্চেক্ষুরসে যথা| শরীরেষু তথা নৄণাং শুক্রং বিদ্যাদ্ভিষগ্বরঃ||” (সু. শা. অ. ৪) ইতি|) বিশেষত ইতি পদেন শুক্রস্য বাহুল্যেন বিসর্গঃ, অন্যস্যাপি রক্তাদেরিতি বদন্তি||৪৮-৫৪||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ রসাদিধাতুগতজ্বরানাহ– গুরুতেত্যাদি| গুরুতা গাত্রাণাং, হৃদযোত্ক্লেশঃ হৃদযস্থস্য দোষস্যোপস্থিতবমনত্বমিব, রসস্য হৃদযস্থিতত্বাত্| সদনমঙ্গগ্লানিঃ, দৈন্যং ক্লান্তচিত্ততা, রসস্থে রসধাতুগতে জ্বরে| যদ্যপি রসৈকধাতুপ্রাপ্ত্যা সন্তত এবাযং তথাঽপ্যনুক্রমধাতুগতকথনার্থমত্র নির্দেশঃ| রক্তগং জ্বরমাহ– মোহো বিগতচিত্ততা| পিডিকাতৃষ্ণেতি| মাংসগতমাহ– পিণ্ডিকেত্যাদি| পিণ্ডিকা জান্বধোভাগে মাংসপিণ্ডঃ, তস্যা উদ্বেষ্টনং দণ্ডাদিনিপীডনেনেব বেদনাবিশেষঃ| সৃষ্টমূত্রপুরীষতা প্রবর্তমানমূত্রপুরীষত্বম্| ঊষ্মান্তর্দাহবিক্ষেপৌ তত্র ঊষ্মা বহিঃ, অন্তর্দাহঃ; এতচ্চ বিশেষপরং, প্রাযঃ সর্বজ্বরেষু তথাভাবাত্; অন্যে “ঊষ্মান্তর্মোহবিক্ষেপৌ” ইতি পঠন্তি| তত্র– ঊষ্মা অন্তর্দাহঃ, বিক্ষেপো হস্তাদিচালনম্| মেদোগতে ভৃশং স্বেদ ইতি মেদোমলত্বাত্, তদ্বিকৃত্যৈব দৌর্গন্ধ্যং গাত্রে, অসহিষ্ণুতা বেদনাসহত্বং, ক্রোধনত্বমিতি কার্তিকঃ| অস্থিগতে ভেদোঽস্থ্নামিতি ভেদ ইব ভেদঃ, ভঙ্গবত্পীডেত্যর্থঃ পরপদার্থেষু প্রযুজ্যমানাঃ শব্দা ইবান্তরেণাপি ইব ইত্যর্থং গমযন্তি, যথা অগ্নির্মাণবকঃ; এবমন্যত্রাপি| কূজনং কুন্থনং, কুঞ্চনমিতি কেচন পঠন্তি; তচ্চ সান্নিধ্যাদস্থ্নামিত্যনেন সম্বধ্যতে| মজ্জগতে– তমঃপ্রবেশনম্ অন্ধকারপ্রবিষ্টস্যেবার্থাসংবিত্তিঃ| মহাশ্বাস ইতি শ্বাসনিদানে বক্ষ্যমাণলক্ষণঃ| মর্মশব্দেন হৃদযমুচ্যতে প্রাধান্যাদিতি কার্তিকঃ, তস্য ছেদ ইব মর্মচ্ছেদঃ| শুক্রগতলক্ষণমাহ– মরণমিত্যাদি| তত্র তেষু রসাদিধাতুগতজ্বরেষু মধ্যে শুক্রস্থানগতে মরণং প্রাপ্নুযাদিতি যোজ্যম্| ননু শুক্রগে জ্বরে মরণমিত্যুক্তং, তচ্চ শুক্রং সর্বদেহগং, ততশ্চ রসাদিধাত্বভিভবেঽপি শুক্রপ্রাপ্তেঃ তদৃতেঽপি মরণমিতি| নৈবম্– সর্বশরীরস্থস্যাপি শুক্রস্য কলান্তরিতত্বেন ক্রমেণ ত্বচি প্রাপ্তেঃ| ক্রমেণাপি শুক্রং জ্বরেণ কথং প্রাপ্যমিতি চেত্, ধাত্বন্তরাদতিক্রম্য শুক্রগমনাদিতি| বিশেষত ইতি পদেন শুক্রস্য বাহুল্যেন বিসর্গঃ, অন্যস্যাপি রক্তাদেরিতি বদন্তীত্যুক্তম্| সুশ্রুতে– “দগ্ধেন্ধনো যথা বহ্নির্ধাতূন্ হত্বা যথা বিষম্| কৃতকৃত্যো ব্রজেচ্ছান্তিং দেহং হত্বা তথা জ্বরঃ”ইতি| গ্রন্থান্তরেঽপি– “রসরক্তাশ্রিতঃ সাধ্যো মাংসমেদোগতস্তথা| অস্থিমজ্জগতঃ কৃচ্ছ্রঃ শুক্রস্থানে ন জীবতি” ইতি||৪৮-৫৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তবাতাদিজ্বরাণাং কালপ্রকৃতিমুদ্দিশ্য প্রাকৃতত্বং বৈকৃতত্বং চাহ– বর্ষেত্যাদি| বর্ষাদিষু বাতাদ্যৈঃ ক্রমাদ্যো জ্বরঃ স প্রাকৃতঃ; বর্ষাসু বাতিকঃ, শরদি পৈত্তিকঃ, বসন্তে শ্লৈষ্মিকঃ| অস্মাদন্যো বৈকৃতঃ, যথা– বর্ষাসু পৈত্তিক ইত্যাদি| স ইতি বৈকৃতো দুঃসাধ্যঃ, অর্থাত্ প্রাকৃতঃ সুখসাধ্য ইতি| যদুক্তম্– “প্রাকৃতঃ সুখসাধ্যস্তু বসন্তশরদুদ্ভবঃ|” (চ. চি. অ. ৩) ইতি| অত্র বাগ্ভটেন বাতজস্য প্রাকৃতত্বপ্রণযনং যত্কৃতং তদন্যে নানুমন্যন্তে, দুঃসাধ্যত্বেন বৈকৃতাদভিন্নত্বাত্| জতূকর্ণেনাপ্যসৌ ন পঠিতঃ| যদাহ– “বসন্তশরদোঃ প্রাযঃ প্রাকৃতোঽন্যত্র বৈকৃতঃ|” ইতি| অত্রোচ্যতে– ন প্রাকৃতত্বং সুখসাধ্যত্বখ্যাপনপরা সঞ্জ্ঞা, কিন্তু কুম্ভকারাদিবদ্যৌগিকত্বং; যতো যথর্তুপ্রকুপিতো দোষঃ প্রকৃতিরুচ্যতে, তত উদ্ভূতঃ প্রাকৃতঃ; তেন প্রাকৃতত্বেঽপি দোষস্বভাবাদ্বাতিকস্য দুঃখসাধ্যত্বং বৈকৃতবদিতি দুঃখসাধ্যত্বেন বৈকৃতসাধর্ম্যাত্তু চরকজতূকর্ণাভ্যাং নোক্তঃ, নতু প্রাকৃতত্বাভাবাদিত্যভিপ্রাযো বাগ্ভটস্যেতি| অন্যরোগেষু প্রাকৃতত্বেন দুঃসাধ্যত্বং, জ্বরস্য তু ব্যাধিপ্রভাবাত্ সুখসাধ্যত্বম্| তন্ত্রান্তরং হি– “জ্বরে তুল্যর্তুদোষত্বং প্রমেহে তুল্যদূষ্যতা| রক্তগুল্মে পুরাণত্বং সুখসাধ্যস্য লক্ষণম্||” ইতি||৫৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ কালভেদেন জ্বরস্য সাধ্যাসাধ্যলক্ষণমাহ– বর্ষেত্যাদি| বর্ষাদিষু ঋতুষু বাতাদ্যৈঃ ক্রমাদ্যো জ্বরঃ স প্রাকৃতঃ, বর্ষাসু বাতিকঃ, শরদি পৈত্তিকঃ, বসন্তে শ্লৈষ্মিকঃ| অস্মাদন্যো বৈকৃতঃ, ক্রমাদ্যথা– বর্ষাসু পৈত্তিকঃ, শরদি শ্লৈষ্মিকো, বসন্তে বাতিকঃ স ইতি| বৈকৃতো দুঃসাধ্যঃ অর্থাত্সুখসাধ্যঃ প্রাকৃত ইতি| যদুক্তম্– “প্রাকৃতঃ সুখসাধ্যস্তু বসন্তশরদুদ্ভবঃ” ইতি| অনিলোদ্ভবশ্চ প্রাকৃতো দুঃসাধ্যঃ||৫৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তেষামেব প্রাকৃতজ্বরাণাং চিকিত্সাবিশেষার্থমুত্পত্তিক্রমমাহ– বর্ষাস্বিত্যাদি| দুষ্ট ইতি কুপিতঃ, গ্রীষ্মে সঞ্চিতত্বাত্| পিত্তশ্লেষ্মান্বিত ইতি তত্কালোচিতপিত্তকফানুবন্ধঃ| যদুক্তম্– “ভূবাষ্পান্মেঘনিষ্যন্দাত্ পাকাদম্লাজ্জলস্য চ| বর্ষাস্বগ্নিবলে ক্ষীণে কুপ্যন্তি পবনাদযঃ|” (চ. সূ. অ. ৬) ইতি| কুর্যাদিতি ছেদঃ| পিত্তমিত্যাদি পিত্তং চ শরদি দুষ্টং জ্বরং কুর্যাদিতি পূর্বোক্তেন সম্বধ্যতে; এবং কফো বসন্তে ইত্যত্রাপি যোজ্যম্| পিত্তদুষ্টিশ্চ শরদি বর্ষাসু সঞ্চিতত্বাত্| অনুবলোঽনুবন্ধঃ, তস্য চ হেতুর্বার্ষিকক্লেদানুবৃত্তিরেব| তত্প্রকৃত্যেতি তযোঃ পিত্ত শ্লেষ্মণোঃ প্রকৃত্যা স্বভাবেন, তত্কৃতযোর্জ্বরযোরনশনাল্লঙ্ঘনান্ন ভযং ভবতি| যদুক্তম্– “কফপিত্তে দ্রবে ধাতূ সহেতে লঙ্ঘনং মহত্| , আমক্ষযাদূর্ধ্বমতো বাযুর্ন সহতে ক্ষণম্||” ইতি| বিসর্গাচ্চ হেতোর্নানশনাদ্ভযম্| বর্ষাশরদ্ধেমন্তা বিসর্গঃ, তত্রোপচিতবলাঃ প্রাণিনো ভবন্তি, সোমস্য বলবত্ত্বাত্; শিশিরবসন্তগ্রীষ্মাস্ত্বাদানং, তত্রাপচিতবলাঃ প্রাণিনঃ, সূর্যস্য বলবত্ত্বাত্ ইতি ব্যুত্পাদিতং শাস্ত্রে| ‘তত্প্রকৃত্যা বিসর্গস্য’ ইতি পাঠান্তরে তত্প্রকৃত্যা কফবাতপিত্তপ্রকৃত্যা, বিসর্গস্য চ প্রকৃত্যেতি যোজ্যম্| কফ ইত্যাদি| তং কফমনু বাতপিত্তে ভবতঃ, অনুবন্ধরূপে ভবত ইত্যর্থঃ| হেতুশ্চাত্র বসন্তস্যাদানমধ্যত্বেনাগ্নেযরূক্ষত্বাত্ বাতপিত্তপ্রকোপকত্বম্| যদুক্তং চরকে– ‘আদানমধ্যে তস্যাপি বাতপিত্তং ভবেদনু (চ. চি. অ. ৩) ইতি| অত্র কফপিত্তপ্রকৃত্যা লঙ্ঘনং যুক্তমেব, কিন্ত্বাদানমধ্যত্বেন ন নির্ভযং তত্ কার্যম্| অত এব ‘তত্র নানশনাদ্ভযম্’ ইত্যেতস্মাত্ পূর্বমেব পঠিতম্, অন্যথা সর্বশেষে পঠিতং স্যাদিতি||৫৬-৫৭||

আতঙ্কদর্পণ ব্যাখ্যা (বাচস্পতি বৈদ্য কৃত)

তেষামেব প্রাকৃতজ্বরাণাং চিকিত্সাবিশেষার্থমুত্পত্তিক্রমমাহ– বর্ষাস্বিত্যাদি| গ্রীষ্মে সঞ্চিতত্বাত্ বর্ষাসু দুষ্টঃ কুপিতো বাযুঃ পিত্তশ্লেষ্মান্বিত ইতি তত্কালোচিতপিত্তকফানুবন্ধঃ জ্বরং কুর্যাত্| যদুক্তম্– “ ভূবাষ্পান্মেঘনিষ্যন্দাত্পাকাদম্লাজ্জলস্য চ| বর্ষাস্বগ্নিবলে হীনে কুপ্যন্তি পবনাদযঃ||” ইতি| কুপিতং পিত্তং চ শরদি দুষ্টং সত্ জ্বরং কুর্যাদিতি পূর্বোক্তেন সম্বধ্যতে| এবং কফো বসন্ত ইত্যত্রাপি যোজ্যম্| পিত্তং দুষ্টং চ শরদি বর্ষাসু সঞ্চিতত্বেনেতি| এতস্য চ পিত্তজ্বরং কর্তুমুদ্যতস্য শরদি অনুবলো অনুবন্ধী কফো ভবতি| তস্য চ হেতুর্বার্ষিকক্লেদানুবৃত্তিরেব| অনুবলমিবানুবলং যথা স্বতন্ত্রস্য কস্যচিদ্রাজ্ঞো গজরথতুরগপুরুষাদিবলবতো বৈরিভিঃ সহ যুধ্যমানস্য পশ্চাদন্যবলং তচ্ছক্তেরনুবলোপবৃংহণার্থমাগচ্ছতি, এবং স্বতন্ত্রস্য পিত্তস্য জ্বরং কুর্বতো বলোপবৃংহণং শরদি কফঃ করোতি| তযোঃ পিত্তশ্লেষ্মণোঃ, প্রকৃত্যা স্বভাবেন, তত্কৃতযোর্জ্বরযোরনশনাল্লঙ্ঘনাদ্ভযং ন ভবতি| যদুক্তম্– “কফপিত্তে দ্রবে ধাতূ সহেতে লঙ্ঘনং মহত্|” ইতি| তস্মাদ্বিসর্গাচ্চ হেতোর্নানশনাল্লঙ্ঘনাদ্ভযম্| বর্ষাশরদ্ধেমন্তা বিসর্গকালাঃ, তত্রোপচিতবলাঃ প্রাণিনো ভবন্তি, সোমবলত্বাত্; শিশিরবসন্তগ্রীষ্মাস্ত্বাদানকালঃ, তত্রাপচিতবলাঃ প্রাণিনো ভবন্তি, সূর্যবলত্বাত্| “তত্প্রকৃত্যা বিসর্গস্য” ইতি পাঠান্তরে তত্প্রকৃত্যা পিত্তকফযোঃ প্রকৃত্যা বিসর্গস্য চ প্রকৃত্যেতি যোজ্যম্| চন্দ্রনন্দনস্ত্বেবং ব্যাচষ্টে– তত্র শরদি পিত্তজ্বরেঽনশনাল্লঙ্ঘনাদ্ভযং ন ভবতি, কেন কারণেন! তত্প্রকৃত্যা, তযোঃ পিত্তকফজ্বরযোঃ লঙ্ঘনসাধ্যত্বেন; তথা বিসর্গাচ্চ কালস্য বিসর্গাখ্যভাবাত্তত্র লঙ্ঘনাত্প্রত্যবাযশঙ্কা নোত্পদ্যতে, জ্বরস্যামাশযসমুত্থত্বাত্| পিত্তশ্লেষ্মণোর্লঙ্ঘনসাধ্যত্বে| বচনং চ– “কফপিত্তে দ্রবত্বাচ্চ সহেতে লঙ্ঘনং মহত্| আমক্ষযাদূর্ধ্বমপি বাযুর্ন সহতে ক্ষণম্” ইতি| অরুণদত্তস্ত্বেবং ব্যাচষ্টে– তচ্ছব্দেন বর্ষাশরদুদ্ভূতৌ বাতজ্বরপিত্তজ্বরৌ পরামৃষ্যেতে, তযোঃ প্রকৃতিস্তযা তত্প্রকৃত্যা তত্স্বভাবেন তত্র প্রাকৃতে জ্বরেঽনশনাদ্ভযং ন ‘ভবতি’ ইতি শেষঃ; বিসর্গাচ্চ বর্ষাশরদুপলক্ষিতো হি কালো বিসর্গঃ সৌম্যস্বভাবঃ, অস্মাচ্চ কারণাত্তস্মিন্কালে জ্বরোত্পত্তের্লঙ্ঘনান্মৃত্যুপ্রত্যবাযশঙ্কা ন তথা ভবতি যথাঽন্যস্মিন্ জ্বরে আদানকালস্বভাবাদ্বাতপিত্তানুবলত্বাচ্চানশনাদ্ভযং ভবতীত্যর্থঃ| বসন্তে কালে কফো দুষ্টো জ্বরং কুর্যাদিতি, তং কফমনু বাতপিত্তং ভবেদিতি অনুবন্ধরূপে ভবত ইত্যর্থঃ| হেতুশ্চাত্র বসন্তস্যাদানমধ্যত্বেঽগ্নেরুষ্ণত্বাদ্বাতপিত্তপ্রকোপনম্| যদুক্তং চরকে– “আদানমধ্যে তস্যাপি বাতপিত্তং ভবেদনু” ইতি| অতঃ কফপিত্তপ্রকৃত্যা চ লঙ্ঘনং যুক্তমেব কিন্ত্বাদানমধ্যত্বেন নির্ভযং তন্ন কার্যম্| অত এব তত্র নানশনাদ্ভযমিত্যেতস্মাত্পূর্বমেব পঠিতম্, অন্যথা সর্বশেষে পঠিতং স্যাদিতি ||৫৬-৫৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কালোঽপি দোষবিশেষস্য লক্ষণমিত্যাহ– কাল ইত্যাদি| যথাস্বং কালে যস্য বাতাদের্যঃ প্রকোপকালস্তত্র তজ্জন্যজ্বরস্য প্রবৃত্তিরুত্পাদো বৃদ্ধির্বা ভবতি; অথবা প্রবৃত্তির্নিত্যজ্বরস্য, বৃদ্ধির্বিষমজ্বরস্যেতি|৫৮|–

আতঙ্কদর্পণ ব্যাখ্যা (বাচস্পতি বৈদ্য কৃত)

যথাস্বং কালে বাতাদের্যঃ প্রকোপকালস্তত্র তজ্জন্যস্য জ্বরস্য প্রবৃত্তিরুত্পাদঃ অভিবৃদ্ধির্বা ভবতি| অথবা প্রবৃত্তির্নিত্যজ্বরস্য বৃদ্ধির্বিষমজ্বরস্যেতি| কালোঽপি দোষবিশেষলক্ষণম্|৫৮|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

(যথা কালো দোষবিশেষস্য লক্ষণং) তথোপশযানুপশযাবপি লক্ষণমিত্যাহ– নিদানেত্যাদি| নিদানত্বেন যে উক্তা আহারাচারাদযস্তৈরনুপশযো দুঃখং নিদানোক্তানুপশযঃ| বিপরীতৈর্দোষাদিবিপরীতাহারাচারৈরুপশাযিতাসুখজননশীলত্বং বিপরীতোপশাযিতেতি||৫৮||

আতঙ্কদর্পণ ব্যাখ্যা (বাচস্পতি বৈদ্য কৃত)

তথোপশযানুপশযাবপীত্যাহ– নিদানেত্যাদি| নিদানত্বেন যে উক্তা আহারাচারাদযস্তৈরনুপশযো দুঃখং নিদানোক্তোঽনুপশযঃ, বিপরীতৈর্দোষাহারাচারৈরুপশাযিতা সুখজননশীলত্বং বিপরীতোপশাযিতেতি; নিদানত্বেনোপযুক্ত আহারাচারাদিঃ দোষস্য দুঃখজনকত্বেনানুপশযো বিপরীতস্ত্বাহারাচারাদির্দোষানুত্পাদকত্বাদুপশয ইতি পিণ্ডার্থঃ||৫৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তজ্বরাণাং মধ্যে সম্প্রাপ্তিবশাত্ কশ্চিদন্তর্বেগো ভবতি কশ্চিদ্বহির্বেগস্তযোর্লক্ষণমাহ– অন্তর্দাহ ইত্যাদি| শ্বসনং শ্বাসঃ; ‘সদনম্’ ইতি পাঠান্তরং, তন্ন যুক্তমিতি জেজ্জটঃ; যতোঽন্তর্বেগ এব সুশ্রুতে গম্ভীরাখ্যঃ পঠিতঃ, তত্র চ শ্বাস এব পঠিত ইতি| বিনিগ্রহোঽপ্রবৃত্তিঃ| সন্তাপ ইত্যাদি| তৃষ্ণাদীনামিত্যাদিশব্দেনোক্তপ্রলাপাদীনাং গ্রহণম্| মার্দবং স্বল্পত্বম্| অস্য সুখসাধ্যত্বাভিধানেনান্তর্বেগস্য কৃচ্ছ্রসাধ্যতাং সূচযতি, অসাধ্যতাং বা, “গম্ভীরতীক্ষ্ণবেগার্তং জ্বরিতং পরিবর্জযেত্|” (সু. উ. তং. অ. ৩৯) ইতি সুশ্রুতবচনাদিতি||৫৯-৬০||–

আতঙ্কদর্পণ ব্যাখ্যা (বাচস্পতি বৈদ্য কৃত)

উক্তজ্বরাণাং মধ্যে সম্প্রাপ্তিবশাত্কশ্চিদন্তর্বেগো ভবতি, কশ্চিদ্বহির্বেগস্তযোর্লক্ষণমাহ– অন্তরিত্যাদি| এতৈর্লিঙ্গৈরন্তর্বেগজ্বরং লক্ষযেত্| শ্বসনং শ্বাসঃ, অন্যে ‘সদনম্’ ইতি পঠন্তি| দোষস্য বাযোর্বর্চসঃ পুরীষস্য চ বিনিগ্রহোঽপ্রবৃত্তিঃ| বহির্বেগস্য লক্ষণমাহ– সন্তাপ ইত্যাদি| এতৈর্লিঙ্গৈর্বহির্বেগং লক্ষযেত্| তৃষ্ণাদীনামিত্যাদিশব্দেন প্রলাপাদীনাং গ্রহণং, মার্দবং স্বল্পত্বম্| অস্য তু সুখসাধ্যত্বাভিধানেনান্তর্বেগস্য কৃচ্ছ্রসাধ্যত্বং দর্শিতমসাধ্যত্বং বা| সুশ্রুতে অন্তর্বেগো গম্ভীরাখ্যযা পঠিতঃ– “গম্ভীরতীক্ষ্ণবেগার্তং জ্বরিতং পরিবর্জযেত্” ইতি||৫৯-৬০||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চিকিত্সাবিশেষার্থমামপচ্যমানপক্বলক্ষণান্যাহ– লালেত্যাদি| ননু, ন দদ্যাত্তত্র ভেষজমিতি বিরুদ্ধং, দ্বিবিধং হি ভেষজমুক্তং চরকেণ দ্রব্যভূতমদ্রব্যভূতং চেতি; তত্র দ্রব্যভূতং কষাযাদি, অদ্রব্যভূতং লঙ্ঘনস্বেদাদি; অত্র লঙ্ঘনাদিকং ষডঙ্গার্ধশৃতং চ প্রযুজ্যতে| উচ্যতে– ভেষজশব্দেনাত্রান্নপানসাধনব্যতিরিক্তা কল্পনোচ্যতে, চ তু সামান্যেনৌষধমাত্রং; কথমেষা প্রতীতিরিতি চেত্, তরুণজ্বরে ভেষজপাননিষেধেঽপি ভেষজবিধানদর্শনাত্| এবং পচ্যমানেঽপি বোদ্ধব্যং, তত্রাপি সামতাযাঃ সদ্ভাবাত্| ক্ষুদিত্যাদি| অসমাসকরণাত্ ক্ষুদাদযো ব্যস্তাঃ সমস্তাশ্চ ভোদ্ধব্যাঃ| অষ্টাহঃ পক্বলক্ষণমিতি জেজ্জটঃ| হরিচন্দ্রস্ত্বাহ– অসত্যপ্যষ্টাহে ক্ষুদাদিভির্নিরামত্বং দোষপ্রবৃত্ত্যা বা ক্ষুধাদ্যভাবেঽপ্যষ্টাহেনৈব শিষ্যহিতৈষিতযা কালং লক্ষণং চ নির্দিষ্টবানিতি| দ্বিবিধা হি সামতা– একা রসস্য, অপরা দোষস্য; রসসামতা তু মুখবৈরস্যাদিলক্ষণা, দোষসামতা তরুণত্বরূপা, সাঽষ্টাহেনৈবাপৈতি| অত্র চ হরিচন্দ্রেণ হেতুরুক্তঃ– (‘ সপ্তাহেনৈব পচ্যন্তে সপ্তধাতুগতা মলাঃ| নিরামশ্চাপ্যতঃ প্রোক্তো জ্বরঃ প্রাযোঽষ্টমেঽহনি||’ ইতি|) সপ্তানাং ধাতূনাং ধাত্বগ্নিনা সপ্তাহেনামপাকাদষ্টাহেনৈব নিরামত্বমিতি| রসসামতা ত্বষ্টাহাত্ পরতোঽপ্যনুবর্ততে| এনমর্থ জেজ্জটোঽপীচ্ছতি, যদেবং লিখতি চরকসুশ্রুতটীকাযাম্– ‘তরুণা সামতাঽষ্টাহাদপৈতি, রসসামতা তু পরতোঽপ্যনুবর্ততে’| ইতি এতত্প্রযোজনং চ তরুণসামতাযামৌষধং নোপযুজ্যতে, রসসামতাযাং তু পাচনং দীযতে| অত এবাহ চরকঃ ‘জ্বরিতং ষডহেঽতীতে লঘ্বন্নপ্রতিভোজিতম্| পাচনং শমনীযং বা কষাযং পাযযেত্তু তম্||’ (চ. চি. অ. ৩) ইতি| তথা– ‘মৃদৌ জ্বরে লঘৌ দেহে প্রচলেষু মলেষু চ| পক্বং দোষং বিজানীযাজ্জ্বরে দেযং তদৌষধম্||’ (সু. উ. তং. অ. ৩৯) ইত্যভিধাযাপি যত্ সুশ্রুতে ন পঠিতম্– ‘সপ্তরাত্রাত্ পরং কেচিন্মন্যন্তে দেযমৌষধম্| দশরাত্রাত্ পরং কেচিদ্দাতব্যমিতি নিশ্চিতাঃ| (সু. উ. তং. অ. ৩৯) ইতি, তেনৈবং জ্ঞাপযতি– সপ্তাহাদর্বাক্ পাচনমপি ন দীযত ইতি কার্তিককুণ্ডেনাপি ব্যাখ্যাতমিতি| ননু ‘জ্বরিতং ষডহেঽতীতে’ (চ. চি. অ. ৩) ইতি চরকবচনস্য ‘সপ্তরাত্রাত্ পরং’ (সু. উ. তং. অ. ৩৯) ইত্যাদিনা সুশ্রুতবচনেন বিরোধঃ, যতঃ ষডহেঽতীতে সপ্তমদিনং ভবতি, তত্র কষাযং বিধত্ত ইতি| উচ্যতে, ষডহেঽতীতে সপ্তমে লঘ্বন্নপ্রতিভোজিতমষ্টমে কষাযং পাযযেদিত্যষ্টমপদলোপাদ্যোজ্যং রসৌদনবদিতি চক্রঃ, ‘ভেষজং হ্যামদোষস্য ভূযো জ্বলযতি জ্বরম্|’ (চ. চি. অ. ৩) ইতি দোষশ্রুতেরুক্তসুশ্রুতবিরোধাচ্চ| প্রকারান্তরেণৈনমর্থং কার্তিককুণ্ডোঽপ্যাহ, তদ্যথা– ষডহেঽতীতে ইতি জ্বরোত্পাদদিনং পরিত্যজ্য গণনা, বস্তিদানদিনপরিহারেণ পরিহারকালগণনাবত্ এবং ‘পাযযেদাতুরং সামমৌষধং সপ্তমে দিনে| শমনেনাথবা দৃষ্ট্বা নিরামং তমুপাচরেত্||’ ইত্যেতদপি বচনং ব্যাখ্যেযম্| ভট্টারহরিচন্দ্রেণাপি সপ্তমদিনে কষাযপানং যদ্ব্যাখ্যাতং তস্যাযমেবাভিপ্রাযো গবেষণীযঃ, সুশ্রুতদিবিরোধাত্| চন্দ্রিকাকারেণাপি ব্যাখ্যাতম্– “অক্ষিরোগে দিনচতুষ্টযবজ্জ্বরস্য সপ্তাহং সামতাকালঃ, তত্র ন পাচনং ন বা শমনং শোধনম্” ইতি| যত্তু পেযাদ্যনন্তরং হারীতেনোক্তম্– “এতাং ক্রিযাং প্রযুঞ্জীত ষড্রাত্রং সপ্তমেঽহনি| পিবেত্ কষাযসংযোগান্ জ্বরঘ্নান্ সাধুসাধিতান্||” ইতি; তথা– “ইতি ষড্রাত্রিকঃ প্রোক্তো নবজ্বরহিতো বিধিঃ| অতঃ পরং পাচনীযং শমনং বা জ্বরে হিতম্|” ইতি খরনাদবচনং চ পূর্ববদষ্টাহপ্রতিপাদকং দ্রষ্টব্যম্| অথ বা পিত্তজ্বরাভিপ্রাযেণৈব তদ্বচনদ্বযম্| যদাহ সুশ্রুতঃ– ‘সপ্তরাত্রাত্পরম্’ ইত্যারভ্য, যাবত্ ‘পৈত্তিকে বা জ্বরে দেযমল্পকালসমুত্থিতে| অচিরজ্বরিতস্যাপি ভেষজ্যং দোষপাকতঃ||’ (সু. উ. তং. অ. ৩৯) ইতি| সপ্তাহাদর্বাগপি যদেতত্পাচনং কষাযপানমুক্তং তন্নাত্যুদ্ভূতসামতাযাং দ্রষ্টব্যম্| যদাহ বাগ্ভটঃ– ‘সপ্তাহাদৌষধং কেচিদাহুরন্যে দশাহতঃ| কেচিল্লঘ্বন্নভুক্তস্য যোজ্যমামোল্বণে ন তু|| তীব্রজ্বরপরীতস্য দোষবেগোদযো যতঃ| দোষে অথবা অতিনিচিতে তন্দ্রাস্তৈমিত্যকারিণি|| অপচ্যমানং ভৈষজ্যং ভূযো জ্বলযতি জ্বরম্||’ (বা. চি. অ. ১) ইতি| ‘অযমর্থোঽভিযুক্তৈশ্চ কৈশ্চিদুক্তশ্চিকিত্সকৈঃ| সপ্তাহাত্ পরতোঽস্তব্ধে সামে স্যাত্ পাচনং জ্বরে|| নিরামে শমনং, স্তব্ধে সামে নৌষধমাচরেত্|’ ইতি সঙ্ক্ষেপঃ| বিস্তরস্তু কষাযনির্ণযপ্রকরণে দ্রষ্টব্যঃ| পক্বজ্বরলক্ষণেন জীর্ণজ্বরলক্ষণমপি চিকিত্সোচিতং বোদ্ধব্যম্| যদুক্তং তন্ত্রান্তরে– ‘আসপ্তরাত্রম্’ ইত্যাদি| জতূকর্ণেনাপ্যুক্তম্– ‘জীর্ণস্ত্রযোদশদিবসঃ’ ইতি| ‘ত্রিসপ্তাহে ব্যতীতে তু জ্বরো যস্তনুতাং গতঃ| প্লীহাগ্নিসাদং কুরুতে স জীর্ণজ্বর উচ্যতে||’ ইতি তু তন্ত্রান্তরমতিপুরাণাভিপ্রাযেণ দ্রষ্টব্যম্||৬১-৬৫||

আতঙ্কদর্পণ ব্যাখ্যা (বাচস্পতি বৈদ্য কৃত)

চিকিত্সাবিশেষদর্শনার্থমামজ্বরলক্ষণমাহ– লালেত্যাদি| লালাপ্রসেকঃ লালাস্রাবঃ, হৃল্লাসঃ উপস্থিতবমনত্বমিব, হৃদযাশুদ্ধিঃ হৃদযং পূর্ণমিব, গুরু ইব চাপরে| ক্ষুন্নাশঃ ছিক্কাযা অনিঃসরণম্, অথবা ক্ষুত্ ক্ষুধা তস্যা নাশঃ| বলবান্ জ্বরো বলাধিকঃ এতানি লক্ষণানি আমজ্বরে ভবন্তি, তত্র ভেষজং পাচনাদি ন দেযং, যদি দত্তং ভেষজং ভূযো জ্বরং বর্ধযতি শোধনং যত্, যচ্চ শমনীযং তদ্বিষমজ্বরং কুর্যাত্| তত্র সামতা দ্বিধা– একা রসস্যাপরা দোষস্য, দোষসামতা তরুণত্বরূপা, রসসামতাঽষ্টাহাত্পরতো নিবর্ততে, তরুণসামতাযামৌষধং নোপযুজ্যতে| উক্তং চ সুশ্রুতে– “সপ্তরাত্রাত্পরং কেচিত্মন্যন্তে দেযমৌষধম্| দশরাত্রাত্পরং কেচিদ্দাতব্যমিতি নিশ্চিতাঃ” ইতি| এতচ্চ মধুকোশে বহু বিস্তৃতম্| পচ্যমানজ্বরলক্ষণমাহ– জ্বরেত্যাদি| জ্বরবেগোঽধিকো ভবতি, যথা নির্বাণাবস্থাযাং দীপঃ প্রজ্বলতি তদ্বত্পচ্যমানাবস্থাযাং জ্বরস্য বেগাধিক্যং ভবতি, মলপ্রবৃত্তিশ্চ ভবতীতি পচ্যমানস্য দোষস্য লক্ষণং জানীযাত্| অথ নিরামজ্বরলক্ষণমাহ– ক্ষুদিত্যাদি| ক্ষুচ্ছিক্কা তস্যাঃ প্রাদুর্ভাবঃ| অন্যে ক্ষুত্ ক্ষুধা| ক্ষামতা কৃশত্বং, জ্বরমার্দবং জ্বরাল্পত্বং, দোষপ্রবৃত্তিঃ বাযোঃ প্রবর্তনং ‘গুদেন’ ইতি শেষঃ| ‘উত্সাহ’ ইত্যত্র ‘ অষ্টাহ’ ইতি পঠন্তি, অষ্টদিনেভ্যঃ পরতঃ| এতন্নিরামজ্বরলক্ষণং, তত্রৌষধং দেযং জ্বরস্য|| ৬১-৬৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

জ্বরস্য সাধ্যলক্ষণমাহ– বলবত্স্বিত্যাদি| বলবত্সু পুরুষেষু সাধ্যঃ, যদুক্তম্– ‘বলাধিষ্ঠানামারোগ্যম্’ (চ. চি. অ. ৩) ইতি| অল্পদোষেষু নাতিপ্রবলদোষেষু| অনুপদ্রব ইতি জ্বরস্যোপদ্রবাঃ কাসাদযঃ| যদুক্তং তন্ত্রান্তরে– “কাসো মূর্ছাঽরুচিশ্ছর্দিস্তৃষ্ণাতীসারবিড্গ্রহাঃ| হিক্কাশ্বাসাঙ্গভেদাশ্চ জ্বরস্যোপদ্রবা দশ||” ইতি|৬৬|–

আতঙ্কদর্পণ ব্যাখ্যা (বাচস্পতি বৈদ্য কৃত)

সাধ্যজ্বরলক্ষণমাহ– বলবত্স্বিত্যাদি| বলবত্সু বলযুক্তেষু পুরুষেষু জ্বরঃ সাধ্যো ভবতি| যদুক্তম্– “বলাধিষ্ঠানমারোগ্যম্” ইতি| স্বল্পদোষেষু নাতিবলদোষেষু পুরুষেষু| অনুপদ্রবঃ জ্বরস্যোপদ্রবা কাসাদযঃ| যদুক্তং তন্ত্রান্তরে– “কাসো মূর্ছাঽরুচিশ্ছর্দিস্তৃষ্ণাতীসারবিড্গ্রহাঃ| হিক্কা শ্বাসোঽঙ্গভেদশ্চ জ্বরস্যোপদ্রবা দশ” ইতি|৬৬|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

জ্বরস্যাসাধ্যলক্ষণান্যাহ– হেতুভিরিত্যাদি| ননু, যো হেতুভির্বলিভির্বহুভিশ্চোপজাযতে স বহুলক্ষণ এব ভবতি, তত্ কিং বহুলক্ষণবচনেন? উচ্যতে– যথা স্বহেতুকুপিতা দোষাঃ সর্বস্যৈব রোগস্য হেতবো ভবন্তি, প্রাক্তনকর্মাপেক্ষযা তু যদা বিশিষ্টাং সামগ্রীং সম্প্রাপ্তিলক্ষণামাসাদযন্তি তদা জ্বরমাপাদযন্তি, তথা দূষ্যাদিসহকারিকারণসান্নিধ্যাসান্নিধ্যাভ্যাং বহুলক্ষণতামল্পলক্ষণতাং চ কুর্বন্তি| তথা হি তন্ত্রান্তরম্– একং দ্বৌ ত্রীন্ বহূন্ বাঽপি দেহে ধাত্বাদিযোগতঃ| দর্শযন্তি বিকারাংস্তে কুপিতাঃ পবনাদযঃ||’ ইতি| অথবা বিকৃতিবিষমসমবাযাদ্বহুহেতুকোঽপ্যল্পলক্ষণোঽল্পহেতুকোঽপি বহুলক্ষণ ইতি| প্রাণান্তকৃদিতি ছেদঃ| শীঘ্রমিন্দ্রিযনাশন ইতি উত্পন্নমাত্র এব চিকিত্স্যমানোঽপীন্দ্রিযশক্তিং রূপাদিগ্রহণলক্ষণামুপহন্তি সোঽপ্যসাধ্যো ন তূপেক্ষযা; অন্যেঽপি হি রোগা উপেক্ষ্যমাণা ইন্দ্রিযশক্তিমুপঘ্নন্তি অসাধ্যতাং চাধিরোহন্তি| এবং বহুলক্ষণোঽপ্যাদাবেব চিকিত্স্যমান এব বোদ্ধব্যঃ| ইন্দ্রিযাণ্যত্র একাদশ বোদ্ধব্যানি সাঙ্খ্যসিদ্ধান্তেন, তথা চরকসুশ্রুতনির্দিষ্টত্বাত্; ‘চক্ষুঃ শ্রোত্রং ঘ্রাণং রসনং স্পর্শনং চেতি বুদ্ধীন্দ্রিযাণি, হস্তপাদগুদোপস্থজিহ্বাঃ কর্মেন্দ্রিযাণি চেতি, উভযাত্মকং মনঃ||’; এবমন্যত্রাপি দ্রষ্টব্যম্| জ্বরঃ ক্ষীণস্য শূনস্যেতি অপরমসাধ্যলক্ষণম্| গম্ভীরো দৈর্ঘরাত্রিক ইতি গম্ভীরোঽন্তর্ধাতুস্থঃ; অথবা গম্ভীর ইব গম্ভীরঃ, যত্র বাতাদীনাং নিশ্চযঃ কর্তুং ন শক্যতে; অন্যে ত্বাহুঃ– গম্ভীরোঽন্তর্বেগঃ| দৈর্ঘরাত্রিক ইতি ‘দীর্ঘরাত্রানুবন্ধী’ ইতি জেজ্জটঃ, “দীর্ঘাং মরণরূপাং রাত্রিমনুবর্ততে ইতি দৈর্ঘরাত্রিকঃ” ইতি চক্রঃ, অসাধ্য ইত্যর্থঃ| অত্র পক্ষে দৈর্ঘরাত্রিক ইতি পূর্বেণ সম্বধ্যতে, অসাধ্য ইতি পরেণ| কেশসীমন্তকৃদিতি অকস্মাত্ কেশেষু সীমন্তান্ যঃ করোতি| উক্তং হি তন্ত্রান্তরে “কেশাঃ সীমন্তিনো যস্য সঙ্ক্ষিপ্তে বিনতে ভ্রুবৌ| লুনন্তি চাক্ষিপক্ষ্মাণি সোঽচিরাদ্যাতি মৃত্যবে||” ইতি| গম্ভীরার্থা যে জেজ্জটাদিভির্ব্যাখ্যাতাস্তেষু মধ্যে অত্র গম্ভীরোঽন্তর্বেগ ইত্যযমর্থো মাধবকরস্যাভিমতঃ; অত এবাসৌ এতদনন্তরং সৌশ্রুতং গম্ভীরলক্ষণং লিখতি– গম্ভীর ইত্যাদি| য এব চরকেঽন্তর্বেগঃ স এব সুশ্রুতে গম্ভীরঃ পঠিতঃ; সমলক্ষণত্বাত্, পৃথক্পাঠাভাবাচ্চেতি| আনদ্ধত্বেন চেতি বদ্ধদোষত্বেন| আরম্ভাদিত্যাদি| আরম্ভাদুত্পাদাত্ প্রভৃতি যস্য বিষমজ্বরঃ সোঽসাধ্যঃ, যস্য তু নিত্যজ্বরিণো জ্বরোত্সৃষ্টস্য বাঽপচারাদিনা বিষমঃ স সাধ্য এব| এতচ্চ বিষমত্বং সততাদিরূপং বোদ্ধব্যং, নতু বিষমত্বমাত্রেণ, বাতিকজ্বরেঽপি প্রসঙ্গাদিতি| দৈর্ঘরাত্রিকো ব্যাহৃত এব; ন চাস্য পুনরুক্তত্বং, তন্ত্রান্তরীযবাক্যত্বাত্; অধিকার্থপ্রতিপাদনার্থং বুদ্ধ্বাঽপি লিখিতম্; এবং গম্ভীরেঽপি বাচ্যম্| ‘অতিরূক্ষস্য’ ইত্যত্র ‘অনিমিষাক্ষস্য’ ইতি পাঠান্তরে সদা স্ফারিতনেত্রস্যেত্যর্থঃ| বিসঞ্জ্ঞঃ বিহ্বলঃ, তাম্যতে মুহ্যতি| শেতে নিপতিত ইতি শযিতো নিপতিত এবাস্তে ন চ উত্থাতুং সমর্থঃ| শীতার্দিতোঽন্তরুষ্ণশ্চেতি শীতার্দিতো বহিঃ, অন্তরুষ্ণোঽন্তর্দাহবান্| হৃষ্টরোমা রোমাঞ্চিতগাত্রঃ| হৃদি সঙ্ঘাতশূলবানিতি সঙ্ঘাতরূপেণ বস্তুনা অষ্ঠীলিকাদিনাঽঽক্রান্তমিব হৃদযং মন্যতে যঃ স তথা; অন্যে ত্বাহুঃ– নানাপ্রকারশূলবানিতি| বক্ত্রেণ চৈবোচ্ছ্বসিতীত্যেবকারেণ নাসিকাং ব্যবচ্ছিনত্তি ব্যাদিতাস্যপ্রতিপাদনার্থং, খরশ্বাস ইত্যর্থঃ| হিক্কেত্যাদি| হিক্কাদিভির্মিলিতৈরেকেনাপ্যতিবলবতাঽসাধ্যত্বম্| মূঢং মোহযুক্তম্| বিভ্রান্তলোচনং ভ্রান্তপ্রেক্ষণং, চলিতনেত্রং বা| সন্ততোচ্ছ্বাসিনং নিরন্তরখরশ্বাসযুক্তম্| হতপ্রভেত্যাদি| হতপ্রভাণি হতশক্তীনি স্ববিষযাগ্রাহীণি চক্ষুরাদীনি যস্য স তথা; অথবা হতা প্রভা দীপ্তিরিন্দ্রিযাণি চ যস্য স তথা| ‘অরোচকনিপীডিতম্’ ইত্যত্র স্থানে জেজ্জটঃ পাঠান্তরদ্বযং পঠতি– ‘দুরাত্মানমুপদ্রুতম্’ ইতি, ব্যাচষ্টে চ– “দুরাত্মানং দুষ্টান্তঃকরণম্, উপদ্রুতমিতি শ্বাসাদিভিরুপদ্রবৈরুপদ্রুতম্; দুরাত্মভিরুপদ্রুতম্” ইতি পাঠান্তরে তু রাক্ষসাদিভির্জুষ্টমিত্যর্থঃ| এষামসাধ্যলক্ষণানামুপলক্ষণত্বাদন্যান্যপি তন্ত্রান্তরেষু দ্রষ্টব্যানি| তদ্যথা– ‘প্রেতৈঃ সহ পিবেন্মদ্যং স্বপ্নে যঃ কৃষ্যতে শুনা| সুঘোরং জ্বরমাসাদ্য স জীবমপসৃজ্যতে|| জ্বরঃ পৌর্বাহ্ণিকো যস্য শুষ্ককাসশ্চ দারুণঃ| বলমাংসবিহীনস্য যথা প্রেতস্তথৈব সঃ|| জ্বরো যস্যাপরাহ্ণে তু শ্লেষ্মকাসশ্চ দারুণঃ| বলমাংসবিহীনস্য যথা প্রেতস্তথৈব সঃ|| সহসা জ্বরসন্তাপস্তৃষ্ণা মূর্ছা বলক্ষযঃ| বিশ্লেষণং চ সন্ধীনাং মুমূর্ষোরুপজাযতে|| গোসর্গে বদনাদ্যস্য স্বেদঃ প্রচ্যবতে ভৃশম্| লেপজ্বরোপসৃষ্টস্য দুর্লভং তস্য জীবিতম্|| মৃত্যুশ্চ তস্মিন্ বহুপিচ্ছিলত্বাচ্ছীতস্য জন্তোঃ পরিতঃ সরত্বাত্| স্বেদো ললাটে হিমবন্নরস্য শীতার্দিতস্যৈতি সুপিচ্ছিলশ্চ|| কণ্ঠে স্থিতো যস্য ন যাতি বক্ষো নূনং যমস্যৈতি গৃহং স মর্ত্যঃ|| স্রুতস্বেদো ললাটাদ্যঃ শ্লথসন্ধানবন্ধনঃ| মুহ্যেদুত্থাপ্যমানস্তু স স্থূলোঽপি ন জীবতি|| যস্য স্বেদোঽতিবহুলঃ পিচ্ছিলো যাতি সর্বতঃ| রোগিণঃ শীতগাত্রস্য তদা মরণমাদিশেত্||’ ইতি| আধানজন্মনিধনে প্রত্যযাখ্যে বিপত্করে| নক্ষত্রে ব্যাধিরুত্পন্নঃ ক্লেশায মরণায বা| জ্বরস্তু জাতঃ ষড্রাত্রাদশ্বিনীষু নিবর্ততে||’ (বৃ. বা. নি. অ. ১) ইত্যাদিনা গ্রন্থেন নক্ষত্রভেদেন জ্বরস্য সাধ্যত্বাসাধ্যত্বং যদভিহিতং, তদ্ধারীতবৃদ্ধবাগ্ভটযোর্দ্রষ্টব্যম্, ইহ তু বিস্তরভযান্ন লিখিতম্| সন্নিপাতা সাধ্যপ্রকরণং যথা– ‘পিত্তকফানিলবৃদ্ধ্যা দশদিবস দ্বাদশাহ– সপ্তাহাত্| হন্তি বিমুঞ্চতি বাঽঽশু ত্রিদোষজো ধাতুমলপাকাত্||’ ইতি| সপ্তাহাদ্বাতাধিকঃ, দশাহাত্ পিত্তাধিকঃ, দ্বাদশাহাত্ কফাধিকঃ; পিত্তাধিকবদ্বাতপিত্তাধিকঃ, কফাধিকবদ্বাতকফাধিকঃ, যোগবাহিত্বাদ্বাযোঃ| ( যদাহ চরকঃ– ‘যোগবাহী পরং বাযুঃ সংযোগাদুভযার্থকৃত্| দাহকৃত্তেজসা যুক্তঃ শীতকৃত্সোমসংশ্রযাত্||’ ইতি (চ. চি. অ. ৩)| ধাতুপাকাদ্ধন্তি, মলপাকাদ্বিমুঞ্চতীতি ব্যবস্থিতবিকল্পঃ; ধাতুমলপাকবিকল্পে চ দৈবমেব হেতুঃ| উত্তরোত্তররোগবৃদ্ধিবলহানিভ্যাং শুক্রাদিধাতুসহিতমূত্রাদিনা চ ধাতুপাকো জ্ঞেযঃ, অন্যথা তু মলপাকঃ| যদুক্তম্– ‘নিদ্রানাশো হৃদি স্তম্ভো বিষ্টম্ভো গৌরবারুচী| অরতির্বলহানিশ্চ ধাতূনাং পাকলক্ষণম্|| ইতি; অন্যতাচ মলপাকঃ– দোষপ্রকৃতিবৈকৃত্যং লঘুতা জ্বরদেহযোঃ| ইন্দ্রিযাণাং চ বৈমল্যং দোষাণাং পাকলক্ষণম্||’ ইতি| ননু, তরতমাদিভাবব্যবস্থিতশীঘ্রমধ্যমন্দশক্তিত্বাত্ স্থিরশীঘ্রমধ্যমশক্তিত্বাত্ দোষাণাং কথং সপ্তাহাদিনিযম ইতি চেত্| ন, তথা– স্বভাবাদ্ব্যাধেঃ, বিচিত্রা হি প্রতিরোগং স্বভাবাঃ; যথাঽগ্নিরোহিণী সপ্তাহেন হন্তি ন তথাঽন্যে বিকারা ইতি| অথঃ ‘সপ্তমী দ্বিগুণা যাবত্ নবম্যেকাদশী তথা| এষা ত্রিদোষমর্যাদা মোক্ষায চ বধায চ||’ (বা. নি. অ. ২) ইতি হারীতবচনসংবাদার্থমেবং ব্যাচক্ষতে– দশমীপ্রত্যাসত্ত্যা নবমী, দ্বাদশীপ্রত্যাসত্ত্যা একাদশী চ গৃহ্যতে; ততো বৃদ্ধ্যেতি পদমাবর্ত্য সর্বত্র দ্বৈগুণ্যং কার্যম্| এবং, ‘সপ্তমে দিবসে প্রাপ্তে দশমে দ্বাদশেঽপি বা| পুনর্ঘোরতরো ভূত্বা প্রশমং যাতি হন্তি বা||’ (সু. উ. তং. অ. ৩৯) ইত্যত্র সুশ্রুতবাক্যে পুনঃশব্দেন দ্বৈগুণ্যমিতি কার্তিককুণ্ডো ব্যাখ্যাতবান্| এবং দশদ্বাদশসপ্তাহৈঃ পিত্তশ্লেষ্মানিলাধিকঃ| দগ্ধোষ্মণা ধাতুমলান্ হন্তি মুঞ্চতি বা জ্বরঃ||’ (বা. নি. অ. ২) ইত্যত্রাধিকশব্দমাবর্ত্য ক্রিযাবিশেষণং কৃত্বা দ্বৈগুণ্যং ব্যাখ্যাতম্| তথা বাতপিত্তকফৈঃ সপ্তদশদ্বাদশবাসরান্| প্রাযোঽনুযাতি মর্যাদা মোক্ষায চ বধায চ||’ (বা. নি. অ. ২) ইত্যত্রাগ্নিবেশমতে প্রাযোগ্রহণেন দ্বৈগুণ্যমিতি| ননু, সপ্তমীত্যাদৌ কথং তর্হি দশবিংশতিদ্বাদশচতুর্বিংশতীনাং গ্রহণমিতি চেত্| উচ্যতে– একাদশীত্যত্র একেতি পদমাবর্তনীযং, তেন নবমী একেতি দশমী লভ্যতে, একাদশী একেতি দ্বাদশী , ততঃ সর্বত্র দ্বৈগুণ্যম্| তু শব্দঃ সমুচ্চযে, তেন সপ্তমী গৃহ্যতে সা দ্বিগুণা চ| এবং নবম্যাদিষু যোজ্যম্| চতুর্বিংশত্যধিকস্তু মর্যাদাদিবসো নাস্তি, তত্প্রতিপাদকাগমাদর্শনাত্||৬৬-৭৩||

আতঙ্কদর্পণ ব্যাখ্যা (বাচস্পতি বৈদ্য কৃত)

জ্বরস্যাসাধ্যলক্ষণমাহ– হেতুভিরিত্যাদি| যো জ্বরো বলিভিঃ প্রবলৈর্হেতুভিঃ কারণৈর্জাতোঽত এব বহুলক্ষণঃ সম্পূর্ণলক্ষণ ইত্যর্থঃ স ত্বসাধ্যঃ; যশ্চ শীঘ্রমিন্দ্রিযনাশনো ভবতি সোঽপি জ্বরঃ প্রাণান্তকৃত্ মরণাত্মক ইত্যর্থঃ| উত্পন্নমাত্র এব চিকিত্সিতমাত্রোঽপি ইন্দ্রিযশক্তিং রসরূপাদিগ্রহণলক্ষণামুপহরতি সোঽপ্যসাধ্যো ন তূপেক্ষযা| অন্যেঽতি হি রোগা উপেক্ষ্যমাণা ইন্দ্রিযশক্তিমুপঘ্নন্তি অসাধ্যতাং চাধিরোহন্তি; এবমুক্তলক্ষণোঽপ্যাদাবেবাচিকিত্স্যমান এব বোধ্যঃ| ইন্দ্রিযাণি চাত্র চক্ষুঃ শ্রোত্রং ঘ্রাণং রসনং স্পর্শনং চেতি পঞ্চ বুদ্ধীন্দ্রিযাণি হস্তপাদগুদোপস্থজিহ্বাঃ পঞ্চ কর্মেন্দ্রিযাণি উভযাত্মকং মন এবমেকাদশেন্দ্রিযাণি| অপরমসাধ্যলক্ষণমাহ– শূনস্য শোথযুক্তস্য পুরুষস্য, ক্ষীণস্য জ্বরেণ, গম্ভীরো দৈর্ঘ্যরাত্রিকঃ, গম্ভীরোঽন্তর্ধাতুস্থঃ, অথবা গম্ভীর ইব গম্ভীরঃ, যত্র বাতাদীনাং নিশ্চযঃ কর্তুং ন শক্যতে, অন্যে গম্ভীরোঽন্তর্বেগঃ| দৈর্ঘ্যরাত্রিক ইতি দীর্ঘরাত্রানুবন্ধীতি জেজ্জটঃ, দীর্ঘাং মরণরূপাং রাত্রিমনুবর্তত ইতি চক্রঃ, অসাধ্য ইত্যর্থঃ| কেশসীমন্তকৃদিতি অকস্মাত্কেশেষু সীমন্তান্ করোতি যঃ| উক্তং চ তন্ত্রান্তরে– “কেশাঃ সীমন্তিনো যস্য সঙ্ক্ষিপ্তে বিততে ভ্রুবৌ| লুনন্তি চাক্ষিপক্ষ্মাণি সোঽচিরাদ্যাতি মৃত্যবে” ইতি| সুশ্রুতোক্তং সাধ্যগম্ভীরজ্বরলক্ষণমাহ– গম্ভীরস্ত্বিত্যাদি| আনদ্ধত্বেনেতি দোষপুরীষবিবন্ধেন| অপরমসাধ্যলক্ষণমাহ– আরম্ভাদিত্যাদি| আরম্ভাত্প্রভৃতি যস্য বিষমো জ্বরঃ সোঽসাধ্যঃ| তচ্চ বিষমত্বং সততাদিরূপত্যেন বোদ্ধব্যং ন তু বিষমত্বং বেগাদিনা| দৈর্ঘরাত্রিকঃ পূর্বমেব ব্যাখ্যাতোঽপি ন পুনরুক্তঃ, তন্ত্রান্তরীযবাক্যত্বাত্ অধিকার্যপ্রতিপাদনার্থং তদ্বাক্যং পঠিতম্| ‘অতিরূক্ষস্য’ ইত্যত্র ‘অনিমিষাক্ষস্য’ ইতি পাঠং পঠন্ত্যন্যে| তত্র সর্বদা স্ফারিতনেত্রস্যেত্যর্থঃ| অন্যদপ্যসাধ্যলক্ষণমাহ– বিসঞ্জ্ঞো বিহ্বলঃ, তাম্যতি প্রমুহ্যতি, শেতে নিপতত ইব আস্তে নৈবোত্থাতুং সমর্থঃ| শীতার্দিতো বহিরন্তর্দাহবান্| অন্যদপ্যসাধ্যলক্ষণমাহ– য ইত্যাদি| হৃষ্টরোমা রোমাঞ্চিতঃ| হৃদি সঙ্ঘাতশূলবানিতি সঙ্ঘাতরূপেণ বস্তুনা অষ্ঠীলকাদিনা আক্রান্তমিব হৃদযং মন্যতে যঃ, অষ্ঠীলা পাষাণলোষ্টিকা, অনেন প্রকারেণ শূলবানিতি| অন্যে ত্বাহুঃ– নানাপ্রকারশূলবানিতি| বক্ত্রেণ চৈবোচ্ছ্বসিতীতি এবকারেণ নাসিকাভ্যাং ব্যবচ্ছিনত্তি| হিক্কেত্যাদিভির্মিলিতৈরেকেন বাঽপ্যতিবলবতাঽসাধ্যত্বম্| মূঢং মোহযুক্তং, বিভ্রান্তলোচনং ভ্রান্তপ্রেক্ষণং চলিতনেত্রং বা, সন্ততোচ্ছ্বাসিনং নিরন্তরোচ্ছ্বাসিনম্| লক্ষণান্তরমাহ– হতেত্যাদি| হতপ্রভাণি হতশক্তীনি স্ববিষযাগ্রাহীণি চ ইন্দ্রিযাণি চক্ষুরাদীনি যস্য স তথা; অথবা হতা প্রভা দীপ্তিরিন্দ্রিযাণি চ যস্য স তথা| অরোচকনিপীডিতমিত্যত্র জেজ্জটঃ পাঠদ্বযং পঠতি ‘দুরাত্মানমুপদ্রুতং ইতি| দুরাত্মানং দুষ্টান্তঃকরণম্| উপদ্রুতমুপদ্রবযুক্তম্| ‘দুরাত্মভিরুপদ্রুতম্’ ইতি পাঠান্তরে রাক্ষসাদিভির্জুষ্টমিত্যর্থঃ| গম্ভীরোঽন্তর্বেগঃ, তীক্ষ্ণোঽতিদুঃসহো বহিরন্তশ্চ, তাভ্যামন্যোন্যমার্তং পীডিতং, ক্ষামং ক্ষীণং, তমিত্থম্ভূতং জ্বরিতং স্বার্থবিদ্যাযশোহানিভযাদসাধ্যত্বাত্পরিবর্জযেত্| এষামসাধ্যলক্ষণানামুপলক্ষণত্বাদন্যান্যপি তন্ত্রান্তরেষু দ্রষ্টব্যানি| তদ্যথা– “প্রেতৈঃ সহ পিবেন্মদ্যং স্বপ্নে যঃ কৃষ্যতে শুনা| স ঘোরং জ্বরমাসাদ্য নরো জীবাদ্বিমুচ্যতে|| জ্বরঃ পূর্বাহ্ণিকো যস্য শুষ্ককাসশ্চ দারুণঃ| বলমাংসবিহীনশ্চ যথা প্রেতস্তথৈব সঃ|| গোসর্গে বরনাদ্যস্য স্বেদঃ প্রচ্যবতে ভৃশম্| লেপজ্বরোপসৃষ্টস্য দুর্লভং তস্য জীবিতম্” ইতি| অত্র গোসর্গে প্রত্যূষে| “মৃত্যুশ্চ তস্মিন্বহুপিচ্ছিলত্বাচ্ছীতস্য জন্তোঃ পরিতঃ সরত্বাত্| স্বেদো ললাটে হিমবন্নরস্য শীতার্দিতস্যৈতি সুপিচ্ছিলশ্চ|| কণ্ঠে স্থিতো যস্য ন যাতি বক্ষো নূনং যমস্যৈতি গৃহং স মর্ত্যঃ” ইতি| তথাঽন্যত্রাপি– “আবিলাক্ষং প্রতাম্যন্তং নিদ্রাযুক্তমতীব চ| ক্ষীণশোণিতমাংসং চ নরং ক্ষপযতি জ্বরঃ|| স্রুতস্বেদো ললাটাদ্যঃ শ্লথসন্ধানবন্ধনঃ| মুহ্যত্যুত্থাপ্যমানস্তু স স্থূলোঽপি ন জীবতি|| যস্য স্বেদোঽতিবহুলঃ পিচ্ছিলো যাতি সর্বতঃ| রোগিণঃ শীতগাত্রস্য তদা মরণমাদিশেত্|| যস্তাম্যতি স্বপিতি শীতলগাত্রযষ্টিরন্তর্বিদাহসহিতং স্মরণাদপেতম্| সোচ্ছ্বাসিনং কুপিতরোমচযং সশূলং তং বর্জযেদ্ভিষগিহ জ্বরিতং বিধিজ্ঞঃ” ইতি “জ্বরস্তু জাতঃ ষড্রাত্রাদশ্বিনীষু নিবর্ততে” ইত্যাদি নক্ষত্রভেদেন জ্বরস্যাসাধ্যত্বম্| যদুক্তং তদ্ধারীতবৃদ্ধবাগ্ভটযোর্দ্রষ্টব্যম্||৬৬-৭৩||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

জ্বরবিমুক্তিপূর্বরূপমাহ– দাহ ইত্যাদি বিড্ভিদিতি বিড্ভেদঃ; সম্পদাদিপাঠাত্ ভাবে ক্বিপ্| অসঞ্জ্ঞিতা সঞ্জ্ঞানাশঃ| কূজনম্ অস্ফুটধ্বনিঃ| যদুক্তম্– ‘জ্বরপ্রমোক্ষে পুরুষঃ কূজেদ্বমতি চেষ্টতে||’(চ. চি. অ. ৩) ইতি| বাগ্ভটোঽপ্যাহ– ‘ধাতূন্ প্রক্ষোভযন্ দোষো মোক্ষকালে বলীযতে| ততো নরঃ শ্বসন্ স্বিদ্যন্ কূজন্ বমতি চেষ্টতে|| (বা. নি. অ. ২) ইতি| বৈগন্ধ্যং দুর্গন্ধতা গাত্রে| জ্বরমোক্ষণে ভবিষ্যতি আকৃতির্লক্ষণং ‘ভবতি’ ইতি শেষঃ| ননু, দোষক্ষযং বিনা ন ব্যাধিনিবৃত্তিঃ, ক্ষীণশ্চ দোষঃ কথমেবংবিধং লক্ষণং কুর্যাত্? উচ্যতে– কশ্চিদ্ভাবঃ ক্ষীণোঽপি বিনাশকালে স্বশক্তিং দর্শযতি, যথা– নির্বাণাবস্থো দীপো বিশেষাত্ প্রজ্বলতি| অথবা দোষাভিভূতানাং ধাতূনাং দোষাপগমেন ক্ষোভাদ্দাহাদযঃ তরলতরবানরপরিহীযমানতরুণতরুবল্লরীশিখরকম্পবদিতি||৭৪||

আতঙ্কদর্পণ ব্যাখ্যা (বাচস্পতি বৈদ্য কৃত)

জ্বরমুক্তস্য পূর্বরূপমাহ– দাহ ইত্যাদি| জ্বরমোক্ষকালে এতাদৃশ্যাকৃতির্লক্ষণং ‘ভবতি’ ইতি শেষঃ বিড্ভিদিতি বিড্ভেদঃ, অসঞ্জ্ঞতা সঞ্জ্ঞানাশঃ, কূজনং কুন্থনম্| যদুক্তম্– “জ্বরমোক্ষেষু পুরুষঃ কূজন্নতিবিচেষ্টতে” ইতি| বাগ্ভটঽপ্যাহ– “ধাতূন্প্রক্ষোভযন্দোষো মোক্ষকালে বলীযতে| ততো নরঃ শ্বসন্সদ্যঃ কূজন্নতিবিচেষ্টতে” ইতি| বৈগন্ধ্যং দৌর্গন্ধ্যমতীব গাত্রে| ননু দোষক্ষযং বিনা ন ব্যাধিনিবৃত্তিঃ, ক্ষীণশ্চ দোষঃ কথমেবংবিধং লক্ষণং কুর্যাত্? উচ্যতে– কশ্চিদ্ভাবঃ ক্ষীণোঽপি বিনাশকালে স্বশক্তিং দর্শযতি, যথা নির্বাণাবস্থোঽপি দীপো বিশেষাত্প্রজ্বলতি| অথবা দোষাভিভূতানাং ধাতূনাং দোষাপগমেন ক্ষোভাদ্দাহাদযঃ, যথা– তরলতরবানরপরিহীযমানতরুণতরুবল্লরীশিখরকম্পবদিতি| এতচ্চ দাহমারভ্য লক্ষণং ত্রিদোষজে ভবতি ন সর্বত্র; তথাচৈতদনন্তরং ভালুকিঃ প্রাহ– “ত্রিদোষজে জ্বরে হ্যেতদন্তর্বেগে চ ধাতুজে| লক্ষণং মোক্ষকালে স্যাদন্যস্মিন্ স্বেদদর্শনম্” ইতি ||৭৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

জ্বরমুক্তিলক্ষণমাহ– স্বেদ ইত্যাদি| স্বেদো ঘর্মাগমনং, স্রোতসাং স্ফুটত্বাত্| লঘুত্বং গাত্রস্য| শিরসঃ কণ্ডূরিতি সর্বো হি জ্বরস্তৈজসো বিরোধিব্যপগমাত্ সৌম্যঃ শ্লেষ্মা লব্ধবলঃ সন্ শিরসি স্বস্থানেঽসাধারণাত্মলক্ষণং কণ্ডূং করোতি, ব্যাধিমহিম্না তু নান্যত্র কফস্থানে ইতি বদন্তি| পাকো মুখস্যেতি জ্বরোষ্মকোপিতাত্ পিত্তাত্, যত্তু পূর্বং নাকার্ষীদন্যত্র বা তদপি ব্যাধিমহিম্নৈব| এতচ্চ দাহমারভ্য লক্ষণং ত্রিদোষজেঽন্তর্বেগে জ্বরে ভবতি, নতু সর্বত্র| তথা চৈতদনন্তরং ভালুকিঃ প্রাহ– ‘ত্রিদোষজে জ্বরে হ্যেতদন্তর্বেগে চ ধাতুগে| লক্ষণং মোক্ষকালে স্যাদন্যস্মিন্ স্বেদদর্শনম্||’ ইতি| ননু, জ্বরস্য প্রত্যক্ষত্বাত্তস্যাভাবোঽপি প্রত্যক্ষঃ, তত্ কিং তল্লক্ষণপাঠেন? তথাঽপি বা পঠিতব্যং, তর্হি সর্ববিকারেষু পঠ্যতাম্? উচ্যতে– বিষমজ্বরশঙ্কানিরাসার্থং, বিষমজ্বরে হি নিবৃত্তোঽপি জ্বরঃ পুনরাযাতি, দোষাণাং ধাতুলীনত্বাত্; এতল্লক্ষণে তু নিঃশেষদোষনিবৃত্ত্যা ন পুনরাগমঃ| যত্র চৈবংবিধা শঙ্কা তত্রৈব লক্ষণং পঠতি ন সর্বত্র, যথা প্রমেহাতীসারাদিষ্বিতি সর্বং সুস্থম্||৭৫||

আতঙ্কদর্পণ ব্যাখ্যা (বাচস্পতি বৈদ্য কৃত)

জ্বরমুক্তস্য লক্ষণমাহ– জ্বরমুক্তস্য পুরুষস্যৈবং বিধং লক্ষণং ভবতি| স্বেদো ঘর্মাগমঃ স্রোতসাং স্ফুটত্বাত্, লঘুত্বং গাত্রস্য; শিরসঃ কণ্ডূরিতি| সর্বো হি জ্বরস্তৈজসঃ বিরোধিব্যপগমাত্ সৌম্যঃ শ্লেষ্মা লব্ধবলঃ সন্ শিরসি স্বস্থানেঽসাধারণাত্মকলক্ষণং কণ্ডূং জনযতি ব্যাধিমহিম্না নান্যত্র স্থানে ইতি বদন্তি| পাকো মুখস্যেতি জ্বরোষ্মকোপিতাত্পিত্তাত্|| ক্ষবথুঃ ছিক্কা| পরমতে– “দেহো লঘুর্ব্যপগতক্লমমোহতাপঃ পাকো মুখে করণসৌষ্ঠবমব্যথত্বম্| স্বেদঃ ক্ষবঃ প্রকৃতিযোগিমনোঽন্নলিপ্সা কণ্ডূশ্চ মূর্ধ্নি বিগতজ্বরলক্ষণানি” ইতি||৭৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযাং জ্বরনিদানং সমাপ্তম্||২||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবৈদ্যবাচস্পতিকৃতে আতঙ্কদর্পণে রুগ্বিনিশ্চযব্যাখ্যানে জ্বরনিদানং সমাপ্তম্||২||