৩৮. গলগণ্ডগণ্ডমালাপচীগ্রন্থ্যর্বুদনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বৃদ্ধিযুক্তমুষ্কসমানলিঙ্গত্বাত্তদনন্তরং গলগণ্ডনিদানম্| তস্য সামান্যলিঙ্গমাহ– নিবদ্ধঃ শ্বযথুরিত্যাদি| নিবদ্ধোঽনুবন্ধবান্| মুষ্কবদণ্ডবত্| ভোজেঽপ্যুক্তম্– “মহান্তং শোথমল্পং বা হনুমন্যাগলাশ্রযম্| লম্বন্তং মুষ্কবদ্দৃষ্ট্বা গলগণ্ডং বিনির্দিশেত্||” ইতি||১||

আতঙ্কদর্পণ ব্যাখ্যা (বাচস্পতি বৈদ্য কৃত)

বৃদ্ধিযুক্তমুষ্কসাধর্ম্যাত্তদনন্তরং গলগণ্ডনিদানম্| তস্য সামান্যলিঙ্গমাহ– নিবদ্ধ ইত্যাদি| নিবদ্ধোঽনুবন্ধবান্, মুষ্কবত্ অণ্ডবত্| যদুক্তং ভোজেন– “মহান্তং শোথমল্পং বা হনুমন্যাগলাশ্রযম্| লম্বন্তং মুষ্কবদ্দৃষ্ট্বা গলগণ্ডং বিনির্দিশেত্||” ইতি||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্য সম্প্রাপ্তিমাহ– বাত ইত্যাদি| বাতকফমেদাংসি পৃথক্ গলগণ্ডকারণানি, তেন ত্রয এব গলগণ্ডাঃ; পৈত্তিকস্তু ন ভবত্যেব, ব্যাধিস্বভাবাত্; চাতুর্থকজ্বরবত্| চাতুর্থকে হি বচনম্– “চাতুর্থকো দর্শযতি প্রভাবং দ্বিবিধং জ্বরঃ| জঙ্ঘাভ্যাং শ্লৈষ্মিকঃ পূর্বং শিরস্তোঽনিলসম্ভবঃ||” (চ. চি. অ. ৩) ইতি| ক্রমশ ইত্যনেন শনৈরেব বর্ধনং দর্শযতি| স্বলিঙ্গৈঃ সমন্বিতমিতি “নিবদ্ধঃ শ্বযথুঃ” ইত্যাদিনা উক্তগলগণ্ডলিঙ্গৈরন্বিতম্||২||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য সম্প্রাপ্তিমাহ– বাত ইত্যাদি| বাতকফমেদাংসি পৃথগ্গলগণ্ডকারণানি, তেন ত্রয এব গলগণ্ডাঃ পৈত্তিকস্তু ন ভবত্যেব, ব্যাধিস্বভাবাত্| মন্যে উভে কণ্ঠসন্ধৌ| ক্রমশ ইতি শনৈর্বৃদ্ধির্দর্শিতা| স্বলিঙ্গৈঃ সমন্বিতমিতি বাতকফমেদোলক্ষণৈঃ সমন্বিতমিতি||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতজমাহ– তোদান্বিতে ইত্যাদি| চিরবৃদ্ধিরিতি বিকারপ্রভাবাত্ বাতজোঽপি চিরেণ বর্ধতে| যদৃচ্ছযা পাকমিযাদিতি কারণাপ্রতিনিযমেন কদাচিত্ পাকং যাতি, কারণাপ্রতিনিযমশ্চ বাহ্যোঽভিপ্রেতঃ, আভ্যন্তরস্তু পাককারণং পিত্তং রক্তং চ নিযতমেব| কদাচিদিতি ন সর্বকালম্| “যদৃচ্ছযা চৈব ভবেত্ কদাচিত্” ইতি পাঠান্তরে ‘পাক’ ইতি শেষঃ||৩||–

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকমাহ– তোদান্বিত ইত্যাদি| তোদঃ পীডাবিশেষঃ, কৃষ্ণসিরাবৃতঃ, পারুষ্যযুক্তঃ স্পর্শনকর্কশঃ| চিরবৃদ্ধিরিতি ব্যাধিপ্রভাবাত্ বাতজোঽপি চিরেণ বর্ধতে| কারণাপ্রতিনিযমেন কদাচিত্ পাকং গচ্ছতি| কারণাপ্রতিনিযমশ্চ বাহ্যোঽভিমতঃ, আভ্যন্তরং তু পাককারণং পিত্তং রক্তং চ নিযতমেব| কদাচিদিতি ন সর্বকালম্| ‘যদৃচ্ছযা চৈব ভবেত্’ ইতি পাঠান্তরম্| তত্র ‘পাক’ ইতি শেষঃ||৩||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লেষ্মজমাহ– স্থির ইত্যাদি| সবর্ণ ইতি প্রকৃতিসমবর্ণঃ||৪-৫||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকমাহ– স্থির ইত্যাদি| স্থিরো নিশ্চলঃ, সবর্ণঃ প্রকৃতিবর্ণঃ, মহান্ স্থূলঃ| মন্দরুজ ইত্যাদি কদাচিদ্যদা প্রপচ্যতে তদা মন্দরুজ এব প্রপচ্যতে, পাককালে পীডা ন ভবতীত্যর্থঃ| প্রলেপ ইতি শ্লেষ্মণা লিপ্ত ইব||৪-৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মেদোজমাহ– স্নিগ্ধ ইত্যাদি| দেহানুরূপক্ষযবৃদ্ধিযুক্ত ইতি দেহক্ষযে ক্ষযং, দেহবৃদ্ধৌ চ বৃদ্ধিং যাতীত্যর্থঃ| গলেঽনুশব্দমিতি অনুনাদং করোতি| ‘গলে তু শব্দম্’ ইতি পাঠান্তরং সুগমম্||৬||–

আতঙ্কদর্পণ ব্যাখ্যা (বাচস্পতি বৈদ্য কৃত)

মেদোজমাহ– স্নিগ্ধ ইত্যাদি| অনিষ্টগন্ধো, অলাবুবত্ তুম্বীফলবত্, অল্পমূলস্তনুমূলঃ| দেহানুরূপক্ষযবৃদ্ধিঃ– দেহক্ষযে ক্ষযং কার্শ্যং, দেহবৃদ্ধৌ বৃদ্ধিং, যাতীত্যর্থঃ| গলেঽনুশব্দমিতি অনুনাদং প্রতিশব্দং করোতি; “গলেন শব্দম্” ইতি পাঠান্তরং সুগমম্||৬||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যতামাহ– কৃচ্ছ্রাচ্ছ্বসন্তমিত্যাদি| কৃচ্ছ্রাচ্ছ্বসন্তং দুঃখেন শ্বাসবিমোক্ষকারিণম্| ভিন্নস্বরং স্বরভেদবন্তম্||৭||–

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যমাহ– কৃচ্ছ্রাদিত্যাদি| দুঃখেন শ্বাসবিমোক্ষকারকং, মৃদুসর্বগাত্রং শিথিলসর্বগাত্রম্, অতিক্রান্তবত্সরং, ভিন্নস্বরং স্বরভেদবন্তম্||৭||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্থানতুল্যতযা গণ্ডমালামিহৈবাহ– কর্কন্ধুকোলামলকপ্রমাণৈরিত্যাদি| কর্কন্ধুঃ শৃগালকোলিঃ, কোলং বৃহদ্বদরম্| মেদঃকফাভ্যামিতি মেদো দূষ্যং, কফো দোষোঽত্রারম্ভকঃ, মেদঃকফৌ প্রাধান্যেনোক্তৌ; তেন বাতপিত্তসম্বন্ধোঽপ্যত্র দ্রষ্টব্যঃ| যদাহ ভোজঃ– “বাতপিত্তকফা বৃদ্ধা মেদশ্চাপি সমাচিতম্| জঙ্ঘযোঃ কণ্ডরাঃ প্রাপ্য মত্স্যাণ্ডসদৃশান্ বহূন্|| কুর্বন্তি গ্রন্থিতাংস্তেভ্যঃ পুনঃ প্রকুপিতোঽনিলঃ| তান্ দোষানূর্ধ্বগো বক্ষঃকক্ষমন্যাগলাশ্রিতঃ|| নানাপ্রকারান্ কুরুতে গ্রন্থীন্ সা ত্বপচী মতা| তাং তু মালাকৃতিং বিদ্যাত্ কণ্ঠহৃদ্ধনুসন্ধিষু|| গণ্ডমালাং বিজানীযাদপচীতুল্যলক্ষণাম্|” ইতি| স্যাদ্গণ্ডমালেতি মালাতুল্যগণ্ডযোগাত্ গণ্ডমালা| গলমাত্র এব গণ্ডমালা চরকে পঠিতা| যথা– “মেদঃকফাচ্ছোণিতসঞ্চযোত্থো গলস্য মধ্যে গলগণ্ড একঃ স্যাদ্গণ্ডমালা বহুভিশ্চ গণ্ডৈঃ” (চ. চি. অ. ১২) ইতি||৮||–

আতঙ্কদর্পণ ব্যাখ্যা (বাচস্পতি বৈদ্য কৃত)

স্থানতুল্যতযা গণ্ডমালামিহৈবাহ– কর্কন্ধ্বিত্যাদি| কর্কন্ধুর্লঘুবদরং, কোলং বৃহদ্বদরম্| অংসৌ বাহুমূলে, মন্যা শিরোধঃ, বঙ্ক্ষণং জানূরুসন্ধিঃ| মেদঃকফাভ্যামিত্যাদি| মেদো দূষ্যং, কফো দোষোঽত্রারম্ভকঃ, মেদঃকফৌ চ প্রাধান্যেনোক্তৌ, তেন বাতপিত্তসঞ্চযোঽপ্যত্র দ্রষ্টব্যঃ| যদাহ ভোজঃ– “বাতপিত্তকফা বৃদ্ধা মেদশ্চাপি সমাচিতম্| জঙ্ঘযোঃ কণ্ডরাঃ প্রাপ্য মত্স্যাণ্ডসদৃশান্বহূন্|| কুর্বন্তি গ্রন্থিতাংস্তেভ্যঃ পুনঃ প্রকুপিতোঽনিলঃ| তান্দোষানূর্ধ্বগো বক্ষঃকক্ষমন্যাগলাশ্রিতঃ| নানাপ্রকারান্কুরুতে গ্রন্থীন্ সা ত্বপচী মতা| ব্যামিশ্রদোষসঞ্জাতা কৃচ্ছ্রসাধ্যা প্রকীর্তিতা|| তাসাং বাতোত্তরা রূক্ষা বাতবেদনযাঽন্বিতা| ক্ষিপ্রপাকসমুত্থানা দাহযুক্তা চ পৈত্তিকী|| গূঢপাকা চ কঠিনা কফাত্ স্নিগ্ধাঽল্পরুক্করা| মেদোবিকারা শ্লৈষ্মিকী চ বিশেষাদতিমার্দবা|| অপচী কণ্ঠমন্যাসু কক্ষবঙ্ক্ষণসন্ধিষু| তাং তু মালাকৃতিসমাং কণ্ঠহৃদ্দন্তসন্ধিষু| কণ্ঠমালাং বিজানীযাদপচীতুল্যলক্ষণম্||” ইতি| স্যাদ্গণ্ডমালেতি মালাতুল্যগণ্ডাশ্রযা গণ্ডমালা| গলমাত্র এব চরকে গণ্ডমালা পঠিতা, যথা– “মেদঃকফাচ্ছোণিতসঞ্চযোত্থো গলস্য পার্শ্বে গলগণ্ড একঃ| স্যাদ্গণ্ডমালা বহুভিশ্চ গণ্ডৈঃ” ইতি||৮||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গণ্ডমালাতুল্যতযা অপচীমাহ– তে গ্রন্থয ইত্যাদি| তে ইতি গণ্ডমালারম্ভকদোষদূষ্যকৃতা যে গ্রন্থযস্ত এবেত্যর্থঃ| কালানুবন্ধং চিরমিতি চরকলানুবন্ধম্| সৈবাপচীতি তাদৃশী অমালারূপা অপচী ভণ্যতে| সৈবাপচীতি ইতিশব্দেনাভিহিতত্বাত্ প্রবদন্তীতি ক্রিযাযোগেঽপি ন দ্বিতীযা| অপচীনিরুক্তিশ্চাপরাপরোপচীযমানতযা| অত এব “চযপ্রকর্ষাদপচীং বদন্তি|” (সু. নি. অ. ১১) ইতি সুশ্রুতঃ| চযপ্রকর্ষশ্চাপরাপরভবনেনৈব, সাধুত্বং চ নৈরুক্ত্যেন বিধিনা| যদুক্তম্– “বর্ণাগমো বর্ণবিপর্যযশ্চ দ্বৌ চাপরৌ বর্ণবিকারনাশৌ| ধাতোস্তদর্থাতিশযেন যোগস্তদুচ্যতে পঞ্চবিধং নিরুক্তম্||” ইতি| অত এবোক্তম্– নশ্যন্তি ভবন্তি চান্য ইতি| সাধ্যাঃ স্মৃতা ইতি ছেদঃ| পীনসাদিভিরুপদ্রবৈরসাধ্যাঃ| অযং তু গ্রন্থিঃ চরকে গণ্ডমালাযামস্তি; সঙ্গ্রহকারেণ তু গণ্ডমালযা সহ তুল্যত্বাদপচ্যা অপচ্যামেব গ্রন্থিঃ পঠিতঃ||৯-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

গণ্ডমালাতুল্যতযাঽপচীমাহ– ত ইত্যাদি| গণ্ডমালারম্ভকদোষদূষ্যকৃতা যে গ্রন্থযস্ত এবেত্যর্থঃ| অবাপ্তপাকাঃ লব্ধপাকাঃ, কালানুবন্ধমিতি চরকলসম্বন্ধম্| সৈবাপচীতি তাদৃশী আমলকরূপা অপচী ভণ্যতে| সৈবাপচীতি– ইতিশব্দেনাভিহিতত্বাত্প্রবদন্তীত্যাদিক্রিযাযোগেঽপি ন দ্বিতীযা| তস্য সাধ্যত্বমাহ– সাধ্যেত্যাদি| সাধ্যাঃ স্মৃতা ইতি পূর্বগ্রন্থেন সম্বন্ধঃ, ‘স্রবন্তি নশ্যন্তি ভবন্তি চান্যে’ ইত্যাদিপীনসাদিভিরুপদ্রবৈর্যুতা অসাধ্যাঃ||৯-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অনন্তরমপচীগুডকতুল্যতযা গ্রন্থিমাহ– বাতাদয ইত্যাদি| বাতপিত্তকফাঃ প্রত্যেকং দুষ্টাঃ; দুষ্টিশ্চাত্র বৃদ্ধিরেব ন ক্ষযঃ, ক্ষীণানাং বিকারকরণাক্ষমত্বাত্| যদ্যেবং তর্হি কথং বাতাদিক্ষযে মন্দচেষ্টাদযঃ? উচ্যতে– তত্ক্ষযে বিরোধিদোষকোপাত্; যথা– মধুরস্নিগ্ধাদিভির্বাতে ক্ষীণে তত্সমানত্বাত্ শ্লেষ্মা প্রকুপ্যতি| বচনং হি– “বৃদ্ধিশ্চাপি বিরোধিনাম্|” ইতি| সন্দূষ্য মেদশ্চ মাংসমসৃক্ সিরাশ্চেত্যনেন মেদোজঃ কফসম্বন্ধাদ্যো ভবতি তথা সিরাজোঽপি বাযুনা সিরাদুষ্ট্যা যো জন্যতে স উচ্যতে| এবং পঞ্চ গ্রন্থযঃ| তথেতি সন্দূষ্য| মাংসমসৃগিতি অত্রাসৃজঃ ক্রমোল্লঙ্ঘনেন পাঠোঽপ্রাধান্যপ্রতিপাদনার্থঃ, বিসর্পে তু শোণিতমেব প্রধানম্| অত এব ক্বচিত্ চকারমপ্রাধান্যসূচকং নিবেশ্য ‘অসৃক্ চ’ ইতি পাঠঃ| চরকে তু গ্রন্থিঃ বাতকফজ এব গ্রন্থিবিসর্পশব্দেনোক্তঃ| বৃত্তোন্নতমিতি বৃত্তং বর্তুলম্, উন্নতম্ উচ্ছূনম্| বিগ্রথিতং কঠিনং, ককখটং বা; বিগ্রথিতত্বাদেব গ্রন্থিরিতি সঞ্জ্ঞা||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

অপচীগণ্ডকরূপতযা গ্রন্থিকামাহ– বাতাদযেত্যাদি| বাতাদযো বাতপিত্তকফাঃ, প্রত্যেকং দুষ্টাঃ মাংসমসৃক্ সন্দূষ্য শোফং কুর্বন্তীতি সম্বন্ধঃ| এতেন ত্রযো গ্রন্থয উক্তাঃ, দুষ্টিশ্চাত্র বৃদ্ধিরেব, ন ক্ষযঃ, ক্ষীণানাং বিকারকরণাক্ষমত্বাত্, সন্দূষ্য মেদশ্চ তথা সিরাশ্চেত্যনেন মেদোজঃ সিরাজশ্চৈবং দ্বৌ, সন্দূষ্য মাংসমসৃগিত্যত্রাসৃজঃ ক্রমোল্লঙ্ঘনেন পাঠোঽপ্রাধান্যপ্রতিপাদনার্থং, বৃত্তং বর্তুলম্, উন্নতং উচ্ছূনং, বিগ্রথিতং বিচ্ছিদ্য গ্রথিতম্, অতো বিগ্রথিতত্বাদেব গ্রন্থিসঞ্জ্ঞা||১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অনিলগ্রন্থিমাহ– আযম্যত ইত্যাদি| আযম্যতে আকৃষ্য দীর্ঘীক্রিযতে| বৃশ্চ্যতীতি ছিনত্তীব, অত্র দিবাদেরাকৃতিগণত্বাত্ ‘শ্যন্’ প্রত্যযঃ| প্রত্যস্যতে ক্ষিপ্যতে| মথ্যতি আলোডযতীব, অত্রাপি পূর্ববত্ সমাধানম্| ভিদ্যতে বিদীর্যত ইব| অস্রং স্রাবম্||১২||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকমাহ– আযম্যত ইত্যাদি| আকৃষ্য দীর্ঘীক্রিযত ইব, বৃশ্চ্যতি ছিনত্তীব, তুদ্যতে শূলেনেব, প্রত্যস্যতে ক্ষিপ্যতে, মথ্যতি আলোডযতীব, ভিদ্যতে বিদার্যত ইব||১২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তগ্রন্থিমাহ– দন্দহ্যত ইত্যাদি| দন্দহ্যতে অত্যর্থং দহ্যতে অগ্নিনেব| পাপচ্যতে ভৃশং পচ্যত ইব ক্ষারেণ, কিংবা উত্ক্বথ্যত ইব| প্রজ্বলতীব জ্বলন্ ভস্মীভবতীব||১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– দন্দহ্যত ইত্যাদি| অগ্নিনা দহ্যত এব, ধূপ্যতি ধূমাযত ইব, চূষ্যতে শৃঙ্গেণেব, পাপচ্যতে ভৃশং পচ্যত ইব ক্ষারেণ, কিংবা উত্ক্বথ্যত ইব| জ্বলতীব জ্বলনেনেব ভস্মীভবতি, বর্ণেন রক্তঃ অথবা পীতঃ, ভিন্নঃ সন্ অতীবাতিশযেন দুষ্টং রক্তং স্রবতি||১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফগ্রন্থিমাহ– শীত ইত্যাদি| অবিবর্ণঃ প্রকৃতিবর্ণঃ, ঈষদ্বিবর্ণ ইতি কশ্চিত্| পাষাণবত্ সংহননোপপন্ন ইতি পাষাণবত্ কঠিন ইত্যর্থঃ; কিংবা পাষাণবত্ ভবতি, সংহননোপপন্ন ইতি সংহতান্বিতো মহানিত্যর্থঃ||১৪||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকমাহ– শীত ইত্যাদি| অবিবর্ণঃ প্রকৃতিবর্ণঃ, পাষাণবত্ সঙ্ঘাতান্বিতো মহানিত্যর্থঃ| ভিন্নঃ সন্ শুক্লং ঘনং পূযং স্রবেত্ চ||১৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মেদোজগ্রন্থিমাহ– শরীরেত্যাদি| শরীরবৃদ্ধিক্ষযবৃদ্ধিহানিরিতি শরীরবৃদ্ধিক্ষযাভ্যাং যথাক্রমং বৃদ্ধিহানী যস্য স তথা| মেদোজেষ্বেবং যুক্তিঃ ধাতুস্বভাবাত্ চিরস্থাযিত্বাদ্বা| গচ্ছতি চাত্র ভিন্নে পিণ্যাকসর্পিঃপ্রতিমং তু মেদ ইতি ভিন্নে সতি পিণ্যাকস্তিলকল্কঃ, সর্পিরত্র স্ত্যানং, তত্সদৃশং মেদঃ স্রবতি| ভোজেন তু মেদোগ্রন্থেঃ সম্প্রাপ্তিঃ পঠ্যতে| যথা– “মেদো বাযুর্যদা মাংসে নিক্ষিপেদথবা ত্বচি| তত্র মেদোভবগ্রন্থিঃ শ্যাবো ভবতি পাণ্ডুরঃ|| কৃশঃ কৃশে, মহান্ স্থূলে, গ্রন্থির্ভিন্নশ্চ পীডিতঃ| তিলকল্কনিভঃ স্রাবো ঘৃতবচ্চাস্য জাযতে||” ইতি||১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

মেদোজমাহ– শরীরবৃদ্ধিক্ষযাভ্যাং যথাক্রমং বৃদ্ধিহানী যস্য স তথা| ভিন্নে সতি পিণ্যাকসর্পিঃসদৃশং মেদো গচ্ছতি স্রবতীত্যর্থঃ| পিণ্যাকস্তিলকল্কঃ, সর্পিরত্র স্ত্যানম্, তত্সদৃশং মেদো গচ্ছতি| উক্তঞ্চ ভোজে– “মেদো বাযুর্যদা মাংসে নিক্ষিপেদথ বা ত্বচি| তত্র মেদোভবো গ্রন্থিঃ শ্যাবো ভবতি পাণ্ডুরঃ|| কৃশঃ কৃশে মহান্ স্থূলে গ্রন্থিশ্ছিন্নশ্চ পীডিতঃ| তিলকল্কনিভঃ স্রাবো ঘৃতবচ্চাস্য জাযতে||” ইতি||১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সিরাজগ্রন্থেঃ সম্প্রাপ্তিমাহ– ব্যাযামজাতৈরিত্যাদি| সঙ্কুচ্যেতি অন্তর্ভাবিতোঽত্র ণ্যর্থঃ, তেন সঙ্কোচ্যেত্যর্থঃ| সম্পিণ্ড্যেতি সংহতীকৃত্য| উন্নতমাশু বৃত্তমিতি অস্য সামান্যলক্ষণেনৈব সিদ্ধে পুনস্তদুক্তিরতিশযার্থম্| স চ সিরাজো গ্রন্থির্যদি সরুজশ্চলশ্চ স্যাত্তদা কৃচ্ছ্রসাধ্যঃ| স চারুজশ্চাপীত্যাদিনা ন সাধ্যঃ| স চেতি চকারেণারুজত্বাদিধর্মযোগাদপরেঽপি গ্রন্থযোঽসাধ্যা ইতি সূচযতি| যদুক্তং ভোজে– “পঞ্চৈতানরুজো গ্রন্থীন্ মর্মজানচলাংস্ত্যজেত্| কপোলগলমন্যাসু দুশ্চিকিত্স্যাশ্চ সন্ধিষু||” ইতি| অন্যে তু মাংসাসৃগ্ভ্যাং ষষ্ঠং গ্রন্থিং বদন্ত এবং পঠন্তি– “ মাংসাসৃজং চার্বুদলক্ষণেন তুল্যং হি দৃষ্টং ত্বথ লক্ষণজ্ঞৈঃ|” ইতি কিন্ত্বনার্ষোঽযং পাঠঃ, ভোজাদিসমানতন্ত্রেষ্বদৃষ্টত্বাত্||১৬-১৭||

আতঙ্কদর্পণ ব্যাখ্যা (বাচস্পতি বৈদ্য কৃত)

সিরাজগ্রন্থেঃ সম্প্রাপ্তিমাহ– ব্যাযামেত্যাদি| তৈস্তৈরিতি বলবদ্বিগ্রহাদিভিঃ সিরাপ্রতানং সিরাভ্যো নির্গতং সূক্ষ্মসিরাজালম্| সঙ্কুচ্যেতি অন্তর্ভাবিতোঽত্র ণ্যর্থঃ, তেন সঙ্কোচ্যেত্যর্থঃ| সম্পীড্য সংহতীকৃত্য, উন্নতমুচ্চং, বৃত্তং বর্তুলম্| স তু সিরাজো গ্রন্থিঃ যদি সরুজশ্চলঃ স্যাত্তদা কৃচ্ছ্রসাধ্যঃ| তস্যাসাধ্যত্বমাহ– স ইতি| চকারেণারুজাদিধর্মযোগাদ্ অপরেঽপি গ্রন্থযঃ অসাধ্যা ইতি সূচযন্তি| যদুক্তং ভোজেন– “পঞ্চৈতানরুজো গ্রন্থীন্মর্মজাংশ্চ চলাংস্ত্যজেত্| কপোলগলমন্যাসু দুশ্চিকিত্স্যাশ্চ সন্ধিষু||” ইতি||১৬-১৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মাংসশোণিতদূষ্যসাম্যাদর্বুদাভিধানম্| তস্য সম্প্রাপ্তিমাহ– গাত্রপ্রদেশে ক্বচিদিত্যাদি| ক্বচিদেবেত্যনেনানিযতদেশে, ন পুনরপচীবন্নিযতদেশে| “সম্মূর্ছিতা” ইতি পাঠান্তরে সম্মূর্ছিতা বৃদ্ধাঃ, দূষ্যসংসৃষ্টা ইতি কার্তিকঃ| মাংসমসৃক্ প্রদূষ্যেতি সর্বার্বুদসাধারণং দূষ্যং, মাংসার্বুদমেদোঽর্বুদযোস্তু বিশেষেণ মাংসদুষ্টিঃ; মাংসার্বুদমেদোঽর্বুদযোরপি তদ্দূষকো দোষোঽস্তি, তেন তত্রাপি দোষকর্তৃতযা সম্প্রাপ্তিরিযং ভবতি| মাংসোচ্ছ্রযমিতি মাংসোচ্ছ্রযতযা প্রতীযমানম্| মেদোজেঽপি মাংসমুদ্গতং ভবতি| অত্যগাধমিতি দূরানুপ্রবিষ্টম্; অত এবানল্পমূলমিত্যুক্তম্| বাতাদিভিস্তদর্বুদং জাযতে ভবতি, তেন ষডর্বুদানি ভবন্তি| গ্রন্থেঃ সমানানীতি বাতপিত্তকফমেদোগ্রন্থিভির্বাতপিত্তকফমেদোঽর্বুদানাং লক্ষণানি সমানানি, শোণিতজমাংসজযোস্তু লক্ষণং পৃথক্ বক্ষ্যতি||১৮-১৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

অথার্বুদান্যাহ| তস্য সম্প্রাপ্তিমাহ– গাত্রেত্যাদি| ক্বচিদেবেতি অনিযতদেশে ন পুনরপচীবত্ নিযতপ্রদেশে| সম্মূর্ছিতা ইতি পাঠান্তরে বৃদ্ধাঃ| মাংসমসৃক্ প্রদূষ্যেতি সর্বার্বুদেষু সাধারণং দূষ্যং, মাংসার্বুদমেদোঽর্বুদযোশ্চ বিশেষেণ মাংসমেদোদুষ্টিঃ, বৃত্তং বর্তুলং, মৃদুং মৃদুস্পর্শং, মাংসমেদআশ্রযত্বাত্| অত্যগাধং দূরানুপ্রবিষ্টম্, অত এবানল্পমূলমিত্যুক্তম্| তস্য সঙ্খ্যামাহ– বাতেনেত্যাদি| বাতাদিভিস্তদর্বুদং জাযতে ভবতি; তেন ষডর্বুদানি ভবন্তি| গ্রন্থেঃ সমানানীতি বাতপিত্তকফমেদোজগ্রন্থিভির্বাতপিত্তকফমেদোজার্বুদানাং লক্ষণানি সমানানি| শোণিতজমাংসজযোস্তু লক্ষণং পৃথক্পঠ্যতে||১৮-১৯||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তার্বুদমাহ– দোষঃ প্রদুষ্ট ইত্যাদি| সঙ্কুচ্যেতি অন্তর্ভাবিতোঽত্র ণ্যর্থঃ| অপাকমীষত্পাকং, তেন সাস্রাবমিত্যুপপন্নং ভবতি| দোষ উন্নহ্যতি উচ্ছ্রিতো ভবতি| সাস্রাবমীষত্স্রাবম্| মাংসপিণ্ডমাশুবৃদ্ধং শীঘ্রবর্ধনং, মাংসাঙ্কুরৈরাচিতং করোতি, তথা অজস্রং রুধিরপ্রবৃত্তিমপি করোতি; রুধিরং চাত্রাধিষ্ঠানভূতং সিরাগতং প্রবর্ততে ন তু পাকাত্, ঈষদেব স্রাবস্য ক্লেদরূপস্যোক্তত্বাত্| কিংবা উন্নহ্যতীত্যন্তর্ভাবিতণ্যর্থঃ, তেন মাংসপিণ্ডমুন্নাহযতি উদ্গতং করোতি| “দোষাঃ প্রদুষ্টা” ইতি পাঠপক্ষে “ সাস্রাবমুন্নহ্য হি” ইতি পাঠঃ| উন্নহ্য উন্নাহ্য, অন্তর্ভাবিতণ্যর্থত্বাত্| হি পাদপূরণে||২০-২১||–

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তার্বুদমাহ– দোষ ইত্যাদি| সঙ্কুচ্যেতি অন্তর্ভাবিতোঽত্র ণ্যর্থঃ| অপাকমিতি ঈষত্পাকং, তেন সাস্রাবমিত্যুপপন্নং ভবতি| দোষঃ প্রদুষ্টঃ উন্নহ্যতি উচ্ছ্রিতো ভবতি| অজস্রং রুধিরপ্রবৃত্তিমতিরুধিরং চাধিষ্ঠানভূতং প্রবর্ততে, ন তু পাকাত্, ঈষদেব স্রাবস্য ক্লেদরূপস্যোক্তত্বাত্| সুশ্রুতোক্তৈঃ রক্তক্ষযোপদ্রবৈঃ পাণ্ডুঃ স্যাত্||২০-২১||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মাংসজন্যসম্প্রাপ্তিমাহ– মুষ্টিপ্রহারাদিভিরিত্যাদি| অশ্মোপমং পাষাণবত্ কঠিনম্| অপ্রচাল্যং স্থিরম্| যদ্যপি রক্তমাংসার্বুদযো রক্তমাংসযোর্হেতুত্বেনোক্তিস্তথাঽপি রক্তজে পিত্তং, মাংসজে বাযুরারম্ভকঃ, এবমপি তাভ্যাং ঘৃতদুগ্ধন্যানেন ব্যপদেশঃ| মাংসপরাযণস্য মাংসাশনশীলস্য| তস্য চাতিমাত্রং মাংসবৃদ্ধিঃ, “মাংসং মাংসেন বর্ধতে” ইত্যভিধানাত্||২২-২৩||–

আতঙ্কদর্পণ ব্যাখ্যা (বাচস্পতি বৈদ্য কৃত)

মাংসজস্য সম্প্রাপ্তিমাহ– মুষ্টীত্যাদি| মুষ্টিপ্রহারাদিভিরর্দিতেঽঙ্গপ্রদেশে, অনন্যবর্ণম্, অপাকং পাকরহিতম্, অশ্মোপমং পাষাণবত্কঠিনম্, অপ্রচাল্যং স্থিরম্| যদ্যপি রক্তমাংসার্বুদযোঃ রক্তমাংসযোর্হেতুত্বেনোক্তিঃ, তথাঽপি রক্তজে পিত্তং, মাংসজে বাযুরারম্ভকঃ, এবমপি তাভ্যাং ঘৃতদুগ্ধন্যাযেন ব্যপদেশঃ| মাংসপরাযণস্য মাংসভক্ষণশীলস্য, তস্য চাতিমাত্রং মাংসবৃদ্ধিঃ “মাংসং মাংসেন বর্ধতে” ইতি বচনাত্| এতন্মাংসার্বুদমসাধ্যম্||২২-২৩||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সাধ্যেষ্বপ্যসাধ্যপ্রকারানাহ– সাধ্যেষ্বপীত্যাদি| সম্প্রস্রুতং স্রাবযুক্তং, স্রাবশ্চাত্রাপাকিত্বেঽপি ত্বগবদরণাত্ মনাগবগন্তব্যঃ| স্রোতঃসু নাসাদিষু| অচাল্যং স্থিরম্||২৪||

আতঙ্কদর্পণ ব্যাখ্যা (বাচস্পতি বৈদ্য কৃত)

সাধ্যেষ্বপ্যসাধ্যপ্রকারানাহ– সাধ্যেষ্বিত্যাদি| সাধ্যেষ্বপি ইমানি অর্বুদানি বর্জযেত্| সম্প্রস্রুতং স্রাবযুক্তম্| স্রাবশ্চাত্রাপাকিত্বেঽপি ত্বগ্দারণাত্ মনাগবগন্তব্যঃ| স্রোতস্সু সিরাদিষু, অচাল্যং স্থিরম্||২৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অধ্যর্বুদমাহ– যজ্জাযত ইত্যাদিনা| অধিকমর্বুদম্ অধ্যর্বুদম্, এতদ্দ্বিরর্বুদমেব| যদ্দ্বন্দ্বজাতং যুগপত্ ক্রমাদ্বেতি দ্বন্দ্বজাতং যুগ্মেন জাতং, যুগপদেকদা ক্রমেণ বা, তদ্দ্বিরর্বুদং ন সাধ্যম্| তথাচ ভোজঃ– “অর্বুদে ত্বর্বুদং জাতং দ্বন্দ্বজং চানুজং চ যত্| দ্বিরর্বুদমিতি জ্ঞেযং তচ্চাসাধ্যং বিনির্দিশেত্||” ইতি||২৫||

আতঙ্কদর্পণ ব্যাখ্যা (বাচস্পতি বৈদ্য কৃত)

অধ্যর্বুদমাহ– যদিত্যাদি| অধিকমর্বুদমধ্যর্বুদং, এতদ্দ্বিরর্বুদমেব| যদ্ দ্বন্দ্বজাতং যুগপদেকদা ক্রমেণ বা তত্ দ্বিরর্বুদং ন সাধ্যম্| তথা চ ভোজঃ– “অর্বুদং ত্বর্বুদে জাতং দ্বন্দ্বজং চানুজং চ যত্| দ্বিরর্বুদমিতি জ্ঞেযং তচ্চাসাধ্যং বিনির্দিশেত্||” ইতি||২৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অর্বুদানাং পাকাভাবে হেতুমাহ– ন পাকমাযান্তীত্যাদি| সর্বার্বুদানি পিত্তরক্তজান্যপি ন পাকমাযান্তি, কুতঃ ইত্যত আহ– কফাধিকত্বান্মেদোবহুত্বাচ্চ| ননু, অপচ্যামপি বিশেষতঃ কফমেদসী অধিকে, অথ চ তস্যাঃ পাকোঽস্ত্যেব, ইত্যত আহ– দোষস্থিরত্বাদিতি| অপচ্যাং কালান্তরেণ হি রক্তপিত্তমধিকং পাকমারভতে, তচ্চেহ দোষস্থিরত্বাত্ সদা সদৃশদোষত্বাত্ গ্রথিতত্বাচ্চ ন পাকারম্ভকম্| অন্যে তু দোষস্থিরত্বাদিতি দোষোচ্ছ্রাযরূপশোথকাঠিন্যাদিত্যাহুঃ; তদপ্রযোজনকম্, অন্যত্র দোষোচ্ছ্রাযশোথকাঠিন্যেঽপি পাকদর্শনাত্| অথ কুতো যথোক্তহেতুসম্পদিত্যাহ– নিসর্গতস্ত্বিতি| নিসর্গতো ব্যাধিস্বভাবাত্| ভোজেঽপ্যুক্তম্– “ন পচ্যতে স্থিরত্বাচ্চ গ্রথিতত্বাত্ স্বভাবতঃ|” ইতি||২৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অর্বুদানাং পাকাভাবে হেতুমাহ– নেত্যাদি| সর্বার্বুদানি পিত্তরক্তজান্যপি ন পাকমাযান্তি, কুত ইত্যাহ– কফাধিকত্বান্মেদোবহুত্বাচ্চ| ননু, অপচ্যামপি কফমেদসী অধিকে, অথ চ তস্যাঃ পাকঃ কালতোঽস্ত্যেবেত্যাহ– দোষস্থিরত্বাদিতি কালান্তরেণ হি রক্তপিত্তমধিকং পাকমারভতে| ননু, ইহ দোষস্থিরত্বাত্ সদৃশদোষত্বাত্ গ্রন্থিতত্বাচ্চ ন পাকারম্ভকত্বম্, অথ কুতো যথোক্তহেতুসম্পদিত্যাহ– নিসর্গতস্ত্বিতি| নিসর্গতো ব্যাধিস্বভাবাত্| ভোজেঽপ্যুক্তম্– “ন পচ্যতে স্থিরত্বাচ্চ গ্রথিতত্বাত্স্বভাবতঃ” ইতি| তেষামর্বুদানামিতি||২৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তবিরচিতাযাং মধুকোশব্যাখ্যাযাং গলগণ্ডগণ্ডমালাপচীগ্রন্থ্যর্বুদনিদানং সমাপ্তম্||৩৮||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং গলগণ্ডগণ্ডমালাঽপচীগ্রন্থ্যর্বুদনিদানম্||৩৮||