৫. অর্শোনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অতীসারগ্রহণ্যর্শসাং পরস্পরানুবন্ধিত্বাদতীসারগ্রহণ্যনন্তরমর্শ উচ্যতে– পৃথগিত্যাদি| ‘অরিবত্ প্রাণান্ শৃণাতি হিনস্তীত্যর্শঃ’ ইতি পৃষোদরাদিপাঠান্নিরুক্তিমাহুঃ| সহজানীতি সহ শরীরেণ জাতানি, গুদবল্যারম্ভকবীজভাগস্য দোষদূষিতত্বাত্| অত্র দ্বন্দ্বজানি প্রকৃতিসমসমবাযারব্ধত্বান্ন পৃথগ্গণিতানি| উক্তং হি সুশ্রুতে– “অর্শঃসু দৃশ্যতে রূপং যদা বৈ দোষযোর্দ্বযোঃ| সংসর্গং তং বিজানীযাত্ সংসর্গঃ ষড্বিধশ্চ সঃ||” (সু. নি. অ. ২) ইতি| ষড্বিধত্বং চাত্র সংসর্গস্য বাতাদিভির্যুগ্মৈস্ত্রযঃ সংসর্গাঃ, তৈরেব রক্তযোগাদপরে ত্রয ইতি| সন্নিপাতজং ত্বেকৈকদোষজেষ্বদৃষ্টস্যাসাধ্যত্বস্য যোগাদ্বিকৃতিবিষমসমবাযারব্ধমিতি সঙ্খ্যযা পৃথগ্গণিতম্| গুদবলিত্রয ইতি অর্ধপঞ্চাঙ্গুলমানং গুদং, তস্যাবযবভূতাস্তিস্রো বলয উপর্যুপরি ব্যবস্থিতাঃ শঙ্খাবর্তনিভাঃ প্রবাহণীবিসর্জনীসংবরণীনামিকাঃ; তত্র গুদৌষ্ঠমর্ধাঙ্গুলং, তদূর্ধ্বমঙ্গুলমানা প্রথমাবলী সুশ্রুতেন (সু. নি. অ. ২) নির্দিষ্টা; ভোজেঽপ্যুক্তম্– “রোমান্তেভ্যো যবাধ্যর্ধং গুদৌষ্ঠং পরিচক্ষতে| গুদৌষ্ঠাদঙ্গুলং চৈকং প্রথমাং তাং বলীং বিদুঃ|| সার্ধৈকাঙ্গুলমানেন তদন্যেঽপি প্রকীর্তিতে||” ইতি সার্ধাঙ্গুলমানা দ্বিতীযা তৃতীযা চেতি||১||

আতঙ্কদর্পণ ব্যাখ্যা (বাচস্পতি বৈদ্য কৃত)

অতীসারগ্রহণ্যর্শসাং পরস্পরানুবন্ধিত্বাদতীসারগ্রহণ্যোরনন্তরমর্শ উচ্যতে– পৃথগিত্যাদি| অরিবত্ প্রাণান্ হিংসন্তি ইত্যর্শাংসি| তানি চ ষট্প্রকারাণি ভবন্তি| পৃথগ্দোষৈর্বাতাদিভিঃ ত্রীণি, সমস্তৈর্দোষৈঃ একং, শোণিতেন চৈকম্, একং সহজমিত্যেবং ষডর্শাংসি| তত্র সহজানি সহ শরীরেণ জাতানি, গুদবল্যারম্ভকবীজভাগস্য দোষদূষিতত্বাত্, কুলজানীত্যর্থঃ| অত্র দ্বন্দ্বজানি প্রকৃতিসমসমবাযারব্ধত্বান্ন পৃথগ্গণিতানি| উক্তং হি সুশ্রুতে– “অর্শঃসু দৃশ্যতে রূপং যদা বৈ দোষযোর্দ্বযোঃ| সংসর্গং তং বিজানীযাত্ সংসর্গঃ ষড্বিধশ্চ সঃ” ইতি| ষড্বিধত্বং চাত্র সংসর্গস্য বাতাদিযুগ্মৈস্ত্রযঃ সংসর্গাঃ, তৈরেব রক্তযোগাদপরে ত্রয ইতি| ত্রিদোষজং তু বিকৃতিবিষমসমবাযারব্ধত্বেনাসাধ্যত্বাত্সঙ্খ্যযা পৃথগ্গণিতম্| গুদবলিত্রয ইতি অর্ধপঞ্চাঙ্গুলমানং গুদং, তস্যাবযবভূতাস্তিস্রো বলয উপর্যুপরি ব্যবস্থিতাঃ শঙ্খাবর্তনিভাঃ প্রবাহণীবিসর্জনীসংবরণীনামিকাঃ, তত্র গুদোষ্ঠমর্ধাঙ্গুলং, তদূর্ধ্বমঙ্গুলদ্বযপ্রমাণা প্রথমাবলি, দ্বিতীযা সার্ধৈকাঙ্গুলা, তৃতীযাঽপি সার্ধৈকাঙ্গুলা, এবং সার্ধপঞ্চাঙ্গুলগুদং সুশ্রুতেন নির্দিষ্টম্| ভোজেনাপ্যুক্তম্– “রোমান্তেভ্যো যবাধ্যর্ধং গুদৌষ্ঠং পরিচক্ষতে| গুদৌষ্ঠাদঙ্গুলং চৈকং প্রথমাং তাং বলীং বিদুঃ” ইতি| সার্ধাঙ্গুলমানা দ্বিতীযা তৃতীযা চেতি||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সম্প্রাপ্তিপূর্বকমর্শঃস্বরূপমাহ– দোষা ইত্যাদি| ত্বঙ্মাংসগ্রহণেন ত্বঙ্মাংসাশ্রিতং রক্তমপি গৃহ্যতে, চিকিত্সাযাং রক্তস্রাবণোপদেশাত্| অপানং গুদম্, আদিশব্দেন নাসিকাদীনাং গ্রহণম্| কাযচিকিত্সকাস্তু গুদজস্যৈবার্শস্ত্বমিচ্ছন্তি, নাসাদিজানাং ত্বধিমাংসত্বং, তেষু “পঞ্চাত্মা মারুতঃ” ইত্যাদিসম্প্রাপ্তেরভাবাত্, বিষ্টম্ভ ইত্যাদিপূর্বরূপস্য চাসম্ভবাত্; যদাহ চরকঃ– ‘শিশ্ন’ ইত্যারভ্য যাবত্ “অধিমাংসব্যপদেশ এব” (চ. চি. অ. ১৪) ইতি| সুশ্রুতেন তু মাংসাঙ্কুরত্বসাধর্ম্যাত্ শস্ত্রক্ষারাগ্নিসাধ্যত্বাচ্চ তেষ্বর্শঃশব্দপ্রযোগঃ কৃতঃ, সার্ষপাদিস্নেহে তৈলব্যপদেশবত্; সুশ্রুতার্থবাদিনো বাগ্ভটস্যাপ্যযমেবাভিপ্রায ইতি||২||

আতঙ্কদর্পণ ব্যাখ্যা (বাচস্পতি বৈদ্য কৃত)

সম্প্রাপ্তিপূর্বকমর্শঃস্বরূপমাহ– দোষা ইত্যাদি| দোষা বাতাদযস্ত্বঙ্মাংসমেদাংসি সন্দূষ্য অপানাদৌ যান্ মাংসাঙ্কুরান্ কুর্বন্তি ভিষজস্তান্মাংসাঙ্কুরানর্শাংসি জগুঃ কথযন্তি| ত্বঙ্মাংসগ্রহণেন ত্বঙ্মাংসাশ্রিতং রক্তমপি গৃহ্যতে, যস্মাত্ চিকিত্সাযাং রক্তস্রাবকরণোপদেশঃ| অপানং গুদম্| আদিশব্দেন নাসিকাশ্রবণচক্ষুর্মেঢ্রনাভিপ্রভৃতযো গৃহ্যন্তে| এষাং লক্ষণানি সুশ্রুতে পঠিতানি| কাযচিকিত্সকাস্তু গুদজস্যৈবার্শস্ত্বমিচ্ছন্তি নাসিকাদিজাতানাং ত্বধিমাংসত্বং, তেষু ‘পঞ্চাত্মা মারুতঃ পিত্তম্’ ইত্যাদিসম্প্রাপ্তেরভাবাত্, তথা বিষ্টম্ভেত্যাদিসর্বপূর্বরূপস্য চাসম্ভবাত্| যদাহ চরকঃ– “শিশ্নেত্যারভ্য যাবদধিমাংসব্যপদেশ এব” ইতি| সুশ্রুতেন তু মাংসাঙ্কুরত্বসাধর্ম্যাচ্ছস্ত্রক্ষারাগ্নিসাধ্যত্বাচ্চ তেষ্বর্শঃশব্দপ্রযোগঃ কৃতঃ, সর্ষপাদিস্নেহে তৈলব্যপদেশবত্| সুশ্রুতনুবাদিনো বাগ্ভটস্যাযমেবাভিপ্রাযঃ প্রতিভাতি||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতার্শসো নিদানমাহ– কষাযেত্যাদি| প্রমিতম্ অল্পতমম্, অল্পং মাত্রাহীনমশনং, জেজ্জটস্ত্বাহ– ‘প্রমিতমতীতকালভোজনম্’| ‘প্রমৃত’ ইতি পাঠে তু নষ্টশক্তিকং ধান্যাদিকমাহুঃ| ‘প্রমিতাশনমেকরসাভ্যাসঃ’ ইত্যন্যে| তন্নাতিযুক্তম্; একরসাভ্যাসঃ কিং বাতপ্রকোপকস্য কট্বাদেঃ, কফপ্রকোপকস্য মধুরাদের্বা? নাদ্যঃ, কট্বাদেরত্রৈবোপাত্তত্বাত্; দ্বিতীযে মধুরাদীনাং ত্বভ্যাসো বাতশামক এব, একরসাভ্যাসাচ্চ দৌর্বল্যমুক্তং নতু বাতবৃদ্ধিরিতি চিন্ত্যমেতত্| তীক্ষ্ণমিতি মদ্যবিশেষণং, পৈষ্টিকাদিমৃদুমদ্যস্য বাতপ্রশমকত্বাত্| শীতো দেশ আনূপঃ, কালো হেমন্তাদিঃ| আতপস্য উষ্ণম্, আতপস্যোষ্ণগুণস্যাপ্যুদ্ভূতরৌক্ষ্যাদ্বাতপ্রকোপকত্বমিতি||৩-৪||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ বাতার্শোনিদানমাহ– কষাযেত্যাদি| এতত্সর্বং বাতার্শসাং হেতুঃ কারণম্| প্রমিতমল্পতমম্, অল্পং মাত্রাহীনম্, অন্যে প্রমিতস্থানে অতীতমিতি পঠন্তি, তত্রাতীতকালভোজনম্| অন্যে প্রমৃতাল্পাশনমিতি পঠন্তি| তত্র প্রমৃতং নষ্টশক্তিকং ধান্যাদিকমাহুঃ| তীক্ষ্ণমিতি মদ্যবিশেষণং, পৈষ্ট্যাদিমৃদুমদ্যস্য বাতপ্রশমকত্বাত্| শীতো দেশ আনূপঃ, কালো হেমন্তাদিঃ| আতপস্যোষ্ণগুণস্যাপি উদ্ভূতরূক্ষত্বাত্ বাতপ্রকোপকত্বমেব| অন্যত্সুবোধম্||৩-৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তার্শোনিদানমাহ– কট্বম্লেত্যাদি| দেশকালাবশিশিরাবিতি উষ্ণো দেশো মরুঃ, উষ্ণঃ কালঃ শরদ্ গ্রীষ্মশ্চ| অসূযনং পরসম্পত্তৌ দ্বেষঃ, স ক্রোধবিশেষ এব| পিত্তোল্বণানামিত্যনেন সর্বেষামর্শসাং ত্রিদোষজত্বম্, অধিকেন তু ব্যপদেশ ইতি দর্শিতং চরকেণ| যদাহ স এব– “অর্শাংসি নাম জাযন্তে নাঽসন্নিপতিতৈস্ত্রিভিঃ| দোষৈর্দোষবিশেষাত্তু বিশেষঃ কথ্যতেঽর্শসাম্||” (চ. চি. অ. ১৪) ইতি||৫-৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ পিত্তার্শোনিদানমাহ– কট্বিত্যাদি| কট্বম্লেত্যাদিকো হেতুর্জ্ঞেযঃ| দেশকালাবশিশিরাবিতি দেশো মরুদেশঃ, উষ্ণশ্চ কালো গ্রীষ্মঃ শরচ্চ, অসূযনং পরসম্পত্তৌ দ্বেষঃ, স চ ক্রোধবিশেষ এব| পিত্তোল্বণানামিত্যনেন সর্বেষামর্শসাং ত্রিদোষজত্বম্, অধিকেন তু ব্যপদেশ ইতি দর্শিতং চরকেণ, যদাহ স এব “অর্শাংসি নামজাযন্তে নাঽঽসন্নিপতিতৈস্রিভিঃ| দোষৈর্দোষবিশেষাত্তু বিশেষঃ কথ্যতেঽর্শসাম্” ইতি| শেষং সুগমম্||৫-৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লেষ্মার্শোনিদানমাহ– মধুরেত্যাদি| শয্যাসনসুখে রতিরিতি সুখশয্যাসনে রতিরাসক্তিঃ| প্রাগ্বাতসেবা পুরোবাতসেবনম্| অচিন্তনং নিশ্চিন্ততা||৭-৮||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ শ্লেষ্মার্শোনিদানমাহ– মধুরেত্যাদি| শ্লেষ্মোত্কটানামর্শসাং সমুত্পত্তাবেতন্মধুরস্নিগ্ধেত্যাদিকারণমুক্তম্| শয্যাসনসুখে রতিস্তত্রাসক্তিঃ| প্রাগ্বাতসেবা পুরোবাতসেবনম্| অচিন্তনং নিশ্চিন্ততা| অন্যত্সুবোধম্||৭||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দ্বন্দ্বজার্শোনিদানাদিকমাহ– হেত্বিত্যাদি| হেতুলক্ষণসংসর্গাদিতি দোষদ্বযস্য নিদানমেলকেন লক্ষণমেলকেন চ দ্বন্দ্বোল্বণানি দ্বন্দ্বজানি বিদ্যাত্|৯|–

আতঙ্কদর্পণ ব্যাখ্যা (বাচস্পতি বৈদ্য কৃত)

দোষাণাং হেতুলক্ষণৈরেব দ্বন্দ্বোল্বণমাহ– হেত্বিত্যাদি| দোষদ্বযস্য নিদানমেলকে লক্ষণমেলকে চ দ্বন্দ্বোল্বণানি দ্বন্দ্বজানি বিদ্যাত্ জানীযাত্|৯|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্রিদোষজার্শোনিদানমাহ– সর্ব ইত্যাদি| সর্বো হেতুরিতি একৈকশো বাতাদ্যর্শসাং যো হেতুরুক্তঃ স ত্রিদোষজানাং ভবতি, ত্রযো দোষা জনকত্বেনৈষাং সন্তীতি ত্রিদোষজানি| সহজৈর্লক্ষণং সমমিতি তেষাং লক্ষণং সহজৈরর্শোভিঃ সহ সমং সদৃশং, সহজানাং যল্লক্ষণং তত্ত্রিদোষজানামিত্যর্থঃ| ‘সহজৈর্লক্ষণৈঃ সমম্’ ইতি পাঠান্তরে তু সহজৈঃ সহজার্শোভবৈর্লক্ষণৈঃ সমং সহ সর্বো হেতুস্ত্রিদোষাণামিতি যোজ্যম্| সহজার্শোলক্ষণং চাত্র সঙ্গ্রহেণোক্তং তন্ত্রান্তরাদনুস্মর্তব্যং; যদাহ সুশ্রুতঃ– “দুর্দর্শনানি পরুষারুণপাণ্ডূনি দারুণান্তর্মুখানি, তৈরুপদ্রুতঃ কৃশোঽল্পভুক্ সিরাসন্ততগাত্রোঽল্পপ্রজঃ ক্ষীণরেতাঃ ক্ষামস্বরঃ ক্রোধনোঽল্পাগ্নির্ঘ্রাণশিরোঽক্ষিশ্রবণরোগবান্, সততমন্ত্রকূজনাটোপহৃদযোপলেপারোচকপ্রভৃতিভিঃ পীড্যতে||” (সু. নি. অ. ২) ইতি; চরকে চ– ‘কানিচিদণূনি’ (চ. চি. অ. ১৪) ইত্যাদিনা প্রভূততরং লক্ষণমুক্তম্| ননু, ত্রিদোষজানীতি বিশেষাভিধানমনুপপন্নং, সর্বেষামেব রোগাণাং ত্রিদোষজত্বাত্| যদুক্তম্– “দ্রব্যমেকরসং নাস্তি ন রোগোঽপ্যেকদোষজঃ| যোঽধিকস্তেন নির্দেশঃ ক্রিযতে রসদোষযোঃ||” ইতি| নৈবং; “সর্বদেহচরাস্তু বাতপিত্তশ্লেষ্মাণঃ” ইতি বচনাদেকস্মিন্ ধাত্বাদৌ দোষেণ দূষিতে সতি তদ্গতেতরদোষেঽপ্যবশ্যম্ভাবিনী কাচিদ্দুষ্টিঃ, দুষ্টদোষসম্বন্ধাত্| কিঞ্চ স্বকারণাত্ বৃদ্ধো বাযুঃ শৈত্যাচ্ছীতস্য শ্লেষ্মণো বলমাদধাতি, লাঘবাত্তেজোরূপস্য পিত্তস্য; পিত্তং চ কটুত্বাদ্বাতস্য, দ্রবত্বাত্ শ্লেষ্মণঃ; কফশ্চ শৈত্যাদ্বাযোঃ, দ্রবত্বাত্ পিত্তস্যেতি| অত এবোক্তম্– “ন রোগোঽপ্যেকদোষজঃ” ইতি| অনেনৈবাভিপ্রাযেণোক্তম্– “একঃ প্রকুপিতো দোষঃ সর্বানেব প্রকোপযেত্|” ইতি| যত্র তু স্বকারণাত্ত্রযোঽপি কুপিতাস্তত্র ত্রিদোষব্যপদেশ ইতি সিদ্ধান্তঃ; এবং সর্বত্র||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্রিদোষজমাহ– সর্ব ইত্যাদি| একৈকশো বাতাদ্যর্শসাং যো হেতুরুক্তঃ স ত্রিদোষজানাং ভবতি| ত্রযো দোষা জনকত্বেনৈষাং সন্তীতি ত্রিদোষজানি| তেষাং লক্ষণং সহজৈরর্শোভিঃ সহ সমং সদৃশং সহজানাং যল্লক্ষণং ভবতি তত্ত্রিদোষজানাং ভবতীত্যর্থঃ| সহজার্শোলক্ষণং চাত্র সঙ্গ্রহে নোক্তং তন্ত্রান্তরাদনুসর্তব্যম্| যদাহ সুশ্রুতঃ– “দুর্দর্শনানি পরুষারুণপাণ্ডুরাণি দারুণান্তর্মুখানি চ, তৈরুপদ্রুতঃ কৃশোঽল্পভুক্ সিরাসন্ততগাত্রোঽল্পপ্রজঃ ক্ষীণরেতাশ্চ ভবতি, ক্ষামস্বরঃ ক্রোধনোঽল্পাগ্নির্ঘ্রাণশিরোক্ষিশ্রবণরোগী সন্ততমন্ত্রকূজাটোপহৃদযোপলেপারোচকপ্রভৃতিভিঃ পীড্যতে” ইতি সহজানাং লক্ষণম্ ||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বং নিদানমুক্তং, সম্প্রতি বাতাদিভেদেনার্শসাং লক্ষণান্যুচ্যন্তে, তত্র প্রথমং বাতার্শোলক্ষণমাহ– গুদেত্যাদি| গুদাঙ্কুরা গুদে অঙ্কুরাকারাঃ মাংসপ্ররোহাঃ, ত এব অর্শাংসি| বহ্বনিলা বাতোল্বণাঃ| শুষ্কাঃ স্রাবরহিতাঃ| চিমচিমা বেদনাবিশেষঃ| ম্লানা অনুপচিতাঃ| স্তব্ধাঃ কাঠিন্যাত্| বিশদা অপিচ্ছিলাঃ, ধূলিস্পর্শবত্| পরুষাঃ কর্কশাঃ, গোজিহ্বাস্পর্শবত্| খরাঃ কর্কোটফলবত্ সূক্ষ্মানেককণ্টকাচিতাঃ| এষু বিকল্পেষু বক্ষ্যমাণং কেচিদিতি পদং সম্বন্ধনীযম্| মিথোবিসদৃশাঃ পরস্পরভিন্নরূপাঃ| বক্রা ধনুঃকাষ্ঠাদিবত্| তীক্ষ্ণাঃ সূক্ষ্মাগ্রাঃ| ফলসন্নিভা ইতি বিম্ব্যাদিভিঃ সম্বধ্যতে, বিম্ব্যাদিসন্নিভত্বং চাকৃত্যা জ্ঞেযম্| বিম্বী ওষ্ঠোপমফলা ‘তেলাকুচা’ ইতি লোকে খ্যাতা, কার্পাসী বনকার্পাসী, কদম্বপুষ্পাভাঃ স্থূলা অনেকসূক্ষ্মশিখরাঃ| সিদ্ধার্থকোপমাঃ সূক্ষ্মপিডকারূপাঃ| হৃদযং গৃহীতমিবেতি বেদনা হৃদ্গ্রহঃ| গ্রথিতং গ্রন্থিলং পাষাণবত্| রুক্ শূলম্| পিচ্ছা পিচ্ছিলো দ্রবভাগঃ| উপবেশ্যতে বর্চস্ত্যাজ্যতে| কৃষ্ণশব্দস্ত্বগাদিভিঃ বক্ত্রান্তৈঃ প্রত্যেকং সম্বধ্যতে| অস্যোপদ্রবমাহ– গুল্মেত্যাদি| অষ্ঠীলা বাতরোগবিশেষঃ||১০-১৫||

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বং নিদানমুক্তং, সম্প্রতি বাতাদিভেদেনার্শসাং লক্ষণমাহ– গুদাঙ্কুরা ইত্যাদি| বহ্বনিলাঃ বাতোল্বণাঃ| গুদাঙ্কুরাঃ গুদেঽঙ্কুরাঃ মাংসপ্ররোহাঃ অর্শাংসি| শুষ্কাঃ স্রাবরহিতাঃ| চিমিচিমা বেদনাবিশেষস্তেনান্বিতাঃ; সর্ষপকল্কলিপ্তা ইবেতি যাবত্| ম্লানা অনুপচিতাঃ| শ্যাবারুণা বর্ণতঃ| স্তব্ধাঃ কঠিনাঃ কীলবত্| বিশদা অপিচ্ছিলাঃ ধূলীস্পর্শবত্| বিষমা ইতি পাঠে বিষমা নিম্নোন্নতাঃ| পরুষাঃ কর্কশাঃ গোজিহ্বাস্পর্শবত্| খরাঃ কর্কোটকফলবত্ সূক্ষ্মানেককণ্টকচিতাঃ| এষু বিকল্পে বক্ষ্যমাণং কেচিদিতি পদং সম্বন্ধনীযম্| মিথ ইতি মিথোবিসদৃশাঃ পরস্পরং বিভিন্নরূপাঃ| বক্রা ধনুর্বত্কুটিলাঃ| তীক্ষ্ণা দর্ভাঙ্কুরবত্সূক্ষ্মাগ্রাঃ| বিস্ফুটিতাননাঃ কেসরাদিবদাননং যেষাং তেষাং বিদীর্ণমুখা ইত্যর্থঃ| বিম্বাদিফলবত্ সদৃশত্বমাকৃত্যা, বিম্বী ওষ্ঠোপমফলা, কর্কন্ধুঃ কোলবদরী, কার্পাসী বনকার্পাসী| কেচিদিতি কেচিত্কদম্বপুষ্পাভাঃ স্থূলাঃ, কেচিত্সিদ্ধার্থকোপমাঃ সর্ষপবত্সূক্ষ্মাঃ| শিরঃপ্রভৃতীনামভ্যধিকব্যথা অতিবেদনা| ক্ষবথ্বিতি ক্ষবথুঃ ছিক্কা| বিষ্টম্ভো মলস্য তৃড্গ্রহঃ| হৃদ্গ্রহঃ হৃদযং গৃহীতমিবেতি বেদনা হৃদ্গ্রহঃ| তৈরিতি তৈর্গুদাঙ্কুরৈরর্শোভিঃ পীডিতঃ পুরুষঃ গ্রথিলং গ্রথিতং পাষাণবত্, স্তোকমল্পং, সপ্রবাহিকং বাতপ্রবাহিকালক্ষণোপেতং; রুক্ শূলং, পিচ্ছা পিচ্ছিলো দ্রবভাগস্তেনানুগতম্, ঈদৃগ্বর্চঃ উপবেশ্যতে ত্যাজ্যতে, গুদেনেতি শেষঃ| কৃষ্ণশব্দস্ত্বগাদিভির্বক্ত্রান্তৈঃ প্রত্যেকং সম্বধ্যতে| অস্যোপদ্রবমাহ– গুল্মেত্যাদি| ততো বাতার্শোভ্য উপদ্রবরূপাণামেষাং সম্ভব উত্পত্তিঃ| অষ্ঠীলা নাভেরধোভাগে পাষাণপিণ্ডিকাবদ্বাতরোগবিশেষঃ||১০-১৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তার্শোলক্ষণমাহ– পিত্তোত্তরা ইত্যাদি| নীলমুখা নীলাগ্রাঃ| তন্বস্রং তন্বস্রং তনু অঘনম্, অস্রং রক্তং স্রবন্তীতি তন্বস্রস্রাবিণঃ| বিস্রাঃ আমগন্ধিনঃ| তনবঃ স্বল্পাঃ| মৃদবঃ কোমলাঃ| শ্লথাঃ লম্বনশীলাঃ| যবমধ্যাঃ যববন্মধ্যে স্থূলাঃ| হরিত্ হরিত্পত্রবর্ণং, পীতং হরিতালাভং, হারিদ্রং হরিদ্রাবর্ণম্; আদিশব্দাদ্বিণ্মূত্রনেত্রবক্ত্রাণাং গ্রহণম্||১৬-১৮||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকান্যাহ– পিত্তোত্তরা ইত্যাদি| পিত্তোত্তরাঃ পিত্তোল্বণা গুদাঙ্কুরা ঈদৃশা জ্ঞেযাঃ| নীলমুখাঃ নীলাগ্রাঃ| তনু অঘনমস্রং রক্তং স্রবন্তীতি তন্বস্রস্রাবিণঃ, বিস্রাঃ বিস্রগন্ধিনঃ, তনবঃ স্বল্পাঃ, মৃদবঃ কোমলাঃ অন্যে ‘মৃদুলম্বিন’ ইতি পঠন্তি, তত্র লম্বিনো লম্বনশীলাঃ| আকৃত্যা চ শুকজিহ্বাযকৃত্খণ্ডজলৌকোমুখসন্নিভাঃ সদৃশাঃ| উপদ্রবানাহ– দাহেত্যাদি| দাহাদিমোহান্তোপদ্রবদাযিনঃ| সোষ্মাণঃ উষ্ণস্পর্শাঃ| দ্রবং নীলং উষ্ণং পীতরক্তম্, আমমপক্বং বর্চঃ উপবেশযন্তি| যবমধ্যেতি যববত্ মধ্যে স্থূলাঃ প্রান্তে সূক্ষ্মাঃ| হরিতং হরিতপত্রবর্ণং, পীতং হরিতালাভং, হারিদ্রবর্ণং তদ্বত্ ত্বগাদি যেষাং তে| এবমাদিশব্দাচ্চ চক্ষুর্নেত্রাদযো গৃহ্যন্তে||১৬-১৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লেষ্মার্শোলক্ষণমাহ– শ্লেষ্মোল্বণে ইত্যাদি| অত্র ‘গুদাঙ্কুরা’ ইত্যনুবর্ততে| মহামূলা দূরবাস্ত্ববগাহিনঃ| ঘনা নিবিডাবযবাঃ| উত্সন্না দৈর্ঘ্যেণোদ্গতাঃ, উপচিতাঃ পরিণাহেন স্থূলাঃ, স্তব্ধা অনম্রাঃ, বৃত্তাঃ পরিণাহেন বর্তুলাঃ, গুরবো গুরুদ্রব্যাক্রান্তমিব গুদং কুর্বতে, স্থিরা অচঞ্চলাঃ| শ্লক্ষ্ণা মণিবন্মসৃণাঃ| কণ্ড্বাঢ্যাঃ কণ্ডূবহুলাঃ; কণ্ডূব্যপগমার্থং স্পৃশ্যমানাঃ প্রীণযন্ত্যর্শসমিতি স্পর্শনপ্রিযাঃ| করীরো মরুজদ্রুমঃ, পনসঃ কণ্টকিফলং, তযোরস্থ্যাভাঃ, অথবা করীরো বংশাঙ্কুরঃ; তেন করীরাভাঃ, পনসাস্থ্যাভাশ্চেত্যর্থঃ| তথা গোস্তনসন্নিভাঃ গোস্তনসদৃশা ইত্যর্থঃ| বঙ্ক্ষণৌ আনাহিতুমাবদ্ধুমিব শীলং যেষাং তে তথা; গুদপ্রত্যাসত্ত্যা বঙ্ক্ষণযোঃ প্রেরণাদ্যসামর্থ্যকারিণ ইত্যর্থঃ| পাযুবস্তিনাভিবিকর্ষিণ ইতি পায্বাদিষ্বাকর্ষবত্পীডাকারিণঃ| প্রসেকো মুখস্য গুদস্য বা; কৃচ্ছ্রং মূত্রকৃচ্ছ্রং, শিরোজাড্যং শিরঃস্তিমিততা, শিশিরজ্বরকারিণঃ শীতজ্বরকারিণঃ| ক্লৈব্যং স্ত্রীষ্বনুত্সাহঃ, অগ্নিমার্দবং বহ্নিমান্দ্যং, ছর্দির্বমিঃ| আমপ্রাযবিকারদাঃ আমবহুলা যে রোগাঃ অতীসারগ্রহণ্যাদযস্তত্প্রদাঃ| প্রাযস্থানে ‘প্রাজ্য’ ইতি পাঠান্তরে স এবার্থঃ; প্রাযপ্রাজ্যশব্দযোঃ প্রচুরার্থত্বাত্| বসাভং চ সকফং চ প্রাজ্যং চ পুরীষং যেষাং তে তথা| ন স্রবন্তি ‘ক্লেদরক্তাদিকম্’ ইতি শেষঃ| ন ভিদ্যন্তে গাঢবিট্কপ্রপীডিতা অপি ন বিদীর্যন্ত ইতি||১৯-২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লৈষ্মিকান্যাহ– শ্লেষ্মোল্বণা ইত্যাদি| অত্রাদৌ গুদাঙ্কুরা ইত্যনুবর্ততে| মহামূলা দূরধাত্ববগাহনাঃ| ঘনা নিবিডাবযবাঃ| মন্দরুজঃ স্বল্পপীডাঃ| সিতাঃ শুক্লবর্ণাঃ| উত্সন্না দৈর্ঘ্যেণোদ্গতাঃ| উচ্ছূনা ইতি পাঠে শ্বযথুমন্তঃ| পরিণাহেন স্থূলাঃ, স্তব্ধাঃ অনম্রাঃ| বৃত্তাঃ পরিণাহেন বর্তুলাঃ| গুরবঃ গুরুদ্রব্যাক্রান্তমিব গুদং কুর্বতে| স্থিরা নিশ্চলাঃ| পিচ্ছিলা অবিশদাঃ| স্তিমিতা মন্দাঃ| শ্লক্ষ্ণা মণিবন্মসৃণাঃ| কণ্ড্বাঢ্যাঃ কণ্ডূবহুলাঃ| কণ্ডূব্যপগমার্থমুপস্পৃশ্যমানাঃ প্রীণযন্ত্যর্শসমিতি স্পর্শনপ্রিযাঃ| আকৃত্যা তু করীরো মরুদেশোদ্ভবো দ্রুমঃ, পনসঃ কণ্টকিফলং, তযোরস্থিবদাভাঃ| অথবা করীরো বংশাঙ্কুরঃ, তেন করীরাভাঃ, পনসাস্থ্যাভাশ্চেত্যর্থঃ| তথা গোস্তনসন্নিভাস্তত্সদৃশাঃ| বঙ্ক্ষণাবানাহিতুমাবদ্ধুমিব শীলং যেষাং তে তথা| গুদপ্রত্যাসত্ত্যা বঙ্ক্ষণযোঃ প্রেরণাদ্যসামর্থ্যকারিণঃ| পাযুবস্তিনাভিবিকর্ষিণঃ পায্বাদিষু আকর্ষণবত্ পীডাকারিণঃ| বস্তিঃ মূত্রকোশঃ| উপদ্রবানাহ– কাসেত্যাদি| হৃল্লাসঃ উপস্থিতবমনমিব, প্রসেকো মুখস্য গুদস্য বা| কৃচ্ছ্রং মূত্রকৃচ্ছ্রং, শিরোজাড্যং শিরস্তিমিততা, শিশিরজ্বরকারিণঃ শীতজ্বরকারিণঃ| ক্লৈব্যং স্ত্রীষ্বনুত্সাহঃ| আমপ্রাযবিকারদাঃ আমবহুলা যে রোগা অতীসারগ্রহণ্যাদযস্তত্প্রদাঃ| প্রাযঃস্থানে ‘প্রাজ্য’ ইতি পাঠে স এবার্থঃ, প্রাযঃ প্রাজ্যশব্দযোঃ প্রচুরার্থত্বাত্| বসাভং চ, সকফং, প্রাজ্যং প্রভূতং পুরীষং যেষাং তে তথা| সপ্রবাহিকাঃ শ্লৈষ্মিকপ্রবাহযুক্তাঃ| ন স্রবন্তি ক্লেদরক্তাদিকমিতি শেষঃ| ন ভিদ্যন্তে গাঢবিট্কনিপীডিতা অপি ন বিদীর্যন্ত ইতি| পাণ্ডুস্নিগ্ধাস্ত্বগাদযঃ ত্বঙ্নখনযনবদনানি যত্র পুরুষাণাং ভবন্তি||১৯-২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্নিপাতার্শসঃ সহজার্শসশ্চ লক্ষণমাহ– সর্বৈরিত্যাদি| সর্বৈর্বাতজাদ্যর্শোভবৈর্লক্ষণৈঃ, সর্বাত্মকানি ত্রিদোষজানি; তথা তৈরেব লক্ষণৈঃ সহজান্যপ্যাহুঃ, তেষামপি ত্রিদোষজত্বাত্||–

আতঙ্কদর্পণ ব্যাখ্যা (বাচস্পতি বৈদ্য কৃত)

সন্নিপাতার্শসঃ সহজার্শসশ্চ লক্ষণমাহ– সর্বৈরিত্যাদি| সর্বৈর্বাতজাদ্যর্শোভবৈর্লক্ষণৈঃ সর্বাত্মকানি ত্রিদোষজানি তথা তৈরেব লক্ষণৈঃ সহজান্যপ্যাহুঃ, তেষামপি ত্রিদোষজত্বাত্||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তার্শোলক্ষণমাহ– রক্তোল্বণা ইত্যাদি| গুদেকীলাঃ কীলবত্ কীলাঃ অর্শাংসি, “হলদন্তাত্ সপ্তম্যাঃ সঞ্জ্ঞাযাম্” (পা. অ. ৬ পা. ৩ সূ. ১) ইত্যলুক্সমাসঃ| পিত্তাকৃতিসমন্বিতাঃ পৈত্তিকার্শোলক্ষণযুক্তাঃ| বিদ্রুমসন্নিভাঃ প্রবালমণিবল্লোহিতা ইত্যর্থঃ| তে গাঢবিট্কপ্রপীডিতাঃ কঠিনপুরীষযন্ত্রিতাঃ, দুষ্টম্ আবিলম্, উষ্ণং চ রক্তং স্রবন্তি| তস্যেতি রক্তস্য, অতিপ্রবৃত্তিতঃ অতিক্ষযাত্, ভেকাভঃ প্রাবৃষেণ্যবর্ষাভ্বাভঃ পীতচ্ছবিঃ, ‘পুরুষঃ’ ইতি শেষঃ| দুঃখৈঃ রোগৈঃ| শোণিতক্ষযসম্ভবৈরিতি ত্বক্পারুষ্যাম্লশীতপ্রার্থনাসিরাশৈথিল্যৈঃ (সু. সূ. অ. ১৫) সুশ্রুতোক্তৈঃ| বলং স্থৌল্যম্, উত্সাহো হর্ষঃ| হতৌজা হতশক্তিঃ| কলুষেন্দ্রিয আবিলচক্ষুঃ, ব্যাকুলসর্বেন্দ্রিযো বা| বিট্ শ্যাবমিতি বিট্শব্দো নপুংসকোঽপ্যস্তি, এতন্নির্দেশাদেব| কাশ্মীরাস্তু চরকে– “বিট্ শ্যাবা কঠিনা রূক্ষা” ইত্যেব পঠন্তি| অধোবাযুর্ন বর্ততে গুদেন, প্রতিলোমগত্বাত্||২৪-২৭||

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তজান্যাহ– রক্তোল্বণা ইত্যাদি| গুদেকীলাঃ কীলবত্ কীলা অর্শাংসি, তেষাং লক্ষণমীদৃশম্– পিত্তাকৃতিসমন্বিতাঃ পৈত্তিকার্শোলক্ষণযুক্তাঃ| আকৃত্যা চ গুঞ্জা রক্তগুঞ্জা, বিদ্রুমঃ প্রবালমণিস্তত্সদৃশলোহিতা ইত্যর্থঃ| তে গাঢবিট্কপ্রপীডিতাঃ কঠিনপুরীষযন্ত্রিতাঃ| অতিশযেন দুষ্টং রক্তমুষ্ণং চ স্রবন্তি| সহসা অকস্মাত্| তস্যেতি রক্তস্যাতিপ্রবৃত্তিতঃ প্রবর্তনাদ্ভেকাভঃ প্রাবৃষেণ্যবর্ষাভ্বাভঃ পীতচ্ছবিঃ পুরুষঃ| দুঃখৈঃ রোগৈঃ, শোণিতক্ষযসম্ভবৈরিতি শোণিতক্ষযে ত্বক্পারুষ্যাম্লশীতপ্রার্থনাসিরাশৈথিল্যৈঃ সুশ্রুতোক্তৈঃ| বলং স্থৌল্যম্| উত্সাহো হর্ষঃ| হতৌজা হতশক্তিঃ, কলুষেন্দ্রিযো ব্যাকুলসর্বেন্দ্রিযঃ| অধোবাযুর্ন প্রবর্ততে গুদেন, প্রতিলোমত্বাত্||২৪-২৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইদানীং তস্যৈব রক্তার্শসো নিদানস্য রক্তস্য বাতাদিভেদেন লক্ষণমাহ– তন্বিত্যাদি| তত্রানুবন্ধো বাতস্যেতি বাতাদিদুষ্টস্যৈব রক্তস্যারম্ভকত্বান্নতু কেবলস্য, দোষত্বাভাবাত্| শিথিলমিত্যাদিনা কফানুবন্ধস্য| ননু, পিত্তানুবন্ধঃ কুতো নোক্ত ইতি? উচ্যতে, রক্তপিত্তযোঃ প্রাযঃ সমানলিঙ্গত্বাত্| উক্তং চ পূর্বং “রক্তোল্বণা গুদেকীলাঃ পিত্তাকৃতিসমন্বিতাঃ|” ইতি||২৮-৩০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীমস্যৈব রক্তার্শোনিদানস্য বাতাদিভেদেন লক্ষণমাহ– তন্বিত্যাদি| রক্তোল্বণানামর্শসামসৃগ্যদীদৃশং ভবতি– তনু অল্পং, কট্যাদিষু শূলম্, অধিকং চ দৌর্বল্যং, তত্র রক্তার্শসি বাতস্যানুবন্ধো জ্ঞেযঃ| যদি চ রূক্ষণং রূক্ষদ্রব্যাদি হেতুঃ কারণম্| শ্লেষ্মানুবন্ধলক্ষণমাহ– রক্তোল্বণানামর্শসাং যদি শিথিলং শ্বেতপীতং চ বিট্ প্রবর্ততে, যদি চ স্নিগ্ধং গুরু শীতলং তন্তুমত্পাণ্ডু পিচ্ছিলং চ অসৃক্প্রবর্ততে, তন্তুমত্সূত্রাকারং, গুদমপি পিচ্ছিলার্দ্রস্তিমিতং নিশ্চলং ভবতি, তস্মিন্ রক্তার্শসি শ্লেষ্মানুবন্ধো বিজ্ঞেযঃ| গুরু স্নিগ্ধং চ তত্র কারণং হেতুঃ| ননু পিত্তানুবন্ধঃ কুতো নোক্তঃ ইতি তত্ উচ্যতে, রক্তপিত্তযোঃ প্রাযঃ সমানলিঙ্গত্বাত্| পূর্বমুক্তং চ ``রক্তোল্বণা গুদেকীলাঃ পিত্তাকৃতিসমন্বিতাঃ'' ইতি||২৮-৩০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– বিষ্টম্ভ ইত্যাদি| বিষ্টম্ভোঽন্নস্যেতি বিষ্টভ্যান্নস্যাজীর্ণতাগমনম্ আহারো বা বা বিষ্টব্ধঃ আমাশয এবাবতিষ্ঠতে, বাতবৈগুণ্যাত্| দৌর্বল্যং হীনশক্তিতা| ‘বিষ্টম্ভোঽঙ্গস্য’ ইতি পাঠান্তরে বিষ্টম্ভো মলস্য, অঙ্গস্য দৌর্বল্যম্| যদ্যপি নিদানানন্তরং পূর্বরূপং বক্তব্যং ভবতি, তথাঽপি নিদানলক্ষণানন্তরমত্র পূর্বরূপং; নিদানলিঙ্গযোশ্চিকিত্সাঙ্গতমত্বপ্রতিপাদনার্থং তযোঃ পূর্বমভিধানম্; অথবাঽবশ্যবক্তব্যানাং কামচারাদভিধানমিতি| এবমন্যত্রাপি ব্যতিক্রমে দ্রষ্টব্যম্| কুক্ষেরাটোপো ‘গুডগুডাশব্দঃ’ ইতি চক্রঃ, ‘তনতনী’ ইতি গুণাকরঃ; ‘রুজাপূর্বকঃ ক্ষোভঃ’ ইতি গদাধরঃ, পুরীষবৃদ্ধিলক্ষণে চ ‘আটোপম্ আধ্মানম্’ ইতি বিবৃতবান্; এতচ্চ ন সর্বত্র, গুল্মপূর্বরূপে আটোপাধ্মানযোরুভযোরপি পাঠাত্| উদ্গারবাহুল্যমধোনিরুদ্ধস্য বাযোরূর্ধ্বগমনাত্| সক্থিসাদো জঙ্ঘাবসাদঃ| গ্রহণীদোষপাণ্ড্বর্তেঃ গ্রহণীদোষযুক্তপাণ্ডুরোগস্য উদরস্য চাশঙ্কা, তেষাং লক্ষণদর্শনাত্| ‘গ্রহণীদোষপাণ্ড্বর্তিঃ’ ইতি পাঠান্তরে গ্রহণীদোষস্য পাণ্ডোঃ পাণ্ডুরোগস্য চার্তিঃ পীডা স্যাত্| অভিবৃদ্ধযে উত্পত্ত্যর্থমিতি||৩১-৩২||

আতঙ্কদর্পণ ব্যাখ্যা (বাচস্পতি বৈদ্য কৃত)

বিষ্টম্ভোঽন্নস্যেত্যাদি| বিষ্টম্ভোঽন্নস্য অজীর্ণতাগমনম্, আহারো বা বিষ্টব্ধ আমাশয এবাবতিষ্ঠতে, বাতবৈগুণ্যাত্| দৌর্বল্যং হীনশক্তিতা| বিষ্টম্ভোঽঙ্গস্যেতি পাঠান্তরে বিষ্টম্ভো মলস্য, অঙ্গস্য দৌর্বল্যম্| কুক্ষেরাটোপঃ গুডগুডাশব্দ ইতি চক্রঃ, তলতল ইতি গুণাকরঃ, রুজাপূর্বকঃ ক্ষোভ ইতি গদাধরঃ, পুরীষবৃদ্ধিলক্ষণে আটোপঃ আধ্মানমিতি মাধবঃ| উদ্গারবাহুল্যং অধোনিরুদ্ধস্য বাযোরূর্ধ্বগতত্বাত্| সক্থিসাদো জঙ্ঘাবসাদঃ, অল্পবিট্কতা অল্পপুরীষত্বম্| গ্রহণীরোগপাণ্ড্বর্তেরাশঙ্কেতি গ্রহণীরোগযুক্তস্য পাণ্ডুরোগোদরস্য চাশঙ্কা, এতেষাং লক্ষণদর্শনাত্| গ্রহণীরোগপাণ্ড্বর্তিরিতি পাঠান্তরে গ্রহণীরোগস্য পাণ্ডোঃ পাণ্ডুরোগস্য চার্তিঃ পীডা স্যাদিতি||৩১-৩২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ননু, গুদদেশদুষ্ট্যা গুদজস্যোত্পাদাত্ কথং সর্বদেহে কৃশত্বকৃষ্ণত্বাদিরূপা দুষ্টিরিত্যত আহ– পঞ্চাত্মেত্যাদি| পঞ্চাত্মা পঞ্চস্বরূপঃ, প্রাণাপানসমানোদানব্যানভেদাত্; ইতি তেষাং স্থানানি| এবং লিঙ্গবিপরিণামাত্ পঞ্চাত্মকত্বং পিত্তেঽপি যোজ্যং, পিত্তং হ্যালোচকরঞ্জকসাধকপাচকভ্রাজকভেদাদ্ভিন্নম্| এবং কফোঽপি পঞ্চাত্মা, হৃদযামাশযজিহ্বাশিরঃসন্ধিষু ক্রমেণাবলম্বকক্লেদকবোধকতর্পকশ্লেষ্মকভেদাত্| যদাহ গৌতমঃ– “শ্লেষ্মা তু পঞ্চবিধোরঃস্থঃ ক্লেদকাদিস্বকর্মণা| কফধাম্নাং চ সর্বেষাং যত্ করোত্যবলম্বনম্|| অতোঽবলম্বকঃ, শ্লেষ্মা যস্ত্বামাশযসংশ্রিতঃ| ক্লেদকঃ সোঽন্নসঙ্ঘাতক্লেদনাদ্, রসবোধনাত্|| বোধকো রসনাস্থস্তু, শিরঃসংস্থোঽক্ষিতর্পণাত্| তর্পকঃ, শ্লেষ্মকঃ সম্যক্ শ্লেষণাত্ সন্ধিষু স্থিতঃ||” ইতি| গুদবলীত্রযস্য চ প্রকোপো বিকৃতত্বং, সন্নিধানস্যাপ্যভাবাত্, বলীদুষ্টেরপ্রাপ্তেশ্চ| সর্ব এবেতি উক্তমারুতাদয এবেতি| তস্মাদিত্যাদি| বহুব্যাধিকরাণীতি জঠরাগ্নিমান্দ্যাদ্যুপদ্রবকরাণি| প্রাযঃ কৃচ্ছ্রতমানীতি প্রাযোগ্রহণাদসাধ্যানি সুখসাধ্যান্যপি||৩৩-৩৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ননু, গুদদেশদুষ্ট্যা গুদজস্যোত্পাদাত্ কথং সর্বদেহে কৃশত্বাদিরূপা দুষ্টিরিত্যাহ– পঞ্চাত্মেত্যাদি| গুদজানাং সমুদ্ভবে সম্ভবে এতে সর্ব এবোক্তস্বরূপা বাতাদযঃ প্রকুপ্যন্তি| পঞ্চাত্মা পঞ্চস্বরূপঃ, প্রাণাপানসমানোদানব্যানভেদাত্| তেষাং স্থানানি– “হৃদি প্রাণো গুদেঽপানঃ সমানো নাভিসংস্থিতঃ| উদানঃ কণ্ঠদেশে চ ব্যানঃ সর্বশরীরগঃ”ইতি| এবং পঞ্চাত্মা বাযুঃ কথ্যতে “যোঽনিলো বক্ত্রসঞ্চারী স প্রাণো নাম দেহধৃক্| সোঽন্নং প্রবেশযত্যন্তঃ প্রাণাংশ্চৈবাবলম্বতে|| কুপিতঃ কুরুতে চাপি হিক্কাশ্বাসাদিকান্ গদান্| উদানো নাম যস্তূর্ধ্বমুপৈতি পবনোত্তমঃ|| তেন ভাষিতগীতাদিবিশেষশ্চাভিবর্ততে| ঊর্ধ্বজত্রুগতান্ রোগান্ করোতি কুপিতশ্চ সঃ|| আমপক্বাশযচরঃ সমানোঽগ্নিসহাযবান্| অন্নং পচতি তজ্জাংশ্চ বিকারান্ প্রব্যনক্তি সঃ|| গুল্মাগ্নিসাদাতীসারান্প্রদুষ্টশ্চ করোতি সঃ| পক্বাশযাশ্রযোঽপানঃ কালে কর্ষতি চাপ্যধঃ| বাতমূত্রপুরীষাণি শুক্রগর্ভার্তবানি চ| ক্রুদ্ঘশ্চ কুরুতে রোগান্ ঘোরান্বস্তিগুদাশ্রযান্|| সর্বদেহসরো ব্যানো রসসংবাহনোদ্যতঃ| স্বেদাসৃক্স্রাবণশ্চাপি পঞ্চধা চেষ্টযত্যপি|| ক্রুদ্ধশ্চ কুরুতে রোগান্ প্রাযশঃ সর্বদেহগান্| শুক্রদোষাঃ প্রমেহাশ্চ ব্যানাপানপ্রকোপজাঃ|| যুগপত্ কুপিতাশ্চামী দেহং ভিন্দ্যুরসংশযম্”ইতি| পঞ্চাত্মা বাযুঃ ‘রজোগুণমযঃ সূক্ষ্মঃ শীতো রূক্ষো লঘুশ্চলঃ’ ইতি| এবং পঞ্চাত্মকত্বং পিত্তে যোজ্যম্, আলোচকরঞ্জকসাধকপাচকভ্রাজকভেদাত্;”পাচকং ভ্রাজকং চৈব রঞ্জকালোচকে তথা| সাধকং চেতি পঞ্চৈব পিত্তনামান্যনুক্রমাত্|| স্বাশযে পাচকং পিত্তমগ্নিরূপং তিলোন্মিতম্| ভ্রাজকং কান্তিদং যত্তু লেপাভ্যঙ্গাদিপাচকম্|| রঞ্জকং তু যকৃত্প্লীহোস্তদ্রসং শোণিতং ব্রজেত্| আলোচকং স্থিতং নেত্রে রূপদর্শনকারি তত্|| সাধকং হৃদযে তিষ্ঠেন্মেধাপ্রজ্ঞাকরং চ তত্| পিত্তমুষ্ণং দ্রবং পীতং নীলং সত্ত্বগুণোত্তরম্|| কটুতিক্তরসং জ্ঞেযং বিদগ্ধং চাম্লতাং ব্রজেত্” ইতি| তেষাং স্থানানি আলোচকং নেত্রযোঃ, রঞ্জকং যকৃত্প্লীহ্নোঃ, সাধকং হৃদি, পাচকং পক্বামাশযযোর্মধ্যে, ভ্রাজকং ত্বচি| এবং কফোঽপি পঞ্চাত্মা, আলম্বকক্লেদকবোধকতর্পকশ্লেষ্মকভেদাত্| তেষাং স্থানানি| যদাহ গৌতমঃ– “শ্লেষ্মা পঞ্চবিধস্তত্র ত্রিকসংস্থঃ স্ববীর্যতঃ| হৃদযস্থঃ স্ববীর্যাচ্চ তত এবাম্বুকর্মণা|| কফধাম্নামশেষাণাং যত্করোত্যবলম্বনম্| অতোঽবলম্বকঃ শ্লেষ্মা যস্ত্বামাশযসংস্থিতঃ|| ক্লেদকঃ সোঽন্নসঙ্ঘাতক্লেদনাদ্রসবোধনাত্| বোধকো রসনাস্যস্তু শিরঃসংস্থোঽক্ষিতর্পণাত্|| তর্পকঃ শ্লেষ্মকঃ সন্ধেঃ শ্লেষণাত্সন্ধিসংস্থিতঃ| উরঃকণ্ঠঃশিরঃসন্ধিপর্বাণ্যামাশযো রসঃ| মেদো ঘ্রাণং চ জিহ্বা চ কফস্থানমুরো ভৃশম্”ইতি| এবং দোষত্রযাণাং পঞ্চাত্মকত্বং সিদ্ধম্| পঞ্চাত্মানো দোষাস্ত্রযঃ গুদবলিত্রযং চ গুদজানাং সমুদ্ভবে সর্ব এব প্রকুপ্যন্তি, গুদবলিত্রযস্য প্রকোপো বিকৃতত্বং প্রবহণাদিস্বকার্যাকর্তৃত্বম্| অন্যে তু গুদবলীত্রয ইতি পঠন্তি ব্যাখ্যানযন্তি চ– সর্বে দোষা গুদবলীত্রযে কুপ্যন্তি| তন্নাতিযুক্তং, প্রাণোদানযোস্তত্রাসন্নিধানাত্| অন্যে ব্যাখ্যানযন্তি– গুদবলীত্রযে গুদজানাং সমুদ্ভবে উত্পত্তৌ সতি সর্ব এব দোষাঃ প্রকুপ্যন্তীতি| তস্মাদর্শাংসি দুঃখপ্রদানি বহুব্যাধিকরাণি জঠরাগ্নিমান্দ্যাদ্যুপদ্রবকরাণি| অতঃ সর্বশরীরতাপীনি| প্রাযঃ কৃচ্ছ্রতমানীতি প্রাযোগ্রহণাদসাধ্যানি| সুশ্রুতস্তু– “সর্বাঃ স্যুর্বলযো যেষাং দুর্নামভিরুপদ্রুতাঃ| তাভিস্তু প্রহিতো বাযুরপানঃ সন্নিবর্ততে|| ততো ব্যানেন সঙ্গম্য জ্যোতির্গৃহ্ণাতি দেহিনাম্|” ইতি||৩৩-৩৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উক্তবাতাদ্যর্শসাং সাধ্যত্বাদিকমাহ– বাহ্যাযামিত্যাদি| ন চিরোত্পতিতানীতি অনতিক্রান্তসংবত্সরাণি| পরিসংবত্সরাণীতি পরিগতোঽতিক্রান্তঃ সংবত্সরো যৈস্তানি তথা| যানি তু বাহ্যবলিজাতানি দ্বিদোষোল্বণানি তানি কৃচ্ছ্রাণি, ত্রিদোষজানি যাপ্যানীত্যুক্তম্; এবং দ্বিতীযাযামেকদোষোল্বণানি কৃচ্ছ্রাণি, দ্বিদোষোল্বণানি যাপ্যানি, ত্রিদোষোল্বণান্যসাধ্যানি; এবং তৃতীযাযামেকদোষোল্বণানি যাপ্যানি, শেষাণ্যসাধ্যানি| যদ্যাপ্যং প্রত্যাখ্যেযং বা তদ্দোষবলিভেদেঽপ্যসাধ্যমেব; যদুক্তং চরকেণ– “নাসাধ্যঃ সাধ্যতাং যাতি সাধ্যো যাতি ত্বসাধ্যতাম্|” (চ. নি. অ. ৮) ইতি||৩৫-৩৭||

আতঙ্কদর্পণ ব্যাখ্যা (বাচস্পতি বৈদ্য কৃত)

সুখসাধ্যান্যাহ– বাহ্যাযামিত্যাদি| ন চিরোত্পতিতানীতি অনতিক্রান্তসংবত্সরাণি| কৃচ্ছ্রসাধ্যান্যাহ– দ্বন্দ্বজানি দ্বিতীযাযাং বলৌ যান্যর্শাংসি কৃচ্ছ্রসাধ্যানি তান্যাহুঃ| পরিসংবত্সরাণি চ পরিগতোঽতিক্রান্তঃ সংবত্সরো যৈস্তানি কৃচ্ছ্রসাধ্যানি যাপ্যানীত্যর্থঃ| অসাধ্যান্যাহ– সহজানীত্যাদি| যানি সহজানি তান্যসাধ্যানি, তথা ত্রিদোষজান্যুত্তরকালজান্যপি, যান্যভ্যন্তরং বলিং সংশ্রিত্য জাযন্ত” ইত্যন্বযঃ| তত্রাপি বিশেষঃ কথ্যতে– যানি তু বাহ্যবলিজাতানি দ্বিদোষোল্বণানি তানি কৃচ্ছ্রাণি, ত্রিদোষাণি যাপ্যানীত্যুক্তম্; এবং দ্বিতীযাযামেকদোষোল্বণানি কৃচ্ছ্রাণি ত্রিদোষোল্বণানি অসাধ্যানি; এবং তৃতীযাযাং একদোষোল্বণানি যাপ্যানি শেষাণ্যসাধ্যানি||৩৫-৩৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যো হি দ্বিবিধো যাপ্যপ্রত্যাখ্যেযভেদাত্, তত্র যদ্যাযুঃশেষোঽস্তি চতুষ্পাদসম্পত্তিশ্চ তদা যাপ্যত্বমন্যথা প্রত্যাখ্যেযত্বমিত্যাহ– শেষত্বাদিত্যাদি| চতুষ্পাদসমন্বিতে ‘অর্শোরোগিণি’ ইতি শেষঃ| সমন্বিত ইতি ভাবে ক্তঃ, তেন ‘চতুষ্পাদসমন্বযে সতি’ ইতি চক্রঃ||৩৮||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যস্য যাপ্যপ্রত্যাখ্যেযভেদেন দ্বৈবিধ্যমাহ– শেষত্বাদিত্যাদি| যদ্যাযুষঃ শেষোঽস্তি তদা চতুষ্পাদসমন্বিতে তান্যর্শাংসি যাপ্যন্তে ‘ রোগিণম্’ ইতি শেষঃ| কীদৃশে রোগিণি? দীপ্তকাযাগ্নৌ, পুনঃ কীদৃশে? চতুষ্পাদসমন্বিতে; অতোঽন্যথা বিপরীতানি প্রত্যাখ্যেযানি অসাধ্যানি| পাদচতুষ্টযং যথা– রোগী ভিষক্, পরিচারক ঔষধং চ| যদা রোগী ভিষগ্বাক্যকৃদাঢ্যো জিতেন্দ্রিযঃ, বৈদ্যঃ শাস্ত্রে কর্মণি কুশলো নির্লোভঃ সত্যধর্মপরশ্চ, পরিচারক আপ্তঃ কুলীনোঽনলসঃ আতুরচ্ছন্দানুবর্তী চ, ঔষধং নবং রসবীর্যাদিসম্পন্নং চ| তদুক্তম্– “বৈদ্যো ব্যাধ্যুপসৃষ্টশ্চ ভেষজং পরিচারকঃ| এতে পাদাশ্চিকিত্সাযাঃ কর্মসাধনহেতবঃ| তত্ত্বাধিগতশাস্ত্রার্থো দৃষ্টকর্মা স্বযঙ্কৃতী| লঘুহস্তঃ শুচিঃ শূরঃ সজ্জোপস্কৃতভেষজঃ|| প্রত্যুত্পন্নমতির্ধীমান্ ব্যবসাযী বিশারদঃ| সত্যধর্মপরো যশ্চ স ভিষক্পাদ উচ্যতে|| আযুষ্মান্ সত্ত্ববান্ সাধ্যো দ্রব্যবানাত্মবানপি| উচ্যতে ব্যাধিতঃ পাদো বৈদ্যবাক্যকৃদাস্তিকঃ|| প্রশস্তদেশসম্ভূতং প্রশস্তেঽহনি চোদ্ধৃতম্| অল্পমাত্রং মহাবীর্যং গন্ধবর্ণরসান্বিতম্|| দোষঘ্নমগ্লানিকরমবিকারি বিপর্যযে| সমীক্ষ্য কালে দত্তং চ ভেষজং পাদ উচ্যতে|| স্নিগ্ধোঽজুগুপ্সুর্বলবান্ যুক্তো ব্যাধিতরক্ষণে| বৈদ্যবাক্যকৃদশ্রান্তঃ পাদঃ পরিচরঃ স্মৃতঃ” ইতি| এষা চতুষ্পাদসম্পত্তিঃ সা চাযুষঃ শেষত্বাদ্ঘটতে||৩৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উপদ্রবাদসাধ্যত্বমাহ– হস্তে ইত্যাদি| হস্তপাদাদিশোথো মিলিতোঽসাধ্যলক্ষণম্| অত্র হৃত্পার্শ্বশূলসম্মোহাদি ব্যস্তং সমস্তং বা||৩৯-৪১||

আতঙ্কদর্পণ ব্যাখ্যা (বাচস্পতি বৈদ্য কৃত)

অথোপদ্রবাদসাধ্যত্বমাহ– হস্ত ইত্যাদি| যস্য হস্তপাদাদিষু শ্বযথুঃ স্যাত্ হৃত্পার্শ্বশূলং চ স অর্শসোঽর্শোরোগী অসাধ্যঃ| অসাধ্যস্য লক্ষণমাহ– হৃদিত্যাদি| হৃত্পার্শ্বশূলং সম্মোহশ্চ; তথা হৃত্পার্শ্বাদি সমস্তং ব্যস্তং চ, অঙ্গস্য রুক্ পীডা, গুদমুষ্কযোঃ পাকশ্চ, গুদজানি অর্শাংসি, তং নরং ঘ্নন্তীত্যর্থঃ| রক্তার্শোঽসাধ্যত্বমাহ– তৃষ্ণেত্যাদি| অতিপ্রস্রুতশোণিতং তৃষ্ণারোচকাদ্যুপদ্রবযুক্তং পুরুষমর্শাংসি ক্ষপযন্তি নাশযন্তি, হি পাদপূরণে||৩৯-৪১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অথ মেঢ্রজাদীনাং স্বরূপমাহ– মেঢ্রাদিষ্বিত্যাদি| মেঢ্রাদিষ্বপি বক্ষ্যন্তে যথাস্বমিত্যন্তেন ছেদঃ| তেন ‘নাসার্শ’ ইত্যাদিব্যপদেশঃ| গণ্ডূপদাস্যরূপাণি কিঞ্চুলকমুখসদৃশানি||৪২||

আতঙ্কদর্পণ ব্যাখ্যা (বাচস্পতি বৈদ্য কৃত)

স্থানান্তরেষ্বন্যান্যপ্যর্শাংস্যাহ– মেঢ্রাদিষ্বিত্যাদি| মাংসাঙ্কুরত্বাদেষামর্শসাং ব্যপদেশঃ, সর্ষপাদিষু স্নেহেষু তৈলব্যপদেশবত্| মেঢ্রঃ শেফঃ, আদিশব্দাচ্চক্ষুর্নাসাদীনি| যথাস্বং যথাস্থানম্| নাভিজানি তু গণ্ডূপদাস্যরূপাণি কিঞ্চুলমুখসদৃশানি আকৃত্যেত্যর্থঃ| তানি পিচ্ছিলানি মৃদূনি চ ভবন্তি||৪২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

চর্মকীলসম্প্রাপ্তিমাহ– ব্যান ইত্যাদি| ব্যানো বাযুঃ, “এতচ্চ গুদৌষ্ঠদেশ এব নান্যত্র ইতি কার্তিককুণ্ডাদযঃ”||৪৩||

আতঙ্কদর্পণ ব্যাখ্যা (বাচস্পতি বৈদ্য কৃত)

চর্মকীলসম্প্রাপ্তিমাহ– ব্যান ইত্যাদি| ব্যানো বাযুঃ, কফং গৃহীত্বা সঙ্গৃহ্য, ত্বচো বহিঃ কীলসদৃশমর্শঃ কুর্যাত্, স্থিরং নিশ্চলং, তং চর্মকীলং প্রাহুঃ| ত্বচো বহিরিতি গুদৌষ্ঠং পরিত্যজ্যেত্যর্থঃ, তত্র ত্বর্শসামেব সম্ভবত্বাত্; এতচ্চ গুদোষ্ঠদেশ এব নান্যত্রেতি কার্তিককুণ্ডাদযঃ||৪৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্যৈব বাতাদিভেদেন লক্ষণমাহ– বাতেনেত্যাদি| সবর্ণতা গাত্রসবর্ণতা|৪৪||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যৈব বাতাদিলক্ষণমাহ– বাতেনেত্যাদি| বাতেন তোদঃ পীডাবিশেষঃ, পারুষ্যং পরুষতা; পিত্তাত্ অসিতং কিঞ্চিত্কৃষ্ণং বক্ত্রং চ; শ্লেষ্মণা স্নিগ্ধতা, গ্রন্থিসাদৃশ্যং সবর্ণতা গাত্রসমানবর্ণতা| দোষাঃ প্রকুপিতা মেঢ্রমাংসশোণিতে প্রদূষ্য কণ্ডূঃ কুর্বন্তি, ততঃ কণ্ডূযতাং ক্ষতম্| “তস্মিন্ ক্ষতে প্ররোহাঃ স্যুর্মাংসজা রুধিরস্রবাঃ| বিনাশযন্তি শেফং তে ঘ্নন্তি পুংস্ত্বং চ সত্বরম্” ইতি| শেফো মেঢ্রং, পুংস্ত্বং শুক্রম্| “তথা যোনৌ চ তে দুষ্টা গণ্ডূপদমুখাকৃতীন্|| দুর্গন্ধান্সুকুমারাংশ্চ পিচ্ছিলান্ জনযন্তি হি”ইতি| মাংসাঙ্কুরানিতি শেষঃ| চকারাদ্যোনেরার্তবং চ ঘ্নন্তি| “তৈরেবোর্ধ্বগতৈর্দোষৈঃ কর্ণজার্শস্তু জাযতে| বাধির্যং শূলমত্যুগ্রং সততং কর্ণপূতিতা|| নেত্রজেষু জলস্রাবো বেদনা চাপ্যদর্শনম্| অশ্রূণাং জাযতে বর্ত্মাঽবরোধোঽর্শস্সু সন্ততম্|| ঘ্রাণজেষু প্রতিশ্যাযঃ কৃচ্ছ্রোচ্ছ্বাসঃ শিরোব্যথা| ক্ষবথুঃ পূতিবক্ত্রং চ বাক্যং স্যাদনুনাসিকম্|| মুখার্শস্সু চ কণ্ঠৌষ্ঠতালুমধ্যৈকজন্মসু| স্যাদ্ধি গদ্গদবাক্যত্বং রসাজ্ঞানং মুখামযাঃ||” ইতি||৪৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজরক্ষিতকৃতাযাং মধুকোশব্যাখ্যাযামর্শোনিদানং সমাপ্তম্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবৈদ্যবাচস্পতিকৃতে আতঙ্কদর্পণে রুগ্বিনিশ্চযব্যাখ্যাযামর্শোনিদানম্||৫||