Adhikarana আমবাতস্য নিদানপূর্বিকা সম্প্রাপ্তিঃ (১-৫) · Śloka ৫
অথামবাতনিদানম্ | বিরুদ্ধাহারচেষ্টস্য মন্দাগ্নের্নিশ্চলস্য চ | স্নিগ্ধং ভুক্তবতো হ্যন্নং ব্যাযামং কুর্বতস্তথা ||১|| বাযুনা প্রেরিতো হ্যামঃ শ্লেষ্মস্থানং প্রধাবতি | তেনাত্যর্থং বিদগ্ধোঽসৌ ধমনীঃ প্রতিপদ্যতে ||২|| বাতপিত্তকফৈর্ভূযো দূষিতঃ সোঽন্নজো রসঃ | স্রোতাংস্যভিষ্যন্দযতি নানাবর্ণোঽতিপিচ্ছিলঃ ||৩|| জনযত্যাশু দৌর্বল্যং গৌরবং হৃদযস্য চ | ব্যাধীনামাশ্রযো হ্যেষ আমসঞ্জ্ঞোঽতিদারুণঃ ||৪|| যুগপত্কুপিতাবন্তস্ত্রিকসন্ধিপ্রবেশকৌ | স্তব্ধং চ কুরুতো গাত্রমামবাতঃ স উচ্যতে ||৫||
View original
अथामवातनिदानम् | विरुद्धाहारचेष्टस्य मन्दाग्नेर्निश्चलस्य च | स्निग्धं भुक्तवतो ह्यन्नं व्यायामं कुर्वतस्तथा ||१|| वायुना प्रेरितो ह्यामः श्लेष्मस्थानं प्रधावति | तेनात्यर्थं विदग्धोऽसौ धमनीः प्रतिपद्यते ||२|| वातपित्तकफैर्भूयो दूषितः सोऽन्नजो रसः | स्रोतांस्यभिष्यन्दयति नानावर्णोऽतिपिच्छिलः ||३|| जनयत्याशु दौर्बल्यं गौरवं हृदयस्य च | व्याधीनामाश्रयो ह्येष आमसञ्ज्ञोऽतिदारुणः ||४|| युगपत्कुपितावन्तस्त्रिकसन्धिप्रवेशकौ | स्तब्धं च कुरुतो गात्रमामवातः स उच्यते ||५||
🔊 Audio coming soon
Hide commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
ঊরুস্তম্ভে বাযুঃ সাম ইত্যুক্তম্, অতস্তদনন্তরমামবাতনিদানমাহ– বিরুদ্ধেত্যাদি| বিরুদ্ধাহারঃ সংযোগাদিবিরুদ্ধঃ, বিরুদ্ধা চ চেষ্টা যথা– অজীর্ণে ব্যাযামব্যবাযজলপ্রতরণাদি| স্নিগ্ধং ভুক্তবতো ব্যাযামং কুর্বত ইতি মিলিতো হেতুঃ, ন পৃথক্ত্বেন| শ্লেষ্মস্থানমামাশযসন্ধ্যাদি| তেন বাতেন বিদগ্ধো দূষিতোঽসাবামো ধমনীঃ প্রতিপদ্যতে, ‘ধমনীভিঃ প্রতিপদ্যত’ ইতি পাঠান্তরে শ্লেষ্মস্থানমিতি যোজ্যম্| সোঽন্নজো রস ইতি আমঃ, অন্নরসস্যৈবাপক্বস্য তন্ত্রান্তরে আমব্যপদেশাত্| যদুক্তম্– “ঊষ্মণোঽল্পবলত্বেন ধাতুমাদ্যমপাচিতম্| দুষ্টমামাশযগতং রসমামং প্রচক্ষতে||” (বা. সূ. অ. ১৩) ইত্যাদি| অন্যৈরপ্যুক্তম্– “আমাশযস্থঃ কাযাগ্নের্দৌর্বল্যাদবিপাচিতঃ| আদ্য আহারধাতুর্যঃ স আম ইতি কীর্তিতঃ||” ইতি অপরে ত্বাহুঃ– “অবিপক্বমসংযুক্তং দুর্গন্ধং বহু পিচ্ছিলম্| সদনং সর্বগাত্রাণামাম ইত্যভিধীযতে||” ইতি| অন্যে ত্বাহুঃ– “আহারস্য রসঃ শেষো যো ন পক্বোঽগ্নিলাঘবাত্| স মূলং সর্বরোগাণামাম ইত্যভিধীযতে||” ইতি| তথা চাপরে– “আমমন্নরসং কেচিত্, কেচিত্তু মলসঞ্চযম্| প্রথমাং দোষদুষ্টিং চ কেচিদামং প্রচক্ষতে||” ইতি| নানাবর্ণ ইতি বাতাদিদূষিতত্বাদ্বহুবর্ণঃ| যুগপদিত্যাদি, বাতকফৌ যুগপত্কুপিতাবন্তঃ কোষ্ঠে ত্রিকসন্ধিপ্রবেশকৌ ভবতঃ, অথবা গাত্রং স্তব্ধং কুরুতঃ; ত্রিকসন্ধিষু প্রবেশস্তদ্গতবেদনযা বোধ্যঃ||১-৫||
আতঙ্কদর্পণ ব্যাখ্যা (বাচস্পতি বৈদ্য কৃত)
ঊরুস্তম্ভে বাযুঃ সাম ইত্যুক্তম্, অতস্তদন্তরমামবাতনিদানমাহ– বিরুদ্ধেত্যাদি| বিরুদ্ধাহারচেষ্টস্য তথা মন্দাগ্নেরেবংবিধস্য পুরুষস্য, নিশ্চলস্য ব্যাপাররহিতস্য; বিরুদ্ধাহারঃ ক্ষীরমত্স্যাদিঃ সংযোগাদিবিরুদ্ধঃ; বিরুদ্ধা চেষ্টাঽজীর্ণে ব্যাযামব্যবাযজলপ্রতরণাদিকা| স্নিগ্ধমন্নং ভুক্তবতো ব্যাযামং কুর্বত ইতি মিলিতো হেতুর্ন পৃথক্ত্বেন| আমবাতে বিগতব্যাযামত্বাত্| অন্যে ‘ব্যাযামং বাঽপ্যকুর্বত’ ইত্যাদি পঠন্তি| তন্নাতিযুক্তং, নিশ্চলস্যেত্যনেনৈব লব্ধত্বাত্| শ্লেষ্মস্থানং প্রধাবতীতি শ্লেষ্মস্থানানি আমাশযোরঃশিরঃকণ্ঠসন্ধয ইতি| শ্লেষ্মস্থাননিচিতেন বাতেন বিদগ্ধো দূষিত আমো ধমনীঃ সিরাঃ প্রতিপদ্যতে| ‘ধমনীভিঃ প্রপদ্যতে’ ইতি পাঠান্তরং, তত্র শ্লেষ্মস্থানমিতি যোজ্যম্| অপক্বস্যৈবাম ইতি সঞ্জ্ঞা, অন্নরসস্যৈবাঽপক্বস্য তন্ত্রান্তরে আম ইতি ব্যপদেশাত্| যদুক্তম্– “ঊষ্মণোঽল্পবলত্বেন ধাতুমাদ্যমপাচিতম্| দুষ্টমামাশযগতং রসমামং প্রচক্ষতে|| জঠরানলদৌর্বল্যাদবিপক্বস্তু যো রসঃ| স আমসঞ্জ্ঞকো দেহে সর্বরোগপ্রকোপকঃ||” ইতি| অন্যৈরপ্যুক্তম্– “আমাশযস্থঃ কাযাগ্নের্দৌর্বল্যাদবিপাচিতঃ| আদ্য আহারধাতুর্যঃ স আমঃ পরিকীর্তিতঃ||” ইতি| অন্যত্রাপি– “অবিপক্বমসংযুক্তং দুর্গন্ধং বহু পিচ্ছিলম্| সদনং সর্বগাত্রাণামাম ইত্যভিধীযতে||” ইতি| তথাঽপরে– “অবিপক্বরসং কেচিত্কেচিত্তং মলসঞ্চযম্| প্রথমাং দোষদুষ্টিং বা কেচিদামং প্রচক্ষতে||” ইতি| ত্রিভির্দোষৈরতিশযদূষিতোঽন্নরসঃ স্রোতাংস্যভিষ্যন্দযতি লিম্পতি, অতিপিচ্ছিলত্বাত্| নানাবর্ণ ইতি বাতাদিদূষিতত্বাদ্বহুবর্ণঃ| ততো বহ্নের্মন্দত্বং জনযতি| হৃদযে গৌরবং ভবতি, তস্য স্থানত্বাত্| সর্বেষাং রোগাণামযমেব কারণীভূত আমসঞ্জ্ঞকঃ| তস্যৈব রূপমাহ– যুগপদিতি| যুগপদেকবারমেব কুপিতৌ বাতকফৌ অন্তঃকোষ্ঠে ত্রিকসন্ধিপ্রবেশকৌ ভবতঃ| (ত্রিকে কটিমন্যাশযসন্ধী তত্র, তথা সন্ধিষু প্রবিশ্য) অথবা গাত্রং স্তব্ধং কুরুতঃ, স আমবাতঃ কথ্যতে| ত্রিকসন্ধিপ্রবেশশ্চ তদ্গতবেদনযা বোদ্ধব্যঃ||১-৫||