Adhikarana adhyāyōpakramaḥ · Śloka
🔊 Audio coming soon
sarvāṅgasundarī vyākhyā ( kr̥ta)
asmādanantaraṁ śastrakarmavidhyadhyāyaḥ prastūyatē| yatō'nantarātītē'dhyāyē (ślō. 25)-"śastrēṇa vā viśasyādau" ityuktam| atastasyaiva śastrakarmaṇō vidhānaṁ vaktuṁ yuktamityāha-
Adhikarana śastrakarmavidhiradhyāyaḥ (2) · Śloka 2
athātaḥ śastrakarmavidhimadhyāyaṁ vyākhyāsyāmaḥ| iti ha smāhurātrēyādayō maharṣayaḥ| (gadyasūtrē|2|
अथातः शस्त्रकर्मविधिमध्यायं व्याख़्यास्यामः| इति ह स्माहुरात्रेयादयो महर्षयः| (गद्यसूत्रे|२|
🔊 Audio coming soon
sarvāṅgasundarī vyākhyā ( kr̥ta)
sa0-śastrasya karma śastrakarma,- śastrāvacāraṇakriyā, tasya vidhiḥ-itikartavyatā, śastrakarmavidhiḥ, tam| śēṣaṁ pūrvavat| nanu, yadyayaṁ śastrakarmavidhiḥ, tataḥ śastrakarmagrantha ēvādau nirdēṣṭuṁ yuktaḥ, (ślō. 14)- "prāk śastrakarmaṇaścēṣṭaṁ bhōjayēdannamāturam|" ityādi| na tu "vraṇaḥ sañjāyatē prāyaḥ" ityādi| atrōcyatē| śastrakarmavidhēḥ pūrvaṁ viṣayō nirdiṣṭuṁ yuktaḥ| yataḥ śastrakarmavidhērupāyō'yam, ityasyaiva pūrvamupanyāsō yukta ityāha-
āyurvēdarasāyanam vyākhyā ( kr̥ta)
ā0 ra0- śastrakarmavidhimadhyāyaṁ vyākhyātuṁ pratijānītē-athēti|
Adhikarana śastrakarmaviṣayasya vraṇasyōtpattiḥ vraṇasyōtpattipratibandhaḥ (1-2) · Śloka 2
vraṇaḥ sañjāyatē prāyaḥ pākācchvathupūrvakāt| tamēvōpacarēttasmādrakṣan pākaṁ prayatnataḥ||1|| suśītalēpasēkāsramōkṣasaṁśōdhanādibhiḥ| |2|
व्रणः सञ्जायते प्रायः पाकाच्छ्वथुपूर्वकात्| तमेवोपचरेत्तस्माद्रक्षन् पाकं प्रयत्नतः||१|| सुशीतलेपसेकास्रमोक्षसंशोधनादिभिः| |२|
🔊 Audio coming soon
sarvāṅgasundarī vyākhyā ( kr̥ta)
sa0-prāyō vraṇaḥ pākāt sañjāyatē| kimbhūtāt ? śvayathuḥ pūrvō yasya pākasya sa śvayathupūrvakaḥ, tasmāt| śvayathupākamantarēṇāpi śastrādyabhighātāt vraṇō jāyata iti prāyōgrahaṇam| yasmācchvayāthupūrvakāt pākāt vraṇaḥ sañjāyatē, atastamēva-śvayathuṁ, upacarēt-upakramēt| kiṁ kurvan ? pākaṁ prayatnēna rakṣan| katham ? suśītalēpasēkādibhiḥ| suśītābhyāṁ-sparśatō vīryataśca, lēpasēkābhyām| tathā, raktamōkṣaṇēna| tathā, saṁśōdhanēna-vamanēna virēkēṇa ca| ādigrahaṇāt kaṣāyapānaghr̥tapānādīnāṁ grahaṇam| tasya ca śōphasyāmapacyamānapakvākhyātistisrō'vasthā bhavantītyāha-
āyurvēdarasāyanam vyākhyā ( kr̥ta)
ā0 ra0- śastrakarmaviṣayasya vraṇasyōtpattimāha-vraṇa iti|vraṇasyōtpattipratibandhamāha-tamēvēti| tamēva-śvayathumēva| śastrakarmaṇi bhēṣajavidhānaṁ bhēṣajāsādhyē śastrakarma vidhātavyamiti jñāpanārtham| uktaṁ hi saṅgrahē (sū. a. 38)- "dvividhē'pi hi vyādhāvupāyāpēkṣē nija āgantau vā bhēṣajaviṣayātītē śastrakarma prayujyatē|" iti|
Adhikarana apakvasya śvayathōrlakṣaṇam (2) · Śloka 2
| śōphō'lpō'lpōṣmaruksāmaḥsavarṇaḥ kaṭhinaḥ sthiraḥ||2||
| शोफोऽल्पोऽल्पोष्मरुक्सामःसवर्णः कठिनः स्थिरः||२||
🔊 Audio coming soon
sarvāṅgasundarī vyākhyā ( kr̥ta)
sa0-āmō yaḥ śōphaḥ saḥ pramāṇatō'lpaḥ| tathā, alpōṣmā| tathā, alparuk-alpaśūlaḥ| tathā, savarṇaḥ-tvaksamānavarṇaḥ| tathā, kaṭhinō-na mr̥duḥ, pakvavat| tathā, sthirō-na pakvavaccalaḥ| sa āmaḥ sāma iti "sō'ci lōpē cētpādapūraṇam" iti sulōpaḥ|
āyurvēdarasāyanam vyākhyā ( kr̥ta)
ā0 ra0- apakvasya śvayathōrlakṣaṇamāha-śōfa iti| āmaḥ-apakvaḥ| ūṣmā-auṣṇyam| rūk-śūlam| sthiraḥ-śanairvardhamānaḥ|
Adhikarana pacyamānasya lakṣaṇam (3-4) · Śloka 4
pacyamānō vivarṇastu rāgī bastirivātataḥ| sphuṭatīva sanistōdaḥ sāṅgamardavijr̥mbhikaḥ||3|| saṁrambhārucidāhōṣātr̥ḍjvarānidratānvitaḥ| styānaṁ viṣyandayatyājyaṁ vraṇavatsparśanāsahaḥ||4||
पच्यमानो विवर्णस्तु रागी बस्तिरिवाततः| स्फुटतीव सनिस्तोदः साङ्गमर्दविजृम्भिकः||३|| संरम्भारुचिदाहोषातृड्ज्वरानिद्रतान्वितः| स्त्यानं विष्यन्दयत्याज्यं व्रणवत्स्पर्शनासहः||४||
🔊 Audio coming soon
sarvāṅgasundarī vyākhyā ( kr̥ta)
sa0-sa śōphaḥ pacyamānō vivarṇō-na tvaksamānavarṇaḥ| tathā rāgī-lōhitavarṇaḥ| tathā, bastirivātataḥ-stabdhō vātapūrṇadr̥tivat| chāgādīnāṁ tu mūtrādhārō bastirityucyatē| tathā, sphuṭatīva| { tathā, } sanistōdaḥ-saha nistōdēna vartata iti sanistōdaḥ| niyataprabandhapravr̥ttā rūk-nistōdō, vicchinnā tu śūlamityucyatē| sāṅgētyādi| aṅgānāṁ mardaḥ- kṣōbhaḥ, sahāṅgamardavijr̥mbhikāyāṁ vartata iti sāṅgamardavijr̥mbhikaḥ| tathā, saṁrambhādibhiryutaḥ| anvitaśabdēna pratyēkaṁ saṁrambhādīnāṁ sambandhaḥ| saṁrambhō-vāgviṣayātītānāṁ svasaṁvēdyānāmanēkarūpāṇāṁ pīḍanavighaṭṭanacchēdanabhēdanadaṁśanādīnāṁ rūjāṁ prādurbhāvaḥ| sarvāṅgīṇastīvrō-dāhaḥ| aratimān dāha uṣā ucyatē| tathā, sa pacyamānō ghr̥taṁ styānamupayuktaṁ vilīnayati| tathā, sparśanaṁ na sahatē vraṇavat|
āyurvēdarasāyanam vyākhyā ( kr̥ta)
ā0 ra0- pacyāmānasya śōfasya lakṣaṇamāha-pacyamāna iti| vivarṇaḥ-tvāgviparītavarṇaḥ| rāgī-rañjanaśaktimān, lēpauṣadhaṁ varṇantaraṁ nayatītyarthaḥ| sfuṭati-viṣliṣṭāvayatvaṁ vrajati| saṁrambhō-jhaṭiti rujādivr̥ddhiḥ|
Adhikarana pakvasyalakṣaṇam (5-6) · Śloka 6
pakvē'lpavēgatā glāniḥ pāṇḍutā valisambhavaḥ| nāmō'ntēṣūnnatirmadhyē kaṇḍūśōphādimārdavam||5|| spr̥ṣṭē pūyasya sañcārō bhavēdbastāvivāmbhasaḥ| |6|
पक्वेऽल्पवेगता ग्लानिः पाण्डुता वलिसम्भवः| नामोऽन्तेषून्नतिर्मध्ये कण्डूशोफादिमार्दवम्||५|| स्पृष्टे पूयस्य सञ्चारो भवेद्बस्ताविवाम्भसः| |६|
🔊 Audio coming soon
sarvāṅgasundarī vyākhyā ( kr̥ta)
sa0-pakvē sati, alpavēgatā bhavati, na tu saṁrambhaḥ| tathā, glāniḥ-mlānatvam| tathā, pāṇḍutvaṁ valīnāṁ cōdbhavaḥ| tathā, antēṣu-paryantēṣu, nāmō-nimnatvam, madhya unnatiḥ| nāmō'ntēṣvityuktyaiva madhya unnatitvaṁ labdhamēva, unnatigrahaṇaṁ tvatiśayārtham, tēnōttuṇḍitvaṁ gamyatē| tathā, kaṇḍvādimr̥dutvaṁ syāt| tathā, spr̥ṣṭē tasmin sati pūyasya sañcārō bhavati, bastērantaḥsthitasya yathā'mbhasaḥ sañcāraḥ|
āyurvēdarasāyanam vyākhyā ( kr̥ta)
ā0 ra0- pakvasya śōfasya lakṣaṇamāha-pavka iti| alpavēgatā-upadravālpatvam| kaṇḍūśōfādayō lakṣaṇāni| upadravāstu-aṅgamardādayaḥ|
Adhikarana pākasya raktadōṣatrayakāryatvam (6-7) · Śloka 7
| śūlaṁ nartē'nilāddāhaḥ pittācchōphaḥ kaphōdayāt||6|| rōgō raktācca pākaḥ syādatō dōṣaiḥ saśōṇitaiḥ| |7|
| शूलं नर्तेऽनिलाद्दाहः पित्ताच्छोफः कफोदयात्||६|| रोगो रक्ताच्च पाकः स्यादतो दोषैः सशोणितैः| |७|
🔊 Audio coming soon
sarvāṅgasundarī vyākhyā ( kr̥ta)
sa0-vātaṁ vinā śūlaṁ na bhavati| pittamantarēṇa dāhō na syāt| kaphōdayādvinā śōphō na syāt| śōphaḥ kaphāditi vaktavya udayagrahaṇaṁ viśēṣadyōtanārtham| raktādr̥tē-raktaṁ vinā, rāgasya lauhityasya sambhavō na| tēna kaphādhikaiḥ sarvairdōṣaiḥ śōṇitasahitaiḥ śvayathupākaḥ syāditi gamyatē|
āyurvēdarasāyanam vyākhyā ( kr̥ta)
ā0 ra0- raktadōṣatrayakāryatvaṁ pākasyāha-śūlamiti|
Adhikarana atipakvasya lakṣaṇam (7-8) · Śloka 8
| pākē'tivr̥ttē suṣirastanutvagdōṣabhakṣitaḥ||7|| valībhirācitaḥ śyāvaḥ śīryamāṇatanūruhaḥ| |8|
| पाकेऽतिवृत्ते सुषिरस्तनुत्वग्दोषभक्षितः||७|| वलीभिराचितः श्यावः शीर्यमाणतनूरुहः| |८|
🔊 Audio coming soon
sarvāṅgasundarī vyākhyā ( kr̥ta)
sa0-pākē cātivr̥ttē-atikrāntē, suṣirō'ntasthaḥ śōphadēśaḥ sampadyatē| tathā, tanuḥ-tanvī, tvak yasmin sa tanutvak| tathā, dōṣabhakṣitaḥ-pūyavān, dōṣaśabdēnēha pūya ucyatē, tēna bhakṣitatvāt suṣiratvaṁ tanutvaktvaṁ cāsya| tathā, valībhirācitō-vyāptaḥ| tathā, śyāmavarṇaḥ| tathā, śīryamāṇatanūruhaḥ-patadrōmā|
āyurvēdarasāyanam vyākhyā ( kr̥ta)
ā0 ra0- atipavkasya śōfasya lakṣaṇamāha-pāka iti| ativr̥ttē-pramāṇamatikrantē| suṣiraḥ-śūnyōdaraḥ| tanutvak-viralatvak| dōṣabhakṣitaḥ-pūyabhakṣitamāṁsādiḥ| tanūruhaṁ-rōma|
Adhikarana raktapākasya lakṣaṇam (8-10) · Śloka 10
| kaphajēṣu tu śōphēṣu gambhīraṁ pākamētyasr̥k||8|| pakvaliṅgaṁ tatō'spaṣṭaṁ yatra syācchhītaśōphatā| tvaksāvarṇyaṁ rujō'lpatvaṁ ghanasparśatvamaśmavat||9|| raktapākamiti brūyāttaṁ prājñō muktasaṁśayaḥ| |10|
| कफजेषु तु शोफेषु गम्भीरं पाकमेत्यसृक्||८|| पक्वलिङ्गं ततोऽस्पष्टं यत्र स्याच्छीतशोफता| त्वक्सावर्ण्यं रुजोऽल्पत्वं घनस्पर्शत्वमश्मवत्||९|| रक्तपाकमिति ब्रूयात्तं प्राज्ञो मुक्तसंशयः| |१०|
🔊 Audio coming soon
sarvāṅgasundarī vyākhyā ( kr̥ta)
sa0-yadyapi tribhirēva dōṣaiḥ śōṇitānvitaiḥ pākō jāyatē, tathā'pi kaphajēṣvityuktēradhikatarakaphēṣviti gamyatē| kaphajēṣviti bahuvacananirdēśāt dēhadēśabahutvādyēṣu dēhadēśēṣvasau kaphō jāyatē, tēṣu kaphajēṣu śōphēṣu gambhīraṁ-durlakṣyamatiśayēnāntarnigūḍhatvāt, asr̥k pākamēti| ata ēva pakvaliṅgaṁ-pakvalakṣaṇaṁ, aspaṣṭaṁ durlakṣyaṁ, syāt| tathā, yatra śītaguṇayōgāt, śītaścāsau śōphaśca śītaśōphaḥ, tasya bhāvaḥ śītaśōphatā| tathā, tvaksamānavarṇatvam| tathā, rujaḥ stōkatvam| tathā, ghanasparśatvaṁ-nibiḍasparśatā syāt, aśmavat-hastādinā spr̥ṣṭē pāṣāṇatulyaḥ sparśa upalabhyatē| taṁ-tathābhūtaṁ śvayathupākaṁ, raktapākamityēvaṁ prājñō-dhīmān, brūyāt-na tu śōphaṁ pakvamiti kathayēt| katham ? muktasaṁśayaḥ,- śōṇitaṁ pakvaṁ nātra śōpha ityēvaṁ vadēdityarthaḥ|
āyurvēdarasāyanam vyākhyā ( kr̥ta)
ā0 ra0- raktapākasya lakṣaṇamāha-kafajēṣviti| gambhīraṁ yadasr̥k tat pākamēti, na māṁsam| tataḥ-tasmāt, uktaṁ pakvaliṅgaṁ spaṣṭaṁ nōtpadyatē| tēna yatra śītaśōfatvādi, taṁ raktapākaṁ brūyāt|
Adhikarana dāraṇapāṭanayōrviṣayōbhēdaḥ (10-11) · Śloka 11
| alpasattvē'balē bālē pākādvā'tyarthamuddhatē||10|| dāraṇaṁ marmasandhyādisthitē cānyatra pāṭanam| |11|
| अल्पसत्त्वेऽबले बाले पाकाद्वाऽत्यर्थमुद्धते||१०|| दारणं मर्मसन्ध्यादिस्थिते चान्यत्र पाटनम्| |११|
🔊 Audio coming soon
sarvāṅgasundarī vyākhyā ( kr̥ta)
sa0-stōkē sattvē sati, tathā durbalē, tathā bālē, ētēṣu jātē śvayathau, tathā pākādvā'tyarthamuddhatē-atikrāntē ca śvayathau, dāraṇaṁ kāryam; vraṇapratiṣēdhōddiṣṭairdāraṇadravyaiḥ (hr̥. u. a. 25|37)| yathā-"guggulvatasigēndatasvarṇakṣīrīkapōtaviṭ| kṣārauṣadhāni kṣārāśca pakvaśōphavidāraṇam||" iti| na kēvalamalpasattva ityādikē śvathau dāraṇaṁ kāryam, yāvat caśabdāt marmasandhyādisthitē ca śvayathau dāraṇaṁ kāryam, na pāṭanaṁ śastrēṇa| anyatrēti dāraṇaviṣayānirdiṣṭē sthānē śastrēṇa pāṭanaṁ kāryam|
āyurvēdarasāyanam vyākhyā ( kr̥ta)
ā0 ra0- atha pāṭanam| tatra dāraṇapāṭanayōrviṣayabhēdamāha-alpasatva iti| satvaṁ-mānasaṁ balam| pākē cātyarthamuddhatē-atipakvē, śōphē marmasandhyādiṣvanavacāryaśastrēṣvaṅgēṣu sthitē ca, dāraṇam| anyatra pāṭanam| dāraṇaṁ kṣārādinā dvārakaraṇam| pāṭanaṁ-śastrēṇa|
Adhikarana apakvasya dāraṇapāṭananiṣēdhaḥ (11-12) · Śloka 12
| āmacchēdē sirāsnāyuvyāpadō'sr̥gatisrutiḥ||11|| rūjō'tivr̥ddhirdaraṇaṁ visarpō vā kṣatōdbhavaḥ| |12|
| आमच्छेदे सिरास्नायुव्यापदोऽसृगतिस्रुतिः||११|| रूजोऽतिवृद्धिर्दरणं विसर्पो वा क्षतोद्भवः| |१२|
🔊 Audio coming soon
sarvāṅgasundarī vyākhyā ( kr̥ta)
sa0-āmasya śōphasya śastrēṇa chēdē sati sirāsnāyuvyāpadō bhavanti| tathā, asr̥jō'tisrāvaḥ syāt| tathā, rujāyā vivr̥ddhiḥ| tathā, daraṇaṁ visarpō vā kṣatōtthaḥ syāt|
āyurvēdarasāyanam vyākhyā ( kr̥ta)
ā0 ra0- apakvasya dāraṇapāṭanē niṣēdhai-āmacchēda iti| śirānāśādidōṣādāmō na chēdya ityarthaḥ|
Adhikarana pakvasyācchēdanē dōṣaḥ (12-13) · Śloka 13
| tiṣṭhannantaḥ punaḥ pūyaḥ sirāsnāyvasr̥gāmiṣam||12|| vivr̥ddhō dahati kṣipraṁ tr̥ṇōlapamivānalaḥ| |13|
| तिष्ठन्नन्तः पुनः पूयः सिरास्नाय्वसृगामिषम्||१२|| विवृद्धो दहति क्षिप्रं तृणोलपमिवानलः| |१३|
🔊 Audio coming soon
sarvāṅgasundarī vyākhyā ( kr̥ta)
sa0-antaḥ-antarē, tu pūyastiṣṭhan san sirādīni dahati| kaḥ kamiva ? analastr̥ṇōlapamiva|
āyurvēdarasāyanam vyākhyā ( kr̥ta)
ā0 ra0- pakvasyācchēdanē dōśamāha-tiṣṭhanniti| tr̥ṇōlapaṁ-tr̥ṇagulmam|
Adhikarana āmapakvalakṣaṇānabhijñānindā (13-14) · Śloka 14
| yaśchinattyāmamajñānādyaśca pakvamupēkṣatē||13|| śvapacāviva vijñēyau tāvaniścitakāriṇau| |14|
| यश्छिनत्त्याममज्ञानाद्यश्च पक्वमुपेक्षते||१३|| श्वपचाविव विज्ञेयौ तावनिश्चितकारिणौ| |१४|
🔊 Audio coming soon
sarvāṅgasundarī vyākhyā ( kr̥ta)
sa0-yaḥ-puruṣaḥ (vaidyaḥ), ajñānāt-mōhāt, āmaṁ- apakvaṁ, chhinatti| yaśca pakvamupēkṣatē-na pāṭayati| tau-narau, śvapacatulyau vēdyau, āturavyāpādanāt| tadvayāpādanaṁ tu kutō vidhattaḥ ? ityāha-aniścitakāriṇau,-asamīkṣyavidhāyinau yataḥ|
āyurvēdarasāyanam vyākhyā ( kr̥ta)
ā0 ra0- āmapakvalakṣaṇānabhijñaṇ nindati-yaścchinattīti|
Adhikarana śastrakarmaṇaḥ pūrvaṁ bhōjanādi (14-15) · Śloka 15
| prāk śastrakarmaṇaścēṣṭaṁ bhōjayēdannamāturam||14|| pānapaṁ pāyayēnmadyaṁ tīkṣṇaṁ yō vēdanākṣamaḥ| na mūrcchatyannasaṁyōgānmattaḥ śastraṁ na budhyatē||15||
| प्राक् शस्त्रकर्मणश्चेष्टं भोजयेदन्नमातुरम्||१४|| पानपं पाययेन्मद्यं तीक्ष्णं यो वेदनाक्षमः| न मूर्च्छत्यन्नसंयोगान्मत्तः शस्त्रं न बुध्यते||१५||
🔊 Audio coming soon
sarvāṅgasundarī vyākhyā ( kr̥ta)
sa0-śastrakarmaṇaḥ prāk-pūrvaṁ, āturamiṣṭamannaṁ-yadvraṇē'pathyamapi, tadvalādhānārthaṁ bhōjayēt| tathā, yō vēdanākṣamaḥ-śastravyathāmasahiṣṇuḥ, tamāturaṁ madyōcitaṁ tīkṣṇaṁ-tīvramadaṁ, madyaṁ pāyayēt| ēvaṁ sati yatsyāttadāha-na mūrcchatyannasaṁyōgādityādi| yatō'nnōpayōgānna muhyati| paraṁ tīkṣṇamadyapānānmattaḥ san śastraṁ-nyastamaṅgē, na budhyatē-na cētayatē, tatkadarthanayā kliśyata ityarthaḥ|
āyurvēdarasāyanam vyākhyā ( kr̥ta)
ā0 ra0- śastrakarmaṇaḥ pūrvaṁ bhōjanamāha-prākśastrakarmaṇa iti| tīkṣṇamadyapānamāha-pānapamiti| yō vēdanākṣamaḥ-śastravyathāṁ sōḍhumaśaktō madyapaḥ, tasya madyapānam| itarasya bhōjanamēva|
Adhikarana mūḍhagarbhādau bhōjanādiniṣēdhaḥ (16) · Śloka 16
anyatra mūḍhagarbhāśmamukharōgōdarāturāt| |16|
अन्यत्र मूढगर्भाश्ममुख़रोगोदरातुरात्| |१६|
🔊 Audio coming soon
sarvāṅgasundarī vyākhyā ( kr̥ta)
sa0-aśmaśabdēnāśmarī gr̥hyatē| mūḍhagarbhādibhirya āturastaṁ varjayitvēṣṭabhōjanaṁ madyapānaṁ ca kārayitavyam|
āyurvēdarasāyanam vyākhyā ( kr̥ta)
ā0 ra0- mūḍhagarbhādau bhōjanamadyapānē niṣēdhatianatrēti|
Adhikarana śastrakarmavidhiḥ bhōjanādiniṣēdhaḥ (16-18) · Śloka 18
| athāhr̥tōpakaraṇaṁ vaidyaḥ prāṅmukhamāturam||16|| sammukhō yantrayitvā''śu nyasyēnmarmādi varjayan| anulōmaṁ suniśitaṁ śastramāpūyadarśanāt||17|| sakr̥dēvāharēttacca| |18|
| अथाहृतोपकरणं वैद्यः प्राङ्मुख़मातुरम्||१६|| सम्मुख़ो यन्त्रयित्वाऽऽशु न्यस्येन्मर्मादि वर्जयन्| अनुलोमं सुनिशितं शस्त्रमापूयदर्शनात्||१७|| सकृदेवाहरेत्तच्च| |१८|
🔊 Audio coming soon
sarvāṅgasundarī vyākhyā ( kr̥ta)
sa0-athaśabdēna maṅgalavācinā saṅgrahōktamarthaṁ sūcayati| yathā (sū. a. 38)- "sumuhūrtē ca dadhyakṣatānnapānarukmaratnārcitavipraṁ praṇatēṣṭadēvataṁ" ityādi| āhr̥taṁ-ḍhaukitaṁ samīpānītaṁ, upakaraṇaṁ-tatkālayōgyaṁ yantraśastrāgnijāmbavauṣṭhapicuplōtasnēhamadhukalkādikaṁ, yasya tam, āturaṁ prāṅmukhaṁ-pūrvābhimukhaṁ, vaidyaḥ sammukhaḥ-pratyaṅmukhō, yantrayitvā śastramāśu-na vilambitaṁ, nyasyēt-nikṣipēt| marmādi varjayan-marmasirāsandhyādīn pariharan| tathā, anulōmaṁ kr̥tvā-na prātilōmyēna| kimbhūtaṁ śastram ? suniśitaṁ-atitīkṣṇam| tacca śastramāpūyadarśanāt nyasēt,-na tvadhikam| tat kiṁ tatraiva sthāpyam ? tacca sakr̥dēva-na bahūn vārān, āharēt-ākarṣēt|
āyurvēdarasāyanam vyākhyā ( kr̥ta)
ā0 ra0- śastrakarmavidhimāha-athēti| saṅgrahē tu (sū. a. 38)- " athōpahr̥tayantraśastrakṣārāgnijāmbavauṣṭhapicuplōtapatrasūtracarmapaṭṭamadhusnēhakaṣāyalēpakalkasēkōdakumbhaśītōṣṇōdakakaṭāhavyajanādivraṇōpayōgisarvōpakaraṇamāstr̥taśayanīyamupasthitasthirasnēhabalavadavalambakapuruṣamiṣṭē'hani muhūrtē ca dadhyakṣatānnapānarukmaratnārcitavipraṁ praṇatēṣṭadēvataṁ bhuktavantamāturaṁ prāṅgnukhamupavēśya saṁvēśya vā yantrayitvā pratyuṅgukhō vaidyō marmaśirāsnāyusandhyasthidhamanīḥ pariharan anulōmaṁ śastraṁ nidadhyāt|" iti| nikhātaśastrasyāharaṇavidhimāha-sakr̥dēvēti| sakr̥t-ēkavāramāharēt, nāntarā'ntarā muñcēdityarthaḥ|
Adhikarana pāṭanapramāṇam pāṭanasthānam (18-21) · Śloka 21
pākē tu sumahatyapi| pāṭayēt dvyaṅgulaṁ samyadvyaṅgulatryaṅgulāntaram||18|| ēṣitvā samyagēṣiṇyā paritaḥ sunirūpitam| aṅgulīnālavālairvā yathādēśaṁ yathāśayam||19|| yatō gatāṁ gatiṁ vidyādutsaṅgō yatra yatra ca| tatra tatra vraṇaṁ kuryātsuvibhaktaṁ nirāśayam||20|| āyataṁ ca viśālaṁ ca yathā dōṣō na tiṣṭhati| |21|
पाके तु सुमहत्यपि| पाटयेत् द्व्यङ्गुलं सम्यद्व्यङ्गुलत्र्यङ्गुलान्तरम्||१८|| एषित्वा सम्यगेषिण्या परितः सुनिरूपितम्| अङ्गुलीनालवालैर्वा यथादेशं यथाशयम्||१९|| यतो गतां गतिं विद्यादुत्सङ्गो यत्र यत्र च| तत्र तत्र व्रणं कुर्यात्सुविभक्तं निराशयम्||२०|| आयतं च विशालं च यथा दोषो न तिष्ठति| |२१|
🔊 Audio coming soon
sarvāṅgasundarī vyākhyā ( kr̥ta)
sa0-pākē tu sumahatyapi pāṭayēt| dvyaṅgulaṁ-dvyaṅgulaparimāṇaṁ vraṇaṁ, samyak kuryāt,-nādhikam| dvyaṅgulētyādi| aṅguladvayamathavā'ṅgulatrayamantarīkr̥tya punaranyaṁ vraṇaṁ kuryāt,-na tvāsannam| tathā, ēṣiṇyā samyagēṣitvā-gavēśayitvā, paritaḥ-samantāt, sunirūpitaṁ-suparyālōcitam| na kēvalamēṣiṇyā, yāvadaṅgulyā, nālēna-padmōtpalādijēna, vālairvā-varāhādisambandhibhiḥ, anvēṣya yathādēśaṁ yathāśayaṁ vraṇaṁ kuryāt| taṁ ca pradēśaṁ darśayitumāha-yata ityādi| yatō yasmin pradēśē gatāṁ-dūrayātāṁ, gatiṁ-nāḍīṁ, jānīyāt tasmin pradēśē vraṇaṁ kuryāt| yatra yatra śvayathupradēśē, utsaṅgaṁ-unnatiṁ, vidyāt tatra tatra pradēśē vraṇaṁ kuryāt| kiṁbhūtaṁ vraṇam ? suṣṭhu vibhaktau pārśvāparapārśvādivibhāgau yasya taṁ tathāvidham| tathā, nirāśayam,-na vidyata āśayaḥ-pūyādērdōṣasya sthānaṁ, yasya tathābhūtaṁ nirāśayaṁ kuryāt| tathā, āyataṁ-dīrgham, tathā viśālaṁ-vistirṇaṁ, kuryāt| ēvaṁ kr̥tē sati dōṣaḥ-pūyākhyō, na tiṣṭhati-na sthitiṁ labhatē|
āyurvēdarasāyanam vyākhyā ( kr̥ta)
ā0 ra0- pāṭanapramāṇamāha-pākē tviti| bahuṣu pāṭanēṣu vdyaṅgulaṁ tryaṅgulaṁ vā'ntaraṁ kāryam| pāṭanasthānamāha-ēṣitvēti| ēṣiṇyādivibhāgauktaḥ saṅgrahē (sū. a. 38)- " vivr̥tē pradēśē vāmapradēśinyaiṣitvā nātivivr̥tē gambhīrē māṁsalē caiṣiṇyā| viārītē karīrādinālēna| atisaṁvr̥tē śūkaravālēna|" dēśaḥ-śarīrāvayavaḥ| āśayō-vraṇāṁsthānam| gatiḥ-nāḍīvraṇaḥ| utsaṅgaḥ-pūyaskhalanasthānam| vibhaktō-māṁsādilēśarahitaḥ| āśayaḥ-utsaṅgaḥ|
Adhikarana pāṭanē vaidyagatasāmagrī (21-22) · Śloka 22
| śauryamāśukriyā tīkṣṇaṁ śastramasvēdavēpathū||21|| asammōhaśca vaidyasya śastrakarmaṇi śasyatē| |22|
| शौर्यमाशुक्रिया तीक्ष्णं शस्त्रमस्वेदवेपथू||२१|| असम्मोहश्च वैद्यस्य शस्त्रकर्मणि शस्यते| |२२|
🔊 Audio coming soon
sarvāṅgasundarī vyākhyā ( kr̥ta)
sa0-vaidyasya śastrakarmaṇi śauryaṁ-pāṭanādau vīryaṁ, śasyatē| tathā, āśukriyā-caturahastatā| tathā, tīkṣṇaśastratā| tathā, svēdaśca vēpathuśca, na vidyamānau tau yasya sa ēvam, svēdābhāvaḥ kampābhāvaścētyarthaḥ| tathā, asammōhaḥ-tatkālōcitakāryakaraṇē samyakpravr̥ttiḥ| nanu, "śauryaṁ vaidyasya śasyatē" ityuktyaiva svēdakampābhāvaḥ pratyapādi| tathā ca svēdavēpathū bhīrōrēva sambhavataḥ, na śūrasya| ityanarthakaṁ "asvēdavēpathū" iti| atrācakṣmahē satyamēvaitau bīruguṇau, kintūṣṇakālavaśāt prakr̥tivaśādvā yasya svēdavēpathū bhavataḥ, tatparihārārthamētaduktam| sasvēdasya hi vaidyasya śastrakarmakartumudyatasya śastragrahaṇamēva na tathā sampadyatē, tadvatsakampasyāpi| tasmāttatparihārō yuktaḥ|
āyurvēdarasāyanam vyākhyā ( kr̥ta)
ā0 ra0- pāṭanē vaidyagatasāmagrīmāha-śauryamiti|
Adhikarana lalāṭādau tiryak pāṭanam (22-23) · Śloka 23
| tiryakchindyāllalāṭābhrūdantavēṣṭakajatruṇi||22|| kukṣikakṣākṣikūṭauṣṭhakapōlagalavaṅkṣaṇē| |23|
| तिर्यक्छिन्द्याल्ललाटाभ्रूदन्तवेष्टकजत्रुणि||२२|| कुक्षिकक्षाक्षिकूटौष्ठकपोलगलवङ्क्षणे| |२३|
🔊 Audio coming soon
sarvāṅgasundarī vyākhyā ( kr̥ta)
sa0-lalāṭādidēśēṣu tiryak chhēdaḥ kāryaḥ| dantavēṣṭakō dantapiṇḍikā dantādhāra ucyatē|
āyurvēdarasāyanam vyākhyā ( kr̥ta)
ā0 ra0- lalāṭādau tiryakpāṭanamāha-tiryagiti|
Adhikarana pradēśāntarē tiryakpāṭananiṣēdhaḥ (23) · Śloka 23
| anyatra chēdanāttiryak sirāsnāyuvipāṭanam||23||
| अन्यत्र छेदनात्तिर्यक् सिरास्नायुविपाटनम्||२३||
🔊 Audio coming soon
sarvāṅgasundarī vyākhyā ( kr̥ta)
sa0-anyatra pradēśē tiryak chhēdanāt sirāṇāṁ snāyūnāṁ ca vyāpattiḥ syāt|
āyurvēdarasāyanam vyākhyā ( kr̥ta)
ā0 ra0- pradēśāntar tiryakpāṭanaṁ niṣēdhati-anyatrēti|
Adhikarana pāṭanānantaraṁ kartavyam (24-28) · Śloka 28
śastrē'vacāritē vāgbhiḥ śītāmbhōbhiśca rōgiṇam| āśvāsya paritō'ṅgulyā paripīḍya vraṇaṁ tataḥ||24|| kṣālayitvā kaṣāyēṇa plōtēnāmbhō'panīya ca| guggulvagurusiddhārthahiṅgusarjarasānvitaiḥ||25|| dhūpayētpaṭuṣaḍgranthānimbapatrairghr̥taplutaiḥ| tilakalkājyamadhubhiryathāsvaṁ bhēṣajēna ca||26|| digdhāṁ vartiṁ tatō dadyāttairēvācchhādayēcca tāṁ| ghr̥tāktaiḥ saktubhiścōrdhvaṁ ghanāṁ kavalikāṁ tataḥ||27|| nidhāya yuktyā badhnīyātpaṭṭēna susamāhitam| pārśvē savyē'pasavyē vā nādhastānnaiva cōpari||28||
शस्त्रेऽवचारिते वाग्भिः शीताम्भोभिश्च रोगिणम्| आश्वास्य परितोऽङ्गुल्या परिपीड्य व्रणं ततः||२४|| क्षालयित्वा कषायेण प्लोतेनाम्भोऽपनीय च| गुग्गुल्वगुरुसिद्धार्थहिङ्गुसर्जरसान्वितैः||२५|| धूपयेत्पटुषड्ग्रन्थानिम्बपत्रैर्घृतप्लुतैः| तिलकल्काज्यमधुभिर्यथास्वं भेषजेन च||२६|| दिग्धां वर्तिं ततो दद्यात्तैरेवाच्छादयेच्च तां| घृताक्तैः सक्तुभिश्चोर्ध्वं घनां कवलिकां ततः||२७|| निधाय युक्त्या बध्नीयात्पट्टेन सुसमाहितम्| पार्श्वे सव्येऽपसव्ये वा नाधस्तान्नैव चोपरि||२८||
🔊 Audio coming soon
sarvāṅgasundarī vyākhyā ( kr̥ta)
sa0-śastrē'vacāritē-nyastē sati, vāgbhiḥ-tatkālōcitārbhirmadhurābhiḥ 'svasthō jātō'si' ityēvaṁprāyābhiḥ, tathā śītāmbhōbhiḥ-pariṣēkādibhiḥ, āturamāśvāsya, anantaraṁ vraṇaṁ paritaḥ-samantāt, aṅgulyā paripīḍya-pūyādidōṣaṁ nirhārya, anantaraṁ kaṣāyēṇa-madhuyaṣṭyādisādhitēna, kṣālayitvā, tataḥ plōtēnakārpāsādijavastrakhaṇḍēna, jalamapanīya-pānīyārdratāṁ nirhr̥tya, anantaraṁ vraṇaṁ guggulvādibhirnimbapatrāntairdhūpayēt| kimbhūtaiḥ ? ghr̥taplutaiḥ|- plutagrahaṇādbahughr̥tairiti dyōtayati| saṅgrahē cōktam (sū. a. 38)- "guggulvādibhirēvaṁ śayanāsanādi dvirahnō dhūpayēt|" iti| tataḥ-anantaraṁ, vartiṁ-kārpāsādimayīṁ, vraṇāntardadyāt-pravēśayēt, vaidyaḥ| kimbhūtām ? digdhām| kaiḥ ? tilakalkājyamadhubhiḥ,-vātavraṇē tilapiṣṭadigdhāṁ, pittavraṇē ghr̥tadigdhāṁ, kaphavraṇē madhudigdhām| kēcittu sarvairēva tairyugapaddigdhāmityāhuḥ| na ca kēvalaṁ tilādibhiḥ, yāvat yathāsvaṁ-yat yasya dōṣasya svaṁ bhēṣajaṁ, tēna ca digdhām| tairēva-tilakalkādibhiḥ, vraṇāntaḥpraviṣṭāṁ tāṁ-vartiṁ, ācchhādayēt-sthagayēt| ūrdhvaṁ-tadupariṣṭāt, ghr̥tayuktaiḥ saktubhirācchhādayēt| saṅgrahē cōktam (sū. a. 38)-"nātibhr̥ṣṭayavasaktubhirghr̥tāktairbhājanāntē'mbhasā dakṣiṇāṅgulībhiḥ sumr̥ditairavacchhādya" iti| tatō- vraṇāntaḥpraviṣṭavarticchhādanādanantaraṁ, kavalikāṁ-bahuvastrakhaṇḍapuṭanirvartitāṁ, nidhāya-saṁsthāpya, paṭṭēna-nibiḍavastrakhaṇḍēna, prakr̥tatvāt vraṇaṁ badhnīyāt| katham ? yuktyā-dōṣakālānuguṇayā| ata ēva saṅgrahē jagāda (sū.a.38)-"vātaślēṣmōdbhavāṁstatra dvistrirvā vēṣṭayēdvraṇān| sakr̥dēva parikṣapya pittaraktābhighātajān|| śastrakṣatarujāyāṁ tu pratatāyāṁ yaṣṭīmadhukasarpiṣōṣṇēna vraṇaṁ siñcēt| udakumbhāccāpō gr̥hītvā prōkṣayan parita upacarēt|" iti| kathaṁ badhnīyāt ? susamāhitaṁ kr̥tvā-nāvahēlayā, vāmapārśvē dakṣiṇapārśvē vā| adhastāt na badhnīyāt, naiva cōpari-ūrdhvaṁ, badhnīyāt, naiva cōpari-ūrdhvaṁ, badhnīyāt|
āyurvēdarasāyanam vyākhyā ( kr̥ta)
ā0 ra0- pāṭanānantaraṁ kartavyamāha-śastra iti| sarjarasō-rālaḥ| ṣaṅgranthā-vacā| yathāsvaṁ [bhēṣajēna ]-yasmin vraṇē yadbhēṣajamuktaṁ tēna| cahabdaḥ samuccayē| digdhāṁlitpām| taiḥ-vartilēpauṣadhaiḥ| taṁ-vraṇam| ūrdhvaṁ-pūrvalēpasya, ghr̥tāktasaktulēpaḥ| saṅgrahē tu (sū. a. 28)- " nātibhr̥ṣṭayavasaktubhirghr̥tāktairbhājanāntē'mbhasā dakṣiṇāṅgulībhiḥ sumr̥ditaiḥ" iti| kavalikāṁ-vastrakhaṇḍamayīṁ pālīm| paṭṭēna-ghanavasnakhaṇḍēna| susamāhitaṁ-suṣṭu sanniviṣṭaṁ yathā bhavati tathā| pārśvē bandhīyāt-granthiṁ dadyāt| saṅgahē tu (sū. a. 38)- "vātaślēṣmōdbhavāṁstatra dvisnirvā vēṣṭayēhraṇān| sakr̥dēva parikṣipya pittaraktābhighātajān|| sastrakṣatarujāyāṁ u pratatāyāṁ yaṣṭimadhukasarpiṣōṣṇēna vraṇaṁ siñcēt|" iti|
Adhikarana paṭṭakavalikāvikēśikānāṁ viśēṣaḥ (29) · Śloka 29
śucisūkṣmadr̥ḍhāḥ paṭṭāḥ kavalyaḥ savikēśikāḥ| dhūpitā mr̥davaḥ ślakṣṇā nirvalīkā vraṇē hitāḥ||29||
शुचिसूक्ष्मदृढाः पट्टाः कवल्यः सविकेशिकाः| धूपिता मृदवः श्लक्ष्णा निर्वलीका व्रणे हिताः||२९||
🔊 Audio coming soon
sarvāṅgasundarī vyākhyā ( kr̥ta)
sa0-tathā śucayaḥ sūkṣmasūtrā dr̥ḍhāśca paṭṭāḥ, tathā kavalikāḥ savikēśikāśca vraṇē hitāḥ| kimbhūtāḥ ? dhūpitāḥ, tathā mr̥davaḥ, tathā ślakṣṇāḥ, tathā valīrahitāḥ|
āyurvēdarasāyanam vyākhyā ( kr̥ta)
ā0 ra0- paṭṭakavalikāvikēśikānāṁ viśēṣamāha-śucisūkṣmaddaḍhā iti| vikēśikā-sūtravartiḥ|
Adhikarana rakṣā baliśca (30) · Śloka 30
kurvītānantaraṁ tasya rakṣāṁ rakṣōniṣiddhayē| baliṁ cōpaharēttēbhyaḥ|30|
कुर्वीतानन्तरं तस्य रक्षां रक्षोनिषिद्धये| बलिं चोपहरेत्तेभ्यः|३०|
🔊 Audio coming soon
sarvāṅgasundarī vyākhyā ( kr̥ta)
sa0-anantaraṁ [ tasya-] rōgiṇaḥ kr̥taśastrakarmaṇō, vraṇē rakṣāṁ kuryāt| kimartham ? rakṣōniṣiddhayē-piśitāśanarākṣasādiniṣēdhāya| tēbhyaśca-rakṣōbhyō, balimupaharēt-dadyāt|
āyurvēdarasāyanam vyākhyā ( kr̥ta)
ā0 ra0- rakṣāmāha-kurvītēti| saṅgrahē tu (sū. a. 38)- " udakumbhāccapō gr̥hītvā prōkṣayēt| paritō yāvakārthaparṇasaparyādibhirasya rakṣāṁ kuryāt|" iti| balimāha- baliṁ cēti|
Adhikarana auṣadhividhāraṇam (30-31) · Śloka 31
| sadā mūrdhnā ca dhārayēt||30|| lakṣmīṁ guhāmatiguhāṁ jaṭilāṁ brahmacāriṇīm| vacāṁ chhatrāmaticchhatrāṁ dūrvāṁ siddhārthakānapi||31||
| सदा मूर्ध्ना च धारयेत्||३०|| लक्ष्मीं गुहामतिगुहां जटिलां ब्रह्मचारिणीम्| वचां छ्हत्रामतिच्छ्हत्रां दूर्वां सिद्धार्थकानपि||३१||
🔊 Audio coming soon
sarvāṅgasundarī vyākhyā ( kr̥ta)
sa0-sarvakālaṁ cauṣadhīrmūrdhnā dhārayēt| tā ēvāha-lakṣmīmityādi| lakṣmīṁ-padmacāriṇīm| guhāṁ-pr̥śniparṇīm| atiguhāṁ-śāliparṇām| jaṭilāṁ-māṁsīm| brahmacariṇīṁ-brahmayaṣṭikām| vacāṁ-ugragandhām| chhatrāṁ-śatapuṣpām| aticchatrāṁ-viṣāṇikām|
āyurvēdarasāyanam vyākhyā ( kr̥ta)
ā0 ra0- auṣadhīvidhāraṇamāha-sadēti| lakṣmīṁ-śamīm| guhātiguhē-śāliparṇīpr̥śniparṇyau| jaṭilāṁ-māṁsīm| brahyacāriṇīṁ-brāhmīm| chatrāticchtrē-śatapuṣpādvayam|
Adhikarana āhāravihāraniyamaḥ (32) · Śloka 32
tataḥ snēhadinēhōktaṁ tasyācāraṁ samādiśēt| |32|
ततः स्नेहदिनेहोक्तं तस्याचारं समादिशेत्| |३२|
🔊 Audio coming soon
sarvāṅgasundarī vyākhyā ( kr̥ta)
sa0-tataḥ-anantaraṁ, tasya vraṇinaḥ, ācāramādiśēt| kathamam ? snēhadinēhōktam,-snēhasya dinaṁ snēhadinaṁ, snēhapānōpalakṣitamahaḥ, tatrēhā-cēṣṭā, tasyāmuktaṁ-snēhapānavidhyupadiṣṭaṁ "uṣṇōdakōpacārī syāt" ityādikam|
āyurvēdarasāyanam vyākhyā ( kr̥ta)
ā0 ra0- āhāravihāraniyamamāha-tata iti| snēhadinēhōktaṁ-snēhavidhidinacaryōktam|
Adhikarana vraṇē divāsvapnaniṣēdhaḥ (32) · Śloka 32
| divāsvapnō vraṇē kaṇḍūrāgarukśōphapūyakr̥t||32||
| दिवास्वप्नो व्रणे कण्डूरागरुक्शोफपूयकृत्||३२||
🔊 Audio coming soon
sarvāṅgasundarī vyākhyā ( kr̥ta)
sa0-divāsvapnō vraṇē kaṇḍvādikr̥t| tasmāt vraṇinā'haḥ svapnō na sēvyaḥ|
āyurvēdarasāyanam vyākhyā ( kr̥ta)
ā0 ra0- divāsvapnaṁ viśēṣatō niṣēdhati-divāsvapna iti|
Adhikarana vraṇē strīsaṅganiṣēdhaḥ (33-1) · Śloka 1
strīṇāṁ tu smr̥tisaṁsparśadarśanaiścalitasrutē| śukrē vyavāyajān dōṣānasaṁsargē'pyavāpnuyāt||33|| (vraṇē śvayathurāyāsāt sa ca rāgaśca jāgarāt| tau ca ruk ca divāsvāpāttāśca mr̥tyuśca maithunāt)||1||
स्त्रीणां तु स्मृतिसंस्पर्शदर्शनैश्चलितस्रुते| शुक्रे व्यवायजान् दोषानसंसर्गेऽप्यवाप्नुयात्||३३|| (व्रणे श्वयथुरायासात् स च रागश्च जागरात्| तौ च रुक् च दिवास्वापात्ताश्च मृत्युश्च मैथुनात्)||१||
🔊 Audio coming soon
sarvāṅgasundarī vyākhyā ( kr̥ta)
sa0-strīṇāṁ tu smr̥tisaṁsparśadarśanaiḥ pūrvaṁ svasthānaccalitaṁ paścātsrutaṁ tasmiṁścalitasrutē śukrē satyasaṁsargē'pi-tāsāmasambandhē'pi maithunamantarēṇāpi, vyavāyajān-maithunōtthān, dōṣānavāpnuyāt| tasmāt strīsmaraṇasaṁsparśadarśanāni varjyānītyarthaḥ|
āyurvēdarasāyanam vyākhyā ( kr̥ta)
ā0 ra0- strīsaṅgaṁ viśēṣatō niṣēdhati-strīṇāmiti|
Adhikarana vraṇē bhōjanam,vraṇē bhōjanaviśēṣaḥ (34-37) · Śloka 37
bhōjanaṁ ca yathāsātmyaṁ yavagōdhūmaṣaṣṭikāḥ| masūramudgatuvarījīvantīsuniṣaṇṇakāḥ||34|| bālamūlakavārtākataṇḍulīyakavāstukam| kāravēllakakarkōṭapaṭōlakaṭukāphalam||35|| saindhavaṁ dāḍimaṁ dhātrī ghr̥taṁ taptahimaṁ jalam| jīrṇaśālyōdanaṁ snigdhamalpamuṣṇōdakōttaram||36|| bhuñjānō jāṅgalairmāṁsaiḥ śīghraṁ vraṇamapōhati| |37|
भोजनं च यथासात्म्यं यवगोधूमषष्टिकाः| मसूरमुद्गतुवरीजीवन्तीसुनिषण्णकाः||३४|| बालमूलकवार्ताकतण्डुलीयकवास्तुकम्| कारवेल्लककर्कोटपटोलकटुकाफलम्||३५|| सैन्धवं दाडिमं धात्री घृतं तप्तहिमं जलम्| जीर्णशाल्योदनं स्निग्धमल्पमुष्णोदकोत्तरम्||३६|| भुञ्जानो जाङ्गलैर्मांसैः शीघ्रं व्रणमपोहति| |३७|
🔊 Audio coming soon
sarvāṅgasundarī vyākhyā ( kr̥ta)
sa0-bhōjanaṁ yathāsātmyaṁ-yadyasya sātmyaṁ yavādi, tathā jīvantyādiśākaṁ ca, tathā saindhavādikaṁ, purāṇaśālibhaktaṁ snigdhaṁ-snēhaṁ, tathā'lpaṁ, jāṅgalairmāṁsaiḥ saha bhuñjāna uṣṇōdakōttaraṁ yathābhavati, ēvaṁ vraṇī śīghraṁ vraṇamapōhati|
āyurvēdarasāyanam vyākhyā ( kr̥ta)
ā0 ra0- bhōjanamāha-bhōjanamiti| kaṭukāphalaṁ-kaṭurōhiṇīphalam| bhōjanaviśēṣamāha-jīrṇaśālyōdanamiti|
Adhikarana viṣamāśanasamaśanādhyāśananiṣēdhaḥ (37-38) · Śloka 38
| aśitaṁ mātrayā kālē pathyaṁ yāti jarāṁ sukham||37|| ajīrṇāttvanilādīnāṁ vibhramō balavān bhavēt| tataḥ śōpharujāpākadāhānāhānavāpnuyāt||38||
| अशितं मात्रया काले पथ्यं याति जरां सुख़म्||३७|| अजीर्णात्त्वनिलादीनां विभ्रमो बलवान् भवेत्| ततः शोफरुजापाकदाहानाहानवाप्नुयात्||३८||
🔊 Audio coming soon
sarvāṅgasundarī vyākhyā ( kr̥ta)
sa0-mātrayā kālē bhuktaṁ pathyaṁ sukhēna jarāṁ yāti| tasmāt pathyaṁ mātrayā kālē bhōktavyam| ajīrṇaṁ tu na kathañcit kāryam| yatō'jīrṇāt vātādīnāṁ balavān vibhramaḥ-kṣōbhaḥ, syāt| { tataḥ- } tasmātkṣōbhāt, śōphādīn prāpnuyāt|
āyurvēdarasāyanam vyākhyā ( kr̥ta)
ā0 ra0- viṣamāśanaṁ samaśanaṁ ca niṣēdhati-aśitamiti| adhyaśanaṁ niṣēdhati-ajīrṇa iti|
Adhikarana navadhānyādivargaḥ navadhānyādēratyapathyatvam (39-40) · Śloka 40
navaṁ dhānyaṁ tilān māṣān madyaṁ māṁsamajāṅgalam| kṣīrēkṣuvikr̥tīramlaṁ lavaṇaṁ kaṭukaṁ tyajēt||39|| yaccānyadapi viṣṭambhi vidāhi guru śītalam| vargō'yaṁ navadhānyādirvraṇinaḥ sarvadōṣakr̥t||40||
नवं धान्यं तिलान् माषान् मद्यं मांसमजाङ्गलम्| क्षीरेक्षुविकृतीरम्लं लवणं कटुकं त्यजेत्||३९|| यच्चान्यदपि विष्टम्भि विदाहि गुरु शीतलम्| वर्गोऽयं नवधान्यादिर्व्रणिनः सर्वदोषकृत्||४०||
🔊 Audio coming soon
sarvāṅgasundarī vyākhyā ( kr̥ta)
sa0-navadhānyādi tyajēt| yatō'yaṁ navadhānyādivargō vraṇinaḥ sarvān dōṣān karōti| saṅgrahē cōktam (sū.a.38)-"navadhānyamāṣakalāyakulatthaniṣpāvaśimbīśītāmbumadyēkṣukṣirapiṣṭatilavikr̥tiśuṣkaśākapiśitaharitamँkāmlalavaṇakaṭukakṣārānpāmiṣāṇi varjayēt|" iti| śītalaṁ-śītāmbvādi|
āyurvēdarasāyanam vyākhyā ( kr̥ta)
ā0 ra0- navadhanyādivargamāha-navaṁ dhānyamiti| saṅgrahē tu (sū. a. 38)- "navadhānyamāṣakalāyakulatthaniṣpāvaśimbīśītāmbumadyēkṣukṣīrapiṣṭatilavikr̥tiśuṣkaśākapiśitaharitakāmlalavaṇakaṭukakśārānūpāmiṣāṇi varjayēt|" iti| navadhānyādēratyapathyatvamāha- varga iti|
Adhikarana madyasya tatō'pathyatvam (41) · Śloka 41
madyaṁ tīkṣṇōṣṇarūkṣāmlamāśu vyāpādayēdvraṇam| |41|
मद्यं तीक्ष्णोष्णरूक्षाम्लमाशु व्यापादयेद्व्रणम्| |४१|
🔊 Audio coming soon
sarvāṅgasundarī vyākhyā ( kr̥ta)
sa0-madyaṁ tīkṣṇōṣṇādiguṇaṁ drāk vraṇaṁ vyāpādayēt| tasmāt madyamīdr̥śaṁ varjyam, nāparam| tathā ca tantrāntarē-"sasnēhaṁ madhuraprāyaṁ nātitīkṣṇamakarkaśam| tanu yatsukhapēyaṁ ca mārdvīkēṣu taduttamam||" ityuktam| tasmāt mārdvīkādiprāyaṁ rōdhrāsavādikaṁ vā yanmadyaṁ tassātmyatvātkiñcit pēyamēva|
āyurvēdarasāyanam vyākhyā ( kr̥ta)
ā0 ra0- madyasya tatō'pathyatvamāha-madyamiti|
Adhikarana vraṇaśuśrūṣaṇam (41-43) · Śloka 43
| vālōśīraiśca vījyēta na cainaṁ parighaṭṭayēt||41|| na tudēnna ca kaṇḍūyēccēṣṭamānaśca pālayēt| snigdhavr̥ddhadvijātīnāṁ kathāḥ śruṇvanmanaḥpriyāḥ||42|| āśāvān vyādhimōkṣāyā kṣipraṁ vraṇamapōhati| |43|
| वालोशीरैश्च वीज्येत न चैनं परिघट्टयेत्||४१|| न तुदेन्न च कण्डूयेच्चेष्टमानश्च पालयेत्| स्निग्धवृद्धद्विजातीनां कथाः श्रुण्वन्मनःप्रियाः||४२|| आशावान् व्याधिमोक्षाया क्षिप्रं व्रणमपोहति| |४३|
🔊 Audio coming soon
sarvāṅgasundarī vyākhyā ( kr̥ta)
sa0-vālōśīraiścainaṁ vraṇaṁ vījayēt| na cainaṁ parighaṭṭayēt| tathā na vyathayēt| nāpi kaṇḍūyēt| {cēṣṭamānaḥ-kriyāsu} vyāpāraṁ kurvan, vraṇaṁ pālayēt-rakṣēt| tathā snigdhādīnāṁ kathāścittapriyā ākarṇayan rōgamuktayē vihitāśō'hnāya vraṇamapōhati|
āyurvēdarasāyanam vyākhyā ( kr̥ta)
ā0 ra0- vraṇaśuśrūṣaṇamāha-vālōśīraiścēti| vālaiḥ-cāmaraiḥ| uśīraiḥ-vīraṇavyajanaiḥ|
Adhikarana tr̥tīyē divasē prakṣālanādikam dvitīyē prakṣālanādiniṣēdhaḥ niṣēdhātikramē dōṣaḥ (43-44) · Śloka 44
| tr̥tīyē'hni punaḥ kuryādvraṇakarma ca pūrvavat||43|| prakṣālanādi, divasē dvitīyē nācarēttathā| tīvravyathō vigrathitaścirātsaṁrōhati vraṇaḥ||44||
| तृतीयेऽह्नि पुनः कुर्याद्व्रणकर्म च पूर्ववत्||४३|| प्रक्षालनादि, दिवसे द्वितीये नाचरेत्तथा| तीव्रव्यथो विग्रथितश्चिरात्संरोहति व्रणः||४४||
🔊 Audio coming soon
sarvāṅgasundarī vyākhyā ( kr̥ta)
sa0-tr̥tīyē ca divasē punarapi prakṣālanādi karma pūrvavatpūrvēṇa vraṇakarmaṇā tulyaṁ, kuryāt| dvitīyē tu divasē prakṣālanādi nācarēt| kimityāha-tathētyādi| tathā-tēna prakārēṇa, vraṇastīvravyathaḥ sampadyatē| tathā, vigrathitaḥ-sa pradēśō bahubhirgranthibhiryuktaḥ syāt| tathā, vraṇāścirāt-cirēṇa kālēna, saṁrōhati-saṁrōhaṁ yāti rūḍhaḥ sampadyatē|
āyurvēdarasāyanam vyākhyā ( kr̥ta)
ā0 ra0- tr̥tīyē divasē prakṣālanādikamāha-tr̥tīyē'hnīti| dvitīyē divasē prakṣālanādikaṁ niṣēdhati-divasa iti| niṣēdhātikramē dōṣamāha-tathēti| vigrathitō-viṣamasaṁsthānaḥ|
Adhikarana snigdhādivikēśikāyāḥ kalkasya ca niṣēdhaḥ (45) · Śloka 45
snigdhāṁ rūkṣāṁ ślathāṁ gāḍhāṁ durnyastāṁ ca vikēśikām| vraṇē na dadyātkalkaṁ vā|45|
स्निग्धां रूक्षां श्लथां गाढां दुर्न्यस्तां च विकेशिकाम्| व्रणे न दद्यात्कल्कं वा|४५|
🔊 Audio coming soon
sarvāṅgasundarī vyākhyā ( kr̥ta)
sa0-vraṇē-vraṇākhyē ādhārē, snigdhādiguṇayuktaṁ vikēśikāṁvraṇāntaḥpravēśayōgyāṁ vartiṁ, na dadyāt| ślathāṁ-śithilām, gāḍhāṁ-nibiḍām, durnyastāṁ-viṣamanyastāṁ| atra cātiśabdō'rthavaśādgamyamānō bōdhyaḥ| ata ēva saṅgrahē spaṣṭaṁ kr̥tvōvāca (sū.a. 38)- {"atisnigdharūkṣamatiślathamatigāḍham| } atisnēhātklēdaḥ|" iti| kalkaṁ vā-kalkamapyatisnigdhādiguṇayuktaṁ vraṇē na yōjayēt| piṣṭamauṣadhaṁ dravāplutaṁ kalka ityucyatē (hr̥.ka.a.6|10)| kimiti snigdhādiguṇayuktāṁ vivēśikāṁ kalkaṁ vā na dadyāt ? ityāha-
āyurvēdarasāyanam vyākhyā ( kr̥ta)
ā0 ra0-snigdhādivikēśikāṁ kalkaṁ ca niṣēdhatisnigdhāmiti|
Adhikarana niṣēdhātikramē dōṣaḥ (45-47) · Śloka 47
| snēhātklēdō vivarddhatē||45|| māṁsacchhēdō'tirugraukṣyādvaraṇaṁ śōṇitāgamaḥ| ślathātigāḍhadurnyāsairvraṇavartmāvagharṣaṇam||46|| gh|47|
| स्नेहात्क्लेदो विवर्द्धते||४५|| मांसच्छेदोऽतिरुग्रौक्ष्याद्वरणं शोणितागमः| श्लथातिगाढदुर्न्यासैर्व्रणवर्त्मावघर्षणम्||४६|| घ्|४७|
🔊 Audio coming soon
sarvāṅgasundarī vyākhyā ( kr̥ta)
sa0-yatō'tisnēhāt klēdavr̥ddhiḥ| atarūkṣatvācca māṁsacchhēdō'tivyathā ca, tathā vidāraṇaṁ raktasrāvaśca| ślathādiguṇayuktēna ca vraṇamārgasyāvagharṣaṇaṁ syāt| vikēśikā vraṇē kasmāddhīyatē ? ityāha-
āyurvēdarasāyanam vyākhyā ( kr̥ta)
ā0 ra0- niṣēdhātikramē dōṣamāha-snēhāditi| raukṣyāccatvārō dōṣāḥ|
Adhikarana vikēśikāyā guṇaḥ (47) · Śloka 47
sapūtimāṁsaṁ sōtsaṅgaṁ sagatiṁ pūyagarbhiṇam| vraṇaṁ viśōdhayēcchīghraṁ sthitā hyantarvikēśikā||47||
सपूतिमांसं सोत्सङ्गं सगतिं पूयगर्भिणम्| व्रणं विशोधयेच्छीघ्रं स्थिता ह्यन्तर्विकेशिका||४७||
🔊 Audio coming soon
sarvāṅgasundarī vyākhyā ( kr̥ta)
sa0-vikēśikā vraṇāntarē sthitā pūtyādiyuktaṁ vraṇaṁ viśōdhayēt| atō'sau yōjyā| kīdr̥gvraṇaṁ ? pūtiyuktamāṁsam, sōtsaṅgaṁ-unnatam, pūyādibhakṣitamāṁsādipradēśaḥ śūnyō dēhasya gatirucyatē, {sagatiṁ-} gatiyuktam, pūyaścāsau garbhaśca, sa vidyatē yasya sa pūyagarbhī taṁ ca|
āyurvēdarasāyanam vyākhyā ( kr̥ta)
ā0 ra0- vikēśikāyā guṇamāha-sapūtimāṁsamiti|
Adhikarana apakvapāṭanē cikitsā (48) · Śloka 48
vyamlaṁ tu pāṭitaṁ śōphaṁ pācanaiḥ samupācarēt| bhōjanairupanāhaiśca nātivraṇavirōdhibhiḥ||48||
व्यम्लं तु पाटितं शोफं पाचनैः समुपाचरेत्| भोजनैरुपनाहैश्च नातिव्रणविरोधिभिः||४८||
🔊 Audio coming soon
sarvāṅgasundarī vyākhyā ( kr̥ta)
sa0-vyamlaṁ-vidagdhaṁ pakvāpakvaṁ vraṇaṁ, pakvamityajñānāt pāṭitam| tathāvidhiṁ śvayathuṁ pācanairannapānaistathāvidhaiścōpanāhaiḥ-sātvaṇakiṇvādikalpitaiḥ, upācarēt| na ca sarvairēvāviśēṣēṇa pācanairupācarēdityāha-nātītyādi| vraṇātivirōdhīni yāni śvayathupācanāni-amlakaṭukatīkṣṇōṣṇalavaṇaprāyāṇi dravyāṇi tathaivaṁprāyāṇi bhōjanāni, na tairupācarēt| api tu kiñcidēva vraṇavirōdhīni yāni tairucitairupakramēditi bōdhyam, nātiśabdaprayōgāt|
āyurvēdarasāyanam vyākhyā ( kr̥ta)
ā0 ra0- apakvapāṭanē cikitsāmāha-vyamlaṁ tviti| vyamlaṁ-vidagdham, tatra hiraktaṁ vigatāmlarasaṁ bhavati| iti pāṭanavidhiḥ|
Adhikarana sīvanasya viṣayaḥ (49-51) · Śloka 51
sadyaḥ sadyōvraṇān sīvyēdvivr̥tānabhighātajān| mēdōjāllikhitān granthīn hrasvāḥ pālīśca karṇayōḥ||49|| śirōkṣikūṭanāsauṣṭhagaṇḍakarṇōrubāhuṣu| grīvālalāṭamuṣkasphiṅmēḍhrapāyūdarādiṣu||50|| gambhīrēṣu pradēśēṣu māṁsalēṣvacalēṣu ca| |51|
सद्यः सद्योव्रणान् सीव्येद्विवृतानभिघातजान्| मेदोजाल्लिखितान् ग्रन्थीन् ह्रस्वाः पालीश्च कर्णयोः||४९|| शिरोक्षिकूटनासौष्ठगण्डकर्णोरुबाहुषु| ग्रीवाललाटमुष्कस्फिङ्मेढ्रपायूदरादिषु||५०|| गम्भीरेषु प्रदेशेषु मांसलेष्वचलेषु च| |५१|
🔊 Audio coming soon
sarvāṅgasundarī vyākhyā ( kr̥ta)
sa0-sadyōvraṇānabhighātajān vivr̥tān-vistīrṇamukhān, sadyaḥ-tatkṣaṇādēva, sīvyēt| saṅkucitavadanāstu tē na sīvyāḥ| abhighātājjanma yēṣāṁ tānēvam| sadyōvraṇāniti sadyōgrahaṇamabhighātajēṣvapi cirakālasthitēṣu nāyaṁ vidhiriti dyōtayati| mēdōjān granthīn likhitān-śastralikhitān, sūcyā sīvyēt| karṇayōśca hrakhāḥ pālīrlikhitāḥ sīvyēt| śirōkṣiprabhr̥tiṣu pradēśēṣu prabhūtamāṁsēṣvacalēṣu ca sthitān vraṇān sīvyēt|
āyurvēdarasāyanam vyākhyā ( kr̥ta)
ā0 ra0- atha sīvanavidhiḥ| tatra sīvanasya viṣayamāha-sadya iti| sadyaḥ-vraṇōtpattidinē| sadyōvraṇān-śōfapākādipūrvarūparahitān| tēṣāmabhidhātajatvāt vyabhicārē'pi tadupādānaṁ dōṣasaṁsargavyudāsārtham| likhitānlikhanōddhr̥tamēdasaḥ| karṇapālīśca likhitāḥ-likhanōddhr̥tahasvatvahētuduṣṭāvayavāḥ| śiraḥprabhr̥tau yē gambhīrā māṁsalā acalāśca pradēśāstēṣu sthitān vraṇān|
Adhikarana sīvanāviṣayaḥ (51-52) · Śloka 52
| na tu vaṅkṣaṇakakṣādāvalpamāṁsē calē vraṇān||51|| vāyunirvāhiṇāḥ śalyagarbhān kṣāraviṣāgnijān| |52|
| न तु वङ्क्षणकक्षादावल्पमांसे चले व्रणान्||५१|| वायुनिर्वाहिणाः शल्यगर्भान् क्षारविषाग्निजान्| |५२|
🔊 Audio coming soon
sarvāṅgasundarī vyākhyā ( kr̥ta)
sa0-vaṅkṣaṇādisthitānāṁ vraṇānāṁ gambhīrādipradēśatvātsīvanaṁ prāptaṁ tanniṣidhyatē| māṁsalēṣu sthirēṣu ca vraṇān sīvyēdityuktyaivālpamāṁsē calē sthānē vraṇānna sīvyēdityarthē labdhē, alpamāṁsāṁścalāṁśca vraṇān na sīvyēditi vacanamatiśayārtham| jātucidabhighātajān vivr̥tānapyēvaṁvidhān vraṇān na sīvyēditi gamayati| tathā, vāyuṁ nirvahanti-niḥśvasanti, tān vāyunirvāhiṇō na sīvyēt| tathā śalyaṁ garbhē yēṣāṁ tān śalyagarbhān, tathā kṣāraviṣāgnibhyō jātān vraṇān na sīvyēt| sīvanātpūrvaṁ yatkriyatē taddarśayati-
āyurvēdarasāyanam vyākhyā ( kr̥ta)
ā0 ra0- sīvanāviṣayamāha-na tviti| vāyunirvāhiṇaḥ=vāyunirgamadvārabhūtān|
Adhikarana sīvanasya vidhiḥ (52-54) · Śloka 54
| sīvyēccalāsthiśuṣkāsratr̥ṇarōmāpanīya tu||52|| pralambi māṁsaṁ vicchinnaṁ nivēśya svanivēśanē| sandhyasthi ca sthitē raktē snāyvā sūtrēṇa valkalaiḥ||53|| sīvyēnna dūrē nāsannē gr̥hṇannālpaṁ na vā bahu| |54|
| सीव्येच्चलास्थिशुष्कास्रतृणरोमापनीय तु||५२|| प्रलम्बि मांसं विच्छिन्नं निवेश्य स्वनिवेशने| सन्ध्यस्थि च स्थिते रक्ते स्नाय्वा सूत्रेण वल्कलैः||५३|| सीव्येन्न दूरे नासन्ने गृह्णन्नाल्पं न वा बहु| |५४|
🔊 Audio coming soon
sarvāṅgasundarī vyākhyā ( kr̥ta)
sa0-sthānāccalitamasthyapanīya-nirasya, tathā śuṣkaraktaṁ tr̥ṇāni rōmāṇi cāpāsya, tathā śastrādinā prakarṣēṇa lambi vraṇē yadvidyatē māṁsaṁ tat svanivēśanē-ātmīyē sthānē, nivēśya-saṁsthāpya, tathā sandhyasthi svē sthānē saṁsthāpya, sthitē raktē astravadrūpatvaṁ prāptē sati, vraṇaṁ sīvyēt| kēna ? snāyvādinā, tathā valkalaiḥ| valkalāni-śaṇāśmantakāditvagudbhavāni, taiḥ| kathaṁ sīvyēt ? na dūrē-na viprakr̥ṣṭē, na cāsannē-nātinikaṭē nālpaṁ vraṇāṁśaṁ na ca bahu gr̥hṇan|
āyurvēdarasāyanam vyākhyā ( kr̥ta)
ā0 ra0- sīvanasya vidhimāha-sīvyēditi| calaṁ yadasthi śuṣkaṁ ca yadasr̥k tadapanīya, tr̥ṇāni rōmāṇi ca sandhigatamasthi ca svanivēśanē nivēśya| sthitē-strāvānnivRttē| valkalē viśēṣa uktaḥ saṅgrahē (sū.a. 38)- "śaṇāśmantakamūrvātasīnāṁ vā valkalaiḥ|" iti| tathā (saṁ. sū. a. 38)- " sīvanavikalpāstu samāsēna catvāraḥ| gōṣphaṇikā tunnasēvanī vēllitakaṁ rājagranthibandhanamiti| tēṣāṁ nāmabhirēvākr̥tivibhāgaḥ, prahāravaśāccōpayōgaḥ|" iti|
Adhikarana sīvanānantaraṁ kartavyam (54-55) · Śloka 55
| sāntvayitvā tataścārtaṁ vraṇē madhughr̥tadrutaiḥ||54|| añjanakṣau majamaṣīphalinīśallakīphalaiḥ| sarōdhramadhukairdigdhē yuñjyādbandhādi pūrvavat||55||
| सान्त्वयित्वा ततश्चार्तं व्रणे मधुघृतद्रुतैः||५४|| अञ्जनक्षौ मजमषीफलिनीशल्लकीफलैः| सरोध्रमधुकैर्दिग्धे युञ्ज्याद्बन्धादि पूर्ववत्||५५||
🔊 Audio coming soon
sarvāṅgasundarī vyākhyā ( kr̥ta)
sa0-tataḥ-tasmātsīvanādanantaraṁ, āturaṁ sāntvayitvā- samāśvāsya śītāmbusparśavyajanādibhiḥ, anantaramuktairliptē vraṇē sati| kaiḥ ? añjanādibhiḥ| kimbhūtaiḥ ? madhughr̥tābhyāṁ drutaiḥ-ālōḍitaiḥ| pūrvavadbandhādi yuñjyāt,- tr̥tīyāntādvatiḥ, pūrvōddiṣṭēna karmaṇā tulyaṁ kaṣāyakṣālanādi kavalikādikaṁ ca yōjyamityarthaḥ|
āyurvēdarasāyanam vyākhyā ( kr̥ta)
ā0 ra0- sīvanānantaraṁ kartavyamāha-sāntvayitvēti| añjanaṁ-strōtōñjanam| phalinī-priyaṅguḥ pūrvavat-pāṭanavat|
Adhikarana śuṣkaṁ vraṇamārdaṁ kr̥tvā sīvyēt (56) · Śloka 56
vraṇē niḥśōṇitauṣṭhō yaḥ kiñcidēvāvalikhya tam| sañjātarudhiraṁ sīvyētsandhānaṁ hyasya śōṇitam||56||
व्रणे निःशोणितौष्ठो यः किञ्चिदेवावलिख़्य तम्| सञ्जातरुधिरं सीव्येत्सन्धानं ह्यस्य शोणितम्||५६||
🔊 Audio coming soon
sarvāṅgasundarī vyākhyā ( kr̥ta)
sa0-avidyamānaśōṇitau ōṣṭau-pārśvau, yasya tamēvaṁbhūtaṁ vraṇaṁ kiñcidēva-īṣanmātramēva śastrēṇāvalikhya, taṁ sañjātarudhiraṁ santaṁ sīvyēt, na tvēvamēva| yasmādasya-vraṇasya, sandhānaṁ śōṇitamēva|
āyurvēdarasāyanam vyākhyā ( kr̥ta)
ā0 ra0- śuṣkaṁ vraṇamārdraṁ kr̥tvā sīvyēdityāha-vraṇa iti| niḥśōṇita ōṣṭhō-vyadhaniyapradēśō, yasya sa tathā| iti sīvanavidhiḥ|
Adhikarana bandhanasya sādhanāni (57-59) · Śloka 59
bandhanāni tu dēśādīn vīkṣya yuñjīta tēṣu ca| āvikājinakauśēyamuṣṇam, kṣau maṁ tu śītalam||57|| śītōṣṇam tūlasantānakārpāsasnāyuvalkajam| tāmrāyastrapusīsāni vraṇē mēdaḥkaphādhikē||58|| bhaṅgē ca yuñjyātphalakaṁ carmavalkakuśādi ca| |59|
बन्धनानि तु देशादीन् वीक्ष्य युञ्जीत तेषु च| आविकाजिनकौशेयमुष्णम्, क्षौ मं तु शीतलम्||५७|| शीतोष्णम् तूलसन्तानकार्पासस्नायुवल्कजम्| ताम्रायस्त्रपुसीसानि व्रणे मेदःकफाधिके||५८|| भङ्गे च युञ्ज्यात्फलकं चर्मवल्ककुशादि च| |५९|
🔊 Audio coming soon
sarvāṅgasundarī vyākhyā ( kr̥ta)
sa0-badhyatē vraṇa ēbhiriti bandhanāni,- āvikājinādīni, tēṣu-vraṇēṣu, dēśakālasātmyādīn vīkṣya-nirūpya, yathāyōgamāvikādyanyatamaṁ yuñjyāt| tēṣāṁ ca bandhanānāṁ svarūpamāha-āvikētyādi| avirēvāvikaḥ, tasyēdamāvikam| "avēḥ kaḥ" iti kaḥ, "tasyēdam" ityaṇ| ajinaṁ-carma| kōśātsambhūtaṁ-kauśēyam| "kōṣāḍhḍhañ" iti ḍhañ| āvikādikaṁ bandhanatrayamuṣṇaṁ-uṣṇavīryam| kṣau maṁ tu bandhanaṁ śītalaṁ-śītavīryam| tūlasantānādijaṁ śītōṣṇaṁ-ubhayasvabhāvam| tūlaṁ śālmalyādijaṁ tasya santānaḥ-santatiḥ sūtrarūpatā, tēna niṣpāditam| mēdaḥkaphādhikē vraṇē tāmrādīni bandhanārthaṁ yuñjyāt| bhaṅgē-asthibhaṅgē| na kēvalaṁ tāmrādīni mēdaḥkaphādhikē vraṇē yuñjayāt, yāvaccaśabdāttāni bhaṅgē'pi yuñjyāt| na ca kēvalaṁ bhaṅgē tāmrādīni yuñjyāt, yāvatphalakādi ca yuñjyāt| kuśāśabdēna vaṁśādikambikōcyatē| adhunā bandhaprakārānnirdiśati-
āyurvēdarasāyanam vyākhyā ( kr̥ta)
ā0 ra0- atha bandhanavidhiḥ| tatra bandhanasya sādhanānyāha-bandhanānīti| santānaṁ-nantuḥ| phalakaṁ-kāṣṭhapaṭṭikā| kuśā-vēṇudalam|
Adhikarana bandhanaprakārāḥ (59-61) · Śloka 61
svanāmānugatākārā bandhāstu daśa pañca ca||59|| kōśasvastikamuttōlīcīnadāmānuvēllitam| khaṭvāvibandhasthagikāvitānōtsaṅgatōṣphaṇāḥ||60|| yamakaṁ maṇḍalākhyaṁ ca pañcāṅgī cēti yōjayēt| (vidadhyāttēṣu tēṣvēva kōśamaṅguliparvasu| svastikaṁ karṇakakṣādistanēṣūktaṁ ca sandhiṣu||1|| muttōlīṁ mēḍhragrīvādau yuñjyāccīnamapāṅgayōḥ| sambādhē'ṅē tathā dāma, śākhāsvēvānuvēllitam||2|| khaṭṭāṁ gaṇḍē hanau śaṅkhē, vibandhaṁ pr̥ṣṭhakōdarē| aṅguṣṭhāṅgulimēḍhrāgrē sthagikāmantravr̥ddhiṣu||3|| vitānaṁ pr̥thulāṅgādau tathā śirasi cērayēt| vilambini tathōtsaṅgaṁ, nāsauṣṭhacibukādiṣu||4|| gōṣphaṇaṁ sandhiṣu tathā, yamakaṁ yamikē vraṇē| vr̥ttē'ṅghē maṇḍalākhyaṁ, ca pañcāṅgī cōrdhvajatruṣu||5|| ) yō yatra suniviṣṭaḥ syāttaṁ tēṣāṁ tatrē buddhimān||61||
स्वनामानुगताकारा बन्धास्तु दश पञ्च च||५९|| कोशस्वस्तिकमुत्तोलीचीनदामानुवेल्लितम्| खट्वाविबन्धस्थगिकावितानोत्सङ्गतोष्फणाः||६०|| यमकं मण्डलाख्यं च पञ्चाङ्गी चेति योजयेत्| (विदध्यात्तेषु तेष्वेव कोशमङ्गुलिपर्वसु| स्वस्तिकं कर्णकक्षादिस्तनेषूक्तं च सन्धिषु||१|| मुत्तोलीं मेढ्रग्रीवादौ युञ्ज्याच्चीनमपाङ्गयोः| सम्बाधेऽङे तथा दाम, शाखास्वेवानुवेल्लितम्||२|| खट्टां गण्डे हनौ शङ्खे, विबन्धं पृष्ठकोदरे| अङ्गुष्ठाङ्गुलिमेढ्राग्रे स्थगिकामन्त्रवृद्धिषु||३|| वितानं पृथुलाङ्गादौ तथा शिरसि चेरयेत्| विलम्बिनि तथोत्सङ्गं, नासौष्ठचिबुकादिषु||४|| गोष्फणं सन्धिषु तथा, यमकं यमिके व्रणे| वृत्तेऽङ्घे मण्डलाख्यं, च पञ्चाङ्गी चोर्ध्वजत्रुषु||५|| ) यो यत्र सुनिविष्टः स्यात्तं तेषां तत्रे बुद्धिमान्||६१||
🔊 Audio coming soon
sarvāṅgasundarī vyākhyā ( kr̥ta)
sa0-svaṁ ca tannāma ca svanāma, tēnānugataḥ-anubaddhaḥ, ākāraḥ-saṁsthānaviśēṣō, yēṣāṁ tē pañcadaśa bandhā vakṣyamāṇāḥ| tuśabdō'vadhāraṇārthaḥ| arthāt pañcadaśaivēti, na nyūnāḥ| kōśādayaḥ pañcāṅgyantāḥ| tēṣāṁ-bandhānāṁ madhyē, yō-bandhaviśēṣō, yatra-yasmindēhadēśē, suniviṣṭō bhavēt, taṁ-bandhaṁ kōśādikaṁ, tatra-tasmindēśē, yōjayēt| tatra kōśō'ṅgulīparvasu carmādikr̥taḥ| svastikaṁ sandhikūrcabhrūstanāntarakṣākṣikapōlakarṇēṣu| muttōlī grīvāmēḍhrayōḥ| cīnamapāṅgayōḥ| dāma sambādhē'ṅgē vaṅkṣaṇādau| anuvēllitaṁ śākhāsu| khaṭvā hanusandhigaṇḍēṣu| vibandhamudarōrupr̥ṣṭhēṣu| sthagikā'ṅguṣṭhāṅgulīmaḍhrāntramūtravr̥ddhiṣu| vitānaṁ mūrddhādau pr̥thulē'ṅgē| utsaṅgamaṅgaviśēṣē lambini bāhvādau| gōṣphaṇaṁ nāsauṣṭhacibukasakthiṣu| yamakaṁ yamalavraṇayōḥ| maṇḍalaṁ vr̥ttē'ṅgē| pañcāṅgī jatrūrdhvamiti yōjanā kāryā| sampratyēṣāṁ bandhānāṁ gāḍhaśithilādibandhatvaṁ dēśādyanurōdhānnirūpayati-
āyurvēdarasāyanam vyākhyā ( kr̥ta)
ā0 ra0- bandhānāha-svanāmānugatākārā iti| saṅgrahē tu (sū. a. 38)- "tatra kōśamaṅguliparvasu vidadhyāt| dāma sambādhē'ṅgē| utsaṅgaṁ vilambini| svastikaṁ sandhikūrcabhrūstanāntarakakṣākṣikapōlakarṇēṣu| anuvēllitaṁ śāhāsu| muttōlīṁ grīvāmēḍhrayōḥ| maṇḍalaṁ vr̥ttē'ṅgē| sthagikāmaṅguṣṭhāṅgulimēḍhrāgramūtravr̥ddhiṣu| yamakaṁ yamalavraṇayōḥ| khaṭvāṁ hanuśaṅkhagaṇḍēṣu| cīnamapāṅgayōḥ| vibandhamudarōrupr̥ṣṭhēṣu| vitānaṁ murddhādau pr̥thulē'ggē| gōṣfaṇaṁ nāsauṣṭhacibukasakthaṣu| ~pañcāṅgīṁ atrūrdhvamiti| na tu vraṇasyōpari kuryād granthiṁ na cābādhakarō yathā syāt| bandhstviṣṭō'nilē duṣṭē daṣṭē bhagnē vraṇēṣu ca| tatrāntyayōrdvidhā bandhaḥ savyadakṣiṇabhēdataḥ|| trividhastvēva sarvatra gāḍhaślathasamatvataḥ| kafavātē ghanō gāḍhaḥ pittaraktē tanuḥ ślathaḥ|| vātapittē samō bandhaḥ kaphapittavraṇēśu ca||" iti|
Adhikarana pradēśaviśēṣēṇa bandhanaviśēṣaḥ (62-66) · Śloka 66
badhnīyādgāḍhamūrusphikkakṣāvaṅkṣaṇamūrdhasu| śākhāvadanakarṇāraḥpr̥ṣṭhapārśvagalōdarē||62|| samaṁ mēhanamuṣkē ca, nētrē sandhiṣu ca ślatham| badhnīyācchhithilasthānē vātaślēṣmōdbhavē samam||63|| gāḍhamēva samasthānē, bhr̥śaṁ gāḍhaṁ tadāśayē| śītē vasantē'pi ca tau mōkṣaṇīyau tryahātryahāt||64|| pittaraktōtthayōrbandhō gāḍhasthānē samō mataḥ| samasthānē ślathō, naiva śithilasyāśayē tathā||65|| sāyaṁprātastayōrmōkṣō grīṣmē śaradi cēṣyatē| |66|
बध्नीयाद्गाढमूरुस्फिक्कक्षावङ्क्षणमूर्धसु| शाख़ावदनकर्णारःपृष्ठपार्श्वगलोदरे||६२|| समं मेहनमुष्के च, नेत्रे सन्धिषु च श्लथम्| बध्नीयाच्छ्हिथिलस्थाने वातश्लेष्मोद्भवे समम्||६३|| गाढमेव समस्थाने, भृशं गाढं तदाशये| शीते वसन्तेऽपि च तौ मोक्षणीयौ त्र्यहात्र्यहात्||६४|| पित्तरक्तोत्थयोर्बन्धो गाढस्थाने समो मतः| समस्थाने श्लथो, नैव शिथिलस्याशये तथा||६५|| सायंप्रातस्तयोर्मोक्षो ग्रीष्मे शरदि चेष्यते| |६६|
🔊 Audio coming soon
sarvāṅgasundarī vyākhyā ( kr̥ta)
sa0-ūrusphigādiṣu dēśēṣu gāḍhaṁ bandhaṁ badhnīyāt, na tu ślatham| śākhāvadanādiṣu samaṁ bandhaṁ badhnīyāt| caśabdānmēhanē muṣkayōśca samamēva| nētrē-nayanē, tathā'sthisandhiṣu śithilaṁ bandhaṁ badhnīyāt| śithilasthānē śithilō bandha upadiṣṭaḥ tatra sthānē yau vraṇau vātaślēṣmōdbhavau tau samaṁ kr̥tvā badhnīyāt, na gāḍhaṁ na śithilam| samasthānē samō bandha upadiṣṭaḥ, tatra sthānē vātaślēṣmōdbhavau vraṇau gāḍhamēva badhnīyāt| bhr̥śamityādi| tadityanēna gāḍhāśayaḥ parāmr̥śyatē| gāḍhabandhōddiṣṭē sthānē vātaślēṣmōdbhavau vraṇau bhr̥śaṁ-sutarāṁ, gāḍhaṁ badhnīyāt| tau-vātaślēṣmōdbhavau vraṇau, śītē-hēmantaśiśirākhyē kālē, vasantē ca tryahāttryahāt-tridinaṁ tridinamantarīkr̥tya, mōkṣaṇiyau-mōkṣaṇārhau bhavataḥ| pittaraktōtthayōrvraṇayōrgāḍhabandhasthānē samō bandhō mataḥ, na śithilaḥ| samasthānē yatra samō bandhaḥ upadiṣṭaḥ śākhāvadanādau, tatrasthayōḥ pittaraktōtthayōrvraṇayōḥ śithilō bandhaḥ kāryaḥ| śithilasya bandhasyāśayē yatra śithilō bandhaḥ kārya ityuktaṁ, tatra naiva bandhaḥ kārya iti| ēvakārō'vadhāraṇārthaḥ kr̥taḥ| tayōḥ-pittaraktōtthayōḥ, sāyaṁprātardvau kālau mōkṣa iṣyatē| grīṣmē śaradi cānyadōṣōtthavraṇasyāpi sāyaṁprātarmōkṣa iṣyatē| na tu bandhēna vinā vraṇō dhārya ityāha-
āyurvēdarasāyanam vyākhyā ( kr̥ta)
ā0 ra0- pradēśaviśēṣēṇa bandhaviśēṣamāha-bandhīyāditi| ūrvādiṣu gāḍham| śākhādiṣu samam| nētrādau ślatham| tryahāntarmōkṣaṇaṁ sāyaṁprātarmōkṣaṇaṁ ca sarvartuṣu prātpasyaikāhāntaramōkṣaṇasya kratuviśēṣē'pavādaḥ|
Adhikarana bandhākaraṇē dōṣaḥ (66-67) · Śloka 67
| abaddhō daṁśamaśakaśītavātādipīḍitaḥ||66|| duṣṭibhavēcciraṁ cātra na tiṣṭhētsnēhabhēṣajam| kr̥cchhrēṇa śuddhiṁ rūḍhiṁ vā yāti rūḍhō vivarṇatām||67||
| अबद्धो दंशमशकशीतवातादिपीडितः||६६|| दुष्टिभवेच्चिरं चात्र न तिष्ठेत्स्नेहभेषजम्| कृच्छ्ह्रेण शुद्धिं रूढिं वा याति रूढो विवर्णताम्||६७||
🔊 Audio coming soon
sarvāṅgasundarī vyākhyā ( kr̥ta)
sa0-abaddhō vraṇō daṁśādibhiḥ pīḍitō-vyathitaḥ, tathā''diśabdāt rajōdhūmādibhiśca vyathitaḥ, aduṣṭō'pi duṣṭībhavati| atra ca-vraṇē, bandhamantarēṇa vraṇaghnaḥ snēha upayōjitō bhēṣajaṁ cōpayōjitaṁ ciraṁ na tiṣṭhēt| bandhaṁ ca vinā samyagupacaryamāṇō'pi vraṇaḥ kaṣṭēna śuddhiṁ yāti| rūḍhiṁ ca kr̥cchhrēṇa yāti| rūḍhō'pi san vivarṇatāṁ yāti, na śarīravarṇatām| ityabandhanāddōṣāḥ| idānīṁ bandhanādguṇānāha-
āyurvēdarasāyanam vyākhyā ( kr̥ta)
ā0 ra0- bandhākaraṇē dōṣamāha-abaddha iti| snēhaśca bhēṣajaṁ cēti dvandvaḥ| saṅgrahē tu (sū. a. 38)- "snēhaścātra na ciraṁ tiṣṭhati| bhēṣajamacirācchuṣyati|" iti|
Adhikarana bandhakaraṇē guṇaḥ (68-70) · Śloka 70
baddhastu cūrṇitō bhagnō viślaṣṭaḥ pāṭitō'pi vā| chhinnasnāyusirō'pyāśu sukhaṁ saṁrōhati vraṇaḥ||68|| utthānaśayanādyāsu sarvēhāsu na pīḍyatē| udvr̥ttauṣṭhaḥ samutsannō viṣamaḥ kaṭhinō'tiruk||69|| samō mr̥duraruk śīghraṁ vraṇaḥ śudhyati rōhati| |70|
बद्धस्तु चूर्णितो भग्नो विश्लष्टः पाटितोऽपि वा| छिन्नस्नायुसिरोऽप्याशु सुखं संरोहति व्रणः||६८|| उत्थानशयनाद्यासु सर्वेहासु न पीड्यते| उद्वृत्तौष्ठः समुत्सन्नो विषमः कठिनोऽतिरुक्||६९|| समो मृदुररुक् शीघ्रं व्रणः शुध्यति रोहति| |७०|
🔊 Audio coming soon
sarvāṅgasundarī vyākhyā ( kr̥ta)
sa0-turavadhāraṇē| baddha ēva vraṇō bandhamāhātmyāt, cūrṇitaḥ-asthisamāśritō vraṇaḥ, tathā bhagnaḥ-asthisamāśrita ēva vraṇaḥ, tathā viślaṣṭaḥ-sandhisthānādanyasthānagatō vraṇō nētrādisthaḥ, tathā pāṭitaḥ-sarvadēśasthitō'pi, tathā chhinnasnāyusirō'pyāśu vraṇaḥ sukhaṁ samyagrōhati| tathōtthānaśayanādyāsu sarvāsvīhāsu-cēṣṭāsu, na pīḍyatē-na vyathatē| ūrdhvaṁ vr̥ttau-vartulau, ōṣṭhau yasya sa udvr̥ttauṣṭhaḥ, na samaḥ| tathā, samutsannaḥ-samāntāducchhūnarūpō yō vraṇō na samaḥ| tathā, viṣamaḥ udvr̥ttauṣṭhasamutsannābhyāṁ vyatiriktō viṣamasaṁsthānaḥ| tathā, kaṭhinō-yō vraṇō na mr̥duḥ| tathā, atiruk ca yō vraṇaḥ| sa sarva udvr̥ttauṣṭhādiḥ pañcaprakārō'pi bandhamāhātmyāt aśubharūpatāṁ hitvā vraṇaḥ { samō mr̥duraruk ca bhavati, tathā } śīghraṁ śuddhiṁ yāti rōhati| nanu, udvr̥ttauṣṭhasamutsannāvapi viṣamakaṭhinaśabdēnaiva (bdābhyāmēva) grahīṣyētē, kimētābhyāmupāttābhyāṁ ? astyēvaitat| kintvanayōḥ pr̥thaṅnirdēśēnātiduścikitsyataratvaṁ gamayati|
āyurvēdarasāyanam vyākhyā ( kr̥ta)
ā0 ra0- bandhakaraṇē guṇamāha-baddhastvati| udvr̥ttaḥ-ūrdhvaṁ calitaḥ, ōṣṭhaḥ-prāntō, yasya| samutsannō-vivr̥ddhamāṁsaḥ| viṣamaḥ-kvaciduccaḥ kvavinnīcaḥ| satrividhō'pi samō bhavati| tattaddōṣatyāgāt kaṭhinō mr̥durbhavati| atiruk rujāhīnō bhavati| aśuddhaḥ śudhyati| arūḍhō rōhati|
Adhikarana vraṇaviśēṣē lēpasya patrācchādanam (70-72) · Śloka 72
| sthirāṇāmalpamāṁsānāṁ raukṣyādanuparōhatām||70|| pracchhādyamauṣadhaṁ patrairyathādōṣaṁ yathartu ca| ajīrṇataruṇācchhidraiḥ samantātsunivēśitaiḥ||71|| dhautairakarkaśaiḥ kṣīribhūrjārjunakadambajaiḥ| |72|
| स्थिराणामल्पमांसानां रौक्ष्यादनुपरोहताम्||७०|| प्रच्छ्हाद्यमौषधं पत्रैर्यथादोषं यथर्तु च| अजीर्णतरुणाच्छ्हिद्रैः समन्तात्सुनिवेशितैः||७१|| धौतैरकर्कशैः क्षीरिभूर्जार्जुनकदम्बजैः| |७२|
🔊 Audio coming soon
sarvāṅgasundarī vyākhyā ( kr̥ta)
sa0-sthirāṇāṁ vraṇānāṁ dīrghakālānuṣaṅgiṇāṁ, tathā'lpamāṁsānāṁ-anupacitapalalānāṁ, ata ēva hētōḥ, tathā raukṣyādanuparōhatāṁ-rūḍhimagacchatāṁ, auṣadhaṁ-kalkasnēhādikaṁ yadupayujyatē, tat patraiḥ kṣīribhūrjārjunakadambajaiḥ pracchhadyaṁ-sthagitavyam| yathādōṣaṁ-dōṣānatikramēṇa, yathartu-r̥tvanatikramēṇa ca, tadvaśādyathāyōgam| yathā-vātavraṇē śītatā snigdhōṣṇaiḥ patraiḥ, pittavraṇē gharmakālē śītasvabhāvaiḥ, kaphavraṇē uṣṇakālē rūkṣōṣṇaprāyaiḥ ēvaṁ ca prāvr̥ṣi kālē miśradōṣē ca kalpanīyam| kimbhūtaiḥ patraiḥ ? ajīrṇāni-ajarjarāṇi, taruṇāni-pratyagrāṇi, acchhidrāṇi-chhidrarahitāni, tairajīrṇataruṇācchhidraiḥ| tathā, samantāt-sarvataḥ suṣṭhu nivēśitaiḥ| tathā, dhautaiḥ-jalādinā nirmalīkr̥taiḥ| tathā, akarkaśaiḥ-akaṭhinaiḥ|
āyurvēdarasāyanam vyākhyā ( kr̥ta)
ā0 ra0- vraṇaviśēṣē lēpasya patrācchādanamāha- sthirāṇāmiti| yahādōṣaṁ-śītē dōṣē uṣṇaiḥ, uṣṇē śītaiḥ| ēvaṁ yathartu| ajīrṇataruṇaiḥ-vr̥ddhatvabālatvarahitaiḥ| kṣīriṇaḥ- aśvatthādayaḥ|
Adhikarana vraṇaviśēṣē bandhananiṣēdhaḥ (72-74) · Śloka 74
| kuṣṭhināmagnidagdhānāṁ piṭikāmadhumēhinām||72|| karṇikāścōnduruviṣē kṣāradagdhā viṣānvitāḥ| bandhanīyā na māṁspākē gudapākē ca dāruṇē||73|| śīryamāṇāḥ sarugdāhāḥ śōphāvasthāvisarpiṇaḥ| |74|
| कुष्ठिनामग्निदग्धानां पिटिकामधुमेहिनाम्||७२|| कर्णिकाश्चोन्दुरुविषे क्षारदग्धा विषान्विताः| बन्धनीया न मांस्पाके गुदपाके च दारुणे||७३|| शीर्यमाणाः सरुग्दाहाः शोफावस्थाविसर्पिणः| |७४|
🔊 Audio coming soon
sarvāṅgasundarī vyākhyā ( kr̥ta)
sa0-kuṣṭhyādīnāṁ yē vraṇāstē na bandhanīyāḥ| tathā, unduruviṣē yāḥ karṇikāḥ kōṭharūpāḥ, tāśca na bandhanīyāḥ| tathā, kṣāradagdhā yē vraṇāstathā viṣadagdhā yē vraṇāstē ca na bandhanīyāḥ| tathā, māṁspākē vraṇāstathā dāruṇē ca gudapākē-na gudapākamātrē, vraṇāstē ca na bandhanīyāḥ| māṁspāka iti "māṁsasya paciyuḍghañōḥ" ityalōpaḥ| tathā, śīryamāṇāḥ-śadanāvasthāṁ bhajamānāḥ, tathā sarugdāhāḥ tathā śōphāvasthāḥ-anēkāvasthā bhajantō'pi yē śōphāvasthāvasthitāḥ, tathā visarpiṇō-visarpāvasthāsthitāḥ tē ca na bandhanīyāḥ| idānīṁ sakr̥mīṇāṁ vraṇānāṁ cikitsāmāha-
āyurvēdarasāyanam vyākhyā ( kr̥ta)
ā0 ra0- vraṇaviśēṣē bandhanaṁ niṣēdhati-kuṣṭhināmiti| tē ca kuṣṭhādivraṇāstrayōdaśa| tatra madhumēhināṁ piṭikāḥ| unduruviṣē karṇikāḥ- mūṣakaviṣōtthapadmakarṇikākāramāṁsavr̥ddhayaḥ visarpiṇaḥ-itastatō vraṇāḥ|
Adhikarana vraṇē kr̥mipratīkāraḥ (74-77) · Śloka 77
| arakṣayā vraṇē yasmin makṣikā nikṣipētkr̥mīn||74|| tē bhakṣayantaḥ kurvanti rujāśōphāsrasaṁsravān| surasādiṁ prayuñjīta tatra dhāvanapūraṇē||75|| saptaparṇakarañjārkanimbarājādanatvacaḥ| gōmūtrakalkitō lēpaḥ sēkaḥ kṣārāmbunā hitaḥ||76|| pracchhādya māṁsapēśyā vā vraṇaṁ tānāśu nirharēt| |77|
| अरक्षया व्रणे यस्मिन् मक्षिका निक्षिपेत्कृमीन्||७४|| ते भक्षयन्तः कुर्वन्ति रुजाशोफास्रसंस्रवान्| सुरसादिं प्रयुञ्जीत तत्र धावनपूरणे||७५|| सप्तपर्णकरञ्जार्कनिम्बराजादनत्वचः| गोमूत्रकल्कितो लेपः सेकः क्षाराम्बुना हितः||७६|| प्रच्छ्हाद्य मांसपेश्या वा व्रणं तानाशु निर्हरेत्| |७७|
🔊 Audio coming soon
sarvāṅgasundarī vyākhyā ( kr̥ta)
sa0-arakṣayā-apālanēna. yasmin vraṇē makṣikā kr̥mīnnikṣipēt| tē-tatrasthāḥ kr̥mayō, vraṇaṁ bhakṣayantō rujādīn kurvanti| tatra-sakr̥mau vraṇē, surasādigaṇaṁ dhāvanapūraṇē-tannimittaṁ, prayuñjīta| dhāvanaṁ ca pūraṇaṁ ca tasmin| tathā tasminvraṇē saptaparṇādīnāṁ tvacō gōmūtrakalkitāḥ-piṣṭāḥ, lēpō hitaḥ| tathā, kṣārāmbunā sēkō hitaḥ| athavā māṁsapēśyā vraṇaṁ pracchhadya, tān-kr̥mīn, āśu nirharēt|
āyurvēdarasāyanam vyākhyā ( kr̥ta)
ā0 ra0- vraṇē kr̥mipratīkāramāha-arakṣayēti| surasādigaṇasya vkāthēna dhāvanaṁ, cūrṇēna pūraṇam| rājādanaḥ-rājāhvaḥ| māṁsapēśyā-māṁsagarbhayā pēśyā| tān-māṁsalōbhāt pēśīpraviṣṭān kr̥mīn|
Adhikarana aśuddhasya rōpaṇaniṣēdhaḥ (77-78) · Śloka 78
| na cainaṁ tvaramāṇō'ntaḥ sadōṣamuparōhayēt||77|| sō'lpēnāpyapacārēṇa bhūyō vikurutē yataḥ| |78|
| न चैनं त्वरमाणोऽन्तः सदोषमुपरोहयेत्||७७|| सोऽल्पेनाप्यपचारेण भूयो विकुरुते यतः| |७८|
🔊 Audio coming soon
sarvāṅgasundarī vyākhyā ( kr̥ta)
sa0-na cainaṁ-vraṇamantaḥ sadōṣaṁ tvaramāṇō vaidya uparōhayēt| kasmāt ? ityāha-sa ityāti| yatō-yasmāt, saḥ-antaḥ sthitadōṣō vraṇō, rūḍhō'pi bhūyaḥ-punaḥ, stōkēnāpyapacārēṇa vikr̥tiṁ yāti|
āyurvēdarasāyanam vyākhyā ( kr̥ta)
ā0 ra0- aśuddhasya rōpaṇaṁ niṣēdhati-na cainamiti|
Adhikarana rūḍhavraṇasya saptamāsāvadhirniyamaḥ (78-79) · Śloka 79
| rūḍhē'pyajīrṇavyāyāmavyavāyādīn vivarjayēt||78|| harṣaṁ krōdhaṁ bhayaṁ cāpi yāvadāsthairyasambhavāt| ādarēṇānuvartyō'yaṁ māsān ṣaṭ sapta vā vidhiḥ||79||
| रूढेऽप्यजीर्णव्यायामव्यवायादीन् विवर्जयेत्||७८|| हर्षं क्रोधं भयं चापि यावदास्थैर्यसम्भवात्| आदरेणानुवर्त्योऽयं मासान् षट् सप्त वा विधिः||७९||
🔊 Audio coming soon
sarvāṅgasundarī vyākhyā ( kr̥ta)
sa0-rūḍhē'pi satyajīrṇādīn vivarjayēt| { sthairyaṁ yāvat harṣādīn varjayēt| } ayaṁ-ajīrṇavyāyāmavyavāyādiparivarjanalakṣaṇō, vidhiḥ ṣaṭ sapta vā māsān ādarēṇa-yatnavatā, anuvartyaḥ-anuṣṭhātavyaḥ|
āyurvēdarasāyanam vyākhyā ( kr̥ta)
ā0 ra0- rūḍhavraṇasya satpamāsāvādhiṁ niyamamāha-rūḍha iti| ādiśabdāt krōdhaśikabhayādayaḥ|
Adhikarana anuktaṁ svayamūhanīyam (29) · Śloka 29
utpadyamānāsu ca tāsu tāsu vārtāsu dōṣādibalānusārī| taistairupāyaiḥ prayataścikitsē dālōcayan vistaramuttarōktam||80|| iti śrīvaidyapatisiṁhaguptasūnuśrīmadvāgbhaṭaviracitāyāmaṣṭāṅgahr̥dayasaṁhitāyāṁ sūtrasthānē śastrakarmavidhirnāmaikōnatriṁśō'dhyāyaḥ||29||
उत्पद्यमानासु च तासु तासु वार्तासु दोषादिबलानुसारी| तैस्तैरुपायैः प्रयतश्चिकित्से दालोचयन् विस्तरमुत्तरोक्तम्||८०|| इति श्रीवैद्यपतिसिंहगुप्तसूनुश्रीमद्वाग्भटविरचितायामष्टाङ्गहृदयसंहितायां सूत्रस्थाने शस्त्रकर्मविधिर्नामैकोनत्रिंशोऽध्यायः||२९||
🔊 Audio coming soon
sarvāṅgasundarī vyākhyā ( kr̥ta)
sa0- yathā,- makṣikābhiḥ kr̥minikṣēpāt kr̥miprābalyē jātē cikitsā vihitā| tathā, anyāsvapi tāsu tāsu vārtāsu avasthāsvanirdiṣṭasvarūpābhidhānāsu, utpadyamānāsu, taistaiḥ- uktānuktaiḥ, upāyaiḥ- sādhanaiḥ, cikitsēdvaidyaḥ| kimbhūtō vaidyaḥ ? dōṣādibalānusārī,-dōṣādīnāṁ balaṁ dōṣādibalam, ādiśabdāddēśakālādayō gr̥hyantē, tadanusaratyēvaṁvidō yō vaidyaḥ saḥ| tathā, prayati-yatnaparaḥ| tathā, uttarē- uttaratantrē vraṇabhaṅgavidhānē, uktaṁ-nirdiṣṭaṁ, vistaramālōcayan-nirūpayan, na tu yadr̥cchayēti bhāvaḥ| indravajrāvr̥ttam| iti śrīmr̥kāṅkadattaputraśrīmadaruṇadattaviracitāyāmaṣṭāṅgahr̥dayaṭīkāyāṁ sarvāṅgasundarākhyāyāṁ sūtrasthānē śastrakarmavidhirnāmaikōnatriṁśō'dhyāyaḥ samāptaḥ|| 29||
āyurvēdarasāyanam vyākhyā ( kr̥ta)
ā0 ra0- nuktaṁ svayamūhanīyamityāha-utpadyamānāsviti| vārtāsu-avasthāsu| uttarōktaṁ-uttarasthānōktam| iti hēmādriṭīkāyāmāyurvēdarasāyanē| śastrakarmaprakaraṇaṁ sāmastyēna nirūpitam||