Adhikarana অধ্যাযোপক্রমঃ · Śloka
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০ -অন্নরক্ষাধ্যাযাদনন্তরং মাত্রাশিতীযাধ্যাযারম্ভো যুক্তঃ| যতো বিষাদিভ্যো রক্ষিতমন্নপানং হীনমাত্রাতিমাত্রাভ্যবহৃতং জীবিতোপঘাতায সম্পদ্যতে| মাত্রাভ্যবহৃতং প্রাণিনাং প্রাণায|-
Adhikarana মাত্রাশিতীযাধ্যাযোঽষ্টমঃ (২) · Śloka ২
অথাতো মাত্রাশিতীযমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২||
अथातो मात्राशितीयमध्यायं व्याख्यास्यामः| इति ह स्माहुरात्रेयादयो महर्षयः| (गद्यसूत्रे||२||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-অথেত্যানন্তর্যে| যথা,-"অথাঽতো ধর্মজিজ্ঞাসা|" ইত্যত্র মীমাংসাযাং বেদাধ্যযনাদনন্তরং ধর্মো জিজ্ঞাসিতব্য ইত্যর্থঃ| অত ইতি প্রস্তুতাভিসম্বন্ধে| অশনং-অশিতম্| ভাবে নিষ্ঠা| মাত্রযাঽশিতং-মাত্রাশিতম্, তস্মৈ হিতো মাত্রাশিতীযঃ| শেষং পূর্ববদ্ব্যাখ্যেযম্|
আযুর্বেদরসাযনম্ ব্যাখ্যা ( কৃত)
আ০ র০- মাত্রাশিতীয্মধ্যাযং ব্যাখ্যাতুং প্রতিজানীতেঅথেতি| যতঃ পূর্বেঽধ্যাযে "আহারো বর্ণিতস্তত্র তত্র তত্র চ বক্ষ্যতে|" ইত্যুক্তম্ (হৃ. সূ. অ. ৭/৫৩)| স চাসাধারণো যথাস্বং বক্তব্যঃ| অসাধারণার্থমযমধ্যমধ্যঃ| অত এব মাত্রাশিতীযঃ| মাত্রাশব্দেন সম্যম্যোগো লক্ষ্যতে| স চাসম্যগ্যোগস্য ত্যাগাত্সম্ভবতি| স পুনঃ সত্পধাসঙ্কীর্ণাশনং, বিরুদ্ধাশনং, অমাত্রাশর্ম,অজীর্ণাশনং, সমশনং, অধ্যশনং, বিষমাশনং চেতি| তত্র নিষিদ্ধনাং গৃহে নিষিদ্ধৈর্বা সহ নিষিদ্ধং চান্নং যত্র ভুজ্যতে তত্-সঙ্কীর্ণা শনম্| তচ্চ "শত্রুসত্রগণাকীর্ণগণিকাপণিকাশনম্|" ইত্যাদ্যুক্তম্ (হৃ. সূ. অ. ২/৪৩)| বিরুদ্ধাশনম্-অহিতাশনম্| তচ্চ "বিরুদ্ধমপি চাহারং" ইত্যাদ্যুক্তম্ (হৃ. সূ. অ. ৭/২৯)| অমাত্রাশনাদীন্যত্রোত্র্যন্তে| মাত্রাবদপি যন্নজীর্যতি তত্-অজীর্ণাশনম্| সমশনাদীন্যত্রৈব লক্ষযিষ্যতি|অ
Adhikarana মাত্রাশনম্ (১) · Śloka ১
মাত্রাশী সর্বকালং স্যান্মাত্রা হ্যগ্নেঃ প্রবর্তিকা| মাত্রাং দ্রব্যাণ্যপেক্ষন্তে গুরূণ্যপি লঘূন্যপি||১||
मात्राशी सर्वकालं स्यान्मात्रा ह्यग्नेः प्रवर्तिका| मात्रां द्रव्याण्यपेक्षन्ते गुरूण्यपि लघून्यपि||१||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-সর্বকালং-স্বস্থ আতুরো বা, মাত্রাশী স্যাত্-পরিমিতাশী ভবেত্| কুতো হেতোঃ ? হি-যস্মাত্, মাত্রাঽগ্নেঃ প্রবর্তিকা স্বব্যাপারে| অগ্নিপ্রবৃত্তিশ্চ দেহস্থিতিহেতুঃ| তথা চোক্তম্-"অগ্নিমূলং বলং পুংসাং বলমূলং হি জীবিতম্|" ইতি| তস্মান্মাত্রাযাঃ প্রাধান্যম্| অস্মাচ্চ কারণান্মাত্রাযাঃ প্রাধান্যং যতো মাত্রাং দ্রব্যাণ্যপেক্ষন্তে গুরূণ্যপি লঘূনি চ| তত্র গুরূণি-পিষ্টক্ষীরদ্রাক্ষাক্ষোডেক্ষুমাষানূপমাংসাদীনি| লঘূনি-দিব্যোদকরক্তশালিষষ্টিকমুদ্গলাবকপিঞ্জলৈণশশশম্বরাদীনি|
আযুর্বেদরসাযনম্ ব্যাখ্যা ( কৃত)
আ০ র০- তত্র মাত্রাং বিধত্তে-মাত্রাশীতি| মাত্রামশ্নাতীতি মাত্রাশী| যদ্যপি মাত্রাবিশিষ্টান্নপানস্যৈব কর্মত্বম্, তথাপি প্রাধান্যার্থং মাত্রাযাঃ কর্মত্বব্যপদেশঃ| কিমর্থং মাত্রাশী স্যাত্ ? হি-যস্মাত্, মাত্রা অগ্নেঃ প্রবর্তিকাপচন্তমগ্নিং প্রবর্তযতি, পাচযতীত্যর্থঃ| ননু, দ্রব্যাণ্যগ্নিমিন্ধনত্বাত্প্রবর্তযন্তি, ন মাত্রেত্যত আহ-মাত্রামিতি| ননু, গুরূণি দ্রব্যাণি দুর্জরত্বান্মাত্রামপেক্ষন্তাম্, ন পুনর্লঘূনীত্যত আহ-গুরূণ্যপীতি|
Adhikarana গুরূণাং লঘূনাং চ মাত্রাপ্রমাণম্ (২) · Śloka ২
তত্র গুরূণাং কা মাত্রা ? কা(চ) লঘূনাম্ ? ইত্যাহ গুরূণামর্ধসৌহিত্যং লঘূনাং নাতিতৃপ্ততা| মাত্রাপ্রমাণং নির্দিষ্টং সুখং যাবদ্বিজীর্যতি||২||
तत्र गुरूणां का मात्रा ? का(च) लघूनाम् ? इत्याह गुरूणामर्धसौहित्यं लघूनां नातितृप्तता| मात्राप्रमाणं निर्दिष्टं सुखं यावद्विजीर्यति||२||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-গুরূণাং দ্রব্যাণামর্ধসৌহিত্যং-অর্ধতৃপ্তিঃ| লঘূনাং নাতিতৃপ্ততা-নাতিতৃপ্তিঃ, কিং তর্হি ? সৌহিত্যমাত্রম্| এতন্মাত্রাপ্রমাণং নির্দিষ্টম্| মাত্রা-হ্রস্বা মধ্যা বৃহতী চ, তস্যাঃ প্রমাণং-মাত্রাপ্রমাণম্| তত্র মাত্রা-পরিমাণং মানম্, তস্যাস্তু প্রমাণং-উন্মানম্| এবং চাত্র মাত্রাশব্দস্যাপৌনরুক্ত্যম্| হি যস্মাত্, যাবত্ পরিমাণমভ্যবহৃতং সুখং-অবিকৃতিং কৃত্বা, জীর্যতি-পরিণমতি|
আযুর্বেদরসাযনম্ ব্যাখ্যা ( কৃত)
আ০ র০- ননু গুরুভির্লঘুভির্বা তৃত্পিরেবোত্পদ্যতে, ন তেষাং বিশেষ ইত্যত আহ-গুরূণামিতি| যাবতাঽঽহাররাশিনা তৃপ্তিরুত্পদ্যতে তাববোঽর্ধং ভুজ্যত ইতি-অর্ধসৌহিত্যম্| তাবন্মাত্রমেব-নাতিতৃপ্ততা| ননু, এবং চেন্মাত্রাযা অব্যবস্থিতত্বং প্রাপ্নোতীত্যত আহমাত্রেত্যাদি| মাত্রাপ্রমাণং-মাত্রালক্ষণম্, যাবত্সুখং জীর্যতি তাবন্মাত্রাশব্দঃ বাচ্যমিত্যর্থঃ| উক্তং চ খারণাদিনা"যদন্যবহৃত সম্যগ্যথাকালং জরাং ব্রজেত্| প্রকৃত্যবিকৃতিং কৃত্বা তন্মাত্রালক্ষণং বিদুঃ||" ইতি| তস্মাদ্গুরূণামর্ধসৌহিত্যং সুখং জীর্যতি, লঘূনাং নাতিতৃত্পতেতি নাব্যবস্থা|
Adhikarana হীনমাত্রভোজনে দোষাঃ (৩) · Śloka ৩
ভোজনং হীনমাত্রং তু ন বলোপচযৌজসে| সর্বেষাং বাতরোগাণাং হেতুতাং চ প্রপদ্যতে||৩||
भोजनं हीनमात्रं तु न बलोपचयौजसे| सर्वेषां वातरोगाणां हेतुतां च प्रपद्यते||३||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-হীনমাত্রং পুনরশনং ন বলায, নোপচযায, ন চৌজসে| সর্বেষাং বাতরোগাণাং হেতুতাং-কারণতাং যাতি|
আযুর্বেদরসাযনম্ ব্যাখ্যা ( কৃত)
আ০ র০- অথ অমাত্রাশনে দোষাঃ| তচ্চ দ্বিবিধম্, হীনমাত্রমতিমাত্রং চ| তত্র হীনমাত্রজান্ দোষানাহভোজনমিতি| বলং-শক্তিঃ| উপচযঃ-পুষ্টিঃ| ওজঃ-কান্তিঃ|
Adhikarana অতিমাত্রে দোষাঃ (৪) · Śloka ৪
অতিমাত্রং ত্বশনং ত্রীনপি দোষান্ প্রকোপযেত্| |৪|
अतिमात्रं त्वशनं त्रीनपि दोषान् प्रकोपयेत्| |४|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-অতিমাত্রং ত্বশনং ত্রীনপি দোষান্ শীঘ্রমেব প্রকোপযতি|
আযুর্বেদরসাযনম্ ব্যাখ্যা ( কৃত)
আ০ র০- অতিমাত্রজান্ দোষানাহ-অতিমাত্রমিতি|
Adhikarana বিসূচিকালসকযোঃ সম্প্রাপ্তিঃ (৪-৬) · Śloka ৬
প্রকুপিতাশ্চ ত্রযো দোষা অলসকাখ্যং বিসূচিকাখ্যং বা ব্যাধিং যথা কুর্বন্তি, তথা দর্শযতি | পীড্যমানা হি বাতাদ্যা যুগপত্তেন কোপিতাঃ||৪|| আমেনান্নেন দিষ্টেন তদেবাবিশ্য কুর্বতে| বিষ্টম্ভযন্তোঽলসকং চ্যাবযন্তো বিসূচিকাম্||৫|| অধরোত্তরমার্গাভ্যাং সহসৈবাজিতাত্মনঃ| |৬|
प्रकुपिताश्च त्रयो दोषा अलसकाख्यं विसूचिकाख्यं वा व्याधिं यथा कुर्वन्ति, तथा दर्शयति | पीड्यमाना हि वाताद्या युगपत्तेन कोपिताः||४|| आमेनान्नेन दिष्टेन तदेवाविश्य कुर्वते| विष्टम्भयन्तोऽलसकं च्यावयन्तो विसूचिकाम्||५|| अधरोत्तरमार्गाभ्यां सहसैवाजितात्मनः| |६|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-তেনাপক্বেনান্নেন-আহারেণ, দুষ্টেন বতাদ্যা হি-যস্মাত্, পীড্যমানাঃ-বিবধ্যমানাঃ রুদ্ধমার্গত্বাত্, অত এব যুগপত্-এককালং সর্ব এব, কোপিতাস্তদেব-দুষ্টমন্নমাবিশ্য-আশ্রিত্যালসকং কুর্বতে| কিং কুর্বতঃ ? বিষ্টম্ভযতঃ,-তদেব দুষ্টমন্নং স্রোতঃসু রুন্ধানাঃ| তথা, অধরোত্তরমার্গাভ্যাং সহসৈব-অনুচিতে দেশে কালে (চ), চ্যাবযন্তঃ-ঊর্ধ্বমধশ্চ নিষ্কাশযন্তঃ| অজিতাত্মনঃ-অসংযতচেতসঃ পুংসৌ বিসূচিকাং কুর্বতে|
আযুর্বেদরসাযনম্ ব্যাখ্যা ( কৃত)
আ০ র০- অথ প্রসঙ্গাদতিমাত্রপ্রকুপিতদোষজানাং রোগাণাং নিদানচিকিত্সিতে কথযতি| তত্র বিসূচিকালসকযোঃ সম্প্রাত্পিমাহ-পীড্যমানা ইতি| পীড্যমানাঃ সন্তো যুগপত্কোপিতাঃ-স্ত্রোতোধাত্ পরস্পরসঙ্ঘট্টনেন ত্রযোঽপ্যেকদৈব কোপং নীতাঃ| কেন ? তেন,-অতিমাত্রেণান্নেন| অতিমাত্রত্বাদেবামেনপাককালাতিক্রমেঽপ্যপক্বেন, অত এব দুষ্টেন-বিকৃতেন, তদেবাবিশ্য-তথাবিধমেবান্নমধিষ্ঠায, এবংভূতাস্তদেবান্নং বিষ্টম্ভযন্তোঽলসকং কুর্বতে| চ্যাবযন্তঃ পুনর্বিসূচিকাম্| কাভ্যাং চ্যাবযন্তঃ ? অধরোত্তরমার্গাভ্যাম্| সহসৈববেগেন| অজিতাত্মগ্রহণমন্নলোলুপস্যৈবালসদ্যুত্পত্তিরিতি জ্ঞাপনার্থম্| উক্তং চ সুশ্রুতেন (উ. অ. ৫৬/৫)- " ন তাং পরিমিতাহারা লভন্তে বিদিতাগমাঃ| মূঢাস্তামজিতাত্মানো লভন্তে কলুষাশযাঃ||" ইতি||
Adhikarana অলসকনির্বিচনম্ (৬-৭) · Śloka ৭
| প্রযাতি নোর্ধ্বং নাধস্তাদাহারো ন চ পচ্যতে||৬|| আমাশযেঽলসীভূতস্তেন সোঽলসকঃ স্মৃতঃ| |৭|
| प्रयाति नोर्ध्वं नाधस्तादाहारो न च पच्यते||६|| आमाशयेऽलसीभूतस्तेन सोऽलसकः स्मृतः| |७|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-ঊর্ধ্বং-মুখেনাহারো ন প্রযাতি, ন চাধস্তাত্-গুদেন প্রযাতি, ন চাহারঃ পচ্যতে, আমশযে-"নাভিস্তনান্তরং জন্তোরামাশয ইতি স্মৃতঃ|" তস্মিন্, অলসীভূত ইবালসীভূতঃ| যথা,-অকর্মশীলঃ পুরুষোঽলস ইত্যুচ্যতে, তথাঽযমাহারোঽলসীভূতস্তিষ্ঠতি| তেন হেতুনা স রোগোঽলসকঃ স্মৃতঃ|
আযুর্বেদরসাযনম্ ব্যাখ্যা ( কৃত)
আ০ র০- অলসকং নির্বক্তি-প্রযাতীতি| যস্মাদস্মিন্ ব্যাধাবাহারঃ আমাশযেঽলসীভূতঃ, তস্মাদসাবলসযতীত্যলসকঃ| অলসত্বং-নিষ্ক্রিতত্বম্| তদেব প্রযাতীত্যাদিনা স্পষ্টীকৃতম্|
Adhikarana বিসূচিকানির্বচনম্ (৭-৮) · Śloka ৮
বিসূচিকাযা নির্বচনমাহ | বিবিধৈর্বেদনোদ্ভেদৈর্বায্বাদিভৃশকোপতঃ||৭|| সূচীভিরিব গাত্রাণি বিধ্যতীতি বিসূচিকা| |৮|
विसूचिकाया निर्वचनमाह | विविधैर्वेदनोद्भेदैर्वाय्वादिभृशकोपतः||७|| सूचीभिरिव गात्राणि विध्यतीति विसूचिका| |८|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-বায্বাদীনাং ত্রযাণামত্যন্তপ্রকোপাত্ নানাপ্রকারৈর্বেদনোদ্ভেদৈঃ-পীডোত্পাদৈঃ, যস্মাদ্গাত্রাণি সূচিভিরিব বিধ্যতি, তস্মাদ্বিসূচিকেত্যুচ্যতে| বিবিধানাং বিকারাণাং সূচিকা-বিসূচিকেত্যুচ্যতে|
আযুর্বেদরসাযনম্ ব্যাখ্যা ( কৃত)
আ০ র০- বিসূচিকাং নির্বক্তি-বিবিধৈরিতি| বিবিধসূচীতুল্যত্বাদ্বিসূচিকা| তদেব "বিবিধৈঃ" ইত্যাদিনা স্পষ্টীকৃতম্|
Adhikarana বিসূচিকালক্ষণম্ (৮-৯) · Śloka ৯
| তত্র শূলভ্রমানাহকম্পস্তম্ভাদযোঽনিলাত্||৮|| পিত্তাজ্জ্বরাতিসারান্তর্দাহতৃট্প্রলযাদযঃ| কফাচ্ছর্দ্যঙ্গগুরুতাবাক্সঙ্গষ্ঠীবনাদযঃ||৯||
| तत्र शूलभ्रमानाहकम्पस्तम्भादयोऽनिलात्||८|| पित्ताज्ज्वरातिसारान्तर्दाहतृट्प्रलयादयः| कफाच्छर्द्यङ्गगुरुतावाक्सङ्गष्ठीवनादयः||९||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-বাতাদধিকাত্ শূলাদযো ভবন্তি| আদিশব্দেনাঙ্গোদ্বেষ্টনমুখশোষাদিপরিগ্রহঃ| পিত্তাদ্দৃদ্ধাত্ জ্বরাদ্যাঃ স্যুঃ| প্রলযো-মূর্চ্ছাপ্রাযঃ| আদিশব্দেন মদাদিপরিগ্রহঃ| কফাদধিকাত্ ছর্দ্যাদযো ভবন্তি| আদিশব্দেন ক্ষবথ্বাদীনাং গ্রহণম্|
আযুর্বেদরসাযনম্ ব্যাখ্যা ( কৃত)
আ০ র০- বিসূচিকালক্ষণমাহ-তত্রেতি| তত্রবিসূচিকাযাম্| অনিলাত্ শূলাদযো ভবন্তি| পিত্তাত্ জ্বরাদযঃ| কফাত্ ছর্দ্যাদযঃ| অন্তর্দাহঃ-কোষ্ঠদাহঃ| প্রলযো-মূর্চ্ছা| অঙ্গগ্রহণং সর্বাঙ্গদৌরবার্থম্| বাক্সঙ্গো-বাচঃ স্খলনম্| ষ্ঠীবনং-শ্লেষ্মনিঃসরণম্| অনিলাদিগ্রহণমনিলাদিকৃতসমস্তবিকারপ্রাপ্ত্যর্থম্| অত এবাদিশব্দঃ প্রযুক্তঃ| শূলাদিগ্রহণং তু মন্দবুদ্ধিপ্রবোধনার্থম্| এতেন ত্রৈবিধ্যশঙ্কাঽপ্যপাস্তা| সুশ্রুতোঽপি মুর্চ্ছাদীন্যভেদেনাহ (উ. অ. ৫৬/৬)- "মূর্চ্ছাতিসারৌ বমথুঃ পিপাসা সূলভ্রমোদ্বেষ্টনজৃম্ভদাহাঃ| বৈবর্ণ্যকম্পৌ হৃদযে রুজশ্চ ভবন্তি তস্যাং শিরসশ্চ ভেদঃ||" ইতি|
Adhikarana অলসকলক্ষণম্ (১০-১২) · Śloka ১২
বিশেষাদ্দুর্বলস্যাল্পবহ্নের্বেগবিধারিণঃ| পীডিতং মারুতেনান্নং শ্লেষ্মণা রুদ্ধমন্তরা||১০|| অলসং ক্ষোভিতং দোষৈঃ শল্যত্বেনৈব সংস্থিতম্| শূলাদীন্ কুরুতে তীব্রাংশ্ছর্দ্যতীসারবর্জিতান্||১১|| সোঽলসঃ| |১২|
विशेषाद्दुर्बलस्याल्पवह्नेर्वेगविधारिणः| पीडितं मारुतेनान्नं श्लेष्मणा रुद्धमन्तरा||१०|| अलसं क्षोभितं दोषैः शल्यत्वेनैव संस्थितम्| शूलादीन् कुरुते तीव्रांश्छर्द्यतीसारवर्जितान्||११|| सोऽलसः| |१२|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-দুর্বলত্বাদিযুক্তস্য যন্মারুতেন বিশেষাদন্নং পীডিতম্, অন্তরা-আমাশযমধ্য এব, শ্লেষ্মণা রুদ্ধং-অলসীভূতম্, তথা দোষৈঃ ক্ষোভিতং-আকুলিতম্, অত এবাতিপীডাকারিত্বাচ্ছল্যরূপতযৈব স্থিতম্, তীব্রান্-দুঃসহান্, শূলাদীন্ ছর্দ্যাদিবর্জিতান্ কুরুতে| ছর্দ্যতীসারাভ্যাং হি বিসূচিকোক্তা| সোঽলসসংজ্ঞো রোগঃ| দুর্বলো হ্যনুপচিতধাতুঃ, স ন কদাচিদাহারং সোঢুং শক্তঃ| অল্পাগ্নিশ্চাহারং ন সম্যক্ জরযতি| যতো বেগধারণশীলস্য প্রতিহতো বাযুর্বিমার্গগঃ পিত্তকফাবপি বিমার্গগৌ কুরুতে, ইত্যেতদ্বিশেষেণ নির্দেশঃ|
আযুর্বেদরসাযনম্ ব্যাখ্যা ( কৃত)
আ০ র০- অলসকলক্ষণমাহ-বিশেষাদিতি| যত্রান্নং ছর্দ্যতীসারবর্জিতান্ শূলাদীন্ বিসূচিকোক্তান্ কুরুতে, স ব্যাধিরলসকঃ| কীদৃশমন্নম্ ? মারুতেন পীডিতম্,- অলব্ধসঞ্চারেণ বাযুনাঽঽক্রান্তম্, আক্রান্তত্বাদূর্ধ্বমধো বা অনির্গচ্ছদেব অন্তরা-মধ্য এব, স্লেষ্মণা রুদ্ধং-নিষিদ্ধনির্গমম্ অত এবালসং-নিষ্ক্রিযতাং গতম্, ততো দোষৈঃ- বাতপিত্তকফৈঃ ক্ষোভিতং-সঞ্চালিতম্| কিং সর্বেষামবিশেষেণ ? নেত্যাহ-বিশেষাদিত্যাদি| দুর্বলত্বাদিবিশিষ্টস্য বিশেষেণলস ইত্যর্থঃ|
Adhikarana দণ্ডকালসকলক্ষণম্ (১২-১৩) · Śloka ১৩
দণ্ডকালসকং লিলক্ষযিষুরাহ- অত্যর্থদুষ্টাস্তু দোষা দুষ্টামবদ্ধখাঃ| যান্তস্তির্যক্তনুং সর্বাং দণ্ডবত্স্তম্ভযন্তি চেত্||১২|| দণ্ডকালসকং নাম তং ত্যজেদাশুকারিণম্| |১৩|
दण्डकालसकं लिलक्षयिषुराह- अत्यर्थदुष्टास्तु दोषा दुष्टामबद्धखाः| यान्तस्तिर्यक्तनुं सर्वां दण्डवत्स्तम्भयन्ति चेत्||१२|| दण्डकालसकं नाम तं त्यजेदाशुकारिणम्| |१३|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-চেদ্যদ্যর্থে| অতিশযেন দুষ্টা দোষাঃ, তথা দুষ্টামেন বদ্ধানি-পূর্ণানি, খানি-স্রোতাংসি, যৈস্তে দুষ্টামবদ্ধখাঃ, তথা তির্যগ্গচ্ছন্তঃ, তনুং সর্বাং-শরীরং সকলং, দণ্ডবদ্যদি স্তম্ভযন্তি-প্রসারণাকুঞ্চনরহিতং কুর্বন্তি, তদা দণ্ডকালসকো নাম রোগো ভবতি| তং-দণ্ডকালসকং, ত্যজেত্-নোপক্রমেত্| যত আশুকারিণম্,-আশু-শীঘ্রং স্বকর্ম মারণং করোতীত্যাশুকারী, ক্ষিপ্রং হন্তীত্যর্থঃ|
আযুর্বেদরসাযনম্ ব্যাখ্যা ( কৃত)
আ০ র০- দণ্ডকালসকং লক্ষযতি-অত্যর্থে| যদ্যলসকে দোষাঃ সর্বাং তনুং দণ্ডবত্স্তম্ভযন্তি, তমলসকং দণ্ডকালসকসংজ্ঞমাশুকরিণং ত্যজেত্| কীদ্দশা দোষাঃ ? অন্যর্থদুষ্টাঃ,-অতিমাত্রন্নসেবনেন অতিদুষ্টা| দৃষ্টামবদ্ধাখাঃ,-চিরসঞ্চযাত্ দিষ্টেনামেন-কারণভূতেন, বদ্ধানিঃ-পূরিতানি খানি-স্ত্রোতাংসি, যৈস্তে তথা| তির্যগ্গচ্ছন্তঃ-মার্গবরোথাত্তির্যঙার্গেণ প্রসরন্তঃ|
Adhikarana আমবিষলক্ষণম্ (১৩-১৪) · Śloka ১৪
সম্প্রত্যামবিষং নির্দিশতি | বিরুদ্ধাধ্যশনাজীর্ণশীলিনো বিষলক্ষণম্||১৩|| আমদোষং মহাঘোরং বর্জযেদ্বিষসংজ্ঞকম্| বিষরূপাশুকারিত্বাদ্বিরুদ্ধোপক্রমত্বতঃ||১৪||
सम्प्रत्यामविषं निर्दिशति | विरुद्धाध्यशनाजीर्णशीलिनो विषलक्षणम्||१३|| आमदोषं महाग़ोरं वर्जयेद्विषसंज्ञकम्| विषरूपाशुकारित्वाद्विरुद्धोपक्रमत्वतः||१४||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-বিরুদ্ধং-প্রাগুক্তম্, "বিরুদ্ধমম্লং" (হৃ.সূ.অ. ৭|৩১) ইত্যাদিনা| "বিদ্যাদধ্যশনং" (হৃ.সূ.অ. ৮|৩৪) ইত্যাদিনা-অধ্যশনম্| অজীর্ণং চ-ত্রিবিধং বক্ষ্যতি| এতানি শীলিতুং শীলং যস্য তস্য পুংসো য, আমদোষো বিষলক্ষণঃ-লালাদিলক্ষণযুক্তো, মহাঘোরো-অতিকষ্টো বিষাখ্যো যো ভবতি, তং ন চিকিত্সেত্| কুতঃ ? বিষরূপত্বাদাশুকারিত্বাদ্বিরুদ্ধোপক্রমত্বাচ্চ| বিষসদৃশস্বরূপত্বাদ্বিষে শীতোপক্রমো যুক্তঃ, আমে চোষ্ণোপক্রমো যুক্তঃ, ইতি বিরুদ্ধোপক্রমত্বম্|
আযুর্বেদরসাযনম্ ব্যাখ্যা ( কৃত)
আ০ র০- আমবিষং লক্ষযতি-বিরুদ্ধেতি| বিরুদ্ধাশনাদিশীলিনঃ পুরুবস্যোত্পন্নমামদোষং-অজীর্ণজং ব্যধিং বর্জযেত্| বিরুদ্ধং পযোমত্স্যাদি| অধ্যশনং-বক্ষ্যমাণম্| অজীর্ণ-অজীর্ণাশনম্| কীদৃশমামদোষম্ ? বিষলক্ষণং,-দেহব্যাপিবিষতুল্যলক্ষণম্| মহাঘোরং-তীব্রপীডাকরম্| বিষসংজ্ঞকং-বিষাখ্যম্| আমোপপদৈবেযং সংজ্ঞা| উক্তং চ চরকেণ (বি. অ. ২/১৫)-"বিরুদ্ধাধ্যশনাজীর্ণাশনশীলিনঃ পুনরামদোষমামবিষমাচক্ষতে" ইতি| কুতো বর্জযেত্ ? বিষরুপাশুকারিত্বাত্-বিষরূপত্বাচ্ছীঘ্রকারিত্বাচ্চ| ননু, বিষমপি সাধ্যং দৃষ্টম্| তত্কুতোঽস্য বিষরূপত্বাদসাধ্যত্বম্ ? ইত্যত আহ-বিরুদ্দোপক্রমত্বতঃ,- হেতুবিপরীতব্যাধিবিপরীতযোরুপচারযোর্বিরোধাত্| হেতুর্হ্যত্রামসঞ্চযঃ, তত্রাগ্নেয উপচারঃব্যাধিস্তু বিষরূপঃ তত্র সৌম্য উপচার ইতি বিরোধঃ|
Adhikarana অলসকচিকিত্সা (১৫-১৬) · Śloka ১৬
অথামমলসীভূতং সাধ্যং ত্বরিতমুল্লিখেত্| পীত্বা সোগ্রাপটুফলং বার্যুষ্ণং যোজযেত্ততঃ||১৫|| স্বেদনং ফলবর্তিং চ মলবাতানুলোমনীম্| নাম্যমানানি চাঙ্গানি ভৃশং স্বিন্নানি বেষ্টযেত্||১৬||
अथाममलसीभूतं साध्यं त्वरितमुल्लिख़ेत्| पीत्वा सोग्रापटुफलं वार्युष्णं योजयेत्ततः||१५|| स्वेदनं फलवर्तिं च मलवातानुलोमनीम्| नाम्यमानानि चाङ्गानि भृशं स्विन्नानि वेष्टयेत्||१६||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-অথেত্যানন্তর্যে| পূর্বোক্তং সাধ্যাসাধ্যমবগম্যানন্তরমামং সাধ্যমদুষ্টং সন্তং ত্বরিতং-দ্রাক্, আতুর উল্লিখেত্-উদ্বমেদিত্যর্থঃ| কিংবিধমামম্ ? অলসীভূতম্,-অলসলক্ষণতাং গতম্| কথমুল্লিখেত্ ? ইত্যাহ-পীত্বেত্যাদি| জলমুষ্ণং পীত্বা বচালবণমদনফলযুক্তং, বমেদিত্যর্থঃ| ততোঽনন্তরং স্বেদনং যোজযেত্| তথা-"বিপাচ্য মূত্রাম্লমধূনি দন্তীপিণ্ডীতকৃষ্ণাবিডধূমকুষ্ঠৈঃ| বর্তিং করাঙ্গুষ্ঠনিভাং ঘৃতাক্তাং গুদে রুজানাহহরীং বিদধ্যাত্||" ইত্যাদি ফলবর্তীং চ মলবাতানুলোমনীং যোজযেত্| তত্রামদোষে দোষবশাদঙ্গানি চ নাম্যমানানি-সঙ্কোচ্যমানানি সন্তি, অত্যর্থং স্বিন্নানি বস্ত্রাদিনা বেষ্টযেত্|
আযুর্বেদরসাযনম্ ব্যাখ্যা ( কৃত)
আ০ র০- উক্তানামামদোষাণাং চিকিত্সামাহ-অথেতি| অথশব্দশ্চিকিত্সারম্ভে মঙ্গলার্থঃ| আমং-আমদোষম্,উল্লিখেত্-বমেত্, অলসীভূতম্| যঃ স্বযং ন প্রবর্ততে বলাত্প্রবর্তমানোঽপি মন্দং মন্দং বা প্রবর্ততে, সোঽলসঃ|আমদো(বি)ষোঽপি তথাভুতঃ| স হ্যলসকেনৈব(নেব) প্রবর্ততে| বিসূচ্যাং তু মন্দং মন্দং প্রবর্ততে| স দ্বিবিধোঽপ্যুল্লেখনীযঃ| উক্তং হি খারণাদিনা-"বিসূচ্যলসকৌ বাম্যৌ পিপ্পলীলবণাম্ভসা|" ইতি| সাধ্যগ্রহণমিহ নিযমার্থম্, সাধ্যমেব ন ত্বসাধ্যমপি| দ্দশ্যতে হি নিদানেঽসাধ্যত্বেনোক্তানাং মাংসগ্রন্থ্যাদীনাং চিকিত্সিতে চিকিত্সোপদেশঃ| আমদোষস্ত্বসাধ্যঃ, অসাধ্য এবেত্যর্থঃ| কিং কৃত্বোল্লিখেত্ ? সোগ্রাপটুফলমুষ্ণং বারি পীত্বা| উগ্রা-বচা| পটু-সৈন্ধবম্| ফলং-মদনফলম্| ততো-বমনানন্তরং, স্বেদনং যোজযেত্ ফলবর্তি চ| কস্যা বর্তেঃ ফলবর্তিসংজ্ঞা ? ইত্যপেক্ষাযামাহ-মলবাতানুলোমনীম্| বিণ্মূত্রাধোবাতানাং প্রবর্তিনী বর্তিঃ-ফলবর্তিরিত্যর্থঃ| স্বেদফলবর্তিদ্রব্যাণ্যুক্তানি খারণাদিনা-"শূলে তু স্তিমিতে সামে স্বেদঃ শস্তো মুহুর্মুহুঃ| রূক্ষোষ্ণৈঃ কটুকৈঃ পাংশুকরীষসিকতাদিভিঃ||পিপ্পল্যোঽগারধূমশ্চ মদনং সর্ষপাস্ত্রিবৃত্| হেমক্ষীরী বচা কিণ্বং কুষ্ঠং দন্তী যবাগ্রজঃ|| সমূত্রলবণাভ্যক্তা ফলবর্তিরিযং হিতা| সংস্বেদ্যালসকে শূলবিবন্ধানাহনাশিনী||" ইতি| যদ্যামদোষেণাঙ্গানি নাম্যন্তে-সঙ্কোচ্যন্তে, তদা তান্যতিস্বিন্নানি কৃত্বা বস্ত্রাদিভির্বেষ্টযেত্|
Adhikarana বিসূচিকাচিকিত্সা (১৭) · Śloka ১৭
বিসূচ্যামতিবৃদ্ধাযাং পার্ষ্ণ্যোর্দাহঃ প্রশস্যতে| তদহশ্চোপবাস্যৈনং বিরিক্তবদুপাচরেত্||১৭||
विसूच्यामतिवृद्धायां पार्ष्ण्योर्दाहः प्रशस्यते| तदहश्चोपवास्यैनं विरिक्तवदुपाचरेत्||१७||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-বিসূচ্যাং-পূর্বোক্তলক্ষণাযাম্, অতিবৃদ্ধাযাং সত্যাং পার্ষ্ণ্যোঃ-খুরিকযোঃ, অযঃশলাকাদিনা দাহঃ প্রশস্যতে| তদহঃ-বিসূচিকারম্ভদিবস এব, এনং-বিসূচিকাবন্তং, উপবাস্য-লঙ্ঘযিত্বা, বিরক্তবত্-পেযাদিক্রমেণোপাচরেত্| সুশ্রুতে (?) চোক্তম্ (সঙ্গ্রহে সূ.অ.১১)-"সুচ্ছর্দিতবিরিক্তস্য গাত্রাযামেঽতিদারুণে| ভল্লাতকমধূচ্ছিষ্টজীর্ণপিণ্যাকনাগরৈঃ|| ঘৃততৈলং পচেত্ সাম্লৈস্তচ্চ খল্লীঘ্নমুত্তমম্|| ত্বক্পত্ররাস্নাগুরুশিগ্রুকুষ্ঠৈরম্লপ্রতিষ্ঠৈঃ সবচাশতাহ্বৈঃ| উদ্বর্তনং খল্লিবিসূচিকাঘ্নং তৈলং বিপক্বং চ তদর্থকারি|| শিরীষনক্তাহ্বফণিজ্জবীজত্রাযন্ত্যপামার্গফলানি বর্তিঃ| বস্তস্য মূত্রেণ বিসূচিকাঘ্নী প্রলেপনস্যাঞ্জনধূমযোগৈঃ||" ইতি|
আযুর্বেদরসাযনম্ ব্যাখ্যা ( কৃত)
আ০ র০- বিসূচ্যাং বিশেষমাহ-বিসূচ্যামিতি| অতিবৃদ্ধাযাং-পূর্বোক্তেন প্রকারেণ অশান্তাযাং, বিসূচ্যাং পার্ষ্ণ্যোর্দাহঃ প্রশস্যতে| প্রশব্দঃ প্রকর্ষার্থঃ| সর্বেষ্বামদোষেষু পার্ষ্ণ্যোর্দাহঃ শস্যতে, বিসূচ্যাং তু প্রকর্ষেণ| যদাহ সুশ্রুতঃ (উ. অ. ৫৬/১২)- "সাধ্যাসু পার্ষ্ণ্যোর্দহনং প্রশস্তমগ্নিপ্রতাপো বমনং চ তীক্ষ্ণম্||" ইতি| সাধ্যাস্বিতি বহুবচনাত্ বিসুচিকালসবিলম্বিকানাং গ্রহণম্| উক্তং চ বঙ্গসেনেন-"বিলম্বিকালসকযোর্বিসূচ্যুক্তঃ ক্রিযাক্রমঃ|" ইতি| পার্ষ্ণিদাহশ্চ পিপ্পল্যাদিভিঃ| যদাহ ভেডঃ-"বিসূচ্যামতিবৃদ্ধাযাং পার্ষ্ণিদেশে চ দাহযেত্| পিপ্পল্যা বাঽপ্যরণ্যা বা শস্ত্রেণাতাপিতেন বা||" ইতি| নিবৃত্তামদোষস্য চিকিত্সামাহ-তদহশ্চেতি| যস্মিন্নহনি আমদোষো নিবৃত্তঃ, তদহরেনমুপবাস্য| তথা চ খারণাদিঃ-"আমাশযবিশুধ্যর্থমথৈনমুপবাসযেত্| জীর্ণে বিরিক্তবৃত্তিঃ স্যাদ্যা প্রোক্তা মণ্ডপূর্বিকা||" ইতি| বমনাদ্যুপক্রমান্তে পঠ্যমানেন প্রকৃতপরামর্শিনা তচ্ছব্দেন আমদোষনিবৃত্তিদিনমেব পরামর্ষ্টুং যুক্তম্, ন পুনরুত্পত্তিদিনম্|
Adhikarana আমদোষিণঃ শমনৌষধনিষেধঃ (১৮-১৯) · Śloka ১৯
অজীর্ণিনো ভেষজং নিষেধতি তীব্রার্তিরপি নাজীর্ণী পিবেচ্ছূলঘ্নমৌষধম্| আমসন্নোঽনলো নালং পক্তুং দোষৌষধাশনম্||১৮|| নিহন্যাদপি চৈতেষাং বিভ্রমঃ সহসাঽঽতুরম্| |১৯|
अजीर्णिनो भेषजं निषेधति तीव्रार्तिरपि नाजीर्णी पिबेच्छूलघ्नमौषधम्| आमसन्नोऽनलो नालं पक्तुं दोषौषधाशनम्||१८|| निहन्यादपि चैतेषां विभ्रमः सहसाऽऽतुरम्| |१९|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-অজীর্ণী-অজীর্ণবান্, তীব্রশূলোঽপি সন্ শূলহরমৌষধং ন পিবেত্| বমনকরমুষ্ণোদকং চ প্রাগুপদিষ্টমেব পিবেদিত্যর্থঃ| শূলঘ্নমিত্যুপলক্ষণার্থম্| ছর্দ্যতীসারঘ্নমপি বিসূচিকাযাং ন পিবেত্| যত আমেন সন্নো-মন্দীভূতোঽগ্নির্দোষৌষধাশনং পক্তুং ন সমর্থঃ| এতেষাং চ-দোষৌশধাশনানাং, ত্রযাণাং সম্বন্ধী যো বিভ্রমো-ব্যাপত্তিঃ, সহসা-কালমনপেক্ষ্যৈব, আতুরং হন্যাত্| ন কেবলমিদং গুণায সম্পদ্যতে, প্রত্যুত দোষং করোতীতি সূচনার্থমপি চেতি কৃতম্|
আযুর্বেদরসাযনম্ ব্যাখ্যা ( কৃত)
আ০ র০-আমদোষিণঃ শমনৌষধং নিষেধতি-তীব্রার্তিরিতি| অপিষব্দ উভযত্র সম্বধ্যতে| তীব্রার্তিরাপি-কিংপুনর্মন্দার্তিরনর্তির্বা| শূলন্ধমপি-কিংপুনপাচনাদিকম্| কুতঃ ? যত আমেনান্নেন সন্নো-মন্দীভূতো, অগ্নির্দোষাদীনি পক্তুংনালং-ন সমর্থঃ| দোষঃ- আমান্নক্ষোভিতঃ কফাদিঃ| ঔষধংতন্নিবৃত্যর্থং প্রযুক্তং পাচনাদি| অশনং-তদ্ধেতুভূতমামান্নম্| নকেবলমৌষধাদর্থানবাপ্তিঃ, অপি তু অনর্থাবাপ্তিররপীত্যাহ-নিহন্যাদিতি| এতেষাং-দোষাদীনাম্,ব্যপত্তিঃ-পাকাভাবজনিতসঙ্ক্ষোভঃ, আতুরং সহসা হন্যাত্| অপি চেতি প্রত্যুতার্থে, রোগশমনার্থমৌষধং রোগং ন শমযতি প্রত্যুত বর্ধযতীত্যর্থঃ|
Adhikarana আমদোষিণোঽবস্থাবিশেষে ঔষধম্ (১৯-২০) · Śloka ২০
কদা ঔষধং যুঞ্জীত ? ইত্যাহ- | জীর্ণাশনে তু ভৈষজ্যং যুঞ্জ্যাত্ স্তব্ধগুরূদরে||১৯|| দোষশেষস্য পাকার্থমগ্নেঃ সন্ধুক্ষণায চ| |২০|
कदा औषधं युञ्जीत ? इत्याह- | जीर्णाशने तु भैषज्यं युञ्ज्यात् स्तब्धगुरूदरे||१९|| दोषशेषस्य पाकार्थमग्नेः सन्धुक्षणाय च| |२०|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-জীর্ণমশনং যস্য তস্মিন্নৌষধং যুঞ্জ্যাদ্বৈদ্যঃ| কীদৃশি ? স্তব্ধং-অচলং, গুরূদরং-কোষ্ঠো, যস্য তস্মিন্| কিমর্থমৌষধং যুঞ্জ্যাত্ ? ইত্যাহ-দোষেত্যাদি| গতার্থম্|
আযুর্বেদরসাযনম্ ব্যাখ্যা ( কৃত)
আ০ র০- অবস্থাবিশেষে ঔষধমাহ-জীর্ণাশন ইতি| আমদোষিণো যদা জীর্ণমন্নং তদা দীপনপাচনমৌষধং দেযম্| সঙ্গ্রহে তু (সূ. অ. ১১)- "সদ্যঃ সম্যগ্বিশুদ্বশস্য শাগ্যন্তি তদুপদ্রবাঃ| শূলে নিরন্নকোষ্ঠোঽদ্ভিঃ কোষ্ণাভিশ্চূর্ণিতাঃ পিবত্|| হিঙ্গুপ্রতিবিষাব্যোষসোবর্চলবভযাঃ| অথবা পিণ্ণ লীমূলত্রিবৃতাদারুসৈন্ধবম্|| শুণ্ঠীস্নুক্ক্ষীরলবণপিপ্প লীমরিচানি চ| পাঠাম্লবেতসক্ষারযবানীর্যোকরাণি চ|| দ্বিরুত্তরং হিঙ্গুবচাগ্নিকুষ্ঠসুবর্চিকাক্ষারবিডাজমোদম্| শূলোদরানাহবিসূচিকার্শোহৃদ্রোগগুল্মোর্ধ্বসমীরণাঘ্নম্|| মুস্তাজমোদপূতীকবচাশুণ্ট্যগ্নিধান্যকৈঃ| সবালকদী বিল্বৈঃ ক্বাথং তৃট্শূলবান্ পিবেত্|| রাস্নাকটফলষড্গ্রন্থাবৃহত্পীদ্বযজোঙ্গকৈঃ| গুগ্গুল্বতিবিষাকুষ্ঠপত্রব্যাঘ্রবখাম্বুদৈঃ|| কুর্যাচ্ছুষ্কৈঃ সমূত্রৈর্বা লেপোদ্বর্তনধূপনম্| সরুগানদ্ধমুদরমম্লপিষ্টৈঃ প্রলেপযেত্|| দারুহৈমবতীকুষ্ঠশতাহ্বাহিঙ্গুসৈন্ধবৈঃ| যবচূর্ণশ্চ সক্ষারতক্রঃ কোষ্ঠার্তিজিত্পরম্|| যোজযেত্সৈন্ধবান্তৈশ্চ বাত বিণ্মূত্রসঙ্গ্রহে| দ্বিক্ষারজীর্ণপিণ্যাককুষ্ঠারুষ্কর চিত্রকৈঃ|| সশুক্তসৈন্ধবৈস্তৈলং পক্বমভ্যঞ্জনে হিতম্| সুচ্ছর্দিতবিরিক্তস্য গাত্রাযামে সুদারুণে|| ভল্লাতকমধূচ্ছিষ্টজীর্ণপিণ্যাকনাগরৈঃ| ঘৃততৈলং পচেত্সাম্লৈরতচ্চ খল্লীঘ্নমুত্তমম্|| ত্বক্যত্ররাস্নাগুরুশিগ্রুকুষ্ঠৈরম্লপ্রপিষ্টৈঃ সবচাশতাহ্বৈঃ| উদ্বর্তনং খল্লিবিসূচিকাঘ্নং তৈলং বিপক্বং চ তদর্থকারি|| যঃ শ্যাবদন্তৌষ্ঠনখোঽল্পসংজ্ঞঃ ছর্দ্যর্দিতোঽন্তর্গততাম্রনেত্রঃ| ক্ষামস্বরঃস্ত্রস্তসমস্তসন্ধির্যাযান্নরোঽসৌ পুনরাগমায|| ব্যোষাং কর ঞ্জস্য ফলং হরিদ্রাং মূলং সমাবাপ্য চ মাতুলুঙ্গযাঃ| ছাযাবিশুষ্কা গুটিকাঃ কৃতাস্তা হন্যুর্বিসূচীং নযনাঞ্জনেন|| শিরীষনক্তাহ্বফণিজ্জবীজত্রাযন্ত্যপামার্গফলানি বর্তিঃ| বস্তস্যমূত্রেণবিসূচিকাঘ্নী প্রলেপধূমাঞ্জননস্যযোগৈঃ|| যামৈশ্চতুভির্দ্বাভ্যং চ ভোজ্যভৈষজ্যযোঃ সমে| পাকোঽগ্নৌ যুক্তযোর্দ্রাক্ তু তীক্ষ্ণে, মন্দে পুনশ্চিরাত্|| সভক্তমৌষধং তস্মান্মন্দাগ্নেরবচারযেত্| পূর্বাহ্ণে ভোজনং সাত্ম্যং লঘু দীপনবৃংহণম্|| প্রাতরাশে ত্বজীর্ণেঽপি সাযমাশো ন দুষ্যতি| অজীর্ণে সাযমাশে তু প্রাতরাশো হি দুষ্যতি|| দিবা প্রবুধ্যতেঽর্কেণ হৃদযং পুণ্ডরীকবত্| তস্মিন্বিবুদ্ধে স্ত্রোতাংসি স্ফুটত্বং যান্তি সর্বশঃ|| ব্যাযামাচ্চ বিহারাচ্চ বিক্ষিপ্তত্বাচ্য চেতসঃ| ন ক্লেদমুপগচ্ছন্তি দিবা তেনাস্য ধাতবঃ|| অক্লিত্রেষ্বন্নমাসিক্তমন্যত্তেষু ন দুষ্যতি| অবিদগ্ধেষ্বিব পযঃস্বন্যত্ সম্মিশ্রিতং পযঃ|| রাত্রৌ তু হৃদযে ম্লানে সংবৃতেষ্বযনেষু চ| যান্তি কোষ্ঠে পরিক্লেদং সংবৃতে দেহধাতবঃ|| ক্লিন্নেষ্বন্যদপক্ষেষু তেষ্বাসিক্তং প্রদুষ্যতি| বিদগ্ধেষু পযঃস্বন্যত্ পযস্তপ্তেষ্বিবার্পিতম্|| নৈশে তস্মাদজীর্ণেঽন্নে নান্যদ্ভুঞ্জীত ভোজনম্| উদ্গারশুদ্ধিরুত্সাহো বেগোত্সর্গো যথোচিতঃ|| লঘুতা ক্ষুত্পিপাসা চ জীর্ণাহারস্য লক্ষণম্| প্রাযঃ প্রজ্ঞাপরাধেন রোগগ্রামঃ প্রজাযতে|| নৃণামশনলুব্ধানাং বিশেষেণ বিসূচিকা|| দোষোপনদ্ধং যদি লীনমামং পিত্তোল্বণস্যাবৃণুযান্ন বহ্বিম্| জাযেত দুষ্টা তু ততো বুভুক্ষা সা মন্দবুদ্ধীন্ বিষবন্নিহন্তি||" ইতি|
Adhikarana আমদোষসামান্যচিকিত্সা (২০-২১) · Śloka ২১
কীদৃশমৌষধং যোজ্যমিত্যাহ | শান্তিরামবিকারাণাং ভবতি ত্বপতর্পণাত্||২০|| ত্রিবিধং ত্রিবিধে দোষে তত্সমীক্ষ্য প্রযোজযেত্| |২১|
कीदृशमौषधं योज्यमित्याह | शान्तिरामविकाराणां भवति त्वपतर्पणात्||२०|| त्रिविधं त्रिविधे दोषे तत्समीक्ष्य प्रयोजयेत्| |२१|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-তুরবধারণে| যস্মাদতর্পণাদেবামজানাং বিকারাণাং-আলস্যজাড্যাগ্নিমান্দ্যাদীনাম্, শান্তিঃ-উপশমো, ভবতি| তস্মাদতর্পণং যোজযেত্| বক্ষ্যতি হি (হৃ.সূ.অ. ১৪|১০)-"মেহামদোষাতিস্নিগ্ধ" ইত্যারভ্য যাবত্ "লঙ্ঘযেন্নিত্যম্" ইতি| তস্মাদতর্পণং সমীক্ষ্য-দেশকালাগ্ন্যাদীন্ পর্যালোচ্য, ত্রিপ্রকারং ত্রিপ্রকারে দোষে বৈদ্যঃ প্রযোজযেত্|
আযুর্বেদরসাযনম্ ব্যাখ্যা ( কৃত)
আ০ র০- উক্তানুক্তামদোষসঙ্গ্রহার্থং সামান্যচিকিত্সামাহ-শান্তিরিতি| আমবিকারাণাং-সর্বেষামজীর্ণান্নজানাং ব্যাধীনাম্| অপতর্পণাত্-লঙ্ঘনাত্| অপতর্পণং বিভজতি-ত্রিবিধমিতি| সমীক্ষ্য-বলাদিকং সম্যগ্জ্ঞাত্বা|
Adhikarana অল্পমধ্যপ্রভূতদোষচিকিত্সা (২১-২২) · Śloka ২২
সম্প্রত্যেতদেব যথাযোগ্যমাহ- | তত্রাল্পে লঙ্ঘনং পথ্যং, মধ্যে লঙ্হ্ঘনপাচনম্||২১|| প্রভূতে শোধনং, তদ্ধি মূলাদুন্মূলযেন্মলান্| |২২|
सम्प्रत्येतदेव यथायोग्यमाह- | तत्राल्पे लङ्घनं पथ्यं, मध्ये लङ्ह्घनपाचनम्||२१|| प्रभूते शोधनं, तद्धि मूलादुन्मूलयेन्मलान्| |२२|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-তত্র-তেষু ত্রিষু মধ্যে, অল্পে দোষে, লঙ্ঘনং-উপবাসাখ্যং, পথ্যম্| তেন হ্যনলানিলবৃধ্দ্যাঽল্পো দোষঃ শীঘ্রং সংশোষ্য জীযতে| মধ্যে দোষে লঙ্ঘনং পাচনং চ পথ্যম্| অগ্নিঃ পচতি, তস্য পচতো যে বিবন্ধহেতবঃ, তান্নিষিধ্য পাটবং পক্তুরাদধতঃ পচেতি প্রযুঙ্ক্ত ইব তত্ পাচযতীতি পাচনমুচ্যতে| হেতুমণ্ণিজন্তাত্পচের্বাহুলকাত্কর্তরি ল্যুট্| যদুপযুক্তমন্নপানৌষধমপক্বানাং সামানাং ধাতূনাং পাচনে সমর্থং তত্ পাচনমিত্যর্থঃ| প্রভূতে শোধনং পথ্যম্| শোধনং তু কাযাদ্বহির্দোষানীরযতি| বক্ষ্যতি হি (হৃ.সূ.অ. ১৪|৫)-"যদীরযেদ্বহির্দোষান্ পঞ্চধা শোধনং তু তত্|" ইত্যাদি| কুতঃ প্রভূত আমদোষে শোধনং হিতম্ ? ইত্যাহ-তদ্ধীত্যাদি| হি-যস্মাত্, তত্-শোধনম্, মূলান্মলান্নাশযেত্| সঙ্গ্রহেঽপ্যুক্তম্ (সূ.অ. ১১)-বহুদোষাণাং পুনর্দোষাবসেচনমেব কার্যম্| ন হ্যস্রাবিতে পল্বলোদকৌঘে শাল্যাদিপুষ্টির্ভবতি|" ইতি|
আযুর্বেদরসাযনম্ ব্যাখ্যা ( কৃত)
আ০ র০- বিভাগং স্পষ্টীকরোতি-তত্রেতি| লঙ্ঘনমত্রোপবাসঃ| লঙ্ঘনপাচনং-উপবাসযুক্তং পাচনৌষধপানম্| প্রভূতে-বহুতরে| শোধনং-বমনাদি| হি-যস্মাত্, তত্-শোধনম্, মলান্মূলাদুন্মূলযেত্-সমূলানুচ্ছিন্দ্যাত্| মলবলমূলং চ বিকারে প্রভূত্বম্|
Adhikarana এবমন্যব্যাধিচিকিত্সা,হেতুব্যাধিবিপর্যযচিকিত্সা (২২-২৩) · Śloka ২৩
| এবমন্যানপি ব্যাধীন্ স্বনিদানবিপর্যযাত্||২২|| চিকিত্সেদনুবন্ধে তু সতি হেতুবিপর্যযম্| ত্যক্ত্বা যথাযথং বৈদ্যো যুঞ্জ্যাদ্ব্যাধিবিপর্যযম্||২৩||
| एवमन्यानपि व्याधीन् स्वनिदानविपर्ययात्||२२|| चिकित्सेदनुबन्धे तु सति हेतुविपर्ययम्| त्यक्त्वा यथायथं वैद्यो युञ्ज्याद्व्याधिविपर्ययम्||२३||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-যথা সন্তর্পণোত্থ আমদোষো নিদানবিপর্যযাচ্চিকিত্স্যতে, এবমন্যানপি জ্বরাদীন্ বিকারান্ স্বনিদানবিপর্যযাচ্চিকিত্সেত্| সন্তর্পণোত্থোঽপতর্পণেন, শীতোত্থ উষ্ণেন, ইত্যাদি| যদি ত্বেবমুপক্রম্যমাণো ব্যাধিরনুবধ্যেত-তেনোপশমং ন গচ্ছেত্, ততো হেতুবিপর্যযং ত্যক্ত্বা ব্যাধিবিপর্যযং যুঞ্জ্যাত্| কিম্ভূতম্ ? যথাযথং,-যদ্যস্য জ্বরাদিব্যাধের্ভৈষজ্যং বক্ষ্যমাণং তত্প্রযুঞ্জীতেত্যর্থঃ| যথা, (সঙ্গ্রহে সূ.অ. ১২)-"মুস্তাপর্পটকং জ্বরে, রজনী যবান্নং প্রমেহে" ইতি|
আযুর্বেদরসাযনম্ ব্যাখ্যা ( কৃত)
আ০ র০- তুল্যন্যাপ্রসঙ্গাদন্যেষামপি ব্যাধীনাং চিকিত্সামাহ-এবমিতি| এবং-আমবিকারবত্| অন্যান্-জ্বরাদীন্| যথা, আমবিকারাঃ সন্তর্পণোত্থাস্তদ্বিপরীতেনাপতর্পণেন চিকিত্স্যন্তে, তথা, অন্যেঽপি বিকারাঃ স্বনিদানবিপর্যযাচ্চিকিত্স্যাঃ| আমবিকারাণামন্যেষাং চ স্বনিদানবিপর্যানুপশমে চিকিত্সামাহ-অনুবন্ধে ত্বিতি| যদি হেতুবিপর্যযে ক্রিযমাণেঽপ্যনুবন্ধো-অনুবর্তনং ব্যাধেঃ, তদা হেতুবিপর্যযং ত্যাক্ত্বা ভিষক্ ব্যাধিবিপর্যযং ভৈষজ্যং যথাযথং যুঞ্জ্যাত্| হেতুবিপরীতাদিস্বরূপমুক্তং সঙ্গ্রহে (সূ.১২ " তত্র হেতুবিপরীতং" ইত্যারভ্য যাবত্ "বিপরীতমর্থং করোতি" ইতি|)|
Adhikarana তদর্থকারী চিকিত্সা,পক্বদোষাণাং চিকিত্সা (২৪) · Śloka ২৪
ন চ হেতুব্যাধিবিপর্যযযোরেব চিকিত্সাযামুপযোগ ইতি দর্শযন্নাহ তদর্থকারি বা, পক্বে দোষে ত্বিদ্ধে চ পাবকে| হিতমভ্যঞ্জনস্নেহপানবস্ত্যাদি যুক্তিতঃ||২৪||
न च हेतुव्याधिविपर्यययोरेव चिकित्सायामुपयोग इति दर्शयन्नाह तदर्थकारि वा, पक्वे दोषे त्विद्धे च पावके| हितमभ्यञ्जनस्नेहपानबस्त्यादि युक्तितः||२४||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-তত্-নিদানব্যাধিবিপর্যযসাধ্যং, অর্থং-রোগোপশমলক্ষণং, কর্তুং শীলং যস্য তত্-তদর্থকারি| তদ্বা যুঞ্জ্যাত্| যথা (সঙ্গ্রহে সূ.অ. ১২)-"মদাত্যযে মদ্যপানম্, অতিসারে বিরেচনম্" ইতি| বাশব্দঃ সমুচ্চযার্থঃ| ইতি ত্রিবিধমৌষধং নির্দিশ্যাঽঽমচিকিত্সামেবানুসরন্নাহ-পক্ব ইতি| পক্বে দোষে-নিরামে, দীপ্তে পাবকে চ| নিরামত্বে দীপ্তাগ্নিত্বে চ সমুচিতমেব হিতমভ্যঙ্গাদিকম্| যুক্তিতো-মাত্রযা, যথাঽগ্নিসাদাদি ন ভবতীতি|
আযুর্বেদরসাযনম্ ব্যাখ্যা ( কৃত)
আ০ র০- পক্বদোষাণামামবিকারাণাং চিকিত্সামাহ-পক্বেদোষে ইতি| উক্তেনোপক্রমেণ পক্বে দোষে দীত্পে চাগ্নৌ সত্যামদোষিণামভ্যঞ্জনাদি হিতম্| আদিশব্দাদ্রসাযনবাজীকরণাদি|
Adhikarana আমাজীর্ণলক্ষণম্ (২৫) · Śloka ২৫
অজীর্ণং লক্ষযিতুমাহ অজীর্ণং চ কফাদামং তত্র শোফোঽক্ষিগণ্ডযোঃ| সদ্যোভুক্ত ইবোদ্গারঃ প্রসেকোত্ক্লেশগৌরবম্||২৫||
अजीर्णं लक्षयितुमाह अजीर्णं च कफादामं तत्र शोफोऽक्षिगण्डयोः| सद्योभुक्त इवोद्गारः प्रसेकोत्क्लेशगौरवम्||२५||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-অগ্নিপ্রতিপক্ষত্বেন কফস্যাজীর্ণকরণপ্রাধান্যাদগ্রে নির্দেশঃ| কফাত্সকাশাদজীর্ণমামসংজ্ঞকং ভবতি| তত্র-আমাখ্যেঽজীর্ণে, অক্ষিকূপযোর্গণ্ড্যোশ্চ শোফো ভবতি| সদ্যোভুক্তবদপ্রাপ্তবিদাহাবস্থ উদ্গারঃ| প্রসেকঃ-প্রসক্তং নিষ্ঠীবনম্| উত্ক্লেশো-দোষাণাং স্থানাচ্চলনম্| গৌরবং-গাত্রাণম্|
আযুর্বেদরসাযনম্ ব্যাখ্যা ( কৃত)
আ০ র০- মহান্তমামদোষমুক্ত্বা ক্ষুদ্রমাহ| তত্র কফজমাহ-অজীর্ণমিতি| আমং-আমসংজ্ঞম্| তত্র-আমে,অক্ষ্ণি গণ্ডে চ শোফঃ| জাত্যপেক্ষমেকবচনম্| সদ্যোভুক্ত ইবোদ্গারঃ-চিরভুক্তস্যাপি সদ্যোভুক্তবদপ্রাপ্তবিদাহাবস্থ উদ্গারঃ| উত্ক্লেশো-বমনোন্মুখত্বমিব|
Adhikarana বিষ্টব্ধাজীর্ণলক্ষণম্ (২৬) · Śloka ২৬
বিষ্টব্ধমনিলাচ্ছূলবিবন্ধাধ্মানসাদকৃত্| |২৬|
विष्टब्धमनिलाच्छूलविबन्धाध्मानसादकृत्| |२६|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-অনিলাদ্বিষ্টব্ধং নামাজীর্ণং ভবতি| তচ্চ শূলাদিকৃত্|
আযুর্বেদরসাযনম্ ব্যাখ্যা ( কৃত)
আ০ র০- অনিলজমাহ-বিষ্টব্ধমিতি| বিষ্ঠব্ধং-বিষ্টব্ধসংজ্ঞম্| সাদঃ-কার্যাক্ষমত্বম্|
Adhikarana বিদগ্ধাজীর্ণলক্ষণম্ (২৬) · Śloka ২৬
| পিত্তাদ্বিদগ্ধং তৃণ্মোহভ্রমাম্লোদ্গারদাহবত্||২৬||
| पित्ताद्विदग्धं तृण्मोहभ्रमाम्लोद्गारदाहवत्||२६||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-পিত্তাদ্বিদগ্ধং নামাজীর্ণমুত্পদ্যতে| তচ্চ তৃডাদিযুক্তম্|
আযুর্বেদরসাযনম্ ব্যাখ্যা ( কৃত)
আ০ র০- পিত্তজমাহ-পিত্তাদ্বিদগ্ধমিতি| বিদর্গ্ধংবিদগ্ধাখ্যাম্|
Adhikarana আমাজীর্ণাদীনাং চিকিত্সা (২৭) · Śloka ২৭
ত্রিবিধস্যৈবাস্য চিকিত্সামাহ লঙ্ঘনং কার্যমামে তু, বিষ্টব্ধে স্বেদনং ভৃশম্| বিদগ্ধে বমনং, যদ্বা যথাবস্থং হিতং ভবেত্||২৭||
त्रिविधस्यैवास्य चिकित्सामाह लङ्घनं कार्यमामे तु, विष्टब्धे स्वेदनं भृशम्| विदग्धे वमनं, यद्वा यथावस्थं हितं भवेत्||२७||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-তুরবধারণে| আমাখ্যেঽজীর্ণে লঙ্ঘনমেব কার্যম্, ন বমনবিরেচনাদি| বিষ্টব্ধে স্বেদনং ভৃশং কার্যম্| ভৃশশব্দেনৈতত্ দ্যোতযতি,-পূর্বত্রাপি স্বেদনং কার্যমত্র ত্বত্যর্থমিতি| বিদগ্ধে-বিদগ্ধনাম্ন্যজীর্ণে, বমনং কার্যম্| যদ্বা লঙ্ঘনস্বেদনবমনানাং যথাবস্থং-যথাদোষোদ্রেকং, হিতং ভবেত্তদেব কার্যম্| আমাজীর্ণেঽপি স্বেদনবমনে, বিদগ্ধেঽপি লঙ্ঘনস্বেদনে, ইতি|
আযুর্বেদরসাযনম্ ব্যাখ্যা ( কৃত)
আ০ র০- আমাদীনাং চিকিত্সাসাহ-লঙ্ঘনমিত্যাদি ভৃশমিতি ত্রিষ্বপি যোজ্যম্| লঙ্ঘনাদিবিভাগস্ত্বতিশযার্থঃ যদাহ খারণাদিঃ-বিষ্টব্ধে স্বেদনং বর্ত্যো লবণোষ্ণাম্বু শস্যতে| বিদগ্ধে বমনং শস্তমুপবাসো বিরেচনম্||" ইতি| যদ্বা-অথবা| যথাবস্থং হিতং-যস্যাজীর্ণস্য যস্যামবস্থাযাং যদ্ধিতং, তস্য তস্যামবস্থাযাং তষ্কার্যমিত্যর্থঃ| বিভাগনিযমস্তু বাহুল্যাভিপ্রাযেণ|
Adhikarana বিলম্বিকালক্ষণং চিকিত্সা চ (২৮) · Śloka ২৮
গরীযসো ভবেল্লীনাদামাদেব বিলম্বিকা| কফবাতানুবদ্ধাঽঽমলিঙ্গা তত্সমসাধনা||২৮||
गरीयसो भवेल्लीनादामादेव विलम्बिका| कफवातानुबद्धाऽऽमलिङ्गा तत्समसाधना||२८||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-গরীযসঃ-প্রভূতাত্, আজীর্ণাদেব বিলম্বিকা স্যাত্| কীদৃশাত্ ? লীনাত্-অত্যর্থং স্রোতঃসু শ্লিষ্টত্বাত্| লীনাদিতি লীঙ্ শ্লেষণ ইত্যস্য ক্তপ্রত্যযে স্বাদয ওদিত ইত্যোদিতশ্চেতি নিষ্ঠানত্বম্| সা চ শ্লেষ্মবাযুভ্যামনুবদ্ধা-যুক্তা ভবতি| আমং নাম যদজীর্ণং তত্সদৃশলক্ষণা| যথা-"শোফোঽক্ষিগণ্ডযোঃ| অদ্যো ভুক্ত ইবোদ্গারঃ প্রসেকোত্ক্লেশগৌরবম্||" ইতি| তেন-আমেন, সমং-তুল্যং, সাধনং-চিকিত্সা, যস্যাঃ সৈবম্| "লঙ্ঘনং কার্যমামে" ইতি|
আযুর্বেদরসাযনম্ ব্যাখ্যা ( কৃত)
আ০ র০- বিলাম্বিকালক্ষণমাহ-গরীযস ইতি| বিলম্বিকানামাজীর্ণং ভবেত্| কস্মাত্ ? লীনাদামাদেব,-আমশব্দ আমাদ্যজীর্ণসামান্যবচনঃ, তযোত্পন্নস্য নিঃশেষমনিবর্তনাল্লীনত্বম্| এবং পুনঃ পুনর্লীনত্বাদ্গরীযস্ত্বম্| পুনঃ পুনরুত্পাদো দুষ্টবুভুক্ষাযাং ভোজনাত্| সা তূক্তা সঙ্গ্রহে (সূ. অ.১১)-"দোষোপনদ্ধং" ইত্যাদি (শ্লো ১৯ টী)| এবকারেণৈবং দ্যোতযতি,-বিসূচ্যলসকাবপ্যজীর্ণাদ্ভবতঃ, কিন্তু তাবন্যতোঽপি সদ্যোঽতিমাত্রভোজনাদেঃ| বিলম্বিকা ত্বজীর্ণদেবেতি| যদাহ সুশ্রুতঃ (উ. অ. ৫৬|৩)- "অজীর্ণমামং বিষ্টব্ধং বিদগ্ধং চ যদীরিতম্| বিসূচ্যলসকৌ তস্মাদ্ভবেচ্চাপি বিলম্বিকা||" ইতি| সা চ কফবাতানুবদ্ধা|তদনুবন্ধেন দীর্ঘকালবিলম্বনাত্ বিলম্বিকেত্যুচ্যতে| গরীযস্বাত্ পতনযোগ্যমপ্যামং কফবাতানুবদ্ধত্বান্নোর্ধ্বং নাপ্যধঃ পততি, লীনমেব চিরমবতিষ্ঠতে ইত্যর্থঃ| তথা চ সুশ্রুতঃ (উ.অ. ৫৬/৯)- "দুষ্টং হি ভুক্তং কফমারুতাভ্যাং প্রবর্ততে নোর্ধ্বমধশ্চ যস্য| বিলম্বিকাং তাং চ বিবির্জনীযামাচক্ষতে শাস্ত্রবিদঃ পুরাণাঃ||" ইতি| কফবাতানুবদ্ধত্বাদেবমিতরেষ্বপি পিত্তারব্ধত্বং বিদগ্ধত্বং চ লক্ষ্যতে| অন্যেন হ্যারব্ধামন্যেনানুবধ্যতে| পিত্তং চ বিদগ্ধাদেব প্রবর্ততে| তথা চ ভেডঃ (চি. অ. ১১)- "যদা ভুক্তং বিদগ্ধং চ নোর্ধ্বং নাধঃ প্রবর্ততে|| তাং বিলম্বীং বিগর্হন্তি বিষকল্পাং বিসূচিকাম্||" ইতি| বিষমল্পামিতি পিত্তোল্বণত্বং দ্যোত্যতে| বিসূকামিতি বিসূচিকাবিশেষ্যত্বেন সান্নিপাতিকত্বম্| আমলিঙ্গা-অজীর্ণতুল্যলক্ষণা, বিশেষানুপাদানাত্ ত্রযাণামপ্যামাদীনাং লিঙৈর্যুক্তা| তথা চ খারণাদিঃ-"এতান্যুক্তানি লিঙ্গানি ত্বামাজীর্ণে বিনির্দিশেত্|" ইতি| এতানি-অজীর্ণত্রযসম্বন্ধীনি| আমাত্-অজীর্ণাদন্নাত্ জাতমজীর্ণং-আমাজীর্ণম্,বিলম্বিকা, ন তু কফজমামম্| "যথাক্রমেণ বাতাদি সন্নিপাতার্মকং বদেত্|" ইতি তেনৈব সান্নিপাতিকস্যোক্তত্বাত্| তত্সমসাধনা,-তেষাংত্রযাণামজীর্ণানাং, সমং-সাধারণং, সাধনং-চিকিত্সিতং, যস্যাঃ সা তথা| তথা চ খারণাদিঃ-"আমে ত্বামপ্রশমনং বিমানে দ্বিবিধং মতম্|" ইতি| বিমানে-বিমানস্থানে, দ্বিবিধং-বিসূচ্যলসকভেদেন| বঙ্গসেনোঽপি-"বিলম্বিকালসকযোর্বিসূচ্যুক্তঃ ক্রিযাক্রমঃ|" ইতি| যুত্তু সুশ্রুতেনবিবর্জনীযত্বমুক্তং তত্প্রত্যাখ্যাযোপচরণীযত্বং (ত্বাত্) ন ত্বনুপক্রমত্বাত্| অত এব "বিলম্বিকাং তাং ভৃশদুশ্চিকিত্স্যাম্" ইতি মাধবকরঃ (মা. নি. অগ্নিমান্দ্যাদৌশ্লো.২১) পঠতি| ইযং চ বিলম্বিকা চরকাচার্যেণান্নবিষসংজ্ঞযোক্তা (চি.অ.১৪/৩৯)- "অভোজনাদজীর্ণাতিভোজ্নাদ্বিষমাশনাত্| অসাত্ম্যগুরুশীতাতিরূক্ষসংদুষ্টভোজনাত্| বিরেকবমনস্নেহবিভ্রমাব্দ্যাধিকর্ষণাত্| দেশকালর্তুবৈষম্যাদ্বেগানাং চ বিধারণাত্|| দুষ্যত্যগ্নিঃ স দুষ্টোঽন্নং ন তত্ পচতি লধ্বতি| অপচ্যমানং শুক্তত্বং যাত্যন্নং বিষতাং চ তত্|| তস্য লিঙ্গমজীর্ণস্য বিষ্টম্ভঃ সদনং ক্লমঃ| শিরোরুক্শোফমূর্চ্ছাশ্চ ভ্রমঃ পৃষ্ঠকটিগ্রহঃ|| জৃম্ভাঽঙ্গমর্দস্তৃষ্ণা চ জ্বরঃ চ্ছর্দিঃ প্রবাহণম্| অরোচকাবিপাকৌ চ ঘোরমন্নবিষং চ তত্|| পিত্তেন সহ সংসৃষ্টং দাহতৃষ্ণামুখামযান্| জনযত্যম্লপিত্তং চ পিত্তজাংশ্চাপরান্ গদান্|| যক্ষ্মপীনসমেহাদীন্ কফজান্ কফসঙ্গতম্| করোতি বাতসংসৃষ্টং বাতজাংশ্চমযান্ বহূন্|| মূত্ররোগাংশ্চ মূত্রস্থং কুক্ষিরোগান্ শকৃদ্গতম্| রসাদিভিশ্চ সংসৃষ্টং কুর্যাদ্রোগান্ রসাদিজান্|" ইতি| যত্তূক্তং জৈজ্জটেন 'ইযং বিলম্বিকা তন্ত্রান্তরে দণ্ডকালসকসংজ্ঞযোক্তা' ইতি| তদসত্| ভেডাদিবচনপর্যালোচনযা বিলমিকাযা বিদগ্ধমূলত্বাত্| দণ্ডকালসকস্যালসকভেদত্বেন বিষ্টব্ধমূলত্বাত্| দণ্ডকালসকস্যাল সকভেদত্বেন বিষ্টব্ধমূলত্বাত্| আমাদ্যজীর্ণলক্ষণাধীনলক্ষণত্বাদ্বিলম্বিকাযা ইহাভিধানম্|
Adhikarana রসশেষলক্ষণং চিকিত্সা চ অজীর্ণিনো দিবাস্বপ্রভোজনে চিকিত্সা (২৯-৩০) · Śloka ৩০
জীর্ণেঽপ্যাহারে কদাচিদাহারসারো রসোঽজীর্ণঃ স্যাত্| তল্লক্ষণার্থমাহ অশ্রদ্ধা হৃদ্ব্যথা শুদ্ধেঽপ্যুদ্গারে রসশেষতঃ| শযীত কিঞ্চিদেবাত্র সর্বশ্চানাশিতো দিবা||২৯|| স্বপ্যাদজীর্ণী, সঞ্জাতবুভুক্ষোঽদ্যান্মিতং লঘু| |৩০|
जीर्णेऽप्याहारे कदाचिदाहारसारो रसोऽजीर्णः स्यात्| तल्लक्षणार्थमाह अश्रद्धा हृद्व्यथा शुद्धेऽप्युद्गारे रसशेषतः| शयीत किञ्चिदेवात्र सर्वश्चानाशितो दिवा||२९|| स्वप्यादजीर्णी, सञ्जातबुभुक्षोऽद्यान्मितं लघु| |३०|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-রসশেষে অশ্রদ্ধা-অন্নানভিলাষঃ| হৃদ্ব্যথা-হৃদযশূলং গৌরবং চ| শুদ্ধেঽপ্যুদ্গারে-অন্নসম্বন্ধিনি| তেনাজীর্ণাদর্থান্তরভূত এবাযং রসশেষঃ| অতশ্চ রসস্য রুধিরাদিহেতোরসম্যক্পরিপাক ইত্যর্থঃ| তচ্চিকিত্সমাহ-শযীতেত্যাদি| অত্র-রসশেষে, কিঞ্চিদেব-স্তোকমাত্রমেব স্বপ্যাত্, নাজীর্ণ ইব প্রভূতম্| সর্বশ্চাজীর্ণী, অনাশিতো দিবা শযীত, আলাঘবাত্| যদা চোত্পন্নক্ষুত্ স্যাত্তদা স্তোকং লঘু চাদ্যাত্| আশঃ কৃতো যেন সঃ-আশিতঃ| ন আশিতো-অনাশিতঃ, অভুক্তবানিত্যর্থঃ| ননু, "অজীর্ণ্যভিহতোন্মত্তান্" ইত্যনেনৈব বাক্যেনাজীর্ণিনাং দিবাস্বপ্নোঽনুজ্ঞাত এব| তত্কিং পুনরুক্তেন ? ব্রূমঃ| বিশেষার্থং বাক্যমিদম্-"অভুক্তো দিবা স্বপ্যাদজীর্ণী" ইতি| তত্র তু সামান্যম্, অশিতানাশিতচিন্তা ন কৃতেতি যুক্তা পুনরিহোক্তিঃ|
আযুর্বেদরসাযনম্ ব্যাখ্যা ( কৃত)
আ০ র০- রসশেষং লক্ষযতি-অশ্রদ্ধেতি| অশ্রদ্ধা-ভোজনানভিলাষঃ| ননু, এতদামাদিষ্বপ্যস্তি,ত আহ্-শুদ্ধেঽপ্যুদ্গারে ইতি| তেষু পুনর্দুষ্ট উদ্গারঃ| রসস্য শেষো-রসশেষঃ| রসশব্দেন রসহেতুভূতাহাররাশির্লক্ষ্যতে| ন হি রসধাতোরপক্বস্যাজীর্ণত্বম্| স হ্যপক্ব এব রসশব্দেনোচ্যতে, পক্বস্তুরুধিরশব্ধেন| দৃষ্টত্বাদজীর্ণত্বমিতি চেত্ ন, তস্যামত্বাত্| বক্ষ্যতি হি (হৃ.সূ.অ. ১৩/২৪)- "ঊষ্মণোঽল্পবলত্বেন ধাতুমাদ্যমপাচিতম্| দুষ্টমামাশযগতং রসামামং প্রচক্ষতে|" ইতি| রসেশেষস্যোষধমাহ-শযীতেতি| কিঞ্চিদেব-মুহূর্তমেব| ননু,মুহূর্তমনুমানতঃ সিদ্ধামেব| মৈবম্| অজীর্ণিনামধিকং দিবাস্বপ্নং বিধাস্যতি| স্বপ্নবিধিশ্চযং প্রধান্যাত্| উষ্ণাম্বুপানাদ্যপি কার্যম্| যদাহ খারণাদিঃ-"রসশেষে হিতঃ স্বপ্নো ঘর্মাম্বু লঘুবোজনম্|" ইতি| অজীর্ণিনো দিবাস্বপ্নং বিধত্তে-সর্বশ্চেতি| অনাশিতো-অভুক্তবান্| সর্বগ্রহণং প্রকৃতবিসূচিকাদ্যজীর্ণসঙ্গ্রহার্থম্| "মুক্ত্বা তু ভাষ্য" ইত্যাদিনা প্রাপ্তে দিবাস্বপ্নে পুনর্বিধানং যথেষ্টস্বপনার্থম্| অজীর্ণিনো ভোজনং বিধত্তে-সঞ্জাতবুভুক্ষ ইতি| সঞ্জাতবুভুক্ষো-অভ্যুদীর্ণান্নাভিলাষঃ| মিতগ্রহণং লঘূনামপি গুরূক্তার্ধসৌহিত্যপ্রাপ্ত্যর্থম্|
Adhikarana অজীর্ণসামান্যলক্ষণাম্ (৩০-৩১) · Śloka ৩১
সাম্প্রতমজীর্ণলক্ষণং সামান্যেন ব্রূতে- | বিবন্ধোঽতিপ্রবৃত্তির্বা গ্লানির্মারুতমূঢতা||৩০|| অজীর্ণলিঙ্গং সামান্যং বিষ্টম্ভো গৌরবং ভ্রমঃ| |৩১|
साम्प्रतमजीर्णलक्षणं सामान्येन ब्रूते- | विबन्धोऽतिप्रवृत्तिर्वा ग्लानिर्मारुतमूढता||३०|| अजीर्णलिङ्गं सामान्यं विष्टम्भो गौरवं भ्रमः| |३१|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-বিবন্ধো-মূত্রপুরীষযোরপ্রবৃত্তিলক্ষণঃ| অতিপ্রবৃত্তিঃ-তযোরেব| গ্লানিঃ-শরীরস্য ম্লানতা| মারুতমূঢতা-বাতস্য প্রতিলোমতা| বিষ্টম্ভঃ-কুক্ষেরাধ্মানম্| গৌরবং-গুরুগাত্রত্বম্| ভ্রমো-মোহঃ| এতত্সামান্যমজীর্ণলক্ষণম্| উক্তং চ-"সীদত্যঙ্গং ভ্রমো মোহঃ কোষ্ঠে মুহ্যতি মারুতঃ| সর্বেষামপ্যজীর্ণানামবিসংবাদি লক্ষণ্ম্||" ইতি|
আযুর্বেদরসাযনম্ ব্যাখ্যা ( কৃত)
আ০ র০-উক্তানুক্তাজীর্ণবিশেষসঙ্গ্রহার্থংমজীর্ণসামান্যলক্ষণমাহ-বিবন্ধ ইতি| বিবন্ধো-মালানামপ্রবৃত্তিঃ| মারুতমূঢতা-বাযোর্বিমার্গগতিঃ| বিষ্টম্বো-বিশেষেণ স্তম্ভোগাত্রাণাম্|
Adhikarana অজীর্ণস্যান্যকারণানি (৩১-৩৩) · Śloka ৩৩
সাম্প্রতমজীর্ণস্যান্যান্যপি কারণান্যাহ- | ন চাতিমাত্রমেবান্নমামদোষায কেবলম্||৩১|| দ্বিষ্টবিষ্টম্ভিদগ্ধামগুরুরূক্ষহিমাশুচি| বিদাহি শুষ্কমত্যম্বুপ্লুতং চান্নং ন জীর্যতি||৩২|| উপতপ্তেন ভুক্তং চ শোকক্রোধক্ষুদাদিভিঃ| |৩৩|
साम्प्रतमजीर्णस्यान्यान्यपि कारणान्याह- | न चातिमात्रमेवान्नमामदोषाय केवलम्||३१|| द्विष्टविष्टम्भिदग्धामगुरुरूक्षहिमाशुचि| विदाहि शुष्कमत्यम्बुप्लुतं चान्नं न जीर्यति||३२|| उपतप्तेन भुक्तं च शोकक्रोधक्षुदादिभिः| |३३|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-অতিমাত্রমেব ভুক্তমন্নং ন কেবলমামদোষায, কিং তর্হি ? দ্বিষ্টাদি চান্নং ন জীর্যতি| দ্বিষ্টং-অপ্রিযম্| বিষ্টম্ভি-কুক্ষ্যাধ্মানকারি| হিমং-অতিশীতম্| অশুচি-উচ্ছিষ্টং কেশাদিদূষিতং চ, এতচ্চাচিন্ত্যপ্রভাবত্বাদামদোষহেতুঃ| বিদাহি-প্রাগুক্তম্| শুষ্কং-অদ্রবপ্রাযম্| অত্যম্বুপ্লুতং-অতিজলেন প্লাবিতম্| চঃ সমুচ্চযে| ন কেবলং দ্বিষ্টাদ্যন্নং ভুক্তং ন জীর্যতি, যাবত্ শোকাদিভিশ্চোপতপ্তেন ভুক্তং ন জীর্যতি| শোকঃ-ইষ্টবিপত্ত্যাদিনা মনোদৌস্থ্যম্| ক্রোধো-রোষঃ| ক্ষুত্-বুভুক্ষা| আদিশব্দেন লোভভযাদিপরিগ্রহঃ|
আযুর্বেদরসাযনম্ ব্যাখ্যা ( কৃত)
আ০ র০- অজীর্ণাশনং লক্ষযতি- ন চেতি| ন কেবলমতিমাত্রমেবান্নমামদোষয| কিং তর্হি? দ্বিষ্টাদিকমপ্যন্নং ন জীর্যতি,-আমদোষায ভবতি| দ্বিষ্টং-অপ্রিযম্| বিষ্টম্ভিবাতাবরোধকারি| দগ্ধং-অতিপক্বম্| আমং-অপব্কম্| অশুচি-মলিনম্| শুষ্কং-নীরসম্| অযম্বুপ্লুতং-অত্যম্বুপানাত্| শোকদিভিরুপতপ্তেন ভুক্তম্| ক্ষুত্-বুভুক্ষা,তদুপতপ্তত্বং-কালাতিক্রমাত্| আদিশব্দাদুদ্বেগাদযঃ|
Adhikarana সমশনলক্ষণম্ অধ্যশনলক্ষণম্ বিষমাশনলক্ষণম্ সমশনাদীনাং দোষঃ (৩৩-৩৫) · Śloka ৩৫
সম্প্রত্যপরমপ্যন্নমামক্ষোভকরমাহ- | মিশ্রং পথ্যমপথ্যং চ ভুক্তং সমশনং মতম্||৩৩|| বিদ্যাদধ্যশনং ভূযো ভুক্তস্যোপরি ভোজনম্| অকালে বহু চাল্পং বা ভুক্তং তু বিষমাশনম্||৩৪|| ত্রীণ্যপ্যেতানি মৃত্যুং বা ঘোরান্ ব্যাধীন্সৃজন্তি বা| |৩৫|
सम्प्रत्यपरमप्यन्नमामक्षोभकरमाह- | मिश्रं पथ्यमपथ्यं च भुक्तं समशनं मतम्||३३|| विद्यादध्यशनं भूयो भुक्तस्योपरि भोजनम्| अकाले बहु चाल्पं वा भुक्तं तु विषमाशनम्||३४|| त्रीण्यप्येतानि मृत्युं वा घोरान् व्याधीन्सृजन्ति वा| |३५|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-পথ্যং-শাল্যাদি| অপথ্যং-যবকাদি| তন্মিশ্রং-একীকৃত্য, ভুক্তং সমশনং মতম্, অস্মিন্বৈদ্যকতন্ত্রে| বিদ্যাদিত্যাদি| ভুক্তস্য-অভ্যবহৃতস্যোপরি যদন্যদ্ভোজনং তদধ্যশনং জানীযাত্| ননু, এবং প্রাতরাশে কৃতে যঃ সাযমাশঃ, তস্যাধ্যশনত্বং প্রসজ্যেত্| অধ্যশনং চ বিবর্জ্যমেব| যতোঽনন্তরমেব পঠিষ্যতি-"ত্রীণ্যপ্যেতানি মৃত্যুং বা" ইত্যাদি| বৈদ্যকতন্ত্রেষু চ নরাণাং দ্বিরাহার উপদিষ্টঃ| ভগবান্ ব্যাসোঽপ্যবোচত্-"সাযংপ্রাতর্মনুষ্যাণাং ভোজনং বিধিনির্মিতম্|" ইতি| তস্মাদধ্যশনস্যৈবং তদসমীচীনং লক্ষণম্| অত্র সঞ্চক্ষ্মহে| প্রাগ্ভুক্তস্যোপরি সমনন্তরেমেব বহ্নাববিভক্তে যদশনং তদেবাধ্যশনম্, নান্যত্| অত এব সুশ্রুতো ব্রূতে (সূ.অ. ৪৬|৪৯১)-"প্রাগ্ভুক্তে ত্ববিভক্তেঽগ্নৌ দ্বিরন্নং ন সমাচরেত্|" ইতি| তস্মাত্ প্রাতরাশে কৃতে সত্যগ্নৌ বিভক্তে যঃ সাযমাশঃ স ন পরিহার্যঃ, অপি তু কার্য এব, গুণাবহত্বাত্| এতদেব প্রতিপাদযিতুং সঙ্গ্রহেঽধ্যগীষ্ট (সূ.অ. ১১)-"প্রাতরাশে ত্বজীর্ণেঽপি সাযমাশো ন দুষ্যতি| অজীর্ণে সাযমাশে তু প্রাতরাশো হি দুষ্যতি|| দিবা প্রবোধ্যতেঽর্কেণ হৃদযং পুণ্ডরীকবত্| তস্মিন্বিবুদ্ধে স্রোতাংসি স্ফুটত্বং যান্তি সর্বশঃ|| ব্যাযামাচ্চ বিচারাচ্চ বিক্ষিপ্তত্বাচ্চ চেতসঃ| ন ক্লেদমুপগচ্ছন্তি দিবা তেনাস্য ধাতবঃ|| অক্লিন্নেষ্বন্নমাসক্তমন্যত্তেষু ন দুষ্যতি| অবিদগ্ধেষ্বিব পযঃস্বন্যত্সম্মিশ্রিতং পযঃ|| রাত্রৌ তু হৃদযে ম্লানে সংবৃতেষ্বযনেষু চ| পরিক্লেদং যান্তি কোষ্ঠে সংবৃতে দেহধাতবঃ|| ক্লিন্নেষ্বন্যদপক্বেষু তেষ্বাসিক্তং প্রদুষ্যতি| বিদগ্ধেষু পযঃস্বন্যত্ পযস্তপ্তেষ্বিবার্পিতম্|| নৈশে তস্মাদজীর্ণেঽন্নে নান্যদ্ভুঞ্জীত ভোজনম্|" ইতি| অধিশব্দোঽত্রোপরিশব্দার্থঃ| যথা-'প্রাসাদমধিরোহতি|' ইতি| অকালে বহু চাল্পং বা ভুক্তং ত্বশনং বিষমাশনসংজ্ঞং বিদ্যাত্| কঃ পুনরকালো ভোজনস্য ? ইতি চেত্, ব্রূমঃ| "প্রসৃষ্টে বিণ্মূত্রে" (শ্লো. ৫৫) ইত্যাদিনাঽঽহারকালং বক্ষ্যতি| তদ্বৈপরীত্যেনাকালো বেদ্যঃ| ত্রীণ্যপ্যেতানি-সমশনাধ্যশনবিষমাশনানি, মৃত্যুং বা সৃজন্তি-জনযন্তি, ঘোরান্ ব্যাধীন্-গুল্মাদীন্ বা|
আযুর্বেদরসাযনম্ ব্যাখ্যা ( কৃত)
আ০ র০- সমশনং লক্ষযতি-মিশ্রমিতি| পথ্যং-শাল্যাদি, অপথ্যং-যবকাদি, তদ্দ্বযং মিশ্রীকৃত্য ভুক্তং-সমশনাখ্যম্| যত্তু কেবলমপথ্যং তদ্বিরুদ্ধাখ্যম্| অধ্যশনং লক্ষযতি-বিদ্যাদিতি| ভুক্তস্যোপরি পুনর্ভোজনং-অধ্যশনাখ্যম্| ভুক্তস্য-প্রাগভ্যবহ্রতস্যান্নস্য পাকাভাবাদামাশয এব স্থিতস্য, উপরি-ঊর্ধ্বমন্যদন্নমাধীযতে যত্তত্-ভুক্তস্যোপরি ভোজনম্, পূর্বান্নশেষে ভুক্তমিত্যর্থঃ| তথা চ চরকঃ (চি.অ. ১৪/২৩৩)- "পূর্বান্নশেষে তু পুনর্ভুক্তমধ্যশনং মতম্|" ইতি| সুশ্রুতোঽপি (সূ.অ. ৪৬/৫০৮)- "অজীর্ণে ভুজ্যতে যত্তু তদধ্যশনমুচ্যতে|" ইতি| কথম্? ভূযো-বাহুল্যেন| অনেন ক্বচিদন্নশেষে ভুক্তমপি নাধ্যশনম্| যথা (সঙ্গ্রহে সূ.অ. ১১)- "প্রাতরাশে ত্বজীর্ণেঽপি সাযমাশো নদুষ্যতি|" ইতি| তথা, অত্যগ্নৌ (হৃদযে চি. অ. ১০/৮৪)- "মুহুর্মুহুরজীর্ণেঽপি ভোজ্যান্যস্যোপকল্পযেত্|" ইতি| ননু, এতদপ্রাত্পকালাশনত্বাদ্বিষমাশনাদভিন্নম্| মৈবম্| জীর্ণে পূর্বান্নে যদপ্রাপ্তকালং তদ্বিশমাশনম্, অধ্যশনং তজীর্ণে ইতি ভেদঃ| ননু,"প্রসৃষ্টে বিণ্মূত্রে" (শ্লো ৫৫) ইত্যাদিনা জীর্ণান্নত্বস্যৈব কালত্বং বক্ষযতি| তত্কথমপ্রাত্পকালত্বম্ ? মৈবম্| যো হি যদা প্রত্যহং ভুঙ্ক্তে স তস্য ভোজনকালঃ| প্রসৃষ্টবিণ্মূত্রবাদিকং তু তস্যৈব বিশেষণম্| তদ্বিশিষ্টস্যৈব তস্য কালত্বার্থম্| তস্মাত্ প্রসৃষ্টবিণ্মূত্রত্বাদিবিশিষ্টে স্বকালে ভোজনং-কালভোজনম্| প্রাপ্তেঽপি পূর্বান্নস্যাজীর্ণত্বাদনুত্পন্নেষু প্রসৃষ্টবিণ্মূত্রত্বাদিষু ভোজনং-অধ্যশনম্| পূর্বান্নস্য জীর্ণত্বাদুত্পন্নেষ্বপি তেষ্বপ্রাত্পে স্বকালে ভোজনং-বিষমাশনম্| অবশ্যং চৈতদভ্যুপগন্তব্যম্| অন্যথা হি (হৃ. সূ. অ. ১৬/১৮)- "হ্যস্তনে জীর্ণ এবান্নে স্নেহোঽচ্ছঃ শুদ্ধযে বহুঃ| শমনঃক্ষুদ্বতোঽনন্নো মধ্যমাত্রশ্চ শস্যতে||" ইতি কালভেদো ন স্যাত্| বিষমাশনং লক্ষযতি-অকাল ইতি| অকালে ভুক্তং বিষমাশনম্| তদ্দ্বিবিধম্,-অপ্রাত্পকালমতীতকালং চ| অমাত্রাশনমপ্যকালে ভুক্তং বিষমাশনমেবেত্যাহ-বহু চাল্পং বেতি| তস্মাত্ কালে যদমাত্রযা ভুজ্যতে তদমাত্রাশনম্| যচ্চাকালে মাত্রযা অমাত্রযা বা তদ্বিষমাশনম্| সমশনাদীনাং দোষমাহ-ত্রীণীতি| এতানি-সমশন-বিষমাশনাধ্যশনানি, অনিযতাযুষাং মৃত্যুং, নিযতাযুষাং ঘোরান্ ব্যাধীন্ সৃজন্তি|
Adhikarana ভোজনস্য সম্যগ্যোগপ্রকারঃ (৩৫-৩৮) · Śloka ৩৮
| কালে সাত্ম্যং শুচি হিতং স্নিগ্ধোষ্ণং লঘু তন্মনাঃ||৩৫|| ষড্রসং মধুরপ্রাযং নাতিদ্রুতবিলম্বিতম্| স্নাতঃ ক্ষুদ্বান্ বিবিক্তস্থো ধৌতপাদকরাননঃ||৩৬|| তর্পযিত্বা পিতৄন্ দেবানতিথীন্ বালকান্ গুরূন্| প্রত্যবেক্ষ্য তিরশ্চোঽপি প্রতিপন্নপরিগ্রহান্||৩৭|| সমীক্ষ্য সম্যগাত্মানমনিন্দন্নব্রুবন্ দ্রবম্| ইষ্টমিষ্টৈঃ সহাশ্র্নীযাচ্ছুচিভক্তজনাহৃতম্||৩৮||
| काले सात्म्यं शुचि हितं स्निग्धोष्णं लघु तन्मनाः||३५|| षड्रसं मधुरप्रायं नातिद्रुतविलम्बितम्| स्नातः क्षुद्वान् विविक्तस्थो धौतपादकराननः||३६|| तर्पयित्वा पितॄन् देवानतिथीन् बालकान् गुरून्| प्रत्यवेक्ष्य तिरश्चोऽपि प्रतिपन्नपरिग्रहान्||३७|| समीक्ष्य सम्यगात्मानमनिन्दन्नब्रुवन् द्रवम्| इष्टमिष्टैः सहाश्र्नीयाच्छुचिभक्तजनाहृतम्||३८||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-কালে-বক্ষ্যমাণে| তন্মনাঃ-ভোজনগতচিত্তঃ| ক্ষুদ্বান্-বুভুক্ষিতঃ| বিবিক্তস্থঃ-একান্তস্থিতঃ| তথা, প্রক্ষালিতচরণ্হস্তমুখঃ| অনিন্দন্-ভোজনমগর্হমাণঃ| অব্রুবন্-অভাষমাণঃ| ইষ্টং-মনোরুচিতং ভোজনম্| তথা, দ্রবং-দ্রবপ্রাযম্| ইষ্টৈঃ-প্রিযৈঃ, সহাশ্নীযাত্| 'ক্ষুদ্বান্' ইত্যত্র প্রশংসাযাং মতুপ্, উত্পন্নপ্রশস্তবুভুক্ষঃ| তেন কিঞ্চিদপি যদা দুষ্টবুভুক্ষা স্যাত্তদা নাদ্যাদিত্যর্থঃ| দুষ্টবুভুক্ষাযা লক্ষণম্ (সঙ্গ্রহে সূ.অ. ১১)- "দোষোপনদ্ধং যদি লীনমন্নং পিত্তোদ্ধতস্যাবৃণুযান্ন বহ্নিম্| জাযেত দুষ্টা তু তদা বুভুক্ষা যা মন্দবুদ্ধীন্ বিষবন্নিহন্তি||" ইতি| কিম্ভূতং ভোজনম্ ? সাত্ম্যম্| তচ্চ সাত্ম্যং দ্বিধা,-একং স্বল্পকালাভ্যস্তং সুখাবহম্, অন্যচ্চ জন্মনঃ প্রভুতি সহাত্মনাভ্যস্তং সুখাবহং চ| এতদেবৈকং সাত্ম্যমুচ্যতে| তথা, শুচি-অনুচ্ছিষ্টং কেশাদ্যনুপহতং চ| হিতং-পথ্যম্| স্নিগ্ধং চ তদুষ্ণং চ-স্নিগ্ধোষ্ণম্| তথা, লঘু-লঘুপ্রাযম্. ন তু লঘ্বেব| অত এবেদমুপপন্নম্ "ষড্রসং মধুরপ্রাযম্" ইতি| মধুররসো হি গুরুঃ| তথা চ বক্ষ্যতি (হৃ.সূ.অ. ১০|৩৮)- "পটোঃ কষাযস্তস্মাচ্চ মধুরঃ পরমং গুরুঃ|" ইতি| তদ্যদি লঘ্বেব স্যাত্ (তর্হি) মধুরপ্রাযমিতি ন ঘটতে| তস্মাল্লঘুপ্রাযমিতি ব্যাখ্যেযম্| কথমদ্যাত্ ? তদাহ-নাতিদ্রুতবিলম্বিতম্| কিং কৃত্বা ? পিত্রাদীংস্তর্পযিত্বা| তথা, তিরশ্চোঽপি-অশ্ববৃষাদীন্, প্রতিপন্নপরিগ্রহান্-কৃতস্বীকারান্, প্রত্যবেক্ষ্য-তদাহারচিন্তাং কৃত্বেত্যর্থঃ| তথা, আত্মানং সমীক্ষ্য-যথা মমেদং সাত্ম্যমিদমসাত্ম্যমিতি নিত্যমপ্রমত্তঃ সন্ পর্যালোচ্য| খরনাদেনোক্তম্-"অতিদ্রুতাশী ত্বাহারগুণদোষান্ন বিন্দতি| উন্মুহ্যত্যল্পমশ্নাতি চ্ছর্দযেদ্বাঽনবস্থিতঃ|| বিলম্বিতং তু ভুঞ্জানো ন তৃপ্তিমধিগচ্ছতি| খাদন্ বহ্বপি শীতত্বাদ্যাতি ভোজ্যমহৃদ্যতাম্|| জল্পতো হসতশ্চাপি ভুঞ্জানস্যান্যচেতসঃ| ত এব দোষা মন্তব্যা যে বিলম্বিতভোজনে||" ইত্যাদি|
আযুর্বেদরসাযনম্ ব্যাখ্যা ( কৃত)
আ০ র০- অথ ভোজনসম্যগ্যোগঃ| তত্র সম্যগ্যোগপ্রকারমাহ-কালে সাত্ম্যমিতি| কালে-"প্রসৃষ্টে বিণ্মূত্রে" (শ্লো. ৫৫) ইত্যাদিনা বক্ষ্যমাণে| শুচি-নির্মলম্| সাত্ম্যমিতি হিতস্যাপ্যনভ্যাসাসাত্ম্যস্য নিবৃত্ত্যর্থম্, হিতমিত্যহিতস্যাভ্যাসসাত্ম্যসসাত্ম্যস্য| তন্মনাঃ-ভোজনৈকদত্তচিত্তঃ| মধুরপ্রাযং-ষড্রসত্বেঽপ্যধিকধুররসম্| নাতিদ্রুতবিলম্বিতমিতি ক্রিযাবিশেষণম্| বিবিক্তস্থো-বিজনস্থঃ| পিত্রাদীংস্তর্পযিত্বা| প্রতিপন্নপরিগ্রহান্-পাল্যত্বেন স্বীকৃতান্| তিরশ্চোঽপি-কিং পুনর্মনুষ্যান্| প্রত্যবেক্ষ্য-তেষামাহারচিন্তাং বিধায| অত্মানং সমীক্ষ্য-প্রকৃতিং বিচার্য| অনিন্দন্ভোজ্যমকুত্সযন্| অব্রুবন্-কৃতমৌনঃ| দ্রবং-দ্রববহুলম্| ইষ্টং-প্রিযম্| ইষ্টৈঃ সহ-প্রিযজনৈঃ সহ| শুচিভক্তজনাহৃতংশুচযো-বাহ্যাভ্যন্তরশৌচযুক্তাঃ, ভক্তাঃ-অনুরক্তাঃ, যে জনাস্তৈরাহৃতং-আনীতম্|
Adhikarana তৃণাদিজুষ্টভোজনত্যাগঃ (৩৯) · Śloka ৩৯
ভোজনং তৃণকেশাদিজুষ্টমুষ্ণীকৃতং পুনঃ| শাকাবরান্নভূযিষ্ঠমত্যুষ্ণলবণং ত্যজেত্||৩৯||
भोजनं तृणकेशादिजुष्टमुष्णीकृतं पुनः| शाकावरान्नभूयिष्ठमत्युष्णलवणं त्यजेत्||३९||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-তৃণাদিজুষ্টং ভোজনং ত্যজেত্| আদিশব্দেন মক্ষিকাদিপরিগ্রহঃ| তথা, ভূয উষ্ণীকৃতম্| তথা, শাকবহুলম্| তথা, অবরান্নং-মাষাদি, তদ্ভূযিষ্ঠম্| তথা, অত্যুষ্ণমতিলবণং চ ত্যজেত্|
আযুর্বেদরসাযনম্ ব্যাখ্যা ( কৃত)
আ০ র০- তৃণজুষ্টাদিভোজনমপবদতি-ভোজনমিতি| তত্রানিন্দান্নিতি গ্রহ্ণাত্ তৃণকেশমক্শিকাদিজুষ্তস্য নিন্দিতস্যাপি প্রপ্তিঃ, উষ্ণগ্র্হণাত্ পুনরূষ্ণীকৃতাত্যুষ্ণযোঃ, ইষ্টগ্রহণাত্ শাকসূপবহুলস্য, ষড্রসগ্রহণাত্ অতিলবণস্য|
Adhikarana কিলাটাদিশীলনম্ (৪০-৪১) · Śloka ৪১
কিলাটদধিকূচীকাক্ষারশুক্তামমূলকম্| কৃশশুষ্কবরাহাবিগোমত্স্যমহিষামিষম্||৪০|| মাষনিষ্পাবশালূকবিসপিষ্টবিরূঢকম্| শুষ্কশাকানি যবকান্ ফাণিতং চ ন শীলযেত্||৪১||
किलाटदधिकूचीकाक्षारशुक्ताममूलकम्| कृशशुष्कवराहाविगोमत्स्यमहिषामिषम्||४०|| माषनिष्पावशालूकबिसपिष्टविरूढकम्| शुष्कशाकानि यवकान् फाणितं च न शीलयेत्||४१||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-তথা, কিলাটাদীন্ন শীলযেত্-নাভ্যসেত্, ন কাদাচিত্কোঽভ্যবহার এষাং নিষিধ্যতে| মুনিনা তু (চ. সূ. অ. ৫|৭)- "নাভ্যসেদ্গৌরবাত্" ইতি যথা হেতুরুপন্যস্তঃ, তথেহ নোক্তঃ, অযুক্তত্বাত্| তথা হি-এষামনভ্যবহারে যদি গুরুত্বমেব হেতুঃ স্যাত্| ততো গুডযবাদীনামপি বহুতরাণাং দ্রব্যাণাং শীলনমযুক্তং স্যাত্| তস্মাদেষামশীলনেঽন্যদপি কারণং চিন্ত্যম্, ন তু গুরুত্বমাত্রমেব| যথা-কিলাটকূচিকযোর্দোষলত্বং, দধ্নস্তু জ্বরাদিকর্তৃত্বং তথা স্রোতোলেপঃ, স্রোতোলেপত্বাচ্চানেকরোগহেতুত্বম্, ক্ষারস্য পুংস্ত্বহানিকৃত্ত্বম্, শুক্তস্য দৃষ্টিহন্তৃত্বাদি| তস্মাদেষামপথ্যত্বাচ্ছীলননিষেধো বোধ্যঃ|
আযুর্বেদরসাযনম্ ব্যাখ্যা ( কৃত)
আ০ র০- সাত্ম্যত্বাদিপ্রসক্তং কিলাটাদ্যভ্যাসমপবদতিকিলাটেতি| আমমিতি মূলকস্য বিশেষণম্, কৃশাদীন্যামিষস্য| ন শীলযেত্-ন নিত্যং ভজেত্| যদা তত্সেবনং বিনা স্থাতুমশক্তিঃ, যদা বা তত্সাধ্যরোগোত্পত্তিঃ, তদা ভজেদিত্যর্থঃ|
Adhikarana শাল্যাদিশীলনম্ (৪২-৪৩) · Śloka ৪৩
শীলযেচ্ছালিগোধূমযবষষ্টিকজাঙ্গলম্| সুনিষণ্ণকজীবন্তীবালমূলকবাস্তুকম্||৪২|| পথ্যামলকমৃদ্বীকাপটোলীমুদ্গশর্করাঃ| ঘৃতদিব্যোদকক্ষীরক্ষৌদ্রদাডিমসৈন্ধবম্||৪৩||
शीलयेच्छालिगोधूमयवषष्टिकजाङ्गलम्| सुनिषण्णकजीवन्तीबालमूलकवास्तुकम्||४२|| पथ्यामलकमृद्वीकापटोलीमुद्गशर्कराः| घृतदिव्योदकक्षीरक्षौद्रदाडिमसैन्धवम्||४३||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-শাল্যাদীন্ শীলযেত্|
আযুর্বেদরসাযনম্ ব্যাখ্যা ( কৃত)
আ০ র০- সাত্ম্যাদীন্যুদাহরতি-শীলযেদেতি| জাঙ্গলংহরিণাদিমাংসম্| পথ্যা-হরীতকী| মৃদ্বীকা-দ্রাক্ষা|
Adhikarana নিত্যসেব্যমৌষধম্ (৪৪) · Śloka ৪৪
ত্রিফলাং মধুসর্পির্ভ্যাং নিশি নেত্রবলায চ| স্বাস্থ্যানুবৃত্তিকৃদ্যচ্চ রোগোচ্ছেদকরং চ যত্||৪৪||
त्रिफलां मधुसर्पिर्भ्यां निशि नेत्रबलाय च| स्वास्थ्यानुवृत्तिकृद्यच्च रोगोच्छेदकरं च यत्||४४||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-মধুসর্পির্ভ্যাং সহ ত্রিফলাং চ রাত্রৌ নেত্রবলায শীলযেত্| ন কেবলং শাল্যাদীনেব শীলযেত্| যচ্চ দ্রব্যং স্বাস্থ্যানুবৃত্তিং করোত্যৃতুচর্যাবিধ্যাদ্যুক্তমন্নপানাদিকম্| তথা, রোগোচ্ছেদকরং যত্-কিরাততিক্তকাদিদ্রব্যম্, তচ্চ শীলযেত্|
আযুর্বেদরসাযনম্ ব্যাখ্যা ( কৃত)
আ০ র০- প্রসঙ্গান্নিত্যসেব্যমৌষধমাহ-ত্রিফলামিতি| নিশি-স্বপ্নকালে| নেত্রেবলায-চক্ষুরিন্দ্রিযদার্ঢ্যায| যচ্চ ঔষধং রসাযনাদিকং, স্বাস্থ্যমনুবর্তযতি রোগোত্পতিবীজং চোচ্ছিনত্তি তদপি যথাকালং ভজেত্| উক্তং চ চরকেণ (সূ. অ. ৫/১০)- "তচ্চ নিত্যং প্রযুঞ্জীত স্বাথ্যং যেনানুবর্ততে| অজাতানাং বিকারাণামনুত্পতিকরং চ যত্||" ইতি|
Adhikarana ভোজ্যক্রমঃ (৪৫-৪৬) · Śloka ৪৬
বিসেক্ষুমোচচোচাম্রমোদকোত্কারিকাদিকম্| অদ্যাদ্দ্রব্যং গুরু স্নিগ্ধং স্বাদু মন্দং স্থিরং পুরঃ||৪৫|| বিপরীতমতশ্চান্তে মধ্যেঽম্ললবণোত্কটম্| |৪৬|
बिसेक्षुमोचचोचाम्रमोदकोत्कारिकादिकम्| अद्याद्द्रव्यं गुरु स्निग्धं स्वादु मन्दं स्थिरं पुरः||४५|| विपरीतमतश्चान्ते मध्येऽम्ललवणोत्कटम्| |४६|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-বিসাদিদ্রব্যং গুর্বাদিগুণযক্তং পুরঃ-পূর্বমদ্যাত্| মোদকো-লড্ডুকঃ| উত্কারিকা-লপ্যসিকা| অতঃ-অস্মাচ্চ, বিপরীতং-লঘুরূক্ষকটুতীক্ষ্ণসরপ্রাযম্, অন্তে ভোজনস্য সেবেত| মধ্যে চাম্ললবণোত্কটম্| খরনাদে চোক্তম্-"কটুং লবণমম্লং বা পূর্বমাহারমাহরেত্| আহারো মধুরোঽগ্রে হি গুরুর্বিষ্টভ্য জীর্যতি||" ইতি| তদেতদুক্তমুভযমপি দেশসাত্ম্যাদিবশাত্ প্রমাণযিতব্যম্|
আযুর্বেদরসাযনম্ ব্যাখ্যা ( কৃত)
আ০ র০- ভোজ্যক্রমমাহ-বিসেতি| গুর্বাদিগুণং বিসাদিভোজ্যদ্রব্যং পুরঃ-পূর্বমদ্যাত্| মোচং-কদলীফলম্| চোচং-নারিকেলফলং পনসং বা| মোদকো-লঙ্গুকঃ| উত্কারিকা-পূপলিকা| আদিশব্দাদিণ্ডরিকাদযঃ| অতো বিপরীতং-লঘ্বাদিগুণং ষষ্টিকৌদনাদিকম্, অন্তে অদ্যাত্| অম্ললবণোত্কটং-শুক্তাদিকং, মধ্যেঽদ্যাত্| যত্তূক্তং খারণদিনা-"কটুং লবণমম্লং বা পুর্বমাহারমাহরেত্| আহারো মধুরোঽগ্রে হি গুরুর্বিষ্টভ্য জীর্যতি||" ইতি| তন্মন্দাগ্নিবিষযম্| তদ্ভোজনস্য দীপনপুর্বকত্বাত্| তথা চোক্তং সঙ্গ্রহে (সূ. অ. ১০)- "যথাগ্নিসাত্ম্যং তু প্রাগ্দ্রাবমুপশুষ্কং বাঽশ্নীযাত্| প্রাগেব তু গুরু স্বাদু স্নিগ্ধং চ| মধ্যেঽম্ললবণম্| অন্তে রূক্ষদ্রবমিতররসযুক্তং চ| তত্র মন্দাগ্নেঃ দ্রবোষ্ণেন সমুত্তেজিতোষ্মণোঽন্যদপ্যুপযুক্তং সম্যক্ পাকমুপৈতি|" ইতি|
Adhikarana অন্নপানযোর্বিভাগঃ (৪৬-৪৭) · Śloka ৪৭
| অন্নেন কুক্ষের্দ্বাবংশৌ পানেনৈকং প্রপূরযেত্||৪৬|| আশ্রযং পবনাদীনাং চতুর্থমবশেষযেত্| |৪৭|
| अन्नेन कुक्षेर्द्वावंशौ पानेनैकं प्रपूरयेत्||४६|| आश्रयं पवनादीनां चतुर्थमवशेषयेत्| |४७|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-কুক্ষেঃ-জঠরস্য, অন্নেন দ্বৌ ভাগৌ প্রপূরযেত্| পানেন-জলাদিনা, একমংশং প্রপূরযেত্| চতুর্থমংশং পবনাদীনামাশ্রযমবশেষযেত্-ন ত্বন্নেন পানেন বা প্রপূরযেত্| অত্র ত্বংশকল্পনা পরিকল্পনেনৈব যুজ্যতে, ন ত্বঙ্গুলমানাদিনা| সুশ্রুতে চাভিহিতম্ (সূ. অ. ৪৬|৪৭৮)- "প্রক্ষালযেদদ্ভিরাস্যং ভুঞ্জানশ্চ মুহুর্মুহুঃ| বিশুদ্ধে রসনে হ্যস্মিন্ রোচতেঽন্নমপূর্ববত্||" ইতি| [রসনা বিদ্যতে যস্য মুখস্য তদ্রসনম্, তস্মিন্ রসনে বিশুদ্ধে রোচতেঽন্নমপূর্ববত্||]
আযুর্বেদরসাযনম্ ব্যাখ্যা ( কৃত)
আ০ র০- অন্নপানযোর্বিভাগমাহ-অন্নেনেতি| কুক্ষিঃউদরম্, চতুর্থা বিভজ্য দ্বাবংশবন্নেন-অদ্রবেণ পূরযেত্| তৃতীযমংশং পানেন-দ্রবেণ পূরযেত্| চতুর্থমংশং পবনাদিসুখসঞ্চারার্থমনশেষযেত্-ন কেনাপি পূরযেত্| এতদেব চ সৌহিত্যমানম্| অত এবার্ধসৌহিত্যং নাতিতৃত্পতা চ জ্ঞেযা|
Adhikarana অনুপানবিভাগঃ,যবগোধূমযোঃ শীতং জলমিত্যাদি (৪৭-৫০) · Śloka ৫০
| অনুপানং হিমং বারি যবগোধূমযোর্হিতম্||৪৭|| দধ্নি মদ্যে বিষে ক্ষৌদ্রে, কোষ্ণং পিষ্টমযেষু তু| শাকমুদ্গাদিবিকৃতৌ মস্তুতক্রাম্লকাঞ্জিকম্||৪৮|| সুরা কৃশানাং পুষ্ট্যর্থং, স্থূলানাং তু মধূদকম্| শোষে মাংসরসো, মদ্যং মাংসে স্বল্পে চ পাবকে||৪৯|| ব্যাধ্যৌষধাধ্বভাষ্যস্ত্রীলঙ্ঘনাতপকর্মভিঃ| ক্ষীণে বৃদ্ধে চ বালে চ পযঃ পথ্যং যথাঽমৃতম্||৫০||
| अनुपानं हिमं बारि यवगोधूमयोर्हितम्||४७|| दध्नि मद्ये विषे क्षौद्रे, कोष्णं पिष्टमयेषु तु| शाकमुद्गादिविकृतौ मस्तुतक्राम्लकाञ्जिकम्||४८|| सुरा कृशानां पुष्ट्यर्थं, स्थूलानां तु मधूदकम्| शोषे मांसरसो, मद्यं मांसे स्वल्पे च पावके||४९|| व्याध्यौषधाध्वभाष्यस्त्रीलङ्घनातपकर्मभिः| क्षीणे वृद्धे च बाले च पयः पथ्यं यथाऽमृतम्||५०||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-যবগোধূমযোর্ভুক্তযোরনু-পশ্চাত্, পানং শীতং জলং হিতম্| তথা, দধ্নি মদ্যে বিষে ক্ষৌদ্রে চ হিমং জলমনুপানে হিতম্| পিষ্টমযেষু কোষ্ণং জলং হিতম্| শাকমুদ্গাদিবিকৃতৌ চ মস্ত্বাদিকমনুপানং হিতম্| কৃশানাং পুংসাং সুরা পুষ্ট্যর্থং হিতা| স্থূলানাং পুনঃ কর্শনায মধূদকং হিতম্| শোষে-ক্ষযে, মাংসরসো হিতঃ, পুষ্টিকারিত্বাত্| মাংসে ভুক্তে মদ্যমনুপানং হিতম্| স্বল্পে চ পাবকে মদ্যমেবানুপানং হিতম্| ব্যাধ্যাদিভিঃ ক্ষীণে-ক্ষপিতে, পযো-দুগ্ধং, পথ্যং-হিতম্| ইহ (হিতমিতি) প্রকৃতেঽপি পথ্যগ্রহণং পথ্যতরত্বজ্ঞাপনার্থম্| যথাঽমৃতমিত্যনেনৈতত্ প্রতিপাদযতি,-যথাঽমৃতং বলবর্ণৌজঃকান্ত্যাযুরাদিজনকং তথেদমপীত্যর্থঃ|
আযুর্বেদরসাযনম্ ব্যাখ্যা ( কৃত)
আ০ র০- অথানুপানম্| তেন হ্যসম্যগ্যোগোঽপি সম্যগ্যোগতাং যাতি| যদাহ খারণাদিঃ-"কামং দোষবদপ্যন্নমমাত্রং বা নিষেবিত,| অল্পদোষমদোষং বাঽপ্যনুপানেন জীর্যতি||" ইতি| অনু-পশ্চাত্পীযত ইত্যনুপানম্| এতচ্চ বাহুল্যাভিপ্রযেণ| তদ্ধি মধ্যেঽপ্যাদাবপি পীযতে| যদাহ সুশ্রুতঃ (সূ. অ. ৪৬/৪৬৮)- "তদাদৌ কর্শযেত্ পীতং স্থাপযেন্মধ্যসেবিতম্| পশ্চাত্পীতং বৃংহযতি তস্মাদ্বীক্ষ্য প্রযোজযেত্||" ইতি| তথা, (সু.সূ.অ. ৪৬/৪২৮)- "নিরামযানাং চৈতত্তু ভুক্তমধ্যে প্রশস্যতে|" ইতি চ| কস্তর্হি পানানুপানযোর্ভেদঃ ? উচ্যতে| যদনিযতকালং রুচিবশাত্পীযতে তত্-পানম্, যন্নেযতকালং বিধিবশাত্পীযতে তত্-অনুপানম্| তত্রাদাবনুপানবিভাগঃ| তত্র যবাদিষু শীতোদকমাহ-অনুপানং হিমমিতি| পিষ্টমযেষু ঈষদুষ্ণোদকমাহ-কোষ্ণমিতি| যত্তু সুশ্রুতেনোক্তম্ (সূ. অ. ৪৬/৪২৩)- "শীতোদকং মাক্ষিকস্য পিষ্টান্নস্য চ সর্বশঃ| দধিপাযসমদ্যার্তিবিষজুষ্টে তথৈব চ||" ইতি| তদ্বিদাহিপিষ্টান্নবিষযম্| উক্তং ব সঙ্গ্রহে (সূ. অ. ১০)- "তচ্ছীতং দধিমধুযবদোধূমমদ্যবিষেষুসর্বেষু চ বিদাহিষু শরদ্গ্রীষ্মযোশ্চ|" ইতি| শাকাদিষু মস্ত্বাদ্যাহ-শাকেতি| শাকং-পাঠাদি, মুদ্গাদিসূপ্যম্, তস্য (তযোঃ) বিকৃতিঃ-বটকাদিকা| বিকৃতিগ্রহণং রসাদ্যন্যত্ব এব মস্ত্বাদিপ্রাপ্ত্যর্থম্| অবিকৃতে তু সূপাদৌ সুশ্রুতেনোক্তম্ (সূ. অ. ৪৬/৪২৫)- "পযো মাংসরসো বাঽপি শাকমুদ্গাদিভোজনে|" ইতি| মস্ত্বাদিষু যস্য যত্সাত্ম্যমিষ্টং বা তস্য তদ্যোজ্যমিতি| একস্যৈব তত্কার্যকরত্বাত্ ন মিশ্রীকৃত্যপ্রযোগঃ| অত এব পৃথগুক্তং সঙ্গ্রহে (সূ. অ. ১০)- "ধান্যাম্লং মস্তু তক্রং বা শাকাবরান্নেষু|" ইতি| কৃশানাং সুরামাহ-সুরেতি| কৃশানাং শীতোদকাদ্যুচিতেষ্বন্নেষু সুরৈবানুপানম্, অনবকাশ্ত্বাত্| পুষ্ট্যর্থে- ন তু রোগনিবৃত্যর্থম্| যস্তু কৃশো রোগার্তঃ তস্য রোগানুরূপমনুপানং প্রযোজ্যম্| স্থূলানাং মধূদকমাহ-স্থূলানাং ত্বিতি| মধুমিশ্রমুদকং-মধূদকম্| শেষং পুর্ববত্| শোষে মাংসরসমাহ-শোষ ইতি| শোষে-শুষ্যতি দেহে| যদাহ খারণাদিঃ-"কৃশক্ষীণামযোন্মুক্তপুষ্টিবর্ণবলার্থিনাম্| মদ্যস্ত্রীশ্রমনিত্যানাং শুষ্যতাং চ রসো হিতঃ||" ইতি| মাংসাশিনাং মন্দাগ্নীনাং চ মদ্যমাহ-মদ্যমিতি| তচ্চ মদ্যোচিতানামেব| যদাহ সুশ্রুতঃ (সূ. অ. ৪৬/৪২৬)- "মদ্যং মদ্যোচিতানাং তু সর্বমাংসেষু পূজিতম্| অমদ্যপানামুদকং ফলাম্লং বা প্রশ্স্যতে||" ইতি| ব্যাধ্যাদিষীণাদীনাং ক্ষীরমাহ-ব্যাধ্যৌষধেতি| লঙ্ঘনংউপবাসঃ| কর্ম-চেষ্টা|
Adhikarana অনুক্তানুপানবিভাগঃ (৫১) · Śloka ৫১
বিপরীতং যদন্নস্য গুণৈঃ স্যাদবিরোধি চ| অনুপানং সমাসেন, সর্বদা তত্প্রশস্যতে||৫১||
विपरीतं यदन्नस्य गुणैः स्यादविरोधि च| अनुपानं समासेन, सर्वदा तत्प्रशस्यते||५१||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-অন্নস্য-ভক্তবটকাদেঃ, যদ্বিপরীতং গুণৈস্তদনুপানং সদা প্রশস্যতে| যথা,-স্নিগ্ধস্য রূক্ষম্, রূক্ষস্য স্নিগ্ধম্, শীতস্যোষ্ণম্, উষ্ণস্য শীতম্, মধুরস্যাম্লম্, অম্লস্য মধুরমিত্যাদি| ননু, এবমুররীক্রিযমাণে ক্ষীরস্য ক্ষৈরেযাদের্বা তক্রচুক্রাদীনামম্লানামনুপানত্বং প্রাপ্তমিত্যাহ-গুণৈরিত্যাদি| বিপরীতগুণমপি যদবিরোধি তদেবানুপানং সদা হিতম্|
আযুর্বেদরসাযনম্ ব্যাখ্যা ( কৃত)
আ০ র০- অনুক্তানুপানবিভাগোপাযমাহ-বিপরীতমিতি| যত্-দ্রব্যং, যস্যান্নস্য গুণৈঃ কৃত্বা বিপরীতং ন চ তেন সহ বিরুদ্ধম্, তত্তদন্নস্যানুপানম্| সমাসেন-সামান্যেন, বিশেষতস্তু সাত্ম্যাদিপর্যালোচনযা স্বযমূহ্যম্| অনুপানস্য নিত্যসেব্যত্বমাহ-সর্বদেতি| তত্-অনুপানম্|
Adhikarana অনুপানস্য ফলম্ (৫২) · Śloka ৫২
অনুপানস্য কিং কর্ম ? ইত্যাহ অনুপানং করোত্যূর্জাং তৃপ্তিং ব্যাপ্তিং দৃঢাঙ্গতাম্| অন্নসঙ্ঘাতশৌথিল্যবিক্লিত্তিজরণানি চ||৫২||
अनुपानस्य किं कर्म ? इत्याह अनुपानं करोत्यूर्जां तृप्तिं व्याप्तिं दृढाङ्गताम्| अन्नसङ्घातशौथिल्यविक्लित्तिजरणानि च||५२||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-অনুপানমূর্জাদীন্ করোতি| ঊর্জা-মনঃপ্রহর্ষঃ| তৃপ্তিঃ-প্রীণনং শরীরেন্দ্রিযস্য, ক্ষামতাবিপরীতোঽন্নগুণঃ| তথা, ব্যাপ্তিঃদ্রবস্য হি গমনম্, ন কঠিনস্য| দৃঢাঙ্গতা-স্থিরশরীরত্বম্| তথা, অন্নসঙ্ঘাতস্য শৈথিল্যম্| বিক্লিত্তিঃ-বিক্লেদনম্| জরণং-পরিণামঃ| এতানি চ করোতি|
আযুর্বেদরসাযনম্ ব্যাখ্যা ( কৃত)
আ০ র০- অনুপানস্য ফলমাহ-অনুপানমিতি| ঊর্জাংবলম্| তৃপ্তিং-সৌহিত্যম্| ব্যাপ্তিং-অন্নস্য সর্বস্রোতোনুসরণম্| অন্নসঙ্ঘাতশৈথিল্যাদীনি চ| শৈথিল্যং-কাঠিন্যনিবৃত্তিঃ| বিক্লিত্তিঃ-শুষ্কত্বনিবৃত্তিঃ| জরণং-পাকঃ|
Adhikarana ঊর্ধ্বজত্রুগদাদৌ অনুপাননিষেধঃ (৫৩) · Śloka ৫৩
এবংগুণমপ্যূর্ধ্বজত্র্বাদিষু ন হিতমিত্যাহ নোর্ধ্বজত্রুগদশ্বাসকাসোরঃক্ষতপীনসে| গীতভাষ্যপ্রসঙ্গে চ স্বরভেদে চ তদ্ধিতম্||৫৩||
एवंगुणमप्यूर्ध्वजत्र्वादिषु न हितमित्याह नोर्ध्वजत्रुगदश्वासकासोरःक्षतपीनसे| गीतभाष्यप्रसङ्गे च स्वरभेदे च तद्धितम्||५३||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-ঊর্ধ্বং জত্রুণঃ-ঊর্ধ্বজত্রু, তস্মিন্ যে গদাস্তেষু তত্-অনুপানং, ন হিতম্| তথা, শ্বাসাদিষু ন হিতম্| গীত-ভাষ্যযোঃ প্রকর্ষেণ সঙ্গঃ-সাতত্যেন সম্বন্ধঃ, তস্মিন্| তথা, স্বরভেদে-স্বরসাদে ন তদ্ধিতম্| ঊর্ধ্বজত্রুগদাদীনাং হ্যনুপানং প্রদূষ্যামাশযমুরঃকণ্ঠস্থিতমাহারজং স্নেহমাসাদ্যাভিষ্যন্দাগ্নিসাদচ্ছর্দ্যাদীনামযান্ বিদধ্যাত্|
আযুর্বেদরসাযনম্ ব্যাখ্যা ( কৃত)
আ০ র০- ঊর্ধ্বজত্রুগদাদাবনুপানং নিষেধতি-নোর্ধ্বেত্যাদি| বক্ষঃস্কন্ধযোঃ সন্ধী-জত্রুণী, তযোরূর্ধ্বং-ঊর্ধ্বজত্রু,-কণ্ঠাদিকপালন্তম্, তত্র যে গদাস্তে-ঊর্ধ্বজত্রুগদাঃ| কাসোত্পত্তেঃ প্রাগপি নিষেধার্থমুরঃক্ষতগ্রহণম্| গীতভাষ্যযোঃ প্রসঙ্গো-গাযনাধ্যযনাদ্যভ্যাসঃ|
Adhikarana প্রক্লিন্নদেহাদীনাং পাননিষেধঃ (৫৪) · Śloka ৫৪
সম্প্রতি যেষাং পানমেব ন শস্যতে, তানাহ প্রক্লিন্নদেহমেহাক্ষিগলরোগব্রণাতুরাঃ| পানং ত্যজেযুঃ|৫৪|
सम्प्रति येषां पानमेव न शस्यते, तानाह प्रक्लिन्नदेहमेहाक्षिगलरोगव्रणातुराः| पानं त्यजेयुः|५४|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-প্রক্লিন্নো দেহো যেষাং আমবিসর্পাদ্যার্তানাং তে পানং ত্যজেযুঃ| মেহাদীনামাতুরশব্দেন প্রত্যেকং সম্বন্ধঃ| মেহরোগাদ্যাতুরাঃ পানং-দ্রবরূপং ত্যজেযুঃ, ন কেবলমন্নস্যোপরি যদনুপানম্| খরনাদে চোক্তম্-"মেহী প্লীহী ব্রণী কুষ্ঠী পাণ্ডুর্জঠরপীনসী| শোষাতিসারী মন্দাগ্নিঃ পানীযং মন্দমাচরেত্|| নোর্ধ্বাঙ্গপবনাবিষ্টে বাগ্ব্যাযামহতে ন চ| ক্ষতোরসি শ্বাসকাসহিক্কাবম্যর্দিতে ন চ|| নিরন্নে চোর্ধ্বরোগে চ ন পেযং বারি শীতলম্|" ইতি|
আযুর্বেদরসাযনম্ ব্যাখ্যা ( কৃত)
আ০ র০- প্রক্লিন্নদেহাদীনাং পানমাত্রং নিষেধতি-প্রক্লিন্নেতি| প্রক্লিন্নদেহঃ-ক্লেদবহুলশরীরঃ| মেহাদিভিরাতুরাঃ|
Adhikarana পানানন্তরভাষ্যাদিনিষেধঃ ভোজনান্তরমাতপাদিনিষেধঃ (৫৪-৫৫) · Śloka ৫৫
| সর্বশ্চ ভাষ্যাধ্বশযনং ত্যজেত্||৫৪|| পীত্বা, ভুক্ত্বাঽঽতপং বহ্নিং যানং প্লবনবাহনম্| |৫৫|
| सर्वश्च भाष्याध्वशयनं त्यजेत्||५४|| पीत्वा, भुक्त्वाऽऽतपं वह्निं यानं प्लवनवाहनम्| |५५|
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-চশব্দো লুপ্তনির্দিষ্টোঽত্র| সর্বোঽপি পুরুষঃ-স্বস্থো রোগী চ, পীত্বা ভুক্ত্বা চ ভাষ্যাদীংস্ত্যজেত্| তথা, আতপাদীন্ পঞ্চ ত্যজেত্| ত্যজেদিত্যত্রাপ্যনুবৃত্ত্যা যোজ্যম্| যানং-রথাদি| প্লবনং-তরণম্| বাহনং-অশ্বাদি|
আযুর্বেদরসাযনম্ ব্যাখ্যা ( কৃত)
আ০ র০- পানানন্তরং ভাষ্যাদি নিষেধতি-সর্বশ্চেতি| সর্বঃ-সষিদ্ধপানোঽনিষিধাপানো বা, নিষিদ্ধপানস্যাপি প্রমাদাদবস্থাদিবশাদ্বা পানপ্রসক্তিঃ| ভোজনানন্তরমাতপাদি নিষেধতি-ভুক্ত্বাঽঽতপমিতি| যানং-পভ্দ্যাং গমনম্| বাহনং-অশ্বাদিভিঃ| প্লবনং-প্রতরণম্| গমনং তু পদশতাদূর্ধ্বং নিষিদ্ধম্| যদাহ সুশ্রুতঃ (সূ. অ. ৪৬/৪৮৬)- "ততঃ পদশতং গত্বা বামপার্শ্বেন সংবিশেত্|" ইতি|
Adhikarana ভোজনস্য কালঃ (৮) · Śloka ৮
"কালে সাত্ম্যম্" (শ্লো. ৩৫) ইত্যুক্তম্| ভোজনস্য তু কঃ কালঃ ? ইত্যাহ প্রসৃষ্টে বিণ্মূত্রে হৃদি সুবিমলে দোষে স্বপথগে বিশুদ্ধে চোদ্গারে ক্ষুদুপগমনে বাতেঽনুসরতি| তথাঽগ্নাবুদ্রিক্তে বিশদকরণে দেহে চ সুলঘৌ প্রযুঞ্জীতাহারং বিধিনিযমিতং, কালঃ স হি মতঃ||৫৫|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে মাত্রাশিতীযো নাম অষ্টমোঽধ্যাযঃ||৮||
"काले सात्म्यम्" (श्लो. ३५) इत्युक्तम्| भोजनस्य तु कः कालः ? इत्याह प्रसृष्टे विण्मूत्रे हृदि सुविमले दोषे स्वपथगे विशुद्धे चोद्गारे क्षुदुपगमने वातेऽनुसरति| तथाऽग्नावुद्रिक्ते विशदकरणे देहे च सुलघौ प्रयुञ्जीताहारं विधिनियमितं, कालः स हि मतः||५५|| इति श्रीवैद्यपतिसिंहगुप्तसूनुश्रीमद्वाग्भटविरचितायामष्टाङ्गहृदयसंहितायां सूत्रस्थाने मात्राशितीयो नाम अष्टमोऽध्यायः||८||
🔊 Audio coming soon
সর্বাঙ্গসুন্দরী ব্যাখ্যা ( কৃত)
স০-আহারং বিধিনা-পূর্বোক্তেন " কালে সাত্ম্যং শুচি হিতম্" ইত্যাদিনা নিযমিতং প্রযুঞ্জীত,-অশ্নীযাদিত্যর্থঃ| কদা ? মূত্রপুরীষে প্রকর্ষেণ সৃষ্টে সতি| ন তু কিঞ্চিদেব ত্যক্ত ইতি প্রশব্দেন দ্যোতযতি| তথা, হৃদযে সুষ্ঠু বিমলে-রসশেষকৃতগৌরবাদিরহিতে| তথা, দোষে-বাতাদৌ, স্বপথগে-স্বমার্গগে, অজীর্ণে হ্যাহারেঽন্নশেষেণ রুদ্ধগতযো বাতাদযঃ স্বস্থানং ন লভরেন্, সুজীর্ণে তু স্বস্থানস্থাঃ স্যুঃ| উদ্গারে চ বিশুদ্ধে-চশব্দোঽনুক্তসমুচ্চযার্থঃ, স্রোতোমুখেষু চ বিশুদ্ধেষ্বিত্যর্থঃ| ক্ষুদুপগমনে-উপগতাযাং ক্ষুধি| বাতেঽনুসরতি-অনুলোমং গচ্ছতি| তথা, অগ্নৌ-কাযাগ্নৌ, উদ্রিক্তে-পাকক্ষমে| তথা, দেহে পট্বিন্দ্রিযে সুষ্টু লঘৌ চ| কালঃ স হি মতঃ| হিশব্দ এবার্থে| স এব কালো ভোজনস্য দৃষ্টঃ, ন ত্বতোঽপ্যূর্ধ্বম্| স হ্যতিকালঃ, তত্র ভুক্তমন্নং বাতবিষ্টব্ধং কৃচ্ছ্রাদ্বিপচ্যতে| তথা চোক্তং তন্ত্রান্তরে-"অতীতকালে ভুঞ্জানো বাযুনোপহতেঽনলে| কৃচ্ছ্রাদ্বিপচ্যতে ভুক্তং দ্বিতীযং ন চ কাঙ্ক্ষতি|| কুক্ষাবাধ্মানমাটোপসাদাংশ্চ কুরুতেঽধিকম্|" ইতি| তস্মাত্পূর্বোক্তে কালে ভোজনমদ্যাদিতি| যমৌ ন্সৌ তঃ সস্যাদ্রসরবিবিরামা ধীরললিতা| ইতি শ্রীমৃগাঙ্কদত্তপুত্র শ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে মাত্রাশিতীযাধ্যাযোঽষ্টমঃ সমাপ্তঃ|| ৮||
আযুর্বেদরসাযনম্ ব্যাখ্যা ( কৃত)
আ০ র০- ভোজবকালমাহ-প্রসৃষ্টে বিণ্মূত্র ইতি| প্রসৃষ্টে- প্রবৃত্তে| সুবিমলে-অতিপ্রসন্নে| স্বপথগে-স্বমার্গগামিনি| বিশুদ্ধে-মাধুর্যাদিরহিতে ক্ষুদুপগমনে-বুভুক্ষোত্পত্তৌ| অনুসরতি-অনুকূলং প্রবর্তমানে| 'দোষে স্বপথগে' ইত্যনেনৈব বাতানুলোম্যে লব্ধে 'বাতেঽনুসরতি' ইতি বাতানুলোম্যস্য প্রাধান্যার্থম্| উদ্রিক্তে-অতিদীত্পে| বিশদকরণেনির্মলেন্দ্রিযে| সুলগৌ-লঘীযসি| বিধিঃ-শাস্ত্রোক্তো নিযমঃ, তেন নিযমিতং-নিষিদ্ধকামচারম্| ননু, যো যদা ভুঙ্ক্তে স তস্য ভোজনকালঃ| কিমনেন ? ইত্যত আহ-কাল ইত্যাদি| হি-যস্মাত্, সঃ-তহাবিধঃ প্রসৃষ্তবিণ্মূত্রত্বাদিবিশিষ্টো, ভোজনকালো ভতঃ আচার্যাণাম্, ন কেবলঃ| তস্মাত্ প্রসৃষ্টবিণ্মূত্রত্বাদিবিশিষ্টে স্বকালে ভুঞ্জীত| ইতি ভোজনপ্রক্রিযা| সঙ্গ্রহে তু (সু.অ. ১০)- "বিধিবিহিতমন্নপানমিষ্টেন্দ্রিযার্থমাযতনমাযুষো ব্রুবতে|তদাযত্তানিহ্যোজস্তেজোধাত্বিন্দ্রিযবলপুষ্টিতুষ্টিপ্রতিভারোগ্যাদীনি| তদিন্ধনা চান্তরগ্নেঃ স্থিতিঃ, অগ্নিমূলং চ দেহধারণমিতি| অথাত্মবান্ স্বভাবসংযোগসংস্কারমাত্রাদেশকালোপযোগব্যবস্থাঃ সপ্তাহারকল্পনাবিশেষণাং স্বাস্থ্যাস্বাস্থ্যফলানাং হেতুভূতাঃ সমীক্ষ্য হিতমেবানুরুধ্যেত| তত্র স্বভাবতো-দিব্যোদকরক্তশালিশষ্টিকমুদ্গৈণলাবাদযো লঘবঃ, ক্ষীরেক্ষুব্রীহিমাষানূপমিষাদযো গুরব তি| তে খ্ল্বপি সংযোগাদিবিশেষৈরন্যথাত্বং প্রতিপদ্যন্তে| তত্র সংযোগো নাম-দ্বযোর্বহূনাং বা সংহতীভাবঃ| স বিশেষমারভতে যন্নৈকৈকশো দ্রব্যাণি| সংস্কারুস্তু-তোযাগ্নিসন্নিকর্ষশৌচমন্থনদেশকালভাবনাভাজনাদিভিরুপজন্যতে| মাত্রা পুনঃ-পিণ্ডপরিমাণতঃ সমুদাযেন প্রতিদ্রব্যাপেক্ষযা চাহাররাশিঃ| দেশো-দ্রব্যস্যোপযোক্তুশ্চোত্পত্যবস্থানে| তত্র পুনরুপযোক্তা স্বস্থাতুরত্বতঃ প্রকৃতিভেদতশ্চ| অজীর্ণে হি পূর্বস্যাহারস্যাপরিণতো রস উত্তরেণোপসৃজ্যমানঃ সর্বান্ দোষান্ প্রকোপযত্যাশু| জীর্ণে তু স্বস্থানস্থেষু দোষেষু বাতানুলোম্যে সৃষ্টেষু বাতমূত্রপুরীষবেগেষু বিশুদ্ধেষূদ্গারহৃদযস্রোতোমুখেষু বিশদকরণে লঘুনি শরীরেঽগ্নাবুর্দীর্ণে জাতাযাং বুভুক্ষাযামভ্যবহৃতমন্নমপ্রদূষযদ্দোষানাযুর্বলবর্ণানভিবর্ধযতি| কেবলমযমেব কালো ভোজনস্য| অতীতকালং পুনস্তদ্ব্তবিষ্টব্ধং কৃচ্ছ্রাদ্বিপচ্যতে| কর্শযত্যন্নরুচিং চ পুনরুপহন্তি| উপযোগব্যবস্থা-নাস্নাতো ন দিগ্বাসা নৈকবস্ত্রধৃক্ ন মলিনবসনো নাহুত্বা নাজপিত্বা নানিরূপ্য দেবতাভ্যো ন পিতৃভ্যো নাদত্বাঽগ্রমগ্নযে ন গুরূভ্যো নাতিথিভ্যো নাভ্যাগতেভ্যো শ্ববযঃ শ্বপচেভ্যঃ| প্রত্যবেক্ষ্য চাশ্রিতোপাশ্রিতানপি তিরশ্চঃ পরিগৃহীতান্ প্রশস্তদেশকালোপকরণযুক্তঃ স্রগ্বী বিভূষিতঃ সুগন্ধিরার্দ্রপাণিপাদঃ সুবিশুদ্ধবদনোঽভিমরসহাযঃ কেশমক্ষিকাদ্যজুষ্টমনিন্দ্যমনিন্দ্রন্ননিন্দিতং পুনর্নোষ্ণীকৃতং নাত্যুষ্ণমনুপদগ্ধং সুসিদ্ধমলোলো নাসাত্ম্যং নাবিদিতং নাবিদিতাগমং নাতিপ্রগে নাতিসাযং নাকাশে নাতপে নান্ধকারে নাধো বৃক্ষস্য ন শয্যাস্থো নোন্নম্য প্রদেশিনীং ন পাত্রে ভীন্নে নাসংবৃতে ন মলিনে ন ভাবদূষিতে ন চাসনস্থিতে ন হস্তস্থে ন হস্তে| প্রাঙ্মুখঃ সুমনাঃ শুচিভক্তাক্ষুধিতানুকূলজনোপহিতং হিতমন্নমশ্নীযাত্| ন পর্যুষিতমন্যত্র মাংসোপদংশশুষ্কশাকফলভক্ষ্যেভ্যঃ| নাশেষমন্যত্র দধিমধুঘৃতসলিলসক্তুশুক্তপাযসেভ্যঃ| অপি চ| স্নিগ্ধং লঘূষ্ণমবিলম্বিতমনতিদ্গুতমজল্পন্নহসংস্তন্মানাঃ সমীক্ষ্য সম্যগাত্মানম্| স্নিগ্ধলঘূষ্ণানি হি বহ্নিমৌদর্যমুদীরযন্তি কোষ্টং পরিশোধযন্তি ধাতূন্ন বিকুর্বতে, ক্ষিপ্রং জীর্যন্ত্যনিলমনুলোমযন্তি| তথা, স্নিগ্ধং দৃঢীকরোতীন্দ্রিযাণ্যুপচিনোতি শরীরমপচিনোতি জরসং, বলমভিবর্ধযতি, বর্ণপ্রসাদমভিনির্বর্তযতি| লঘু চ পুনঃ স্বাভাদিভিরন্নমপ্রতিপীডযদ্দোষানব্যযং পরিণামমেতি, বিপন্নমপি চাল্পদোষং ভবতি| উষ্ণং চ পুনর্জনযতি রুচিমুপশোষযতি শ্লেষ্মাণম্| বিলবিতং তু ভুঞ্জানো ন তৃত্পিমভিগচ্ছতি বহু চ ভুঙ্ক্তে শীতীভবতি চান্নজাতং বিষমপাকং চ ভবতি| অতিদ্রুতং তু ভুঞ্জানস্য জল্পতো হসতোঽন্যমনসো বা ভবেদুত্স্নেহনমবসাদনং ভোজনস্যাপ্রতিষ্ঠানং গুণদোষাবিভাবনং চ| সমীক্ষ্য সম্যগাত্মানমিতি মমেদং সাত্ম্যমিদমসাত্ম্যমিতি বা নিত্যমপ্রমত্তঃ প্রত্যবেক্ষেত| তত্র সাত্ম্যং নাম সহাত্মনা ভবতি, অতস্তদৌচিত্যাদুপশেত ইত্যেকে| সাত্ম্যবিপরীতমনুপশযাদসাত্ম্যম্| অন্যে পুনঃ প্রকৃতিবযোদেশর্তুদোষব্যাধিবশেন সাত্ম্যং বহুবিধমিচ্ছন্তি| তে হ্যুপশযমাত্রমঙ্গীকৃত্য বিপরীতগুণমপ্যুপচারেণ সাত্ম্যমাচক্ষতে| তুল্যগুণং চানুপশযাদসাত্ম্যম্| সাত্ম্যং তু প্রবরাবরমধ্যবিভাগেন ত্রিবিধম্| তত্র সর্বরসং প্রবরম্, একরসমবরম্, মধ্যমং তু মধ্যমেব| তেষু প্রবরং সমদোষস্যোপদিশন্তি| ইতরেষামপি ক্রমেণ সাত্ম্যমপি চাহিতং পাদেন পাদপাদেন বা বিবর্জযেদিত্যুক্তং প্রাক্| তত্র যদাহারজাতং সমান্ ধাতূননুবর্তযতি, বিষমাংশ্চ সমীকরোতি, তত্সমাসতো হিতম্| বিপরীরমহিতম্| তত্পুনর্মাত্রাযোগাদিবৈচিত্র্যাদনিযমপি যথোপদেশং যথাভূযিষ্ঠং চ শীলযেত্ পরিহরেচ্চ| ভুঞ্জানস্তু পেযাযূষরসাম্লব্যঞ্জনানি রাজতেষু পাত্রেষু নিদধ্যাত্| পরিশুষ্কপ্রদগ্ধান্যুষ্ণং চ পযঃ সৌবর্ণেষু| খলকট্বরকাম্বলিকান্ কাংস্যেষু| রাগখাণ্ডবসট্টকান্ বজ্রবৈডূর্যবিচিত্রেষু| ধৃতমাযসে| পযঃ সুশীতং তাম্রমযে| পানীযং পানকানি চ মৃদ্ধেমস্ফটিককাচমযেষু| ওদনং চ বিস্তীর্ণে মনোরমে বিমলেঽন্যতমে স্থালে| অন্যথা হি বর্ণগন্ধরসান্যত্বাদহিতং স্যাত্| অপি চ| দক্ষিণপার্শ্বে ভক্ষ্যং স্থাপযেত্, সব্যে পেযং লেহ্যং মুখোদ্ধর্ষণপিণ্ডীং চ, মধ্যে ভোজ্যমিতি| যথাগ্নিসাত্ম্যং তু প্রাগ্দ্রবমুপশুষ্কং বাঽশ্নীযাত্| প্রাগেব তু গুরু স্বাদু স্নিগ্ধং চ, মধ্যেঽম্ললবণম্, অন্তে রূক্ষং দ্রবমিতররসযুক্তং চ| তত্র মন্দাগ্রের্দ্রবোষ্ণেন সমুত্তেজিতোষ্মণোঽন্যদপ্যুপযুক্তং সম্যক্পাকমেতি| অনুপানং তু সলিলমেব শ্রেষ্ঠম্, সর্বরসযোনিত্বাত্সর্বভূতসাত্ম্যত্বাজ্জীবনাদিগুণযোগাচ্চ| তচ্ছীতং দধিমধুগোধূমযবপিষ্টমযেষু সর্বেষু চ বিদাহিষু শরদ্গ্রীষ্মযোশ্চ| উষ্ণং পিষ্ঠমযেষ্বব্যেষু চ দুর্জরেষু হেমন্তশিশিরযোশ্চ, দ্রবদ্রব্যবিজ্ঞানীযং চেক্ষেত| ক্ষীরং শালিষষ্টিকযোস্তথোপবাসাধ্বভাষ্যস্ত্রীব্যাযামক্লিন্নবালবৃদ্ধেষু| মাংসরসঃ শোষাদিষু| বাতে ত্বাম্লানি চ| পিত্তে শর্করোদকম্| ত্রিফলোদকং তু সক্ষৌদ্রং শ্লেষ্মণি, প্রাযশশ্চাক্ষিগলরোগেষু| মস্ত্বেব বা দধ্নি কূর্চিকাকিলাটযোশ্চ| মদ্যং মাংসেষু ফলাম্লমম্বু বা, আসবাংস্চ বিবিধান্ বিভজ্য প্রযোজযেত্| বিশেষতস্তু মধ্বাসবান্ গ্রাম্যেষু, তীক্ষ্ণান্ ফলাসবান্ বন্যেষু, ন্যগ্রোধাদিফলাসবান্ বিষ্কিরেষু, অর্কশেলুশিরীষকপিত্থাসবান্ বিলেশযেষু দিগ্ধহতেষু চ, অম্লকফলাসবান্ প্রসহেষু, কাসেক্ষুপদ্মবীজশৃঙ্গাঅটকসেরুকমৃদ্বীকামদিরাসবান্ ক্ষৌদ্রযুক্তং বা শীতমুদকমুদশ্বিদ্বা মহামৃগেষ্বৌদকেষু চ, সুরাং প্রতুদেষু| বর্জ্যং তূর্ধ্বজত্রুগদশ্বাসকাসপ্রসেকহিধ্মাস্বরভেদোরঃক্ষতিভির্গীতভাষ্যপ্রসক্তৈশ্চ| তেষাং হি প্রদূষ্যামাশযমুরঃকণ্ঠস্থিতমাহারজং স্নেহমাসাদ্য তদভিষ্যন্দাগ্নিসাদচ্ছর্দ্যাদীনামযান্ বিদধ্যাত্| তেষাং-নিষিদ্ধানুপানানাম্| ততঃ পাণিগতমন্নমন্যেনাপনীয দন্তান্তরস্থং চ শনৈঃ শোধনেন লেপগন্ধস্নেহাপনোদমাচান্তোঽঙ্গুল্যগ্রগলিতাম্বুপরিষিক্তনেত্রস্তাম্বূলাদিকৃতবদনবৈশদ্যো ধূমপানাদিহৃতোর্ধ্বকফবেগঃ পদশতমাত্রং গত্বা বামপার্শ্বেন সংবিশেত্| দ্রবোত্তরভোজনাস্তু সুখশয্যাং নাতিসেবেত| আহারপরিণামকরাঃ পুনরিমে ভাবাঃ| তদ্যথা,-ঊষ্মা বাযুঃ ক্লেদঃ স্নেহঃ কালঃ সমযোগশ্চ| তত্রোষ্মা পচতি, বাযুরপকর্ষতি, ক্লেদঃ শৈথিল্যমাপাদযতি, স্নেহো মার্দবং জনযতি, কালঃ সর্ববপুর্ব্যাত্পিমভিনির্বর্তযতি, সমযোগস্ত্বেষাং পরিণমধাতুসাম্যকরঃ সম্পদ্যতে| সমযোগস্য পুনঃ কারণান্যুচিতো হিতশ্চ দেহসংস্কারোঽভ্যবহারশ্চেষ্টা শযনং সৌমনস্যং চ| পরিণামতস্ত্বাহারগুণাঃ শরীরজগুণভাবমাপদ্যন্তে যথাস্বমবিরুদ্ধাঃ| বিরুদ্ধাস্তু বিহিতাশ্চ বিরোধিভির্বিহন্যুঃ শরীরমিতি| ভবন্তি চাত্র| ঔকুলাভ্যোষপৃথুকান্ সিপিষ্টকৃততন্দুলান্| ন জাতু ভুক্তবানদ্যন্মাত্রযাঽদ্যাত্সুকাঙ্ক্ষিতঃ|| শাকাবরান্নকট্বম্লকষাযলবণোত্কটম্| ত্যজেদেকরসাসাত্ম্যং গুরু শুষ্কং চ ভোজনম্|| বক্ষ্যতে যন্নিদানাদৌ সর্বদোষপ্রকোপণম্| অত্যভিষ্যন্দি বিষ্টম্ভি বিদাহি হিভরূক্ষণম্|| ত্যাগাদ্বিষমহেতূনাং সমানাং চোপসেবনাত্| বিষমা নানুবধ্নন্তি জাযন্তে ধাতবঃ সমাঃ|| মন্দানলবলারোগ্যনৃপেশ্বরসুখাত্মসু| যোজ্যঃ ক্রমোঽযং সততং নাবশ্যমিতরেষু তু|| করোতি রূক্ষং বলবর্ণনাশং ত্বগ্রূক্ষতাং বাতশকৃন্নিরোধম্| স্নিগ্ধং ত্বতিশ্লেষ্মচযপ্রসেকহৃদ্গৌরবালস্যরুচিপ্রণাশান্|| অত্যুষ্ণমন্নং মদদাহতৃষ্ণাবলপ্রণাশভ্রমরক্তপিত্তম্| শীতং তু কাসারুচিবহ্নিনাশহৃল্লাসবিষ্টম্ভনরোমহর্ষান্| অতিস্থিরং মূত্রশকৃদ্বিবন্ধমতৃপ্তিমব্যাপ্তিশীঘ্রপক্তিম্| অতিদ্রবং পীনসমেহকাসস্যন্দান্ করোত্যগ্নিবলং চ হন্তি|| অতিমধুরমনলশমনং ভুক্তমসাত্ম্যং ন পিষ্টযে বপুষঃ| অতিলবণমচক্ষুষ্যং তীক্ষ্ণাত্যম্লং জরা সাক্ষাত্|| ইতি বিধিমবলম্ব্য যোঽন্নপানং বলমিববিগ্রহবত্সদোপযুঙ্ক্তে| তনুমপি রুজামনাপ্য ব্রজতি নরঃ স সমাশতস্য পারম্||" ইতি| ইতি হেমাদ্রিটীকাযামাযুর্বেদরসাযনে| মাত্রাশীতিপ্রকরণং সামস্ত্যেন নিরূপিতম্|| ৮||