৯. দ্রব্যাধিবিজ্ঞানীযাধ্যাযঃ

সর্বাঙ্গসুন্দরী ব্যাখ্যা ( কৃত)

স০- পূর্বমন্নপানাদিদ্রব্যৈকদেশঃ প্রাযোপযোগবান্নির্দিষ্টঃ, তস্য চাহারবিধের্মাত্রা চোপদিষ্টা| সম্প্রতি দ্রব্যরসবীর্যবিপাকাদযো বাচ্যাঃ| অন্নপানং হি রসবীর্যবিপাকাদীন্ পরীক্ষ্যোপযোক্তব্যম্, নান্যথা| তস্মান্মাত্রাশিতীযাধ্যাযাদনন্তরং দ্রব্যাদিবিজ্ঞানীয আরভ্যতে-

সর্বাঙ্গসুন্দরী ব্যাখ্যা ( কৃত)

স০-দ্রব্যমাদির্যেষাং তে দ্রব্যাদযঃ| আদিশব্দেন রসবীর্যাদিপরিগ্রহঃ| দ্রব্যাদীনাং বিজ্ঞানং-অবগমঃ, তস্মৈ হিতঃ| শেষং পূর্ববত্|

আযুর্বেদরসাযনম্ ব্যাখ্যা ( কৃত)

আ০ র০-দ্রব্যাদিবিজ্ঞানীযমধ্যাযং ব্যাখ্যাতুং প্রতিজানীতে-অথেতি| যতঃ পূর্বৈশ্চতুর্ভিরধ্যাযৈরাহার উক্তঃ| স চানন্তবিশেষত্বাত্ তাবতা জ্ঞাতুমশক্যঃ, অতোঽশেষসঙ্রহার্থং দ্রব্যরসগুণবীর্যবিপাকপ্রভাবাঃ সামান্যতো বাচ্যাঃ| তে চাস্মিন্নধ্যাযে| অত এবাযং দ্রব্যাদিবিজ্ঞানীযঃ|

সর্বাঙ্গসুন্দরী ব্যাখ্যা ( কৃত)

স০-রসাদীনামিতি নির্ধারণে ষষ্ঠী| রসবীর্যাদীনাং মধ্যে দ্রব্যমেব প্রধানম্| কুতঃ ? তে-রসাদযো, হি-যস্মাত্, তদাশ্রযাঃ-তদেব দ্রব্যমাশ্রযো যেষাং ত এবম্| অত এব কেবলা রসাদযো নোপলভ্যন্তে| তস্মাত্ দ্রব্যং প্রধানম্|

আযুর্বেদরসাযনম্ ব্যাখ্যা ( কৃত)

আ০ র০-তত্র দ্রব্যস্য প্রাধান্যমাহ-দ্রব্যমেবেতি|| রসাদিভ্যো দ্রব্যমেব প্রধানম্| হি-যস্মাত্, তে-রসাদযঃ, তদাশ্রযাঃ-দ্রব্যাধিষ্ঠানাঃ| এতেনৈব রসাদ্যাশ্রযো দ্রব্যমিত্যুক্তং ভবতি| প্রাধান্যকথনং দ্রব্যজ্ঞানে তাত্পর্যার্থম্| উক্তং চ সঙ্গ্রহে (সূ. অ. ১৭)-"যস্মাদ্ দৃষ্টো যবঃ স্বাদুর্গুরুরপ্য নিলপ্রদঃ| দীপনং শীতমপ্যাজ্যং বসোষ্ণাঽপ্যগ্নিসাদিনী|| কাটুপকোঽপি পিত্তঘ্নো মুদ্গো, মাষস্তু পিত্তলঃ| স্বাদুপাকোঽপি, চযকৃত্স্নিগ্ধোষ্ণং গুরু ফাণিতম্|| রসে স্বাদৌ যথা চৈতত্তথাঽন্যেষ্বপি দৃশ্যতে| বাতলং কফপিত্তঘ্নমম্লমপ্যাক্ষকীফলম্|| কুরুতে দধি গুর্বেব বহ্নিং পালেবতং ন তু| কপিত্থংদাডিমং চাম্লং গ্রাহি, নামলকীফলম্|| কষাযা গ্রাহিণী শীতা ধাতকী, ন হরীতকী| অপ্রধানাঃ পৃথক্ তস্মাদ্গসাদ্যাঃ সংশ্রিতাস্তু তে|| প্রভাবশ্চ যতো দ্রব্যে, দ্রব্যং শ্রেষ্ঠমতো মতম্|" ইতি|

সর্বাঙ্গসুন্দরী ব্যাখ্যা ( কৃত)

স০-তুরবধারণে| যত্তদোশ্চ নিত্যাভিসম্বন্ধাত্ যদিত্যেতদনুক্তমপ্যর্থাল্লভ্যতে| তেনাযমর্থঃ,-যত্ রসাদীনামাশ্রযভূতং কার্যং দ্রব্যং-হরীতক্যাদি স্থাবরং, ছাগাদি বা জঙ্গমং, তত্ পঞ্চভূতাত্মকম্, ন তু যত্কারণং দ্রব্যমাকাশাদি| তস্য হি পঞ্চভূতাত্মকত্বে সত্যাকাশাদীনাং পৃথক্ত্বেনাত্মলাভো ন স্যাত্| ততশ্চেদমাকাশং নাম মহাভূতম্, ইদং পৃথ্বী নাম মহাভূতমিতি গদিতুং ন পার্যেত, সর্বস্য পঞ্চমহাভূতাত্মকত্বাত্| ন চ যত্কারণং তত্কদাচিত্ কার্যং স্যাত্| তস্মাত্ কার্যদ্রব্যস্যৈব পঞ্চমহাভূতাত্মকত্বম্, ন কারণদ্রব্যস্যাঽঽকাশাদেঃ| মুনিস্তু (চ. সূ. অ. ১|৪৭)- "খাদীন্যাত্মা মনঃ কালো দিশশ্চ দ্রব্যসঙ্গ্রহঃ|" ইতি নবধা দ্রব্যমুক্ত্বা তল্লক্ষণং ব্যধীত| যথা (চরকে সূ. অ. ১|৫০)- "যত্রাশ্রিতাঃ কর্মগুণাঃ কারণং সমবাযি যত্| তদ্দ্রব্যম্" ইতি| অস্যার্থঃ,-যত্র কর্ম-পরিস্পন্দলক্ষণং সংযোগবিযোগকারণম্, সমবেতশ্চ গুণঃ-যত্র শব্দাদযো গুর্বাদযো বা| বুদ্ধির্বা পরাদযো বা সমবেতাঃ, যচ্চ কারণং সমবাযি তদ্দ্রব্যমুচ্যতে| সমবাযীতি| যত্কারণমপৃথগ্ভবতি তত্সমবাযিকারণম্| যথা,-তন্তবঃ পটস্য| এতানি কর্মগুণাশ্রযিত্বসমবাযিকারণত্বানি যদ্যপি সর্বাণি সর্বস্মিন্ দ্রব্যে ন বিদ্যন্তে, তথাঽপি যদ্যত্র সম্ভবতি তত্র তেন তস্য দ্রব্যস্য দ্রব্যত্বং কল্প্যম্| তদ্যথা,-মনসঃ কর্মগুণাশ্রযিত্বেন, বায্বাদীনাং তু কর্মগুণাশ্রিযত্বেন সমবাযিকারণ্ত্বেন চ| ননু, আকাশাদীনি কারণদ্রব্যাণীতি কথমুক্তম্ ? যাবতাঽঽকাশস্য দ্রব্যত্বমেব নাস্তীতি কেচিত্| তান্ব্রূমহে| জলধেরিব প্রত্যক্ষেণৈবাস্য নীলরূপতোপলব্ধেরস্তিত্বং সিদ্ধম্| তথা, কবযোঽপি নীলত্বমেবাস্য বর্ণযন্তি| যথা কর্ণাটস্য-"বিপুলপুলিনা হৃদ্যা নদ্যো বহন্ত্যতিনির্মলাঃ কমলসুভগো বাযুর্ঘ্রাণং বিলম্বতি মাংসলঃ| নবজলধরচ্ছাযাবাসাদিবাচিরনির্গতো বহতি শশভৃন্নীলস্নিগ্ধে নভস্যবদাততাম্||" ইতি| তথা চ বাণস্য-"ধৌতাশনি নভসি" ইতি| তদেতদ্দূষযন্তি| তথা হি,- দূরাত্ ভ্রান্তিমাত্রেণৈব নীলরূপত্বমস্যোপলভ্যতে| যথা-গিরের্বিবিধবর্ণস্যাপি দূরান্নীলত্বপ্রতীতিঃ| যত্কবীনাং বর্ণনং তত্সাদৃশ্যলেশেন নিষ্প্রমাণমেব সম্ভাব্যতে| তথা চ তেজসঃ শুক্লত্বং বর্ণযন্তি| ন চ শুক্লত্বমেতস্যোপপদ্যতে, নিরাকারত্বাত্| তস্মান্নীলরূপত্বমাকাশস্যানুপপন্নম্| অপি চ, যদ্যাকাশস্য নীলরূপতা স্যাত্, তদা নীলরূপং ভবন্নভঃ| ন চ স্যাত্স্নিগ্ধনীলরূপত্বং নভসঃ| ননু, দর্শনবৈচিত্র্যাদস্য রূপবত্ত্বমুপপন্নম্| যথা,-পুরুষঃ শরাদেরৃজুতাং দিদৃক্ষুরেকং চক্ষুর্নিমীল্যাপরং চোন্মীল্য তামুপলভতে, ন তু নযনযুগলেন| তদ্বত্সন্নিকৃষ্টে গগনরূপস্যানাদানম্, বিপ্রকৃষ্টে তু গ্রহণং স্যাদিতি| ন চৈতদ্যুক্তম্| যতো রূপবত্ত্বেঽভ্যুপগম্যমানে স্পর্শবত্ত্বমস্য প্রসজ্যেত, রূপস্য স্পর্শেন নিত্যসম্বন্ধাত্| স্পর্শবত্ত্বে চ সত্যাকাশত্বমেব ন স্যাত্| অতো ন রূপবদ্ব্যোম| অন্যে ত্বেবং মন্যন্তে| পবনবদাকাশস্যাবস্থাঽস্তু| যথা কিল পবনঃ স্পর্শবান্, ন চ তস্মিন্ রূপং সম্ভবতি| তথৈবাকাশো রূপবান্, ন চ স্পর্শবানিতি| তদিদমনবগতপদার্থস্বরূপাণাং বিলপনম্| ততো যত্র রূপং তত্রাবশ্যং স্পর্শঃ, ন তু যত্র স্পর্শস্তত্রাবশ্যং রূপম্| তস্মান্ন নভো রূপবন্ন চ সত্ (স্পর্শবত্)| অত্রোচ্যতে| পরমার্থদর্শিভির্যদুপাদাযোত্পত্তিঃ কথ্যতে, তদস্তি| যথা,-পৃথিব্যাদি| উক্তং চ-"অক্ষরাত্ খং ততো বাযুস্তস্মাত্তেজস্ততো জলম্| উদকাত্ পৃথিবী জাতা ভূতানামেষ সম্ভবঃ||" ইতি| তস্মাদাকাশং দ্রব্যমস্তি| অপি চ, আকাশমুপদায যতিবৃদ্ধিপ্রসবাদিবিশেষোপলব্ধেরাকাশস্যাস্তিত্বম্| যথা,-রূপোপলব্ধিবিশেষসম্ভবানুমিতং চক্ষুঃ| অপি চ, আকাশাভাবে হ্যেকঘনত্বং জগতঃ স্যাত্| তথা, শব্দাখ্যস্য গুণস্যান্যথাঽনুপপত্ত্যাঽস্ত্যাকাশমিতি| ননু, বাযোর্দ্রব্যত্বং নাস্তি, তত্স্বরূপগ্রাহকপ্রমাণাভাবাত্| স্পর্শোপলব্ধের্বাযোরস্তিত্বমুচ্যত ইতি চেত্ তদপি ন, যতোঽধুনৈবোক্তং খাদ্বাযুরিতি| গগনস্য চ স্পর্শাভাবাত্ বাযোরপ্যস্পর্শবত্ত্বম্, কারণগুণপূর্বকত্বাত্কার্যস্য| নৈতদস্তি| কার্যস্যোভযাত্মকত্বদর্শনাত্| কারণগুণপূর্বকং কার্যং দৃষ্টমকারণগুণপূর্বকং চ দৃষ্টম্| তত্র কারণগুণপূর্বকং তাবদ্যথা,-তন্তুশ্বেতত্বপূর্বকং পটে শ্বেতত্বং দৃষ্টম্| অকারণগুণপূর্বকং চ দৃষ্টম্, যথা-হরিদ্রাক্ষারসংযোগাদ্রক্ততা| তস্মাদস্পর্শাদাকাশাদুত্পন্নো বাযুঃ স্যাদেব স্পর্শবান্| ননু, এবমপ্যগ্নিজলপৃথিবীষ্বপি স্পর্শবিশেষসম্ভবাত্ অগ্ন্যাদিসমবায এব বাযুর্ব্যবহ্রিযতে ন তু তদ্ব্যতিরিক্তো বাযুরস্তি| অত্রোচ্যতে| সত্যমনলাদীনামপি স্পর্শোঽস্তি, কিন্তু বিলক্ষণ এবাসৌ| তথা হি,- তেজসঃ স্পর্শো রূপৈকার্থসমবাযী| অপাং স্পর্শো রূপরসাভ্যাং সমবেতঃ| পৃথিব্যাঃ স্পর্শো রূপরসগন্ধসমবেতঃ| যস্তু বাযোঃ স্পর্শঃ, স পত্রচলনশাখাভঞ্জনাদিকর্মসমবাযী| স নৈষামগ্ন্যাদীনাং দৃষ্টানাং নাপ্যদৃষ্টানামাত্মগিক্কালাদীনাম্| গুণাশ্চ সর্বে দ্রব্যাশ্রযা দৃষ্টাঃ, রূপাদয ইব পটাদিষু| তস্মাদ্বাযোর্বিশিষ্টস্পর্শবত্ত্বাদস্তিত্বমনুমীযতে| তথা, পবনস্য তত্কর্মোপদেশাদস্তিত্বম্| যস্য তত্ত্বদর্শিভিঃ কর্মোপদিশ্যতে, তদস্তি| যথা,- কফাদিবদ্বাতস্য চ কর্মোপদিষ্টম্ (হৃ.সূ.অ. ১২|৪৯)- "স্রংসব্যাসব্যধস্বাপ" ইত্যাদি| তস্মাদস্তি বাযুর্দ্রব্যমিতি| অগ্নির্দ্রব্যং নাস্তি, ইন্ধনব্যতিরেকেণানুপলব্ধেঃ| অত্রোচ্যতে| তত্ত্বদর্শিভিরগ্নের্দ্রব্যোত্পত্তিহেতুত্বেনোপদেশাদস্তিত্বম্| তথা চেহৈব বক্ষ্যতি (শ্লো. ৮)- "আগ্নেযং দাহভাবর্ণপ্রকাশপচনাত্মকম্|" ইতি| ননু, যুক্তশ্চতুর্ণাং পৃথিব্যাপস্তেজোবাযূনাং ভূতানাং সাবযবত্বাত্ দ্রব্যেষূত্কর্ষাপকর্ষসন্নিবেশঃ, ক্বচিদ্দ্রব্যে কস্যচিদ্ভূতস্য প্রমাণতঃ প্রভাবতশ্চাবযবানামুক্তর্ষাপকর্ষসদ্ভাবাত্| আকাশস্য তু নিরবযবত্বাত্সূক্ষ্মত্বাদেকত্বাচ্চোত্কর্ষাপকর্ষসন্নিবেশো ন যুক্তঃ| যুক্তমাহ ভবান্| কিন্তু সাবযবানামেব দ্রব্যাণাং যেঽবযবাঃ ক্বচিত্পাষাণাদৌ সংহতাস্তথাঽবতিষ্ঠন্তে| যথা তত্র দ্রব্যে কাঠিন্যস্য প্রকর্ষো ভবতি| তত্র চাকাশমপকৃষ্যতে| অনিবিডাবযবে তু সন্নিবেশে আকাশঃ প্রকৃষ্যতে| তদেবমনযা যুক্ত্যাঽঽকাশস্যাপি ন্যূনাধিকভাব উপপন্নঃ| অথ কেন মহাভূতেন কথং কৃত্বাঽঽরব্ধং তদ্দ্রব্যমিত্যাহ-

আযুর্বেদরসাযনম্ ব্যাখ্যা ( কৃত)

আ০ র০-দ্রব্যভেদানাহ-পঞ্চভূতাত্মকমিতি| পঞ্চ সঙ্খ্যাকানি ভূতান্যেব আত্মানো যস্য তত্তথা, পার্থিবাদিভেদাত্ পঞ্চধেত্যর্থঃ| কার্যকারণযোরভেদোপচারাত্ ভূতশব্দেন ভৌতিকমুচ্যতে| দ্রব্যমিত্যনুবর্ততে|

সর্বাঙ্গসুন্দরী ব্যাখ্যা ( কৃত)

স০-পৃথ্বীমাধারীকৃত্বোত্পদ্যতে| এবং পৃথিব্যাখ্যেন ভূতেনাঽঽধারত্বেনোপকৃত্য তেন তদারব্ধং দ্রব্যমিত্যুচ্যতে| স০-তথা, অম্বু-সলিলং, যোনিঃ-কারণং, যস্য তদম্বুযোনি দ্রব্যম্| এবং জলং নাম মহাভূতং রসবত্ত্বাদ্যোনিতযোপকৃত্য তেন তদারব্ধমিত্যুচ্যতে| [মুনিনাঽপ্যুক্তম্ (চ. সূ. অ. ১|৬৩)- "রসনার্থো রসস্তস্য দ্রব্যমাপঃ ক্ষিতিস্তথা| নির্বৃত্তৌ চ বিশেষে চ প্রত্যযাঃ খাদযস্ত্রযঃ||" ইতি| অমীষাং দ্রব্যাদীনামাশ্রযকর্মণোর্ভেদশ্চিন্ত্যঃ|] তথা, অগ্নিপবননভসাং সমবাযাত্-অপৃথগ্ভাবাত্, তস্য-দ্রব্যস্য, নিবৃত্তিঃ-নিষ্পত্তিঃ| তথা, তস্য দ্রব্যস্য যো বিশেষঃ-ইদমন্যদিদমন্যদ্দ্রব্যমিত্যেবংরূপো নানাস্বভাবঃ, সোঽপ্যগ্নিপবননভসাং সমবাযাত্| এবমগ্নি পবননভোভিঃ সমবাযিকারণত্বৈনোপকৃত্য তৈরেতদ্দ্রব্যমারব্ধমিত্যুচ্যতে| এবং চ সর্বং কার্যদ্রব্যং পঞ্চমহাভূতাত্মকম্, পঞ্চভির্মহাভূতৈরারব্ধত্বাত্| ননু, যদি পঞ্চমহাভূতাত্মকং দ্রব্যং তত্কথমুচ্যতে পার্থিবমিদং দ্রব্যমিদমাপ্যমিত্যাহ- স০-যত্র দ্রব্যে যদ্ভূতং ভূযিষ্ঠমধিকৃতম্, তেন তস্য ব্যপদেশঃ-সংজ্ঞা ভবতি| যথা,-পৃথিব্যাঽধিকযোত্পাদিতং দ্রব্যং পার্থিবম্| এবমাপ্যং তৈজসং চ বেদ্যম্| তদেবং সর্বং দ্রব্যং পঞ্চভূতাত্মকং স্থিতম্|

আযুর্বেদরসাযনম্ ব্যাখ্যা ( কৃত)

আ০ র০-দ্রব্যোত্পত্তিমাহ-তত্ত্বিতি| তত্-দ্রব্যম্, ক্ষ্মাং-পৃথিবীম্, অধিষ্ঠায জাযতে, মৃদমিব ঘটঃ, উপাদানকারণং পৃথ্বীত্যর্থঃ| আ রং-অম্বু-উদকং, যোনিঃ-বিপরিণামকারণং যস্য তদম্বুযোনি| যথা,-ঘটে নিষ্পাদ্যে মৃদঃ পিণ্ডীভাবাদৌ| অগ্ন্যাদীনাং সম্বন্ধাত্ তন্নির্বৃত্তিঃ-সম্পূর্ণাবযবত্বম্, কাঠিন্যক্রিযাবকাশাদিদানেন| বিশেষঃ-পরস্পরম্, সোঽপি তত এব| যথা,- পিণ্ডীভূতাযা মৃদো মণিককরকশরাবাদিভেদঃ| আ রং-সর্বেষাং পঞ্চভুতাত্মকত্বাদভেদে প্রাপ্তে ভেদহেতুমাহ-ব্যপদেশ ইতি| ব্যপদেশঃ-ইদং পার্থিবমিদমাপ্যমিত্যাদি ভেদেন ব্যবহারঃ| স ভূযসা-অধিকেন ভূতেন, যত্র যস্যাধিক্যং তস্য তেন ব্যপদেশঃ|

সর্বাঙ্গসুন্দরী ব্যাখ্যা ( কৃত)

স০-তস্মাদ্ভূতসঙ্ঘাতসম্ভবাত্ কারণাদ্দ্রব্যং নৈকরসং-অপি ত্বনেকরসম্| এবং দ্রব্যবদ্রসস্যাপি ভূতসঙ্ঘাতসম্ভবত্বম্| অত এব প্রতিদ্রব্যং মধুরাদিরসস্য নানাস্বাদোপলম্ভঃ| তথা চ, দ্রাক্ষাঽক্ষোডক্ষীরেক্ষুক্ষৌদ্রগোক্ষুরাদৌ দ্রব্যে সত্যপি মাধুর্যেঽপরোঽপর আস্বাদ উপলভ্যতে| এবমম্লানামপি মাতুলুঙ্গধান্যাম্লাদীনাং দ্রব্যাণাং নানাস্বাদোপলম্ভঃ| এবং লবণাদীনামপি বেদ্যম্| অপি চৈষাং দ্রাক্ষাদীনামনেকরসত্বমাস্বাদবিশেষাদনুমীযমানং ভূযসা রসেনান্যরসাভিভবং কৃত্বা ব্যপদিশ্যতে ইদং মধুরমিদমম্লাদ্যন্যতমম্, মহাভূতবত্| যথা,-সর্বং দ্রব্যং পঞ্চমহাভূতাত্মকং ভূযসা মহাভূতেনান্যমহাভূতাভিভবং কৃত্বা যথা তেন ব্যপদিশ্যতে পার্থিবমিদমাপ্যমিদমিতি| ননু, দ্রব্যনির্ণযে প্রকৃতে পাঞ্চভৌতিকং যদেব দ্রব্যং প্রতিজ্ঞাতং তদেব "তস্মাত্" ইত্যাদিনা নিগমগ্রন্থেনাতিবাহযিতুং যুক্তম্, ন পুনরপ্রস্তুতমনেকরসত্বম্| তস্মাদত্রৈবং গ্রন্থঃ কর্তুং ন্যায্যঃ-"তস্মান্নৈকভূতজং দ্রব্যং ভূতসঙ্ঘাতসম্ভবাত্|" ইতি| অত্রোচ্যতে| ষণ্ণামপি রসানাং যোনিরুদকম্| ততশ্চৈকস্যৈব মহাভূতস্যোদকসংজ্ঞস্য রসকারণত্বং প্রাপ্তং নান্যেষাম্, নীরসত্বাত্| ইতি কৃত্বা ন ভূতসঙ্ঘাতসম্ভবত্বং রসস্য| ইত্যেবংবিধামাশঙ্কামপনিনীষুর্ভূতসঙ্ঘাতসম্ভবত্বং রসস্য চৈকেনৈব প্রযত্নেন "তস্মান্নৈকরসং দ্রব্যং ভূতসঙ্ঘাতসম্ভবাত্|" ইতি জগাদ| মুনিশ্চাত এব রসস্য ভূতসঙ্ঘাতসম্ভবত্বং স্পষ্টং কৃত্বোবাচ| যথা (চ. সূ. অ. ১|৬৩)- "রসনার্থো রসস্তস্য দ্রব্যমাপঃ ক্ষিতিস্তথা| নিবৃত্তৌ চ বিশেষে চ প্রত্যযাঃ খাদযস্ত্রযঃ||" ইতি| এবং ভূতসঙ্ঘাতো রসানাং দ্রব্যাশ্রিতানামপি সম্ভবকারণম্| এতচ্চ রসভেদীযে সবিস্তরং কথযিষ্যামঃ|

আযুর্বেদরসাযনম্ ব্যাখ্যা ( কৃত)

আ০ র০-সর্বেষাং দ্রব্যাণাং সর্বধর্মত্বমাহ-তস্মাদিতি| তস্মাত্-সর্বভূতারব্ধত্বাত্ সর্বমপি দ্রব্যং নৈকরসং-অনেকরসম্, সর্বধর্মমিত্যর্থঃ| রসশব্দোঽত্র ধর্মমাত্রোপলক্ষণঃ| সর্বভূতারব্ধত্বেঽপ্যেকরসত্বে কো দোষঃ ? ইত্যাশঙ্ক্যাহ-ভূত সঙ্ঘাতসম্ভবাদিতি| রসানামপি ভূতসমুদাযাদুত্পত্তেঃ| বক্ষ্যতি হি (হৃ.সূ.অ. ১০/১)-"দ্বযোল্বণৈঃ ক্রমাদ্ভূতৈর্মধুরাদিরসোদ্ভবঃ|" ইতি| সতি চ কারণে কার্যেণাবশ্যং ভাব্যম্|

সর্বাঙ্গসুন্দরী ব্যাখ্যা ( কৃত)

স০-যতঃ সর্বং দ্রব্যমনেকরসম্| ততঃ-তস্মাত্কারণাত্, একদোষা রোগা জ্বরাদযো ন ভবন্তি, অপি ত্বনেকদোষাঃ, ত্রিদোষা ইত্যর্থঃ| অত্রাপি "ব্যপদেশস্তু ভূযসা" ইত্যধ্যাহার্যম্| তেন ত্রিদোষাত্মকেঽপি জ্বরে বাতাধিকে বাতজ্বর এবং পিত্তজ্বরঃ শ্লেষ্মজ্বর ইত্যেবংরূপো ব্যপদেশ উপপন্নঃ| ননু, যদি সর্বো জ্বরঃ সন্নিপাতজঃ, তত্কিমিতি বক্ষ্যতি ? অযং সন্নিপাতজ্বর ইতি| ব্রূমহে| সমবিষমরূপং শক্ত্যুত্কর্ষমাশ্রিত্য যত্র দোষা বর্তন্তে স সন্নিপাতজ্বর ইতি তন্ত্রকৃতা পুরস্তাদ্বিস্তরেণ প্রতিপাদযিষ্যতে| অথ কো রসোঽনুরসো বেত্যাহ-তত্রেত্যাদি| তত্র-তস্মিন্ দ্রব্যে, যো ব্যক্তঃ-স্ফুট উপলভ্যতে, স রসঃ স্মৃতস্তন্ত্রকৃদ্ভিঃ| যশ্চাব্যক্তো-অস্ফুটপ্রতিভাসো রসনেন্দ্রিযেণোপলভ্যতে, সোঽনুরসঃ| হীনার্থোঽত্রানুশব্দঃ, অল্পো রস ইত্যর্থঃ| ন চৈতাবদেবানুরসলক্ষণমিত্যাহ-কিঞ্চিদিত্যাদি| মুখক্ষিপ্তস্য হরীতক্যাদের্দ্রব্যস্য রসনেন্দ্রিযেণ কিঞ্চিদন্তে ব্যক্তোঽপ্যুপলভ্যতে যঃ সোঽপ্যনুরস ইষ্যতে, মুনিভিরতি বাক্যশেষঃ| অন্তে ইত্যনেনৈতদ্বোধযতি,-অন্তে-অবসানে, ন ত্বাদাবাপাতমাত্রে ন চ মধ্যে| তযোর্হি রসস্যৈবোপলম্ভঃ| অনুশব্দস্যাত্র পশ্চাদর্থত্বাত্ পশ্চাত্ স্ফুটোঽপি কিঞ্চিদ্য উপলভ্যতে সোঽপ্যনুরস ইত্যর্থঃ| ননু, মধুরাদযো রসা গুর্বাদিগুণযুক্তাঃ কথং বক্তুং পার্যন্তে| যতো মধুরাদযো রসা গুণা গুর্বাদযশ্চ গুণাঃ| ন চ গুণানাং মধুরাদীনাং গুর্বাদিগুণাধারত্বমুপপন্নম্| তথা চ বৈশেষিকা:-"নির্গুণা গুণাঃ" ইতি| তস্মিন্ পর্যনুযোগ ইদমাহ-

আযুর্বেদরসাযনম্ ব্যাখ্যা ( কৃত)

আ০ র০-তুল্যন্যাযত্বপ্রসঙ্গাত্ সর্বেষাং রোগাণাং সর্বদোষজত্বমাহ-নৈকদোষা ইতি| রোগা নৈকদোষাঃ-সর্বেঽপি রোগাঃ সর্বদোষোদ্ভবাঃ| কুতঃ? তত এব হেতোঃ,-রোগাণামপি ভূতসঙ্ঘাতসম্ভবাত্| ভুতসঙ্ঘাতস্য তু ত্রিষু দোষেষু বিভক্তত্বাত্| যথোক্তং সঙ্গ্রহে (সূ.অ. ২০)-"বায্বাকাশধাতুভ্যাং বাযুঃ আগ্নেযং পিত্তম্, অম্ভঃপৃথিবীভ্যাং শ্লেষ্মা|" ইতি| ভূতসঙ্ঘাতং বিনা ন দোষসঙ্ঘাতঃ, তং বিনা ন রোগোত্বপত্তিরিতি, অতঃ সর্বে রোগাস্ত্রিদোষজাঃ| কেচিত্তু সর্বদ্রব্যাণাং সর্বরসত্বেন সর্বদোষসামান্যাত্ সর্বদোষকোপনত্বম্, ততো রোগা নৈকদোষা ইতি ব্যাচক্ষতে| তদসত্| সামান্যবদ্বৈপরীত্যস্যাপি সত্ত্বাত্| সামান্যং প্রযোজকমিতি চেত্ ন, দোষঘ্নদ্রব্যভেদাভাবপ্রসঙ্গাত্| বৈপরীত্যমপি ক্বচিত্ প্রযোজকমিতি চেত্ ন, সর্বদোষকোপনত্বনিযমব্যাঘাতাত্| সর্বদোষকোপনানাং নিযম ইতি চেত্ ন, ব্দ্যেকদোষকোপনদ্রব্যাভাবপ্রসঙ্গাত্| বাহুল্যেনৈব ব্যপদেশ ইতি চেত্ ন, দ্বিদোষকোপনৈকশমনদ্বিশমনৈককোপনদ্রব্যাভাবপ্রসঙ্গাত্| সিদ্ধান্তেঽপি সর্বেষাং সর্বধর্মত্বস্বীকারান্ন দোষঘ্নাদিবিভাগ ইতি চেত্ ন, তস্য তস্য ধর্মস্য তত্র তত্র প্রযোজকত্বাত্| তথা চ বক্ষ্যতি (শ্লো.২২)-"কিঞ্চিদ্রসেন কুরুতে কর্ম পাকেন চাপরম্| গুণান্তরেণ বীর্যেণ প্রভাবেণৈব কিঞ্চন||" ইত্যাদি| তস্মাত্পূর্বমেব ব্যাখ্যানং যুক্তম্| সর্বেষাং সর্বধর্মত্বাদিবিশেষে প্রাপ্তে তন্নিরাসার্থং ধর্মতারতম্যমাহ-তত্র ব্যক্ত ইতি| তত্র-দ্রব্যে, কশ্চিদ্ধর্মঃ সদ্যোব্যক্তঃ কশ্চিদব্যক্তঃ কশ্চিদীষব্দ্যক্তঃ কশ্চিদন্তে ব্যক্তঃ| তেষ্বাদ্যো রসাখ্যঃ, ইতরে ত্রযোঽনুরসাখ্যাঃ|

সর্বাঙ্গসুন্দরী ব্যাখ্যা ( কৃত)

স০-পৃথিব্যাদৌ-পৃথিব্যাদিমহাভূতারব্ধে দ্রব্যে, রসাশ্রযে গুর্বাদযো গুণাঃ পরমার্থত আশ্রিতাঃ, ন তু রসেষু মধুরাদিষু| যত্তু রসেষু ব্যপদিশ্যন্তে তত্ সাহচর্যোপচারতঃ| সহ চরতীতি সহচরঃ, তস্য ভাবঃ সাহচর্যম্| যস্মিন্নেবগুডাদৌ দ্রব্যে মধুরো রস আশ্রিতস্তস্মিন্নপি গুরুগুণ আশ্রিতঃ, ইতি মধুররসগুরুগুণযোঃ সহচরভাবঃ| সাহচর্যেণ-তুল্যাশ্রযত্বেনোপচারঃ সাহচর্যোপচারঃ, তস্মাত্সাহচর্যোপচারতো, গুর্বাদযো গুণা রসেষু-মধুরাদিষু ব্যপদিশ্যন্তে| যথা,-গুরুর্মধুরো রসো লঘুরম্ল ইত্যাদি| ন পুনঃ পরমার্থতো রসেষু গুর্বাদযঃ সন্তি| অস্তি চ সাহচর্যেণ ব্যপদেশঃ| যথা-ঘৃতসহচরেণ ঘৃতস্থেনাগ্নিনা দগ্ধো ঘৃতদগ্ধ ইত্যুচ্যতে|

আযুর্বেদরসাযনম্ ব্যাখ্যা ( কৃত)

আ০ র০-গুর্বাদীনাং রসাশ্রযত্বাদ্দ্রব্যস্যাসর্বধর্মত্বে প্রাপ্তে পরিহারমাহ-গুর্বাদয ইতি| গুর্বাদযো গুণা দ্রব্য এব, ন রসেষু | যস্তু মধুরো গুরুঃ, অম্লো লঘুরিত্যাদি ব্যপদেশঃ, স সাহচর্যোপচারতঃ| একস্মিন্নাশ্রযে দ্বযোরবস্থানং-সাহচর্যম্| সাহচর্যমেব কুতঃ? ইত্যাহ-রসাশ্রয ইতি| দ্রব্যং হি গুর্বাদীনামিব রসানামপ্যাশ্রযঃ| অত একাশ্রযত্বাত্সাহচর্যম্, তেন উপচারঃ-অবিদ্যমানস্যাপ্যাশ্রযাশ্রযীভাবস্যারোপঃ| ননু, কিমেতত্ রসাব্দ্যতিরিক্তং দ্রব্যং নাম ? ইত্যত আহ-পৃথিব্যাদাবিতি| পৃথিব্যাদিশব্দাভিলভ্যং দ্রব্যমিত্যর্থঃ|

সর্বাঙ্গসুন্দরী ব্যাখ্যা ( কৃত)

স০-তত্র-তেষু পার্থিবাদিষু পঞ্চসু দ্রব্যেষু মধ্যে, পার্থিবং দ্রব্যং গুর্বাদিগুণোত্কটম্| উল্বণশব্দেনৈতত্ দ্যোতযতি,-পার্থিবে দ্রব্যেঽন্যেঽপি গুণাঃ সন্তি, সর্বদ্রব্যাণাং পাঞ্চভৌতিকত্বাত্| গুর্বাদযস্তত্রোত্কটাঃ| এবমাপ্যাদিষু সর্বং যোজ্যম্| তথা, গৌরবাদ্যাবহং- গুরুত্বাদিকৃদিত্যর্থঃ|

আযুর্বেদরসাযনম্ ব্যাখ্যা ( কৃত)

আ০ র০-অথ দ্রব্যভেদান্ লক্ষযর্তি| তত্র পার্থিবং লক্ষযতি-তত্র দ্রব্যমিতি| গুর্বাদিগুণোত্কটং গৌরবাদিকরং চ পার্থিবং দ্রব্যম্| সঙ্ঘাতঃ-কাঠিন্যম্| উপচযঃ-স্থৌল্যম্| গুণশব্দোঽত্র ধর্মবাচী| উল্বণগ্রহণ সর্বেষাং সর্বধর্মত্বাত্|

সর্বাঙ্গসুন্দরী ব্যাখ্যা ( কৃত)

স০-আপ্যং দ্রব্যং দ্রবাদিগুণোল্বণং স্নেহনাদিকৃত্ |

আযুর্বেদরসাযনম্ ব্যাখ্যা ( কৃত)

আ০ র০-আপ্যং লক্ষযতি-দ্রবশীতেতি| দ্রবাদিগুণোত্কটং স্নেহনাদিকরং চ দ্রব্যমাপ্যম্| দ্রবসান্দ্রযোঃ পরস্পরবিপরীতযোরপ্যার্দ্রত্বসামান্যাদাপ্যত্বম্| বিপ্যন্দঃ-স্রোতঃস্রাবঃ| প্রহ্লাদঃ-তৃপ্তিঃ|

সর্বাঙ্গসুন্দরী ব্যাখ্যা ( কৃত)

স০-আগ্নেযং দ্রব্যং রূক্ষাদিগুণোত্কটং দাহাদিকরম্|

আযুর্বেদরসাযনম্ ব্যাখ্যা ( কৃত)

আ০ র০-আগ্নেযং লক্ষযতি-রূক্ষতীক্ষ্ণেতি| রূক্ষাদিগুণোত্কটং দাহাদিকরং চ দ্রব্যমাগ্নেযম্| ভা-কান্তিঃ| বর্ণো-গৌরাদিঃ| প্রকাশঃ-আলোকঃ| পচনং-পাকঃ| তদাত্মকত্বং কার্যকারণযোরভেদোপচারাত্|

সর্বাঙ্গসুন্দরী ব্যাখ্যা ( কৃত)

স০-বাযব্যং দ্রব্যং রূক্ষাদিগুণোল্বণং রৌক্ষ্যলাঘবাদিকরম্|

আযুর্বেদরসাযনম্ ব্যাখ্যা ( কৃত)

আ০ র০-বাযব্যং লক্ষযতি-বাযব্যমিতি| রূক্ষাদিগুণোত্কটং রৌক্ষ্যাদিকরং চ দ্রব্যং বাযব্যম্| বিচারো-বিবিধা চেষ্টা|

সর্বাঙ্গসুন্দরী ব্যাখ্যা ( কৃত)

স০-নাভসং দ্রব্যং সূক্ষ্মাদিগুণোল্বণং সৌষির্যাদিকরম্|

আযুর্বেদরসাযনম্ ব্যাখ্যা ( কৃত)

আ০ র০-নাভসং লক্ষযতি-নাভসমিতি| সূক্ষ্মাদিগুণোত্কটং সৌষির্যাদিকরং চ দ্রব্যং নাভসম্| সৌষির্যং সরন্ধ্রত্বম্|

সর্বাঙ্গসুন্দরী ব্যাখ্যা ( কৃত)

স০-এবং-অনেন পঞ্চমহাভূতারব্ধেন গুর্বাদিগুণযোগেন দ্রব্যাণাং, জগতি-ভুবনেঽস্মিন্, অনৌষধভূতং ন কিঞ্চিদ্ দ্রব্যমস্তি,-অপি তু সর্বমেব দ্রব্যং যত্সিকতাপাংস্বাদিকং তদৌষধং,-চিকিত্সিতম্| বশান্নানার্থযোগযোঃ,-অর্থশ্চ যোগশ্চ-অর্থযোগৌ, অর্থঃ-প্রযোজনম্, যোগো-যুক্তিঃ, যথা,-অনযা যুক্ত্যৌষধমিদং যোজিতমস্য রোগস্য বিজযায স্যাদনযা চাস্য রোগস্যেতি, নানাবিধৌ যাবর্থযোগৌ তযোর্বশাত্-সামর্থ্যাত্, সর্বমপি দ্রব্যমৌষধম্, রোগপ্রতীকারহেতুত্বাত্| অথ কিং দ্রব্যং কিম্ভূতোত্কটং ভবতি ? ইত্যাহ-

আযুর্বেদরসাযনম্ ব্যাখ্যা ( কৃত)

আ০ র০-দ্রব্যমাত্রস্যৌষধত্বমাহ-জগতীতি| এবং-উক্তেন প্রকারেণ, তস্য তস্য দ্রব্যস্য তত্তদ্গুণযোগত্বাত্ জগতি ন কিঞ্চিদ্দ্রব্যমনৌষধং বিদ্যতে-সর্বমেব দ্রব্যমৌষধম্| কুতঃ? নানার্থযোগযোর্বশাত্,-অর্থঃ-প্রযোজনম্, যোগো-যোজনা, নানাবিধাবর্থযোগৌ-নানার্থযোগৌ, তযোঃ| এতদুক্তং ভবতি,-যদেকস্মিন্নর্থে নোপযুজ্যতে তদেবান্যস্মিন্নুপযুজ্যতে| যদেকেন যোগেন নোপযুজ্যতে তদেবান্যেনোপযুজ্যতে| যথা,-অত্যন্তানুপযুক্তোঽপি খরমেষাদিবিড্রসো বিন্দুশঃ শ্বাসকাসাদৌ, অত্যন্তাপথ্যোঽপি মাপ ইণ্ডুরীকৃতঃ সনবনীতোঽর্দিতাদৌ|

সর্বাঙ্গসুন্দরী ব্যাখ্যা ( কৃত)

স০-ঊর্ধ্বং গচ্ছতীতি-ঊর্ধ্বগমম্| খপ্রকরণে "গমেরপ্যুপসঙ্খ্যানম্" ইতি খঃ| প্রাযো-বাহুল্যেন, ঊর্ধ্বগমং দ্রব্যমগ্নিপবনাধিকং ভবতি| যথা,-মদনফলাদি| বাহুল্য (প্রাযো) গ্রহণাত্ অগ্নিসমীরণোত্কটস্যাপ্যধোগামিত্বং দৃষ্টম্| যথা,-হরীতক্যাদেঃ, অচিন্ত্যপ্রভাবত্বাত্| যথা,-সর্পস্য বিষমযত্বেঽপি তত্ফণামণের্বিষঘ্নত্বম্| ভূযিষ্ঠং-প্রাযেণ, ভূমিতোযোল্বণং দ্রব্যমধোগামি ভবতি| যথা,-ত্রিবৃতাদি| যত্তু ব্যামিশ্রাত্মকং তুল্যকালমূর্ধ্বাধোদোষহরণং তদিহ গ্রন্থগৌরবভযান্নোক্তমপি ব্যামিশ্রভূতোত্কটং দ্রব্যং ব্যামিশ্রাত্মকমিতি সামর্থ্যলব্ধ এবাযমর্থঃ| স০-ইতি-পরিসমাপ্তৌ, দ্রব্যং প্রতি যদ্বক্তব্যং তন্নিষ্পন্নমিত্যর্থঃ| এবং দ্রব্যে নির্দিষ্টে রসা নির্দেষ্টুং যুক্তা ইত্যাহ- স০-বহুবক্তব্যত্বাদুত্তরত্র-অনন্তরেঽধ্যাযে, রসান্ ভেদৈঃ-ত্রিষষ্টিসঙ্খ্যাবচ্ছিন্নৈঃ, উপদেক্ষ্যতে তন্ত্রকৃত্| অথ বীর্যস্য বিপকাদিভ্যঃ প্রাধান্যাত্তচ্চর্চাং প্রস্তৌতি-

আযুর্বেদরসাযনম্ ব্যাখ্যা ( কৃত)

আ০ র০-ঔষধদ্বৈবিধ্যং পঞ্চবিধে দ্রব্যে বিভজতি| দ্রব্যমূর্ধ্বগমমিতি| দ্বিবিধমৌষধম্,-শোধনং শমনং চ| শোধনং দ্বিবিধম্,-ঊর্ধ্বগমমধোগমং চ| তত্রাগ্নিপবনোত্কটমূর্ধ্বগমম্, ভূমিতোযগুণমধোগমম্| পারিশেষ্যাদাকাশোত্কটং শমনম্| তথা চ সুশ্রুতঃ (সূ. অ. ৪১/৬)-"আকাশগুণভূযিষ্ঠং সংশমনম্" ইতি| গমনং-গমঃ| ঊর্ধ্বং গমোঽস্যাস্তীতি ঊর্ধ্বগমম্| প্রায ইতি ভূযিষ্ঠমিতি চ ব্যভিচারার্থম্| যথা,-চিত্রকবদগ্নিপবনোত্কটাযা অপি দন্ত্যা বিরেচনত্বম্, মৃদ্বীকাবদ্ভূমিতোযগুণাধিকস্যাপি মধুকস্য বমনত্বম্| সঙ্গ্রহে তু (সূ.অ. ১৭)-"ব্যামিশ্রাত্মকমুভযতোভাগম্| শমনং তু দোষবিপরীতগুণমুক্তং প্রাক্| তত্সঙ্গ্করে চ যতো বাহুল্যেন| তত্সঙ্করে-গুণসঙ্করে, যতো বাহুল্যেন-যেষাং গুণানাং বাহুল্যং তৈর্নির্ণযঃ| তথা, অনিলাত্মকং গ্রহি| অনলাত্মকং দীপনপাচনম্| উভযাত্মকং লেখনম্| ভূম্যুদকাত্মকং বৃংহণম্|" ইতি| প্রকরণার্থমুপসংহরতি-ইতি দ্রব্যমিতি| ইতিপরিসমাপ্তৌ| আ০ র০-ক্রমপ্রাপ্তস্য রসস্যানভিধানে হেতুমাহ-রসো ভেদৈরিতি| উত্তরত্র-উত্তরস্মিন্নধ্যাযে, উপদেক্ষ্যতে-বক্ষ্যতে, যতোঽসৌ বহুভির্ভেদৈর্বিশিষ্টঃ, বহুমেদত্বেন বহুবক্তব্যত্বাত্ পৃথগধ্যাযকরণমিত্যর্থঃ|

সর্বাঙ্গসুন্দরী ব্যাখ্যা ( কৃত)

স০-দ্রব্যমুক্তম্| বীর্যং পুনর্গুর্বাদীনষ্টৌ গুণান্ দ্রব্যাশ্রিতানিতি সমাচক্ষতে| তত্-তস্মাত্, এবং-অনেন প্রকারেণ, বীর্যমষ্টধা-অষ্টপ্রকারং, গুর্বাদিবাদিনাং মতম্|

আযুর্বেদরসাযনম্ ব্যাখ্যা ( কৃত)

আ০ র০-অথ বীর্যম্| তত্র পরমতং দর্শযতি-বীর্যং পুনরিতি| একে-খারণাদিপ্রভৃতযঃ, গুর্বাদীন্ গুণান্ বীর্যং চ বদন্তি| এবং চ তদষ্টধা সম্মতম্| সুশ্রুতস্তু গুরুলঘূ বিহায বিশদপিচ্ছিলৌ পঠতি (সূ.অ. ৪০/৫)-"কেচিদষ্টবিধমাহুঃ,-উষ্ণং শীতং স্নিগ্ধং রূক্ষং বিশদং পিচ্ছিলং মৃদু তীক্ষ্ণং চেতি|" ইতি|

সর্বাঙ্গসুন্দরী ব্যাখ্যা ( কৃত)

স০-যেন-স্বভাবেন, যা ক্রিযা ক্রিযতে-যত্কর্ম নিষ্পাদ্যতে, তদ্বীর্যম্| তদেবং যাবত্ কিঞ্চিদ্গুণজাতং দ্রব্যে স্থিতং তত্সর্বং বীর্যমেব| সর্বং করোতীত্যত এবাহ-নাবীর্যমিত্যাদি| যন্ন বীর্যং তন্ন কিঞ্চিত্করোতি-ন কাঞ্চিদপ্যর্থক্রিযাং নিষ্পাদযতি, প্রতিনিযতশক্তিপরিষ্বক্তত্বাত্ সর্বভাবানাম্| অত এবাহ-সর্বেত্যাদি| হিশব্দো যস্মাদর্থে| যস্মাত্সর্বা ক্রিযা বীর্যকৃতা-বীর্যেণ জনিতা| ততো যন্ন বীর্যং তন্ন কিঞ্চিত্কুরুতে|

আযুর্বেদরসাযনম্ ব্যাখ্যা ( কৃত)

আ০ র০-চরকমতং দর্শযতি-চরকস্ত্বাহেতি| যেন ক্রিযতে তত্-বীর্যম্, দ্রব্যকর্তৃকে কর্মাণি করণভূতমিত্যর্থঃ| কতিবিধং তত্ ? ইত্যপেক্ষাযামাহ-যা ক্রিযেতি| যা ক্রিযা যেন ক্রিযতে তস্যাং তদ্বীর্যম্, যাবত্যঃ ক্রিযাস্তাবন্ত্যেব বীর্যাণীত্যর্থঃ| কুতঃ? ইত্যাহ-নাবীর্যমিতি| অবীর্যং দ্রব্যং ন কিঞ্চিত্কুরুতে-বীর্যং বিনা কর্তৃত্বং নাস্তীত্যর্থঃ| কুতঃ? ইত্যাহ-সর্বা বীর্যকৃতা হি সা| হি-যস্মাত্, সা-ক্রিযা সর্বোঽপি বীর্যকৃতা|

সর্বাঙ্গসুন্দরী ব্যাখ্যা ( কৃত)

স০-যতো বীর্যস্যৈব করণসামর্থ্যং তেন কারণেন গুর্বাদিষ্বেবাষ্টাসু বীর্যাখ্যা অন্বর্থেতি-অনুগতার্থেতি, ভণ্যতে| এবকারোঽবধারণার্থঃ| গুর্বাদিষ্বেব বীর্যসংজ্ঞা ন তু রসবিপাকপ্রভাবেষু [মন্দসান্দ্রাদিষু বা]| কিম্ভূতেষু গুর্বাদিষু ? সমগ্রেত্যাদি| সমগ্রাশ্চ তে গুণাশ্চ, তেষু সারাঃ-চিরকালাবস্থিতযো গুর্বাদয এব| তথা চ, জাঠরাগ্নিসংযোগেনাপি ন মধুরাদিরসবত্ স্বভাবমেতে জহতি| সর্তেঃ সুস্থির ইতি ঘঞি সারশব্দঃ| তথা, অন্যেভ্যো মন্দসান্দ্রাদিভ্যো গুণেভ্যো রসাদিভ্যো বা গুর্বাদযঃ শক্ত্যুত্কর্ষবিবর্তিনঃ| শক্তেঃ-সামর্থ্যস্য, উত্কর্ষঃ-আধিক্যম্, বিশেষেণ বর্তো-বিবর্তঃ,-বিশেষেণ ভবনম্, শক্ত্যুত্কর্ষস্য বিবর্তঃ, স বিদ্যতে যেষাং ত এবম্| কিঞ্চ, গুর্বাদীনাং গুণানাং ব্যবহারায-ব্যবহারার্থম্, মুখ্যত্বাত্-অন্যেভ্যো গুণেভ্যো গুর্বাদযঃ প্রধানভূতা ইত্যর্থঃ| তথা চ, (শ্লো. ৪)-"গুর্বাদযো গুণা দ্রব্যে পৃথিব্যাদৌ রসাশ্রযে|" ইত্যুক্তম্, ন মধুরাদযো গুণা ইতি| তস্মাত্ গুর্বাদীনাং গুণানাং ব্যবহারমুখ্যত্বং রসাদিভ্যঃ| তথা, বহ্বগ্রগ্রহণাত্-বহুগ্রহণাদগ্রগ্রহণাচ্চ, বহবো দ্রব্যরসাদযো গুর্বাদিভির্গৃহীতা ভবন্তি| তথা চাযুর্বেদশাস্ত্রেষু রসাদিভ্যো গুর্বাদীনামগ্রে গ্রহণং দৃষ্টম্| যথা,-বাতাদিদোষগুণনিরূপণাযাং গুর্বাদীনামেব পূর্বং গ্রহণম্, ন রসাদীনাম্| তথা চ, "তত্র রূক্ষো লঘুঃ" ইত্যাচার্যোঽপঠদ্বায্বাদিলক্ষণে (হৃ. সূ. অ. ১|১১)| এবং গুর্বাদীনামেবাগ্রগ্রহণাত্ গুর্বাদিষ্বেব বীর্যাখ্যাঽন্বর্থা-অনুগতার্থেতি ভণ্যতে|

আযুর্বেদরসাযনম্ ব্যাখ্যা ( কৃত)

আ০ র০-ননু, এবং রসাদীনামপি বীর্যত্বপ্রসঙ্গ ইত্যাহ-গুর্বাদিষ্বিতি| তেন-চরকেণ, গুর্বাদিষ্বেব বীর্যাখ্যা বর্ণ্যতে| কুতঃ? অম্বর্থেতি কৃত্বা| ইতিশব্দো হেতৌ| যতস্তেষু ক্রিযমাণা বীর্যসংজ্ঞাঽন্বর্থা স্যাত্| অন্বর্থত্বমেব দর্শযতি-সমগ্রেত্যাদি| করণং হি বীর্যম্| করণং চ সাধকতমম্| সাধকতমত্বং চ গুর্বাদীনামেব| কুতঃ? সমগ্রগুণসারত্বাত্| সমগ্রেষু গুণেষু মধ্যে স্থির (সার)ত্বাত্-চিরস্থাযিত্বাত্, শক্ত্যুত্কর্ষবিবর্তনাত্-উত্কৃষ্টশক্তিত্বাত্, ব্যবহারায মুখ্যত্বাত্-লোকে শাস্ত্রে চ মুখ্যত্বেন ব্যবহ্নিযমাণত্বাত্, বহ্নগ্রগ্রহণাত্-বহুগুণগণনাযাং প্রথমগ্রহণাত্| বিপাকেঽপি স্থিরত্বস্য, প্রভাবেঽপি শক্যুত্কর্ষস্য, মৃদুকঠিনাদাবপি ব্যবহারমুখ্যত্বস্য, রসেষ্বপি বহ্বগ্রগ্রহণস্য দর্শনাত্ চতুর্ণামুপাদানম্|

সর্বাঙ্গসুন্দরী ব্যাখ্যা ( কৃত)

স০-অতঃ-অস্মাচ্চ কারণকদম্বকাত্, বিপরীতত্বাত্-বৈপরিত্যেন স্থিতত্বাত্, ন রসাদযো বীর্যম্| তথা হি,-রসস্য সারত্বং নাস্তি, জাঠরানলসংযোগবশেন রসান্তরোত্পত্তেঃ| গুর্বাদীনাং তু জাঠরাগ্নিসংযোগবশেনাপি নান্যথাভাবঃ| তথা চ ন রসস্য শক্ত্যুত্কর্ষবিবর্তিত্বম্,-যতো রসস্য গুর্বাদ্যাহিতশক্তেরেব স্বকর্মণি সামর্থ্যম্| ব্যবহারায যথা গুর্বাদের্মুখ্যত্বং যথা চ বহ্বগ্রগ্রহণং তথা প্রাগ্দর্শিতম্| প্রভাবঃ-সর্বাতিশাযি দ্রব্যস্বভাবঃ, তস্য চ ক্রিযানির্বর্তনসামান্যে সত্যপি বীর্যসংজ্ঞা পূর্বোক্তাদ্ধেতোর্ন প্রবর্ততে| এবং বিপাককর্মণোরপি চিন্ত্যম্| তস্মাত্ রসাদ্যেষু সম্ভবত্যপি-বিদ্যমানাঽপি, অসদ্রূপেব সা বীর্যসংজ্ঞা ন বিবক্ষ্যতে-নোররীক্রিযতে| আদৌ ভবঃ-আদ্যঃ| দিগাদিত্বাদ্যত্| রস আদ্যো যেষাং-প্রভাবাদীনাং, ত এবং তেষু| বীর্যমিত্যাদি| হিশব্দো যস্মাদর্থে| যত এবং সা-বীর্যসংজ্ঞা, সম্ভবত্যপি রসাদিষু বৈপরীত্যান্ন বিবক্ষ্যতে, অতো গুর্বাদয এব বীর্যম্, ন রসাদযঃ |

আযুর্বেদরসাযনম্ ব্যাখ্যা ( কৃত)

আ০ র০-এতচ্চ রসাদিষু নাস্তীতি দর্শযতি-অতশ্চেতি| সা-বীর্যাখ্যা, রসাদিষু সম্ভবত্যপি-বিদ্যমানাপি, ন বিবিক্ষ্যতে, অনুদরা কন্যেতিবত্| ক্রিযানির্বর্তনসামান্যাত্সত্যপি বীর্যত্বে রসাদযো বীর্যত্বেন ন ব্যবহ্নিযন্ত ইত্যর্থঃ| কুতঃ? অতো-হেতুচতুষ্টযাত্, বিপরীতত্বাত্| সিদ্ধমর্থমপনুদতি-বীর্যমিতি| হি-স্ফুটম্, অতঃ-কারণাত্, গুর্বাদয এব বীর্যম্| গুর্বাদীনামষ্টানাং যোগরূঢা বীর্যসংজ্ঞেতি ভাবঃ|

সর্বাঙ্গসুন্দরী ব্যাখ্যা ( কৃত)

স০-অন্য আচার্যা উষ্ণং শীতমিতি দ্বিপ্রকারং বীর্যমাচক্ষতে| এবকারোঽবধারণার্থঃ| দ্বিধৈব বীর্যম্, নাষ্টধেতি|

আযুর্বেদরসাযনম্ ব্যাখ্যা ( কৃত)

আ০ র০-পূর্বমতাপরিতোষান্মতান্তরং দর্শযতি-উষ্ণং শীতমিতি _ অন্যে-সুশ্রুতাদযঃ, উষ্ণং শীতং চেতি দ্বিবিধমেব বীর্যমাচক্ষতে-বদন্তি|

সর্বাঙ্গসুন্দরী ব্যাখ্যা ( কৃত)

স০-অপি চেতি নিপাতসমুদাযো যুক্তিসমুচ্চযে| তেঽপি সযুক্তিকমেবাহুরিত্যর্থঃ| তামেব যুক্তিং দর্শযন্নাহ-নানাত্মকমপীত্যাদি| নানাস্বভাবমপি দ্রব্যং-স্থাবরজঙ্গমাদ্যং চেতনাচেতনম্, অগ্নীষোমৌ মহাবলৌ-উত্কৃষ্টশক্তী, ন জাতু কদাচিদতিক্রামতি-নোল্লঙ্ঘ্য বর্ততে| অবশ্যং হি দ্রব্যং কিঞ্চিদাগ্নেযং কিঞ্চিত্সৌম্যম্, অতঃ কিঞ্চিদ্দ্রব্যমুষ্ণবীর্যং কিঞ্চিচ্ছীতবীর্যম্| তথা চ মুনিঃ (চ. সূ. অ. ২৬|৮৪)- "ন মত্স্যান্ পযসা সহাভ্যবহ্রিযাত্| উভযং হ্যেতন্মধুরং মধুরবিপাকং শীতোষ্ণত্বাত্ বিরুদ্ধবীর্যম্, বিরুদ্ধবীর্যত্বাচ্ছোণিতপ্রদূষণায|" ইতি| অত্র দৃষ্টান্তমাহ-ব্যক্তাব্যক্তমিত্যাদি| ব্যক্তং চাব্যক্তং চ ব্যক্তাব্যক্তম্, নানাত্মকমপি জগত্-ত্রৈলোক্যং কর্তৃ যথা ব্যক্তং চাব্যক্তং চ নাতিক্রামতি, তথা দ্রব্যমগ্নীষোমাবিত্যর্থঃ| ব্যক্তং-স্থূলম্, দৃশ্যমিত্যর্থঃ| সাঙ্খ্যানাং তু মহদাদি-ব্যক্তম্, অব্যক্তং-প্রধানং পুরুষশ্চ|

আযুর্বেদরসাযনম্ ব্যাখ্যা ( কৃত)

আ০ র০-উক্তমতস্যোপপত্তিমাহ-অপি চেতি, নানাত্মকমিতি| ন কেবলং মতমাত্রমিদম্, যুক্তং চেদং পূর্বস্মান্মতাত্, ইত্যপি চেত্যস্যার্থঃ| নানাত্মকমপি-পৃথিব্যাদ্যনেককারণমপি, দ্রব্যমগ্নীষোমৌ জাতুচিত্-কদাচিদপি, নাতিক্রামতি-তর্যোর্বশে বর্ততে, কিঞ্চিদাগ্নেযত্বাদুষ্ণং কিঞ্চিত্সৌম্যত্বাচ্ছীতমিতি দ্বিধৈব গতিরিত্যর্থঃ| কুতঃ? যতস্তৌ মহাবলৌ| অত এব সর্বান্ গুণান্ গুর্বাদযোঽভিভবন্তি| গুর্বাদীনপ্যুষ্ণশীতৌ| অত্র দৃষ্টান্তমাহ-যথা বিশ্বং কর্তৃ ব্যক্তাব্যক্তাখ্যভেদদ্বযং নাতিক্রামতি|

সর্বাঙ্গসুন্দরী ব্যাখ্যা ( কৃত)

স০-তত্র-তযোরুষ্ণশীতযোর্মধ্যে, উষ্ণং-উষ্ণবীর্যং, ভ্রমাদীন্ করোতি| আশুপাকিতাং-শীঘ্রপাকিত্বম্| শিশিরং পুনঃ-শীতবীর্যং তু, হ্লাদনাদীন্ করোতি|

আযুর্বেদরসাযনম্ ব্যাখ্যা ( কৃত)

আ০ র০-উষ্ণং লক্ষ্যতি-তত্রেতি| যদ্ভ্রমাদিকং করোতি তদুষ্ণবীর্যম্| আশুপাকিতা-শীঘ্রপাকঃ| শীতং লক্ষ্যতি-শিশিরমিতি, হ্লাদনমিতি| যত্ হ্লাদনাদীন্ করোতি তচ্ছীতবীর্যম্| হ্লাদনং-নির্বৃত্তিঃ| জীবনং মূর্চ্ছাপনযনাদিভিঃ প্রাণধারণম্| স্তম্ভঃ-স্বেদাপনযনম্| রক্তপিত্তযোঃ প্রসাদং-নির্মলত্বম্|

সর্বাঙ্গসুন্দরী ব্যাখ্যা ( কৃত)

স০-জাঠরেণ-ঔদর্যেণ, অগ্নিনা যোগাত্-সংশ্লেষাত্, যত্ রসানাং পরিণামান্তে-জরণনিষ্ঠাকালে, রসান্তরং-রসবিশেষঃ, উদেতি-উপদ্যতে, স বিপাক ইতি স্মৃতো-মুনিভিঃ কথিতঃ|

আযুর্বেদরসাযনম্ ব্যাখ্যা ( কৃত)

আ০ র০-অথ বিপাকঃ| তত্র বিপাকং লক্ষযতি-জাঠরেণেতি| রসানাং-রসবতাং দ্রব্যাণাং, জাঠরাগ্নিনা সংযোগাত্ যদ্রসান্তরমুত্পদ্যতে স বিপাকঃ| "আদৌ ষড্রসমপ্যন্নং মধুরীভূতমীরযেত্|" (হৃ. শা. অ. ৩১৫৭) ইত্যাদ্যুক্তানাং মধুরাম্লকটুপাকানাং ব্যাবৃত্ত্যর্থমাহ-পরিণামান্তে,-আহারপরিণামান্তে| তে তু পরিণামাত্প্রাগেব উত্পদ্যন্তে, ইতি তেষাং রসত্বমেব|

সর্বাঙ্গসুন্দরী ব্যাখ্যা ( কৃত)

স০-স্বাদুঃ-মধুরো গুডাদিঃ, পটুঃ-লবণঃ সৈন্ধবাদিঃ, মধুরং [ যথা ভবতি তথা ] কৃত্বা পচ্যতে রস ইতি সম্বন্ধঃ| মধুরমিতি ক্রিযাবিশেষণত্বান্নপুংসকলিঙ্গম্| স্বাদুঃস্বাদুবিপাকো, লবণোঽপি স্বাদুবিপাক ইত্যর্থঃ| অম্লো রসো-দধিকাঞ্চিকাদিঃ, অম্লং পচ্যতে-অম্লবিপাকো ভবতি| তিক্তোষণকষাযাণাং প্রাযশঃ কটুর্বিপাকো ভবতি| প্রাযশোগ্রহণং পূর্বত্রাপি যোজনীযম্| তেন ব্রীহিস্থো মধুরো রসোঽম্লং পচ্যত ইত্যুপপন্নম্| তথা চোক্তম্ (হৃ. সূ. অ. ৬|১০)- "স্বাদুরম্লবিপাকোঽন্যো ব্রীহিঃ" ইতি| তথা, হরীতক্যা ভূযস্ত্বেন যঃ কষাযো রসঃ, স মধুরমেব পচ্যতে| তথা, কটুকো রসঃ শুণ্ঠ্যার্দ্রকপিপ্পল্যাদিস্থো মধুরং পচ্যতে| তথা চোক্তম্ (হৃ. সূ. অ. ৬|১৫৩)- "কষাযা মধুরা পাকে" ইতি| তথা (হৃ. সূ. অ. ৬|১৬৩)- নাগরং দীপনং বৃষ্যং গ্রাহি হৃদ্যং বিবন্ধনুত্| রুচ্যং লঘু স্বাদুপাকং " ইতি, "তদ্বদার্দকম্" ইতি| তথা (হৃ. সূ. অ. ৬|১৬১)- "শ্লেষ্মলা স্বাদুশীতার্দ্রা" ইত্যারম্ভ যাবত্ "স্বাদুপাকা" ইতি| অত্র কেচিদাহুঃ,-তিক্তকষাযযোরেব কটুবিপাকতযা পিত্তকর্তৃত্বমাপদ্যত ইতি| তদেতদসত্| শীতবীর্যত্বেনৈতযোঃ পিত্তহর্তৃত্বাত্| বীর্যং হি রসবিপাকৌ বিজযতে| বক্ষ্যতি হি (শ্লো. ২৫)- "রসং বিপাকস্তৌ বীর্যম্" ইতি|

আযুর্বেদরসাযনম্ ব্যাখ্যা ( কৃত)

আ০ র০-বিপাকত্রৈবিধ্যমাহ-স্বাদুরিতি| স্বাদুঃ পটুশ্চ-মধুরো লবণশ্চ, মধুরং পচ্যতে,-পক্বো মধুরত্বং যাতীত্যর্থঃ| মধুরমিতি ক্রিযাবিশেষণম্| পচ্যত ইতি কর্মকর্তর্যাত্মনেপদম্| এবমম্লো রসোঽম্লং পচ্যতে| তিক্তাদীনাং ত্রযাণাং কটুকো বিপাকঃ| মধুররসস্যাপি ব্রীহের্বিপাকেঽম্লত্বাত্, লবণস্যাপি সৌবর্চলস্য কটুবিপাকত্বাত্, অম্লতিক্তোষণানামপি দাডিমপটোলপিপ্পলীনাং মধুরত্বাত্, কষাযস্যাপি কুলত্থস্যাম্লবিপাকত্বাত্, প্রাযশ ইত্যুক্তম্, মতান্তরসঙ্গ্রহার্থং চ| তত্র দ্বৌ বিপাকাবিতি সুশ্রুতঃ (সূ. অ. ৪০১১১)- "দ্রব্যেষু পচ্যমানেষু যেষ্বম্বুপৃথিবীগুণাঃ| নিবর্তন্তেঽধিকাস্তত্র পাকো মধুর ইষ্যতে|| তেজোঽনিলাকাশগুণাঃ পচ্যমানেষু যেষু তু| নিবর্তন্তেঽধিকাস্তত্র পাকঃ কটুক ইষ্যতে||" ইতি| পরাশরস্তু তিক্তকষাযযোর্মধুরবিপাকমাহ (সং.সূ.অ. ১৭)-"পাকাস্ত্রযো রসানামম্লোঽম্লং পচ্যতে কটুঃ কটুকম্| চত্বারোঽন্যে মধুরং, সংসৃষ্টরসাস্তু সংসৃষ্টম্|| কটুতিক্তকষাযাণাং কটুকো যেষাং বিপাক ইতি পক্ষঃ| তেষাং পিত্তবিঘাতে তিক্তকষাযৌ কথং ভবতঃ||' ইতি| ষোঢা পাকস্তু সঙ্গ্রহে নিরস্তঃ (সূ.অ. ১৭)- "যথারসং জগুঃ পাকান্ ষট্ কেচিত্তদসাম্প্রতম্| যত্স্বাদুর্ব্রীহিরম্লত্বং ন চাম্লমপি দাডিমম্|| যাতি তৈলং চ কটুতাং কটুকাঽপি ন পিপ্পলী| যথারসত্বে পাকানাং ন স্যাদেবং বিপর্যযঃ||" ইতি|

সর্বাঙ্গসুন্দরী ব্যাখ্যা ( কৃত)

স০-রসৈঃ-জিহ্বাবৈষযিকৈর্মধুরাম্লকটুকৈঃ, বিপাককালোপলভ্যো মধুরাম্লকটুকলক্ষণো যো রসো ভবতি-অসৌ, তুল্যফলঃ,-তুল্যং-সদৃশং, ফলং যস্য স তুল্যফলঃ| এতদুক্তং ভবতি,-অভ্যবহৃতস্য মধুররসস্য জাঠরাগ্নিসংযোগবশাত্ যত্ রসান্তরং ফলতযা নিষ্পন্নং তত্ রসৈঃ সদৃশফলম্| ফলগ্রহণেনৈতত্প্রতিপাদযতি,-ফলোপমমেব বৃষ্যাদিলক্ষণং কার্যসদৃশম্, ন তু কুসুমোপমং দেহাহ্লাদনাদিলক্ষণং কার্যমিতি| এবমম্লাদীনামপি ব্যাখ্যেযম্| তত্রেত্যাদি| তত্র-তেষু রসবীর্যবিপাকাদিষু মধ্যে, দ্রব্যং কিঞ্চিচ্ছুভাশুভং-সদসত্কর্ম, রসেন কুরুতে| যথা,-মধু মধুরকষাযরসত্বেন পিত্তং শমযতি| কিঞ্চিদ্বিপাকেন| যথা,-তদেব মধু কটুবিপাকতযা কফং হন্তি| কিঞ্চিন্ন দ্রব্যং গুণান্তরেণ,-অন্যোন্যগুণবিকৃতত্বাত্ রসবিপাকতো যঃ স গুণান্তরো গুর্বাদিঃ, তেন| যথা,-অম্লং কাঞ্জিকং কফং শমযতি রৌক্ষ্যাত্| কিঞ্চিন বীর্যেণ| যথা (সঙ্গ্রহে সূ. অ. ১৭)- "কষাযতিক্তং মহত্পঞ্চমূলং বাতং জযতি, ন তু পিত্তমুষ্ণবীর্যত্বাত্|" কিঞ্চিন দ্রব্যং প্রভাবেণৈব শুভাশুভং কর্ম কুরুতে| যথা,-অম্লোষ্ণা সুরা ক্ষীরং বর্ধযতি| ননু, যত্র দ্রব্যাশ্রিতানাং রসাদীনাং বিরোধঃ, তত্রৈষাং কার্যনিষ্পত্তৌ সমশক্তিত্বং ন বা ? ইত্যাশঙ্কানিবৃত্ত্যর্থমাহ-

আযুর্বেদরসাযনম্ ব্যাখ্যা ( কৃত)

আ০ র০-ত্রযাণাং পাকানাং লক্ষণমাহ-রসৈরিতি| অসৌ-ত্রিবিধো বিপাকঃ, যথাস্বং রসৈঃ-মধুরাম্লকটুকৈঃ, তুল্যফলঃ-তুল্যকার্যো জ্ঞেযঃ| মধুরস্য রসস্য কার্যং দৃষ্ট্বা মধুরঃ পাকো লক্ষণীযঃ| এবমম্লস্যাম্লঃ কটুকস্য কটুকঃ| দ্রব্যাদীনাং পৃথক্ প্রযোজকত্বমাহ-তত্র দ্রব্যমিতি| গুণান্তরেণ-রসাব্দ্যতিরিক্তেন গুর্বাদিনা গুণেন| এতদেব রসাদীনামপি গুণত্বং জ্ঞাপযতি| তেন "পলাণ্ডুস্তদ্গুণৈর্ন্যূনঃ" (হৃ. সূ.অ. ৬/১১২) ইত্যাদিপ্রযোগা উপপন্নাঃ| প্রভাবেণ-আত্মনৈব| দ্রব্যস্যাত্মা-প্রভাবঃ| তথা চ সুশ্রুতঃ (সূ.অ. ৪০/১৪)-"তদ্দ্রব্যমাত্মনা কিঞ্চিত্কিঞ্চিদ্বীর্যেণ সেবিতম্| কিঞ্চিদ্রসবিপাকাভ্যাং দোষং হন্তি করোতি চ||" ইতি| শুভং-দোষশমনং কর্ম, অশুভং-দোষকোপনম্| কিঞ্চিদ্পরং কিঞ্চনেতি ত্রযং কর্তৃকর্মবিশেষণম্| যদা বহূনি দ্রব্যাণি একমেব কর্ম কুর্বন্তি তদা-কর্তৃবিশেষণম্, যদৈকমেব দ্রব্যং বহূনি কর্মাণি তদা-কর্মবিশেষণম্| এতচ্চোদাহৃতং সঙ্গ্রহে (সূ.অ. ১৭)-"তত্র যন্মধুরং রসবিপাকযোঃ শীতবীর্যং চ দ্রব্যং, যচ্চাম্লং তযোরুষ্নবীর্যং চ, যদ্বা কটুকং, তেষাং যথাস্বং রসাদিভ্যঃ প্রাযো গুণান্ দোষকোপনশমনত্বং চ বিদ্যাত্| তদ্যথা-ক্ষীরমদিরামরিচাদীনাম্| রসাদিসঙ্করেণ ত্বন্যথাত্বম্| যথা-মধু মধুরং শ্লেষ্মাণং শমযতি কটুবিপাকিতযা, সকষাযত্বাদ্রৌক্ষ্যাচ্চ বাতং জনযতি শীতবীর্যত্বাচ্চ| তথা, যবোঽপি| আনূপৌদকপিশিতং শীতমপি পিত্তং করোতি, উষ্ণবীর্যত্বত্| তথা তৈলং কটুবিপাকিতযা চ বিপাকত এব বদ্ধবিণ্মূত্রম্| অম্লং কাঞ্জিকং কফং জযতি, তীক্ষ্ণোষ্ণত্বাত্| কপিত্থং তু রৌক্ষ্যাত্কফম্, পিত্তং চ শীতবীর্যত্বাত্| আমলকং পিত্তং শীতবীর্যত্বাত্ স্বাদুপাকিতযা চ, কফং রৌক্ষ্যাল্লাঘবাচ্চ, শৈত্যরৌক্ষ্যলাঘাবৈস্তু ন বাতম্| লবণং সৈন্ধবং স্বাদুপাকতযা পিত্তং জযতি, লাঘবাত্ কফম্| কটুকাঽপি শুণ্ঠী স্নেহৌষ্ণ্যস্বাদুপাকতযা বাতং জযতি, পিপ্পলী চ, লশুনোঽপি স্নেহৌষ্ণ্যগৌরবৈঃ, পলাণ্ডুশ্চ| স তু স্নেহগৌরবাভ্যাং জনযতি শ্লেষ্মাণম্, বৃদ্ধং চ মূলকং স্বাদুপাকতযা| তিক্তা পিত্তং জযতি| তিক্তা অপি ব্যাঘ্রীবিশল্যার্কবারুণ্য উষ্ণবীর্যত্বাত্ পিত্তং জনযন্তি| কষাযতিক্তং মহত্ পঞ্চমূলং বাতং জযতি, ন তু পিত্তম্, উষ্ণবীর্যত্বাত্| কষাযাঃ কুলত্থাশ্চাম্লপাকতযা চ| ইত্যেতন্নিদর্শনমাত্রমুক্তম্|" ইতি|

সর্বাঙ্গসুন্দরী ব্যাখ্যা ( কৃত)

স০-রসাদীনাং-রসবীর্যবিপাকপ্রভাবানাং মধ্যে, যত্-রসাদিবস্তু,-রসো বা বীর্যং বা বিপাকো বা প্রভাবো বা, বলবত্ত্বেন-বলিষ্ঠতযা, দ্রব্যে বর্ততে-অবতিষ্ঠতে, তত্-বস্তুজাতম্, ইতরান্-অবলিষ্ঠান্, অভিভূয-বিফলীকৃত্য, কারণত্বং প্রপদ্যতে,-কর্মকরণে কারণতামাসাদযতীত্যর্থঃ| অত ইদমাহ-বিরুদ্ধেত্যাদি| হি-যস্মাত্, বিরুদ্ধগুণসংযোগে-সংহতীভাবে সতি, যদল্পং বস্তু তত্ ভূযসা-বলবতা, জীযতে-অভিভূযতে| গুণশব্দেন চাত্র রসাদযো গৃহ্যন্তে, ন পারিভাশিকা গুর্বাদযোঽপ্রকৃতত্বাত্| বিরুদ্ধগুণসংযোগ ইত্যত্র বিরুদ্ধগুণসমবেতদ্রব্যসংযোগ ইতি বোধ্যম্, ন বিরুদ্ধগুণসংযোগ ইতি| ন হি গুণানাং সংযোগো বক্তুং যুজ্যতে, কিং তর্হি ? দ্রব্যাণাম্| তথা চ মুনিঃ (চ. বি. অ. ১|২৮)- "সংযোগস্তু দ্বযোর্বহূনাং বা দ্রব্যাণাং সংহতীভাবঃ|" ইতি| বিরোধশ্চ দ্বিবিধঃ,-স্বরূপতঃ কার্যতশ্চ| স্বরূপবিরোধো যথা,-গুরুলঘ্বোঃ শীতোষ্ণযোশ্চ| কার্যতো যথা,-বাযৌ জেতব্যে রূক্ষোষ্ণদ্রব্যসংযোগোপযোগঃ| অত্র হি যো গুণানাং বিরোধঃ, স কার্যেণ| তত্র যদল্পং বস্তুজাতং তত্ ভূযসা বস্তুজাতেনাভিভূযতে| তত্র যথা,-ক্ষীরং শীতবীর্যমপি মধুররসহেতুকস্নেহগৌরবাদিভিঃ সহাযবাহুল্যাদ্বাতশমনাখ্যং কার্যং করোতি, ন পুনঃ স্বকার্যং বাতপ্রকোপাখ্যম্| যত্র তু দ্রব্যে রসাদীনামুত্কর্ষাসম্ভবঃ পরস্পরং সাম্যম্, তত্র কস্য কার্যকারণত্বম্ ? ইত্যাহ-

আযুর্বেদরসাযনম্ ব্যাখ্যা ( কৃত)

আ০ র০-সত্স্বপি সর্বেষ্বেকস্যৈব প্রযোজকত্বে হেতুমাহ যদ্যদিতি| বলবত্ত্বেন-বলাধিক্যেন| বলং চ দ্বিবিধং,- কৃত্রিমমকৃত্রিমং চ| মাত্রাধিক্যেন সহাযসম্পত্ত্যা চ কৃতংকৃত্রিমম্, স্বাভাবিকং-অকৃত্রিমম্|

সর্বাঙ্গসুন্দরী ব্যাখ্যা ( কৃত)

স০-রসং-মধুরাদিষড্বিধম্, বিপাকঃ কর্তা অপোহতি-কার্যকরণে কুণ্ঠযতি| যথা,-মধুরো মধুনি রসঃ কটুনা বিপাকেনাভিভূযতে, অত এব পবনশমনাখ্যং কার্যং মধুররসহেতুকং ন করোতি, অপি তু বাতপ্রকোপনাখ্যং কটুবিপাকহেতুকমেব করোতি| তৌ-রসবিপাকৌ, বীর্যং কর্তৃভূতমপোহতি| যথা,-মহিষামিষে স্থিতৌ মধুররসবিপাকাবুষ্ণবীর্যাখ্যং কর্তৃ অভিভবতি, অত এব তন্মাংসং পিত্তাদিদূষণম্, অন্যথা স্বাদুরসবিপাকিত্বাত্ পিত্তশমকমেব স্যাত্| প্রভাবস্তু ত্রীণ্যপি রসাদীনি বিজযতে| যথা,-অম্লরসবিপাকোষ্ণবীর্যা সুরা ক্ষীরং জনযতি| বলসাম্যে ইতি-ঈদৃশম্, রসাদীনাং নৈসর্গিকং বলং,-স্বাভাবিকী শক্তিঃ| এতদুক্তং ভবতি,-রসং সমবলমপি বিপাকোঽপোহতি, রসবিপাকৌ চ সমবলাবপি বীর্যং স্বভাবাদপোহতি, এতানি চ সমবলান্যপি প্রভাবোঽপোহতীতি| ননু, দ্রব্যরসবিপাকবীর্যাণি কর্মানুমানেন যথাস্বরূপাণ্যেবাবগচ্ছামঃ| প্রভাবস্য তু ন জ্ঞাযতে কীদৃশং কর্ম ? ইত্যত আহ-

আযুর্বেদরসাযনম্ ব্যাখ্যা ( কৃত)

আ০ র০-তত্র স্বাভাবিকং বলমাহ-রসমিতি| তৌরসবিপাকৌ| তানি-রসবিপাকবীর্যাণি| অপোহতি-জযতি| বলসাম্যে-কৃত্রিমবলতুল্যত্বে, যত্র রসবিপাকযোস্তুল্যমাত্রত্বং তুল্যসহাযত্বং চ তত্র রসাদ্বিপাকো বলী, মাত্রাসহাযবৈষম্যে তু যো মাত্রাধিকঃ সহাযাধিকো বা স বলীত্যর্থঃ| এবং বীর্যাদিষ্বপি বাচ্যম্| সঙ্গ্রহে তু (সূ. অ. ১৭)- বিরুদ্ধা অপি চান্যোন্যং রসাদ্যাঃ কার্যসাধনে| নাবশ্যং স্যুর্বিঘাতায গুণদোষা মিথো যথা|| রসবীর্যপ্রভৃতযো ভূতোত্কর্ষাপকর্ষতঃ| একরূপা বিরূপা বা দ্রব্যং সমধিশেরতে| মাধুর্যশৈত্যপৈচ্ছিল্যস্নেহগৌরবমন্দতাঃ| সহ বৃত্ত্যা স্থিতাঃ ক্ষীরে ন ত্বানূপৌদকামিষে|| গুণা দ্রব্যেষু যে চোক্তাস্ত এব তনুদোষযোঃ| স্থিতিবৃদ্ধিক্ষযাস্তস্মাত্তেষাং হি দ্রব্যহেতুকাঃ| রসং বিদ্যান্নিপাতেন তেনাধিবসনেন চ| বীর্যং বিপাকং দ্রব্যাণাং কর্মণঃ পরিনিষ্ঠযা|| মধুরস্কন্ধনির্দ্দিষ্টঘৃততৈলগুডাদিষু| গুণাঽঽস্বাদ্বাদিভেদেন রসষট্কং ন যুজ্যতে|| অস্তু ভেদাদসহ্বযাত্বমৈক্যং বাঽঽস্বাদলক্ষণাত্| ভূতোত্কর্ষাপকর্ষেণ ভেদো যোঽল্পেন কল্প্যতে|| সঙ্কীর্ণত্বাত্ ফলে চাসৌ তুল্যত্বান্ন বিবিক্ষ্যতে| গুর্বাদীনাং বিশেষেঽপি স্বজাতেরনতিক্রমাত্|| সঙ্খ্যাভেদো যথা নাস্তি রসানামপি স ক্রমঃ| দৃষ্টং মুখোপলেপাদি যত্সর্বেষু ঘৃতাদিষু|| ন চ তদ্দাডিমাদ্যেষু ষডেবাতো রসাঃ স্মৃতাঃ| আনন্ত্যৈকত্বযোশ্চ স্যান্ন বিচিত্রার্থতন্ত্রণম্|| গুর্বাদ্যা বীর্যমুচ্যন্তে শক্তিমন্তোঽন্যথা গুণাঃ| পটুসামর্থ্যহীনত্বাদ্গুণা দ্বাদশ তে গুণাঃ||" ইতি|

সর্বাঙ্গসুন্দরী ব্যাখ্যা ( কৃত)

স০-দ্বযোর্দ্রব্যযো রসাদীনাং-রসবীর্যবিপাকানাং সাম্যে সতি, যদেকং দ্রব্যমন্যত্কর্ম কুরুতে, অন্যত্পুনরন্যদ্বিশিষ্টং কর্ম, তত্ প্রভাবজং-প্রভাবাজ্জাতমিতি জ্ঞেযম্| অযমস্য দ্রব্যস্য প্রভাব ইতি বিশিষ্টকর্মকরণান্নিশ্চীযত ইত্যর্থঃ| ননু, প্রভাবঃ ক উচ্যতে ? ইতি চেত্ ব্রূমঃ| রসবীর্যবিপাকাদিগুণাতিশাযী দ্রব্যস্য স্বভাবো যঃ, স প্রভাবঃ| উক্তং চ-"রসবীর্যবিপাকাদিগুণাতিশযবানলম্| দ্রব্যস্বভাবো নির্দিষ্টো যঃ প্রভাবঃ স কীর্তিতঃ||" ইতি| অত্র নিদর্শনার্থমাহ-

আযুর্বেদরসাযনম্ ব্যাখ্যা ( কৃত)

আ০ র০-অথ প্রভাবঃ| প্রভাবং লক্ষযতি-রসাদিসাম্য ইতি| দ্বযোর্দ্রব্যযো রসাদিসাম্যে সত্যপ্যেকস্য যদ্বিশিষ্টং কর্ম দৃশ্যতে, তত্প্রভাবজম্| তত্র যো দ্রব্যধর্মো হেতুঃ, স প্রভাব ইত্যর্থঃ|

সর্বাঙ্গসুন্দরী ব্যাখ্যা ( কৃত)

স০-চিত্রকস্য রসবীর্যবিপাকৈস্তুল্যাঽপি দন্তি রসাদিভ্যোঽতিশাযিদ্রব্যস্বভাবযোগাদ্বিরেচনী, ন চিত্রকঃ, চিত্রকত্বাত্| মধুকস্য চ মৃদ্বীকা তুল্যাঽপি রসাদিভ্যোঽতিশাযিদ্রব্যস্বভাবযোগাত্ মৃদ্বীকা বিরেচনী, ন মধুকম্| ঘৃতং ক্ষীরস্য রসাদিভিস্তুল্যমপি ঘৃতং দীপনম্, ন পুনঃ ক্ষীরম্| অন্যে প্রভাবলক্ষণমন্যথাঽঽহ-প্রতিবস্তু স্বসংজ্ঞাপ্রবৃত্তিনিমিত্তলক্ষণো যো ধর্মস্ত্বতলাদিপ্রত্যযপ্রতীতিসমধিগম্যঃ স প্রভাবঃ| তন্ত্রান্তরে চোক্তম্-"বস্তূনাং যঃ স্বসংজ্ঞাযাঃ প্রবৃত্তৌ কারণে স্মৃতঃ| ত্বতলাদিপ্রবোধ্যশ্চ প্রভাব ইতি স স্মৃতঃ||" ইতি| এবং চ দন্তীত্বাদ্দন্ত্যা বিরেচনকারিত্বং প্রভাবঃ, চিত্রকস্য চিত্রকত্বাদবিরেচনকারিত্বং প্রভাবঃ, এবং মৃদ্বীকাত্বান্মৃদ্বীকাযা বিরেচনকারিত্বং প্রভাবঃ, ইত্যাদি সকলপদার্থেষু বোধ্যম্| সামান্যবিশেষাভ্যাং যতঃ সকলং ব্যাপ্তম্, অতো গ্রন্থকার ইদমাহ-

আযুর্বেদরসাযনম্ ব্যাখ্যা ( কৃত)

আ০ র০-প্রভাবমুদাহরতি-দন্তীতি| রসাদয উক্তাশ্বরকেণ (সূ. অ. ২৬/৭০)- "কটুকঃ কটুকঃ পাকে বীর্যোষ্ণশ্চিত্রকো মতঃ| তদ্বদ্দন্তী প্রভাবাত্তু বিরেচযতি" সা নরম্||" ইতি| মধুমমৃদ্বীকযোঃ ক্ষীরঘৃতযোশ্চ মধুররসপাকত্বেন শীতবীর্যত্বেন চ সাম্যেঽপি মৃদ্বীকৈব বিরেচনী ন মধুকম্, ঘৃতমেব দীপনং ন ক্ষীরম্| সঙ্গ্রহে ত্বন্যদপ্যুদাহৃতম্ (সূ.অ. ১৭)-"কটুপাকরসস্নিগ্ধগুরুত্বৈঃ কফবাতজিত্| লশুনো বাতকফকৃন্ন তু তৈরেব যদ্গুণৈঃ|| মিথো বিরুদ্ধান্ বাতাদীন্ লোহিতাদ্যা জযন্তি যত্| কুর্বন্তি যবকাদ্যাশ্চ তত্প্রভাববিজৃম্ভিতম্|| শিরীষাদি বিষং হন্তি স্বপ্নাদ্যং তদ্বিবৃদ্ধযে| মণিমন্ত্রৌষধীনাং চ যত্কর্ম বিবিধাত্মকম্|| শল্যাকর্ষণপুংজন্মরক্ষার্যুধবশাদিকম্| দর্শনাদ্যৈরপি বিষং যন্নিযচ্ছতি চাগদঃ|| বিরেচযতি যদ্দৃষ্যমাশু শুক্রং করোতি বা| ঊর্ধ্বাধোভাগিকং যচ্চ দ্রব্যং যচ্ছমনাদিকম্|| মাত্রাদি প্রাপ্য তত্তচ্চ যত্প্রপঞ্চেন বর্ণিতম্| তচ্চ প্রভাবজং সর্বমতোঽচিন্ত্যঃ স উচ্যতে|| রসেন বীর্যেণ গুণৈশ্চকর্ম দ্রব্যং বিপাকেন চ যদ্বিদধ্যাত্| সদ্যোঽন্যথা তত্ কুরুতে প্রভাবাদ্ধেতোরতস্তস্য ন গোচরোঽস্তি||" ইতি|

সর্বাঙ্গসুন্দরী ব্যাখ্যা ( কৃত)

স০-ইতি-প্রকারে, অনেন প্রকারেণ দ্রব্যরসবীর্যাদীনাং সামান্যেন কর্ম ব্যাখ্যাতম্, ন বিশেষেণ| যৈরেব মহাভূতৈ রসবীর্যাদযো দ্রব্যাশ্রিতা আরব্ধাঃ, তৈরেব তথাভূতৈস্তদাশ্রযমপি দ্রব্যম্| অতঃ সামান্যতঃ কর্ম দ্রব্যাদীনামুক্তম্| সাম্প্রতং বিশিষ্টং কর্ম প্রতিদ্রব্যং বক্তুমিদমাহ-পুনশ্চ তদিতি| তত্-সামান্যোক্তং কর্ম দ্রব্যরসাদীনাং সম্বন্ধি, পুনর্ভিদ্যতে-বিশিষ্যতে| কেন ? ইত্যাহ-বিচিত্রেত্যাদি| বিচিত্রাশ্চ তে প্রত্যযাশ্চ বিচিত্রপ্রত্যযাঃ,-নানাকারসন্নিবেশবিশেষযুক্তানি মহাভূতানি, প্রতিসত্ত্বং প্রাক্তনশুভাশুভকর্মপ্রেরিতো বিচিত্রো মহাভূতপরিণাম ইত্যর্থঃ| বিচিত্রপ্রত্যযারব্ধং চ তদ্দ্রব্যং চ, তস্য ভেদো-বিশেষঃ, তেন বিচিত্রপ্রত্যযারব্ধদ্রব্যভেদেন, তত্-সামান্যোক্তং কর্ম দ্রব্যাদীনাং, ভিদ্যতে-নানাত্বেন সম্পদ্যতে| দ্রব্যাশ্রিতত্বাদ্রসাদীনামপি যত্কর্ম তদপি দ্রব্যভেদেন ভিদ্যতে| ননু, সর্বমপি দেশকালাদিবশাদ্বিচিত্রপ্রত্যযারব্ধম্, পরস্পরবৈলক্ষণ্যাদ্দ্রব্যাণাম্| পরস্পরবৈলক্ষণ্যে চৈষাং বিচিত্রপ্রত্যযারব্ধত্বমেব কারণম্| যদ্বশাদন্যদিদং দ্রব্যমিতি রূপরসবীর্যবিপাকাদিভিন্নমুত্পদ্যতে, তথা প্রতিভাসতে চ| তত্কিন্নু ? "বিচিত্রপ্রত্যযারব্ধদ্রব্যভেদেন ভিদ্যতে|" ইতি| অত্রাচক্ষ্মহে| সত্যমেতত্, কিন্তু বিশিষ্টদ্রব্যস্য সঙ্গ্রহার্থং বিচিত্রপ্রত্যযারব্ধমিতি বিশেষণং শাস্ত্রকৃতা কৃতম্| যস্য ভেদেন দ্রব্যে রসবীর্যাদীনাং যত্সামান্যোক্তং কর্ম তদ্ভিদ্যতে| যস্মিন্ দ্রব্যে রসাদীনামন্যানি মহাভূতান্যারম্ভকাণি দ্রব্যস্য চারম্ভকাণ্যপরাণি, তদ্দ্রব্যং বিচিত্রপ্রত্যযারব্ধম্| তদেবং দ্রব্যাণাং দ্বৈবিধ্যম্| যতঃ কানিচিদ্দ্রব্যাণি যৈরেব মহাভূতৈর্যথাবিধৈ রসাদয আরব্ধাঃ, তৈরেব তথাবিধৈর্মহাভূতৈস্তদাশ্রযাণ্যপি দ্রব্যাণ্যারব্ধানি| তানি রসাদিসমানপ্রত্যযারব্ধান্যুচ্যন্তে| তানি চ যথাযথং তত্কর্ম রসাদ্যনুগুণং সামান্যাত্ কুর্বতে| যথা,-ক্ষীরেক্ষুশর্করাদীনি| কানিচিত্পুনস্তদাশ্রিতরসাদিসমারম্ভকমহাভূতান্যন্যানি তদাশ্রযদ্রব্যারম্ভকাণ্যন্যানি চ মহাভূতানি, তৈরারব্ধানি তানি বিচিত্রপ্রত্যযারব্ধানি দ্রব্যাণি| এতদুক্তং ভবতি,-রসাদীনামারম্ভকাণ্যন্যানি দ্রব্যস্য চারম্ভকাণ্যন্যথাভূতানি মহাভূতানি, নোভযত্রৈকরূপাণীতি| তানি চ যথাযথং রসাদ্যনুগুণং কর্ম ন কুর্বন্তি, ভিন্নত্বাদ্ধেতুভাবস্য| তথা হি,-রসাদীনামারম্ভেঽন্যো হেতুরন্যশ্চ তদাশ্রযদ্রব্যারম্ভ ইতি| যথা,-মকুষ্ঠযবমত্স্যসিংহাদীনি| এতানি হি যথারসং ন বীর্যবিপাককর্ম কুর্বন্তি, বিচিত্রপ্রত্যযারব্ধত্বাত্| ইত্থং যানি রসাদিসমানপ্রত্যযারব্ধানি দ্রব্যাণি বহূন্যপি তেষাং রসোপদেশেন কর্ম নির্দেষ্টুং শক্যতে| অত এব হেতোঃ ষণ্ণাং রসানাং যো গুণনির্দেশঃ, তস্য সার্থকত্বম্| রসোপদেশমন্তরেণ হি বহুতরাণাং দ্রব্যাণাং সমানরূপাণাং ক্ষীরেক্ষ্বাদীনাং কর্ম বক্তুং সুখেন শক্যতে| যানি তু বিচিত্রপ্রত্যযারব্ধানি দ্রব্যাণি তেষাং প্রতিদ্রব্যং কর্মোপদেশং বিনা যথাযথং কর্ম বক্তুং ন শক্যতে|

আযুর্বেদরসাযনম্ ব্যাখ্যা ( কৃত)

আ০ র০-অধ্যাযার্থমুপসংহরতি-ইতি সামান্যত ইতি| দ্রব্যাদীনাং প্রভাবান্তানাম্| সামান্যোক্তং কর্মাপবদতি-পুনশ্ব তদিতি| তত্-সামান্যোক্তং কর্ম, ভিদ্যতে-বিশিষ্যতে, অন্যথা ক্রিযত ইত্যর্থঃ| কেন ? বিচিত্রপ্রত্যযারব্ধদ্রব্যভেদেন, বিচিত্রাঃ-পরস্পরবিলক্ষণাঃ, প্রত্যযাঃ-কারণভূতা মহাভূতসঙ্গাতাঃ, তৈরারব্ধং যদ্দ্দ্রব্যং তস্য ভেদো-দ্রব্যান্তরবিশিষ্টত্বম্, তেন| পার্থিবাদ্যবান্তরসামান্যভেদস্য পূর্বমুক্তত্বাত্ পুনস্তদিত্যুক্তম্| এতদুক্তং ভবতি,-ক্বচ্চিদ্দ্রব্যে যাদৃগেব ভূতসঙ্ঘাতো দ্রব্যস্যারম্ভকঃ, তদৃগেব রসাদীনাম্| তত্সমানপ্রত্যযারব্ধম্, তত্সামান্যগুণান্নাতিক্রামতি| ক্বচিদন্যাদৃগ্ভূতসঙ্ঘাতো দ্রব্যস্যারম্ভকোঽন্যাদৃগ্রসস্যান্যাদৃক্ গুণস্যেত্যাদি, তদ্বিচিত্রপ্রত্যযারব্ধম্, তত্সামান্যগুণানতিক্রামতি | তদর্থে দ্রবদ্রব্যান্নস্বরুপবিজ্ঞানীযাদ্যারম্ভঃ |

সর্বাঙ্গসুন্দরী ব্যাখ্যা ( কৃত)

স০-স্বাদুরসোপেতো গুরুগুণযুক্তক্তশ্চ গোধূমো মধুররসোপদিষ্টং বাতজিত্ত্বং যত্ কর্ম তত্ করোতি, সমানপ্রত্যযারব্ধত্বাত্| যবস্তু স্বাদুরসোপেতো গুরুগুণযুক্তক্তশ্চ গোধূমো মধুররসোপদিষ্টং যদ্বাতজিত্ত্বং কর্ম তন্ন করোতি, অপি তু বাতকৃত্ত্বমেব করোতি, বিচিত্রপ্রত্যযারব্ধত্বাত্| মত্স্যঃ স্বাদুরসোপেতো গুরুগুণোপেতশ্চ ন মধুররসোপদিষ্টঃ শীতবীর্যঃ, কিং তর্হি ? উষ্ণবীর্যঃ, বিচিত্রপ্রত্যযারব্ধত্বাত্| ক্ষীরং চ স্বাদুরসোপেতং গুরুগুণযুক্তং চ মধুররসোপদিষ্টং শীতবীর্যম্, সমানপ্রত্যযারব্ধত্বাত্| স্বাদুরসযুক্তো গুরুগুণযুক্তশ্চ সিংহো ন যথারসং মধুরবিপাকঃ, কিং তর্হি ? কটুকো বিপাকে, বিচিত্রপ্রত্যযারব্ধত্বাত্| শূকরো মধুররসযুক্তো গুরুগুণোপেতশ্চ যথারসং মধুরবিপাক এব, সমানপ্রত্যযারব্ধত্বাত্| এবং যানি সমানপ্রত্যযারব্ধানি দ্রব্যাণি তেষাং রসোপদেশেনৈব গুণা নির্দিষ্টা ভবন্তি| তথা চ মুনিঃ (চ. সূ. অ. ২৩|৪৮)- "শীতং বীর্যেণ যদ্দ্রব্যং মধুরং রসপাকযোঃ| তযোরম্লং যদুষ্ণং চ যচ্চোক্তং কটুকং তযোঃ|| তেষাং রসোপদেশেন নির্দিষ্টো গুণসঙ্গ্রহঃ| বীর্যতোঽবিপরীতানাং পাকতশ্চোপদেক্ষ্যতে|| যথা পযো যথা সর্পির্যথা বা চব্যচিত্রকৌ| এবমাদীনি চান্যানি নির্দিশেদ্রসতো ভিষক্||" ইতি| বাহুল্যেন চ রসাদিসমানপ্রত্যযারব্ধান্যেব দ্রব্যাণীতি চেতসি কৃত্বাঽঽচার্যোঽবোচত্| যথা (শ্লো.৪)- "গুর্বাদযো গুণা দ্রব্যে পৃথিব্যাদৌ রসাশ্রযে| রসেষু ব্যপদিশ্যন্তে সাহচর্যোপচারতঃ||" ইতি| অত এব চ বহুতরাণি দ্রব্যাণি রসাদিসমানপ্রত্যযারব্ধানি, অতো রসোপদেশব্যাপ্ত্যা তানি নির্দেষ্টুং শক্যন্তে, নান্যথা| বিচিত্রপ্রত্যযারব্ধানি পুনঃ কতিপযান্যেব দ্রব্যাণি, তানি প্রতিদ্রব্যমেবোপদিশ্যন্তে| মুনিনাঽপ্যযমর্থো যুক্ত্যবোক্তঃ| যথা (চ. সূ. অ. ২৩|৫৯)- "মধুরং কিঞ্চিদুষ্ণং স্যাত্কষাযং তিক্তমেব চ| যথা মহত্পঞ্চমূলং যথা চানূপমামিষম্|| লবণং সৈন্ধবং নোষ্ণমম্লমামলকং যথা| অর্কগুরুগুডূচীনাং তিক্তানাং চোষ্ণমুচ্যতে|| কিঞ্চিদম্লরসং গ্রাহি কিঞ্চিদম্ল ভিনত্তি চ| যথা কপিত্থং সঙ্গ্রাহি ভেদি চামলকং যথা|| পিপ্পলীনাগরং বৃষ্যং কটু চাবৃষ্যমুচ্যতে| কষাযঃ স্তম্ভনঃ শীতঃ সোঽভযাযা মতোঽন্যথা| তস্মাদ্রসোপদেশেন ন সর্বং দ্রব্যমাদিশেত্|" ইতি| যে চ রসসংযোগা বক্ষ্যমাণাস্তে রসাদিসমানপ্রত্যযারব্ধৈর্মধুরাম্ললবণতিক্তকটুকষাযরূপৈর্মিথঃ কল্পনীযাঃ, ন তু বিচিত্রপ্রত্যযারব্ধৈর্মধুরাম্ললবণতিক্তকটুকষাযরূপৈঃ| যস্মাত্তেষাং ন যথাশাস্ত্রনিরূপিতা রসবীর্যবিপাকাদযো বিদ্যন্তে, বিচিত্রপ্রত্যযারব্ধবাত্| [অতো রসোপদেশব্যাপ্ত্যা তৈর্দ্রব্যৈস্তে রসসংযোগাঃ কল্পযিতুং ন যুজ্যন্তে|] অযং রসসংযোগভেদ এবংগুণোঽযমেবংগুণঃ, এবংগুণত্বাচ্চামুষ্মিন্বিষযে যোজ্য এতস্মিন্বিষযে চাযমিতি নির্দেষ্টুং ন শক্যতে, অনির্জ্ঞাতস্বরূপত্বাত্| ন হি বিচিত্রপ্রত্যযারব্ধৈর্যে রসসংযোগাঃ ক্রিযন্তে, তেষাং স্বরূপং কথমপ্যবধারযিতুং শক্যতে| অপি চ, সমানপ্রত্যযারব্ধৈর্যে সংযোগাঃ কল্প্যন্তে, তেষাং সংযোগিনাং বীর্যতি যো বিরোধঃ শীতোষ্ণলক্ষণঃ, স ন দোষায| যে তু বিচিত্রপ্রত্যযারব্ধৈঃ সংযোগাঃ কল্প্যন্তে, তেষাং সংযোগিনাং যঃ শীতোষ্ণলক্ষণো বিরোধঃ, স দোষাযেতি বেদ্যম্| অন্যথা রসালাপানকাদীনামনেকদ্রব্যকৃতানামনভ্যবহার এব প্রাপ্নুযাত্| তথা, ত্রযস্ত্রিংশদ্বর্গা যে বক্ষ্যমাণাস্তেষু যদযৌগিকং তজ্জহ্যাত্ যৌগিকং ত্বনুক্তমপি যুঞ্জ্যাদিতি যদ্বক্ষ্যতে তত্র রসাদিসমানপ্রত্যযারব্ধমেব যোজ্যম্, ন বিচিত্রপ্রত্যযারব্ধম্| তস্য রসবীর্যবিপাকানাং নিশ্চযস্য কর্তুমশক্যত্বাত্| তস্মাদিত্যাদি| যত এবং বিচিত্রপ্রত্যযারব্ধং বিচিত্ররূপম্, তস্মাদ্রসোপদেশেন ন তত্সর্বং দ্রব্যমাদিশেত্, অপি তু রসাদিসমানপ্রত্যযারব্ধমেব দ্রব্যং রসোপদেশেন নির্দিশেদিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে দ্রব্যাদিবিজ্ঞানীযাধ্যাযো নবমঃ সমাপ্তঃ|| ৯||

আযুর্বেদরসাযনম্ ব্যাখ্যা ( কৃত)

আ০ র০-দ্রব্যভেদমুদাহরতি-স্বাদুরিতি| যবগোধূমযোর্মত্স্যপপযসোঃ সিংহশূকরযোশ্চ স্বাদুত্বগুরুত্বাভ্যাং তুল্যত্বেঽপি যবমত্স্যসিংহানাং বিচিত্রপ্রত্যযারব্ধত্বাত্ বাতল প্রভাবত্বোষ্ণবীর্যত্বকটুবিপাকিত্বানি স্বাদুত্বগুরুত্ববিপরীতানি| গোধূমপযঃশূকরাণাং তু সমানপ্রত্যযারব্ধত্বাত্ বাতঘ্নপ্রভবত্বশীতবীর্যত্বমধুরবিপাকিত্বানি স্বাদুত্বগুরুত্বযোরবিপরীতানি| বাতজিত্ত্ববাতকৃত্ত্বাভ্যাং তত্কারণভূতৌ প্রভাবৌ লক্ষ্যেতে| ইতি হেমাদ্রিটীকাযামাযুর্বেদরসাযনে| দ্রব্যাদীনাং প্রকরণং সামস্ত্যেন নিরূপিতম্|| ৯||